(1)

Ir-Regolament tal-Kummissjoni (UE) 2024/1487 (2) jistabbilixxi r-rekwiżiti tad-data għall-approvazzjoni tal-aġenti protettivi u sinerġisti, u jistabbilixxi programm ta’ ħidma għar-rieżami gradwali tal-aġenti protettivi u sinerġisti li diġà jinsabu fis-suq. Dan il-programm ta’ ħidma għandu l-għan li jippermetti li l-aġenti protettivi u sinerġisti kollha li diġà jinsabu fis-suq jiġu rieżaminati u approvati gradwalment f’konformità mar-Regolament (KE) Nru 1107/2009, fi żmien 5 snin mill-adozzjoni tiegħu.

(2)

F’konformità mal-Artikolu 3(1) tar-Regolament (UE) 2024/1487, il-Kummissjoni ppubblikat, b’mezzi elettroniċi, lista tas-sustanzi jew tal-preparazzjonijiet kollha magħrufa li jintużaw bħala aġenti protettivi jew sinerġisti fil-prodotti għall-protezzjoni tal-pjanti awtorizzat għat-tqegħid fis-suq f’mill-anqas Stat Membru wieħed fid-19 ta’ Ġunju 2024.

(3)

F’konformità mal-Artikolu 3(2) tar-Regolament (UE) 2024/1487, il-partijiet interessati ssottomettew notifiki lill-Kummissjoni ta’ aktar sustanzi jew preparazzjonijiet li potenzjalment intużaw bħala aġenti protettivi jew sinerġisti fil-prodotti għall-protezzjoni tal-pjanti fid-19 ta’ Ġunju 2024, u f’konformità mal-Artikolu 3(4) ta’ dak ir-Regolament, l-Istati Membri u l-Awtorità Ewropea dwar is-Sigurtà fl-Ikel (“l-Awtorità”) ipprovdew kummenti lill-Kummissjoni fir-rigward tan-notifiki li waslu.

(4)

F’konformità mal-Artikolu 3(5) tar-Regolament (UE) 2024/1487, il-Kummissjoni aġġornat il-lista msemmija fl-Artikolu 3(1), filwaqt li qieset in-notifiki sottomessi mill-partijiet interessati u l-kummenti pprovduti mill-Istati Membri u mill-Awtorità. Il-lista aġġornata tiżgura li l-aġenti protettivi u sinerġisti kollha użati fil-prodotti għall-protezzjoni tal-pjanti mid-19 ta’ Ġunju 2024 jiġu identifikati u kkunsidrati għall-inklużjoni fil-programm ta’ ħidma.

(5)

F’konformità mal-Artikolu 4 tar-Regolament (UE) 2024/1487, il-partijiet interessati talbu l-inklużjoni tas-sustanzi elenkati fl-Anness ta’ dan ir-Regolament fil-programm ta’ ħidma għar-rieżami gradwali.

(6)

Il-Kummissjoni vvalutat in-notifiki sottomessi mill-partijiet interessati u l-kummenti pprovduti mill-Istati Membri u mill-Awtorità skont l-Artikolu 3 tar-Regolament (UE) 2024/1487 u t-talbiet għall-inklużjoni sottomessi mill-partijiet interessati skont l-Artikolu 4 ta’ dak ir-Regolament. Dik il-valutazzjoni identifikat l-aġenti protettivi u sinerġisti eliġibbli għall-inklużjoni fil-programm ta’ ħidma.

(7)

Skont l-Artikolu 6(2) tar-Regolament (UE) 2024/1487, il-Kummissjoni għandha tadotta l-programm ta’ ħidma billi temenda l-Anness I ta’ dan ir-Regolament, tispeċifika l-aġenti protettivi u sinerġisti inklużi fil-programm ta’ ħidma u taħtar għal kull wieħed minnhom Stat Membru relatur u Stat Membru korelatur.

(8)

Għalhekk, jenħtieġ li r-Regolament (UE) 2024/1487 jiġi emendat kif xieraq.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,