(1)

Ir-Regolament (UE) 2019/1021 jimplimenta l-impenji tal-Unjoni skont il-Konvenzjoni ta’ Stokkolma dwar il-Pollutanti Organiċi Persistenti (2) (“il-Konvenzjoni”) u skont il-Protokoll għall-Konvenzjoni tal-1979 dwar it-Tniġġis Transkonfini u fit-Tul tal-Arja fuq Pollutanti Organiċi Persistenti (3) (“il-Protokoll”).

(2)

L-Anness A tal-Konvenzjoni fih lista ta’ sustanzi kimiċi. Kull Parti għall-Konvenzjoni hija meħtieġa tipprojbixxi s-sustanzi kimiċi fil-lista jew tieħu l-miżuri legali u amministrattivi meħtieġa biex telimina l-produzzjoni, l-użu, l-importazzjoni u l-esportazzjoni tagħhom.

(3)

Waqt il-ħdax-il laqgħa tagħha li saret bejn l-1 u t-12 ta’ Mejju 2023, il-Konferenza tal-Partijiet għall-Konvenzjoni ddeċidiet, skont l-Artikolu 8(9) tal-Konvenzjoni, li temenda l-Anness A tal-Konvenzjoni biex tinkludi d-Dechlorane Plus f’dak l-Anness b’eżenzjonijiet speċifiċi. L-Unjoni appoġġjat l-inklużjoni tad-Dechlorane Plus fl-Anness A b’eżenzjonijiet speċifiċi kif stipulat fid-Deċiżjoni tal-Kunsill (UE) 2023/1006 (4). Għalhekk jenħtieġ li anke l-Parti A tal-Anness I tar-Regolament (UE) 2019/1021, li fiha lista tas-sustanzi elenkati fil-Konvenzjoni u fil-Protokoll, kif ukoll is-sustanzi li hemm elenkati biss fil-Konvenzjoni, tiġi emendata biex tinkludi d-Dechlorane Plus.

(4)

Fl-2022, il-Kumitati għall-Istima tar-Riskji (RAC) u għall-Analiżi Soċjoekonomika (SEAC) tal-Aġenzija Ewropea għas-Sustanzi Kimiċi (il-“kumitati”) adottaw l-opinjonijiet tagħhom (5) dwar dossier ta’ restrizzjonijiet min-Norveġja għad-Dechlorane Plus skont ir-Regolament (KE) Nru 1907/2006 tal-Parlament Ewropew u tal-Kunsill (6). L-opinjonijiet jappoġġjaw restrizzjoni tal-manifattura u l-użu tad-Dechlorane Plus, b’ċerti derogi għal użi speċifiċi. Dawk id-derogi huma inklużi fil-lista ta’ eżenzjonijiet speċifiċi mogħtija skont il-Konvenzjoni bid-Deċiżjoni SC-11/10 tal-Konferenza tal-Partijiet u jenħtieġ li jingħataw bħala eżenzjonijiet ukoll skont ir-Regolament (UE) 2019/1021 peress li għadhom meħtieġa fl-Unjoni. Dan jikkonċerna, fost l-oħrajn, l-ispare parts għall-vetturi motorizzati għall-użu fuq l-art, bħall-karozzi, il-muturi, il-vetturi motorizzati għall-agrikoltura u għall-kostruzzjoni u t-trakkijiet industrijali, inklużi l-vetturi motorizzati koperti mir-Regolamenti (UE) 2018/858 (7), (UE) Nru 167/2013 (8) u (UE) Nru 168/2013 tal-Parlament Ewropew u tal-Kunsill (9).

(5)

Il-Konvenzjoni tinkludi eżenzjonijiet għall-użu tad-Dechlorane Plus li mhumiex rakkomandati fl-opinjonijiet tal-kumitati. Dan jinkludi l-użu ta’ dik is-sustanza għall-fini ta’ spare parts għal tagħmir motorizzat għall-użu barra, apparati mediċi, apparati dijanjostiċi in vitro u strumenti għall-analiżi, għall-kejl, għall-kontroll, għall-monitoraġġ, għall-ittestjar, għall-produzzjoni u għall-ispezzjoni kif ukoll għat-tiswija ta’ ċerti oġġetti. Meta jitqies li l-volum tad-Dechlorane Plus li jintuża fl-ispare parts u għat-tiswija tal-oġġetti huwa żgħir u meta titqies l-importanza taż-żamma tal-oġġetti li diġà qed jintużaw, jenħtieġ li tali eżenzjonijiet jiġu inklużi fir-Regolament (UE) 2019/1021.

(6)

Id-durata massima tal-eżenzjonijiet jenħtieġ li tkun ta’ ħames snin, bil-possibbiltà li tiġi estiża għal perjodu addizzjonali ta’ ħames snin, f’konformità mal-Artikolu 4(4) tal-Konvenzjoni. Dan huwa partikolarment rilevanti għall-eżenzjonijiet għal applikazzjonijiet tal-imaging mediku u għal apparati u installazzjonijiet tar-radjoterapija, li għalihom l-opinjonijiet tal-kumitati appoġġjaw durata ta’ seba’ u għaxar snin, rispettivament. Jenħtieġ li l-Kummissjoni tirrieżamina l-ħtieġa ta’ estensjoni tal-eżenzjonijiet speċifiċi sa mhux aktar tard mill-1 ta’ April 2028 sabiex tħejji għall-Konferenza tal-Partijiet li hija mistennija li ssir f’Mejju 2029, peress li skont il-Konvenzjoni, f’dik il-Konferenza tal-Partijiet se jkollha tiġi deċiża estensjoni potenzjali tal-eżenzjonijiet speċifiċi għal din is-sustanza.

(7)

L-Artikolu 3 tar-Regolament (UE) 2019/1021 jipprojbixxi l-manifattura, l-introduzzjoni fis-suq, u l-użu ta’ sustanzi elenkati fl-Anness I ta’ dak ir-Regolament, kemm jekk waħedhom, f’taħlitiet, jew f’oġġetti. F’dan ir-rigward, jenħtieġ li jiġi ċċarat li l-oġġetti li fihom id-Dechlorane Plus u li huma prodotti jew introdotti fis-suq skont eżenzjoni stabbilita fl-Anness I ta’ dak ir-Regolament u li kienu diġà qed jintużaw fid-data ta’ skadenza tal-eżenzjoni rilevanti, jitħallew ikomplu jintużaw wara dik id-data.

(8)

Barra minn hekk, f’konformità mad-Deċiżjoni SC-11/10, l-eżenzjoni li tkopri l-introduzzjoni fis-suq u l-użu tad-Dechlorane Plus għall-finijiet ta’ spare parts għal ċerti vetturi, ċerti magni, għall-finijiet ta’ tagħmir motorizzat tal-baħar, tal-ġonna, tal-forestrija u għall-użu barra, għall-finijiet ta’ applikazzjonijiet ajruspazjali, spazjali u tad-difiża u għall-finijiet ta’ ċerti strumenti tingħata sa tmiem il-ħajja operattiva tal-prodott rilevanti jew sal-31 ta’ Diċembru 2043, skont liema tiġi l-ewwel, jew, fir-rigward ta’ spare parts għall-finijiet ta’ apparati mediċi u apparati dijanjostiċi in vitro, sa tmiem il-ħajja operattiva tal-prodott rilevanti. Il-ħajja operattiva tal-prodotti fl-applikazzjonijiet tad-difiża, ajruspazjali u spazjali tista’ tmur lil hinn mill-2043. Għalhekk, jenħtieġ li l-introduzzjoni fis-suq u l-użu tal-ispare parts għal applikazzjonijiet bħal dawn, preżenti fit-territorju tal-Unjoni qabel jew fid-data tal-iskadenza tal-eżenzjoni rilevanti, ikunu permessi anke wara dik id-data.

(9)

Biex jissaħħu l-applikazzjoni u l-infurzar tal-Artikolu 3(1) tar-Regolament (UE) 2019/1021 fl-Unjoni, jenħtieġ li jiġi stabbilit valur limitu għad-Dechlorane Plus li jfeġġ bħala kontaminant f’ammonti traċċa mhux intenzjonat fis-sustanzi, fit-taħlitiet u fl-oġġetti.

(10)

Meta jitqies li l-laboratorji jeħtieġ li jtejbu l-akkuratezza tal-analiżi u jiżguraw applikazzjoni uniformi u adegwata tal-metodi analitiċi, il-limitu tal-kontaminant f’ammonti traċċa mhux intenzjonat jenħtieġ li jiġi stabbilit għal 1 000 mg/kg. Jenħtieġ li 30 xahar wara d-dħul fis-seħħ ta’ dan ir-Regolament, dak il-limitu jkun ta’ 1 mg/kg.

(11)

Għaldaqstant, ir-Regolament (UE) 2019/1021 jenħtieġ li jiġi emendat kif xieraq,