REGOLAMENT TA’ IMPLIMENTAZZJONI TAL-KUMMISSJONI (UE) 2025/772

tas-16 ta’ April 2025

li jemenda u jikkoreġi r-Regolament ta’ Implimentazzjoni (UE) 2019/1842 li jistabbilixxi regoli għall-applikazzjoni tad-Direttiva 2003/87/KE tal-Parlament Ewropew u tal-Kunsill fir-rigward ta’ arranġamenti ulterjuri għall-aġġustamenti għall-allokazzjoni bla ħlas tal-kwoti tal-emissjonijiet minħabba bidliet fil-livell tal-attività

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat d-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi sistema għall-iskambju ta’ kwoti ta’ emissjonijiet ta’ gassijiet serra ġewwa l-Unjoni u li temenda d-Direttiva tal-Kunsill 96/61/KE (1), u b’mod partikolari l-Artikolu 10a(21) tagħha,

Billi:

(1)

Id-Direttiva 2003/87/KE ġiet emendata bid-Direttiva (UE) 2023/959 tal-Parlament Ewropew u tal-Kunsill (2) biex tiġi allinjata mar-Regolament (UE) 2021/1119 tal-Parlament Ewropew u tal-Kunsill (3) li jistabbilixxi mira ta’ tnaqqis fl-emissjonijiet netti ta’ mill-inqas 55 % sal-2030 meta mqabbel mal-1990. F’konformità mar-reviżjoni tad-Direttiva 2003/87/KE, ir-Regolament Delegat tal-Kummissjoni (UE) 2019/331 (4) li jiddetermina regoli tranżizzjonali għall-Unjoni kollha għall-allokazzjoni armonizzata bla ħlas tal-kwoti tal-emissjonijiet ġie emendat bir-Regolament Delegat tal-Kummissjoni (UE) 2024/873 (5). L-emendi tad-Direttiva 2003/87/KE u tar-Regolament Delegat (UE) 2019/331 jikkonċernaw ukoll aġġustamenti għall-allokazzjoni bla ħlas tal-kwoti tal-emissjonijiet minħabba bidliet fil-livell tal-attività u jirrikjedu bidliet fir-Regolament ta’ Implimentazzjoni tal-Kummissjoni (UE) 2019/1842 (6).

(2)

Sabiex jissaħħu l-inċentivi biex jitnaqqsu l-emissjonijiet u tiġi żgurata implimentazzjoni armonizzata fl-Istati Membri kollha tad-dispożizzjonijiet dwar effiċjenza mtejba jew imnaqqsa fl-użu tal-enerġija, meħtieġ li jiġu ċċarati r-regoli u l-metodoloġiji relatati mal-aġġustament tal-allokazzjoni bla ħlas tal-kwoti għas-subinstallazzjonijiet ta’ parametru referenzjarju tas-sħana u s-subinstallazzjonijiet ta’ parametru referenzjarju tal-fjuwil filwaqt li jiġu żgurati kundizzjonijiet ekwi għal strutturi differenti tal-provvista tas-sħana li jużaw l-enerġija kemm minn oriġini eliġibbli kif ukoll minn dik mhux eliġibbli. Bħala inċentiv għat-tnaqqis tal-emissjonijiet minn proċess mhux koperti minn parametri referenzjarji ta’ prodott, jenħtieġ li l-istess dispożizzjonijiet japplikaw ukoll għas-subinstallazzjonijiet ta’ emissjonijiet minn proċess. Għal dawk is-subinstallazzjonijiet, l-aġġustament tal-allokazzjoni bla ħlas tal-kwoti jenħtieġ li jkun ibbażat fuq il-medja tal-livell ta’ attività mistenni li jenħtieġ li tiġi ddeterminata f’konformità ma’ metodoloġija komuni u d-data għall-kalkolu tal-medja tal-livell ta’ attività mistenni jenħtieġ li tiġi inkluża fir-rapport annwali dwar il-livell tal-attività meta d-differenza bejn il-livell ta’ attività medju u l-livell ta’ attività storiku ta’ subinstallazzjoni tkun aktar minn 15 %.

(3)	Sabiex tiġi żgurata d-disponibbiltà kontinwa tad-data rrapportata kull sena meħtieġa għall-aġġustamenti għall-allokazzjoni bla ħlas, l-informazzjoni dwar is-snin ta’ rappurtar jenħtieġ li tiġi aġġornata.

(4)

Id-Direttiva (UE) 2023/959 introduċiet bidliet fiċ-ċiklu ta’ konformità sabiex jitqiesu aħjar l-aġġustamenti għall-allokazzjoni bla ħlas. Peress li l-iskadenza biex l-awtoritajiet kompetenti jagħtu allokazzjoni bla ħlas inbidlet mit-28 ta’ Frar għat-30 ta’ Ġunju, ir-rekwiżit li jiġi ppreżentat rapport preliminari dwar il-livell ta’ attività ma għadux meħtieġ, u għalhekk jenħtieġ li ma jibqax japplika.

(5)

Sabiex tiġi evitata allokazzjoni mhux ġustifikata tal-kwoti, ir-Regolament ta’ Implimentazzjoni (UE) 2019/1842 jipprevedi li l-awtorità kompetenti tista’ tissospendi l-ħruġ ta’ kwoti sakemm ikun ċar b’mod inekwivoku li l-allokazzjoni għall-installazzjoni ma għandhiex għalfejn tiġi aġġustata f’konformità ma’ dak ir-Regolament. Is-sospensjoni tal-ħruġ ta’ kwoti jenħtieġ li tkun obbligatorja jekk ma jkun hemm l-ebda rapport annwali vverifikat dwar il-livell ta’ attività disponibbli jew jekk dak ir-rapport ma jiġix ivverifikat bħala sodisfaċenti skont ir-Regolament ta’ Implimentazzjoni tal-Kummissjoni (UE) 2018/2067 (7).

(6)

L-installazzjonijiet operati minn intrapriżi li huma meħtieġa jwettqu awditu tal-enerġija jew jimplimentaw sistema ċertifikata ta’ ġestjoni tal-enerġija f’konformità mal-Artikolu 8 tad-Direttiva 2012/27/UE tal-Parlament Ewropew u tal-Kunsill (8), u għalhekk ikunu soġġetti għal tnaqqis ta’ 20 % fl-allokazzjoni bla ħlas jekk ma jkunux jistgħu juru matul il-verifika tar-rapport dwar id-data ta’ referenza li l-implimentazzjoni tar-rakkomandazzjonijiet dwar l-effiċjenza fl-użu tal-enerġija minn dawk l-awditi jew is-sistemi ta’ ġestjoni tlestiet jew li l-eċċezzjonijiet għall-kundizzjonalità dwar il-miżuri tal-effiċjenza fl-użu tal-enerġija applikati skont l-Artikolu 22a(1) tar-Regolament Delegat (UE) 2019/331, jenħtieġ li jkollhom l-opportunità li juru implimentazzjoni sussegwenti tar-rakkomandazzjonijiet dwar l-effiċjenza fl-użu tal-enerġija. Sabiex tiżdied iċ-ċertezza legali u tiġi żgurata r-robustezza tas-sistema, jenħtieġ li l-operatur jipprovdi evidenza vverifikata bħala parti mir-rapport dwar il-livell ta’ attività, li turi li l-implimentazzjoni pendenti tar-rakkomandazzjonijiet tkun tlestiet jew li japplikaw miżuri ekwivalenti. Wara d-deċiżjoni tal-awtorità kompetenti li l-kundizzjonijiet speċifikati fl-Artikolu 22a(1), it-tieni subparagrafu tar-Regolament Delegat (UE) 2019/331 ġew issodisfati, l-operatur jenħtieġ li kull sena jirċievi l-ammont sħiħ ta’ kwoti għas-snin li jifdal fil-perjodu ta’ allokazzjoni.

(7)

Il-passi proċedurali tar-regoli ta’ kundizzjonalità rigward il-pjanijiet dwar in-newtralità klimatika huma speċifikati fl-Artikolu 22b tar-Regolament Delegat (UE) 2019/331 f’konformità mal-Artikolu 10a(1), il-ħames subparagrafu, u mal-Artikolu 10b(4), it-tieni, it-tielet u r-raba’ subparagrafi, tad-Direttiva 2003/87/KE, għall-operaturi ta’ installazzjonijiet li l-livelli ta’ emissjonijiet ta’ gassijiet serra tagħhom huma ogħla mit-80 perċentil tal-livelli ta’ emissjonijiet għall-parametri referenzjarji ta’ prodott rilevanti, u għall-operaturi tat-tisħin distrettwali f’ċerti Stati Membri li japplikaw għal allokazzjoni bla ħlas addizzjonali fakultattiva. Sabiex jiġi pprovdut mod strutturat ta’ rappurtar dwar il-miri u l-istadji importanti miksuba u biex tiġi ffaċilitata l-verifika tal-ilħuq ta’ dawk il-miri u l-istadji importanti f’konformità mad-Direttiva 2003/87/KE, jeħtieġ li dawn l-operaturi jintalbu jabbozzaw rapport dwar in-newtralità klimatika. Sabiex jitlesta r-rapport dwar in-newtralità klimatika, jenħtieġ li l-operaturi jużaw il-mudell żviluppat mill-Kummissjoni sakemm ma jkunx preskritt mudell nazzjonali speċifiku mill-Istat Membru kkonċernat.

(8)

Sabiex jirċievu l-ammont sħiħ jew l-allokazzjoni bla ħlas addizzjonali, l-operaturi ta’ installazzjonijiet li l-livelli ta’ emissjonijiet tal-gassijiet serra tagħhom huma ogħla mit-80 perċentil tal-livelli ta’ emissjonijiet għall-parametri referenzjarji ta’ prodott rilevanti u l-operaturi ta’ installazzjonijiet tat-tisħin distrettwali f’ċerti Stati Membri jeħtieġ li jissodisfaw il-kundizzjonijiet stabbiliti fl-Artikolu 22b(1), it-tieni subparagrafu tar-Regolament Delegat (UE) 2019/331 u li juru l-kisba ta’ miri u stadji importanti intermedji fir-rapport verifikat dwar in-newtralità klimatika.

(9)

F’konformità mal-Artikolu 10b(4) tad-Direttiva 2003/87/KE u mal-Artikolu 22b(3) tar-Regolament Delegat (UE) 2019/331, il-forniment ta’ allokazzjoni bla ħlas addizzjonali jrid ikun dipendenti fuq l-installazzjonijiet tat-tisħin distrettwali riċevituri li jagħmlu investimenti ekwivalenti għall-ilħuq tan-newtralità klimatika kif ukoll fuq dawk l-installazzjonijiet li jilħqu l-miri u l-istadji importanti msemmija fl-Artikolu 10b(4), it-tielet subparagrafu, il-punt (b), tad-Direttiva 2003/87/KE. Sabiex l-installazzjonijiet tat-tisħin distrettwali jkunu jistgħu jagħmlu l-investimenti meħtieġa, jenħtieġ li tingħata allokazzjoni addizzjonali bla ħlas malli tiġi pprovduta prova dokumentarja tal-impenn legali għall-investimenti. Bħala prova dokumentarja tal-impenn legali għall-investiment, jenħtieġ li operatur juri impenn li jinvesti jew li jkun sar l-investiment; jenħtieġ li dan jinkludi impenji legalment vinkolanti, bħal kuntratt, jew evidenza dimostrattiva oħra ta’ impenji finanzjarji relatati ma’ investimenti futuri. L-għoti ta’ kwoti addizzjonali bla ħlas kif tiġi aċċettata l-evidenza tal-impenn, se jinċentiva l-avvanzi teknoloġiċi u jiżgura li l-benefiċċji tal-kwoti addizzjonali bla ħlas jikkontribwixxu direttament għat-tnaqqis fl-emissjonijiet tal-gassijiet serra marbuta mat-tisħin distrettwali. Sabiex jiġi stabbilit kontrobilanċ għall-allokazzjoni ta’ kwoti addizzjonali minn qabel u biex jiġi żgurat li l-isforz ta’ investiment ma jkunx biss impenn iżda jsarraf f’azzjonijiet konkreti, jenħtieġ li l-kwoti addizzjonali ta’ 30 % jingħataw lura jekk il-kundizzjonijiet għall-għoti tagħhom ma jiġux issodisfati u kwalunkwe allokazzjoni ulterjuri bla ħlas tal-kwoti jenħtieġ li tieqaf sakemm ingħataw lura l-kwoti.

(10)	Sabiex jiġi evitat piż amministrattiv żejjed filwaqt li jiġu allinjati l-bidliet fil-produzzjoni mal-allokazzjoni bla ħlas, l-għadd minimu ta’ kwoti meħtieġa għall-aġġustamenti għall-allokazzjoni bla ħlas ta’ subinstallazzjoni jenħtieġ li jiżdied minn 100 għal 300.

(11)	Sabiex tiġi evitata allokazzjoni bla ħlas mhux ġustifikata għal subinstallazzjonijiet li ma għadhomx operattivi, jenħtieġ li ma tingħata l-ebda allokazzjoni bla ħlas għall-proporzjon tas-sena kalendarja wara l-jum tal-waqfien tal-operazzjonijiet.

(12)

Mill-1 ta’ Jannar 2026, id-Direttiva (UE) 2023/959 neħħiet il-kunċett ta’ ġeneraturi tal-elettriku u t-trattament speċifiku tagħhom mil-lat ta’ allokazzjoni bla ħlas mill-EU ETS. Għalhekk, jenħtieġ li l-bidliet f’dan il-parametru ma jibqgħux japplikaw għad-determinazzjoni tal-aġġustamenti għall-allokazzjoni bla ħlas tal-kwoti.

(13)

Sabiex tiġi appoġġata applikazzjoni uniformi u preċiża tar-regoli u tal-metodoloġiji u monitoraġġ komprensiv u effettiv tal-livelli tal-attività, l-awtoritajiet kompetenti jridu jippreżentaw lill-Kummissjoni bid-data relatata mal-ammont annwali finali rivedut tal-kwoti tal-emissjonijiet allokati mingħajr ħlas lill-installazzjonijiet bil-bidliet mistennija fil-livelli ta’ attività tagħhom u d-data mill-installazzjonijiet kollha soġġetti għall-obbligu ta’ rappurtar annwali tal-livell tal-attività.

(14)

Sabiex jiġi evitat piż amministrattiv żejjed u tiġi ssimplifikata t-tranżizzjoni għall-perjodu ta’ allokazzjoni li jmiss, jenħtieġ li dan ir-Regolament japplika għall-allokazzjonijiet relatati mal-perjodu li jibda fl-1 ta’ Jannar 2026, u b’hekk jiġi żgurat allinjament mal-applikazzjoni tar-Regolament Delegat (UE) 2024/873 fir-rigward tar-regoli għar-rappurtar dwar id-data ta’ referenza għall-perjodu ta’ allokazzjoni li jmiss.

(15)

L-Artikolu 3(2), it-tieni subparagrafu, tar-Regolament ta’ Implimentazzjoni (UE) 2019/1842 fih żbalji li jikkonċernaw parametri addizzjonali li l-awtorità kompetenti tista’ titlob lill-operaturi jirrapportawhom fir-rapport dwar il-livell tal-attività. Għal raġunijiet ta’ ċarezza, jenħtieġ li dawk l-iżbalji jiġu kkoreġuti.

(16)	Il-miżuri previsti f’dan ir-Regolament huma f’konformità mal-opinjoni tal-Kumitat dwar it-Tibdil fil-Klima,

ADOTTAT DAN IR-REGOLAMENT:

Artikolu 1

Ir-Regolament ta’ Implimentazzjoni (UE) 2019/1842 huwa emendat kif ġej:

(1)

L-Artikolu 2 huwa emendat kif ġej:

(a)

jiddaħħal dan il-punt (1a):

“(1a)

‘medja tal-livell ta’ attività mistenni’ tfisser għal kull subinstallazzjoni, il-medja aritmetika tal-livelli ta’ attività annwali mistennija relatati, iddeterminata abbażi tal-metodu stabbilit fl-Anness I, għas-sentejn kalendarji ta’ qabel il-preżentazzjoni tar-rapport imsemmi fl-Artikolu 3(1);”;

(b)

jiddaħħal dan il-punt (4a):

“(4a)

‘subinstallazzjoni ta’ emissjonijiet minn proċess’” tfisser subinstallazzjoni ta’ emissjonijiet minn proċess kif definita fl-Artikolu 2(10) tar-Regolament Delegat (UE) 2019/331;”;

(2)

L-Artikolu 3 huwa emendat kif ġej:

(a)	fil-paragrafu 1, l-ewwel subparagrafu, it-tieni sentenza hija sostitwita b’dan li ġej: “Fl-2021 u fl-2026, dan ir-rapport għandu jinkludi data għas-sentejn ta’ qabel is-sottomissjoni tiegħu.”;

(b)

il-paragrafu 3 huwa emendat kif ġej;

(i)

fl-ewwel subparagrafu, l-ewwel sentenza hija sostitwita b’dan li ġej:

“Ir-rapport dwar il-livell tal-attività għandu jitressaq sal-31 ta’ Marzu ta’ kull sena, lill-awtorità kompetenti li tagħti l-allokazzjoni bla ħlas, sakemm l-awtorità kompetenti ma tkunx stabbiliet skadenza aktar bikrija għal din is-sottomissjoni.”;

(ii)	it-tieni subparagrafu għandu jitħassar;

(iii)

it-tielet subparagrafu huwa sostitwit b’dan li ġej:

“L-awtorità kompetenti tista’ tissospendi l-ħruġ ta’ kwoti tal-emissjonijiet bla ħlas lil installazzjoni sakemm l-awtorità kompetenti tkun stabbiliet li ma hemm l-ebda rekwiżit li tiġi aġġustata l-allokazzjoni lil dik l-installazzjoni jew il-Kummissjoni tkun adottat Deċiżjoni f’konformità mal-Artikolu 23(4) tar-Regolament Delegat (UE) 2019/331 dwar l-aġġustamenti għall-allokazzjoni lil dik l-installazzjoni.

L-awtorità kompetenti għandha tissospendi l-ħruġ ta’ kwoti tal-emissjonijiet bla ħlas fi kwalunkwe waħda mis-sitwazzjonijiet li ġejjin:

(a)	ma jkun ġie ppreżentat l-ebda rapport verifikat dwar il-livell tal-attività mill-operatur;

(b)	ir-rapport ta’ verifika tar-rapport dwar il-livell tal-attività fih dikjarazzjoni tal-opinjoni msemmija fil-punt (b), (c) jew (d) tal-Artikolu 27(1), l-ewwel subparagrafu, tar-Regolament ta’ Implimentazzjoni (UE) 2018/2067.

Kwalunkwe sospensjoni tal-allokazzjoni tal-kwoti f’konformità mat-tielet subparagrafu ta’ dan il-paragrafu għandha tibqa’ fis-seħħ sakemm l-awtorità kompetenti tkun stabbiliet li ma hemm l-ebda rekwiżit biex tiġi aġġustata l-allokazzjoni lil dik l-installazzjoni jew il-Kummissjoni tkun adottat Deċiżjoni f’konformità mal-Artikolu 23(4) tar-Regolament Delegat (UE) 2019/331 dwar l-aġġustamenti fl-allokazzjoni lil dik l-installazzjoni.”;

(c)

il-paragrafu 4 huwa emendat kif ġej:

(i)	fl-ewwel subparagrafu, jitħassar il-punt (a);

(ii)	it-tieni subparagrafu huwa mħassar;

(3)

jiddaħħlu l-Artikoli li ġejjin:

“Artikolu 3a

Irkupru ta’ kwoti mnaqqsa f’konformità mal-Artikolu 22a tar-Regolament Delegat (UE) 2019/331

1. Meta l-ammont annwali finali tal-kwoti tal-emissjonijiet allokati mingħajr ħlas ikun tnaqqas f’konformità mal-Artikolu 22a tar-Regolament Delegat (UE) 2019/331, l-operatur jista’ jirkupra l-kwoti mnaqqsa dment li l-operatur juri, għas-sodisfazzjon tal-awtorità kompetenti, li tkun ġiet issodisfata waħda mill-kundizzjonijiet li ġejjin:

(a)

ir-rakkomandazzjonijiet pendenti kollha mill-awditi tal-effiċjenza fl-użu tal-enerġija jew mis-sistemi ċertifikati ta’ ġestjoni tal-enerġija msemmija fl-Artikolu 22a(1) tar-Regolament Delegat (UE) 2019/331 ikunu ġew implimentati u waqt il-verifika tar-rapport annwali dwar il-livell tal-attività, il-verifikatur ikun ikkonferma li l-implimentazzjoni ta’ dawn ir-rakkomandazzjonijiet tkun tlestiet;

(b)

ikunu ġew implimentati miżuri oħra matul jew wara l-perjodu ta’ referenza rilevanti li jwasslu għal tnaqqis fl-emissjonijiet tal-gassijiet serra fl-installazzjoni ekwivalenti għal dawk rakkomandati mir-rapport tal-awditu tal-enerġija jew mis-sistema ċertifikata ta’ ġestjoni tal-enerġija msemmija fl-Artikolu 22a(1) tar-Regolament Delegat (UE) 2019/331, u waqt il-verifika tar-rapport annwali dwar il-livell tal-attività, il-verifikatur ikun ikkonferma li l-implimentazzjoni ta’ dawn il-miżuri tkun tlestiet u li dan it-tnaqqis ekwivalenti fl-emissjonijiet tal-gassijiet serra jkun inkiseb.

2. Meta l-operatur ikun jixtieq jirkupra l-kwoti mnaqqsa f’konformità mal-paragrafu 1, l-operatur għandu jippreżenta talba lill-awtorità kompetenti biex jirkupra l-kwoti mnaqqsa bħala parti mir-rapport verifikat dwar il-livell tal-attività msemmi fl-Artikolu 3(3), l-ewwel subparagrafu. L-awtorità kompetenti għandha tivvaluta t-talba u tiddeċiedi jekk il-kundizzjonijiet imsemmija fil-paragrafu 1 ġewx issodisfati.

Meta l-awtorità kompetenti tiddeċiedi li l-kundizzjonijiet imsemmija fil-paragrafu 1 ikunu ġew issodisfati u l-Kummissjoni tkun adottat Deċiżjoni f’konformità mal-Artikolu 23(4) tar-Regolament Delegat (UE) 2019/331 dwar l-aġġustamenti fl-allokazzjoni lil dik l-installazzjoni, kull sena l-operatur għandu jirċievi l-ammont sħiħ ta’ kwoti għas-snin li jifdal fil-perjodu ta’ allokazzjoni li jibda mis-sena tal-preżentazzjoni tat-talba tal-irkupru tal-kwoti mnaqqsa.

Artikolu 3b

Rapport dwar in-newtralità klimatika

1. L-operaturi tal-installazzjonijiet li jkunu ppreżentaw pjan dwar in-newtralità klimatika f’konformità mal-Artikolu 22b tar-Regolament Delegat (UE) 2019/331 għandhom jabbozzaw rapport dwar in-newtralità klimatika li għandu jkun fih l-informazzjoni elenkata fl-Anness II ta’ dan ir-Regolament.

2. L-operaturi msemmija fil-paragrafu 1 għandhom jippreżentaw ir-rapport dwar in-newtralità klimatika u r-rapport ta’ verifika korrispondenti f’konformità mar-Regolament ta’ Implimentazzjoni (UE) 2018/2067 lill-awtorità kompetenti sal-31 ta’ Marzu 2026 fir-rigward tal-perjodu sal-31 ta’ Diċembru 2025, u sal-31 ta’ Marzu ta’ kull ħames sena minn hemm’ il quddiem fir-rigward tal-perjodu preċedenti ta’ 5 snin.

B’deroga mill-ewwel subparagrafu, l-awtorità kompetenti tista’ tistabbilixxi skadenza aktar bikrija għall-preżentazzjoni tar-rapport dwar in-newtralità klimatika u tar-rapport ta’ verifika korrispondenti.

3. Il-Kummissjoni għandha tqiegħed għad-dispożizzjoni mudell elettroniku jew format ta’ fajl speċifiku għall-għoti tal-informazzjoni kif speċifikat fl-Anness II.

4. Meta jabbozzaw ir-rapport dwar in-newtralità klimatika, l-operaturi għandhom jużaw il-mudell elettroniku jew il-format tal-fajl speċifiku msemmi fil-paragrafu 3.

5. B’deroga mill-paragrafi 3 u 4, l-Istati Membri jistgħu jirrikjedu li l-operaturi jużaw mudelli elettroniċi jew formats ta’ fajls speċifiċi żviluppati minn dawk l-Istati Membri biex jistabbilixxu u jippreżentaw rapporti dwar in-newtralità klimatika f’konformità mal-atti delegati adottati skont l-Artikolu 10a(1), l-ewwel subparagrafu, tad-Direttiva 2003/87/KE.

Artikolu 3c

Allokazzjoni ta’ kwoti mnaqqsa f’konformità mal-Artikolu 22b(1) tar-Regolament Delegat (UE) 2019/331

1. Meta l-kundizzjonijiet stabbiliti fl-Artikolu 22b(1), it-tieni subparagrafu, tar-Regolament Delegat (UE) 2019/331 ikunu ġew issodisfati, wara t-tnaqqis tal-kwoti f’konformità mal-ewwel subparagrafu ta’ dak l-Artikolu, il-kwoti mnaqqsa għandhom jiġu allokati għal kull sena fil-perjodu ta’ allokazzjoni applikabbli.

2. Għall-finijiet tal-paragrafu 1, il-kundizzjoni stabbilita fl-Artikolu 22b(1), it-tieni subparagrafu, il-punt (b), tar-Regolament Delegat (UE) 2019/331 għandha tiġi ssodisfata jekk japplika dan kollu li ġej:

(a)

l-operatur ikun ippreżenta rapport verifikat dwar in-newtralità klimatika sal-31 ta’ Marzu 2026, jew sal-iskadenza preċedenti stabbilita mill-awtorità kompetenti, fir-rigward tal-perjodu sal-31 ta’ Diċembru 2025, u sal-31 ta’ Marzu ta’ kull ħames sena minn hemm’ il quddiem fir-rigward tal-perjodu preċedenti ta’ 5 snin;

(b)

ir-rapport dwar in-newtralità klimatika jkun ġie vverifikat bħala sodisfaċenti f’konformità mar-Regolament ta’ Implimentazzjoni (UE) 2018/2067 u l-verifikatur ikun ikkonferma li l-istadji importanti u l-miri stabbiliti fil-pjan tan-newtralità klimatika jkunu ntlaħqu għall-perjodu rilevanti ta’ 5 snin;

(c)	ir-rapport verifikat dwar in-newtralità klimatika jikkonforma mal-Artikolu 3b.

Artikolu 3d

Kwoti addizzjonali ta’ 30 % għat-tisħin distrettwali

1. Sabiex jiżdied l-għadd annwali preliminari ta’ kwoti tal-emissjonijiet bi 30 % f’konformità mal-Artikolu 22b(3) tar-Regolament Delegat (UE) 2019/331, l-operaturi għandhom jippreżentaw lill-awtorità kompetenti prova dokumentarja tal-impenn legali għall-investiment imsemmi fl-Artikolu 22b(3), l-ewwel subparagrafu, il-punt (b), tar-Regolament Delegat (UE) 2019/331, u prova dokumentarja li l-investiment iwassal għal tnaqqis sinifikanti fl-emissjonijiet qabel l-2030.

2. L-ewwel darba li l-operaturi jistgħu jippreżentaw l-evidenza msemmija fil-paragrafu 1 hija sal-31 ta’ Marzu 2026, flimkien mar-rapport verifikat dwar in-newtralità klimatika. Meta l-kundizzjonijiet stabbiliti fl-Artikolu 22b(3) tar-Regolament Delegat (UE) 2019/331 jiġu ssodisfati fis-snin sussegwenti, l-operatur għandu jippreżenta l-evidenza msemmija fil-paragrafu 1 sal-31 ta’ Marzu tas-sena rilevanti flimkien mar-rapport annwali verifikat dwar il-livell tal-attività.

B’deroga mill-ewwel subparagrafu, l-awtorità kompetenti tista’ tistabbilixxi skadenza aktar bikrija għat-tressiq tal-evidenza u tar-rapport verifikat dwar in-newtralità klimatika.

3. L-awtorità kompetenti għandha tivvaluta l-evidenza msemmija fil-paragrafu 1 u r-rapport verifikat dwar in-newtralità klimatika. Abbażi ta’ dik il-valutazzjoni, l-awtorità kompetenti għandha tiddeċiedi jekk il-kundizzjonijiet għaż-żieda tal-għadd annwali preliminari ta’ kwoti tal-emissjonijiet stabbiliti fl-Artikolu 22b(3) tar-Regolament Delegat (UE) 2019/331 ġewx issodisfati.

4. Sabiex juri li l-kundizzjoni stabbilita fl-Artikolu 22b(3), l-ewwel subparagrafu, il-punt (e), tar-Regolament Delegat (UE) 2019/331 hija ssodisfata, l-operatur għandu jipprovdi l-evidenza kollha li ġejja lill-awtorità kompetenti:

(a)

li l-operatur ikun ippreżenta rapport verifikat dwar in-newtralità klimatika sal-31 ta’ Marzu 2026, jew sal-iskadenza preċedenti stabbilita mill-awtorità kompetenti, fir-rigward tal-perjodu sal-31 ta’ Diċembru 2025, u sal-31 ta’ Marzu ta’ kull 5ħames sena minn hemm ’il quddiem fir-rigward tal-perjodu preċedenti ta’ 5 snin;

(b)

li r-rapport dwar in-newtralità klimatika jkun ġie vverifikat bħala sodisfaċenti f’konformità mar-Regolament ta’ Implimentazzjoni (UE) 2018/2067 u l-verifikatur ikun ikkonferma li l-istadji importanti u l-miri stabbiliti fil-pjan tan-newtralità klimatika jkunu ntlaħqu għall-perjodu rilevanti ta’ 5 snin;

(c)	li r-rapport verifikat dwar in-newtralità klimatika jikkonforma mal-Artikolu 3b.

5. Meta l-awtorità kompetenti tkun ħadet id-deċiżjoni msemmija fil-paragrafu 3 matul il-perjodu ta’ allokazzjoni, l-operatur għandu jirċievi, fis-sena li fiha l-awtorità kompetenti tkun ħadet dik id-deċiżjoni, 30 % ta’ kwoti addizzjonali għal kull waħda mis-snin preċedenti fil-perjodu ta’ allokazzjoni. Jekk wara s-sena li fiha l-awtorità kompetenti tkun ħadet id-deċiżjoni msemmija fil-paragrafu 3, ikun għad fadal snin fil-perjodu ta’ allokazzjoni rilevanti, il-kwoti addizzjonali ta’ 30 % għandhom jiżdiedu mal-għadd annwali preliminari ta’ kwoti tal-emissjonijiet li għandhom jiġu allokati f’konformità mal-Artikolu 22b(3) tar-Regolament Delegat (UE) 2019/331.

6. Il-kwoti addizzjonali ta’ 30 % ma għandhomx jibqgħu jiġu żborżati jekk l-awtorità kompetenti jew il-korp nazzjonali ta’ akkreditazzjoni jkun stabbilixxa li r-rapport dwar in-newtralità klimatika ma jkunx ġie vverifikat f’konformità mar-Regolament ta’ Implimentazzjoni (UE) 2018/2067.

7. L-operatur għandu jirritorna l-kwoti addizzjonali ta’ 30 % mingħajr dewmien fi kwalunkwe wieħed mill-każijiet li ġejjin:

(a)	l-ilħuq tal-miri u tal-istadji importanti msemmija fl-Artikolu 10b(4), it-tielet subparagrafu, il-punt (b), tad-Direttiva 2003/87/KE ma jkunx ikkonfermat mill-verifika mwettqa f’konformità mal-Artikolu 10b(4), ir-raba’ subparagrafu, ta’ dik id-Direttiva;

(b)	valur ta’ investiment ekwivalenti għall-valur ta’ dik l-allokazzjoni addizzjonali bla ħlas ma jkunx ġie investit biex jitnaqqsu b’mod sinifikanti l-emissjonijiet qabel l-2030 f’konformità mal-Artikolu 10b(4), it-tieni subparagrafu, tad-Direttiva 2003/87/KE.

8. Jekk l-operatur ma jirritornax il-kwoti addizzjonali ta’ 30 % skont il-paragrafu 7, l-awtorità kompetenti għandha titlob lill-amministratur tar-reġistru nazzjonali biex ma jibqax iqassam l-allokazzjoni tal-kwoti mingħajr ħlas lil dak l-operatur sakemm jiġu rritornati l-kwoti addizzjonali ta’ 30 % mill-operatur. L-Istati Membri għandhom jinfurmaw lill-Kummissjoni bi kwalunkwe talba bħal din.”

;

(4)

L-Artikolu 5 huwa emendat kif ġej:

(a)

il-paragrafu 1 huwa sostitwit b’dan li ġej:

“1. Kull sena l-awtorità kompetenti għandha tqabbel il-livell ta’ attività medju ta’ kull subinstallazzjoni, iddeterminat f’konformità mal-Artikolu 4, mal-livell ta’ attività storiku li jkun intuża inizjalment għad-determinazzjoni tal-allokazzjoni bla ħlas. Meta l-valur assolut tad-differenza bejn il-livell ta’ attività medju u l-livell ta’ attività storiku ta’ dik is-subinstallazzjoni jkun aktar minn 15 % ta’ dak il-livell ta’ attività storiku, l-allokazzjoni bla ħlas tal-kwoti lil dik l-installazzjoni għandha tiġi aġġustata. Dak l-aġġustament għandu japplika mis-sena ta’ wara s-sentejn kalendarji użati għad-determinazzjoni tal-livell ta’ attività medju u jsir billi tiżdied jew titnaqqas l-allokazzjoni bla ħlas għas-subinstallazzjoni rilevanti bil-bidla perċentwali eżatta fil-livell ta’ attività medju meta mqabbel mal-livell ta’ attività storiku inizjalment użat biex tiġi ddeterminata l-allokazzjoni bla ħlas.

Għas-subinstallazzjonijiet ta’ parametru referenzjarju tas-sħana, is-subinstallazzjonijiet ta’ parametru referenzjarju tal-fjuwil u s-subinstallazzjonijiet ta’ emissjonijiet minn proċess, l-aġġustament imsemmi fl-ewwel subparagrafu għandu jkun ibbażat fuq il-medja tal-livell ta’ attività mistenni. L-aġġustamenti għal kull waħda minn dawk is-subinstallazzjonijiet għandhom isiru biss jekk il-valur assolut tal-aġġustament ikun aktar minn 15 %.”

;

(b)

jiddaħħal il-paragrafu li ġej:

“1a. Għall-fini tal-paragrafu 1, it-tieni subparagrafu, u meta l-valur tad-differenza msemmija fil-paragrafu 1, l-ewwel subparagrafu, jinqabeż, l-operatur għandu jattribwixxi l-ammonti rilevanti tal-emissjonijiet tas-sħana, tal-fjuwil u minn proċess għal kull prodott rilevanti f’konformità mal-metodoloġija stabbilita fl-Anness I, bl-applikazzjoni tal-istess metodi bħal dawk għall-attribuzzjoni tad-data lis-subinstallazzjonijiet kif stabbilit fit-Taqsima 3.2 tal-Anness VII tar-Regolament Delegat (UE) 2019/331. L-operatur għandu jiddeskrivi l-metodoloġiji applikati fil-pjan tal-metodoloġija tal-monitoraġġ kif approvat f’konformità mal-Artikolu 6 ta’ dak ir-Regolament.”

;

(c)

il-paragrafu 2 huwa sostitwit b’dan li ġej:

“2. Meta jkun sar aġġustament f’konformità mal-paragrafu 1 matul perjodu ta’ allokazzjoni, aġġustamenti ulterjuri jistgħu jsiru biss jekk il-valur assolut tad-differenza bejn il-livell ta’ attività medju u l-livell ta’ attività storiku ta’ dik is-subinstallazzjoni, jaqbeż l-eqreb intervall ta’ 5 %, lil hinn mill-bidla ta’ 15 %, li kkawża l-aġġustament preċedenti għall-allokazzjoni bla ħlas lil dik l-installazzjoni, billi tiżdied jew titnaqqas l-allokazzjoni bla ħlas għas-subinstallazzjoni rilevanti bil-bidla perċentwali eżatta fil-livell ta’ attività medju meta mqabbel mal-livell ta’ attività storiku inizjalment użat biex tiġi ddeterminata l-allokazzjoni bla ħlas.

;

(d)

il-paragrafu 4 huwa sostitwit b’dan li ġej:

“4. Jekk subinstallazzjoni ma għadhiex operattiva, ma għandhiex tkun intitolata għall-allokazzjoni bla ħlas għall-bqija tas-sena kalendarja wara l-jum tal-waqfien tal-operazzjonijiet, fuq bażi prorata, u l-allokazzjoni bla ħlas ta’ dik is-subinstallazzjoni għandha tiġi stabbilita għal żero mis-sena ta’ wara l-waqfien tal-operazzjonijiet.”

;

(5)

L-Artikolu 6 huwa emendat kif ġej:

(a)	il-paragrafi 1, 2 u 3 jitħassru;

(b)

il-paragrafu 4 huwa sostitwit b’dan li ġej:

“4. Meta r-rapport dwar il-livell ta’ attività ppreżentat skont l-Artikolu 3 jindika li l-medja mobbli ta’ sentejn ta’ parametru elenkat fl-Artikolu 16(5), fl-Artikolu 19, 20, jew 21 tar-Regolament Delegat (UE) 2019/331, għajr il-livelli ta’ attività, tkun inbidlet b’aktar minn 15 % għal subinstallazzjoni, meta mqabbla mal-valur użat biex jiġi ddeterminat il-livell inizjali ta’ allokazzjoni bla ħlas, l-allokazzjoni bla ħlas tal-kwoti lil dik l-installazzjoni għandha tiġi aġġustata, mis-sena ta’ wara s-sentejn użati għad-determinazzjoni tal-bidla tal-parametru.

Meta jkun sar aġġustament f’konformità mal-ewwel subparagrafu matul perjodu ta’ allokazzjoni, aġġustamenti ulterjuri għal parametru jistgħu jsiru biss jekk il-valur assolut tal-medja mobbli tal-parametru rilevanti meta mqabbel mal-valur użat biex jiġi ddeterminat il-livell inizjali ta’ allokazzjoni bla ħlas, jaqbeż l-eqreb intervall ta’ 5 %, lil hinn mill-bidla ta’ 15 %, li kkawża l-aġġustament preċedenti għall-allokazzjoni bla ħlas lil dik l-installazzjoni, billi tiżdied jew titnaqqas l-allokazzjoni bla ħlas għas-subinstallazzjoni rilevanti skont il-bidla perċentwali eżatta ta’ dak it-tqabbil.

Jekk iż-żieda jew it-tnaqqis tal-medja mobbli tas-sentejn kalendarji preċedenti tal-parametru rilevanti ma jibqgħux jaqbżu 15 % meta mqabbla mal-valur użat biex jiġi ddeterminat il-livell inizjali ta’ allokazzjoni bla ħlas ta’ subinstallazzjoni, l-allokazzjoni bla ħlas tal-kwoti lil dik is-subinstallazzjoni għandha tkun ugwali għall-valur użat biex jiġi ddeterminat il-livell inizjali ta’ allokazzjoni bla ħlas, mis-sena ta’ wara s-sentejn kalendarji użati għad-determinazzjoni tal-medja mobbli.”

