(1)

Ir-Regolament Delegat tal-Kummissjoni (UE) 2022/803 (2) jispeċifika r-regoli ta’ proċedura li japplikaw għall-Awtorità Ewropea tat-Titoli u s-Swieq (“ESMA”, European Securities and Markets Authority) għall-eżerċizzju tas-setgħa li timponi multi, kif imsemmi fl-Artikolu 38h tar-Regolament (UE) Nru 600/2014, jew pagamenti perjodiċi ta’ penali, kif imsemmi fl-Artikolu 38i ta’ dak ir-Regolament, fir-rigward tal-fornituri ta’ servizzi ta’ rapportar tad-data (“DRSPs”, Data Reporting Service Providers). Il-kamp ta’ applikazzjoni ta’ dak ir-Regolament Delegat kien limitat għal arranġamenti ta’ pubblikazzjoni approvati u mekkaniżmi ta’ rapportar approvati soġġetti għas-superviżjoni mill-ESMA. Il-kamp ta’ applikazzjoni ta’ dak ir-Regolament Delegat ma kienx ikopri DRSPs oħra soġġetti għas-superviżjoni mill-ESMA, inklużi fornituri ta’ tape konsolidat (“CTPs”, Consolidated Tape Providers). Dak il-kamp ta’ applikazzjoni limitat kien dovut għan-nuqqas ta’ DRSPs li jipprovdu servizzi ta’ tape konsolidat fl-Unjoni u għar-rieżami pendenti tar-Regolament (UE) Nru 600/2014, li ġie emendat bir-Regolament (UE) 2024/791 tal-Parlament Ewropew u tal-Kunsill (3) (“ir-riforma tal-MiFIR”). Ir-riforma tal-MiFIR daħlet fis-seħħ fit-28 ta’ Marzu 2024.

(2)

Ir-riforma tal-MiFIR neħħiet l-ostakli għall-ħolqien ta’ CTPs fl-Unjoni u stabbiliet skeda ta’ żmien għall-għażla u l-awtorizzazzjoni mill-ESMA ta’ CTP għall-bonds, CTP għall-ishma u fondi nnegozjati fil-borża u CTP għal derivattivi barra l-borża. Fid-dawl tal-proċess ta’ awtorizzazzjoni ta’ CTPs li jmiss, huwa meħtieġ li jiġi emendat il-kamp ta’ applikazzjoni tar-Regolament Delegat (UE) 2022/803 biex jiġi żgurat li jkopri t-tipi kollha ta’ DRSPs soġġetti għas-superviżjoni mill-ESMA, inklużi s-CTPs.

(3)

Għalhekk, ir-Regolament Delegat (UE) 2022/803 jenħtieġ li jiġi emendat kif xieraq,