(1)

F’konformità mal-Artikolu 16 tad-Direttiva 2014/53/UE tal-Parlament Ewropew u tal-Kunsill (2), l-apparat tar-radju li jkun konformi mal-istandards armonizzati jew partijiet minnhom, li r-referenzi għalihom ikunu ġew ippubblikati f’Il-Ġurnal Uffiċjali tal-Unjoni Ewropea, irid ikun preżunt konformi mar-rekwiżiti essenzjali stabbiliti fl-Artikolu 3 ta’ dik id-Direttiva, koperti minn dawk l-istandards jew partijiet minnhom.

(2)

Permezz tad-Deċiżjoni ta’ Implimentazzjoni tal-Kummissjoni C(2015) 5376 (3), il-Kummissjoni talbet lill-Kumitat Ewropew għall-Istandardizzazzjoni Elettroteknika (CENELEC, European Committee for Electrotechnical Standardization) u lill-Istitut Ewropew tal-Istandards tat-Telekomunikazzjoni (ETSI, European Telecommunications Standards Institute) biex jabbozzaw u jirrevedu l-istandards armonizzati għall-apparat tar-radju b’appoġġ għar-rekwiżiti essenzjali stabbiliti fid-Direttiva 2014/53/UE u koperti mill-Anness II ta’ dik id-Deċiżjoni (“it-talba”).

(3)

Abbażi tat-talba, l-ETSI ħejja abbozz tal-istandard armonizzat EN 301 489-28 V2.1.1 dwar il-kompatibilità elettromanjetika għall-konnessjonijiet bil-vidjo diġitali mingħajr fili.

(4)

Abbażi tat-talba, l-ETSI rreveda l-istandards armonizzati EN 300 487 V2.1.2, EN 301 908-14 V15.1.1, EN 301 908-18 V15.1.1 u EN 303 978 V2.1.2, li r-referenzi tagħhom huma ppubblikati f’Il-Ġurnal Uffiċjali tal-Unjoni Ewropea bid-Deċiżjoni ta’ Implimentazzjoni tal-Kummissjoni (UE) 2022/2191 (4). Dan wassal għall-adozzjoni tal-istandards armonizzati EN 300 487 V2.2.1, EN 301 908-14 V17.1.1, EN 301 908-18 V17.1.1 u EN 303 978 V2.2.1. Barra minn hekk, l-ETSI ħejja abbozz ta’ standards iżjed speċifiċi biex jissostitwixxu l-istandards armonizzati ġeneriċi EN 302 065-3 V2.1.1 u EN 302 065-4 V1.1.1, li r-referenzi tagħhom huma ppubblikati f’Il-Ġurnal Uffiċjali tal-Unjoni Ewropea bid-Deċiżjoni ta’ Implimentazzjoni (UE) 2022/2191. Dan irriżulta fl-adozzjoni tal-istandards armonizzati EN 302 065-3-1 V3.2.1 u EN 302 065-4-1 V2.2.1.

(5)

Il-Kummissjoni, flimkien mal-ETSI, ivvalutat jekk dawk l-istandards armonizzati humiex konformi mat-talba.

(6)

L-istandards armonizzati EN 300 487 V2.2.1, EN 301 908-14 V17.1.1, EN 301 908-18 V17.1.1, EN 302 065-3-1 V3.2.1, EN 302 065-4-1 V2.2.1 u EN 303 978 V2.2.1 jissodisfaw ir-rekwiżiti essenzjali li għandhom l-għan li jkopru u li huma stabbiliti fl-Artikolu 3 tad-Direttiva 2014/53/UE. Għalhekk, jixraq li r-referenzi ta’ dawk l-istandards armonizzati jiġu ppubblikati f’Il-Ġurnal Uffiċjali tal-Unjoni Ewropea.

(7)

L-istandard armonizzat EN 301 489-28 V2.1.1 ma jindirizzax ir-rekwiżiti tal-emissjonijiet fil-banda tal-frekwenzi taħt 9 kHz. Minbarra dan, fil-klawżola 6 tiegħu, jistabbilixxi kriterji bbażati fuq il-prestazzjoni b’mod suġġettiv, filwaqt li hemm nuqqas ta’ kriterji oġġettivament verifikabbli u limiti speċifiċi. B’konsegwenza, jenħtieġ li EN 301 489-28 V2.1.1 ma jipprovdix preżunzjoni ta’ konformità fir-rigward tar-rekwiżiti tal-emissjonijiet fil-banda tal-frekwenzi taħt 9 kHz u anki fir-rigward tal-klawżola 6 tiegħu, jekk dik il-klawżola tiġi applikata bi kriterji bbażati fuq il-prestazzjoni bħal dawn. Għalhekk, ir-referenza ta’ dak l-istandard armonizzat jenħtieġ li tiġi ppubblikata f’Il-Ġurnal Uffiċjali tal-Unjoni Ewropea b’restrizzjonijiet.

(8)

L-Anness I tad-Deċiżjoni ta’ Implimentazzjoni (UE) 2022/2191 jipprovdi r-referenzi għall-istandards armonizzati li jikkonferixxu preżunzjoni ta’ konformità mad-Direttiva 2014/53/UE. Biex ikun żgurat li r-referenzi tal-istandards armonizzati abbozzati b’appoġġ għad-Direttiva 2014/53/UE jkunu elenkati f’att wieħed, ir-referenzi ta’ dawn l-istandards armonizzati li ġejjin jenħtieġ li jiġu inklużi f’dak l-Anness: EN 300 487 V2.2.1, EN 301 908-14 V17.1.1, EN 301 908-18 V17.1.1, EN 302 065-3-1 V3.2.1, EN 302 065-4-1 V2.2.1 u EN 303 978 V2.2.1. Apparti dan, ir-referenza tal-istandard armonizzat EN 301 489-28 V2.1.1 jenħtieġ li tiġi inkluża f’dak l-Anness b’restrizzjonijiet:

(9)

Għaldaqstant, huwa neċessarju li r-referenzi tal-istandards armonizzati riveduti EN 300 487 V2.1.2, EN 301 908-14 V15.1.1, EN 301 908-18 V15.1.1, EN 302 065-3 V2.1.1, EN 302 065-4 V1.1.1 u EN 303 978 V2.1.2 jiġu rtirati minn Il-Ġurnal Uffiċjali tal-Unjoni Ewropea.

(10)

Biex il-manifatturi jkollhom biżżejjed żmien biex jadattaw l-apparat tar-radju tagħhom kopert mill-istandards armonizzati riveduti EN 300 487 V2.1.2, EN 301 908-14 V15.1.1, EN 301 908-18 V15.1.1, EN 302 065-3 V2.1.1, EN 302 065-4 V1.1.1 jew EN 303 978 V2.1.2, huwa neċessarju li l-irtirar tar-referenzi ta’ dawk l-istandards armonizzati jiġi differit..

(11)

Għalhekk, jenħtieġ li d-Deċiżjoni ta’ Implimentazzjoni (UE) 2022/2191 tiġi emendata kif xieraq.

(12)

Il-konformità ma’ standard armonizzat tikkonferixxi preżunzjoni ta’ konformità mar-rekwiżiti essenzjali korrispondenti stabbiliti fil-leġiżlazzjoni tal-Unjoni dwar l-armonizzazzjoni mid-data tal-pubblikazzjoni tar-referenza tat-tali standard f’Il-Ġurnal Uffiċjali tal-Unjoni Ewropea. Għalhekk, jenħtieġ li din id-Deċiżjoni tidħol fis-seħħ fil-jum tal-pubblikazzjoni tagħha,