(1)

Sabiex jinkisbu l-objettivi msemmija fl-Artikolu 174 tat-Trattat dwar il-Funzjonament tal-Unjoni Ewropea (TFUE), l-Artikolu 175, it-tielet paragrafu, TFUE jipprevedi l-possibbiltà li jiġu adottati azzjonijiet speċifiċi barra mill-Fondi msemmija fl-Artikolu 175, l-ewwel paragrafu, TFUE. Barra minn hekk, il-kooperazzjoni territorjali tikkontribwixxi għall-objettivi msemmija fl-Artikolu 174 TFUE. Għalhekk huwa xieraq li jiġu adottati l-miżuri li huma meħtieġa biex jittejbu l-kundizzjonijiet għall-implimentazzjoni tal-azzjonijiet ta’ kooperazzjoni territorjali.

(2)

L-Artikolu 174, it-tielet paragrafu, TFUE jirrikonoxxi li ir-reġjuni transfruntieri jiffaċċaw ċerti sfidi u jipprevedi li l-Unjoni għandha tagħti attenzjoni partikolari lil dawk ir-reġjuni meta tiżviluppa u twettaq azzjonijiet li jwasslu għat-tisħiħ tal-koeżjoni ekonomika, soċjali u territorjali tal-Unjoni.

(3)

Il-komunikazzjoni tal-Kummissjoni tal-20 ta’ Settembru 2017 bl-isem “Spinta lit-tkabbir u l-koeżjoni fir-reġjuni tal-fruntieri tal-UE” rrikonoxxiet il-progress li sar sa issa fit-trasformazzjoni ta’ tali reġjuni minn żoni prinċipalment periferali f’oqsma ta’ tkabbir u opportunitajiet, iżda enfasizzat ukoll l-ostakli legali u oħrajn li jippersistu f’dawk ir-reġjuni, b’mod partikolari l-ostakli relatati mas-servizzi tas-saħħa, ir-regolamentazzjoni tax-xogħol, it-taxxi u l-iżvilupp tan-negozju u l-ostakli marbuta mad-differenzi fl-oqfsa legali u fil-kulturi amministrattivi nazzjonali. La l-finanzjament tal-kooperazzjoni territorjali Ewropea, ipprovdut b’mod partikolari fil-kuntest tal-programmi “Interreg” stabbiliti skont ir-Regolament (UE) 2021/1059 tal-Parlament Ewropew u tal-Kunsill (4), u lanqas l-appoġġ istituzzjonali għall-kooperazzjoni mir-raggruppamenti Ewropej ta’ kooperazzjoni territorjali (“REKT”) stabbiliti bir-Regolament (KE) Nru 1082/2006 tal-Parlament Ewropew u tal-Kunsill (5) jew mill-inizjattiva b-solutions imnedija fl-2018 mill-Kummissjoni ma huma biżżejjed biex jindirizzaw is-soluzzjoni ta’ wħud mill-ostakli amministrattivi u legali li jxekklu l-kooperazzjoni effettiva.

(4)

Ir-reġjuni transfruntieri huma fir-riskju li jiġu affettwati b’mod sproporzjonat fi żminijiet ta’ kriżi. Matul il-pandemija tal-COVID-19, l-impatt ekonomiku negattiv fuq ir-reġjuni transfruntieri minħabba miżuri relatati mal-fruntieri meħuda mill-Istati Membri kien aktar mid-doppju tal-impatt medju fuq ir-reġjuni kollha tal-Unjoni mil-lat ta’ telf ta’ PDG. Dik l-esperjenza ssaħħaħ il-ħtieġa li jiġi previst mezz biex jiġu indirizzati l-ostakli transfruntieri.

(5)

L-ostakli u d-diskrepanzi ta’ natura legali jew amministrattiva li jinħolqu fil-fruntieri interni tal-Unjoni u potenzjalment idgħajfu l-interazzjoni transfruntiera u l-iżvilupp ta’ reġjuni transfruntieri huma diffiċli biex jiġu indirizzati mill-Istati Membri waħedhom. Konsegwentement, jenħtieġ li s-sejbien ta’ mod kif jissolvew dawk l-ostakli jiġi ffaċilitat billi jiġi ppilotat qafas ċar u komprensiv fil-livell tal-Unjoni li jippermetti lill-Istati Membri jikkooperaw u jikkoordinaw l-isforzi tagħhom. Jenħtieġ li r-rikors għall-qafas stabbilit skont dan ir-Regolament ikun fakultattiv għall-Istati Membri.

(6)

Meta l-Istati Membri jiddeċiedu li jirrikorru għal dak il-qafas, jenħtieġ li jkunu marbuta bi standards komuni.

(7)

Fil-valutazzjoni tagħha tad-data mill-perjodu 2014-2019, l-istudju dwar il-Valutazzjoni tal-Valur Miżjud Ewropew rilevanti mwettaq mis-Servizz ta’ Riċerka tal-Parlament Ewropew sab li s-soluzzjoni tal-ostakli transfruntieri ġġib benefiċċji sinifikanti għar-reġjuni tal-fruntiera NUTS 3 u għall-ekonomija tal-Unjoni kollha kemm hi. B’mod aktar preċiż, il-benefiċċju tal-valur miżjud gross (GVA) totali tas-soluzzjoni tal-ostakli legali u amministrattivi kollha jrendi madwar EUR 457 biljun fis-sena, li jirrappreżenta 3,8 % tal-GVA totali tal-UE għall-2019. Is-soluzzjoni ta’ 20 % tal-ostakli transfruntieri għar-reġjuni tal-fruntiera kollha tirriżulta f’benefiċċju totali tal-GVA ta’ EUR 123 biljun fis-sena, li jirrappreżenta madwar 1 % tal-GVA totali tal-UE għall-2019, kif ukoll benefiċċju ta’ miljun impjieg li jirrappreżentaw madwar 0,5 % tal-impjiegi totali fil-livell tal-Unjoni.

(8)

Minkejja li diġà jeżistu diversi għodod legali biex jissolvew l-ostakli transfruntieri fil-livell intergovernattiv, nazzjonali, reġjonali u lokali f’ċerti reġjuni tal-Unjoni, dawn ma jkoprux ir-reġjuni kollha tal-fruntieri fl-Unjoni u lanqas ma jindirizzaw neċessarjament kwistjonijiet relatati mal-iżvilupp u t-tisħiħ tal-koeżjoni territorjali b’mod konsistenti. Dan ir-Regolament jikkomplementa l-għodod eżistenti permezz ta’ qafas addizzjonali stabbilit mil-liġi tal-Unjoni li jinkludi l-Għodda ta’ Faċilitazzjoni Transfruntiera.

(9)

Sabiex ikun aktar faċli li jiġu ttrattati fajls li jikkonċernaw ostakli transfruntieri, jenħtieġ li l-Istati Membri li ddeċidew japplikaw il-qafas jistabbilixxu punt ta’ koordinazzjoni transfruntier wieħed jew aktar, li jkopru reġjun tal-fruntiera wieħed jew aktar ta’ dawk l-Istati Membri. Jenħtieġ li tali punti ta’ koordinazzjoni transfruntieri jkunu responsabbli biex jirċievu fajls transfruntieri u jinfurmaw lill-inizjaturi. Jenħtieġ li l-punti ta’ koordinazzjoni transfruntieri jikkollaboraw mal-Kummissjoni u jappoġġaw ir-rwol ta’ koordinazzjoni tagħha. Jenħtieġ li l-Istati Membri jiddeċiedu f’konformità mal-qafas legali, amministrattiv u istituzzjonali tagħhom stess jekk il-punt ta’ koordinazzjoni transfruntier għandux jiġi fdat b’kompiti addizzjonali, bħall-valutazzjoni ta’ fajls transfruntieri, jew jekk dawk il-kompiti għandhomx jiġu ttrattati minn awtorità kompetenti.

