(1)

Il-Programm InvestEU għandu l-għan li jappoġġa l-operazzjonijiet ta’ finanzjament u ta’ investiment li jikkontribwixxu għall-kisba tal-objettivi ta’ politika tal-Unjoni stabbiliti fl-Artikoli 3 u 8, u fl-Anness II tar-Regolament (UE) 2021/523. Dawn l-operazzjonijiet ta’ finanzjament u ta’ investiment għandhom l-għan li jappoġġaw l-iżvilupp, fost l-oħrajn, tal-industrija tad-difiża biex jikkontribwixxu għall-awtonomija strateġika tal-Unjoni.

(2)

Skont l-Artikolu 14(1), il-punt (d), tar-Regolament (UE) 2021/523, l-operazzjonijiet ta’ finanzjament u ta’ investiment fl-ambitu ta’ kull waħda mit-twieqi ta’ politika msemmija fl-Artikolu 8 ta’ dak ir-Regolament iridu jkunu konsistenti mal-linji gwida għall-investiment stabbiliti fl-Anness tar-Regolament Delegat tal-Kummissjoni (UE) 2021/1078 (2) (il-“linji gwida għall-investiment” attwali), u abbażi tal-Artikolu 8(3) u (10) tar-Regolament (UE) 2021/523. Fil-każ tal-investimenti strateġiċi fid-difiża, dawk il-linji gwida għall-investiment jistabbilixxu limitazzjonijiet fir-rigward tar-riċevituri finali kkontrollati minn pajjiż terz jew mill-entitajiet ta’ pajjiż terz u r-riċevituri finali li jkollhom il-ġestjoni eżekuttiva tagħhom barra mill-Unjoni bil-ħsieb li jipproteġu s-sigurtà tal-Unjoni u tal-Istati Membri.

(3)

Il-White Paper Konġunta dwar id-Difiża Ewropea – Prontezza 2030 (3) tenfasizza l-ħtieġa urġenti li jittejjeb l-aċċess għall-kapital għall-kumpaniji stabbiliti fl-Unjoni, inkluż l-intrapriżi żgħar u ta’ daqs medju u l-kumpaniji b’kapitalizzazzjoni medja, biex ikunu jistgħu jġibu s-soluzzjonijiet tagħhom fuq skala industrijali u jixprunaw iż-żieda industrijali li l-Unjoni qed tistinka għaliha. Is-settur finanzjarju juri interess dejjem akbar fid-difiża. Madankollu, is-settur tad-difiża jibqa’ suq li mhuwiex moqdi biżżejjed anke minħabba limitazzjonijiet fil-politiki ta’ investiment tal-istituzzjonijiet finanzjarji pubbliċi u privati. Il-mobilizzazzjoni tal-potenzjal sħiħ ta’ InvestEU b’appoġġ għas-settur tad-difiża hija kruċjali biex jiġu indirizzati dawn l-isfidi.

(4)

Abbażi tal-feedback li wasal mill-partijiet ikkonċernati, permezz ta’ konsultazzjoni pubblika u konsultazzjonijiet immirati mas-sħab inkarigati mill-implimentazzjoni ta’ InvestEU u mal-Istati Membri, jidher li l-limitazzjonijiet stabbiliti fil-linji gwida attwali għall-investiment fir-rigward tal-investimenti strateġiċi jistgħu jfixklu l-użu tal-fond InvestEU b’appoġġ għas-settur tad-difiża. Għalhekk, il-linji gwida attwali għall-investiment jenħtieġ li jibbenefikaw minn modifika mmirata sabiex ikunu mfassla bis-sħiħ għall-ispeċifiċitajiet ta’ InvestEU, jiġifieri garanzija baġitarja implimentata f’ġestjoni indiretta. Il-bidliet proposti se jiffaċilitaw l-użu ta’ InvestEU b’appoġġ għas-settur tad-difiża, filwaqt li jżommu biżżejjed salvagwardji għall-investimenti strateġiċi fid-difiża, f’konformità mar-Regolament (UE) 2021/523.

(5)

Il-kamp ta’ applikazzjoni tal-investimenti strateġiċi fid-difiża soġġett għal-limitazzjonijiet huwa definit fil-linji gwida attwali għall-investiment bħala teknoloġiji u prodotti tad-difiża identifikati fil-programm ta’ ħidma annwali għall-Fond Ewropew għad-Difiża. Din id-definizzjoni ġġib magħha kumplessità u inċertezza legali bla bżonn minħabba n-natura li qed tevolvi tal-programm ta’ ħidma tal-Fond Ewropew għad-Difiża. Dan il-kamp ta’ applikazzjoni jenħtieġ li jiġi ssimplifikat billi ssir referenza għall-investimenti fit-teknoloġiji u l-prodotti tad-difiża żviluppati primarjament għal applikazzjonijiet militari. Tali simplifikazzjoni ttejjeb il-prevedibbiltà għas-sħab inkarigati mill-implimentazzjoni ta’ InvestEU u għall-intermedjarji finanzjarji billi tipprovdilhom metodoloġija ċara biex jidentifikaw jekk ir-riċevituri finali humiex soġġetti għal-limitazzjonijiet relatati ma’ pajjiżi terzi, inkluż biex jiġi ċċarat kif dawk il-limitazzjonijiet japplikaw għal teknoloġiji b’applikazzjonijiet tad-difiża u ċivili (b’użu doppju).

(6)

Il-linji gwida attwali għall-investiment jirrikjedu li sabiex tkun eliġibbli, entità kkontrollata minn pajjiż terz jew minn entitajiet ta’ pajjiżi terzi għandha turi li l-Istat Membru li fih tkun stabbilita jkun approva garanzija f’konformità mal-prinċipji li jikkonċernaw l-entitajiet eliġibbli stabbiliti fir-Regolament (UE) 2021/697 tal-Parlament Ewropew u tal-Kunsill (4) li jistabbilixxi l-Fond Ewropew għad-Difiża. Dik id-dispożizzjoni mhijiex imfassla għall-ispeċifiċitajiet ta’ InvestEU u tillimita l-użu tal-finanzjament. Jidher li l-garanziji approvati minn Stat Membru fl-ambitu ta’ programm tad-difiża li jkun irċieva l-kontribuzzjoni finanzjarja tal-Unjoni huma biżżejjed biex jipproteġu s-sigurtà tal-Unjoni u tal-Istati Membri tagħha fil-kuntest tal-Fond InvestEU. Jenħtieġ li l-entitajiet li ma jistgħux jissodisfaw dawn il-kriterji biss ikunu meħtieġa jippreżentaw garanzija speċifikament fil-kuntest tal-operazzjoni ta’ InvestEU. Din l-emenda għandha l-għan li tiċċara l-implimentazzjoni tal-Fond InvestEU b’appoġġ għall-entitajiet stabbiliti fl-UE u kkontrollati minn entitajiet mhux tal-UE. Tali garanziji jistgħu, skont il-każ, jiddependu fuq il-miżuri ta’ mitigazzjoni imposti mill-Istat Membru li jiskrinja l-akkwist ta’ kontroll ta’ tali entitajiet legali minn pajjiż terz ieħor jew minn entità oħra ta’ pajjiż terz, jew għall-benefiċċju tiegħu, skont it-tifsira tar-Regolament (UE) 2019/452 tal-Parlament Ewropew u tal-Kunsill (5).

(7)

Il-linji gwida attwali għall-investiment jistabbilixxu li fir-rigward tal-investimenti strateġiċi fid-difiża, il-limitazzjonijiet relatati mal-kontroll tar-riċevituri finali huma estiżi wkoll għall-fornituri u s-sottokuntratturi tagħhom. Dan il-kamp ta’ applikazzjoni wiesa’ mhuwiex adattat għat-tip ta’ finanzjament ipprovdut fl-ambitu ta’ InvestEU u jista’ jimpedixxi l-użu tal-finanzjament ta’ InvestEU billi jimponi piż amministrattiv bla bżonn. Sabiex jiġi ssimplifikat il-proċess amministrattiv tal-finanzjament ta’ InvestEU u biex jiġi żgurat li l-kundizzjonijiet ta’ eliġibbiltà għall-finanzjament ta’ InvestEU jkunu mfassla għall-istrumenti ta’ finanzjament tad-dejn u tal-ekwità, ir-referenza għall-fornituri fil-każ ta’ kontroll minn pajjiżi terzi jenħtieġ li titneħħa mil-linji gwida għall-investiment.

(8)

Il-limitazzjonijiet stabbiliti fil-linji gwida attwali għall-investiment fir-rigward tal-investimenti strateġiċi jirrestrinġu għal livell mhux neċessarju, l-eliġibbiltà tal-entitajiet stabbiliti f’pajjiżi terzi assoċjati jew ikkontrollati minn pajjiżi terzi assoċjati jew entitajiet ta’ pajjiżi terzi. Biex jiġi żgurat trattament ugwali mal-entitajiet stabbiliti fl-Unjoni u fil-pajjiżi terzi assoċjati mal-Programm InvestEU, u biex jiġi allinjat il-prinċipju għall-entitajiet eliġibbli stabbilit fil-Fond Ewropew għad-Difiża kif ukoll fi programmi oħra tad-difiża li fihom l-Unjoni hija kontributur finanzjarju, il-linji gwida attwali għall-investiment jenħtieġ li jiġu adattati biex jiġi żgurat li jiġu applikati limitazzjonijiet fir-rigward tal-entitajiet stabbiliti jew ikkontrollati minn pajjiżi terzi mhux assoċjati jew entitajiet ta’ pajjiżi terzi.

(9)

Skont il-linji gwida attwali għall-investiment, sa 5 snin wara d-data tal-iżborż finali tal-finanzjament, ir-riċevituri finali tal-investimenti strateġiċi fid-difiża ma jistgħux jilliċenzjaw jew jittrasferixxu b’mod esklussiv id-drittijiet tal-proprjetà intellettwali għal teknoloġiji kritiċi relatati u teknoloġiji strumentali għas-salvagwardja tal-interess essenzjali tas-sigurtà tal-Unjoni u tal-Istati Membri tagħha li jirriżultaw direttament minn dawk l-investimenti strateġiċi lil pajjiżi terzi jew entitajiet ta’ pajjiżi terzi, sakemm ma jkunux approvati mill-Istat Membru li fih ikun stabbilit ir-riċevitur finali. L-implimentazzjoni ta’ dik id-dispożizzjoni toħloq sfidi u konġestjonijiet sinifikanti fl-Istati Membri u għalhekk tfixkel l-użu ta’ InvestEU b’appoġġ għad-difiża billi tirrikjedi lill-Istati Membri jimplimentaw forom ġodda ta’ kontroll, lil hinn mill-mekkaniżmi eżistenti, bħal pereżempju għall-esportazzjoni ta’ oġġetti militari jew l-iskrinjar ta’ investimenti diretti barranin. Sabiex jiġu indirizzati dawk id-diffikultajiet, il-linji gwida attwali għall-investiment jenħtieġ li jiġu modifikati biex jiġi żgurat li l-benefiċjarji jkunu soġġetti biss għal mekkaniżmi ta’ kontroll eżistenti implimentati mill-Istati Membri li fihom ikunu stabbiliti, filwaqt li l-operazzjoni ta’ finanzjament u ta’ investiment tkun koperta mill-garanzija tal-UE.

(10)

Għalhekk, jenħtieġ li r-Regolament Delegat (UE) 2021/1078 jiġi emendat kif xieraq,