IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 127(2), l-ewwel inċiż, tiegħu,

Wara li kkunsidra l-Istatut tas-Sistema Ewropea tal-Banek Ċentrali u tal-Bank Ċentrali Ewropew, u b’mod partikolari l-Artikolu 12.1, it-tieni subparagrafu, flimkien mal-Artikolu 3.1, l-ewwel inċiż, u l-Artikolu 18.1 tiegħu,

Filwaqt li:

(1)

Fid-dawl taċ-ċirkostanzi ekonomiċi u finanzjarji eċċezzjonali assoċjati mat-tixrid tal-marda tal-coronavirus 2019 (COVID-19), fit-18 ta’ Marzu 2020, il-Kunsill Governattiv iddeċieda li jniedi programm temporanju ta’ xiri ta’ emerġenza fil-każ ta’ pandemija (PEPP) li jinkludi l-kategoriji kollha ta’ assi eliġibbli taħt il-programm ta’ xiri ta’ assi tal-BĊE, li jikkonsisti fil-programm ta’ xiri ta’ assi tas-settur pubbliku tas-swieq sekondarji, it-tielet programm ta’ xiri ta’ bonds koperti (CBPP3), il-programm ta’ xiri ta’ titoli ggarantiti b’assi, u l-programm ta’ xiri mis-settur korporattiv (CSPP).

(2)

Is-CBPP3 ġie stabbilit bid-Deċiżjoni BĊE/2014/40 tal-Bank Ċentrali Ewropew (1), li ġiet riformulata fid-Deċiżjoni (UE) 2020/187 tal-Bank Ċentrali Ewropew (BĊE/2020/8) (2). Fih għadd ta’ salvagwardji biex jiġi żgurat li x-xiri u ż-żamma ta’ bonds iggarantiti jkunu proporzjonati mal-għanijiet tiegħu. Dawn is-salvagwardji għandhom jiżguraw ukoll li riskji finanzjarji relatati jitqiesu fid-disinn tas-CBPP3, u għaldaqstant ukoll l-PEPP, u għandhom jirriflettu perspettivi tal-ġestjoni tar-riskju.

(3)	Għaldaqstant, il-Kunsill Governattiv iddeċieda fl-24 ta’ April 2025 li jemenda r-regola applikabbli għal tranżazzjonijiet ta’ self ta’ titoli ta’ bonds iggarantiti miżmuma mill-Eurosistema taħt is-CBPP3 u l-PEPP biex jiġu riflessi kunsiderazzjonijiet ta’ ġestjoni tar-riskju.

(4)	Għaldaqstant, id-Deċiżjoni (UE) 2020/440 tal-Bank Ċentrali Ewropew (BĊE/2020/17) (3) għandha tiġi emendata kif meħtieġ,

ADOTTA DIN ID-DEĊIŻJONI:

Artikolu 1

Emenda

L-Artikolu 7 tad-Deċiżjoni (UE) 2020/440 (BĊE/2020/17) huwa mibdul b’dan li gej:

“ Artikolu 7

Self ta’ titoli

Ħlief għal titoli li ma għadhomx jissodisfaw ir-rekwiżiti tal-kwalità tal-kreditu għal titoli mixtrijin taħt il-programm ta’ xiri tas-settur korporattiv jew it-tielet programm ta’ xiri ta’ bonds iggarantiti, l-Eurosistema għandha tagħmel it-titoli mixtrijin taħt il-PEPP, inklużi riakkwisti, disponibbli għas-self, bil-ħsieb li tiġi żgurata l-effettività tal-PEPP.”

Artikolu 2

Dħul fis-seħħ

Din id-Deċiżjoni għandha tidħol fis-seħħ fil-ħames jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.