(10)

Jenħtieġ li meta Stat Membru ma jistabbilixxix punt ta’ koordinazzjoni transfruntier, jippreżenta informazzjoni dwar l-awtorità rilevanti lill-Kummissjoni. Jenħtieġ li jkun possibbli li dik l-awtorità rilevanti tiġi kkuntattjata u li tirċievi informazzjoni minn punt ta’ koordinazzjoni transfruntier ta’ Stat Membru ġar li jittratta fajl transfruntier. Meta awtorità rilevanti tiġi kkuntattjata minn punt ta’ koordinazzjoni transfruntier ta’ Stat Membru ġar li jittratta fajl transfruntier jew tirċievi informazzjoni minn tali punt ta’ koordinazzjoni transfruntier, jenħtieġ li din ma twassalx għal obbligu skont dan ir-Regolament għall-awtorità rilevanti biex issolvi ostaklu transfruntier. B’mod partikolari, jenħtieġ li dik l-awtorità ma tkunx meħtieġa teżamina l-fajl jew twieġeb lill-inizjatur.

(11)

Sabiex jiġi appoġġat l-istabbiliment ta’ punti ta’ koordinazzjoni transfruntieri, jenħtieġ li l-Istati Membri jistgħu jiddeċiedu li jallokaw riżorsi tal-Fond Ewropew għall-Iżvilupp Reġjonali taħt il-programmi Interreg skont l-Artikolu 14, il-paragrafu 4, il-punt (b), tar-Regolament (UE) 2021/1059 u r-riżorsi tal-Fond Ewropew għall-Iżvilupp Reġjonali jew tal-Fond ta’ Koeżjoni, kif xieraq, taħt l-għan tal-Investiment għall-impjiegi u t-tkabbir skont l-Artikolu 3, il-paragrafu 4, il-punt (c), tar-Regolament (UE) 2021/1058 tal-Parlament Ewropew u tal-Kunsill (6).

(12)

Jenħtieġ li l-applikazzjoni ta’ dan ir-Regolament tkun mingħajr preġudizzju għall-applikazzjoni tal-liġi nazzjonali jew ftehimiet internazzjonali bejn l-Istati Membri li jipprevedu proċeduri ekwivalenti.

(13)

Minkejja l-fatt li r-reġjuni tal-fruntieri marittimi huma differenti fin-natura tagħhom mir-reġjuni tal-fruntieri tal-art, minħabba possibbiltajiet aktar limitati għal interazzjonijiet transfruntieri, jenħtieġ li dan ir-Regolament japplika wkoll għar-reġjuni tal-fruntieri marittimi. Meta Stat Membru jkollu fruntieri kemm tal-art kif ukoll marittimi ma’ Stati Membri oħra u jiddeċiedi li jistabbilixxi punt ta’ koordinazzjoni transfruntier wieħed jew aktar, jenħtieġ li dak l-Istat Membru ma jkunx meħtieġ jistabbilixxi punt ta’ koordinazzjoni transfruntier għal fruntiera marittima kondiviża ma’ Stat Membru ieħor. Jenħtieġ li l-Istati Membri li jkollhom biss fruntieri marittimi ma’ Stati Membri oħra la jkunu meħtieġa jistabbilixxu punt ta’ koordinazzjoni transfruntier u lanqas jippreżentaw informazzjoni lill-Kummissjoni dwar l-awtorità rilevanti jew kwalunkwe informazzjoni meħtieġa mill-Anness.

(14)

Filwaqt li dan ir-Regolament ma japplikax għal ostakli transfruntieri fir-reġjuni tal-fruntiera bejn l-Istati Membri u pajjiżi terzi, jenħtieġ li jkun possibbli għall-Istati Membri li jistabbilixxu oqfsa proċedurali ekwivalenti skont il-liġi nazzjonali biex jidentifikaw u jsolvu ostakli transfruntieri legali u amministrattivi fil-kooperazzjoni tagħhom ma’ pajjiżi terzi.

(15)

Jeżistu diversi għodod mhux ġudizzjarji fil-livell tal-Unjoni għall-monitoraġġ u l-infurzar tal-liġi tal-Unjoni, inkluż b’mod partikolari dawk marbuta mas-suq uniku, bħal SOLVIT (7). Jenħtieġ li dan ir-Regolament ikun mingħajr preġudizzju għal tali għodod. Jenħtieġ li l-qafas previst minn dan ir-Regolament japplika biss għall-ostakli transfruntieri li jirriżultaw minn dispożizzjonijiet jew prattiki leġiżlattivi jew amministrattivi, inkluż dawk id-dispożizzjonijiet jew prattiki li japplikaw il-liġi tal-Unjoni b’mod korrett iżda b’mod diverġenti, li għandhom il-potenzjal li jfixklu b’mod mhux intenzjonat l-ippjanar jew l-implimentazzjoni ta’ servizzi pubbliċi jew infrastruttura transfruntieri. Jenħtieġ li każijiet li jinvolvu ksur potenzjali tal-liġi tal-Unjoni minn awtorità pubblika fi Stat Membru ma jiġux ittrattati fil-qafas previst minn dan ir-Regolament. Dan ir-Regolament huwa wkoll mingħajr preġudizzju għall-mekkaniżmi ta’ koordinazzjoni stabbiliti għas-sigurtà soċjali jew it-tassazzjoni.

(16)

Sabiex jiġu identifikati l-ostakli transfruntieri possibbli li jaqgħu fil-kamp ta’ applikazzjoni ta’ dan ir-Regolament, huwa meħtieġ li jiġu ddefiniti s-sitwazzjonijiet li jikkwalifikaw bħala interazzjonijiet transfruntieri. Għalhekk, jenħtieġ li dan ir-Regolament japplika għal kwalunkwe infrastruttura għal attivitajiet transfruntieri jew għal servizzi pubbliċi transfruntieri. L-infrastruttura meħtieġa għal attivitajiet transfruntieri jistgħu jiġu affettwati minn ostakli transfruntieri, pereżempju meta jkun hemm standards tekniċi differenti għall-bini jew għall-vetturi, inkluż għal tagħmir relatat. Is-servizzi pubbliċi transfruntieri jiġu pprovduti fuq bażi fit-tul u għandhom l-għan li jiġġeneraw benefiċċji għall-pubbliku ġenerali jew għal grupp fil-mira speċifiku fir-reġjun tal-fruntiera li fih jiġi pprovdut is-servizz, u b’hekk itejbu l-kundizzjonijiet tal-għajxien u l-koeżjoni territorjali f’dawk ir-reġjuni.

(17)

Jenħtieġ li fajl transfruntier jiġi ppreżentat minn inizjatur, entità li tistà tkun privata jew pubblika. Sabiex jiġi ffaċilitat it-trattament ta’ fajls transfruntieri u jiġi stabbilit network ta’ korpi nazzjonali li jkunu jistgħu jikkollaboraw ma’ xulxin dwar l-implimentazzjoni ta’ dan ir-Regolament, jenħtieġ li l-Istati Membri jistabbilixxu punt ta’ koordinazzjoni transfruntier wieħed jew aktar fil-livell nazzjonali jew reġjonali. Jenħtieġ li żewġ Stati Membri ġirien jew aktar ikunu jistgħu jiddeċiedu li jistabbilixxu punt ta’ koordinazzjoni transfruntier konġunt kompetenti għal wieħed jew aktar mir-reġjuni transfruntieri tagħhom.

(18)

Jenħtieġ li Stat Membru jkollu l-possibbiltà li jistabbilixxi punt ta’ koordinazzjoni transfruntier bħala parti minn awtorità, korp irregolat bil-liġi pubblika jew entità permanenti eżistenti, irrispettivament minn jekk dik l-awtorità, korp jew entità għandhiex personalità ġuridika, b’mod partikolari billi jafdaha bil-kompiti ta’ punt ta’ koordinazzjoni transfruntier jew bħala awtorità, korp irregolat bil-liġi pubblika jew entità permanenti separati,. Tali awtoritajiet, korpi u entitajiet jistgħu, pereżempju, ikunu kumitati jew kummissjonijiet ta’ kooperazzjoni transfruntiera, stabbiliti fil-qafas ta’ kooperazzjoni bilaterali jew trattati ta’ ħbiberija; kummissjonijiet intergovernattivi għall-kooperazzjoni transfruntiera jew is-segretarjati tagħhom; kunsilli, segretarjati jew segretarjati ġenerali, stabbiliti fil-qafas tal-ftehimiet multinazzjonali għall-kooperazzjoni; uffiċċji nazzjonali ta’ koordinazzjoni, ċentri jew punti ta’ kuntatt nazzjonali, jew strutturi simili stabbiliti fil-qafas ta’ politiki settorjali Ewropej oħra; u l-awtoritajiet tal-programm Interreg u r-REKT.

(19)

Sabiex jiġi stabbilit qafas għat-trattament ta’ fajls transfruntieri li jkun komuni għall-punti ta’ koordinazzjoni transfruntieri kollha, huwa meħtieġ li jiġu ddefiniti l-kompiti li għandu jwettaq kull punt ta’ koordinazzjoni transfruntier. Jenħtieġ li l-punt ta’ koordinazzjoni transfruntieri jaġixxi bħala “punt uniku ta’ servizz” għall-inizjaturi u jenħtieġ li jkun il-punt ta’ kuntatt uniku għall-inizjatur. Jenħtieġ li l-Istati Membri jiżguraw li d-dettalji ta’ kuntatt għall-punti ta’ koordinazzjoni transfruntieri jkunu disponibbli, viżibbli u aċċessibbli pubblikament. Sabiex ikun jista’ jsir segwitu għall-eżitu tal-fajls transfruntieri u biex tiżdied it-trasparenza dwar is-soluzzjoni tal-ostakli transfruntieri, jenħtieġ li l-punti ta’ koordinazzjoni transfruntieri jkunu responsabbli wkoll għall-preżentazzjoni tal-informazzjoni lill-Kummissjoni. Barra minn hekk, jenħtieġ li dan ir-Regolament jistipula obbligi fir-rigward tal-koordinazzjoni, il-kooperazzjoni u l-iskambju ta’ informazzjoni bejn il-punti ta’ koordinazzjoni transfruntieri differenti fi Stat Membru wieħed u bejn il-punti ta’ koordinazzjoni transfruntieri ta’ Stati Membri ġirien.

(20)

Jenħtieġ li jkun possibbli biss li inizjatur jippreżenta fajl transfruntier jekk l-ostaklu jkun jappartjeni għal fruntiera li għaliha jkun ġie stabbilit mill-inqas punt ta’ koordinazzjoni transfruntier wieħed. Jenħtieġ li fajl transfruntier jiġi ppreżentat mill-inizjatur darba biss. Meta inizjatur ieħor fi Stat Membru ieħor jippreżenta wkoll fajl transfruntier relatat mal-istess ostaklu transfruntier, jenħtieġ li l-punti ta’ koordinazzjoni transfruntieri ta’ dawk l-Istati Membri jikkollaboraw ma’ xulxin biex jiġu evitati proċeduri paralleli li jikkonċernaw l-istess ostaklu transfruntier.

(21)

Il-kumplessità tal-liġi nazzjonali applikabbli tista’ tagħmilha diffiċli li tiġi identifikata d-dispożizzjoni speċifika li tikkostitwixxi ostaklu transfruntier. Jenħtieġ għalhekk li, abbażi tal-esperjenza bil-b-solutions, l-inizjatur jiddeskrivi biss is-sitwazzjoni u l-problema li għandha tissolva.

(22)

Sabiex jiġi stabbilit qafas proċedurali li jiżgura ċ-ċertezza legali għall-inizjatur ta’ fajl transfruntier, jenħtieġ li l-punt ta’ koordinazzjoni transfruntier jivvaluta l-fajl transfruntier u jwieġeb lill-inizjatur f’limitu ta’ żmien raġonevoli, li, bħala regola, jenħtieġ li jkun dak stabbilit skont il-liġi nazzjonali. Meta l-liġi nazzjonali ma tipprevedix limitu ta’ żmien standard għal tweġiba għal talba ekwivalenti, jenħtieġ li dan ir-Regolament jipprevedi limiti ta’ żmien xierqa. Jenħtieġ li dawk il-limiti ta’ żmien jibdew mid-data tal-wasla ta’ fajl transfruntier jew fajl transfruntier rivedut, inkluż f’każijiet fejn ikun wasal fajl wara trasferiment minn punt ta’ koordinazzjoni transfruntier ieħor jew awtorità kompetenti oħra.

(23)

L-analiżi ta’ fajl transfruntier tista’ tikkonkludi li ma hemm l-ebda ostaklu transfruntier. F’każ bħal dan, jenħtieġ li l-fajl transfruntier jingħalaq.

(24)

Ladarba l-eżistenza ta’ ostaklu transfruntier tkun ġiet ikkonfermata, jenħtieġ li l-Istati Membri jkollhom id-diskrezzjoni li jagħżlu l-għodda xierqa biex isolvu l-ostaklu transfruntier fir-reġjun transfruntier ikkonċernat. Għal dak l-għan, jenħtieġ li l-Istati Membri jkunu jistgħu jiddependu fuq kwalunkwe ftehim internazzjonali fis-seħħ jew proċedura oħra eżistenti skont il-liġi tal-Istat Membru kkonċernat. Meta dak l-Istat Membru jqis li l-istrumenti disponibbli ma jippermettulux isolvi l-ostaklu transfruntier, jenħtieġ li jitħalla joħloq mekkaniżmi ad hoc għal dak l-għan. Jenħtieġ li jkun possibbli li dan isir jew individwalment jew, jekk ikun meħtieġ u miftiehem, b’mod konġunt mal-Istat Membru ġar. Jenħtieġ li l-Istati Membri jipprovdu r-raġunijiet għall-passi ta’ valutazzjoni meħuda u jindikaw opzjonijiet possibbli ta’ rimedju legali, inkluż f’każijiet fejn jikkonkludu li l-allegat ostaklu identifikat fil-fajl transfruntier ma jaqax fil-kamp ta’ applikazzjoni ta’ dan ir-Regolament.

(25)

Barra minn hekk, jenħtieġ li jkun possibbli li l-punt ta’ koordinazzjoni transfruntier jew l-awtorità kompetenti jużaw l-Għodda ta’ Faċilitazzjoni Transfruntiera. Billi l-eżitu tal-proċedura jista’ jvarja xi ftit, skont jekk in-natura tal-ostaklu transfruntier possibbli tkunx amministrattiva jew leġiżlattiva, dan jenħtieġ li jitqies mill-Għodda ta’ Faċilitazzjoni Transfruntiera. Meta l-punt ta’ koordinazzjoni transfruntier jew l-awtorità kompetenti jiddeċiedu li jsolvu l-ostaklu transfruntier identifikat billi japplikaw l-Għodda ta’ Faċilitazzjoni Transfruntiera, jista’ jkun meħtieġ li ssir koordinazzjoni mal-Istat Membru ġar. Meta l-Istat Membru kkonċernat u l-Istat Membru ġar ikunu t-tnejn lesti li jniedu l-proċedura leġiżlattiva meħtieġa jew li jibdlu d-dispożizzjonijiet jew il-prattiki amministrattivi tagħhom, tali koordinazzjoni tista’ tieħu l-forma ta’ kumitat konġunt magħmul minn rappreżentanti tal-awtoritajiet kompetenti u l-punti ta’ koordinazzjoni transfruntieri tal-Istati Membri kkonċernati.

(26)

Sabiex jiġi pprovdut qafas proċedurali effettiv biex jiġu ttrattati l-fajls transfruntieri, jenħtieġ li dan ir-Regolament jistipula l-passi proċedurali essenzjali, irrispettivament minn jekk l-ostaklu jkunx ta’ natura amministrattiva jew ta’ natura leġiżlattiva. L-eżistenza ta’ sistemi legali differenti fl-Istati Membri ġirien tista’ twassal biex ostaklu transfruntier jikkwalifika bħala dispożizzjoni jew prattika amministrattiva fi Stat Membru wieħed iżda bħala dispożizzjoni leġiżlattiva fl-ieħor. Għalhekk jenħtieġ li kull Stat Membru jagħżel li japplika l-proċedura xierqa skont is-sistema legali tiegħu stess. Jenħtieġ li l-Istati Membri ġirien jikkoordinaw il-proċeduri rispettivi tagħhom kemm jista’ jkun. Meta tittieħed pożizzjoni finali fuq fajl, jenħtieġ li dik il-pożizzjoni tiġi kkomunikata lill-inizjatur, flimkien mar-raġunijiet għaliha.

(27)

Dan ir-Regolament ma jimplika l-ebda obbligu fuq l-Istati Membri biex isolvu ostaklu transfruntier.

(28)

Jenħtieġ li l-Kummissjoni tiġi fdata b’kompiti rilevanti għall-monitoraġġ tal-applikazzjoni ta’ dan ir-Regolament fil-livell tal-Unjoni u biex tipprovdi appoġġ lill-Istati Membri, inkluż it-tisħiħ tal-kapaċitajiet. Jenħtieġ li l-Kummissjoni, b’mod partikolari, tappoġġa l-punti ta’ koordinazzjoni transfruntieri billi tippromwovi l-iskambju ta’ esperjenzi bejn dawk il-punti ta’ koordinazzjoni. Jenħtieġ li jkun possibbli li dak l-appoġġ ukoll jikkonsisti f’għodod ibbażati fuq l-assistenza teknika bħall-b-solutions.

(29)

Sabiex ikun jista’ jsir tfassil ta’ politika bbażat fuq l-evidenza, jenħtieġ li l-Kummissjoni tirrieżamina l-implimentazzjoni ta’ dan ir-Regolament u tippreżenta rapport lill-Parlament Ewropew, lill-Kunsill, lill-Kumitat tar-Reġjuni u lill-Kumitat Ekonomiku u Soċjali Ewropew. Sabiex jiġi żgurat li tinġabar biżżejjed evidenza dwar l-applikazzjoni ta’ dan ir-Regolament u tal-Għodda ta’ Faċilitazzjoni Transfruntiera, jenħtieġ li dak ir-rapport jiġi ppreżentant ħames snin wara d-dħul fis-seħħ ta’ dan ir-Regolament.

(30)

Dan ir-Regolament jirrispetta d-drittijiet fundamentali, josserva l-prinċipji rikonoxxuti mill-Karta tad-Drittijiet Fundamentali tal-Unjoni Ewropea (il-“Karta”) u ma għandu impatt negattiv fuq ebda wieħed minn dawk id-drittijiet fundamentali. Peress li r-Regolament għandu l-għan li jsolvi l-ostakli transfruntieri, jista’ jrawwem id-dritt ta’ aċċess għal servizzi ta’ interess ekonomiku ġenerali, kif stabbilit fl-Artikolu 36 tal-Karta, u l-libertà ta’ intrapriża, kif stabbilit fl-Artikolu 16 tal-Karta. Il-firxa wiesgħa ta’ servizzi bħal dawn tista’ trawwem ukoll l-aċċess għall-kura tas-saħħa, kif stabbilit fl-Artikolu 35 tal-Karta. B’mod aktar ġenerali, peress li s-servizzi tat-trasport pubbliku transfruntier x’aktarx li jibbenefikaw mill-Għodda ta’ Faċilitazzjoni Transfruntiera, dan ir-Regolament jista’ jkollu impatt pożittiv fuq il-libertà tal-moviment u tar-residenza, kif stabbilit fl-Artikolu 45 tal-Karta.

(31)

L-esperjenza turi li l-Istati Membri wettqu inizjattivi individwali, bilaterali jew saħansitra multilaterali sabiex isolvu ostakli transfruntieri legali. Madankollu, dawk l-għodod ma jeżistux fl-Istati Membri kollha jew għall-fruntieri kollha ta’ Stat Membru partikolari. Barra minn hekk, minħabba li l-objettivi ta’ dan ir-Regolament ma jistgħux jinkisbu b’mod suffiċjenti mill-Istati Membri iżda jistgħu pjuttost, minħabba n-natura transfruntiera tal-ostakli, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stipulat fl-Artikolu 5 tat-Trattat dwar l-Unjoni Ewropea.

(32)

F’konformità mal-prinċipju ta’ proporzjonalità kif stipulat fl-Artikolu 5 tat-Trattat dwar l-Unjoni Ewropea, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi. L-użu tal-Għodda ta’ Faċilitazzjoni Transfruntiera skont dan ir-Regolament huwa fakultattiv għal kull Stat Membru. Jenħtieġ li Stat Membru jiddeċiedi, fir-rigward ta’ fruntiera speċifika ma’ Stat Membru ġar wieħed jew aktar, li jsolvi l-ostakli transfruntieri permezz tal-għodod eżistenti li jkun stabbilixxa fil-livell nazzjonali jew ma’ Stat Membru ġar wieħed jew aktar. Għalhekk, dan ir-Regolament ma jmurx lil hinn minn dak li huwa meħtieġ sabiex tiġi ffaċilitata l-kooperazzjoni fir-reġjuni transfruntieri,