(1)

Fis-17 ta’ Ottubru 2024, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet ta’ viti mingħajr irjus (“viti”) li joriġinaw mir-Repubblika tal-Poplu taċ-Ċina (“iċ-Ċina”) abbażi tal-Artikolu 5 tar-Regolament bażiku. Hija ppubblikat Notifika tal-Bidu f’Il-Ġurnal Uffiċjali tal-Injoni Ewropew (2) (“in-Notifika tal-Bidu”).

(2)

Il-Kummissjoni bdiet l-investigazzjoni wara lment ippreżentat fit-2 ta’ Settembru 2024 mill-Istitut Ewropew tal-Elementi tal-Irbit Industrijali (“l-ilmentatur” jew “EIFI”, European Industrial Fasteners Institute). L-ilment sar f’isem l-industrija tal-Unjoni tal-viti mingħajr irjus fis-sens tal-Artikolu 5(4) tar-Regolament bażiku. L-ilment kien fih evidenza ta’ dumping u tad-dannu materjali li jirriżulta li kienet biżżejjed sabiex tiġġustifika l-bidu tal-investigazzjoni.

(3)

Il-Kummissjoni għamlet l-importazzjonijiet tal-prodott ikkonċernat soġġetti għar-reġistrazzjoni bir-Regolament ta’ Implimentazzjoni tal-Kummissjoni (UE) 2025/141 (3) (“ir-Regolament dwar ir-reġistrazzjoni”).

(4)

F’konformità mal-Artikolu 19a tar-Regolament bażiku, fid-19 ta’ Mejju 2025, il-Kummissjoni pprovdiet lill-partijiet b’sommarju tad-dazji proposti u b’dettalji dwar il-kalkolu tal-marġnijiet tad-dumping u l-marġnijiet adegwati biex jitneħħa d-dannu għall-industrija tal-Unjoni. Il-partijiet interessati ġew mistiedna jikkummentaw dwar il-preċiżjoni tal-kalkoli fi żmien 3 ijiem tax-xogħol. Ma wasal l-ebda kumment dwar l-akkuratezza tal-kalkoli.

(5)

Fis-16 ta’ Ġunju 2025, il-Kummissjoni imponiet dazji anti-dumping proviżorji fuq l-importazzjonijiet ta’ viti mingħajr irjus li joriġinaw mir-Repubblika tal-Poplu taċ-Ċina permezz tar-Regolament ta’ Implimentazzjoni tal-Kummissjoni (UE) 2025/1189 (4) (“ir-Regolament proviżorju”).

(6)

Wara l-impożizzjoni ta’ miżuri proviżorji, il-partijiet li ġejjin ressqu kummenti dwar is-sejbiet proviżorji sal-iskadenza prevista mill-Artikolu 2(1) tar-Regolament proviżorju:

(7)

Il-partijiet li talbu li jinstemgħu ngħataw din l-opportunità. Saret seduta ta’ smigħ mal-importatur Pretec AB.

(8)

Il-Kummissjoni kompliet tfittex u tivverifika l-informazzjoni kollha li qieset meħtieġa għas-sejbiet definittivi tagħha. Meta waslet għas-sejbiet definittivi tagħha, il-Kummissjoni kkunsidrat il-kummenti preżentati mill-partijiet interessati u rrevediet il-konklużjonijiet proviżorji tagħha fejn kien xieraq.

(9)

Il-Kummissjoni informat lill-partijiet interessati kollha dwar il-fatti u l-kunsiderazzjonijiet essenzjali li abbażi tagħhom kellha l-ħsieb li timponi dazju anti-dumping definittiv fuq l-importazzjonijiet ta’ viti mingħajr irjus li joriġinaw mir-Repubblika tal-Poplu taċ-Ċina (id-“divulgazzjoni finali”). Il-partijiet kollha ngħataw perjodu li matulu setgħu jikkummentaw dwar id-divulgazzjoni definittiva. Il-partijiet li għamlu t-talba biex jinstemgħu, ingħataw din l-opportunità. Saret seduta ta’ smigħ mal-EIFI u l-EFDA.

1.5.   Affermazzjonijiet dwar il-bidu

(10)

Ma waslet l-ebda affermazzjoni dwar il-bidu. Għalhekk, il-konklużjoni mill-premessa (6) tar-Regolament proviżorju ġiet ikkonfermata.

(11)

Wara d-divulgazzjoni proviżorja, l-EIFI argumenta li mhux il-produtturi esportaturi Ċiniżi kollha li ppreżentaw ruħhom fl-eżerċizzju tal-kampjunar kienu produtturi ġenwini ta’ viti mingħajr irjus.

(12)

Filwaqt li l-Kummissjoni kienet diġà eskludiet uħud mill-kumpaniji li ppreżentaw ruħhom u li nstabu li ma kinux produtturi esportaturi ġenwini mil-lista annessa mar-Regolament proviżorju, hija wettqet kontrolli addizzjonali b’risposta għas-sottomissjoni tal-EIFI. Il-Kummissjoni talbet lill-kumpaniji Ċiniżi li kkooperaw kollha biex jipprovdu l-liċenzja tan-negozju u l-ftehimiet ta’ assoċjazzjoni tagħhom, u, fejn meħtieġ, evidenza addizzjonali li turi li kienu produtturi esportaturi ġenwini tal-prodott ikkonċernat. Il-kumpaniji li ma weġbux ġew infurmati li l-Kummissjoni qieset in-nuqqas ta’ risposta bħala nuqqas ta’ kooperazzjoni f’konformità mal-Artikolu 18 tar-Regolament bażiku. Il-lista ta’ produtturi esportaturi li kkooperaw ġiet riveduta kif xieraq.

(13)

Ma wasal l-ebda kumment ieħor dwar il-kampjunar. Għalhekk, il-konklużjonijiet mill-premessi (7) sa (16) tar-Regolament proviżorju ġew ikkonfermati.

(14)

L-investigazzjoni tad-dumping u tad-dannu kopriet il-perjodu mill-1 ta’ Lulju 2023 sat-30 ta’ Ġunju 2024 (“il-perjodu ta’ investigazzjoni”). L-eżami tax-xejriet rilevanti għall-valutazzjoni tad-dannu kopra l-perjodu mill-1 ta’ Jannar 2021 sa tmiem il-perjodu ta’ investigazzjoni (“il-perjodu kkunsidrat”).

(15)

Il-prodott taħt investigazzjoni huwa viti u boltijiet, kemm jekk bl-iskorfini u l-woxers tagħhom, kif ukoll jekk le, mingħajr irjus, tal-ħadid jew tal-azzar għajr l-azzar inossidabbli, irrispettivament mis-saħħa tensili, esklużi l-coach screws u viti oħra tal-injam, ganċijiet bil-kamin u ċrieki bil-kamin, viti self-tapping, u viti u boltijiet għat-twaħħil ta’ materjal għall-bini ta’ binarji ferrovjarji.

(16)

Il-prodott ikkonċernat huwa l-prodott taħt investigazzjoni li joriġina mir-Repubblika tal-Poplu taċ-Ċina, li bħalissa jaqa’ taħt il-kodiċijiet NM 7318 15 42 u 7318 15 48 .

(17)

Importatur minnhom, Pretec AB, argumenta li l-vireg tal-infrastruttura strutturali galvanizzati b’immersjoni taħraq (“SIRs”, Structural Infrastructure Rods) b’tulijiet ta’ 5,8 metri għandhom jiġu esklużi mill-ambitu tal-prodott ta’ din l-investigazzjoni peress li jikkostitwixxu prodott distint minħabba:

(18)

Il-Kummissjoni nnotat li, tabilħaqq, fir-rigward tad-distinzjonijiet kimiċi u fiżiċi, il-galvanizzazzjoni b’immersjoni taħraq toħloq kisja taż-żingu aktar flessibbli (45–215 μm) meta mqabbla mal-kisi elettroliku (5–20 μm). Madankollu, il-ħxuna tal-galvanizzazzjoni u t-tul tal-SIRs ġew meqjusa li jirriflettu l-applikazzjoni speċifika ta’ prodott li kienet taqa’ fi ħdan id-definizzjoni tal-istess prodott, u mhux ta’ prodott differenti.

(19)

Fir-rigward tal-affermazzjonijiet tekniċi u tal-użu finali, il-Kummissjoni sabet li l-SIRs intużaw fl-istess setturi bħal viti mingħajr irjus oħra, b’mod partikolari s-settur tal-kostruzzjoni u għalhekk kienu f’kompetizzjoni diretta ma’ viti mingħajr irjus oħra f’dan is-settur.

(20)

Barra minn hekk, l-evidenza pprovduta mill-EIFI turi l-kapaċitajiet ta’ produzzjoni eżistenti tal-kisi taż-żingu huma bejn 100 000 u 300 000 MT/sena u l-produzzjoni ta’ vireg sa sitt metri huma bejn 50 000 u 150 000 MT/sena fl-Unjoni. Il-Kummissjoni sabet li hemm metodi oħra ta’ produzzjoni disponibbli għall-protezzjoni tal-azzar mill-korrużjoni speċjalment fi klimi Nordiċi.

(21)

Għalhekk, l-affermazzjoni li jiġu esklużi vireg tal-infrastruttura strutturali galvanizzati b’immersjoni taħraq ta’ 5,8 metri ġiet miċħuda.

(22)

Wara d-divulgazzjoni definittiva, Pretec sostna li l-Kummissjoni ma kinitx ikkunsidrat kif xieraq l-ambitu sħiħ tal-evidenza xjentifika, teknika u regolatorja pprovduta minn Pretec, li tappoġġa n-natura distinta tal-SIRs u li għalhekk jenħtieġ li l-Kummissjoni tikkunsidra mill-ġdid u tilqa’ t-talba ta’ Pretec għall-esklużjoni tas-SIRs. In-nuqqas ta’ alternattivi vijabbli fl-Unjoni u r-raġunament difettuż għall-klassifikazzjoni tal-prodotti jiġġustifikaw ukoll l-esklużjoni tas-SIRs mill-kamp ta’ applikazzjoni.

(23)

B’mod partikolari, Pretec sostna li:

(24)

Il-Kummissjoni nnotat li, meta ddefiniet il-prodott li qed jiġi investigat, l-ilment indirizza b’mod espliċitu l-kisi li jipproteġi l-korrużjoni, inkluża l-galvanizzazzjoni permezz ta’ banju sħun, kif rilevanti għall-prodotti użati fil-kostruzzjoni ta’ barra, il-pontijiet u l-istrutturi ta’ utilità esposti għal ambjenti ħorox bħall-indewwa, il-melħ, u t-temp estrem. L-ilment irrikonoxxa wkoll li l-SIRs, minkejja l-proċess speċifiku ta’ galvanizzazzjoni tagħhom, huma funzjonalment u teknikament allinjati mal-prodotti koperti minn din l-investigazzjoni.

(25)

Il-Kummissjoni enfasizzat li l-ilment kien jinkludi diversi standards (ISO, EN, DIN) li jiddefinixxu l-ispeċifikazzjonijiet mekkaniċi u materjali għall-viti tal-azzar, inkluż l-ISO 898, li jirregola l-proprjetajiet mekkaniċi tal-azzar. Filwaqt li Pretec enfasizza l-istandards tal-ISO bħall-ISO 10684 u l-ISO 1461 għas-SIRs, dawn ma jistabbilixxux kategorija ta’ prodott separata. Standard ISO distint jirrifletti biss li SIRs jistgħu jirrappreżentaw varjant mhux standardizzat ta’ viti mingħajr ras, mhux prodott fundamentalment differenti għall-finijiet ta’ din l-investigazzjoni. Il-Kummissjoni osservat ukoll li d-dipendenza ta’ Pretec fuq ir-rekwiżiti tekniċi bħas-saħħa tal-impatt (27 Joules f’temperatura ta’ – 20 °C) u l-konformità mal-klassijiet ta’ korrużività C3 — C5 hija allinjata mal-ambitu usa’ tal-investigazzjoni, peress li dawn il-kriterji huma konsistenti mal-prinċipji ġenerali tar-reżistenza għall-korrużjoni u l-prestazzjoni mekkanika deskritti fl-ilment.

(26)

L-ambitu tal-prodott ta’ din l-investigazzjoni kien jinkludi vireg bil-kamin u viti mingħajr ras, inklużi dawk iddisinjati għal applikazzjonijiet speċjalizzati, dment li jikkondividu karatteristiċi fiżiċi, tekniċi u funzjonali li jikkoinċidu. L-eżistenza ta’ speċifikazzjonijiet tekniċi vinkolanti għal proġetti speċifiċi (eż., AMA Anläggning, rekwiżiti minn Vattenfall u Svenska Kraftnät) ma nnegatx l-interkambjabbiltà tas-SIRs ma’ viti oħra mingħajr ras meta jissodisfaw kriterji ta’ prestazzjoni ekwivalenti. Il-Kummissjoni nnotat ukoll li filwaqt li l-SIRs jistgħu jikkompetu ma’ prodotti tal-azzar inossidabbli f’ċerti applikazzjonijiet, l-ilment jindirizza b’mod espliċitu tali kompetizzjoni, u l-esklużjoni tal-azzar inossidabbli mill-investigazzjoni ma tiġġustifikax l-esklużjoni ta’ SIRs.

