(1)

Ir-Regolament ta’ Implimentazzjoni tal-Kummissjoni (UE) Nru 993/2011 (2) inkluda l-8-idrossikinolina (l-isem komuni għall-kinolina-8-ol) bħala sustanza attiva fil-Parti B tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (3).

(2)

Sadanittant, f’konformità mal-Artikolu 17 tar-Regolament (KE) Nru 1107/2009, il-Kummissjoni estendiet erba’ darbiet il-perjodu ta’ approvazzjoni tal-kinolina-8-ol, li oriġinarjament kellu jiskadi fil-31 ta’ Diċembru 2021.

(3)

L-approvazzjoni tas-sustanza attiva kinolina-8-ol, kif stabbilit fil-Parti B tal-Anness tar-Regolament ta’ Implimentazzjoni (UE) Nru 540/2011, tiskadi fil-31 ta’ Diċembru 2025.

(4)

F’konformità mal-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (4) u fil-perjodu ta’ żmien previst f’dak l-Artikolu, ġiet ippreżentata applikazzjoni għat-tiġdid tal-approvazzjoni bħala kandidat għas-sostituzzjoni tas-sustanza attiva kinolina-8-ol mill-applikant, lil Spanja, l-Istat Membru relatur, u lin-Netherlands, l-Istat Membru korelatur.

(5)

L-applikant ippreżenta l-fajls supplimentari meħtieġa lill-Istat Membru relatur, lill-Istat Membru korelatur, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 6 tar-Regolament ta’ Implimentazzjoni (UE) Nru 844/2012. L-Istat Membru relatur sab li l-applikazzjoni kienet ammissibbli.

(6)

L-Istat Membru relatur ħejja abbozz tar-rapport ta’ valutazzjoni tat-tiġdid b’konsultazzjoni mal-Istat Membru korelatur u ppreżentah lill-Awtorità u lill-Kummissjoni fid-9 ta’ Lulju 2021. Fl-abbozz tar-rapport ta’ valutazzjoni tat-tiġdid tiegħu, l-Istat Membru relatur ippropona li tiġġedded l-approvazzjoni tal-kinolina-8-ol.

(7)

L-Awtorità għamlet il-fajl tas-sommarju supplimentari disponibbli għall-pubbliku. Barra minn hekk, l-Awtorità ċċirkolat ukoll l-abbozz tar-rapport ta’ valutazzjoni tat-tiġdid lill-applikant u lill-Istati Membri biex jagħtu l-kummenti tagħhom u nediet konsultazzjoni pubblika dwaru. L-Awtorità għaddiet il-kummenti li rċeviet lill-Kummissjoni.

(8)

Fit-28 ta’ Frar 2024, l-Awtorità bagħtet il-konklużjoni tagħha lill-Kummissjoni (5) fejn indikat li, filwaqt li jitqiesu l-kriterji għall-approvazzjoni stabbiliti fl-Anness II tar-Regolament (KE) Nru 1107/2009, il-prodotti għall-protezzjoni tal-pjanti li fihom il-kinolina-8-ol jistgħu jkunu mistennija jissodisfaw il-kriterji għall-approvazzjoni previsti fl-Artikolu 4 tar-Regolament (KE) Nru 1107/2009. Il-konklużjoni tal-Awtorità indikat ukoll li l-kinolina-8-ol ma titqiesx li tissodisfa l-kriterji għall-proprjetajiet li jfixklu s-sistema endokrinali kif stabbilit fil-punti 3.6.5 u 3.8.2 tal-Anness II tar-Regolament (KE) Nru 1107/2009.

(9)

Ir-Regolament tal-Kummissjoni (UE) 2017/776 (6) emenda l-Anness VI tar-Regolament (KE) Nru 1272/2008 tal-Parlament Ewropew u tal-Kunsill (7) biex jinkludi l-kinolina-8-ol (bħala 8-idrossikinolina) u jikklassifikaha bħala tossika għar-riproduzzjoni tal-kategorija 1B.

(10)

Is-sustanzi attivi li huma kklassifikati bħala tossiċi għar-riproduzzjoni tal-kategorija 1B jistgħu jiġu approvati biss jekk jintwera li l-esponiment għall-bnedmin ikun negliġibbli. L-użi rappreżentattivi tal-kinolina-8-ol, li jinkludu l-kundizzjonijiet u r-restrizzjonijiet, urew li skont dawn il-kundizzjonijiet u r-restrizzjonijiet jista’ jintwera esponiment negliġibbli għall-bnedmin, kemm permezz ta’ rotot ta’ esponiment mid-dieta kif ukoll ta’ dawk mhux mid-dieta.

(11)

Fit-13 ta’ Ġunju 2024, il-Kummissjoni bagħtet rapport tat-tiġdid lill-Istati Membri u lill-applikant u abbozz ta’ dan ir-Regolament lill-Kumitat Permanenti dwar il-Pjanti, l-Annimali, l-Ikel u l-Għalf fl-10 ta’ Lulju 2024.

(12)

Il-Kummissjoni stiednet lill-applikant jippreżenta l-kummenti tiegħu dwar il-konklużjoni tal-Awtorità u, f’konformità mal-Artikolu 14(1), it-tielet subparagrafu, tar-Regolament ta’ Implimentazzjoni (UE) Nru 844/2012, dwar ir-rapport tat-tiġdid. L-applikant ippreżenta l-kummenti tiegħu, li ġew eżaminati bir-reqqa u tqiesu.

(13)

Fir-rigward ta’ użu rappreżentattiv wieħed jew aktar ta’ mill-inqas prodott wieħed għall-protezzjoni tal-pjanti li fih il-kinolina-8-ol, ġie stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati.

(14)

Għalkemm il-valutazzjoni tar-riskju għat-tiġdid tal-approvazzjoni tas-sustanza attiva kinolina-8-ol hija bbażata fuq għadd limitat ta’ użi rappreżentattivi, dan ma jirrestrinġix l-użi li għalihom jistgħu jiġu awtorizzati l-prodotti għall-protezzjoni tal-pjanti li fihom il-kinolina-8-ol. Għalhekk jixraq li ma tibqax tinżamm ir-restrizzjoni li din is-sustanza attiva tintuża biss bħala fungiċida u batteriċida.

(15)

Billi l-kinolina-8-ol hi kklassifikata bħala tossika għar-riproduzzjoni tal-kategorija 1B, din tissodisfa l-kundizzjoni stabbilita fis-sitt inċiż tal-punt 4 tal-Anness II tar-Regolament (KE) Nru 1107/2009 biex tiġi approvata bħala kandidat għas-sostituzzjoni skont l-Artikolu 24 tar-Regolament (KE) Nru 1107/2009.

(16)

Għalhekk jixraq li l-approvazzjoni tal-kinolina-8-ol bħala kandidat għas-sostituzzjoni tiġġedded skont l-Artikolu 24 tar-Regolament (KE) Nru 1107/2009.

(17)

Madankollu, f’konformità mal-Artikolu 14(1) tar-Regolament (KE) Nru 1107/2009 flimkien mal-Artikolu 6 tiegħu, u fid-dawl tal-għarfien xjentifiku u tekniku attwali u tal-eżitu tal-valutazzjoni tar-riskju, jeħtieġ jiġu previsti ċerti kundizzjonijiet u restrizzjonijiet. B’mod partikolari, jenħtieġ li jiġu awtorizzati biss l-użi professjonali tal-prodotti għall-protezzjoni tal-pjanti li fihom il-kinolina-8-ol fis-serer permanenti li jippermettu l-iskambju kkontrollat tal-materjal u tal-enerġija mal-madwar u li jipprevjenu r-rilaxx ta’ prodotti għall-protezzjoni tal-pjanti fl-ambjent, permezz tat-tisqija bil-qatra, sabiex jiġi żgurat esponiment negliġibbli tal-operaturi, tal-ħaddiema, tal-persuni li jkunu fil-qrib u tar-residenti. Għall-istess raġuni, jenħtieġ li l-użi tal-kinolina-8-ol jiġu awtorizzati biss meta tkun disponibbli sistema ta’ trasferiment magħluqa għat-tagħbija u għat-taħlit tal-prodott għall-protezzjoni tal-pjanti fit-tagħmir tal-applikazzjoni. Barra minn hekk, bil-għan li jiġi indirizzat ir-riskju għall-makroorganiżmi tal-ħamrija identifikat mill-EFSA, jenħtieġ li jiġi stabbilit intervall ta’ qabel il-ħsad u jiġi ristrett l-użu mill-ġdid tal-ħamrija li fiha jitkabbru l-għelejjel ittrattati bi prodotti għall-protezzjoni tal-pjanti li fihom il-kinolina-8-ol f’serer permanenti.

(18)

Jeħtieġ ukoll li tintalab aktar informazzjoni ta’ konferma mill-applikant fir-rigward tal-esponiment mhux mid-dieta għas-sustanza attiva, data dwar il-metaboliżmu tan-newba tal-għelejjel konfinata li tindirizza d-destin tal-kompost oriġinarju fl-għelejjel sussegwenti, kif ukoll studji jew informazzjoni biex jiġi kkonfermat in-nuqqas ta’ potenzjal klastoġeniku u anewġeniku għall-kinolina-8-ol.

(19)

Jenħtieġ li r-Regolament ta’ Implimentazzjoni (UE) Nru 540/2011 jiġi emendat kif xieraq.

(20)

Ir-Regolament ta’ Implimentazzjoni tal-Kummissjoni (UE) 2015/408 (8) inkluda l-8-idrossikinolina (kinolina-8-ol) fil-lista ta’ kandidati għas-sostituzzjoni. Fid-dawl tat-tiġdid tal-approvazzjoni tal-kinolina-8-ol bħala kandidat għas-sostituzzjoni u tal-inklużjoni korrispondenti tal-kinolina-8-ol lejn il-Parti E tal-Anness tar-Regolament ta’ Implimentazzjoni (UE) Nru 540/2011, l-entrata għall-kinolina-8-ol jenħtieġ li titħassar mill-Anness tar-Regolament ta’ Implimentazzjoni (UE) 2015/408.

(21)

Ir-Regolament ta’ Implimentazzjoni tal-Kummissjoni (UE) 2024/2781 (9) estenda l-perjodu ta’ approvazzjoni tal-kinolina-8-ol sal-31 ta’ Diċembru 2025 sabiex il-proċess tat-tiġdid ikun jista’ jitlesta qabel ma jiskadi l-perjodu ta’ approvazzjoni ta’ dik is-sustanza attiva. Madankollu, minħabba li ttieħdet deċiżjoni dwar it-tiġdid tal-approvazzjoni ta’ dik is-sustanza attiva qabel dik id-data ta’ skadenza estiża, jenħtieġ li dan ir-Regolament japplika qabel dik id-data.

(22)

Dan ir-Regolament ma jżommx lill-applikant milli jippreżenta informazzjoni addizzjonali biex jiġu emendati l-kundizzjonijiet tal-approvazzjoni, kif previst fl-Artikoli 7 u 14 tar-Regolament (KE) Nru 1107/2009.

(23)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,