(1)

L-Anness III tar-Regolament (KE) Nru 1333/2008 jistabbilixxi lista tal-Unjoni tal-addittivi tal-ikel approvati għall-użu fl-addittivi tal-ikel, fl-enżimi tal-ikel, fl-aromatizzanti tal-ikel, fin-nutrijenti, u l-kundizzjonijiet tal-użu tagħhom.

(2)

Il-lista tal-Unjoni tal-addittivi tal-ikel tista’ tiġi aġġornata f’konformità mal-proċedura komuni msemmija fl-Artikolu 3(1) tar-Regolament (KE) Nru 1331/2008, fuq l-inizjattiva tal-Kummissjoni jew wara applikazzjoni minn Stat Membru jew minn parti interessata.

(3)

F’Ottubru 2023, tressqet applikazzjoni lill-Kummissjoni għall-awtorizzazzjoni tal-użu tal-askorbat tas-sodju (E 301) bħala antiossidant fil-livell massimu ta’ 50 000 mg/kg fil-preparazzjonijiet tal-vitamina A mikroinkapsulata għall-formula tat-trabi u għall-formula tal-prosegwiment, li rriżultat fi trasferiment massimu f’dak l-ikel ta’ 1 mg/l ta’ askorbat tas-sodju (E 301). Wara dan, l-applikazzjoni saret disponibbli għall-Istati Membri skont l-Artikolu 4 tar-Regolament (KE) Nru 1331/2008.

(4)

Skont l-Anness III tar-Regolament (KE) Nru 1333/2008, bħalissa l-askorbat tas-sodju (E 301) huwa awtorizzat bħala addittiv tal-ikel għal diversi użi, fosthom fil-preparazzjonijiet tal-vitamina D għall-formula tat-trabi u għall-formula tal-prosegwiment fil-livell massimu ta’ 100 000 mg/kg u fit-trasferiment massimu f’dak l-ikel ta’ 1 mg/l. Din l-awtorizzazzjoni hija bbażata fuq l-opinjoni xjentifika tal-Awtorità Ewropea dwar is-Sigurtà fl-Ikel (“l-Awtorità”), maħruġa fit-22 ta’ Diċembru 2010 (3), li tikkonkludi li l-użu tal-addittiv tal-ikel l-askorbat tas-sodju (E 301) bħala antiossidant għall-preparazzjonijiet tal-vitamina D għall-użu fil-formula tat-trabi u fil-formula tal-prosegwiment mhuwiex ta’ tħassib għas-sikurezza, peress li t-trasferiment massimu ta’ 1 mg/l ta’ askorbat tas-sodju jikkontribwixxi biss marġinalment għall-kontenut tal-vitamina C u tas-sodju fil-formula tat-trabi u fil-formula tal-prosegwiment.

(5)

Barra minn hekk, skont l-Anness tar-Regolament (UE) Nru 609/2013 tal-Parlament Ewropew u tal-Kunsill (4), l-askorbat tas-sodju jista’ jiżdied mal-formula tat-trabi u mal-formula tal-prosegwiment bħala sors ta’ vitamina C. L-ammonti minimi u massimi ta’ vitamina C u ta’ sodju fil-formula tat-trabi u fil-formula tal-prosegwiment huma speċifikati fir-Regolament Delegat tal-Kummissjoni (UE) 2016/127 (5).

(6)

Il-mikroenkapsulazzjoni tintuża b’mod komuni biex tipproteġi l-vitamina A mid-degradazzjoni. F’dan il-kuntest, l-askorbat tas-sodju (E 301), meta jintuża bħala antiossidant, jiżgura l-istabbiltà tal-matriċi protettiva li tinkapsula l-vitamina A matul il-proċess tal-produzzjoni u fil-prodott finali. Aktar stabbiltà tal-vitamina A tippermetti li d-doża tiġi kkontrollata aħjar u huwa meħtieġ inqas eċċess biex jiġi ggarantit l-ammont korrett ta’ vitamina A fil-prodott finali.

(7)

Skont l-Artikolu 3(2) tar-Regolament (KE) Nru 1331/2008, il-Kummissjoni trid tikseb l-opinjoni tal-Awtorità sabiex taġġorna l-lista tal-Unjoni tal-addittivi tal-ikel stabbilita fl-Anness III tar-Regolament (KE) Nru 1333/2008, għajr meta l-aġġornament inkwistjoni ma jkunx mistenni li jkollu effett fuq is-saħħa tal-bniedem.

(8)

L-użu mitlub tal-askorbat tas-sodju (E 301) fil-preparazzjonijiet tal-vitamina A mikroinkapsulata jirriżulta fl-istess livell ta’ trasferiment massimu għall-formula tat-trabi u għall-formula tal-prosegwiment bħal-livell ivvalutat mill-Awtorità fl-2010. Barra minn hekk, l-ammonti massimi għall-vitamina C u għas-sodju awtorizzati fil-formula tat-trabi u fil-formula tal-prosegwiment ikopru l-preżenza tagħhom mis-sorsi kollha, inkluż it-trasferiment tal-addittivi tal-ikel. Għalhekk, l-estensjoni proposta tal-użu tal-askorbat tas-sodju (E 301) mhijiex mistennija li jkollha effett fuq is-saħħa tal-bniedem.

(9)

Għalhekk, jixraq li jiġi awtorizzat l-użu tal-askorbat tas-sodju (E 301) bħala antiossidant fil-preparazzjonijiet tal-vitamina A mikroinkapsulata għall-formula tat-trabi u għall-formula tal-prosegwiment fil-livell massimu ta’ 50 000 mg/kg u fil-livell ta’ trasferiment massimu ta’ 1 mg/l f’dak l-ikel.

(10)

Għalhekk jenħtieġ li r-Regolament (KE) Nru 1333/2008 jiġi emendat kif xieraq.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,