(1)

Il-jodju polivinilpirrolidon ġie approvat bħala sustanza attiva għall-użu fil-prodotti bijoċidali tat-tipi ta’ prodott 1, 3, 4 u 22 bir-Regolament ta’ Implimentazzjoni tal-Kummissjoni (UE) Nru 94/2014 (2), soġġett għall-kundizzjonijiet stabbiliti fl-Anness ta’ dak ir-Regolament.

(2)

L-approvazzjoni tal-jodju polivinilpirrolidon għall-użu fil-prodotti bijoċidali tat-tipi ta’ prodott 1, 3, 4 u 22 (“l-approvazzjoni”) se tiskadi fil-31 ta’ Awwissu 2025. Fit-28 ta’ Frar 2024, ġew ippreżentati żewġ applikazzjonijiet f’konformità mal-Artikolu 13(1) tar-Regolament (UE) Nru 528/2012 għat-tiġdid tal-approvazzjoni tal-jodju polivinilpirrolidon għat-tipi ta’ prodott 1 u 3 (“l-applikazzjonijiet”), filwaqt li ma ġiet ippreżentata l-ebda applikazzjoni għat-tiġdid tal-approvazzjoni tal-jodju polivinilpirrolidon għat-tipi ta’ prodott 4 u 22.

(3)

Fid-19 ta’ April 2024, l-awtorità kompetenti li tevalwa tal-Iżvezja għarrfet lill-Kummissjoni li skont l-Artikolu 14(1) tar-Regolament (UE) Nru 528/2012, kienet iddeċidiet li kienet meħtieġa evalwazzjoni sħiħa tal-applikazzjonijiet. Skont l-Artikolu 8(1) ta’ dak ir-Regolament, l-awtorità kompetenti li tevalwa trid twettaq evalwazzjoni sħiħa tal-applikazzjoni fi żmien 365 jum mill-validazzjoni tagħha.

(4)

L-awtorità kompetenti li tevalwa tista’, skont il-każ, teżiġi li l-applikant jipprovdi biżżejjed data biex titwettaq l-evalwazzjoni, f’konformità mal-Artikolu 8(2) tar-Regolament (UE) Nru 528/2012. F’dak il-każ, il-perjodu ta’ 365 jum jiġi sospiż għal perjodu li ma jistax jaqbeż il-180 jum b’kollox, sakemm ma tkunx iġġustifikata sospensjoni itwal minħabba n-natura tad-data rikjesta jew minħabba ċirkostanzi eċċezzjonali.

(5)

Fi żmien 270 jum minn meta tirċievi rakkomandazzjoni mingħand l-awtorità kompetenti li tevalwa, l-Aġenzija Ewropea għas-Sustanzi Kimiċi trid tħejji u tippreżenta opinjoni lill-Kummissjoni dwar it-tiġdid tal-approvazzjoni tas-sustanza attiva f’konformità mal-Artikolu 14(3) tar-Regolament (UE) Nru 528/2012.

(6)

Għaldaqstant, għal raġunijiet lil hinn mill-kontroll tal-applikant, l-approvazzjoni aktarx tiskadi qabel ma tkun ittieħdet deċiżjoni dwar it-tiġdid tagħha. Għalhekk jixraq li tiġi posposta d-data tal-iskadenza tal-approvazzjoni għall-użu fil-prodotti bijoċidali tat-tipi ta’ prodott 1 u 3 għal perjodu ta’ żmien twil biżżejjed biex l-applikazzjoni tkun tista’ tiġi eżaminata. Filwaqt li jitqiesu l-limiti ta’ żmien għall-evalwazzjoni mill-awtorità kompetenti li tevalwa, u għat-tħejjija u għall-preżentazzjoni mill-Aġenzija Ewropea għas-Sustanzi Kimiċi tal-opinjonijiet tagħha u ż-żmien meħtieġ sabiex il-Kummissjoni tiddeċiedi jekk iġġeddidx l-approvazzjoni, id-data tal-iskadenza għall-użu fil-prodotti bijoċidali tat-tipi ta’ prodott 1 u 3 jenħtieġ li tiġi posposta għad-29 ta’ Frar 2028.

(7)

Wara li tiġi posposta d-data tal-iskadenza tal-approvazzjoni, il-jodju polivinilpirrolidon jibqa’ approvat għall-użu fil-prodotti bijoċidali tat-tipi ta’ prodott 1 u 3, soġġett għall-kundizzjonijiet stabbiliti fl-Anness tar-Regolament ta’ Implimentazzjoni (UE) Nru 94/2014,