(27)

Il-Kummissjoni rrikonoxxiet l-affermazzjoni ta’ Pretec li s-SIRs ma jistgħux jinbidlu ma’ viti iżgħar mingħajr ras minħabba differenzi fid-daqs, fil-kapaċità tal-ġarr tat-tagħbija, u fir-rekwiżiti tekniċi. Madankollu, il-viti, irrispettivament mid-daqs, spiss jaderixxu mal-prinċipji standard tal-inġinerija u jistgħu jaqdu rwoli mekkaniċi simili (eż. il-bering tat-tagħbija, l-irbit) fl-applikazzjonijiet jekk jissodisfaw il-kriterji xierqa tas-saħħa u tas-sikurezza. Il-Kummissjoni ma sabitx evidenza li l-ispeċifikazzjonijiet tekniċi tas-SIRs jagħmluhom kategorikament mhux interkambjabbli ma’ prodotti oħra fil-kamp ta’ applikazzjoni. Barra minn hekk, filwaqt li Pretec sostna li l-produtturi tal-Unjoni ma għandhomx il-kapaċità li jipprovdu SIRs li jissodisfaw l-istandards ISO, l-annessi tal-ilment u s-sottomissjonijiet ulterjuri kkonfermaw l-eżistenza tal-kapaċità tal-produzzjoni tal-Unjoni għal vireg bil-kamin galvanizzati b’banju sħun, li jissodisfaw l-istandards tal-ISO u ta’ tulijiet akbar.

(28)

Fid-dawl tal-kunsiderazzjonijiet deskritti hawn fuq, il-Kummissjoni kkonkludiet li t-talba ta’ Pretec għall-esklużjoni ta’ SIRs mill-ambitu ta’ din l-investigazzjoni hija mingħajr mertu u għalhekk miċħuda. L-ambitu tal-prodott, kif definit fl-ilment u l-annessi tiegħu (5), jinkludi SIRs minħabba t-trikkib tal-karatteristiċi tekniċi, funzjonali u regolatorji tagħhom ma’ viti oħra mingħajr ras.

(29)

Wara l-impożizzjoni ta’ miżuri proviżorji, l-EIFI talab lill-Kummissjoni tinkludi vireg bil-kamin importati taħt il-kodiċi TARIC 7308 90 98 90 (6) u użati għall-gaġeġ tal-boltijiet tal-ankraġġ għall-ambitu tal-prodott tal-investigazzjoni, peress li dawn il-gaġeġ tal-boltijiet tal-ankraġġ ġew ikklassifikati ħażin. Skont l-EIFI, il-klassifikazzjoni ħażina tippermetti importazzjonijiet mhux dovuti ta’ vireg bil-kamin Ċiniżi u timmina l-miżuri anti-dumping. Skont l-EIFI, gaġġa tal-boltijiet tal-ankraġġ hija magħmula primarjament minn viti b’saħħa għolja (ikklassifikati taħt il-kodiċi TARIC 7318 15 48 90), żewġ pjanċi tal-azzar (pjanċi tal-pedamenti u tad-distribuzzjoni), skorfini, woxers, u komponenti minuri oħra, li bħalissa qegħdin jiġu importati mhux assemblati. L-użu tal-kodiċi 7308 90 98 90 għall-klassifikazzjoni tal-gaġeġ tal-boltijiet tal-ankraġġ li jsiru b’vireg bil-kamin għalhekk ma jkunx korrett, peress li l-vireg imsemmija fid-deskrizzjoni tal-kodiċi ma humiex elementi ta’ konnessjoni (bħal vireg bil-kamin), iżda vireg mhux bil-kamin sempliċi.

(30)

L-ambitu tal-prodott ġie ddefinit fin-Notifika tal-bidu. Il-gaġeġ tal-boltijiet tal-ankraġġ ma kinux koperti mill-ilment u għalhekk l-industrija tal-Unjoni ma pprovdiet l-ebda evidenza ta’ dumping u ta’ dannu li jirriżulta li tiġġustifika investigazzjoni. Għalhekk, l-argument ġie miċħud.

(31)

Wara d-divulgazzjoni definittiva, l-EIFI asserixxa li d-dazji jenħtieġ li jiġu applikati pro rata għas-sehem ta’ vireg bil-kamin inklużi fi prodotti importati taħt NM 7308 90 98 (gaġeġ tal-boltijiet tal-ankra), peress li dawn il-vireg bil-kamin jaqgħu fil-kamp ta’ applikazzjoni tal-investigazzjoni. L-EIFI ċċara li l-gaġeġ tal-boltijiet tal-ankraġġ, primarjament magħmula minn vireg bil-kamin, huma meħtieġa li jiġu kklassifikati taħt NM 7308 90 98 taħt l-Informazzjoni Tariffarja Vinkolanti eżistenti (7). Konsegwentement, il-parti pprovdiet evidenza li l-vireg bil-kamin jirrappreżentaw il-maġġoranza tal-piż u l-valur tal-gaġġa tal-ankraġġ.

(32)

Alternattivament, l-EIFI argumenta li l-Kummissjoni allegatament żbaljat meta ċaħdet it-talba biex jiġi estiż il-kamp ta’ applikazzjoni tal-prodott biex jinkludi NM 7308 90 98 , li għalhekk għandha tiġi inkorporata fil-miżuri antidumping. Biex tappoġġa dan, il-parti kkwotat l-investigazzjoni anti-dumping dwar xkejjer u basktijiet (8), fejn prodotti kklassifikati taħt il-kodiċijiet NM li inizjalment ma kinux fil-mira fin-notifika ta’ bidu rilevanti aktar tard ġew inklużi fil-kamp ta’ applikazzjoni tal-proċediment.

(33)

Vireg bil-kamin immuntati f’gaġeġ tal-boltijiet tal-ankra ma ġewx definiti fl-ambitu tal-ilment bħala prodotti soġġetti għal din l-investigazzjoni. Bħala tali, l-industrija tal-Unjoni ma ssottomettiet l-ebda evidenza ta’ dumping jew dannu suffiċjenti biex tiġġustifika l-bidu ta’ investigazzjoni dwar il-vireg bil-kamin immuntati fil-gaġeġ tal-boltijiet tal-ankraġġ. Barra minn hekk, il-partijiet interessati kollha kienu meħtieġa jippreżentaw informazzjoni dwar l-ambitu tal-prodott fi żmien 10 ijiem mill-pubblikazzjoni tan-Notifika ta’ Bidu. Ma tressqet l-ebda talba bħal din sal-iskadenza, u ma ġiet ipprovduta l-ebda evidenza li turi li l-vireg bil-kamin fil-gaġeġ tal-boltijiet tal-ankraġġ jenħtieġ li jaqgħu taħt id-deskrizzjoni tal-prodott deskritta fl-ilment. Konsegwentement, dawn il-vireg bil-kamin ma ġewx inklużi fl-ambitu tal-investigazzjoni, u l-ebda informazzjoni (inklużi l-volumi u l-prezzijiet tal-importazzjoni mill-pajjiż ikkonċernat, l-ishma mis-suq, l-indikaturi rilevanti l-oħra kollha tad-dannu, l-użu downstream u s-sitwazzjoni ta’ tali utenti, eċċ.) ma nġabret u ġiet analizzata fir-rigward tagħhom. Filwaqt li l-parti rreferiet għall-investigazzjoni dwar l-ixkejjer u l-basktijiet (9), fejn prodotti li ma kinux fil-mira inizjalment ġew inklużi aktar tard minħabba li ssodisfaw id-deskrizzjoni tal-prodott, instab li dan il-każ kien differenti. Fl-investigazzjoni attwali, il-vireg bil-kamin fil-gaġeġ tal-boltijiet ankri ma kinux jissodisfaw id-deskrizzjoni tal-prodott ipprovduta fl-ilment u għalhekk ma kinux koperti minn din l-investigazzjoni. Għalhekk, il-pretensjoni tal-parti ġiet miċħuda.

(34)

Importatur (Kohlhage) talab lill-Kummissjoni tikkunsidra d-distinzjoni bejn prodotti u metodi ta’ produzzjoni differenti, billi argumenta li ċerti prodotti jirrikjedu passi addizzjonali, bħall-ġbid ta’ wajers, il-formazzjoni kiesħa tal-bolt, it-tidwir parzjali tal-kamin tal-bolt, il-karatteristiċi personalizzati tal-immaxinjar fuq il-bolt, kif ukoll il-kisi bil-ħadid taż-żingu. Il-produzzjoni ta’ dawn il-prodotti ssir b’kostijiet ogħla b’mod sinifikanti meta mqabbla mal-vireg u l-istuds bil-kamin investigati, minkejja li huma kklassifikati taħt l-istess kodiċi doganali. L-importatur argumenta li prodotti bħal dawn għandhom jiġu esklużi mill-ambitu tal-prodott, u sostna li l-Kummissjoni ma pprovdietx kalkolu ta’ tqabbil jew evidenza ta’ dumping għal dawn it-tipi ta’ prodotti distinti.

(35)

Il-fatt li l-produzzjoni tal-prodott tista’ ssir bl-użu ta’ proċessi ta’ manifattura differenti ma huwiex rilevanti fih innifsu għad-definizzjoni tal-ambitu ta’ prodott li qiegħed jiġi investigat. F’dan il-każ, l-istadji ta’ produzzjoni addizzjonali msemmija mill-importatur kienu diġà deskritti fl-ilment oriġinali. Barra minn hekk, l-investigazzjoni kkonfermat li l-prodotti importati għandhom karatteristiċi fiżiċi u tekniċi simili, u użi finali bażiċi. Il-karatteristiċi speċifiċi li jiddistingwu l-prodotti li qegħdin jiġu investigati (eż. kisi u varjazzjonijiet oħra) diġà jitqiesu fit-tipi ta’ prodotti rrapportati mill-produtturi esportaturi inklużi fil-kampjun, li għalihom jiġu kkalkolati l-marġnijiet tad-dumping.

(36)

Barra minn hekk, il-Kummissjoni għamlet tqabbil bejn it-tipi ta’ prodotti fil-livell tan-numru ta’ kontroll tal-prodott (PCN, Product Control Number), li kien jinkludi l-karatteristiċi ewlenin għal kull tip ta’ prodott u għalhekk jiddistingwi bejn id-differenzi rilevanti għall-kost u l-prezz tad-diversi tipi ta’ prodotti.

(37)

Għalhekk, ma hemm l-ebda ġustifikazzjoni għall-esklużjoni tat-tipi ta’ prodotti mmanifatturati b’kostijiet ferm ogħla mill-investigazzjoni. Għaldaqstant, din l-affermazzjoni ġiet miċħuda.

(38)

Il-Kummissjoni ma rċeviet l-ebda kumment dwar il-proċedura għad-determinazzjoni tal-valur normali f’dan il-każ skont l-Artikolu 2(6a) tar-Regolament bażiku.

(39)

Is-sejbiet proviżorji tal-Kummissjoni fil-premessi (32) sa (44) tar-Regolament proviżorju għalhekk huma kkonfermati.

(40)

Fin-nuqqas ta’ kwalunkwe kumment, is-sejbiet fit-Taqsima 3.2.1 tar-Regolament proviżorju huma kkonfermati.

(41)

Wara l-pubblikazzjoni tar-Regolament proviżorju, Chinafar Group, Junyue, Brother Group u EFDA tennew l-affermazzjonijiet tagħhom li l-Malażja kellha tintgħażel bħala pajjiż rappreżentattiv minflok it-Tajlandja, filwaqt li tennew li i) id-data tal-importazzjoni tal-Malażja kienet aktar affidabbli mid-data tal-importazzjoni tat-Tajlandja u li ii) il-kumpaniji tal-Malażja identifikati kienu aktar affidabbli u rappreżentattivi meta mqabbla ma’ dawk tat-Tajlandja. L-affermazzjonijiet dettaljati huma stabbiliti fit-Taqsimiet 3.1.3 sa 3.1.8 hawn taħt.

(42)

Brother Group u l-EFTA sostnew ukoll li, kieku l-Kummissjoni wettqet valutazzjoni tal-livell u tal-protezzjoni ambjentali, dan kien juri li r-rekord tat-Tajlandja kien inqas favorevoli minn dak tal-Malażja.

(43)

Peress li l-Kummissjoni għażlet lit-Tajlandja bħala l-pajjiż rappreżentattiv xieraq, ma kienx hemm bżonn li titwettaq valutazzjoni bħal din f’konformità mal-aħħar sentenza tal-Artikolu 2(6a)(a), l-ewwel inċiż tar-Regolament bażiku.

(44)

Abbażi ta’ dan ta’ hawn fuq, is-sejbiet proviżorji tal-Kummissjoni fil-premessi (90) sa (149) għalhekk huma kkonfermati.

(45)

Dwar il-kwalità tad-data dwar l-importazzjoni tal-fatturi ta’ produzzjoni, Chinafar Group, Junyue, Brother Group u EFDA rrepetew l-istess argumenti sottomessi wara l-pubblikazzjoni taż-żewġ noti fil-fajl dwar is-sorsi għad-determinazzjoni tal-valur normali, bl-argument li l-kwalità tad-data dwar l-importazzjoni faċilment disponibbli għal kull kodiċi tas-Sistema Armonizzata (kodiċi SA) għat-Tajlandja ma kinitx ta’ kwalità ogħla minn tal-Malażja u li minflok għandha tintgħażel bħala pajjiż rappreżentattiv. Il-partijiet ma ppreżentaw l-ebda evidenza ġdida u lanqas argumenti biex jappoġġaw id-dikjarazzjonijiet tagħha u għalhekk ir-raġunijiet u l-konklużjonijiet fil-premessi (97) sa (145) tar-Regolament proviżorju ġew ikkonfermati u s-sottomissjonijiet ġew miċħuda.

(46)

Brother Group u Junyue argumentaw li l-pajjiż rappreżentattiv ma għandux jintgħażel abbażi tal-fatt li huwa l-akbar pajjiż importatur tal-fatturi ewlenin tal-produzzjoni f’termini ta’ kwantità fost il-pajjiżi potenzjali kollha.

(47)

Il-Kummissjoni bbażat l-għażla tagħha tal-pajjiż rappreżentattiv fuq valutazzjoni bbilanċjata tal-eżistenza ta’ data rilevanti disponibbli faċilment għall-materja prima ewlenija, li ġiet stabbilita fil-premessi (106) sa (109) tar-Regolament proviżorju. Il-Kummissjoni ma kkunsidratx biss il-volum assolut tal-importazzjonijiet, iżda wkoll l-eżistenza ta’ importazzjonijiet miċ-Ċina u mill-pajjiżi elenkati fl-Anness I tar-Regolament (UE) 2015/755 tal-Parlament Ewropew u tal-Kunsill (10) u l-impatt tagħhom fuq il-prezz tal-importazzjoni medju. Għalhekk, l-affermazzjoni ġiet miċħuda.

(48)

Barra minn hekk, Brother Group argumenta li l-fatt li l-prezz tal-importazzjoni tal-materja prima minn sorsi oħra f’pajjiż kien simili għall-prezz tal-importazzjoni miċ-Ċina mhuwiex fih innifsu konklużiv li dak il-prezz huwa influwenzat mill-importazzjonijiet Ċiniżi. Billi dawn il-fatturi tal-produzzjoni kollha huma materjali tal-azzar tal-komoditajiet innegozjati b’mod mifrux fis-suq globali, huwa fatt stabbilit li l-prezzijiet tal-importazzjoni f’diversi pajjiżi jew reġjuni jkunu simili u komparabbli.

(49)

Biex jiġi evitat l-impatt tad-distorsjonijiet sinifikanti Ċiniżi f’pajjiż rappreżentattiv potenzjali, il-Kummissjoni kkunsidrat l-effetti possibbli tal-importazzjonijiet Ċiniżi fil-pajjiż rappreżentattiv potenzjali. Wieħed mill-elementi li jitqies huwa s-similarità tal-prezzijiet tal-importazzjoni minn sorsi oħra minbarra ċ-Ċina. Madankollu, dan ma huwiex kriterju awtonomu iżda għandu jitqies flimkien mal-fatti l-oħra kollha tal-każ. Il-Kummissjoni ċaħdet l-affermazzjoni.

(50)

Wara d-divulgazzjoni definittiva, Brother Group u Junyue tennew li l-għażla tal-Kummissjoni tal-pajjiż rappreżentattiv kienet ibbażata fuq qari selettiv tal-istatistika dwar l-importazzjoni u fuq dipendenza żejda fuq il-kriterju tal-volum tal-importazzjoni. Din l-affermazzjoni kienet diġà indirizzata fil-premessi (47) – (49) hawn fuq u ma ġie ppreżentat l-ebda argument jew evidenza ġdida. Għalhekk, din l-affermazzjoni kienet rifjutata.

(51)

Chinafar Group sostna li l-fattur tal-produzzjoni importat taħt il-kodiċi SA 7213 91 għandu jkun il-kunsiderazzjoni primarja fl-għażla tal-pajjiż rappreżentattiv, peress li dan kien il-materja prima ewlenija użata fil-produzzjoni tal-prodott li qiegħed jiġi investigat. Chinafar Group sostna li l-Malażja għandha tintuża bħala l-pajjiż rappreżentattiv, peress li l-importazzjonijiet miċ-Ċina taħt il-kodiċi SA 7213 91 kienu jirrappreżentaw 30 % tal-importazzjonijiet totali tat-Tajlandja ta’ dan il-fattur ta’ produzzjoni, filwaqt li kienu jirrappreżentaw biss 9 % tal-importazzjonijiet totali tal-Malażja.

(52)

Kif imsemmi fil-premessa (126) tar-Regolament proviżorju, għall-kodiċi SA 7213 91  l-importazzjonijiet totali minn sorsi mingħajr distorsjoni kienu sinifikanti fit-tliet pajjiżi kollha li ntagħżlu inizjalment, bit-Tajlandja jkollha l-ogħla kwantitajiet assoluti ta’ importazzjonijiet minn pajjiżi għajr iċ-Ċina u pajjiżi elenkati fl-Anness I tar-Regolament (UE) 2015/755. Għal dan il-kodiċi SA, il-prezz medju tal-importazzjoni minn sorsi oħra kemm fit-Tajlandja kif ukoll fit-Turkija kien madwar 2 % ogħla mill-prezz tal-importazzjoni miċ-Ċina u mill-pajjiżi elenkati fl-Anness I tar-Regolament (UE) 2015/755, filwaqt li l-prezz medju tal-importazzjoni minn sorsi oħra fil-Malażja kien 5 % aktar baxx mill-prezz miċ-Ċina u mill-pajjiżi elenkati fl-Anness I tar-Regolament (UE) 2015/755.

(53)

Abbażi tal-volum ta’ importazzjonijiet sinifikanti minn sorsi mingħajr distorsjoni u l-impatt limitat tal-importazzjonijiet miċ-Ċina u mill-pajjiżi elenkati fl-Anness I tar-Regolament (UE) 2015/755 fuq il-prezz tal-importazzjoni medju, il-Kummissjoni qieset lit-Tajlandja bħala parametru referenzjarju affidabbli u rappreżentattiv għal dan il-fattur ta’ produzzjoni. Għalhekk, l-affermazzjoni ġiet miċħuda.

(54)

Wara l-pubblikazzjoni tar-Regolament proviżorju, Chinafar Group, Junyue, Brother Group u EFDA tennew l-affermazzjonijiet tagħhom li, jekk it-Tajlandja tinżamm bħala pajjiż rappreżentattiv, il-Malażja għandha tintuża bħala l-pajjiż ta’ riferiment għal xi materja prima u fi kwalunkwe każ l-importazzjonijiet mill-Ġappun lejn it-Tajlandja għandhom jiġu esklużi minħabba l-fatt li dawn jikkonsistu fi prodotti speċjali ta’ grad awtomobilistiku li ma humiex rappreżentattivi għall-kostruzzjoni tal-prodott taħt il-valur normali tal-investigazzjoni.

(55)

Brother Group u EFDA affermaw li l-prezzijiet tal-importazzjoni lejn it-Tajlandja tal-fatturi tal-produzzjoni kklassifikati taħt il-kodiċijiet SA 7213 99 u 7214 99 ma kinux affidabbli, minħabba l-proporzjon għoli u l-importazzjonijiet bi prezz għoli mill-Ġappun, u għalhekk il-Malażja, jew inkella t-Turkija, għandhom jintużaw bħala pajjiż ta’ riferiment. Brother Group argumenta wkoll li l-prezz tal-importazzjoni għall-kodiċi SA 7213 99 kien ogħla b’mod sinifikanti minn dak ta’ SA 7213 91 , minkejja l-fatt li ż-żewġ fatturi tal-produzzjoni kienu differenti biss għad-dijametru trażversali tal-vireg, u ogħla b’mod sinifikanti minn dak tal-kodiċi SA 7227 90 , li kien azzar illigat. Fuq il-bażi ta’ għarfien industrijali komuni, l-azzar illigat tipikament ikun jiswa aktar flus mill-azzar mhux illigat. Brother Group u EFDA laħqu konklużjonijiet simili għall-kodiċi SA 7214 99 meta mqabbla mal-kodiċi SA 7228 30 .

(56)

L-ewwel nett, il-Kummissjoni diġà spjegat fil-premessi (132) sa (134) tar-Regolament proviżorju għaliex ma qisitx li huwa xieraq li teskludi l-importazzjonijiet mill-Ġappun mill-kalkolu tal-parametru referenzjarju. Anki jekk xi wħud mill-produtturi esportaturi inklużi fil-kampjun setgħu ma pproduċewx jew ma bigħux viti ta’ grad speċjali, il-Kummissjoni kkonfermat is-sejba proviżorja tagħha li l-ebda waħda mill-partijiet ma ppreżentat evidenza tal-iskala tal-importazzjonijiet Ġappuniżi lejn it-Tajlandja ta’ materja prima maħsuba għall-produzzjoni ta’ viti mhux standard għal setturi speċjalizzati, li tiġġustifika l-esklużjoni ta’ dawn l-importazzjonijiet mill-parametri referenzjarji tal-materja prima.

(57)

It-tieni, il-Kummissjoni nnotat li l-prezzijiet bejn kodiċijiet SA differenti ma setgħux jitqiesu direttament komparabbli minħabba t-taħlita tal-prodotti f’dawn il-kodiċijiet. Bħala eżempju, id-differenza fil-prezz tal-importazzjoni bejn il-kodiċijiet SA 7213 91 u 7213 99 ma kinitx limitata għad-dijametru trażversali iżda kienet attribwibbli wkoll għal kontenut ogħla ta’ karbonju u l-preżenza ta’ elementi ta’ lligar fil-kodiċi SA 7213 99 .

(58)

Il-fatt li taħt kodiċi doganali xi materja prima kienet ta’ grad aħjar u għalhekk tiswa aktar flus ma kienx biżżejjed biex tiġi kkontestata l-affidabbiltà tal-parametru referenzjarju.

(59)

Wara d-divulgazzjoni definittiva, Brother Group, Junyue u EFDA tennew li l-parametri referenzjarji għal ċerta materja prima tal-azzar kienu influwenzati mill-prezzijiet għoljin tal-importazzjonijiet mill-Ġappun lejn it-Tajlandja maħsuba għall-produzzjoni ta’ viti ta’ grad speċjali mhux standard għal setturi speċjalizzati.

(60)

Huma argumentaw li dan kien ikkorroborat mill-istatistika żvelata mill-Kummissjoni nnifisha, li turi li porzjon sinifikanti ta’ din il-materja prima li toriġina mill-Ġappun kellha livelli ta’ prezzijiet sostanzjalment ogħla minn dawk minn pajjiżi oħra, u mill-preżenza sinifikanti ta’ manifatturi ta’ qfieli li huma proprjetà tal-Ġappun fit-Tajlandja.

(61)

Brother Group sostna wkoll li l-produtturi esportaturi Ċiniżi tal-prodott li qed jiġi investigat ma kinux jeħtieġu din il-materja prima estremament għalja peress li ma kinux qed ifornu speċifikament applikazzjonijiet ta’ livell għoli, bħal dawk fl-industrija awtomobilistika jew fis-settur taż-żejt u tal-gass.

(62)

Il-Kummissjoni diġà stabbiliet fil-premessi (132) sa (134) tar-Regolament provviżorju r-raġunijiet għaliex iddeċidiet li tinkludi l-importazzjonijiet Ġappuniżi fil-kalkolu tal-parametri referenzjarji tal-materja prima u ma tressaq l-ebda argument jew evidenza ġdida f’dan ir-rigward. Fil-fatt, il-Kummissjoni sabet li kemm il-viti ta’ grad standard kif ukoll dawk ta’ grad speċjali setgħu jintużaw f’setturi speċjalizzati, b’mod partikolari s-settur awtomobilistiku, u fi kwalunkwe każ l-investigazzjoni kopriet kemm il-viti standard kif ukoll dawk mhux standard. Barra minn hekk, filwaqt li l-istatistika dwar l-importazzjonijiet ġenerali mill-Ġappun kienet disponibbli, ma ġiet ippreżentata l-ebda evidenza sostantiva tal-preżenza speċifika ta’ azzar ta’ grad speċjalizzat f’viti standard jew mhux standard.

(63)

Il-Kummissjoni nnotat ukoll li diversi produtturi esportaturi Ċiniżi li ppreżentaw il-liċenzja tan-negozju tagħhom u l-Artikolu ta’ Assoċjazzjoni tagħhom kellhom il-produzzjoni tal-elementi tal-irbit għas-settur awtomobilistiku fl-ambitu tan-negozju tagħhom. Bl-istess mod, fost il-produtturi esportaturi fil-kampjun, kien hemm produzzjoni ta’ vireg bil-kamin b’saħħa għolja għal setturi speċjalizzati, bħal żoni taż-żejt u pipelines taż-żejt offshore, tagħmir u manutenzjoni tal-bastimenti, u inġinerija tal-kostruzzjoni.

(64)

Brother Group ikkontesta l-affermazzjoni tal-Kummissjoni li d-differenza fil-prezz tal-importazzjoni bejn il-kodiċijiet HS 7213 91 u 7213 99 ma kinitx dovuta biss għad-dijametru tas-sezzjoni trażversali iżda kienet attribwibbli wkoll għal kontenut ogħla ta’ karbonju u l-preżenza ta’ elementi permessi fil-kodiċi HS 7213 99 .

(65)

Brother Group argumenta li jekk l-allegat kontenut ta’ karbonju jew elementi ta’ lligar kienu jeżistu u kienu responsabbli għall-prezz ogħla b’mod sinifikanti tat-taħlita tal-prodott taħt 7213 99 , dan waħdu jagħmel it-taħlita tal-prodott mhux rappreżentattiva tat-tip ta’ materjal li l-produtturi Ċiniżi tipikament użaw.

(66)

Is-sejba tal-Kummissjoni kienet ibbażata fuq evidenza miġbura matul iż-żjarat ta’ verifika fil-bini tal-produtturi esportaturi Ċiniżi inklużi fil-kampjun, b’mod aktar speċifiku fuq iċ-ċertifikati tal-azzar li jindikaw il-kompożizzjoni kimika tal-materja prima differenti użata mill-produtturi esportaturi Ċiniżi. L-analiżi taċ-ċertifikati wriet li kien hemm differenzi bejn il-materja prima tal-azzar f’termini ta’ kontenut ta’ karbonju u l-preżenza ta’ elementi ta’ lligar.

(67)

L-affermazzjonijiet ġew għalhekk miċħuda u fin-nuqqas ta’ kummenti oħra, is-sejbiet fil-premessi (153) sa (163) tar-Regolament proviżorju ġew ikkonfermati.

(68)

Wara l-pubblikazzjoni tar-Regolament proviżorju, Chinafar tenniet l-affermazzjoni tagħha li l-parametru referenzjarju għax-xogħol għandu jiġi kkalkolat abbażi tal-kost lavorattiv annwali fil-pajjiż rappreżentattiv diviż bin-numru ta’ sigħat annwali ta’ ħidma f’Chinamar u mhux fil-pajjiż rappreżentattiv.

(69)

Il-Kummissjoni spjegat fil-premessa (169) tar-Regolament proviżorju r-raġuni wara l-kalkolu tal-parametru referenzjarju tax-xogħol u għaliex hija ċaħdet l-approċċ propost minn Chinafar. Madankollu, Chinafar ma pprovdiet l-ebda argument jew evidenza addizzjonali biex tappoġġa l-affermazzjoni tagħha. Għalhekk, l-affermazzjoni hija miċħuda.

(70)

Fin-nuqqas ta’ kummenti oħra, il-konklużjonijiet fil-premessi (165) sa (169) tar-Regolament proviżorju huma kkonfermati.

(71)

Wara l-pubblikazzjoni tar-Regolament proviżorju, Brother Group u EFDA affermaw li l-kost mingħajr distorsjoni tal-elettriku kien ġie kkalkolat b’mod żbaljat. Huma affermaw li l-Kummissjoni (i) applikat ħażin imposta ta’ aġġustament tal-enerġija bħala indiċi ta’ aġġustament ’il fuq minflok ma żiedet il-valur assolut tagħha fl-imposta bażi, (ii) perjodu tariffarju fiss ikklassifikat ħażin bħala perjodu ta’ konsum massimu u (iii) għamlet għadd doppju tat-tariffa għas-servizzi u tat-tariffi għad-domanda.

(72)

Wara li vvalutat l-affermazzjonijiet, il-Kummissjoni aċċettat tnejn minnhom, jiġifieri l-affermazzjonijiet li jikkonċernaw (i) l-applikazzjoni tat-tariffa ta’ aġġustament tal-enerġija u (iii) l-għadd doppju tat-tariffa għas-servizzi u t-tariffi għad-domanda. Għaldaqstant, il-Kummissjoni rrevediet il-parametru referenzjarju tal-elettriku.

(73)

Il-Kummissjoni ċaħdet l-affermazzjoni li l-klassifikazzjoni tal-perjodu tariffarju fiss bħala l-perjodu tariffarju massimu kienet ħażina. Fil-fatt, il-produtturi Ċiniżi rrapportaw il-konsum tal-elettriku tagħhom f’ħames kategoriji ta’ tariffi differenti: ġenerali, ċatta, massima, baxxa u għolja. Madankollu, hemm biss żewġ kategoriji ta’ tariffi differenti għall-elettriku fil-pajjiż rappreżentattiv skont il-ħin tal-konsum: l-ogħla livell u mhux fl-ogħla livell. . Fil-klassifikazzjoni tagħha, il-Kummissjoni nnotat li r-rata fissa medja rrapportata mill-produtturi Ċiniżi kienet aktar simili għar-rati massimi u b’hekk użat it-tariffi massimi fil-pajjiż rappreżentattiv bħala parametru referenzjarju għall-konsum irrapportat bħala ġenerali, ċatt, għoli u għoli u użat it-tariffa mhux fl-ogħla livell bħala parametru referenzjarju għall-konsum irrapportat bħala baxx. Il-Brother Group ma ssottometta l-ebda evidenza li tappoġġa l-asserzjoni li l-konsum ċatt għandu jiġi kkunsidrat bħala mhux fl-ogħla livell minflok konsum fl-ogħla livell. Għalhekk, tqies aktar xieraq li t-tariffa fissa tiġi kklassifikata bħala r-rata massima.

(74)

Fin-nuqqas ta’ kwalunkwe kumment, is-sejbiet fil-premessa (175) tar-Regolament proviżorju huma kkonfermati.

(75)

Fin-nuqqas ta’ kwalunkwe kumment, is-sejbiet fil-premessa (176) tar-Regolament proviżorju huma kkonfermati.

(76)

Wara l-pubblikazzjoni tar-Regolament proviżorju, Chinafar Group, Junyue, Brother Group u EFDA tennew li l-kumpaniji identifikati tal-Malażja kienu aktar affidabbli u rappreżentattivi meta mqabbla ma’ dawk tat-Tajlandja.

(77)

Fir-rigward tar-rappreżentattività tal-kumpaniji fil-Malażja, il-Kummissjoni diġà spjegat fil-premessi (143) u (144) tar-Regolament proviżorju għaliex ma qisitx tnejn mit-tliet kumpaniji fil-Malażja bħala parametri referenzjarji aktar affidabbli u rappreżentattivi mill-kumpaniji fit-Tajlandja.

(78)

Wara l-impożizzjoni ta’ miżuri proviżorji, Brother Group, Junyue u Chinafar Group affermaw li l-Kummissjoni għamlet żball meta skwalifikat lill-kumpanija Malażjana Tong Herr Fasteners Co. Sdn. Bhd. (“Tong Herr”) bħala kumpanija xierqa. Junygue sostniet li r-rapport tal-introjtu ta’ Tong Herr wera li l-kumpanija kienet profittabbli fl-2024, filwaqt li Brother Group afferma li l-Kummissjoni setgħet tiddependi biss fuq waħda mis-sentejn finanzjarji li jikkoinċidu mal-perjodu ta’ investigazzjoni.

(79)

Il-Kummissjoni nnotat li Junyue ppreżentat ir-rapport tal-introjtu korporattiv għal Tong Herr Resources Bhd., minflok għal Tong Herr, id-diviżjoni tal-grupp li timmanifattura l-irbit. B’riżultat ta’ dan, din l-informazzjoni ma setgħetx tintuża bħala evidenza biex jintwera li d-diviżjoni kienet profittabbli fl-2024.

(80)

Għalhekk, l-affermazzjoni li l-kumpaniji fil-Malażja identifikati kienu aktar affidabbli u rappreżentattivi meta mqabbla ma’ dawk tat-Tajlandja ġiet miċħuda.

(81)

Wara l-pubblikazzjoni tar-Regolament proviżorju, Chinafar Group, Junyue, Brother Group, u EFDA affermaw li l-parametru referenzjarju tat-Tajlandja għal SG&A u l-profitti kienu għoljin b’mod mhux raġonevoli minħabba li l-Kummissjoni bbażat biss fuq żewġ kumpaniji, Sanwa Iron (Thailand) Company Ltd. u Thai Meira Co, Ltd, u minħabba li dan il-kampjun kien affettwat mill-marġni ta’ profitt eċċessiv ta’ dawn tal-aħħar, li ma kienx rappreżentattiv tal-livell normali tal-profitt fis-settur tal-manifattura.

(82)

Chinafar Group u Junyue tennew il-kummenti tagħhom li saru fi stadju proviżorju li dan il-profitt għoli mhux rappreżentattiv kien minħabba li l-mudell kummerċjali ta’ Thai Meira kien iffukat fuq il-manifattura ta’ rbit speċjalizzat u ta’ livell għoli. Huma ppreżentaw ukoll li sehem żgħir biss tal-produzzjoni ta’ Thai Meira kien irrappreżentat minn viti mingħajr irjus, u dan għamel lill-kumpanija mhux adegwata għall-kalkolu tal-parametru referenzjarju għal SG&A u l-profitt.

(83)

L-ewwel nett, il-Kummissjoni diġà spjegat fil-premessa (139) tar-Regolament proviżorju li ma kien hemm l-ebda evidenza li l-profittabbiltà tal-bejgħ fis-setturi speċjalizzati kienet ogħla mill-bejgħ lil setturi oħra.

(84)

It-tieni, il-Kummissjoni ma setgħetx tidentifika xi kumpaniji li pproduċew esklużivament il-prodott li qiegħed jiġi investigat u konsegwentement kellha tirrikorri għal kumpaniji li jipproduċu firxa usa’ ta’ prodotti, inkluż il-prodott li qiegħed jiġi investigat. Dan kien japplika għal Thai Meira u għall-produtturi l-oħra kollha fit-Tajlandja kif ukoll fil-Malażja. Il-fatt li Thai Meira pproduċiet prodotti oħra minbarra l-prodott li qiegħed jiġi investigat ma kienx ta’ ħsara għall-adegwatezza tagħha bħala kumpanija rappreżentattiva għad-determinazzjoni ta’ parametru referenzjarju għall-profitti u l-SG&A. L-affermazzjoni ġiet miċħuda.

(85)

Chinafar Group argumenta li l-kumpanija Tajlandiża S.J. Screws Co. Ltd. tqieset bħala kumpanija rappreżentattiva f’investigazzjoni anti-dumping preċedenti dwar ċertu rbit tal-ħadid jew tal-azzar, li huwa prodott simili għall-prodott ikkonċernat.

(86)

Il-perjodu ta’ investigazzjoni fl-investigazzjoni dwar ċertu rbit tal-ħadid jew tal-azzar li joriġina miċ-Ċina kien mill-1 ta’ Lulju 2019 sat-30 ta’ Ġunju 2020. Kwalunkwe sejba f’dak il-każ seħħet qabel il-perjodu kkunsidrat fl-investigazzjoni kurrenti. Fl-investigazzjoni kurrenti, il-Kummissjoni sabet li S.J. Screws Co. Ltd. kienet kumpanija li tinnegozja, u mhux li tipproduċi l-prodott li qiegħed jiġi investigat u għalhekk ma setgħetx titqies għad-determinazzjoni ta’ parametru referenzjarju għall-SG&A u l-profitt.

(87)

Chinafar Group, Junyue, Brother Group u EFDA affermaw li l-Kummissjoni għandha mill-inqas iżżid in-numru ta’ kumpaniji mit-Tajlandja inklużi fil-ġabra ta’ kumpaniji użati għall-kalkolu tal-SG&A u l-profitt sabiex iżżid ir-rappreżentattività u l-affidabbiltà tagħha.

(88)

Junyue ppreżenta informazzjoni faċilment disponibbli ta’ 19 kumpanija Tajlandiża addizzjonali miksuba mill-bażi tad-data tal-Maħżen tad-Data dwar l-Iżvilupp tan-Negozju tad-Dipartiment tal-Gvern Tajlandiż (11), li pprovdiet informazzjoni disponibbli għall-pubbliku dwar il-kumpaniji fit-Tajlandja.

(89)

Brother Grupp u EFDA pproponew li jinkludu żewġ kumpaniji addizzjonali: Tycoon Worldwide Group u Thaisin Metal Industries Co., Ltd.

(90)

EFDA u Chinafar Group talbu lill-Kummissjoni tikkunsidra mill-ġdid il-ħames kumpaniji diġà identifikati fil-premessa (140) tar-Regolament proviżorju. Huma kkontestaw id-deċiżjoni tal-Kummissjoni li teskludi dawn il-kumpaniji abbażi tal-livell ta’ profitt baxx tagħhom. Fil-fehma tagħhom, din id-deċiżjoni kienet arbitrarja u mhux ġustifikata.

(91)

Wara li analizzat id-data finanzjarja faċilment disponibbli tal-kumpaniji proposti mill-esportaturi Ċiniżi, il-Kummissjoni aċċettat l-affermazzjoni fir-rigward taż-żieda fl-għadd ta’ kumpaniji mit-Tajlandja li għandhom jiġu inklużi fil-grupp ta’ kumpaniji li għandhom jintużaw għall-kalkolu tal-SG&A u l-profitt. B’riżultat ta’ dan, il-Kummissjoni inkludiet tliet kumpaniji addizzjonali, Thaisin Metal Industries Co., Ltd., Boonsan Fastener Limited Partnership, Yahata Fastener Thai Co., Ltd., li kkonformaw mal-istess kriterji użati biex intgħażlu Sanwa Iron (Thailand) Company Ltd. u Thai Meira Co, Ltd.

(92)

Il-Kummissjoni ma qisitx il-kumpaniji l-oħra proposti minn Junyue għar-raġunijiet li ġejjin:

(93)

Il-Kummissjoni kkonfermat id-deċiżjoni li ma jiġix inkluż Tycoon Worldwide Group, peress li l-profitt medju ponderat tiegħu matul l-2023 u l-2024 wera telf.

(94)

Il-Kummissjoni kkonfermat id-deċiżjoni tagħha li teskludi l-ħames kumpaniji identifikati fil-premessa (140) tar-Regolament proviżorju, abbażi tal-livell ta’ profitt baxx tagħhom (0,35 % sa 1,31 %), li tqies li ma kienx livell raġonevoli ta’ profitt skont l-Artikolu 2(6a)(a) tar-Regolament bażiku, meta jitqies li kienu qed joperaw qrib il-punt ta’ ekwilibriju.

(95)

Bħala riżultat, l-SG&A, espressi bħala perċentwal tal-Kostijiet tal-Prodotti Mibjugħa (“COGS”, Costs of Goods Sold) u applikati għall-kostijiet tal-produzzjoni mingħajr distorsjoni, żdiedu minn 8 % għal 9,6 %. Il-profitt espress bħala perċentwal tas-COGS u applikat għall-kostijiet tal-produzzjoni mingħajr distorsjoni naqas minn 21,2 % għal 14,8 %.

(96)

Wara d-divulgazzjoni definittiva, Brother Group u Junyue tennew l-affermazzjoni li l-kumpaniji Malasjani identifikati kienu aktar affidabbli u rappreżentattivi minn dawk mit-Tajlandja. It-tnejn li huma ma qablux mad-deċiżjoni tal-Kummissjoni li tiskwalifika lil Tong Herr. Brother Group issottometta r-rapport tal-introjtu tal-2024 ta’ din il-kumpanija li juri profitt medju ponderat pożittiv matul l-2023 u l-2024. Junyue sostna wkoll li l-Kummissjoni injorat kompletament iż-żewġ kumpaniji Malasjani l-oħra, Chin Well u Sanwa Iron (il-Malażja), fl-analiżi tagħha.

(97)

Il-Kummissjoni sabet li r-rapporti tal-introjtu għal Tong Herr kemm fl-2023 kif ukoll fl-2024 kienu jinkludu ċertu ammont ta’ introjtu ieħor, jiġifieri ta’ introjtu għajr dħul mill-bejgħ. Il-prattika tal-Kummissjoni hija li ma tqisx dan il-komponent tal-introjtu meta tikkalkula l-proporzjonijiet tal-profitt u tal-SG&A. It-tneħħija tal-introjtu l-ieħor mill-kalkolu tirriżulta f’telf għas-sentejn li huma.

(98)

Il-Kummissjoni stabbiliet ir-raġunijiet fil-premessa (144) tar-Regolament provviżorju għaliex ma qisitx lil Chin Well aktar affidabbli u rappreżentattiva għad-determinazzjoni tal-SG&A u l-proporzjonijiet tal-profitt mill-kumpaniji Tajlandiżi.

(99)

Filwaqt li Sanwa Iron (il-Malażja) tista’ titqies bħala kumpanija xierqa, il-Kummissjoni kkonkludiet li l-grupp usa’ ta’ kumpaniji Tajlandiżi stabbilit fil-premessa (91) pprovda sett ta’ data aktar affidabbli u rappreżentattiv mill-kumpaniji Malasjani.

(100)

Għalhekk, ġew miċħuda l-pretensjonijiet.

(101)

Brother Group u l-EFDA ma qablux mad-deċiżjoni tal-Kummissjoni li teskludi ċerti kumpaniji minħabba li ma pproduċewx il-prodott li qed jiġi investigat. Dawn il-kumpaniji mmanifatturaw prodotti fil-kategorija usa’ tal-elementi tal-irbit; barra minn hekk, l-ebda waħda mill-kumpaniji magħżula ma pproduċiet esklussivament il-prodott investigat iżda wkoll firxa wiesgħa ta’ prodotti.

(102)

Junyue sostna wkoll li l-esklużjoni ta’ ċerti kumpaniji fuq bażi individwali kienet mingħajr mertu. Is-sottomissjoni ta’ Junyue fl-istadju provviżorju kienet ibbażata fuq ċifri aggregati li jirrappreżentaw l-industrija tal-elementi tal-irbit Tajlandiża kollha kemm hi. Junyue argumenta li kwalunkwe anomalija, bħal livelli baxxi ta’ profitt jew proporzjonijiet SG&A eċċessivament għoljin ġew ibbilanċjati permezz tal-aggregazzjoni tad-data.

(103)

Barra minn hekk, Junyue sostna li l-Kummissjoni ma pprovdietx ġustifikazzjoni adegwata għall-esklużjoni ta’ kumpaniji bbażati fuq il-bażi tad-data Orbis jew is-siti web tagħhom, peress li d-Dokument ta’ Divulgazzjoni Ġenerali (GDD) ma kellux evidenza ta’ sostenn għal din id-deċiżjoni.

(104)

L-ewwel nett, il-Kummissjoni osservat li l-użu ta’ data aggregata tal-industrija ma eliminax il-ħtieġa li titwettaq valutazzjoni individwali tas-sitwazzjoni speċifika tal-produzzjoni u finanzjarja ta’ kull kumpanija meta mqabbla mal-prodott li qed jiġi investigat, peress li din id-data kienet disponibbli. Din il-valutazzjoni individwali kienet essenzjali biex jiġi ddeterminat jekk kumpanija kinitx xierqa biex tiġi inkluża fil-pool ta’ kumpaniji għad-determinazzjoni tal-profitt u l-proporzjonijiet SG&A.

(105)

It-tieni, l-informazzjoni mill-bażi tad-data Orbis kienet faċilment disponibbli, u data simili setgħet tinkiseb ukoll mill-bażi tad-data tal-Maħżen tad-Data Tajlandiżi faċilment disponibbli. Barra minn hekk, l-informazzjoni miksuba mis-siti web (16) relatati mal-kumpaniji esklużi mill-għażla, skont il-punt 4 tal-premessa (92) ta’ dan ir-Regolament, kienet disponibbli faċilment u ma kinitx konklużiva tal-produzzjoni tal-prodott li qed jiġi investigat. Għall-kumpanija Mongkol Fasteners & ampParts Co., Ltd (17)., il-Kummissjoni ma setgħetx tikkonkludi mill-informazzjoni disponibbli li hija kienet produttur ġenwin.

(106)

Għalhekk, il-Kummissjoni kkonkludiet li l-partijiet interessati kellhom aċċess għall-evidenza meħtieġa. Barra minn hekk, Junyue ma ressaq l-ebda argument li jbiddel is-sejbiet tal-Kummissjoni fil-premessi (91) sa (95).

(107)

Għalhekk, ġew miċħuda l-pretensjonijiet.

(108)

Wara l-pubblikazzjoni tar-Regolament proviżorju, l-EIFI issottometta kummenti fejn qabel mal-metodoloġija applikata mill-Kummissjoni biex jiġu stabbiliti l-marġnijiet tad-dumping. Madankollu, l-EIFI afferma wkoll li wara l-perjodu ta’ investigazzjoni, il-prezzijiet tal-esportazzjoni tal-produttur esportatur Ċiniż naqsu u talab li d-data ta’ wara l-perjodu ta’ investigazzjoni għandha tintuża biex jiġu vvalutati mill-ġdid il-marġnijiet tad-dumping.

(109)

Il-Kummissjoni ma taqbilx ma’ din il-fehma. Kif huwa stipulat fl-Artikolu 6(1) tar-Regolament bażiku, l-investigazzjoni trid tkopri kemm id-dumping kif ukoll id-dannu u dawn iridu jiġu investigati b’mod simultanju u, għall-finijiet ta’ sejba rappreżentattiva, irid jintgħażel perjodu ta’ investigazzjoni. It-tielet subparagrafu tal-istess Artikolu jkompli jiddikjara li l-informazzjoni relatata ma’ perjodu sussegwenti għall-perjodu ta’ investigazzjoni normalment ma għandhiex titqies. Ta’ min jinnota wkoll li l-prezzijiet normalment ivarjaw ’il fuq jew ’l isfel wara l-perjodu ta’ investigazzjoni. Għalhekk, il-varjazzjonijiet fil-prezzijiet waħedhom ma humiex biżżejjed per se biex jiġġustifikaw ħarsa lejn id-data ta’ wara l-perjodu ta’ investigazzjoni. Fin-nuqqas ta’ kwalunkwe raġuni partikolari għaliex f’dan il-każ il-Kummissjoni għandha tiddevja mir-regola ġenerali tal-Artikolu 6(1) u tqis id-data ta’ wara l-perjodu ta’ investigazzjoni, it-talba tal-EIFI instabet li ma hijiex iġġustifikata. Għalhekk, din l-affermazzjoni ġiet miċħuda.

(110)

Wara d-divulgazzjoni definittiva, l-EIFI tenna l-kummenti tiegħu billi sostna li d-dazji anti-dumping proposti ma jirriflettux il-livell ta’ dumping u jenħtieġ li jiġu vvalutati mill-ġdid abbażi tal-volumi u l-prezzijiet tal-importazzjoni minn perjodu sussegwenti għall-perjodu ta’ investigazzjoni. L-EIFI sostna wkoll li l-Kummissjoni ma kinitx konformi mal-Artikolu 6(1) tar-Regolament bażiku billi ma vvalutatx id-data relatata mal-perjodu ta’ wara l-investigazzjoni għad-determinazzjoni tal-livell tad-dazji anti-dumping.

(111)

Il-Kummissjoni ma qablitx ma’ din il-fehma għar-raġunijiet diġà spjegati fil-premessa (109) hawn fuq. Barra minn hekk, il-livell ta’ dumping huwa stabbilit għal kull produttur esportatur investigat individwalment, billi jitqabbel il-valur normali individwali tiegħu mal-prezzijiet tal-esportazzjoni tiegħu. Għalhekk, l-informazzjoni sottomessa mill-EIFI dwar il-fluttwazzjonijiet ġenerali tal-prezzijiet tal-esportazzjoni mingħajr ebda informazzjoni dettaljata dwar il-prezzijiet tal-esportazzjoni tal-produtturi esportaturi inklużi fil-kampjun, aħseb u ara l-valuri normali tagħhom, matul il-perjodu ta’ wara l-investigazzjoni, fi kwalunkwe każ ma tkunx biżżejjed biex jiġu vvalutati mill-ġdid il-marġnijiet tad-dumping tagħhom. Għalhekk, din l-affermazzjoni kienet rifjutata.

(112)

Wara l-pubblikazzjoni tar-Regolament proviżorju Junyue tenniet l-affermazzjoni tagħha li l-metodoloġija użata mill-Kummissjoni biex tistabbilixxi l-proporzjon tal-SG&A tirriżulta f’paragun inġust bejn il-valur normali u l-prezz tal-esportazzjoni minħabba li l-Kummissjoni ma naqqsitx il-kwoti bħall-imposti bankarji, il-kost tal-kreditu tal-merkanzija bil-baħar u l-assigurazzjoni tal-baħar fil-proporzjon tal-SG&A li nħadem, filwaqt li naqqset dawn il-kostijiet mill-kalkolu tal-prezz tal-esportazzjoni ta’ Junyue. Barra minn hekk, Chinafar appoġġat din l-affermazzjoni b’argumenti simili.

(113)

Għalkemm Junyee spjegat ukoll għaliex ma qablitx mar-raġunament tal-Kummissjoni spjegat fil-premessi (190) – (194) tar-Regolament proviżorju, la Junyue u lanqas Chinafar ma pprovdew l-ebda evidenza addizzjonali biex jappoġġaw l-affermazzjonijiet tagħhom, b’mod partikolari ma kien hemm l-ebda evidenza li turi li l-kostijiet tal-SG&A tal-kumpaniji mit-Tajlandja kkonċernati kienu jinkludu kostijiet tat-trasport għall-konsenja lill-klijenti.

(114)

Il-Kummissjoni ssostni li l-valur normali ġie stabbilit fil-livell tal-kummerċ mill-fabbrika billi ntużaw il-kostijiet tal-produzzjoni flimkien mal-ammonti għall-SG&A u l-profitt, li tqiesu raġonevoli għal dak il-livell ta’ kummerċ. Għalhekk, ma kien hemm bżonn tal-ebda aġġustament biex il-valur normali jiġi lura nett għal-livell ta’ kif joħroġ mill-fabbrika. Għalhekk, dawn l-affermazzjonijiet huma miċħuda u l-premessi (188) u (193) sa (197) tar-Regolament proviżorju huma kkonfermati.

(115)

Wara d-divulgazzjoni definittiva, Junyue tenna l-affermazzjoni tiegħu dwar it-tqabbil bejn il-valur normali tiegħu u l-prezz tal-esportazzjoni. Junyue sostna wkoll li jenħtieġ li l-Kummissjoni ġġorr l-oneru li tipprova li l-parametri referenzjarji mibnija għall-valur normali huma stabbiliti fil-livell tal-kummerċ mill-fabbrika. Din l-affermazzjoni kienet essenzjalment l-istess bħal dik li diġà saret wara t-Tieni Nota u indirizzata fil-premessi (190) – (194) tar-Regolament provviżorju u ma ġie ppreżentat l-ebda argument jew evidenza ġdida. Għalhekk, din l-affermazzjoni kienet rifjutata.

(116)

Kif deskritt fil-premessi (72) sa (91), wara l-asserzjonijiet mill-partijiet interessati, il-Kummissjoni rrevediet il-marġnijiet tad-dumping.

(117)

Il-marġnijiet tad-dumping definittivi espressi bħala perċentwal tal-prezz fil-fruntiera tal-Unjoni tal-kost, assigurazzjoni u nol (CIF, cost, insurance and freight), bid-dazju mhux imħallas, huma kif ġej:

(118)

Għall-produtturi esportaturi li kkooperaw li ma kinux inklużi mill-kampjun, il-Kummissjoni kkalkolat il-marġni tad-dumping medju ponderat tal-produtturi esportaturi inklużi fil-kampjun, f’konformità mal-Artikolu 9(6) tar-Regolament bażiku.

(119)

Kif huwa spjegat fil-premessa (203) tar-Regolament proviżorju, il-livell ta’ kooperazzjoni f’dan il-każ kien għoli. Fuq din il-bażi, il-Kummissjoni qieset li huwa xieraq li tistabbilixxi l-marġni tad-dumping għall-produtturi esportaturi li ma kkooperawx fil-livell tal-kumpanija li kkooperat inkluża fil-kampjun eżaminata fuq bażi individwali bl-ogħla marġni tad-dumping.

(120)

Ma wasal l-ebda kumment dwar id-definizzjoni tal-industrija tal-Unjoni u l-produzzjoni tal-Unjoni. Għalhekk, il-konklużjonijiet mill-premessi (205) sa (206) tar-Regolament proviżorju ġew ikkonfermati.

(121)

Ma wasal l-ebda kumment dwar il-konsum tal-Unjoni. Għalhekk, il-konklużjonijiet mill-premessi (207) sa (209) tar-Regolament proviżorju ġew ikkonfermati.

(122)

Ma wasal l-ebda kumment dwar il-volum u s-sehem mis-suq tal-importazzjonijiet mill-pajjiż ikkonċernat. Għalhekk, il-konklużjonijiet mill-premessi (210) sa (213) tar-Regolament proviżorju ġew ikkonfermati.

(123)

Chinafar Group sostna li l-użu baxx tal-kapaċità tal-kumpaniji inklużi fil-kampjun ikkawża inflazzjoni artifiċjali tal-kostijiet tal-produzzjoni tal-unitajiet (minħabba l-allokazzjoni tal-kostijiet fissi) u rriżulta f’marġnijiet ta’ bejgħ taħt il-prezz għoljin b’mod sproporzjonat. Chinafar għalhekk talab li jiġi kkalkolat mill-ġdid l-użu tal-kapaċità f’konformità mal-metodoloġiji standard tal-industrija biex jiġi indirizzat dan it-tħassib.

(124)

Il-Kummissjoni nnotat li l-marġnijiet tal-bejgħ taħt il-prezz huma bbażati fuq id-data tat-tliet kumpaniji inklużi fil-kampjun, fejn il-kostijiet fissi jammontaw għal anqas minn 30 % tal-kostijiet tal-produzzjoni totali. Dan il-proporzjon ta’ kostijiet fissi bħala sehem mill-kostijiet totali tal-produzzjoni jista’ jitqies ukoll bħala baxx fir-rigward tan-normi u d-data tal-industrija mis-settur relatat mal-prodott ikkonċernat. L-affermazzjoni li l-użu tal-kapaċità baxx “tikkawża inflazzjoni artifiċjali” tal-kostijiet għalhekk kienet bla bażi, peress li l-allokazzjoni użata għall-kalkolu tal-marġni tal-bejgħ bil-prezz imwaqqa’ tibqa’ fi ħdan il-parametri aċċettabbli. Għalhekk, l-affermazzjoni ġiet miċħuda.

(125)

Ma wasal l-ebda kumment ieħor dwar il-prezzijiet tal-importazzjonijiet mill-pajjiż ikkonċernat, it-twaqqigħ tal-prezz u s-suppressjoni tal-prezz. Għalhekk, il-konklużjonijiet mill-premessi (214) sa (219) tar-Regolament proviżorju ġew ikkonfermati.

(126)

Ma wasal l-ebda kumment dwar is-sitwazzjoni ekonomika tal-industrija tal-Unjoni. Għalhekk, il-konklużjonijiet mill-premessi (220) sa (254) tar-Regolament proviżorju ġew ikkonfermati.

(127)

Importatur wieħed, Kohlhage, sostna li l-industrija tal-Unjoni qiegħda tiffaċċja sfidi minn pressjonijiet esterni (tensjonijiet ġeopolitiċi, sanzjonijiet, u ostakli għall-kummerċ) u falliment fil-politika interna (miżuri għat-tisħiħ tal-produttività insuffiċjenti), li wasslu għal żieda fl-inflazzjoni u l-kostijiet tal-produzzjoni. Huwa argumenta li d-dazji anti-dumping fuq il-prodott ma jindirizzawx dawn il-kwistjonijiet sistemiċi u jistgħu jnaqqsu aktar il-produttività f’setturi li jiddependu fuq il-prodotti importati, u dan jaggrava l-inflazzjoni.

(128)

Madankollu, kif iddikjarat fil-premessa (274) tar-Regolament proviżorju, l-argument li l-miżuri anti-dumping ifixklu l-kapaċità tal-industrija tal-Unjoni li taġġusta l-prezzijiet skont iż-żidiet fil-kostijiet huwa bla bażi. Mingħajr importazzjonijiet oġġett ta’ dumping li jeżerċitaw pressjoni ’l isfel fuq il-prezzijiet, l-industrija tal-Unjoni tista’ twieġeb b’mod indipendenti għall-kundizzjonijiet tas-suq. L-affermazzjoni kellha nuqqas ta’ evidenza ulterjuri biex turi kif id-dazji anti-dumping se jaggravaw il-produttività jew l-inflazzjoni fis-setturi downstream. Għaldaqstant, l-argument ġie miċħud.

(129)

Ma wasal l-ebda kumment ieħor dwar il-kawżalità. Għalhekk, il-konklużjonijiet mill-premessi (255) sa (275) tar-Regolament proviżorju ġew ikkonfermati.

(130)

L-EIFI argumenta li l-livell tad-dazji proviżorji ma jindirizzax biżżejjed is-serjetà tad-dannu kkawżat mill-importazzjonijiet oġġett ta’ dumping u ma llimitax iż-żieda sinifikanti fl-importazzjonijiet oġġett ta’ dumping, li kompliet tagħmel pressjoni fuq l-industrija tal-Unjoni wara l-bidu tal-investigazzjoni, murija minn xejra ’l fuq fil-volumi tal-importazzjoni u xejra ’l isfel fil-prezzijiet medji tal-importazzjoni. Għalhekk, l-EIFI talab rivalutazzjoni tal-livell tad-dazji biex iqis bis-sħiħ dawn il-bidliet wara l-PI u biex jiġi aġġornat il-kalkolu tad-dumping billi jitqabblu l-prezzijiet CIF Ċiniżi ta’ wara l-PI u l-offerti tal-prezzijiet mal-valur normali mibni, biex jiġi ddeterminat jekk il-marġni tad-dumping kif ikkalkolat għall-PI għadux xieraq f’kundizzjonijiet tas-suq aktar reċenti.

(131)

Kif iddikjarat mill-EIFI stess, l-informazzjoni relatata ma’ perjodu sussegwenti għall-perjodu ta’ investigazzjoni normalment ma għandhiex titqies, skont l-Artikolu 6(1), it-tielet subparagrafu, tar-Regolament bażiku. L-unika fluttwazzjoni fil-volumi u fil-prezzijiet tal-importazzjoni wara l-perjodu ta’ investigazzjoni ma kinitx tikkostitwixxi ċirkostanza bħal li d-dazju anti-dumping propost isir manifestament mhux xieraq, speċjalment peress li ż-żieda fil-volumi tal-importazzjoni miċ-Ċina wkoll wara l-perjodu ta’ investigazzjoni ġiet ivvalutata għall-ġbir retroattiv tad-dazji definittivi, kif stabbilit fit-Taqsima 8.3 hawn taħt.

(132)

Għalhekk, il-Kummissjoni ċaħdet l-affermazzjoni.

(133)

Ma wasal l-ebda kumment ieħor dwar il-livell ta’ miżuri. Għalhekk, il-konklużjonijiet mill-premessi (276) sa (284) tar-Regolament proviżorju ġew ikkonfermati.

(134)

Għalhekk, il-livell finali tal-marġni tad-dumping u l-livell ta’ eliminazzjoni tad-dannu għall-produtturi esportaturi li kkooperaw u għall-kumpaniji l-oħrajn kollha huwa kif ġej:

(135)

Il-livell ta’ eliminazzjoni tad-dannu għal “kumpaniji oħra li kkooperaw” u għal “l-importazzjonijiet l-oħrajn kollha li joriġinaw mill-pajjiż ikkonċernat” huwa definit bl-istess mod bħall-marġni tad-dumping għal dawn il-kumpaniji u l-importazzjonijiet, kif stipulat fil-premessa (118).

(136)

Kif huwa spjegat fil-premessa (203) tar-Regolament proviżorju, il-livell ta’ kooperazzjoni f’dan il-każ kien għoli. Fuq din il-bażi, il-Kummissjoni qieset li huwa xieraq li tistabbilixxi l-marġni tad-dumping u l-livell finali ta’ eliminazzjoni għall-produtturi esportaturi li ma kkooperawx fil-livell tal-kumpanija li kkooperat inkluża fil-kampjun eżaminata fuq bażi individwali bl-ogħla marġni tad-dumping u livell finali ta’ eliminazzjoni, rispettivament.

(137)

Wara d-divulgazzjoni definittiva, l-EIFI sostna li 17-il kumpanija elenkati fl-Anness ma kellhomx jitqiesu li kkooperaw minħabba li dawn il-kumpaniji pprovdew id-dokumenti supplimentari mitluba mill-Kummissjoni fid-19 ta’ Ġunju 2025 tard jew mhux kompluti.

(138)

Il-Kummissjoni eżaminat is-sottomissjonijiet u nnotat li għalkemm xi wħud mis-sottomissjonijiet waslu wara l-iskadenza stabbilita inizjalment tas-26 ta’ Ġunju 2025, id-dewmien jew in-nuqqasijiet ma kinux tant sinifikanti li dawn il-kumpaniji ma setgħux jitqiesu li kkooperaw. Għalhekk, din l-affermazzjoni kienet rifjutata.

(139)

Wara d-divulgazzjoni definittiva, tliet produtturi esportaturi Ċiniżi addizzjonali pprovdew id-dokumenti supplimentari mitluba. Il-Kummissjoni eżaminat is-sottomissjonijiet u ddeċidiet li tinkludi l-kumpaniji fl-Anness. Il-Kummissjoni ddivulgat l-Anness emendat fis-16 ta’ Settembru 2025. Ma wasal l-ebda kumment.

(140)

Wara l-valutazzjoni ta’ hawn fuq, id-dazji anti-dumping definittivi jenħtieġ li jiġu stabbiliti kif ġej f’konformità mal-Artikolu 7(2) tar-Regolament bażiku:

(141)

Wara d-divulgazzjoni proviżorja, l-Assoċjazzjoni Ewropea tal-Azzar EUROFER, li tirrappreżenta l-fornituri tas-substrat tal-azzar tal-vireg tal-wajer użati fil-produzzjoni tal-viti, appoġġat l-impożizzjoni tal-miżuri.

(142)

Barra minn hekk, l-EIFI ippreżenta bosta ittri ta’ appoġġ minn diversi entitajiet fl-industriji upstream u downstream li jappoġġaw l-impożizzjoni ta’ miżuri.

(143)

Importatur minnhom, Pretec AB, argumenta li l-impożizzjoni ta’ dazji anti-dumping tagħmel ħsara lill-importaturi Nordiċi u lill-utenti finali minħabba nuqqas ta’ alternattivi tal-Unjoni għal SIRs b’tulijiet ta’ 5,8 metri, iżżid il-kostijiet u thedded il-proġetti infrastrutturali.

(144)

Il-Kummissjoni nnotat li l-importazzjonijiet minn pajjiżi terzi mhux Ċiniżi diġà kienu jammontaw għal 13 % tas-suq matul il-PI, filwaqt li l-miżuri anti-dumping għandhom l-għan li jirrestawraw il-kompetizzjoni ġusta, u mhux jipprojbixxu l-importazzjonijiet Ċiniżi, billi jiżguraw ukoll li jibqgħu disponibbli alternattivi. Barra minn hekk, kif previst fil-premessa (19), l-evidenza mill-EIFI ikkonfermat li l-produtturi tal-Unjoni għandhom il-kapaċità li jipproduċu SIRs b’daqs sa sitt metri, kif ukoll li japplikaw kisjiet taż-żingu u metodi ta’ protezzjoni kontra l-korrużjoni oħra, li tikkontradixxi direttament l-affermazzjonijiet ta’ Pretec dwar in-nuqqas ta’ disponibbiltà. Dawn il-fatturi juru li jeżistu alternattivi vijabbli, li jtaffu t-tfixkil fis-suq potenzjali.

(145)

Ma wasal l-ebda kumment ieħor dwar l-interess tal-Unjoni. Għalhekk, il-konklużjonijiet dwar l-interess tal-Unjoni tar-Regolament proviżorju ġew ikkonfermati.

(146)

Fid-dawl tal-konklużjonijiet milħuqa fir-rigward tad-dumping, tad-dannu, tal-kawżalità, tal-livell tal-miżuri u tal-interess tal-Unjoni, u f’konformità mal-Artikolu 9(4) tar-Regolament bażiku, jenħtieġ li jiġu imposti miżuri anti-dumping definittivi sabiex ma jiġix ikkawżat dannu ulterjuri lill-industrija tal-Unjoni mill-importazzjonijiet oġġett ta’ dumping tal-prodott ikkonċernat.

(147)

Abbażi ta’ dak li ntqal hawn fuq, ir-rati tad-dazju anti-dumping definittivi, espressi skont il-prezz CIF fil-fruntiera tal-Unjoni, bid-dazju doganali mhux imħallas, jenħtieġ li jkunu kif ġej:

(148)

Ir-rati tad-dazju anti-dumping tal-kumpaniji individwali speċifikati f’dan ir-Regolament ġew stabbiliti abbażi tas-sejbiet ta’ din l-investigazzjoni. Għalhekk, dawn jirriflettu s-sitwazzjoni li nstabet matul din l-investigazzjoni fir-rigward ta’ dawn il-kumpaniji. B’hekk, dawn ir-rati tad-dazju huma applikabbli esklużivament għall-importazzjonijiet tal-prodott taħt investigazzjoni li joriġina mill-pajjiż konċernat u manifatturat mill-entitajiet legali msemmija. L-importazzjonijiet tal-prodott ikkonċernat immanifatturat minn kwalunkwe kumpanija oħra mhux imsemmija b’mod speċifiku fil-parti operattiva ta’ dan ir-Regolament, inklużi entitajiet relatati ma’ dawk imsemmija b’mod speċifiku, ma jistgħux jibbenefikaw minn dawn ir-rati u jenħtieġ li jkunu soġġetti għar-rata ta’ dazju applikabbli għall-“kumpaniji l-oħrajn kollha”.

(149)

Kumpanija tista’ titlob l-applikazzjoni ta’ dawn ir-rati tad-dazju anti-dumping individwali jekk hija sussegwentement tbiddel l-isem tal-entità tagħha. It-talba trid tiġi indirizzata lill-Kummissjoni (18). It-talba jrid ikun fiha l-informazzjoni rilevanti kollha li turi li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, se jiġi ppubblikat Regolament dwar il-bidla tal-isem f’Il-Ġurnal Uffiċjali tal-Unjoni Ewropea.

(150)

Sabiex jiġu minimizzati r-riskji ta’ ċirkomvenzjoni minħabba d-differenza fir-rati tad-dazju, huma meħtieġa miżuri speċjali biex tiġi żgurata l-applikazzjoni xierqa tad-dazji anti-dumping individwali. L-applikazzjoni tad-dazji anti-dumping individwali hija applikabbli biss mal-preżentazzjoni ta’ fattura kummerċjali valida lill-awtoritajiet doganali tal-Istati Membri. Il-fattura trid tikkonforma mar-rekwiżiti stipulati fl-Artikolu 1(3) ta’ dan ir-Regolament. Sakemm tiġi ppreżentata tali fattura, l-importazzjonijiet għandhom ikunu soġġetti għad-dazju anti-dumping applikabbli għall-“kumpaniji l-oħrajn kollha”.

(151)

Filwaqt li l-preżentazzjoni ta’ din il-fattura hija meħtieġa biex l-awtoritajiet doganali tal-Istati Membri jkunu jistgħu japplikaw ir-rati tad-dazju anti-dumping individwali fuq l-importazzjonijiet, din mhijiex l-uniku element li għandu jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, jenħtieġ li l-awtoritajiet doganali tal-Istati Membri jwettqu l-kontrolli tas-soltu tagħhom u jistgħu, bħal fil-każijiet l-oħrajn kollha, ikunu jirrikjedu dokumenti addizzjonali (dokumenti tat-tbaħħir, eċċ.) bl-għan li jivverifikaw l-akkuratezza tad-dettalji li jinsabu fid-dikjarazzjoni u jiżguraw li l-applikazzjoni sussegwenti tar-rata tad-dazju tkun ġustifikata, f’konformità mal-liġi doganali.

(152)

Jekk l-esportazzjonijiet minn waħda mill-kumpaniji li jibbenefikaw minn rati tad-dazju individwali aktar baxxi jiżdiedu b’mod sinifikanti fil-volum, b’mod partikolari wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont l-Artikolu 13(1) tar-Regolament bażiku. F’tali ċirkostanzi, tista’ tinbeda investigazzjoni antiċirkomvenzjoni, dment li jiġu ssodisfati l-kundizzjonijiet sabiex din issir. Din l-investigazzjoni tista’, inter alia, teżamina l-ħtieġa tat-tneħħija ta’ rata/i tad-dazju individwali u l-impożizzjoni konsegwenti ta’ dazju għall-pajjiż kollu.

(153)

Sabiex jiġi żgurat infurzar xieraq tad-dazji anti-dumping, jenħtieġ li d-dazju anti-dumping għall-kumpaniji l-oħrajn kollha japplika mhux biss għall-produtturi esportaturi li ma kkooperawx f’din l-investigazzjoni, iżda wkoll għall-produtturi li ma kellhomx esportazzjonijiet lejn l-Unjoni matul il-perjodu ta’ investigazzjoni.

(154)

Jenħtieġ li l-produtturi esportaturi li ma esportawx il-prodott ikkonċernat lejn l-Unjoni matul il-perjodu ta’ investigazzjoni jkunu jistgħu jitolbu lill-Kummissjoni sabiex tkun soġġetta għar-rata tad-dazju anti-dumping għall-kumpaniji li kkooperaw mhux inklużi fil-kampjun. Jenħtieġ li l-Kummissjoni tilqa’ talba bħal din dment li jiġu ssodisfati tliet kundizzjonijiet. Il-produttur esportatur il-ġdid ikollu juri li: (i) ma esportax il-prodott ikkonċernat lejn l-Unjoni matul il-PI; (ii) mhuwiex relatat ma’ produttur esportatur li għamel dan; u (iii) esporta l-prodott ikkonċernat wara dan jew daħal f’obbligu kuntrattwali irrevokabbli sabiex jagħmel dan fi kwantitajiet sostanzjali.

(155)

Fid-dawl tal-marġnijiet ta’ dumping li nstabu u minħabba l-livell tad-dannu kkawżat lill-industrija tal-Unjoni, jenħtieġ li l-ammonti ggarantiti permezz tad-dazji anti-dumping proviżorji, imposti bir-Regolament proviżorju, jinġabru b’mod definittiv sal-livelli stabbiliti skont dan ir-Regolament.

(156)

Kif imsemmi fit-Taqsima 1.2, il-Kummissjoni għamlet l-importazzjonijiet tal-prodott li qiegħed jiġi investigat soġġetti għal reġistrazzjoni.

(157)

Matul l-istadju definittiv tal-investigazzjoni, ġiet ivvalutata d-data miġbura fil-kuntest tar-reġistrazzjoni. Il-Kummissjoni analizzat jekk il-kriterji skont l-Artikolu 10(4) tar-Regolament bażiku kinux issodisfati għall-ġbir retroattiv tad-dazji definittivi.

(158)

Il-kriterji dwar jekk id-dazji jistgħux jinġabru matul il-perjodu ta’ reġistrazzjoni huma stabbiliti fl-Artikolu 10(4) tar-Regolament bażiku.

(159)

Il-kundizzjoni fl-Artikolu 10(4)(a) tar-Regolament bażiku hija ssodisfata billi l-importazzjonijiet ġew irreġistrati f’konformità mar-Regolament dwar ir-reġistrazzjoni, li f’dak iż-żmien kienet f’konformità mal-Artikolu 14(5) tar-Regolament bażiku.

(160)

L-importaturi ngħataw opportunità biex jikkummentaw f’konformità mal-Artikolu 10(4)(b) tar-Regolament bażiku wara l-pubblikazzjoni tar-Regolament dwar ir-reġistrazzjoni, kif ukoll il-pubblikazzjoni tar-Regolament proviżorju.

(161)

L-ebda parti interessata ma esprimiet l-oppożizzjoni tagħha għar-reġistrazzjoni. Madankollu, waslu kummenti mill-EFDA u mill-EIFI dwar l-impożizzjoni retroattiva possibbli tad-dazji. L-EIFI indika l-qbil tiegħu fil-ġbir tad-dazji matul il-perjodu ta’ reġistrazzjoni.

(162)

Skont l-Artikolu 10(4)(c) tar-Regolament bażiku, jeħtieġ li jkun hemm “storja ta’ dumping matul perjodu estiż, jew l-importatur kien konxju, jew kellu jkun konxju, tad-dumping fir-rigward tal-firxa tad-dumping, u d-dannu allegat jew misjub”. F’dan il-każ, il-Kummissjoni qieset li l-importaturi kienu konxji, jew kellhom ikunu konxji tad-dumping fir-rigward tal-grad tad-dumping u tad-dannu allegat jew misjub mid-data tal-bidu tal-investigazzjoni.

(163)

Fil-fatt, in-Notifika ta’ Bidu u l-verżjoni mhux kunfidenzjali tal-ilment kien fihom għadd ta’ dikjarazzjonijiet u elementi ta’ evidenza li jappoġġaw u jiddikjaraw il-firxa tad-dumping u d-dannu allegat, pereżempju fit-Taqsimiet 3 u 4 tan-Notifika ta’ Bidu, u fit-Taqsima B u C.5 tal-verżjoni mhux kunfidenzjali tal-ilment. Konsegwentement, il-Kummissjoni qieset li l-importaturi u l-utenti kienu konxji, jew kellhom ikunu konxji tal-prattiki ta’ dumping allegati, il-grad tagħhom u d-dannu allegat.

(164)

Madankollu, l-EFDA argumentat li l-importaturi tal-Unjoni ma kellhom l-ebda bażi storika biex jantiċipaw il-miżuri anti-dumping kontra l-viti mingħajr ras, peress li l-prodotti inkwistjoni tipikament jeħtieġu żmien meħtieġ għall-eżekuzzjoni tal-produzzjoni u l-konsenja tal-prodott ikkonċernat sa 6 xhur. Pereżempju, l-importazzjonijiet li waslu fl-Ewropa bejn Jannar u Marzu 2025 ġew ordnati sa minn Lulju 2024, qabel il-bidu tal-investigazzjoni. Il-Kummissjoni osservat li l-ebda evidenza sostanzjata fil-fajl ta’ din l-investigazzjoni ma kkonfermat żmien meħtieġ għall-eżekuzzjoni sa 6 xhur għal dawn l-importazzjonijiet, li jagħmel l-argument spekulattiv u mhux appoġġat minn data fattwali. Għalhekk, l-argument ġie miċħud.

(165)

Barra minn hekk, skont l-Artikolu 10(4)(d) tar-Regolament bażiku, jeħtieġ li jkun hemm “żieda sostanzjali ulterjuri fl-importazzjonijiet minbarra l-livell ta’ importazzjonijiet li kkawżaw dannu matul il-perjodu ta’ investigazzjoni” li, fid-dawl taż-żmien u l-volum tagħha u ċirkostanzi oħrajn, x’aktarx li timmina serjament l-effett ta’ rimedju tad-dazji definittivi.

(166)

L-analiżi tal-Kummissjoni wriet żieda sostanzjali ulterjuri fl-importazzjonijiet minbarra l-livell ta’ importazzjonijiet li kkawżaw dannu matul il-perjodu ta’ investigazzjoni, kif preskritt mill-Artikolu 10(4)(d) tar-Regolament bażiku.

(167)

Għal din l-analiżi, il-Kummissjoni qabblet il-volumi medji tal-importazzjoni ta’ kull xahar tal-prodott ikkonċernat matul il-perjodu ta’ investigazzjoni mal-volumi u l-prezzijiet medji tal-importazzjoni fix-xahar wara l-bidu (matul il-perjodu minn Novembru 2024 sa Ġunju 2025), filwaqt li għamlet distinzjoni bejn (i) l-ewwel xhur sħaħ wara l-bidu tal-investigazzjoni sal-aħħar xahar sħiħ meta saret ir-reġistrazzjoni (Novembru 2024 sa Jannar 2025) u (ii) l-ewwel xhur sħaħ wara l-bidu tal-investigazzjoni sal-aħħar xahar sħiħ meta ġew adottati l-miżuri proviżorji (Novembru 2024 sa Ġunju 2025).

Tabella 1

Importazzjonijiet ta’ viti mingħajr irjus miċ-Ċina

(168)

Il-volum tal-importazzjonijiet medju ta’ kull xahar miċ-Ċina matul il-perjodu ta’ investigazzjoni kien ta’ 9 360 tunnellata. Il-volum medju tal-importazzjonijiet fix-xahar miċ-Ċina fil-perjodu li jibda fl-ewwel xahar sħiħ wara l-pubblikazzjoni tan-Notifika ta’ bidu tal-investigazzjoni f’Il-Ġurnal Uffiċjali tal-Unjoni Ewropea u li jintemm fl-aħħar xahar sħiħ sal-aħħar xahar sħiħ meta saret ir-reġistrazzjoni (Novembru 2024 sa Jannar 2025) kien ta’ 13 458 tunnellata, 44 % ogħla milli fil-perjodu ta’ investigazzjoni. Meta jitqabblu l-importazzjonijiet wara l-perjodu ta’ investigazzjoni mal-istess xhur matul il-perjodu ta’ investigazzjoni (jiġifieri Novembru 2023 sa Jannar 2024, b’volum ta’ importazzjonijiet medju ta’ kull xahar ta’ 8 768 tunnellata), biex tiġi evitata kwalunkwe differenza fl-istaġjonalità, il-bidla fil-medja ta’ kull xahar hija saħansitra ogħla b’żieda ta’ 53 %.

(169)

L-istess xejra tista’ tiġi nnotata meta jitqabblu l-importazzjonijiet matul il-perjodu ta’ investigazzjoni mal-perjodu wara l-bidu tal-każ sal-aħħar xahar sħiħ meta ġew adottati miżuri proviżorji.

(170)

Il-volum tal-importazzjonijiet medju ta’ kull xahar miċ-Ċina fil-perjodu li jibda fl-ewwel xahar sħiħ wara l-pubblikazzjoni tan-Notifika tal-bidu tal-investigazzjoni f’Il-Ġurnal Uffiċjali tal-Unjoni Ewropea u li jispiċċa fl-aħħar xahar sħiħ qabel l-impożizzjoni tal-miżuri proviżorji (Novembru 2024 sa Ġunju 2025) kien ta’ 13 427 tunnellata, jiġifieri 43 % ogħla milli mill-perjodu ta’ investigazzjoni. Meta jitqabblu l-importazzjonijiet wara l-perjodu ta’ investigazzjoni mal-istess xhur matul il-perjodu ta’ investigazzjoni (jiġifieri Novembru 2023 sa Ġunju 2024, b’volum ta’ importazzjonijiet medju ta’ 8 978 tunnellata fix-xahar), iż-żieda fil-medja fix-xahar hija ta’ 50 %.

(171)

Għalhekk, il-Kummissjoni kkonkludiet li kien hemm żieda sostanzjali fil-volumi tal-importazzjonijiet wara l-bidu.

(172)

L-EFDA argumentat li ż-żieda osservata fil-volumi tal-importazzjonijiet matul l-ewwel xhur tal-2025, b’mod partikolari f’Jannar u fi Frar, tallinja max-xejriet staġunali normali fl-industrija, peress li l-kumpaniji tipikament inaqqsu l-livelli tal-istokk f’Novembru u Diċembru għall-ġestjoni tal-inventarju ta’ tmiem is-sena u sussegwentement jirriġeneraw il-provvisti fl-ewwel xhur tas-sena. Din il-varjazzjoni ma hijiex relatata mal-investigazzjoni anti-dumping u minflok tirrifletti mġiba tas-suq ta’ rutina. Madankollu, il-Kummissjoni ċaħdet l-argument, peress li qabblet ukoll perjodi identiċi matul u wara l-PI, b’mod partikolari x-xhur bikrin ta’ kull sena u għalhekk l-effetti staġunali kienu riflessi fit-tqabbil.

(173)

L-EFDA argumentat li l-PI ra volumi ta’ importazzjonijiet baxxi b’mod mhux tas-soltu minħabba l-istokk żejjed ta’ wara l-pandemija fl-imħażen tal-Unjoni, xprunati minn interruzzjonijiet fil-katina tal-provvista u vjeġġi mdewma li wasslu għall-kumulazzjoni ta’ riżervi. Iż-żieda sussegwenti fl-importazzjonijiet wara l-PI tirrifletti korrezzjoni tas-suq peress li l-inventarji jirritornaw għal livelli tipiċi tagħhom, aktar milli jkun hemm xejra anormali. Il-Kummissjoni ċaħdet l-argument, billi, kif ġie nnotat fil-premessa (212) tar-regolament proviżorju, il-volumi tal-importazzjoni żdiedu matul il-PI fir-rigward tal-2023 minkejja li d-domanda fl-Unjoni baqgħet baxxa matul il-PI.

(174)

Barra minn hekk, il-Kummissjoni nnotat li l-prezz tal-importazzjonijiet medju naqas wara l-bidu tal-investigazzjoni. Meta wieħed iqabbel (i) l-ewwel xhur sħaħ wara l-bidu tal-investigazzjoni sal-aħħar xahar sħiħ meta saret ir-reġistrazzjoni bil-prezz medju fil-PI, jintwera tnaqqis ta’ 8,6 % fil-prezz minn 1 213 EUR/tunnellata għal EUR 1 109/tunnellata, u meta jitqabblu (ii) l-ewwel xhur sħaħ wara l-bidu tal-investigazzjoni sal-aħħar xahar sħiħ meta l-miżuri proviżorji ġew adottati bi tnaqqis fil-prezz medju tal-PI, instab tnaqqis ta’ 9 % fil-prezz (minn EUR 1 213/tunnellata għal EUR 1 104/tunnellata).

(175)

Fid-dawl ta’ dak ta’ hawn fuq, il-Kummissjoni setgħet tikkonkludi li ż-żieda fl-importazzjonijiet x’aktarx kienet se tippreġudika serjament l-effett rimedjali tad-dazju anti-dumping definittiv li għandu jiġi applikat, skont it-tifsira tal-Artikolu 10(4)(d) tar-Regolament bażiku.

(176)

Konsegwentement, il-Kummissjoni kkonkludiet li l-kundizzjonijiet kollha għall-ġbir retroattiv ġew issodisfati. Dazju antidumping definittiv għandu għalhekk jiġi impost fuq il-prodott ikkonċernat, li sar suġġett għal reġistrazzjoni mir-Regolament ta’ Implimentazzjoni (UE) 2025/141.

(177)

Il-livell tad-dazju li għandu jinġabar b’mod retroattiv għandu jiġi stabbilit fil-livell tad-dazju definittiv inkluż fl-Artikolu 1(2) hawn taħt.

(178)

Wara d-divulgazzjoni definittiva, l-EFDA, appoġġata minn Junyue and Chinafar Groups, ikkontestat l-applikazzjoni retroattiva tad-dazji skont l-Artikolu 10(4)(c) tar-Regolament bażiku, bl-argument li l-kundizzjonijiet għall-impożizzjoni retroattiva ma kinux issodisfati peress li ma kien hemm l-ebda evidenza ta’ dumping sostnut fuq perjodu estiż għall-prodott investigat. Għalhekk, l-importaturi la kienu konxji tal-allegat dumping u lanqas tal-firxa tad-dannu ddikjarat, b’mod partikolari minħabba l-esklużjoni espliċita tal-prodott mill-investigazzjoni anti-dumping preċedenti dwar ċerti qfieli tal-ħadid jew tal-azzar (19).

(179)

L-EFDA enfasizzat li l-biċċa l-kbira tal-importaturi huma intrapriżi żgħar u ta’ daqs medju (“SMEs”) b’kapaċità limitata li jivvalutaw b’mod indipendenti r-riskji tad-dumping. Dawn l-entitajiet tipikament joperaw bis-suppożizzjoni li l-prodotti importati jiġu pprezzati b’mod ġust, u ma jkunx raġonevoli li wieħed jistenna li l-SMEs jieħdu miżuri ta’ prekawzjoni b’mod proattiv kontra d-dumping għal prodotti li qabel ma kinux soġġetti għal skrutinju anti-dumping, kif ukoll li jippenalizzawhom. Iż-żieda fl-importazzjonijiet wara l-bidu tal-investigazzjoni kienet primarjament dovuta għal żminijiet ta’ tħejjija tal-katina tal-provvista, li damu sa tmien xhur bejn il-ħruġ tal-ordni u l-iżdoganar tal-merkanzija, aktar milli ċirkomvenzjoni intenzjonata. Għalhekk, huma sostnew li l-importazzjonijiet lejn l-Unjoni minn Jannar sa Marzu 2025 ġew ordnati minn Mejju sa Lulju 2024. Huma nnutaw li ż-żmien meħtieġ għandu jittieħed kont tiegħu meta tiġi analizzata l-ħtieġa tal-applikazzjoni retroattiva tad-dazji f’investigazzjonijiet oħra (20).

(180)

L-EFDA enfasizzat ukoll li l-volumi tal-importazzjoni tal-prodott investigat bdew jonqsu minn Frar 2025, u dan jindika ritorn għal flussi kummerċjali normalizzati. Flimkien ma’ dan, il-prezzijiet tal-importazzjoni żdiedu b’mod kostanti, u dan jindika li l-kundizzjonijiet tas-suq qed jaġġustaw mill-ġdid b’mod naturali. Dawn l-iżviluppi komplew jimminaw il-ġustifikazzjoni għal dazji retroattivi.

(181)

L-EIFI kkontesta t-talba ta’ żmien ta’ sitt xhur bejn it-tqegħid tal-ordni u l-iżdoganar tal-merkanzija, u pprovda informazzjoni għal perjodi iqsar ta’ żmien fl-2024. Huwa argumenta li d-distakk ta’ 153 jum bejn il-bidu tal-investigazzjoni (17 ta’ Ottubru 2024) u l-bidu tal-applikazzjoni retroattiva tad-dazju anti-dumping (19 ta’ Marzu 2025) fisser li l-ordnijiet għall-importazzjonijiet soġġetti għal dazji saru wara l-bidu tal-investigazzjoni, meta l-importaturi kienu konxji mill-allegat dumping u dannu. L-EIFI enfasizza li x-xejra fl-importazzjonijiet uriet żieda qawwija fl-importazzjonijiet Ċiniżi ta’ viti mingħajr irjus minn Lulju 2024 (12 694–22 584 tunnellata fix-xahar), meta mqabbla mal-livelli ta’ qabel Lulju 2023 (6 510–11 449 tunnellata fix-xahar). Din ix-xejra indikat l-għarfien tas-suq tal-ilment anti-dumping imminenti, bl-importaturi jantiċipaw il-vjaġġi biex jevitaw id-dazji. L-EIFI asserixxa wkoll li l-importaturi konxjament assumew ir-riskju ta’ dazji retroattivi minkejja dan l-għarfien u issa jfittxu li jevadu r-responsabbiltà billi jikkwotaw żminijiet ta’ tħejjija spekulattivi.

(182)

L-EIFI kkontesta wkoll l-affermazzjonijiet li ż-żieda fl-importazzjonijiet Ċiniżi fl-2024–2025 kienet tirrifletti aġġustamenti tal-istokk ta’ wara l-pandemija jew xejriet staġjonali, u argumenta li dan irriżulta mill-antiċipazzjoni tas-suq tal-ilment anti-dumping. Iż-żieda ta’ 109 % sena wara sena fl-ewwel trimestru tal-2025 u tnaqqis sostnut fil-prezzijiet (EUR 1 302/tonne fl-2023 għal EUR 1 093/tonne sa nofs l-2025) ikkontestaw dikjarazzjonijiet ta’ mġiba temporanja jew ċiklika. L-EIFI enfasizza li ż-żieda f’daqqa u x-xejriet tal-ipprezzar kienu korrelatati mal-investigazzjoni li jmiss, jinvalidaw spjegazzjonijiet alternattivi u jenfasizzaw il-ħtieġa għal dazji retroattivi biex jiġu indirizzati l-importazzjonijiet predatorji.

(183)

Il-Kummissjoni fakkret li l-Artikolu 10(4)(d) tar-Regolament bażiku jirreferi għal “importazzjonijiet” u mhux għal “ordnijiet” li x’aktarx jimminaw serjament l-effett rimedjali tad-dazju anti-dumping definittiv li għandu jiġi applikat. Dawn l-importazzjonijiet iridu jiġu vvalutati għat-twaqqit, il-volum u l-potenzjal tagħhom li jimminaw l-effett rimedjali tad-dazji anti-dumping. L-Artikolu 10(4)(c) jiddependi fuq l-għarfien tal-importatur dwar id-dumping, iżda jenfasizza li d-dazji retroattivi mhumiex punittivi. Minflok, l-għan tagħhom huwa li jippreservaw l-effettività tal-miżuri anti-dumping billi jindirizzaw l-importazzjonijiet li, b’mod ġenerali, jirriskjaw li jimminaw l-impatt rimedjali tagħhom. Il-valutazzjoni skont l-Artikolu 10(4)(d) tipprijoritizza l-effett oġġettiv tal-volumi tal-importazzjoni u d-dinamika tas-suq fuq l-intenzjonijiet suġġettivi jew iż-żminijiet ta’ tħejjija tal-importaturi individwali (21).

(184)

Fl-investigazzjoni attwali, il-Kummissjoni rrikonoxxiet li setgħu għaddew diversi xhur bejn l-ordni u d-data tal-importazzjoni. Hija rrieżaminat l-evidenza ppreżentata mill-partijiet rigward iż-żminijiet ta’ tħejjija tal-katina tal-provvista għall-prodott investigat iżda fil-biċċa l-kbira rrifjutatha bħala mhux sostanzjata jew mhux kompluta. In-nuqqasijiet ewlenin kienu jinkludu ordnijiet neqsin u/jew fatturi korrispondenti segwiti minn dokumentazzjoni doganali f’ċerti każijiet. Barra minn hekk, xi importaturi li pprovdew informazzjoni naqsu milli jikkooperaw ma’ din l-investigazzjoni, u dan ħalla l-volumi totali tal-importazzjoni tagħhom lejn l-Unjoni mhux magħrufa. Konsegwentement, l-informazzjoni ppreżentata mill-importaturi li kkooperaw kienet tirrappreżenta inqas minn 5 % tal-importazzjonijiet totali tal-prodott li qed jiġi investigat lejn l-Unjoni matul il-perjodu ta’ investigazzjoni. Għalhekk, minbarra li hija essenzjalment irrilevanti fid-dawl tal-prinċipji mfakkra fil-premessa (183), il-Kummissjoni ma qisitx id-data rappreżentattiva biżżejjed biex tassumi li l-importaturi l-oħra kollha kienu f’sitwazzjoni simili.

(185)

Fid-dawl tal-analiżi tal-Kummissjoni ta’ żieda sostanzjali fl-importazzjonijiet wara l-perjodu ta’ investigazzjoni, hija qieset li, filwaqt li xi wħud mill-kunsinni minn Novembru 2024 sa Frar 2025 setgħu jkunu parzjalment dovuti għal ordnijiet ta’ qabel l-investigazzjoni li saru qabel Ottubru 2024, din l-ispjegazzjoni ma kinitx biżżejjed biex tqis iż-żieda sostnuta fl-importazzjonijiet, li ammontat għal żieda ta’ 47 % minn Frar sa Ġunju 2025 meta mqabbla mal-istess perjodu fl-2024. Barra minn hekk, il-Kummissjoni osservat tnaqqis ta’ 11 % fil-prezz medju tal-importazzjoni tal-prodott matul Frar – Ġunju 2025 meta mqabbel ma’ Frar – Ġunju 2024, xejra inkonsistenti mad-dikjarazzjoni tal-EFDA ta’ normalizzazzjoni tas-suq. Dan it-tnaqqis fil-prezz, flimkien maż-żieda fil-volumi tal-importazzjonijiet, immina direttament l-argument tal-partijiet li l-flussi kummerċjali kienu ġew aġġustati mill-ġdid b’mod naturali wara Frar 2025.

(186)

Barra minn hekk, l-affermazzjoni tal-EFDA li l-importazzjonijiet lejn l-Unjoni f’Jannar – Marzu 2025 ġew ordnati sa minn Mejju – Lulju 2024 instabet li ma kinitx korretta mal-analiżi tal-prezz medju tal-importazzjoni. Jekk id-dikjarazzjoni kienet preċiża, il-prezz medju tal-importazzjoni f’Jannar – Marzu 2025 (EUR 1 057/tunnellata) kellu jkun allinjat mal-firxa tal-prezzijiet ta’ Mejju – Lulju 2024 (EUR 1 218/tunnellata) jew qabel, iżda minflok kien 13 % inqas.

(187)

Il-Kummissjoni ċaħdet l-argument tal-partijiet rigward l-esklużjoni tal-prodott investigat mill-investigazzjoni anti-dumping preċedenti dwar ċerti qfieli tal-ħadid jew tal-azzar, bħala irrilevanti għall-proċediment attwali. Skont il-prattika stabbilita u l-Artikolu 10(4)(c) tar-Regolament Bażiku, kull investigazzjoni hija limitata għall-kamp ta’ applikazzjoni tal-prodott definit fl-ilment. L-assenza ta’ viti jew boltijiet fl-ilment preċedenti ma ċaħditx il-validità tal-investigazzjoni attwali, peress li l-kamp ta’ applikazzjoni ta’ kwalunkwe proċediment huwa ddeterminat biss mill-allegazzjonijiet u l-evidenza speċifiċi ppreżentati fl-ilment inkwistjoni. Barra minn hekk, il-Kummissjoni enfasizzat li l-industriji li jipproduċu viti mingħajr irjus u dawk li jipproduċu qfieli oħra tal-ħadid jew tal-azzar huma distinti f’termini ta’ proċessi ta’ produzzjoni, funzjonijiet tas-suq, u dannu. Għalhekk, id-dipendenza tal-partijiet fuq l-esklużjoni preċedenti hija żbaljata, peress li tgħaqqad investigazzjonijiet mhux relatati ma’ kampijiet ta’ applikazzjoni ta’ prodotti differenti. Għaldaqstant, dan l-argument ġie miċħud bħala fattwalment u legalment mhux sostanzjat.

(188)

Fid-dawl ta’ dan ta’ hawn fuq, il-Kummissjoni kkonkludiet li l-applikazzjoni retroattiva tad-dazji hija ġġustifikata, peress li l-evidenza wriet li ż-żieda fl-importazzjonijiet u t-twaqqit tal-kunsinni ma setgħux jiġu rikonċiljati maż-żminijiet meħtieġa u l-kundizzjonijiet għall-impożizzjoni retroattiva skont l-Artikolu 10(4)(c) tar-Regolament Bażiku ġew issodisfati.

(189)

Skont l-Artikolu 10(4) tar-Regolament bażiku, l-applikazzjoni retroattiva tad-dazju hija imposta mid-19 ta’ Marzu 2025.

(190)

Fid-dawl tal-Artikolu 109 tar-Regolament (UE, Euratom) 2024/2509 tal-Parlament Ewropew u tal-Kunsill (22), meta ammont ikun irid jiġi rrimborżat wara sentenza tal-Qorti tal-Ġustizzja tal-Unjoni Ewropea, l-imgħax li jrid jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikat fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar.

(191)

Il-miżuri previsti f’dan ir-regolament huma f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036,