(1)

It-titjib tas-sikurezza fit-toroq huwa objettiv primarju tal-politika tat-trasport tal-Unjoni. Fil-Qafas ta' Politika tal-UE dwar is-Sikurezza fit-Toroq 2021-2030 tagħha, il-Kummissjoni impenjat ruħha mill-ġdid għall-għan ambizzjuż li sal-2050 tersaq aktar qrib imwiet żero u korrimenti serji żero fit-toroq tal-Unjoni (“Viżjoni Żero”), kif ukoll għall-mira li fuq perjodu medju tnaqqas l-imwiet u l-korrimenti serji b'50 % sal-2030.

(2)

Biex jintlaħaq l-għan li tittejjeb is-sikurezza fit-toroq, il-Ministri għat-Trasport tal-Istati Membri, fid-Dikjarazzjoni tal-Belt Valletta dwar is-Sikurezza fit-Toroq tad-29 ta' Marzu 2017, appellaw biex jissaħħaħ il-qafas ġuridiku tal-Unjoni dwar is-sikurezza fit-toroq, b'enfasi partikolari fuq il-ħtieġa li l-Istati Membri jikkooperaw fil-kwistjoni tal-iskwalifiki mis-sewqan tas-sewwieqa mhux residenti.

(3)

Minħabba l-moviment liberu tal-persuni u l-livell li qed jiżdied ta' traffiku fit-toroq madwar id-dinja, spiss jiġu imposti skwalifiki mis-sewqan minn Stat Membru li ma jkunx dak fejn normalment ikun residenti s-sewwieq jew li jkun ħariġlu l-liċenzja tas-sewqan.

(4)

Bħalissa, Stat Membru li ma jkunx dak fejn normalment ikun residenti s-sewwieq jew li ma jkunx l-Istat Membru li ħareġ il-liċenzja tas-sewqan (l-“Istat Membru tal-ħruġ”) jista' jieħu miżuri, f'konformità mal-liġi nazzjonali tiegħu, b'reazzjoni għal imġiba illegali fit-territorju tiegħu mid-detentur ta' liċenzja tas-sewqan miksuba fi Stat Membru ieħor. Dawn il-miżuri jirriżultaw f'rifjuti tar-rikonoxximent tal-validità tal-liċenzji tas-sewqan maħruġa minn Stati Membri oħra u, għalhekk, f'restrizzjoni tad-dritt tas-sewqan tal-persuna kkonċernata. Madankollu, il-kamp ta' applikazzjoni ta' tali miżuri jkun limitat għat-territorju tal-Istat Membru fejn tkun saret l-imġiba illegali, u l-effett tagħhom ikun limitat għar-rifjut tar-rikonoxximent tal-validità ta' dik il-liċenzja tas-sewqan f'dak it-territorju. Għaldaqstant, fin-nuqqas ta' azzjoni mill-Istat Membru tal-ħruġ, dik il-liċenzja tas-sewqan tibqa' rikonoxxuta fil-bqija tal-Istati Membri. Dan ix-xenarju jżomm milli jinkiseb livell ogħla ta' sikurezza fit-toroq fl-Unjoni. Jenħtieġ li s-sewwieqa skwalifikati mis-sewqan fi Stat Membru li ma jkunx l-Istat Membru tal-ħruġ ma jaħarbux l-effetti ta' dik il-miżura meta jkunu jinsabu fi Stat Membru li ma jkunx l-Istat Membru fejn twettaq ir-reat (l-“Istat Membru fejn isir ir-reat”).

(5)

Biex jiġi żgurat livell għoli ta' protezzjoni għall-utenti kollha tat-toroq fl-Unjoni, jeħtieġ jiġu stabbiliti regoli speċifiċi għall-implimentazzjoni tal-iskwalifiki mis-sewqan imposti minn Stat Membru li ma jkunx dak li ħareġ il-liċenzja tas-sewqan tal-persuna soġġetta għal skwalifika mis-sewqan, meta tali skwalifiki mis-sewqan jirriżultaw minn reati li jwasslu għal skwalifika mis-sewqan fil-kamp ta' applikazzjoni ta' din id-Direttiva.

(6)

Madankollu, jenħtieġ li l-implimentazzjoni ta' din id-Direttiva ma tirrikjedix l-armonizzazzjoni tad-dispożizzjonijiet tal-liġi nazzjonali dwar id-definizzjoni ta' reati tat-traffiku fit-toroq, in-natura legali tagħhom u l-miżuri possibbli li jirriżultaw minn tali reati. B'mod partikolari, jenħtieġ li ssir l-implimentazzjoni tal-iskwalifiki mis-sewqan fl-Istat Membru tal-ħruġ irrispettivament minn jekk l-Istat Membru fejn isir ir-reat jikkwalifikax il-miżuri nazzjonali bħala amministrattivi jew kriminali. F'konformità mal-prinċipju ta’ awtonomija proċedurali, jenħtieġ li l-Istati Membri jistabbilixxu l-proċeduri interni tagħhom, fil-limiti tal-liġi nazzjonali tagħhom, biex jiksbu l-aktar implimentazzjoni ta’ malajr u effiċjenti ta' din id-Direttiva.

(7)

Jenħtieġ li din id-Direttiva tkun mingħajr preġudizzju għar-regoli dwar il-kooperazzjoni mill-pulizija u ġudizzjarja f'materji kriminali, kif ukoll dawk dwar ir-rikonoxximent reċiproku tad-deċiżjonijiet ġudizzjarji relatati. Barra minn hekk, jenħtieġ li din ma taffettwax il-possibbiltà li l-awtoritajiet ġudizzjarji tal-Istati Membri jeżegwixxu deċiżjonijiet maħruġa minnhom, b'mod partikolari deċiżjonijiet ta' natura kriminali. B'mod partikolari, jenħtieġ li din id-Direttiva ma taffettwax id-drittijiet u l-obbligi li jirriżultaw mid-Deċiżjonijiet Qafas tal-Kunsill 2005/214/ĠAI (3) u 2008/947/ĠAI (4), jew id-drittijiet tal-persuni suspettati u akkużati kif previsti fid-Direttivi 2010/64/UE (5), 2012/13/UE (6), 2013/48/UE (7), (UE) 2016/343 (8), (UE) 2016/800 (9) u (UE) 2016/1919 (10) tal-Parlament Ewropew u tal-Kunsill.

(8)

L-għan ta' din id-Direttiva huwa li tippermetti lill-Unjoni tilħaq l-għan li ttejjeb is-sikurezza fit-toroq fl-Unjoni kollha. Kif sostniet il-Qorti tal-Ġustizzja fil-Kawża C-43/12 (11), il-miżuri maħsuba biex itejbu s-sikurezza fit-toroq jiffurmaw parti mill-politika tat-trasport u jistgħu jiġu adottati abbażi tal-Artikolu 91(1), il-punt (c), tat-Trattat dwar il-Funzjonament tal-Unjoni Ewropea (TFUE), dment li jkunu “miżuri biex titjieb is-sikurezza tat-trasport” skont it-tifsira ta' dik id-dispożizzjoni.

(9)

L-iskwalifiki mis-sewqan li jirriżultaw minn reati li jwasslu għal skwalifika mis-sewqan fil-kamp ta' applikazzjoni ta' din id-Direttiva jistgħu jikkonsistu fl-irtirar, is-sospensjoni jew ir-restrizzjoni tad-dritt tas-sewqan, tal-liċenzja tas-sewqan jew tar-rikonoxximent tal-validità ta' dik il-liċenzja tas-sewqan. Għalhekk, l-implimentazzjoni ta' tali skwalifiki mis-sewqan jenħtieġ li tinkiseb fl-Unjoni permezz tal-applikazzjoni ta' tali rtirar, restrizzjonijiet jew sospensjonijiet mill-Istat Membru li jkun ħareġ il-liċenzja tas-sewqan.

(10)

Madankollu, it-twettiq ta' reat mhuwiex l-unika ċirkustanza li tista' twassal għal irtirar, sospensjoni jew restrizzjoni tad-dritt għas-sewqan, ta’ liċenzja tas-sewqan jew tar-rikonoxximent tal-validità ta' liċenzja tas-sewqan. Ċirkustanzi oħra, bħan-nuqqas ta' ssodisfar tal-istandards minimi stabbiliti fl-Anness III tad-Direttiva (UE) 2025/2205 tal-Parlament Ewropew u tal-Kunsill (12), jistgħu jwasslu wkoll għal tali irtirar, sospensjoni jew restrizzjoni. Peress li d-Direttiva (UE) 2025/2205 tirregola tali standards minimi, id-definizzjonijiet relatati ma' dawk it-termini jenħtieġ li jiċċaraw li dawn ikopru l-każijiet kollha li jirriżultaw f’tali irtirar, sospensjoni jew restrizzjoni, u mhux biss dawk li jirriżultaw mit-twettiq ta' reat.

