(1)

Talba għar-reġistrazzjoni ta’ inizjattiva taċ-ċittadini Ewropej intitolata “Save your right, save your flight!” (Aqbeż għal drittijietek; titlifx it-titjira!) intbagħtet lill-Kummissjoni fit-18 ta’ Ġunju 2025.

(2)

L-organizzaturi tal-inizjattiva jirreferu għal “bidliet fid-drittijiet tal-passiġġieri li se jnaqqsu l-protezzjonijiet li l-vjaġġaturi ilhom jiddependu fuqhom għal għoxrin sena”. Huma jqisu li dawk il-bidliet se jirriżultaw f’telf ta’ ħin, ta’ flus u ta’ drittijiet meta mqabbla mal-livell ta’ protezzjoni offrut mil-leġiżlazzjoni attwali. L-għan tal-inizjattiva, kif espress mill-organizzaturi, huwa li titlob it-treġġigħ lura ta’ “bidliet ostili għall-passiġġieri” u ż-żamma tal-“limiti ta’ eliġibbiltà għall-kumpens attwali”.

(3)

L-anness tal-inizjattiva jipprovdi dettalji ulterjuri dwar l-isfond tagħha, is-suġġett tagħha u l-objettivi tagħha. Huwa jirreferi għall-proposti tal-Kunsill relatati mal-introduzzjoni ta’ “skadenza għall-ipproċessar ta’ talbiet għal kumpens (sa 14-il jum)”, li jiggarantixxu “d-dritt tal-konsumaturi għall-informazzjoni dwar il-kawżi tad-dewmien” u li titwaqqaf “lista definittiva ta’ każijiet eliġibbli għal kumpens, abbażi tal-ġurisprudenza stabbilita tal-QĠUE”.

(4)

Il-Kummissjoni tqis li tista’ tadotta proposta għal regolament dwar id-drittijiet tal-passiġġieri fl-Unjoni abbażi tal-Artikolu 91(1) u tal-Artikolu 100(2) tat-Trattat dwar il-Funzjonament tal-Unjoni Ewropea.

(5)

Għal din ir-raġuni, il-Kummissjoni hija tal-fehma li l-ebda parti mill-inizjattiva ma taqa’ manifestament barra mill-qafas tas-setgħat tal-Kummissjoni li tippreżenta proposta għal att legali tal-Unjoni għall-fini tal-implimentazzjoni tat-Trattati.

(6)

Dik il-konklużjoni ma taffettwax il-valutazzjoni dwar jekk il-kundizzjonijiet sostantivi konkreti meħtieġa biex il-Kummissjoni taġixxi, inkluża l-konformità mal-prinċipji tal-proporzjonalità u tas-sussidjarjetà u l-kompatibbiltà mad-drittijiet fundamentali, ikunux issodisfati f’dan il-każ.

(7)

Il-grupp ta’ organizzaturi pprovda evidenza xierqa li huwa jissodisfa r-rekwiżiti stipulati fl-Artikolu 5(1) u (2) tar-Regolament (UE) 2019/788 u ħatar il-persuni ta’ kuntatt f’konformità mal-Artikolu 5(3), l-ewwel subparagrafu, ta’ dak ir-Regolament.

(8)

L-inizjattiva la hija manifestament abbużiva, frivola jew vessatorja u lanqas ma tmur manifestament kontra l-valuri tal-Unjoni kif stabbiliti fl-Artikolu 2 tat-Trattat dwar l-Unjoni Ewropea jew kontra d-drittijiet minquxin fil-Karta tad-Drittijiet Fundamentali tal-Unjoni Ewropea.

(9)

Għalhekk, jenħtieġ li l-inizjattiva intitolata “Save your right, save your flight!” (Aqbeż għal drittijietek; titlifx it-titjira!) tiġi rreġistrata.

(10)

Il-konklużjoni li l-kundizzjonijiet għar-reġistrazzjoni skont l-Artikolu 6(3) tar-Regolament (UE) 2019/788 huma ssodisfati, ma timplikax li l-Kummissjoni b’xi mod jew ieħor tikkonferma l-korrettezza fattwali tal-kontenut tal-inizjattiva emendata, li hija r-responsabbiltà unika tal-grupp ta’ organizzaturi tal-inizjattiva. Il-kontenut tal-inizjattiva jesprimi biss il-fehmiet tal-grupp ta’ organizzaturi, u bl-ebda mod ma jista’ jitqies li jirrifletti l-fehmiet tal-Kummissjoni,