(1)

Jenħtieġ li l-azzjoni tal-Unjoni fis-settur tan-navigazzjoni interna tiżgura l-uniformità fl-iżvilupp tar-rekwiżiti tekniċi għall-bastimenti tal-passaġġi fuq l-ilma interni fl-Unjoni.

(2)

Id-Direttiva (UE) 2016/1629 stabbiliet sistema armonizzata għall-ħruġ ta’ ċertifikati tekniċi għall-bastimenti tal-passaġġi fuq l-ilma interni billi, inter alia, għamlet referenza għar-rekwiżiti tekniċi tal-Kumitat Ewropew għat-tfassil ta’ standards fin-navigazzjoni interna (“CESNI”, European Committee for drawing up standards in the field of inland navigation).

(3)

Is-CESNI ġie stabbilit fit-3 ta’ Ġunju 2015 fil-qafas tal-Kummissjoni Ċentrali għan-Navigazzjoni fuq ir-Renu (“CCNR”, Central Commission for the Navigation of the Rhine) biex jiżviluppa standards tekniċi uniformi għall-passaġġi fuq l-ilma interni f’diversi oqsma, b’mod partikolari fir-rigward tal-bastimenti u r-rekwiżiti tekniċi għall-bastimenti. Dawn l-istandards issir referenza għalihom ukoll fir-reġim legali tas-CCNR.

(4)

L-Anness II tad-Direttiva (UE) 2016/1629 jipprevedi li r-rekwiżiti tekniċi applikabbli għall-inġenji huma dawk stabbiliti fl-Istandard Ewropew li jistabbilixxi r-Rekwiżiti Tekniċi għall-bastimenti tan-Navigazzjoni Interna fl-edizzjoni tiegħu 2023/1 (ES-TRIN 2023/1). L-istandard ES-TRIN jistabbilixxi r-rekwiżiti tekniċi uniformi meħtieġa biex tiġi żgurata s-sikurezza tal-bastimenti tal-passaġġi fuq l-ilma interni.

(5)

Fil-laqgħa tiegħu tas-17 ta’ Ottubru 2024, is-CESNI adotta edizzjoni ġdida tal-istandard ES-TRIN, jiġifieri l-istandard ES-TRIN 2025/1. L-istandard ES-TRIN 2025/1 jintroduċi partikolarment regoli ġodda dwar il-fjuwils b’punt ta’ fjammabbiltà baxx, b’mod partikolari l-ħżin u l-użu tal-metanol, l-immarkar ta’ żoni perikolużi u t-tikkettar tal-fjuwils, is-sistemi ta’ propulsjoni elettrika u l-akkumulaturi tal-joni tal-litju, l-użu ta’ aluminju jew plastik imsaħħaħ bil-fibra għall-kostruzzjoni ta’ bastimenti tal-passiġġieri, l-abbandun tal-protokoll tal-parametri tal-magna, ir-rikonoxximent tal-eżenzjoni tal-ittestjar fuq il-post għall-magni, il-konnessjonijiet tal-mili u l-kodiċijiet xierqa tal-kuluri, it-tagħmir tan-navigazzjoni u tal-informazzjoni, b’mod partikolari t-tagħmir tal-AIS Interna, l-impjanti tat-trattament tad-drenaġġ, il-kmamar tat-tmunier li jistgħu jiġu elevati u dispożizzjonijiet tranżizzjonali għall-kmamar tat-tmunier ritrattibbli, is-sistemi ta’ bexxiexa tal-ilma awtomatiċi li jaħdmu bl-arja kkumpressata, il-partijiet ta’ konnessjoni bejn l-ankra u l-katina u l-kabini tal-irqad.

(6)

Għaldaqstant, l-Anness II tad-Direttiva (UE) 2016/1629 jenħtieġ li jiġi aġġornat biex jipprevedi li r-rekwiżiti tekniċi applikabbli għall-inġenji huma dawk stipulati fl-istandard ES-TRIN 2025/1 u jenħtieġ li japplika mill-1 ta’ Jannar 2026.

(7)

Għalhekk, jenħtieġ li d-Direttiva (UE) 2016/1629 tiġi emendata kif xieraq,