(1)

L-ammont tat-tariffa li għandha titħallas mill-applikanti għal awtorizzazzjoni għall-ivvjaġġar tas-Sistema Ewropea ta’ Informazzjoni u ta’ Awtorizzazzjoni għall-Ivvjaġġar (ETIAS) huwa speċifikat fl-Artikolu 18(1) tar-Regolament (UE) 2018/1240. Ir-Regolament Delegat tal-Kummissjoni (UE) 2024/2511 (2) jistabbilixxi mekkaniżmi li permezz tagħhom il-Kummissjoni għandha tivvaluta l-ħtieġa tal-aġġustament ta’ dik it-tariffa.

(2)

F’konformità mar-Regolament Delegat (UE) 2024/2511, il-Kummissjoni identifikat għadd ta’ fatturi li x’aktarx jirriżultaw f’żieda sinifikanti jew persistenti fil-kostijiet tal-operat u tal-manutenzjoni tas-sistema tal-ETIAS, lil hinn minn dawk antiċipati meta ġie adottat ir-Regolament (UE) 2018/1240. L-ewwel nett, mill-2016 ir-rata tal-inflazzjoni kumulattiva fl-Unjoni żdiedet bi 30,12 %. It-tieni, f’dawn l-aħħar snin l-għadd ta’ vjaġġaturi eżentati mill-viża li jidħlu fl-Unjoni żdied b’mod sinifikanti u mistenni li jkompli jiżdied fil-futur qrib. Fl-aħħar nett, ġew implimentati funzjonalitajiet addizzjonali tal-ETIAS għall-funzjonament tal-ETIAS, li ma kinux antiċipati meta ġie adottat ir-Regolament (EU) 2018/1240.

(3)

Huwa meħtieġ li t-tariffa tal-awtorizzazzjoni għall-ivvjaġġar tal-ETIAS tiġi allinjata ma’ dawk ta’ sistemi komparabbli biex jiġu żgurati parità kompetittiva u kundizzjonijiet ekwi ma’ programmi oħra ta’ awtorizzazzjoni għall-ivvjaġġar madwar id-dinja.

(4)

Għaldaqstant huwa meħtieġ li t-tariffa għall-awtorizzazzjoni għall-ivvjaġġar tal-ETIAS tiżdied.

(5)

Għalhekk, jenħtieġ li r-Regolament (UE) 2018/1240 jiġi emendat skont dan.

(6)

Dan ir-Regolament ma jaffettwax l-applikazzjoni tad-Direttiva 2004/38/KE tal-Parlament Ewropew u tal-Kunsill (3)u tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (4).

(7)

Ġaladarba dak ir-Regolament (UE) 2018/1240 jimxi fuq il-passi tal-acquis ta’ Schengen, f’konformità mal-Artikolu 4 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka nnotifikat l-implimentazzjoni tar-Regolament (UE) 2018/1240 fil-liġi nazzjonali tagħha. Għalhekk id-Danimarka hija marbuta b’dan ir-Regolament.

(8)

Dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen li l-Irlanda ma hijiex qiegħda tieħu sehem fihom, f’konformità mad-Deċiżjoni tal-Kunsill 2002/192/KE (5). Għalhekk l-Irlanda ma hijiex qed tieħu sehem fl-adozzjoni ta’ dan ir-Regolament u mhix marbuta bih jew suġġetta għall-applikazzjoni tiegħu.

(9)

Fir-rigward tal-Iżlanda u n-Norveġja, dan ir-Regolament jikkostitwixxi żvilupp fid-dispożizzjonijiet tal-acquis ta’ Schengen fis-sens tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dawn iż-żewġ Stati mal-implimentazzjoni, l-applikazzjoni u l-iżvilupp tal-acquis ta’ Schengen (6), li jaqgħu fil-qasam imsemmi fl-Artikolu 1, il-punt A, tad-Deċiżjoni tal-Kunsill 1999/437/KE (7).

(10)

Fir-rigward tal-Iżvizzera, dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen, fis-sens tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (8), li jaqgħu fil-qasam imsemmi fl-Artikolu 1, il-punt A, tad-Deċiżjoni 1999/437/KE moqri flimkien mal-Artikolu 3 tad-Deċiżjoni tal-Kunsill 2008/146/KE (9).

(11)

Fir-rigward tal-Liechtenstein, dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen fis-sens tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (10), li jaqgħu fil-qasam imsemmi fl-Artikolu 1, il-punt A, tad-Deċiżjoni tal-Kunsill 1999/437/KE moqri flimkien mal-Artikolu 3 tad-Deċiżjoni 2011/350/UE (11).

(12)

Dan ir-Regolament jikkostitwixxi att li jimxi fuq il-passi tal-acquis ta’ Schengen fi ħdan it-tifsira tal-Artikolu 3(1) tal-Att tal-Adeżjoni tal-2003, jew huwa relatat miegħu b’xi mod ieħor,