(1)

Ir-Regolament (UE) 2017/625 jistabbilixxi, fost l-oħrajn, il-qafas għat-twettiq tal-kontrolli uffiċjali u ta’ attivitajiet uffiċjali oħra fuq il-kunsinni ta’ annimali u ta’ oġġetti li jidħlu fl-Unjoni minn pajjiżi terzi sabiex tiġi vverifikata l-konformità mar-regoli tal-Unjoni dwar il-katina agroalimentari. Ir-Regolament ta’ Implimentazzjoni tal-Kummissjoni (UE) 2019/1014 (2) ġie adottat fil-qafas tar-Regolament (UE) 2017/625, u jistabbilixxi, fost l-oħrajn, rekwiżiti minimi komuni u speċifiċi għall-postijiet ta’ kontroll fuq il-fruntiera għal ċerti kunsinni ta’ annimali u ta’ oġġetti li jidħlu fl-Unjoni.

(2)

B’mod aktar speċifiku, l-Artikolu 3(2) u (3) tar-Regolament ta’ Implimentazzjoni (UE) 2019/1014 jipprevedi li l-kmamar u ż-żoni tal-postijiet ta’ kontroll fuq il-fruntiera jrid ikollhom sistema ta’ drenaġġ adegwata. Peress li hemm xi inċertezza dwar ir-rwol tas-sistema ta’ drenaġġ, jeħtieġ li jiġi ċċarat l-iskop tagħha. Barra minn hekk, peress li l-kategoriji ta’ annimali u ta’ oġġetti ttrattati jinvolvu riskji differenti u jeħtieġu operazzjonijiet differenti ta’ tindif u ta’ diżinfezzjoni, hemm bżonn jiġi ċċarat li s-sistema ta’ drenaġġ jenħtieġ li tiġi adattata għal dawn l-operazzjonijiet.

(3)

L-Artikolu 3(4) tar-Regolament ta’ Implimentazzjoni (UE) 2019/1014 jippermetti li l-kunsinni mhux ippakkjati ġol-kontejners ta’ prodotti tas-sajd għall-konsum mill-bniedem għandhom jinħattu f’żoni mingħajr soqfa. Il-prodotti tas-sajd mhux maħsuba għall-konsum mill-bniedem u l-annimali akkwatiċi għall-użi kollha jistgħu jaslu wkoll fil-postijiet ta’ kontroll fuq il-fruntiera f’kunsinni mhux ippakkjati ġol-kontejners. Peress li l-ħatt ta’ kunsinni bħal dawn f’żoni mingħajr soqfa ma joħloq l-ebda riskju għas-saħħa tal-bniedem jew tal-annimali, jenħtieġ li jkun permess ukoll li jinħattu prodotti tas-sajd mhux maħsuba għall-konsum mill-bniedem u annimali akkwatiċi għall-użi kollha f’żoni mingħajr soqfa.

(4)

Il-ħatt ta’ makkinarju agrikolu u forestali użat soġġett għal spezzjoni fitosanitarja f’post ta’ kontroll fuq il-fruntiera huwa kumpless minħabba d-dimensjonijiet kbar tiegħu. Peress li l-ħatt f’żoni mingħajr soqfa ma joħloq l-ebda riskju għas-saħħa tal-pjanti fil-każ ta’ makkinarju agrikolu u forestali użat, jixraq li jkun permess il-ħatt ta’ tali makkinarju f’żoni mingħajr soqfa.

(5)

L-Artikolu 3(5) tar-Regolament ta’ Implimentazzjoni (UE) 2019/1014 jipprevedi li, għat-twettiq tal-kontrolli uffiċjali fuq il-likwidi bl-ingrossa ta’ oriġini mill-annimali u ta’ oriġini mhux mill-annimali, il-postijiet ta’ kontroll fuq il-fruntiera mhumiex meħtieġa jkollhom żoni jew kmamar għall-ħatt u kmamar ta’ spezzjoni jew żoni ta’ spezzjoni, peress li dawn l-oġġetti jinħattu direttament mill-mezzi tat-trasport f’tankijiet permezz ta’ pajpijiet speċjali. Tali żoni jew kmamar lanqas ma huma meħtieġa għal oġġetti bl-ingrossa ta’ volum għoli ta’ oriġini mhux mill-annimali, peress li jistgħu jinħattu direttament mill-mezzi tat-trasport għal sajlos jew għal imħażen permezz ta’ tagħmir speċjali, bħal trasportaturi. Għalhekk, iż-żoni jew il-kmamar għall-ħatt ta’ oġġetti u l-kmamar ta’ spezzjoni jew iż-żoni ta’ spezzjoni msemmija fl-Artikolu 3(1), il-punti (a) u (b), tar-Regolament ta’ Implimentazzjoni (UE) 2019/1014, jenħtieġ li ma jkunux meħtieġa għal oġġetti bl-ingrossa ta’ volum għoli ta’ oriġini mhux mill-annimali li jinħattu direttament f’sajlos jew fi mħażen permezz ta’ tagħmir speċjali. Għalhekk, jenħtieġ li l-Artikolu 3(5) tar-Regolament ta’ Implimentazzjoni (UE) 2019/1014 jiġi emendat kif xieraq.

(6)

L-Artikolu 3(6) tar-Regolament ta’ Implimentazzjoni (UE) 2019/1014 jipprevedi l-eżenzjoni tal-postijiet ta’ kontroll fuq il-fruntiera li jintgħażlu għall-pjanti, għall-prodotti tal-pjanti u għal oġġetti oħra msemmija fl-Artikolu 47(1), il-punt (c), tar-Regolament (UE) 2017/625 mir-rekwiżiti li jkollhom provvista ta’ ilma ġieri sħun u kiesaħ, faċilitajiet fejn wieħed jaħsel u jnixxef idejh, u kmamar b’soqfa faċli biex jiġu diżinfettati. Il-postijiet ta’ kontroll fuq il-fruntiera magħżula għall-pjanti, għall-prodotti tal-pjanti u għal oġġetti oħra li huma koperti mill-miżuri u mill-kundizzjonijiet imsemmija fl-Artikolu 47(1), il-punti (d) sa (f), tar-Regolament (UE) 2017/625, jenħtieġ li jiġu eżentati wkoll minn dawk ir-rekwiżiti, peress li tali eżenzjoni ma toħloq l-ebda riskju għas-saħħa tal-pjanti. Għalhekk, jenħtieġ li l-Artikolu 3(6) tar-Regolament ta’ Implimentazzjoni (UE) 2019/1014 jiġi emendat kif xieraq.

(7)

L-Artikolu 3(11) tar-Regolament ta’ Implimentazzjoni (UE) 2019/1014 jipprevedi li l-faċilitajiet ta’ ħżin kummerċjali jistgħu jintużaw għat-twettiq tal-kontrolli tal-identità u tal-kontrolli fiżiċi fuq il-prodotti ta’ oriġini mhux mill-annimali jekk dawn il-faċilitajiet jikkonformaw mar-rekwiżiti minimi stabbiliti f’dak ir-Regolament ta’ Implimentazzjoni, ikunu fil-viċinanza immedjata tal-post ta’ kontroll fuq il-fruntiera u jkunu taħt il-kompetenza tal-istess awtorità doganali bħall-post ta’ kontroll fuq il-fruntiera. Jenħtieġ li l-awtoritajiet kompetenti jitħallew iwettqu l-kontrolli tal-identità u l-kontrolli fiżiċi fuq il-pjanti, il-prodotti tal-pjanti u oġġetti oħra f’faċilitajiet ta’ ħżin kummerċjali, taħt l-istess kundizzjonijiet peress li t-twettiq ta’ tali kontrolli f’faċilitajiet ta’ ħżin kummerċjali ma joħloq l-ebda riskju għas-saħħa tal-pjanti. Għalhekk, jenħtieġ li l-Artikolu 3(11) tar-Regolament ta’ Implimentazzjoni (UE) 2019/1014 jiġi emendat biex jiġu estiżi l-kategoriji ta’ oġġetti li għalihom jistgħu jitwettqu l-kontrolli tal-identità u l-kontrolli fiżiċi f’faċilitajiet ta’ ħżin kummerċjali.

(8)

L-Artikolu 5(1), il-punt (e), tar-Regolament ta’ Implimentazzjoni (UE) 2019/1014 jirrikjedi li l-postijiet ta’ kontroll fuq il-fruntiera li jkunu ntgħażlu għall-annimali msemmija fl-Artikolu 47(1), il-punt (a), tar-Regolament (UE) 2017/625 ikollhom żoni ta’ bini jew kmamar ta’ bini biex jinżammu separati l-ungulati għajr l-ekwidi rreġistrati, l-ekwidi rreġistrati, u annimali oħra għajr l-ungulati (iżda inklużi l-ungulati taż-żoo). Meta l-postijiet ta’ kontroll fuq il-fruntiera jkunu ntgħażlu għall-annimali, iż-żoni ta’ bini jew il-kmamar ta’ bini jridu jiġu adattati għall-kategoriji ta’ annimali li għalihom ikunu ntgħażlu l-postijiet. Madankollu, iż-żoni ta’ bini jew il-kmamar ta’ bini jistgħu jintużaw bejn ċerti kategoriji ta’ annimali mingħajr ma jiġu kompromessi r-rekwiżiti tas-saħħa tal-annimali u dawk dwar il-benesseri tal-annimali. Għalhekk, jixraq li jiġi emendat l-Artikolu 5(1), il-punt (e), tar-Regolament ta’ Implimentazzjoni (UE) 2019/1014 biex ikun hemm flessibbiltà fir-rigward tar-rekwiżiti ta’ separazzjoni bejn ċerti kategoriji ta’ annimali.

(9)

Peress li l-ispezzjoni tal-kunsinni ta’ bajd għat-tifqis fil-postijiet ta’ kontroll fuq il-fruntiera magħżula għall-annimali ma toħloq l-ebda riskju għas-saħħa pubblika jew tal-annimali fir-rigward tal-annimali u tal-oġġetti ttrattati f’dawn il-postijiet ta’ kontroll fuq il-fruntiera, jenħtieġ li l-awtoritajiet kompetenti jitħallew jispezzjonaw il-kunsinni ta’ bajd għat-tifqis fil-postijiet ta’ kontroll fuq il-fruntiera magħżula għall-annimali. Għalhekk, jenħtieġ li l-Artikolu 5 tar-Regolament ta’ Implimentazzjoni tal-Kummissjoni (UE) 2019/1014 jiġi emendat kif xieraq.

(10)

L-Artikolu 6(5) tar-Regolament ta’ Implimentazzjoni (UE) 2019/1014 jippermetti li l-kunsinni ta’ żrinġijiet ħajjin, ta’ ħut ħaj u ta’ invertebrati ħajjin, li huma maħsuba għall-konsum mill-bniedem, u l-kunsinni ta’ bajd għat-tifqis u ta’ lixkiet tas-sajd, għandhom jiġu spezzjonati fil-postijiet ta’ kontroll fuq il-fruntiera li jkunu ntgħażlu għall-kategoriji ta’ oġġetti msemmija fl-Artikolu 47(1), il-punt (b), tar-Regolament (UE) 2017/625. Id-daqs żgħir ta’ dawn l-ispeċijiet ta’ annimali, u l-fatt li jiġu ttrasportati f’kontenituri jew f’kaxxi, jimminimizza r-riskju ta’ kontaminazzjoni kroċjata ma’ kategoriji oħra ta’ oġġetti. L-invertebrati ħajjin mhux maħsuba għall-konsum mill-bniedem huma ta’ daqs simili u jiġu ttrasportati bl-istess mod bħal dawk maħsuba għall-konsum mill-bniedem. Peress li r-riskju ta’ kontaminazzjoni kroċjata huwa l-istess għaż-żewġ tipi ta’ invertebrati ħajjin, jixraq li jiġi emendat l-Artikolu 6(5) tar-Regolament ta’ Implimentazzjoni (UE) 2019/1014 biex jippermetti wkoll l-ispezzjoni ta’ invertebrati ħajjin mhux maħsuba għall-konsum mill-bniedem fil-postijiet ta’ kontroll fuq il-fruntiera li jkunu ntgħażlu għall-kategoriji ta’ oġġetti msemmija fl-Artikolu 47(1), il-punt (b), tar-Regolament (UE) 2017/625.

(11)

Id-definizzjoni ta’ “prodotti ġerminali” stabbilita fl-Artikolu 4, il-punt (28), tar-Regolament (UE) 2016/429 tal-Parlament Ewropew u tal-Kunsill (3) tinkludi l-bajd għat-tifqis. Peress li l-kunsinni tal-prodotti ġerminali jiġu spezzjonati fil-postijiet ta’ kontroll fuq il-fruntiera magħżula għall-kategoriji tal-oġġetti msemmija fl-Artikolu 47(1), il-punt (b), tar-Regolament (UE) 2017/625, ma hemmx bżonn li ssir referenza għall-bajd għat-tifqis fl-Artikolu 6(5) tar-Regolament ta’ Implimentazzjoni (UE) 2019/1014, u għal raġunijiet ta’ ċertezza legali, għalhekk, jixraq li titħassar dik ir-referenza minn dik id-dispożizzjoni.

(12)

L-Artikolu 60(1) tar-Regolament (UE) 2017/625 jipprevedi li l-Istati Membri jridu jippubblikaw l-informazzjoni dwar l-għażla tal-postijiet ta’ kontroll fuq il-fruntiera tagħhom. L-Istati Membri huma meħtieġa jużaw l-abbrevjazzjonijiet u l-ispeċifikazzjonijiet tal-Anness II tar-Regolament ta’ Implimentazzjoni (UE) 2019/1014 biex jippubblikaw il-kategoriji ta’ annimali u ta’ oġġetti li għalihom huma magħżula l-postijiet ta’ kontroll fuq il-fruntiera. Għal raġunijiet ta’ koerenza, il-frażijiet introduttorji tal-punti (a), (c) u (d) tal-Anness II tar-Regolament ta’ Implimentazzjoni (UE) 2019/1014 jenħtieġ li jiġu estiżi għall-oġġetti msemmija fl-Artikolu 47(1), il-punti (d), (e) jew (f), tar-Regolament (UE) 2017/625 kif applikabbli.

(13)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

L-Artikolu 3 huwa emendat kif ġej:

(2)

L-Artikolu 5 huwa emendat kif ġej:

(3)

fl-Artikolu 6, il-paragrafu 5 huwa sostitwit b’dan li ġej:

(4)

L-Anness II huwa emendat kif ġej: