(1)

Fil-bidu tal-2020, il-pajjiżi sħab tal-UE li kellhom ftehim ta’ kummerċ ħieles mal-Unjoni ġew ikkonfrontati bl-impossibbiltà li jipprovdu ċ-ċertifikati tal-moviment f’forma xierqa, jiġifieri fil-format korrett tal-karta, iffirmati bl-idejn u ttimbrati b’linka friska, meta jitqies li, minħabba l-pandemija tal-COVID-19, f’għadd ta’ pajjiżi l-kuntatti bejn l-awtoritajiet doganali tal-pajjiżi sħab tal-UE u l-operaturi ekonomiċi ġew sospiżi. Għalhekk, tqies xieraq li jiġu adottati miżuri eċċezzjonali applikabbli fuq bażi reċiproka, biex tiġi żgurata l-implimentazzjoni sħiħa tal-kummerċ preferenzjali.

(2)

L-awtoritajiet doganali tal-Istati Membri tal-UE u tal-pajjiżi sħab tal-UE ġew mistiedna jaċċettaw iċ-ċertifikati tal-moviment maħruġa b’mod elettroniku, b’firma, timbru jew cachet diġitali tal-awtoritajiet kompetenti, jew fil-forma ta’ kopja taċ-ċertifikat oriġinali, maħruġ jew f’forma stampata jew elettronika, jiġifieri kopja skennjata jew waħda disponibbli online.

(3)

Il-miżuri kienu applikabbli wkoll għaċ-ċertifikati tal-moviment A.TR għall-fini taċ-ċirkolazzjoni libera tal-merkanzija fl-Unjoni Doganali bejn l-UE u t-Turkija. Din il-prattika kienet ibbażata fuq il-flessibbiltà prevista fl-Artikolu 10, il-paragrafu 1 tad-Deċiżjoni Nru 1/2006 tal-Kumitat dwar il-Kooperazzjoni Doganali tas-26 ta’ Lulju 2006 (2) (“id-Deċiżjoni Nru 1/2006”). Skont dik id-dispożizzjoni, iċ-ċertifikati tal-moviment A.TR għandhom jiġu ppreżentati lill-awtoritajiet doganali tal-Istat importatur f’konformità mal-proċeduri applikabbli f’dak l-Istat.

(4)

Iċ-ċirkostanzi eċċezzjonali li wasslu għall-adozzjoni tal-miżuri flessibbli ma baqgħux jitqiesu rilevanti, u għalhekk ġie deċiż li dawk il-miżuri ma jibqgħux japplikaw mill-1 ta’ Mejju 2024.

(5)

L-Unjoni u t-Turkija rrikonoxxew li l-esperjenza tal-kummerċ skont il-miżuri eċċezzjonali adottati minħabba l-pandemija tal-COVID-19 kienet pożittiva u qiesu li kien xieraq li jitkomplew il-prattiki tajba introdotti fiċ-ċirkostanzi eċċezzjonali matul il-pandemija sabiex l-operaturi ekonomiċi jibbenefikaw mid-diġitalizzazzjoni taċ-ċertifikati tal-moviment A.TR.

(6)

Is-sistema mfassla u żviluppata għall-ħruġ elettroniku taċ-ċertifikati tal-moviment A.TR toffri l-possibbiltà għall-awtoritajiet doganali li jivverifikaw l-awtentiċità taċ-ċertifikati tal-moviment A.TR minnufih, u mingħajr preġudizzju għall-Artikolu 16 tad-Deċiżjoni Nru 1/2006 dwar il-proċeduri għall-verifiki sussegwenti. Jenħtieġ li jiġu stabbiliti arranġamenti dettaljati dwar l-implimentazzjoni tal-kontrolli tal-awtentiċità. L-istess funzjonalità jenħtieġ li tiġi attivata ladarba tiġi stabbilita sistema ta’ diġitalizzazzjoni taċ-ċertifikati tal-moviment A.TR għall-ħruġ elettroniku ta’ tali ċertifikati fl-Unjoni.

(7)

Fil-kuntest tal-kummerċ preferenzjali fiż-żona Pan-Ewro-Mediterranja (PEM), li tinkludi kemm l-UE kif ukoll it-Turkija, il-Kumitat Konġunt tal-Konvenzjoni Reġjonali dwar ir-regoli preferenzjali tal-oriġini pan-Ewro-Mediterranji adotta id-Deċiżjoni Nru 1/2024 (3) dwar l-użu taċ-ċertifikati tal-moviment EUR.1 u EUR-MED maħruġa b’mod elettroniku.

(8)

Għal prattika armonizzata dwar l-użu taċ-ċertifikati tal-moviment u wara li jitqiesu l-Artikolu 9 u l-Anness II tad-Deċiżjoni Nru 1/2006, huwa xieraq li ċ-ċertifikati tal-moviment A.TR maħruġa b’mod elettroniku skont il-qafas tal-Unjoni Doganali bejn l-UE u t-Turkija, jkunu aċċettati mill-awtoritajiet doganali tal-Istati Membri tal-UE u tat-Turkija.

(9)

Mit-8 ta’ Lulju 2024, l-awtoritajiet doganali tal-Istati Membri tal-UE u t-Turkija bdew jaċċettaw ċertifikati tal-moviment A.TR maħruġa b’mod elettroniku. Għalhekk, huwa xieraq li tiġi prevista l-applikazzjoni retroattiva tal-użu taċ-ċertifikati tal-moviment A.TR maħruġa b’mod elettroniku mit-8 ta’ Lulju 2024, biex tiġi żgurata l-kontinwità tal-prattiki tajba introdotti matul il-pandemija tal-COVID-19 minn dik id-data, mingħajr preġudizzju għall-azzjonijiet meħuda mill-amministrazzjonijiet doganali taż-żewġ partijiet matul il-perjodu interim mill-1 ta’ Mejju 2024 sat-8 ta’ Lulju 2024, u mingħajr ma jaffettwaw id-drittijiet mogħtija lill-individwi matul dak il-perjodu,