(1)

Fil-komunikazzjoni tagħha tal-11 ta’ Frar 2025 bit-titolu “Ewropa aktar sempliċi u rapida: Komunikazzjoni dwar l-implimentazzjoni u s-simplifikazzjoni”, il-Kummissjoni stabbiliet viżjoni għal aġenda ta’ implimentazzjoni u simplifikazzjoni li twassal għal titjib rapidu u viżibbli għan-nies u għan-negozji fil-prattika. Dan jirrikjedi aktar minn approċċ inkrementali u l-Unjoni għandha tieħu azzjoni kuraġġuża biex tilħaq dak l-għan. Il-Parlament Ewropew, il-Kunsill, il-Kummissjoni, l-awtoritajiet tal-Istati Membri fil-livelli kollha u l-partijiet ikkonċernati jeħtieġu jaħdmu id f’id biex jirrazzjonalizzaw u jissimplifikaw ir-regoli tal-UE, ir-regoli nazzjonali u dawk reġjonali u biex jimplimentaw il-politiki b’mod aktar effettiv.

(2)

Fil-kuntest tal-impenn tal-Kummissjoni li tnaqqas il-piżijiet tar-rapportar u li ssaħħaħ il-kompetittività, huwa meħtieġ li jiġu introdotti emendi mmirati għad-Direttivi (UE) 2022/2464 (3) u (UE) 2024/1760 (4) tal-Parlament Ewropew u tal-Kunsill sabiex jintlaħqu dawk l-objettivi, filwaqt li jinżammu l-objettivi ta’ politika tal-Patt Ekoloġiku kif stabbilit fil-komunikazzjoni tal-Kummissjoni tal-11 ta’ Diċembru 2019 bit-titolu “Il-Patt Ekoloġiku Ewropew” u tal-Pjan ta’ Azzjoni dwar il-Finanzi Sostenibbli kif stabbilit fil-komunikazzjoni tal-Kummissjoni tat-8 ta’ Marzu 2018 bit-titolu “Pjan ta’ Azzjoni: Il-Finanzjament tat-Tkabbir Sostenibbli”.

(3)

Id-Direttiva (UE) 2022/2464 tispeċifika d-dati minn meta l-Istati Membri għandhom japplikaw ir-rekwiżiti ta’ rapportar dwar is-sostenibbiltà stabbiliti fid-Direttiva 2013/34/UE tal-Parlament Ewropew u tal-Kunsill (5), b’dati differenti skont id-daqs tal-impriża kkonċernata. Impriżi kbar li huma entitajiet ta’ interess pubbliku b’medja ta’ aktar minn 500 impjegat matul is-sena finanzjarja u entitajiet ta’ interess pubbliku li huma impriżi omm ta’ grupp kbir b’medja ta’ aktar minn 500 impjegat fid-dati tal-karta bilanċjali tiegħu, fuq bażi konsolidata, matul is-sena finanzjarja għandhom jirrapportaw fl-2025 għas-snin finanzjarji li jibdew fl-1 ta’ Jannar 2024 jew wara. Impriżi kbar oħra u impriżi omm oħra ta’ grupp kbir, għandhom jirrapportaw fl-2026 għas-snin finanzjarji li jibdew fl-1 ta’ Jannar 2025 jew wara. L-impriżi żgħar u ta’ daqs medju, ħlief il-mikroimpriżi, l-istituzzjonijiet żgħar u mhux kumplessi, l-impriżi ta’ assigurazzjoni captive u l-impriżi ta’ riassigurazzjoni captive għandhom jirrapportaw fl-2027 għas-snin finanzjarji li jibdew fl-1 ta’ Jannar 2026 jew wara. Meta jitqiesu l-inizjattivi tal-Kummissjoni li għaddejjin bħalissa li għandhom l-għan li jissimplifikaw ċerti obbligi eżistenti ta’ rapportar dwar is-sostenibbiltà u li jnaqqsu l-piż amministrattiv relatat fuq l-impriżi, u sabiex jipprevedu ċarezza legali u jevitaw li l-impriżi li bħalissa huma meħtieġa jirrapportaw għas-snin finanzjarji li jibdew fl-1 ta’ Jannar 2025 jew wara u fl-1 ta’ Jannar 2026 jew wara jġarrbu kostijiet bla bżonn u li jistgħu jiġu evitati, jenħtieġ li r-rekwiżiti ta’ rapportar dwar is-sostenibbiltà għal dawk l-impriżi jiġu posposti b’sentejn.

(4)

Id-Direttiva (UE) 2022/2464 tispeċifika d-dati minn meta l-Istati Membri għandhom japplikaw ir-rekwiżiti ta’ rapportar dwar is-sostenibbiltà stabbiliti fid-Direttiva 2004/109/KE tal-Parlament Ewropew u tal-Kunsill (6), b’dati differenti skont id-daqs tal-emittent ikkonċernat. Emittenti li huma impriżi kbar b’medja ta’ aktar minn 500 impjegat matul is-sena finanzjarja u emittenti li huma impriżi omm ta’ grupp kbir b’medja ta’ aktar minn 500 impjegat fid-dati tal-karta bilanċjali tiegħu, fuq bażi konsolidata, matul is-sena finanzjarja, għandhom jirrapportaw fl-2025 għas-snin finanzjarji li jibdew fl-1 ta’ Jannar 2024 jew wara. Emittenti oħrajn li huma impriżi kbar u emittenti oħrajn li huma impriżi omm ta’ grupp kbir, għandhom jirrapportaw fl-2026 għas-snin finanzjarji li jibdew fl-1 ta’ Jannar 2025 jew wara. L-emittenti li huma impriżi żgħar u ta’ daqs medju, ħlief il-mikroimpriżi, l-istituzzjonijiet żgħar u mhux kumplessi, l-impriżi ta’ assigurazzjoni captive u l-impriżi ta’ riassigurazzjoni captive għandhom jirrapportaw fl-2027 għas-snin finanzjarji li jibdew fl-1 ta’ Jannar 2026 jew wara. Meta jitqiesu l-inizjattivi tal-Kummissjoni li għaddejjin bħalissa li għandhom l-għan li jissimplifikaw ċerti obbligi eżistenti ta’ rapportar dwar is-sostenibbiltà u li jnaqqsu l-piż amministrattiv relatat fuq l-impriżi, u sabiex jipprevedu ċarezza legali u li jevitaw li l-emittenti li bħalissa huma meħtieġa jirrapportaw għas-snin finanzjarji li jibdew fl-1 ta’ Jannar 2025 jew wara u fl-1 ta’ Jannar 2026 jew wara jġarrbu kostijiet bla bżonn u li jistgħu jiġu evitati, jenħtieġ li r-rekwiżiti ta’ rapportar dwar is-sostenibbiltà għal dawk l-emittenti jiġu posposti b’sentejn.

(5)

Jenħtieġ li d-data minn meta l-Istati Membri għandhom japplikaw id-Direttiva (UE) 2024/1760 tiġi posposta b’sena għall-ewwel sett ta’ kumpaniji li jaqgħu fil-kamp ta’ applikazzjoni ta’ dik id-Direttiva sabiex il-kumpaniji jingħataw aktar żmien biex iħejju għar-rekwiżiti ta’ dik id-Direttiva u biex jingħataw l-opportunità li jqisu l-linji gwida li għandhom jinħarġu mill-Kummissjoni dwar kif jenħtieġ li jissodisfaw l-obbligi ta’ diliġenza dovuta tagħhom b’mod prattiku. Barra minn hekk, jenħtieġ li d-data tal-applikazzjoni tal-1 ta’ Jannar 2029 għall-miżuri meħtieġa biex jikkonformaw mal-obbligu ta’ rapportar skont l-Artikolu 16 tad-Direttiva (UE) 2024/1760 fir-rigward tat-tielet sett ta’ kumpaniji li jaqgħu fil-kamp ta’ applikazzjoni ta’ dik id-Direttiva tiġi emendata sabiex tiġi żgurata l-koerenza mad-dati tal-applikazzjoni rispettivi għas-settijiet l-oħra ta’ kumpaniji.

(6)

Barra minn hekk, fid-dawl ta’ proposta leġiżlattiva parallela li għandha l-għan li tissimplifika l-qafas ta’ sostenibbiltà u tnaqqas il-piż fuq il-kumpaniji, l-iskadenza għall-Istati Membri biex jittrasponu d-Direttiva (UE) 2024/1760 jenħtieġ li tiġi estiża b’sena sabiex jitqies id-dewmien possibbli fl-isforzi ta’ traspożizzjoni tagħhom li għaddejjin bħalissa minħabba emendi possibbli għal dik id-Direttiva.

(7)

Minħabba li l-objettivi ta’ din id-Direttiva ma jistgħux jinkisbu b’mod suffiċjenti mill-Istati Membri iżda jistgħu pjuttost, minħabba l-iskala u l-effetti tal-azzjoni, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-objettivi.

(8)

Għalhekk jenħtieġ li d-Direttivi (UE) 2022/2464 u (UE) 2024/1760 jiġu emendati skont dan. Billi l-emenda għad-Direttiva (UE) 2024/1760 tbiddel id-data ta’ skadenza tat-traspożizzjoni u ċerti dati ta’ applikazzjoni, li kollha jaqgħu fil-futur, l-Istati Membri jkollhom bżonn biss li jipposponu d-dati ta’ applikazzjoni skont l-Artikolu 2 ta’ din id-Direttiva fil-każ li jkunu diġà ttrasponew id-Direttiva (UE) 2024/1760.

(9)

Minħabba l-urġenza tal-kwistjoni u biex tiġi pprovduta ċertezza legali mill-aktar fis possibbli, jitqies li huwa xieraq li tiġi invokata l-eċċezzjoni għall-perjodu ta’ tmien ġimgħat prevista fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni Ewropea, anness mat-Trattat dwar l-Unjoni Ewropea, mat-Trattat dwar il-Funzjonament tal-Unjoni Ewropea u mat-Trattat li jistabbilixxi l-Komunità Ewropea għall-Enerġija Atomika.

(10)

Għal raġunijiet ta’ urġenza u biex tiġi pprovduta ċertezza legali mill-aktar fis possibbli, jenħtieġ li din id-Direttiva tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea,

(a)

l-ewwel paragrafu huwa emendat kif ġej:

(b)

it-tielet subparagrafu huwa emendat kif ġej: