(1)

L-iżviluppi reċenti fit-trasport ta’ oġġetti perikolużi, inkluż iż-żejt, minħabba kunflitti ġeopolitiċi li jaffettwaw it-trasport marittimu jagħtu lok għal tħassib serju. B’mod partikolari, l-okkorrenza tal-hekk imsejħa flotta mistura jew imdella, kif definita fir-Riżoluzzjoni A.1192 (33) tal-Assemblea tal-Organizzazzjoni Marittima Internazzjonali (OMI), spiss magħmula minn vapuri f’kundizzjoni ħażina, toħloq riskji sostanzjali għas-sikurezza marittima u għall-ekosistemi tal-baħar.

(2)

L-istimi jissuġġerixxu li l-flotta mistura jew imdella kibret b’70 % matul l-aħħar ftit snin u tinkludi madwar 600 bastiment. L-operazzjoni mhux trasparenti tal-flotta mistura jew imdella toħloq diffikultajiet, speċjalment fl-istabbiliment u l-verifika tal-istatus taċ-ċertifikati, inklużi ċ-ċertifikati tal-assigurazzjoni. Iż-żieda fit-trasport taż-żejt minn tali vapuri mhux sikuri u mhux assigurati timmina l-istandards tas-sikurezza u ambjentali fis-seħħ permezz tal-istrumenti żviluppati mill-OMI.

(3)

B’konsegwenza ta’ dan, iż-żieda fl-esponiment tal-kosti Ewropej tal-Istati Membri għal danni ambjentali li ġejjin minn attività intensifikata tal-flotta mistura jew imdella, u li tipprovoka riskju akbar ta’ aċċidenti u inċidenti marittimi, hija meqjusa bħala theddida inaċċettabbli għas-sikurezza tal-ħajja fuq il-baħar u għall-ambjent.

(4)

Il-possibbiltajiet legali li tiġi attribwita r-responsabbiltà jew li jinkiseb kumpens f’każ ta’ inċident jistgħu jkunu limitati minħabba n-nuqqas ta’ ċarezza rigward is-sjieda u l-kopertura tal-assigurazzjoni tal-bastimenti, u b’hekk, il-piż tar-rimedju tad-danni kkawżati minn tixrid potenzjali jitqiegħed fuq l-Istati Membri affettwati u l-Unjoni.

(5)

Id-Direttiva 2009/20/KE tal-Parlament Ewropew u tal-Kunsill (2) dwar l-assigurazzjoni tas-sidien ta’ vapuri għal pretensjonijiet marittimi fiha dispożizzjonijiet dwar in-notifika ta’ prova ta’ assigurazzjoni marittima għal kwalunkwe vapur – irrispettivament mill-bandiera – li jbaħħar lejn kwalunkwe port ta’ Stat Membru tal-UE, kif ukoll fil-baħar territorjali tal-Istati Membri tal-UE, mingħajr preġudizzju għar-rekwiżiti tad-dritt internazzjonali. Madankollu, ma tkoprix vapuri fi tranżitu.

(6)

Fl-Artikolu 5 tagħha, id-Direttiva 2002/59/KE tirrikjedi li l-vapuri kollha li jidħlu fiż-żona ta’ kwalunkwe Stat(i) Membru/i tal-UE jikkonformaw mas-sistemi mandatarji tar-rapportaġġ tal-bastimenti billi jirrapportaw l-informazzjoni meħtieġa. Barra minn hekk, l-Artikolu 16 jirrikjedi li kwalunkwe vapur li jonqos milli jinnotifika, jew li ma jkollux, ċertifikati tal-assigurazzjoni jew garanziji finanzjarji f’konformità mar-regoli internazzjonali jew tal-UE, jitqies li jkun ta’ periklu potenzjali għat-trasport marittimu jew ta’ theddida għas-sikurezza marittima, għas-sikurezza tal-individwi jew għall-ambjent.

(7)

Ir-rekwiżiti eżistenti ma jkoprux b’mod adegwat sitwazzjonijiet ta’ vapuri li, irrispettivament mill-bandiera tagħhom, ibaħħru tul il-kosti tal-Istati Membri, fi tranżitu, iżda ma jidħlu fl-ebda port ta’ Stat Membru, u dawn jeħtieġ li jiġu indirizzati.

(8)

L-iżviluppi internazzjonali reċenti jenfasizzaw il-ħtieġa għal miżuri robusti biex jiġu indirizzati r-riskji maħluqa minn bastimenti mhux assigurati u mhux sikuri. Ir-Riżoluzzjoni A.1192 (33) tal-Assemblea tal-OMI (Diċembru 2023) tħeġġeġ azzjonijiet biex jiġu evitati operazzjonijiet illegali fis-settur marittimu mill-flotta mistura jew imdella. Il-linji gwida riveduti mill-Kumitat Legali tal-OMI (LEG.1/Circ.16, Ġunju 2024) jistabbilixxu standards aġġornati għar-rikonoxximent taċ-ċertifikati tal-assigurazzjoni ta’ responsabbiltà ċivili u għall-validazzjoni tal-fornituri tas-sigurtà finanzjarja, inklużi l-Klabbs ta’ Protezzjoni u Indennizz (P&I), filwaqt li r-Riżoluzzjonijiet tal-Assembleadwar il-Fond tal-1992 u l-Fond Supplimentari (ir-Riżoluzzjonijiet Nru 14 u Nru 6 rispettivament, Novembru 2024) isaħħu r-reġim internazzjonali tar-responsabbiltà u tal-kumpens stabbilit skont il-Konvenzjoni dwar ir-Responsabbiltà Ċivili (CLC, Civil Liability Convention) tal-1992, il-Konvenzjoni dwar il-Fond tal-1992, u l-Protokoll dwar il-Fond Supplimentari. Sabiex jiġi żgurat l-allinjament ma’ dawn l-istandards internazzjonali u jiġu indirizzati r-riskji emerġenti b’mod effettiv, huwa neċessarju li d-Direttiva 2002/59/KE tiġi aġġornata biex tirrifletti dawn l-iżviluppi.

(9)

L-OMI stabbiliet diversi sistemi Mandatarji tar-Rapportaġġ tal-Bastimenti (MSR) biex ittejjeb is-sikurezza marittima/it-tħejjija għat-tniġġis u tippermetti lill-Istati kostali jimmonitorjaw it-traffiku marittimu b’mod effettiv, b’mod partikolari l-bastimenti li jġorru merkanzija perikoluża jew li tniġġes bħaż-żejt. Dawk is-sistemi huma mfassla biex jiffaċilitaw l-iskambju ta’ informazzjoni vitali relatata mal-movimenti tal-vapuri u mal-merkanzija, filwaqt li jiżguraw li l-awtoritajiet rilevanti jiġu infurmati minnufih. Fl-Unjoni, din l-informazzjoni tiġi trażmessa permezz ta’ sistemi ta’ rapportaġġ nazzjonali konnessi mas-sistema tal-Unjoni għall-Iskambju ta’ Informazzjoni Marittima, SafeSeaNet. Il-punt 4 tal-Anness I tad-Direttiva 2002/59/KE jiddeskrivi t-tip ta’ informazzjoni li l-vapuri jridu jipprovdu lill-awtoritajiet permezz tas-sistemi ta’ rapportaġġ rilevanti. Sabiex jiġu ssodisfati l-ħtiġijiet operattivi u tas-sikurezza li qed jevolvu, huwa neċessarju li dak l-Anness jiġi emendat biex jinkludi informazzjoni ġdida, u b’mod aktar speċifiku dwar iċ-ċertifikati tal-assigurazzjoni, meqjusa essenzjali biex jiġu żgurati s-sikurezza marittima, il-protezzjoni ambjentali, u r-rispons effettiv ta’ emerġenza.

(10)

Għalhekk jenħtieġ li d-Direttiva 2002/59/KE tiġi emendata kif xieraq,

“—

X. Mixxellanji: