(1)

F’konformità mal-Artikolu 12 tad-Direttiva 2014/35/UE tal-Parlament Ewropew u tal-Kunsill (2), it-tagħmir elettriku konformi mal-istandards armonizzati jew ma’ partijiet minnhom, li r-referenzi tagħhom ikunu ġew ippubblikati f’Il-Ġurnal Uffiċjali tal-Unjoni Ewropea, għandu jkun preżunt konformi mal-objettivi tas-sikurezza koperti minn dawk l-istandards armonizzati jew minn partijiet minnhom, imsemmija fl-Artikolu 3 ta’ dik id-Direttiva u stabbiliti fl-Anness I ta’ dik id-Direttiva.

(2)

Bl-ittra M/511 tat-8 ta’ Novembru 2012, il-Kummissjoni talbet lill-Kumitat Ewropew għall-Istandardizzazzjoni (CEN), lill-Kumitat Ewropew għall-Istandardizzazzjoni Elettroteknika (Cenelec) u lill-Istitut Ewropew tal-Istandards tat-Telekomunikazzjoni (ETSI) biex jipprovdu l-ewwel lista sħiħa tat-titoli tal-istandards armonizzati u għall-abbozzar, ir-reviżjoni u t-tlestija ta’ standards armonizzati, għat-tagħmir elettriku ddisinjat għall-użu fi ħdan ċerti limiti tal-voltaġġ b’appoġġ għad-Direttiva 2014/35/UE (“it-talba”). L-objettivi tas-sikurezza msemmija fl-Artikolu 3 tad-Direttiva 2014/35/UE u stabbiliti fl-Anness I ta’ dik id-Direttiva ma nbidlux minn mindu saret it-talba lis-CEN, lis-Cenelec u lill-ETSI.

(3)

Abbażi tat-talba, is-CENELEC irreveda l-istandard armonizzat EN 50214:2006 kif ikkorreġut b’EN 50214:2006/Ac:2007 dwar Kejbils flessibbli ċatti miksija bil-polivinilklorur, li r-referenzi tiegħu huma ppubblikati f’Il-Ġurnal Uffiċjali tal-Unjoni Ewropea bid-Deċiżjoni ta’ Implimentazzjoni tal-Kummissjoni (UE) 2023/2723 (3). Dan irriżulta fl-adozzjoni tal-istandard armonizzat EN 50214:2024.

(4)

Barra minn hekk, abbażi tat-talba, is-Cenelec emenda l-istandard armonizzat EN 50620: 2017 kif emendat b’EN 50620: 2017/A1: 2019 dwar il-kejbils li jiċċarġjaw vetturi elettriċi. Dan irriżulta fl-adozzjoni tal-istandard armonizzat emendatorju EN 50620:2017/A2:2024.

(5)

Il-Kummissjoni, flimkien mas-CENELEC, ivvalutat jekk l-istandards u l-emendi tagħhom, abbozzati mis-CENELEC, humiex konformi mat-talba.

(6)

L-istandards armonizzati li ġejjin u l-emendi tagħhom jissodisfaw l-objettivi tas-sikurezza li għandhom l-għan li jkopru u li huma stabbiliti fid-Direttiva 2014/35/UE: EN 50214: 2024 u EN 50620: 2017 kif emendati b’EN 50620:2017/A1:2019 u b’EN 50620:2017/A2:2024. Għalhekk jixraq li r-referenzi ta’ dawk l-istandards u l-emendi tagħhom jiġu ppubblikati f’Il-Ġurnal Uffiċjali tal-Unjoni Ewropea.

(7)

L-Anness I tad-Deċiżjoni ta’ Implimentazzjoni (UE) 2023/2723 jipprovdi r-referenzi tal-istandards armonizzati li jikkonferixxu preżunzjoni ta’ konformità mad-Direttiva 2014/35/UE. Biex jiġi żgurat li r-referenzi tal-istandards armonizzati abbozzati b’appoġġ għad-Direttiva 2014/35/UE jkunu elenkati f’att wieħed, ir-referenzi ta’ dawk l-istandards u tal-emendi tagħhom jenħtieġ li jiġu inklużi f’dak l-Anness.

(8)

Għalhekk, jeħtieġ li r-referenzi tal-istandards armonizzati EN 50214:2006 u EN 50620:2017 jiġu rtirati minn Il-Ġurnal Uffiċjali tal-Unjoni Ewropea, flimkien mar-referenzi tal-istandards emendatorji jew korrettorji għalihom ippubblikati f’Il-Ġurnal Uffiċjali tal-Unjoni Ewropea. Għalhekk, jixraq li dawk ir-referenzi jitħassru mill-Anness I tad-Deċiżjoni ta’ Implimentazzjoni (UE) 2023/2723.

(9)

Sabiex il-manifatturi jingħataw biżżejjed żmien biex jadattaw it-tagħmir tagħhom li huwa kopert bl-istandard armonizzat EN 50214:2006 kif ikkorreġut b’EN 50214:2006/AC:2007 u b’EN 50620:2017 kif emendat b’EN 50620:2017/A1:2019, jeħtieġ li l-irtirar tar-referenzi ta’ dawk l-istandards armonizzati jiġi differit.

(10)

Id-Deċiżjoni ta’ Implimentazzjoni (UE) 2023/2723 jenħtieġ li tiġi emendata skont dan.

(11)

Il-konformità ma’ standard armonizzat tikkonferixxi preżunzjoni tal-konformità mar-rekwiżiti essenzjali korrispondenti, inkluż l-objettivi tas-sikurezza, stabbiliti fil-leġiżlazzjoni tal-Unjoni dwar l-armonizzazzjoni, mid-data tal-pubblikazzjoni tar-referenza ta’ tali standard f’Il-Ġurnal Uffiċjali tal-Unjoni Ewropea. Għalhekk, jenħtieġ li din id-Deċiżjoni tidħol fis-seħħ fil-jum tal-pubblikazzjoni tagħha,