(1)

Skont ir-Regolament (UE) 2020/1783, il-komunikazzjonijiet u l-iskambji kollha ta’ dokumenti bejn il-qrati u l-awtoritajiet l-oħra maħtura mill-Istati Membri skont dan ir-Regolament għandhom, bħala regola, jitwettqu permezz ta’ sistema tal-IT deċentralizzata sigura u affidabbli li tinkludi sistemi tal-IT nazzjonali li huma interkonnessi u teknikament interoperabbli, pereżempju, u mingħajr preġudizzju għal aktar progress teknoloġiku, abbażi ta’ e-CODEX. Dik is-sistema tal-IT deċentralizzata tiġi implimentata fi ħdan sistema tal-IT deċentralizzata akbar ibbażata fuq l-e-CODEX imsejħa s-sistema tal-Iskambju dwar il-Ġustizzja Elettronika (JUstice Digital EXchange system, JUDEX), li tirrikjedi skambju effettiv ta’ informazzjoni dwar l-iżviluppi orizzontali.

(2)

L-ispeċifikazzjonijiet tekniċi, il-miżuri u rekwiżiti oħra għall-implimentazzjoni ta’ dik is-sistema tal-IT deċentralizzata ġew stabbiliti fir-Regolament ta’ Implimentazzjoni tal-Kummissjoni (UE) 2022/422 (2).

(3)

Is-sistema tal-IT deċentralizzata se ssir operazzjonali fl-1 ta’ Mejju 2025.

(4)

Ir-Regolament (UE) 2020/1783 jipprevedi li l-Kummissjoni għandha tistabbilixxi kumitat ta’ tmexxija li jinkludi rappreżentanti tal-Istati Membri biex jiżgura t-tħaddim u l-manutenzjoni tas-sistema tal-IT deċentralizzata sabiex jintlaħqu l-objettivi tar-Regolament.

(5)

Ir-rwoli u l-kompiti tal-kumitati ta’ tmexxija skont ir-Regolament (UE) 2020/1783 u r-Regolament (UE) 2020/1784 tal-Parlament Ewropew u tal-Kunsill (3) huma simili, u dan jagħmilha espedjenti u kosteffettiv li jsiru laqgħat konġunti tal-kumitati ta’ tmexxija skont iż-żewġ Regolamenti.

(6)

Jenħtieġ li jiġu stabbiliti regoli dwar divulgazzjoni ta’ informazzjoni minn membri tal-kumitat ta’ tmexxija u l-osservaturi.

(7)

Id-data personali jenħtieġ li tiġi pproċessata f’konformità mar-Regolament (UE) 2018/1725 tal-Parlament Ewropew u tal-Kunsill (4).

(8)

Il-miżuri previsti f’din id-Deċiżjoni huma f’konformità mal-opinjoni tal-Kumitat dwar kooperazzjoni bejn il-qrati tal-Istati Membri fil-kumpilazzjoni tax-xhieda f’materji ċivili jew kummerċjali,

(a)

jikkollabora mal-Kummissjoni / jagħti pariri lill-Kummissjoni fir-rigward tal-operat u l-manutenzjoni tal-kumpilazzjoni ta’ xhieda tas-sistema tal-IT deċentralizzata skont ir-Regolament (UE) 2020/1783.

(b)

iwettaq skambju ta’ esperjenza u prattika tajba bejn l-awtoritajiet tal-Istati Membri fil-qasam tal-kumpilazzjoni ta’ xhieda f’materji ċivili u kummerċjali fir-rigward tal-operat u l-manutenzjoni tas-sistema tal-IT deċentralizzata tal-kumpilazzjoni ta’ xhieda.

(c)

jiddiskuti kwistjonijiet tekniċi, riskji u sfidi, inkluż il-prijoritajiet ta’ implimentazzjoni, fid-dawl tal-iżvilupp kontinwu u l-manutenzjoni tal-kumpilazzjoni ta’ xhieda tas-sistema tal-IT deċentralizzata u l-komponenti tagħha.