(11)

Billi s-sewqan taħt l-influwenza tax-xorb, li jfisser sewqan waqt li s-sewwieq ma jkunx kompletament f'sensih minħabba l-alkoħol, kif definit fil-liġi tal-Istat Membru fejn isir ir-reat, is-sewqan taħt l-influwenza tad-drogi u s-sewqan b'veloċità eċċessiva, li jfisser meta jinqabżu l-limiti tal-veloċità fis-seħħ fl-Istat Membru fejn isir ir-reat għat-triq ikkonċernata jew għat-tip ta' vettura kkonċernat, jikkostitwixxu l-kawżi ewlenin ta' ħabtiet u fatalitajiet tat-traffiku fit-toroq fl-Unjoni, jenħtieġ li tiġi applikata l-ogħla diliġenza possibbli għall-każijiet relatati ma' tali reati, li jenħtieġ li jitqiesu bħala reati li jwasslu għal skwalifika mis-sewqan għall-finijiet ta' din id-Direttiva. Barra minn hekk, minħabba n-natura serja tagħhom, jenħtieġ li anke r-reati tat-traffiku fit-toroq li jirriżultaw f'mewt jew korriment gravi ta' vittma jitqiesu bħala reati li jwasslu għal skwalifika mis-sewqan fil-kamp ta' applikazzjoni ta' din id-Direttiva. Jenħtieġ li l-impożizzjoni ta’ skwalifika mis-sewqan tirrikjedi l-identifikazzjoni preċiża tas-sewwieq li jkun wettaq reat li jwassal għal skwalifika mis-sewqan u jenħtieġ li ma tiġix deċiża abbażi ta' responsabbiltà oġġettiva, bħal li tkun sid il-vettura.

(12)

Jenħtieġ li l-iskwalifiki mis-sewqan jiġu nnotifikati lill-Istat Membru tal-ħruġ f'konformità ma' din id-Direttiva biss jekk ikunu ġew imposti minħabba t-twettiq ta' reat li jwassal għal skwalifika mis-sewqan kif definit minn din id-Direttiva.

(13)

Jenħtieġ li l-iskwalifiki mis-sewqan imposti minn Stat Membru fuq persuna li jkollha liċenzja tas-sewqan maħruġa minn Stat Membru ieħor isiru effettivi fit-territorju sħiħ tal-Unjoni, f'termini simili għall-iskwalifiki mis-sewqan imposti fuq persuni li jkollhom liċenzji tas-sewqan maħruġa mill-Istat Membru li jimponi l-iskwalifika mis-sewqan. Barra minn hekk, fid-dawl tal-prinċipju ta’ awtonomija proċedurali, l-Istati Membri jenħtieġ li jkunu liberi li jiddeċiedu kif l-aħjar jiksbu dak ir-riżultat f'konformità mal-liġi nazzjonali tagħhom.

(14)

Jenħtieġ li l-Istat Membru fejn isir ir-reat jinnotifika mingħajr dewmien bla bżonn lill-Istat Membru tal-ħruġ dwar kwalunkwe skwalifika mis-sewqan fil-kamp ta' applikazzjoni ta' din id-Direttiva imposta għal durata ta' mill-inqas tliet xhur u li għaliha, fil-mument tan-notifika, il-perjodu ta' sospensjoni jew restrizzjoni li jifdal li jiġi servut skont dik l-iskwalifika tas-sewqan ikun ta’ aktar minn xahar, sabiex jiskattaw il-proċeduri meħtieġa sabiex tiġi żgurata l-implimentazzjoni tal-iskwalifika mis-sewqan fl-Istat Membru tal-ħruġ. Jenħtieġ li din in-notifika tintbagħat f'forma elettronika permezz ta' ċertifikat standard għan-notifika ta' skwalifika mis-sewqan (iċ-“ċertifikat standard ta' skwalifika mis-sewqan”), biex jiġi żgurat skambju ta' informazzjoni mingħajr xkiel, affidabbli u effettiv bejn l-Istati Membri.

(15)

Jenħtieġ li ċ-ċertifikat standard ta' skwalifika mis-sewqan ikun fih ġabra minima ta' data li tippermetti l-implimentazzjoni xierqa ta' din id-Direttiva, u b'mod partikolari jenħtieġ li jinkludi d-dettalji tal-awtorità tal-Istat Membru fejn isir ir-reat li imponiet l-iskwalifika mis-sewqan, ir-reat imwettaq li jwassal għal skwalifika mis-sewqan, l-iskwalifika mis-sewqan li tirriżulta u l-persuna soġġetta għall-iskwalifika mis-sewqan. Għal dak il-għan, jenħtieġ li l-Kummissjoni taġġorna l-kodiċijiet inklużi fl-Anness I, Parti E, tad-Direttiva (UE) 2025/2205 skont att delegat taħt din id-Direttiva, sabiex dawn il-kodiċijiet ikunu disponibbli ferm qabel id-data finali tat-traspożizzjoni ta' din id-Direttiva. L-użu taċ-ċertifikat standard ta' skwalifika mis-sewqan ser jiggarantixxi skambju ta’ informazzjoni effettiva bla ma jobbliga lill-Istati Membri jikkondividu ammont sproporzjonat jew eċċessiv ta' informazzjoni.

(16)

Iċ-ċertifikat standard ta' skwalifika mis-sewqan jenħtieġ li jiġi tradott ukoll fi kwalunkwe lingwa uffiċjali tal-istituzzjonijiet tal-Unjoni li tkun lingwa uffiċjali tal-Istat Membru tal-ħruġ jew fi kwalunkwe lingwa oħra tal-istituzzjonijiet tal-Unjoni li l-Istat Membru tal-ħruġ ikun aċċetta, biex jiġi żgurat ipproċessar malajr mid-destinatarju.

(17)

L-impożizzjoni tal-iskwalifiki mis-sewqan b'reazzjoni għal imġiba illegali tikkontribwixxi biex jiġi garantit livell għoli ta' sikurezza fit-toroq fl-Unjoni. Abbażi tal-prinċipju tar-rikonoxximent reċiproku tal-liċenzji tas-sewqan maħruġa fl-Istati Membri, jenħtieġ li jkun possibbli li l-miżuri li jikkonċernaw l-irtirar, is-sospensjoni jew ir-restrizzjoni ta' liċenzja tas-sewqan maħruġa mill-Istat Membru tal-ħruġ jiġu infurzati awtomatikament mill-Istati Membri l-oħra kollha, billi l-persuna soġġetta għal skwalifika mis-sewqan ma tkunx tista' tippreżenta dokument validu biex tivverifika d-dritt tas-sewqan tagħha. Għalhekk, malli jiġi nnotifikat bl-iskwalifika mis-sewqan imposta, u dment li ma tkunx tapplika jew tiġi invokata raġuni għal eżenzjoni, jenħtieġ li l-Istat Membru tal-ħruġ jieħu l-miżuri xierqa biex jimplimenta l-iskwalifika mis-sewqan.

(18)

Jenħtieġ li l-miżura li tittieħed mill-Istat Membru tal-ħruġ tvarja skont in-natura speċifika tal-iskwalifika mis-sewqan. Billi l-irtirar, is-sospensjonijiet jew ir-restrizzjonijiet neċessarjament ikollhom konsegwenzi differenti, dawn jeħtieġu l-implimentazzjoni ta' proċeduri differenti f'konformità mal-kompetenzi tal-Istati Membri involuti. Fir-rigward tal-irtirar, il-persuna soġġetta għal skwalifika mis-sewqan jenħtieġ li tkun tista' tirkupra l-liċenzja tas-sewqan tagħha jew li tapplika għal liċenzja tas-sewqan ġdida f'konformità mad-Direttiva (UE) 2025/2205. Meta l-Istat Membru tal-ħruġ ma jipprevedix il-possibbiltà ta' rtirar, jenħtieġ li l-Istat Membru tal-ħruġ jissospendi l-liċenzja tas-sewqan, jivvaluta l-idoneità jew il-kompetenza biex isuq tad-detentur ta' dik il-liċenzja tas-sewqan u jieħu kwalunkwe miżura meqjusa xierqa wara dik il-valutazzjoni. Fir-rigward ta’sospensjoni jew ir-restrizzjoni, jenħtieġ li jiġi żgurat li tiġi implimentata d-durata ta’ tali miżuri biss, anke meta l-iskwalifika mis-sewqan tipprevedi kundizzjonijiet komplementari, minħabba li l-għan primarju ta’ dik is-sospensjoni jew restrizzjoni huwa li temporanjament jew parzjalment twaqqaf lill-persuna soġġetta għall-iskwalifika mis-sewqan milli ssuq u mhux li tiddetermina kif jenħtieġ li dik il-persuna tirkupra l-liċenzja tas-sewqan tagħha. Madankollu, jenħtieġ li dan ikun mingħajr preġudizzju għad-dritt li jiġi vvalutat jekk il-persuna soġġetta għall-iskwalifika mis-sewqan tippreżentax riskju għas-sikurezza fit-toroq u li jiġu adottati miżuri li jirriflettu din il-valutazzjoni.

(19)

Jenħtieġ li l-Istat Membru tal-ħruġ ikollu l-għan li, fil-limiti legali eżistenti tal-liġi nazzjonali, jiżgura li l-miżuri meħuda fir-rigward tal-iskwalifiki mis-sewqan jikkorrispondu kemm jista' jkun għall-miżuri imposti mill-Istat Membru fejn isir ir-reat.

(20)

Meta Stat Membru fejn isir ir-reat jimponi skwalifika mis-sewqan fuq persuna li jkollha r-residenza normali tagħha f'dak l-Istat Membru iżda jkollha liċenzja tas-sewqan maħruġa minn Stat Membru ieħor, l-Istat Membru fejn isir ir-reat ikun intitolat jiskambja l-liċenzja tas-sewqan biex japplika dik l-iskwalifika mis-sewqan. Fejn Stat Membru fejn isir ir-reat jirtira l-liċenzja tas-sewqan ta' persuna li jkollha residenza normali tagħha fi Stat Membru li ma jkunx l-Istat Membru tal-ħruġ, jenħtieġ li l-Istat Membru tar-residenza normali jkun responsabbli għall-ħruġ ta' liċenzja tas-sewqan ġdida, filwaqt li jqis l-informazzjoni magħmula disponibbli mill-Istat Membru tal-ħruġ fin-network tal-liċenzji tas-sewqan tal-UE, imsemmi fl-Artikolu 15(1) tad-Direttiva 2006/126/KE tal-Parlament Ewropew u tal-Kunsill (13).

(21)

Jenħtieġ li l-Istat Membru fejn isir ir-reat, f'konformità mal-liġi nazzjonali tiegħu u b'effetti limitati għat-territorju tiegħu, ikun jista' jkompli japplika l-iskwalifiki mis-sewqan u kwalunkwe kundizzjoni komplementari relatata sakemm il-persuna soġġetta għall-iskwalifika mis-sewqan tikkonforma magħhom. Barra minn hekk, jenħtieġ li l-Istat Membru fejn isir ir-reat ikun jista' jimponi rekwiżiti dwar l-iskadenza ta' perjodu ta' żmien fiss, bħal perjodu li fih is-sewwieq soġġett għall-iskwalifika mis-sewqan huwa projbit milli jirkupra l-liċenzja tas-sewqan eżistenti jew milli japplika għal-liċenzja tas-sewqan ġdida (“perjodu ta' projbizzjoni”), u jenħtieġ li tali rekwiżiti ma jitqisux bħala kundizzjonijiet komplementari skont it-tifsira ta' din id-Direttiva. Matul dan il-perjodu ta' projbizzjoni, jenħtieġ li jkun possibbli li l-Istat Membru fejn isir ir-reat jiddeċiedi li ma jirrikonoxxix il-validità ta' liċenzja tas-sewqan li tkun ġiet irkuprata jew ta' liċenzja tas-sewqan ġdida li tkun inkisbet fl-Istat Membru tal-ħruġ. Madankollu, wara li jiskadi tali perjodu ta' projbizzjoni, jenħtieġ li l-validità ta' liċenzja tas-sewqan maħruġa mill-Istat Membru tal-ħruġ tiġi rikonoxxuta mill-Istat Membru fejn isir ir-reat, irrispettivament minn jekk tkunx inħarġet matul tali perjodu ta’ projbizzjoni.

(22)

Jenħtieġ li din id-Direttiva tkun mingħajr preġudizzju għad-dispożizzjonijiet tad-Direttiva (UE) 2025/2205 li jiddikjaraw li jenħtieġ li liċenzja tas-sewqan titqies bħala kkanċellata, irtirata, sospiża jew ristretta sa meta l-persuna soġġetta għal skwalifika mis-sewqan tkun issodisfat kwalunkwe kundizzjoni, imposta mill-Istat Membru tal-ħruġ, li dik il-persuna tkun meħtieġa tikkonforma magħha sabiex tkun tista' tirkupra l-liċenzja tas-sewqan jew tapplika għal waħda ġdida. F'każ li liċenzja tas-sewqan tinħareġ bi żball lil applikant li jkun għadu ma ssodisfax kwalunkwe kundizzjoni bħal din, jenħtieġ li l-Istati Membri jkunu jistgħu jirrifjutaw li jirrikonoxxuha, anke wara tmiem il-perjodu ta' projbizzjoni.

(23)

Meta l-Istat Membru tal-ħruġ ikun adotta miżuri biex jimplimenta l-iskwalifika mis-sewqan u sussegwentement ikun ivvaluta mill-ġdid jekk ikunx xieraq li l-persuna soġġetta għal skwalifika mis-sewqan tirkupra l-liċenzja tas-sewqan tagħha, jenħtieġ li dik il-valutazzjoni tiġi rikonoxxuta fl-Unjoni kollha u għalhekk anke fl-Istat Membru fejn isir ir-reat, dment li jkun għadda l-perjodu ta' żmien fiss impost mill-Istat Membru fejn isir ir-reat bħala parti mill-iskwalifika mis-sewqan.

(24)

Jenħtieġ li l-applikazzjoni tal-miżuri mill-Istat Membru tal-ħruġ isservi biex jiġi żgurat li skwalifika mis-sewqan tiġi implimentata u jenħtieġ li din ma tkunx tirrikjedi valutazzjoni ġdida tal-fatti li jwasslu għall-iskwalifika mis-sewqan.

(25)

Sabiex jiġi garantit li l-implimentazzjoni ta' skwalifika mis-sewqan ma tmurx kontra l-prinċipju ta’ proporzjonalità, id-drittijiet fundamentali jew l-eċċezzjonijiet previsti fil-liġi tal-Istat Membru tal-ħruġ, huwa xieraq li jiġu stabbiliti ċerti raġunijiet li jeżentaw lill-Istat Membru tal-ħruġ mill-obbligu li jadotta l-miżuri. Fir-rigward ta' raġunijiet għal eżenzjoni li mhumiex obbligatorji, jenħtieġ li l-Istati Membri jkunu jistgħu jiddeċiedu li tali raġunijiet għandhom jiġu vvalutati b'mod sistematiku mill-awtorità kompetenti jew għandhom jiġu vvalutati biss jekk ikun hemm raġuni sostanzjali biex wieħed jemmen li japplikaw tali raġunijiet. Fil-każijiet kollha, jenħtieġ li l-persuna soġġetta għall-iskwalifika mis-sewqan ikollha l-possibbiltà li tfittex rimedju legali fir-rigward tal-valutazzjoni u l-applikazzjoni tar-raġunijiet għal eżenzjoni mill-Istat Membru tal-ħruġ, f'konformità mal-liġi ta' dak l-Istat Membru.

(26)

Barra minn hekk, id-diġitalizzazzjoni tar-regoli tat-traffiku fit-toroq tappoġġa s-servizzi ta' informazzjoni dwar it-traffiku f'ħin reali, tiffaċilita l-imġiba legali u tippermetti lis-sewwieqa jirrispettaw ir-regolamenti tat-traffiku nazzjonali, inkluż meta jsuqu barra mill-pajjiż. Id-Direttiva 2010/40/UE tal-Parlament Ewropew u tal-Kunsill (14) tirrikjedi li l-Istati Membri jiżguraw li d-data statika u dinamika fir-rigward tal-limiti tal-veloċità applikabbli għan-network trans-Ewropew komprensiv għat-toroq, awtostradi u sezzjonijiet oħra ta' toroq primarji, kif ukoll għall-bliet fiċ-ċentru tan-nodi urbani, taħt ċerti kundizzjonijiet, tkun disponibbli u aċċessibbli permezz ta' punti ta' aċċess nazzjonali sal-31 ta' Diċembru 2028. Id-Direttiva 2010/40/UE tħeġġeġ ukoll lill-Istati Membri biex jagħmlu d-data dwar il-limiti tal-veloċità aċċessibbli għal partijiet oħra tan-network tat-toroq tagħhom. Fiha klawsola ta' rieżami, li abbażi tagħha l-Kummissjoni għandha tirrieżamina l-progress li jkun sar fir-rigward tad-disponibbiltà u l-aċċessibbiltà tad-data, fost l-oħrajn, u tipproponi, fejn xieraq, li sal-31 ta' Diċembru 2028 tadatta l-kopertura ġeografika ta' ċerti tipi ta' data meqjusa kruċjali.

(27)

Fl-interess tas-sikurezza fit-toroq u sabiex tiġi pprovduta ċertezza legali lill-persuna soġġetta għal skwalifika mis-sewqan u lill-Istat Membru fejn isir ir-reat, jenħtieġ li l-Istat Membru tal-ħruġ jimplimenta l-iskwalifika mis-sewqan jew japplika raġuni għal eżenzjoni mingħajr dewmien mhux iġġustifikat, u fi kwalunkwe każ fil-limiti ta' żmien, jekk ikun hemm, stabbiliti fid-dispożizzjonijiet tal-liġi nazzjonali rigward l-impożizzjoni ta' skwalifika mis-sewqan. Jenħtieġ li l-Istat Membru tal-ħruġ jinforma lill-Istat Membru fejn isir ir-reat dwar kwalunkwe dewmien.

(28)

L-implimentazzjoni xierqa ta' din id-Direttiva tippresupponi komunikazzjoni mill-qrib, rapida u effettiva bejn l-awtoritajiet nazzjonali kompetenti involuti. Jenħtieġ li l-komunikazzjonijiet kollha bejn l-Istat Membru fejn isir ir-reat u l-Istat Membru tal-ħruġ għall-fini tal-implimentazzjoni ta' skwalifika mis-sewqan isiru permezz tan-network tal-liċenzji tas-sewqan tal-UE msemmi fl-Artikolu 15(1) tad-Direttiva 2006/126/KE u jenħtieġ li l-Kummissjoni tiżgura li dak in-network ikun mgħammar bir-riżorsi meħtieġa biex iwettaq dak il-kompitu. Barra minn hekk, f'każijiet speċifiċi definiti sew, jenħtieġ li kemm l-Istat Membru tal-ħruġ kif ukoll l-Istat Membru fejn isir ir-reat jiskambjaw mingħajr dewmien informazzjoni importanti fir-rigward tal-applikazzjoni ta' din id-Direttiva. Jenħtieġ li l-awtoritajiet nazzjonali kompetenti tal-Istati Membri jikkonsultaw lil xulxin kull meta jkun meħtieġ għall-implimentazzjoni ta' din id-Direttiva, inkluż fir-rigward ta': l-adozzjoni ta' miżuri li jimplimentaw l-iskwalifiki mis-sewqan; deċiżjonijiet meħuda għal raġunijiet ta' eżenzjoni; it-tlestija tal-iskwalifiki mis-sewqan; u kwalunkwe ċirkostanza li taffettwa l-iskwalifiki mis-sewqan imposti oriġinarjament, bħar-rieżami mill-awtoritajiet nazzjonali tal-iskwalifika mis-sewqan oriġinarjament imposta mill-Istat Membru fejn isir ir-reat jew l-issodisfar tal-kundizzjonijiet komplementari mill-persuna soġġetta għall-iskwalifika mis-sewqan fl-Istat Membru fejn isir ir-reat.

(29)

Jenħtieġ li l-Istat Membru tal-ħruġ jinforma lill-persuna soġġetta għal skwalifika mis-sewqan imposta mill-Istat Membru fejn isir ir-reat, sa fejn ikun possibbli, mhux aktar tard minn 20 jum tax-xogħol wara li jirċievi n-notifika tal-iskwalifika mis-sewqan imposta f'konformità mal-proċeduri skont il-liġi nazzjonali tiegħu.

(30)

Wara li jimplimenta l-iskwalifika mis-sewqan, jenħtieġ li l-Istat Membru tal-ħruġ jinforma lill-persuna soġġetta għall-iskwalifika mis-sewqan, sal-iskadenzi stabbiliti għan-notifika ta' deċiżjonijiet simili skont il-liġi nazzjonali tiegħu, bl-adozzjoni tal-miżuri meħuda biex tiġi implimentata dik l-iskwalifika mis-sewqan, b'mod partikolari sabiex ikunu jistgħu jiġu eżerċitati d-drittijiet fundamentali.

(31)

Jenħtieġ li l-Istati Membri jiżguraw li jkunu disponibbli rimedji legali adegwati fir-rigward tal-miżuri meħuda skont din id-Direttiva, u li l-informazzjoni dwar tali rimedji tiġi pprovduta fi żmien debitu biex jiġi żgurat li dawn ikunu jistgħu jiġu eżerċitati b'mod effettiv. Madankollu, jenħtieġ li ma jkunx possibbli li l-iskwalifika mis-sewqan imposta mill-Istat Membru fejn isir ir-reat tiġi kkontestata b'azzjoni mressqa fl-Istat Membru tal-ħruġ.

(32)

Il-protezzjoni tal-persuni fiżiċi b'rabta mal-ipproċessar tad-data personali tagħhom hija dritt fundamentali. F'konformità mal-Artikolu 8(1) tal-Karta tad-Drittijiet Fundamentali tal-Unjoni Ewropea u l-Artikolu 16(1) TFUE, l-individwi għandhom id-dritt għall-protezzjoni tad-data personali relatata magħhom. L-atti rilevanti leġiżlattivi tal-Unjoni, jiġifieri r-Regolament (UE) 2016/679 tal-Parlament Ewropew u tal-Kunsill (15) u d-Direttiva (UE) 2016/680 tal-Parlament Ewropew u tal-Kunsill (16), jenħtieġ li japplikaw għall-ipproċessar tad-data personali fil-kuntest ta' din id-Direttiva f'konformità mal-kamp ta' applikazzjoni rispettiv tagħhom.

(33)

Din id-Direttiva tistabbilixxi l-bażi legali għall-iskambju tad-data personali għall-fini tal-implimentazzjoni tal-iskwalifiki mis-sewqan imposti minn Stat Membru li ma jkunx l-Istat Membru tal-ħruġ. Dik il-bażi legali hija konformi mar-Regolament (UE) 2016/679 u mad-Direttiva (UE) 2016/680. Jenħtieġ li d-data personali li għandha tiġi skambjata mal-Istat Membru tal-ħruġ tkun limitata għal dak li jkun meħtieġ biex ikun hemm konformità mal-obbligi stabbiliti f'din id-Direttiva.

(34)

Biex ikun żgurat l-iskambju mingħajr xkiel, affidabbli u effettiv tal-informazzjoni, jenħtieġ li kull Stat Membru jiddeżinja punt ta' kuntatt nazzjonali wieħed jew aktar għall-finijiet ta' din id-Direttiva. Jenħtieġ ukoll li l-Istati Membri jiżguraw li l-punti ta' kuntatt nazzjonali rispettivi tagħhom jikkooperaw mal-awtoritajiet kompetenti għall-infurzar tal-iskwalifiki mis-sewqan koperti minn din id-Direttiva, b'mod partikolari biex jiġi żgurat li l-informazzjoni kollha meħtieġa tiġi kondiviża f'waqtha.

(35)

Jenħtieġ li l-Istati Membri jkunu jistgħu jiddeżinjaw punt ta' kuntatt nazzjonali wieħed jew aktar u awtorità kompetenti waħda jew aktar biex iwettqu l-kompiti meħtieġa għall-implimentazzjoni ta' din id-Direttiva, u jenħtieġ li jkunu jistgħu jiddefinixxu r-regoli għall-kooperazzjoni fost dawk l-entitajiet nazzjonali, biex tiġi ffaċilitata l-implimentazzjoni effiċjenti ta' din id-Direttiva.

(36)

Fl-interess ta' infurzar effettiv tal-iskwalifiki mis-sewqan, jenħtieġ li l-Istati Membri jiżguraw li l-awtoritajiet kompetenti jivverifikaw id-dritt tas-sewqan, speċjalment meta jkun hemm dubju dwar jekk is-sewwieq ikkonċernat huwiex taħt l-effett ta' skwalifika mis-sewqan, b'mod partikolari f'każijiet fejn ma jiġux ċeduti liċenzji tas-sewqan fiżiċi.

(37)

Jenħtieġ li l-Istati Membri regolarment jiġbru statistika dwar l-applikazzjoni ta' din id-Direttiva, u jibagħtuha lill-Kummissjoni, inizjalment erba' snin wara d-dħul fis-seħħ ta' din id-Direttiva u kull ħames snin wara dan.

(38)

Skemi nazzjonali ta' punti penali, li skonthom detentur ta' liċenzja tas-sewqan jitlef jew jakkumula punti b'rabta mat-twettiq ta' ċerti reati, mhumiex indirizzati minn din id-Direttiva. L-Istati Membri jadottaw approċċi differenti, bħall-impożizzjoni immedjata ta' miżuri aktar stretti jew l-iffukar fuq kampanji mmirati ta' infurzar u prevenzjoni. Meta twettaq ir-rieżami tagħha ta' din id-Direttiva, jenħtieġ li l-Kummissjoni tivvaluta kif ittejjeb is-sikurezza fit-toroq u tiffaċilita lill-Istati Membri fl-indirizzar ta' diversi sfidi, mingħajr ma tipprijoritizza kwalunkwe approċċ speċifiku.

(39)

Sabiex jiġu żgurati kundizzjonijiet uniformi għall-implimentazzjoni ta' din id-Direttiva, jenħtieġ li jingħataw setgħat ta’ implimentazzjoni lill-Kummissjoni biex tistabbilixxi l-format u l-kontenut taċ-ċertifikat standard ta' skwalifika mis-sewqan. Jenħtieġ li dawk is-setgħat jiġu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (17).

(40)

Minħabba li l-objettiv ta' din id-Direttiva, jiġifieri t-titjib tas-sikurezza fit-toroq madwar l-Unjoni billi tiġi prevista n-notifika u implimentazzjoni ta’ skwalifika mis-sewqan imposta minħabba t-twettiq ta’reat li jwassal għal skwalifika mis-sewqan, li jaqa’ fil-kamp ta’ applikazzjoni ta’ din id-Direttiva, fi Stat Membru għajr l-Istat Membru tal-ħruġ jew l-Istat Membru tar-residenza normali, ma jistax jinkiseb b’mod suffiċjenti mill-Istati Membri iżda jista’ pjuttost, minħabba l-iskala u l-effett ta’ din id-Direttiva, jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta’ sussidjarjetà kif stipulat fl-Artikolu 5 tat-Trattat dwar l-Unjoni Ewropea. F'konformità mal-prinċipju ta’ proporzjonalità, kif stipulat f'dak l-Artikolu, din id-Direttiva ma tmurx lil hinn minn dak meħtieġ sabiex jinkiseb dak l-objettiv.

(41)

Għalhekk, jenħtieġ li d-Direttiva (UE) 2025/2205 tiġi emendata skont dan.

(42)

Il-Kontrollur Ewropew għall-Protezzjoni tad-Data ġie kkonsultat skont l-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (18) u ta opinjoni fl-14 ta' Ġunju 2023,

(1)

fl-Artikolu 1(1), jiżdied il-paragrafu li ġej:

;

(2)

fl-Artikolu 2, jiżdiedu l-punti li ġejjin:

(*1)  Id-Direttiva (UE) 2015/413 tal-Parlament Ewropew u tal-Kunsill tal-11 ta' Marzu 2015 li tiffaċilita l-iskambju transfruntier ta' informazzjoni u assistenza reċiproka dwar reati tat-traffiku relatati mas-sikurezza fit-toroq (ĠU L 68, 13.3.2015, p. 9, ELI: http://data.europa.eu/eli/dir/2015/413/oj).”;"

(3)

jiddaħħlu l-Artikoli li ġejjin:

(4)

fl-Artikolu 22, jiddaħħal il-paragrafu li ġej:

(5)

fl-Artikolu 23, jiddaħħal il-paragrafu li ġej:

(6)

fl-Artikolu 24, il-paragrafu 1, jiżdied il-punt li ġej: