(1)

L-Artikolu 40 tar-Regolament (UE) 2022/2065 jistabbilixxi regoli dwar l-aċċess għad-data li għandu jingħata mill-fornituri ta’ pjattaformi online kbar ħafna u ta’ magni tat-tiftix online kbar ħafna. B’mod partikolari, dan jippermetti lir-riċerkaturi li jkunu temmew proċess biex juru li huma jissodisfaw il-kundizzjonijiet stabbiliti fil-paragrafu 8 ta’ dak l-Artikolu (“riċerkaturi verifikati”) li jingħataw tali aċċess.

(2)

Skont l-Artikolu 40(4) tar-Regolament (UE) 2022/2065, ir-riċerkaturi verifikati għandhom jingħataw aċċess għad-data bħala għajnuna biex jistudjaw ir-riskji sistemiċi fl-Unjoni u biex jivvalutaw l-effettività tal-miżuri biex jiġu mmitigati dawk ir-riskji. Is-sejbiet tagħhom jistgħu jikkostitwixxu kontribut siewi għall-infurzar tar-Regolament (UE) 2022/2065 u jrawmu l-obbligu ta’ rendikont tal-fornituri ta’ pjattaformi online kbar ħafna u ta’ magni tat-tiftix online kbar ħafna. L-għan ta’ dan ir-Regolament huwa li jistabbilixxi l-kundizzjonijiet tekniċi u l-proċeduri meħtieġa biex ikun permess tali aċċess, b’mod sigur u effiċjenti li jkun konsistenti bejn il-Koordinaturi tas-Servizzi Diġitali kollha, u b’mod li jiżgura trattament ugwali għar-riċerkaturi u għall-fornituri tad-data.

(3)

Biex jiġi żgurat li l-proċess tal-aċċess għad-data jkun konsistenti bejn il-Koordinaturi tas-Servizzi Diġitali kollha u biex dak il-proċess ikun ċar u trasparenti għal kulħadd, huwa meħtieġ li tinħoloq infrastruttura diġitali ddedikata (“il-portal tal-aċċess għad-data tad-DSA”). Il-portal tal-aċċess għad-data tad-DSA jenħtieġ li jippermetti lir-riċerkaturi, lill-fornituri tad-data u lill-Koordinaturi tas-Servizzi Diġitali jipparteċipaw fil-proċess tal-aċċess għad-data, ikollhom aċċess għal informazzjoni rilevanti u jxerrduha, bħad-dettalji tal-punti ta’ kuntatt iddedikati, u jikkomunikaw ma’ xulxin. Il-portal tal-aċċess għad-data tad-DSA jenħtieġ li ma jitqiesx bħala wieħed mill-modalitajiet ta’ aċċess li għandhom jintużaw għall-għoti ta’ aċċess għad-data skont talba motivata.

(4)

Il-fornituri tad-data u r-riċerkaturi li jkunu jixtiequ jipparteċipaw fil-proċess tal-aċċess għad-data, jenħtieġ li joħolqu kont fuq il-portal tal-aċċess għad-data tad-DSA għal dak il-għan. Biex jiġi żgurat li l-Koordinaturi tas-Servizzi Diġitali jkunu jistgħu jaċċessaw l-informazzjoni sottomessa permezz tal-portal tal-aċċess għad-data tad-DSA mingħajr il-ħtieġa li jinħoloq kont separat fuq il-portal, il-portal tal-aċċess għad-data tad-DSA jenħtieġ li jkun interoperabbli ma’ AGORA, is-sistema tal-kondiviżjoni tal-informazzjoni stabbilita fir-Regolament ta’ Implimentazzjoni tal-Kummissjoni (UE) 2024/607 (2).

(5)

Biex tiġi żgurata t-trasparenza tal-proċess tal-aċċess għad-data għall-partijiet kollha involuti u biex jiġu mmonitorjati l-effettività u l-effiċjenza tal-proċess tal-aċċess għad-data u l-konformità mal-Artikolu 40(4) tar-Regolament (UE) 2022/2065 u ma’ dan ir-Regolament, il-portal tal-aċċess għad-data tad-DSA jenħtieġ li jiġġenera notifiki awtomatiċi fir-rigward ta’ passi u aġġornamenti differenti tal-proċess.

(6)

Sabiex ir-riċerkaturi jingħataw informazzjoni konsistenti dwar il-proċess tal-aċċess għad-data, il-Koordinaturi tas-Servizzi Diġitali jenħtieġ li jagħmlu disponibbli u faċilment aċċessibbli fuq l-interfaċċi online tagħhom informazzjoni dwar il-proċess tal-aċċess għad-data, inklużi links għall-portal tal-aċċess għad-data tad-DSA. Biex jiġi evitat li jinħoloq piż amministrattiv bla bżonn, tiżdied l-effiċjenza u tiġi ffaċilitata l-komunikazzjoni bejn il-partijiet kollha involuti fil-proċess tal-aċċess għad-data, il-Koordinaturi tas-Servizzi Diġitali huma mħeġġa jiffaċilitaw il-ġestjoni tal-informazzjoni relatata mal-proċess tal-aċċess għad-data, anke minn perspettiva lingwistika.

(7)

Sabiex ir-riċerkaturi jkunu jistgħu jidentifikaw id-data rilevanti għall-finijiet stabbiliti fl-Artikolu 40(4) tar-Regolament (UE) 2022/2065, il-fornituri tad-data jenħtieġ li jagħmlu disponibbli katalgi tad-data tad-DSA għas-servizzi tagħhom. Tali katalgi jenħtieġ li jkunu jistgħu jinstabu u jkunu aċċessibbli faċilment fuq l-interfaċċi online tal-fornituri tad-data, u jenħtieġ li jiddeskrivu l-assi tad-data disponibbli, l-istruttura tad-data u l-metadata tagħhom, li l-aċċess għalihom jista’ jintalab skont l-Artikolu 40(4) tar-Regolament (UE) 2022/2065. Meta jagħmlu disponibbli l-katalgi tad-data tad-DSA, il-fornituri tad-data jenħtieġ li jqisu r-riskji għall-kunfidenzjalità, għas-sigurtà tad-data jew għall-protezzjoni tad-data personali li potenzjalment jirriżultaw mill-fatt li tali informazzjoni li ssir pubblika.

(8)

Biex jikkontribwixxu għall-iżvilupp ta’ proġetti ta’ riċerka rilevanti għall-finijiet stabbiliti fl-Artikolu 40(4) tar-Regolament (UE) 2022/2065, il-katalgi tad-data tad-DSA jenħtieġ li jinkludu b’mod partikolari data relatata mar-riskji sistemiċi fl-Unjoni li l-fornituri tad-data identifikaw fil-valutazzjonijiet tar-riskju annwali tagħhom skont l-Artikolu 34 ta’ dak ir-Regolament, kif ukoll data relatata ma’ kwalunkwe miżura ta’ mitigazzjoni tar-riskju msemmija fl-Artikolu 35 ta’ dak ir-Regolament. Biex jiġu żgurati r-rilevanza u l-puntwalità tal-katalgi tad-data tad-DSA, dawk il-katalgi jenħtieġ li jiġu aġġornati regolarment b’kunsiderazzjoni xierqa għar-riskji sistemiċi li jkunu għadhom kif ġew identifikati u għall-evoluzzjoni tar-riskji sistemiċi. Pereżempju, jenħtieġ li dawn jirriflettu r-riskji emerġenti identifikati wara valutazzjoni tar-riskju ad hoc skont l-Artikolu 34 tar-Regolament (UE) 2022/2065 jew wara rapport tal-awditjar skont l-Artikolu 37 ta’ dak ir-Regolament. Biex jiġi minimizzat il-piż proċedurali fuq il-fornituri tad-data, meta jkun xieraq, tali katalgi jistgħu jibbażaw fuq ir-riżorsi eżistenti tad-dokumentazzjoni tad-data użati għal skopijiet u udjenzi oħrajn, bħar-reklamar, il-ħolqien tal-kontenut jew l-iżvilupp tal-applikazzjonijiet ta’ partijiet terzi. Il-katalgi tad-data tad-DSA jenħtieġ li ma jkunux meħtieġa li jkunu eżawrjenti u għalhekk jenħtieġ li ma jorbtux jew ma jillimitawx lir-riċerkaturi applikanti fl-applikazzjonijiet tagħhom għall-aċċess għad-data.

(9)

Sabiex tiġi ffaċilitata d-determinazzjoni tal-modalitajiet ta’ aċċess mill-Koordinatur tas-Servizzi Diġitali tal-istabbiliment u jitnaqqas il-piż ġenerali tal-proċess ta’ aċċess għad-data fuq l-atturi kollha involuti, il-fornituri tad-data jenħtieġ li jippubblikaw il-modalitajiet issuġġeriti ta’ aċċess tagħhom għad-data deskritta fil-katalgi tad-data tad-DSA. Dawn il-modalitajiet issuġġeriti ta’ aċċess jenħtieġ li jkunu proporzjonati għas-sensittività tad-data u li jinkludu informazzjoni dwar il-kundizzjonijiet tekniċi, organizzazzjonali u legali possibbli kkunsidrati mill-fornituri tad-data kif xieraq biex jippermettu l-forniment tad-data. Il-modalitajiet ta’ aċċess issuġġeriti mill-fornituri tad-data jenħtieġ li ma jorbtux lill-Koordinaturi tas-Servizzi Diġitali tal-istabbiliment, li jenħtieġ li jibqgħu kompetenti biex jiddeterminaw il-modalitajiet ta’ aċċess xierqa.

(10)

Biex jiġi żgurat li l-applikazzjonijiet għall-aċċess għad-data jiġu ttrattati b’mod ugwali, indipendentement mill-Koordinatur tas-Servizzi Diġitali li lilu tiġi sottomessa l-applikazzjoni għall-aċċess għad-data jew li minnu toriġina t-talba motivata, jenħtieġ li jiġi speċifikat il-perjodu ta’ żmien għall-formulazzjoni ta’ talbiet motivati biex tiġi żgurata l-konsistenza bejn il-Koordinaturi tas-Servizzi Diġitali kollha. Jekk il-formulazzjoni tat-talba motivata tirrikjedi żmien addizzjonali, il-Koordinatur tas-Servizzi Diġitali tal-istabbiliment jenħtieġ li jinnotifika lir-riċerkatur prinċipali, filwaqt li jagħti r-raġunijiet għad-dewmien. Dawn ir-raġunijiet jistgħu jinkludu l-ħtieġa ta’ verifiki addizzjonali mill-Koordinatur tas-Servizzi Diġitali tal-organizzazzjoni ta’ riċerka jew tal-istabbiliment, pereżempju meta l-applikazzjonijiet għall-aċċess għad-data jimplikaw trasferimenti internazzjonali tad-data, jew meta l-Koordinatur tas-Servizzi Diġitali tal-istabbiliment ikun identifika riskji potenzjali għas-sigurtà tal-Unjoni li kieku d-data kellha tiġi kondiviża. Bil-ħsieb li jiġu allinjati wkoll il-passi fil-proċess tal-aċċess għad-data qabel il-formulazzjoni ta’ talbiet motivati, inkluż il-valutazzjoni tal-applikazzjonijiet għall-aċċess għad-data u l-għoti ta’ status ta’ riċerkatur verifikat, il-Koordinaturi tas-Servizzi Diġitali huma mħeġġa jiżviluppaw mod ta’ ħidma konsistenti u koordinat, inkluż kriterji operazzjonali komuni, fil-qafas tal-Bord Ewropew għas-Servizzi Diġitali.

(11)

Sabiex jiġu ssimplifikati l-proċeduri għall-formulazzjoni ta’ talbiet motivati, il-Koordinaturi tas-Servizzi Diġitali kollha tal-istabbiliment jenħtieġ li jkunu meħtieġa jivverifikaw li ċerti elementi komuni tal-proċess tal-aċċess għad-data kienu koperti kif xieraq fl-applikazzjonijiet għall-aċċess għad-data. Għal dak il-għan, il-Koordinaturi tas-Servizzi Diġitali tal-istabbiliment jenħtieġ li jivverifikaw li r-riċerkaturi applikanti kollha li jissemmew fl-applikazzjoni għall-aċċess għad-data wrew l-affiljazzjoni tagħhom ma’ organizzazzjoni ta’ riċerka, pereżempju billi jipprovdu dokumenti ta’ sostenn ta’ kuntratti ta’ impjieg jew kwalunkwe forma oħra ta’ assoċjazzjoni legali mal-organizzazzjoni ta’ riċerka. Il-Koordinaturi tas-Servizzi Diġitali tal-istabbiliment jenħtieġ li jivverifikaw ukoll li r-riċerkaturi applikanti wrew l-indipendenza tagħhom minn interessi kummerċjali, pereżempju, permezz ta’ dikjarazzjoni għal dak il-għan.

(12)

Il-Koordinatur tas-Servizzi Diġitali tal-istabbiliment jenħtieġ li jivverifika li l-finanzjament tal-proġett ta’ riċerka li għalih tintalab id-data jiġi ddivulgat fl-applikazzjoni għall-aċċess għad-data. L-informazzjoni pprovduta mir-riċerkaturi applikanti jenħtieġ li tinkludi dettalji tal-kontribuzzjonijiet, bħall-entità ta’ finanzjament, l-ammont, in-natura u t-tul ta’ żmien tal-kontribuzzjoni, inkluż jekk il-finanzjament ikunx diġà ngħata jew jekk applikazzjoni għall-finanzjament tkunx għadha qiegħda tiġi evalwata, kif ukoll, meta applikabbli, referenzi rilevanti għall-proġetti ffinanzjati mill-Unjoni. Meta jkun disponibbli, l-applikazzjoni għall-aċċess għad-data jenħtieġ li tinkludi wkoll l-eżiti tal-evalwazzjonijiet imwettqa mill-entità jew mill-entitajiet li jipprovdu l-finanzjament.

(13)

Il-Koordinatur tas-Servizzi Diġitali tal-istabbiliment jenħtieġ li jivverifika li l-applikazzjoni għall-aċċess għad-data tiddeskrivi kif jintgħażlu d-data u l-format tad-data, b’referenza għar-rekwiżiti tan-neċessità u tal-proporzjonalità għall-iskop tar-riċerka prevista. Meta d-data mitluba tkun disponibbli wkoll permezz ta’ sorsi oħrajn, il-Koordinatur tas-Servizzi Diġitali tal-istabbiliment jenħtieġ li jivvaluta jekk it-talba għal tali data fl-applikazzjoni għall-aċċess għad-data hijiex debitament ġustifikata, filwaqt li jqis l-informazzjoni fl-applikazzjoni għall-aċċess għad-data. Ġustifikazzjonijiet possibbli jistgħu jinkludu evidenza ta’ kwalità batuta jew nuqqas ta’ affidabbiltà ta’ tali data li tirriżulta minn sorsi oħrajn jew in-nuqqas ta’ adegwatezza tal-format li fih tali data tista’ tinkiseb minn sorsi oħrajn għall-finijiet tal-proġett ta’ riċerka, li jfixkel l-eżekuzzjoni tal-proġett ta’ riċerka. Id-data li tista’ tintalab sabiex jiġu studjati r-riskji sistemiċi jew il-mitigazzjoni tagħhom fl-Unjoni tista’ tevolvi fil-futur. Eżempji kurrenti ta’ tali data jinkludu data relatata mal-utenti tas-servizzi, bħal informazzjoni dwar il-profil, networks ta’ relazzjonijiet, esponiment tal-kontenut fil-livell individwali u stejjer ta’ involviment; data ta’ interazzjoni bħal kummenti jew impenji oħrajn; data relatata mar-rakkomandazzjonijiet tal-kontenut, inkluża d-data użata għall-personalizzazzjoni tar-rakkomandazzjonijiet; data relatata mal-immirar tar-reklami u t-tfassil ta’ profili, inkluża d-data dwar il-kost għal kull klikk u miżuri oħrajn tal-prezzijiet tar-reklamar; data relatata mal-ittestjar ta’ karatteristiċi ġodda qabel l-użu tagħhom, inklużi r-riżultati tat-testijiet A/B; data relatata mal-moderazzjoni u mal-governanza tal-kontenut, bħal data dwar sistemi u proċessi ta’ moderazzjoni tal-kontenut, algoritmiċi jew ta’ tip ieħor, inklużi r-reġistri tal-modifiki, l-arkivji jew ir-repożitorji li jiddokumentaw kontenut moderat, inklużi kontijiet kif ukoll data relatata mal-prezzijiet, mal-kwantitajiet u mal-karatteristiċi ta’ oġġetti jew servizzi pprovduti jew intermedjati mill-fornitur tad-data.

(14)

Il-Koordinatur tas-Servizzi Diġitali tal-istabbiliment jenħtieġ li jivverifika jekk l-applikazzjoni għall-aċċess għad-data tipprovdix biżżejjed informazzjoni li turi li r-riċerkatur huwa kapaċi jissodisfa r-rekwiżiti speċifiċi tal-kunfidenzjalità, tas-sigurtà u tal-protezzjoni tad-data personali fir-rigward tad-data mitluba, jidentifika r-riskji possibbli li jirriżultaw mill-aċċess u mill-ipproċessar ta’ tali data għall-finijiet tar-riċerka, u jiddokumenta kwalunkwe modalità ta’ aċċess proposta, inkluż il-kundizzjonijiet legali, organizzazzjonali u tekniċi li se jiġu stabbiliti biex jiġu minimizzati r-riskji identifikati, pereżempju permezz ta’ ittra ta’ impenn mill-organizzazzjoni ta’ riċerka li tikkonferma l-aċċess għal mezzi li jistgħu jikkostitwixxu salvagwardji rilevanti, jew dokumenti oħrajn ta’ sostenn.

(15)

Meta tintalab data personali, il-Koordinatur tas-Servizzi Diġitali tal-istabbiliment jenħtieġ li jivverifika li l-applikazzjoni għall-aċċess għad-data tinkludi informazzjoni dwar il-bażi legali għall-ipproċessar ta’ data personali, inkluż kategoriji speċjali ta’ data personali, meta applikabbli, u jekk tali bażi legali hijiex konformi mal-Artikolu 6(1), il-punt (e) jew (f), u meta applikabbli l-Artikolu 9(2), il-punt (g) jew (j), tar-Regolament (UE) 2016/679 tal-Parlament Ewropew u tal-Kunsill (3). Barra minn hekk, il-Koordinatur tas-Servizzi Diġitali tal-istabbiliment jenħtieġ li jivverifika li l-applikazzjoni għall-aċċess għad-data jkun fiha biżżejjed indikazzjoni li r-riċerkaturi jkunu vvalutaw ir-riskji għall-protezzjoni tad-data personali. Pereżempju, dan jista’ jintwera permezz ta’ valutazzjoni tal-impatt fuq il-protezzjoni tad-data skont it-tifsira tal-Artikolu 35 ta’ dak ir-Regolament. Biex jiġi żgurat li d-data personali tkun tista’ tiġi aċċessata f’konformità mar-Regolament (UE) 2016/679, il-Koordinaturi tas-Servizzi Diġitali jenħtieġ li jitħallew jikkonsultaw lill-awtoritajiet superviżorji rilevanti stabbiliti skont l-Artikolu 51 ta’ dak ir-Regolament, li jibqgħu kompetenti biex jivvalutaw il-konformità mar-Regolament (UE) 2016/679.

(16)

Biex jiffaċilita l-formulazzjoni tat-talba motivata u jippreżerva l-integrità tal-informazzjoni inkluża fl-applikazzjoni għall-aċċess għad-data, il-Koordinatur tas-Servizzi Diġitali tal-istabbiliment jenħtieġ li jivverifika jekk l-applikazzjoni għall-aċċess għad-data tinkludix sommarju. Tali sommarju jenħtieġ li jkun fih ħarsa ġenerali lejn l-informazzjoni li se tkun parti mit-talba motivata, ippubblikata fil-portal tal-aċċess għad-data tad-DSA, f’każijiet li fihom il-valutazzjoni tal-applikazzjoni għall-aċċess għad-data twassal għall-formulazzjoni ta’ talba motivata.

(17)

Sabiex jiġi żgurat li l-modalitajiet ta’ aċċess li l-Koordinatur tas-Servizzi Diġitali tal-istabbiliment jiffissa jkunu adegwati biex jindirizzaw is-sensittività tad-data speċifika mitluba f’applikazzjoni għall-aċċess għad-data, il-Koordinatur tas-Servizzi Diġitali tal-istabbiliment jenħtieġ li jwettaq valutazzjoni każ b’każ, abbażi tal-informazzjoni pprovduta fl-applikazzjoni għall-aċċess għad-data. Il-modalitajiet ta’ aċċess stabbiliti fit-talba motivata jenħtieġ li jkunu xierqa biex jissodisfaw ir-rekwiżiti tas-sigurtà tad-data, tal-kunfidenzjalità tad-data u tal-protezzjoni tad-data personali u, fl-istess ħin, jippermettu l-ilħuq tal-objettivi ta’ riċerka tal-proġett ta’ riċerka. L-aċċess għad-data jista’ jseħħ, pereżempju, bit-trażmissjoni tad-data lir-riċerkaturi verifikati permezz ta’ interfaċċa xierqa u ħżin xieraq tad-data; bit-trażmissjoni tad-data lejn ambjent ta’ pproċessar sigur operat mill-fornitur tad-data jew minn fornitur terz, li għalih ikollhom aċċess ir-riċerkaturi verifikati, kif ukoll bil-ħżin fih, iżda bla ma sseħħ l-ebda trażmissjoni tad-data lir-riċerkaturi verifikati, jew b’modalitajiet oħrajn ta’ aċċess li għandhom jiġu stabbiliti jew iffaċilitati mill-fornitur tad-data. Meta jispeċifika l-modalitajiet ta’ aċċess, il-Koordinatur tas-Servizzi Diġitali tal-istabbiliment jenħtieġ li jelenka wkoll kwalunkwe kundizzjoni legali, teknika jew organizzattiva li l-aċċess għandu jkun soġġett għaliha. F’każijiet li fihom l-għoti tal-aċċess jinvolvi trasferiment ta’ data personali lil pajjiżi terzi jew organizzazzjonijiet internazzjonali skont it-tifsira tal-Kapitolu V tar-Regolament (UE) 2016/679, il-modalitajiet ta’ aċċess jenħtieġ li jinkludu wkoll informazzjoni dwar il-ħtieġa li jiġi stabbilit mekkaniżmu ta’ trasferiment xieraq, biex jiġi żgurat li l-fornitur tad-data jieħu l-azzjoni meħtieġa biex jikkonforma ma’ dak ir-Regolament.

(18)

Biex jiġi żgurat li l-modalitajiet ta’ aċċess għad-data jkunu xierqa biex jindirizzaw sensittivitajiet speċifiċi f’termini ta’ protezzjoni tad-data, ta’ sigurtà tad-data jew ta’ kunfidenzjalità, il-Koordinatur tas-Servizzi Diġitali tal-istabbiliment, abbażi tal-informazzjoni riċevuta fl-applikazzjoni għall-aċċess għad-data, jenħtieġ li jkun jista’ jirrikjedi, li l-aċċess għad-data jingħata permezz ta’ ambjenti ta’ pproċessar siguri. F’każijiet bħal dawn, il-Koordinatur tas-Servizzi Diġitali tal-istabbiliment jenħtieġ li jiżgura li l-ambjent magħżul jopera f’konformità mal-aktar teknoloġija xierqa u jippermetti lir-riċerkaturi verifikati jilħqu l-objettivi tar-riċerka tagħhom.

(19)

Sabiex tiġi żgurata l-konsistenza tal-informazzjoni trażmessa mill-Koordinaturi tas-Servizzi Diġitali tal-istabbiliment lill-fornituri tad-data, jeħtieġ li jiġi speċifikat il-kontenut tat-talbiet motivati.

(20)

Sabiex jiġu ssalvagwardjati l-interessi tal-fornituri tad-data u biex titnaqqas il-frekwenza tat-talbiet għal emendi maż-żmien u tiġi ffaċilitata l-formulazzjoni tal-applikazzjonijiet rilevanti għall-aċċess għad-data mir-riċerkaturi, jenħtieġ li ssir disponibbli għall-pubbliku ħarsa ġenerali lejn kull talba motivata, inkluż kwalunkwe emenda u aġġornament għaliha, fil-portal tal-aċċess għad-data tad-DSA mill-Koordinatur tas-Servizzi Diġitali tal-istabbiliment li jkun ħareġ it-talbiet motivati rispettivi.

(21)

Sabiex jiġi żgurat li l-Koordinatur tas-Servizzi Diġitali tal-istabbiliment ikollu l-informazzjoni rilevanti biex jevalwa talba għal emenda u biex jiffaċilita approċċ uniformi fl-evalwazzjoni tat-talbiet għal emendi, il-fornitur tad-data jenħtieġ li jkun meħtieġ jispeċifika r-raġunijiet għal tali talba, kif imsemmi fl-Artikolu 40(5) tar-Regolament (UE) 2022/2065. B’mod aktar speċifiku, meta jivvaluta talba għal emenda sottomessa abbażi tan-nuqqas ta’ aċċess ta’ fornitur tad-data għad-data, il-Koordinatur tas-Servizzi Diġitali tal-istabbiliment jenħtieġ li jkun f’pożizzjoni li jeżamina jekk l-allegata impossibbiltà hijiex debitament ġustifikata, pereżempju min-nuqqas ta’ eżistenza tad-data mitluba, jew minn restrizzjonijiet tekniċi bħall-kriptaġġ u jenħtieġ li jkollu l-informazzjoni meħtieġa biex iqis jekk in-nuqqas ta’ aċċess huwiex permanenti jew temporanju. Jenħtieġ li jkun ċar, f’dan ir-rigward, li l-kunsiderazzjonijiet kummerċjali jenħtieġ li ma jitqisux bħala raġuni biex jiġi rrifjutat awtomatikament l-aċċess għad-data mitluba iżda pjuttost bħala raġuni biex jiġu mmodifikati l-mezzi sabiex jiġi pprovdut aċċess għad-data, li jista’ jirriżulta fl-impożizzjoni ta’ rekwiżiti addizzjonali ta’ sigurtà u kunfidenzjalità tad-data.

(22)

Sabiex tiġi żgurata soluzzjoni effiċjenti tat-tilwim u biex titħeġġeġ l-identifikazzjoni ta’ soluzzjoni aċċettabbli b’mod reċiproku, wara talba għal emenda, il-fornituri tad-data jenħtieġ li jkunu jistgħu jitolbu lill-Koordinaturi tas-Servizzi Diġitali tal-istabbiliment biex jipparteċipaw fil-medjazzjoni. Tali parteċipazzjoni jenħtieġ li tkun volontarja matul il-proċess kollu ta’ medjazzjoni u jenħtieġ li ma tirriżulta f’ebda eżitu vinkolanti għall-Koordinatur tas-Servizzi Diġitali tal-istabbiliment, li jibqa’ kompetenti biex jiddeċiedi dwar it-talbiet għal emendi. Il-partijiet kollha involuti fil-proċess ta’ medjazzjoni jenħtieġ li jimpenjaw ruħhom in bona fide u jagħmlu ħilithom biex jilħqu ftehim ġust u aċċettabbli b’mod reċiproku.

(23)

Sabiex jiġi evitat li l-medjazzjoni ttawwal b’mod indefinit il-proċess tal-aċċess għad-data, it-trażmissjoni tat-talba bil-miktub għall-medjazzjoni, l-għażla tal-medjatur u l-proċess ta’ medjazzjoni nnifsu jenħtieġ li jsiru f’perjodi ta’ żmien speċifikati. Il-Koordinaturi tas-Servizzi Diġitali tal-istabbiliment jenħtieġ li jistabbilixxu limitu ta’ żmien għall-proċess ta’ medjazzjoni fir-rigward ta’ talba motivata partikolari u l-medjatur jenħtieġ li jkollu l-awtorità li jtemm il-proċess ta’ medjazzjoni f’ċirkostanzi speċifiċi.

(24)

Sabiex tibqa’ l-fiduċja reċiproka fost il-partijiet involuti fil-medjazzjoni, il-Koordinatur tas-Servizzi Diġitali tal-istabbiliment jenħtieġ li jiżgura li l-medjatur propost jissodisfa r-rekwiżiti ta’ imparzjalità u tal-indipendenza u jkollu għarfien espert rilevanti dwar is-suġġett tal-medjazzjoni.

(25)

Għall-finijiet tal-iffaċilitar tat-teħid ta’ deċiżjonijiet infurmat u effettiv fir-rigward tal-proċess tal-aċċess għad-data, il-Koordinaturi tas-Servizzi Diġitali jenħtieġ li jkollhom il-possibbiltà li jitolbu opinjonijiet esperti dwar elementi speċifiċi tal-proċess tal-aċċess għad-data, bħad-determinazzjoni tal-modalitajiet ta’ aċċess, inkluż interfaċċi xierqa, il-formulazzjoni tat-talba motivata u kwalunkwe talba għal emenda mill-fornitur tad-data. L-esperti kkonsultati jenħtieġ li jkollhom għarfien espert ippruvat fil-kwistjoni li dwarha tintalab l-opinjoni tagħhom u jenħtieġ li jkunu indipendenti. B’mod partikolari, jenħtieġ li ma jkollhom l-ebda kunflitt ta’ interess, li jirriżulta pereżempju minn kwalunkwe rabta mar-riċerkaturi applikanti jew mal-fornitur tad-data.

(26)

Sabiex tiżdied it-trasparenza u biex il-Koordinaturi tas-Servizzi Diġitali jkunu jistgħu jibnu fuq l-għarfien espert tagħhom miksub maż-żmien, kull talba għal konsultazzjoni tal-esperti u s-segwitu ġġenerat minnha jenħtieġ li jiġu rreġistrati f’AGORA.

(27)

Biex tiġi ffaċilitata s-superviżjoni effettiva tal-konformità mal-kundizzjonijiet stabbiliti fit-talba motivata, il-fornitur tad-data jenħtieġ li jinnotifika lill-Koordinatur tas-Servizzi Diġitali tal-istabbiliment fi żmien 3 ijiem tax-xogħol mid-data li fiha jkun ingħata l-aċċess lir-riċerkaturi verifikati u mid-data tat-terminazzjoni tal-aċċess.

(28)

Sabiex ir-riċerkaturi verifikati jkunu jistgħu jużaw id-data mitluba għall-finijiet tar-riċerka u jipprovdu informazzjoni tal-kuntest rilevanti, il-fornituri tad-data jenħtieġ li jipprovdu lir-riċerkaturi verifikati l-metadata u d-dokumentazzjoni rilevanti li tiddeskrivi d-data magħmula disponibbli, bħal kodiċijiet anonimizzati, reġistri tal-modifiki u dokumentazzjoni arkitettonika.

(29)

Sabiex tiġi ffaċilitata r-riċerka sinifikattiva mir-riċerkaturi verifikati, anke billi jiġi permess il-kombinament tad-data mitluba mad-data disponibbli minn sorsi oħrajn, jenħtieġ li l-fornituri tad-data ma jimponu l-ebda restrizzjoni fuq l-għodod analitiċi użati minn riċerkaturi verifikati, inklużi libreriji tas-software rilevanti, u jenħtieġ li ma jimponux rekwiżiti ta’ arkivjar, ħżin, aġġornament u tħassir, sakemm ma jkunux imsemmija b’mod espliċitu fil-modalitajiet ta’ aċċess identifikati fit-talba motivata.

(30)

Meta d-data pprovduta lir-riċerkaturi verifikati tinkludi data personali skont it-tifsira tal-Artikolu 4 tar-Regolament (UE) 2016/679, il-fornitur tad-data jenħtieġ li josserva r-regoli stabbiliti f’dak ir-Regolament. B’mod partikolari, l-Artikolu 40(4) tar-Regolament (UE) 2022/2065 joħloq obbligu legali skont it-tifsira tal-Artikolu 6(1), il-punt (c) tar-Regolament (UE) 2016/679 għal kwalunkwe pproċessar ta’ data personali meħtieġ għall-fornitur tad-data biex jagħti aċċess għad-data speċifikata fit-talba motivata. Meta jkunu jridu jiġu pproċessati kategoriji speċjali ta’ data personali skont it-tifsira tal-Artikolu 9 tar-Regolament (UE) 2016/679, dan ir-Regolament jissodisfa r-rekwiżit tal-Artikolu 9(2), il-punt (g) tar-Regolament (UE) 2016/679.

(31)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (4) u ta opinjoni fl-4 ta’ Diċembru 2024.

(32)

Wara li kkonsultat mal-Bord Ewropew għas-Servizzi Diġitali f’konformità mal-Artikolu 40(13) tar-Regolament (UE) 2022/2065 u wara l-approvazzjoni tiegħu,