;

(6)

jiddaħħlu l-Artikoli li ġejjin:

“Artikolu 6a

Livell limitu assolut għall-aġġustamenti

L-aġġustament għall-allokazzjoni bla ħlas tal-kwoti lil installazzjoni skont l-Artikolu 5(1), (2) u (3) u l-Artikolu 6 għandu jsir biss jekk l-aġġustament tal-ammont preliminari annwali tal-kwoti tal-emissjonijiet allokati bla ħlas lis-subinstallazzjoni jkun mill-inqas 300 kwota tal-emissjonijiet fl-aggregat.

Artikolu 6b

Preżentazzjoni tar-referenzi lill-Kummissjoni

L-awtoritajiet kompetenti għandhom jippreżentaw lill-Kummissjoni l-informazzjoni stabbilita fl-Artikolu 3(2) mir-rapporti kollha dwar il-livell tal-attività ppreżentati f’konformità mal-Artikolu 3(1) u (3), mingħajr dewmien żejjed malli jiġu vvalutati r-rapporti.”

;

(7)	it-test stabbilit fl-Anness I ta’ dan ir-Regolament jiżdied bħala l-Anness I;

(8)	it-test stabbilit fl-Anness II ta’ dan ir-Regolament jiżdied bħala l-Anness II.

Artikolu 2

Fl-Artikolu 3(2) tar-Regolament ta’ Implimentazzjoni (UE) 2019/1842, it-tieni subparagrafu huwa sostitwit b’dan li ġej:

“L-awtorità kompetenti tista’ titlob lill-operaturi jirrappurtaw ukoll kwalunkwe wieħed mill-parametri addizzjonali inklużi fl-Anness IV tar-Regolament Delegat (UE) 2019/331 fir-rapport dwar il-livell tal-attività msemmi fil-paragrafu 1.”.

Artikolu 3

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan għandu japplika għall-allokazzjonijiet relatati mal-perjodu mill-1 ta’ Jannar 2026.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-16 ta’ April 2025.

Għall-Kummissjoni

Il-President

Ursula VON DER LEYEN

(1) ĠU L 275, 25.10.2003, p. 32, ELI: http://data.europa.eu/eli/dir/2003/87/oj.

(2) Id-Direttiva (UE) 2023/959 tal-Parlament Ewropew u tal-Kunsill tal-10 ta’ Mejju 2023 li temenda d-Direttiva 2003/87/KE li tistabbilixxi sistema għall-iskambju ta’ kwoti ta’ emissjonijiet ta’ gassijiet serra ġewwa l-Unjoni u d-Deċiżjoni (UE) 2015/1814 dwar l-istabbiliment u l-funzjonament ta’ riżerva tal-istabbiltà tas-suq għas-sistema għall-iskambju ta’ kwoti tal-emissjonijiet tal-gassijiet serra tal-Unjoni (ĠU L 130, 16.5.2023, p. 134, ELI: http://data.europa.eu/eli/dir/2023/959/oj).

(3) Ir-Regolament (UE) 2021/1119 tal-Parlament Ewropew u tal-Kunsill tat-30 ta’ Ġunju 2021 li jistabbilixxi l-qafas biex tinkiseb in-newtralità klimatika u li jemenda r-Regolamenti (KE) Nru 401/2009 u (UE) 2018/1999 (“il-Liġi Ewropea dwar il-Klima”) (ĠU L 243, 9.7.2021, p. 1, ELI: http://data.europa.eu/eli/reg/2021/1119/oj).

(4) Ir-Regolament Delegat tal-Kummissjoni (UE) 2019/331 tad-19 ta’ Diċembru 2018 li jiddetermina regoli tranżizzjonali għall-Unjoni kollha għall-allokazzjoni armonizzata bla ħlas tal-kwoti tal-emissjonijiet skont l-Artikolu 10a tad-Direttiva 2003/87/KE tal-Parlament Ewropew u tal-Kunsill (ĠU L 59, 27.2.2019, p. 8, ELI: http://data.europa.eu/eli/reg_del/2019/331/oj).

(5) Ir-Regolament Delegat tal-Kummissjoni (UE) 2024/873 tat-30 ta’ Jannar 2024 li jemenda r-Regolament Delegat (UE) 2019/331 fir-rigward ta’ regoli tranżizzjonali għall-Unjoni kollha għall-allokazzjoni armonizzata bla ħlas tal-kwoti tal-emissjonijiet (ĠU L, 2024/873, 4.4.2024, ELI: http://data.europa.eu/eli/reg_del/2024/873/oj).

(6) Ir-Regolament ta’ Implimentazzjoni tal-Kummissjoni (UE) 2019/1842 tal-31 ta’ Ottubru 2019 li jistabbilixxi regoli għall-applikazzjoni tad-Direttiva 2003/87/KE tal-Parlament Ewropew u tal-Kunsill fir-rigward ta’ arranġamenti ulterjuri għall-aġġustamenti għall-allokazzjoni bla ħlas tal-kwoti tal-emissjonijiet minħabba bidliet fil-livell tal-attività (ĠU L 282, 4.11.2019, p. 20, ELI: http://data.europa.eu/eli/reg_impl/2019/1842/oj).

(7) Ir-Regolament ta’ Implimentazzjoni tal-Kummissjoni (UE) 2018/2067 tad-19 ta’ Diċembru 2018 dwar il-verifika tad-data u l-akkreditament tal-verifikaturi skont id-Direttiva 2003/87/KE tal-Parlament Ewropew u tal-Kunsill (ĠU L 334, 31.12.2018, p. 94, ELI: http://data.europa.eu/eli/reg_impl/2018/2067/oj).

(8) Id-Direttiva 2012/27/UE tal-Parlament Ewropew u tal-Kunsill tal-25 ta’ Ottubru 2012 dwar l-effiċjenza fl-enerġija, li temenda d-Direttivi 2009/125/KE u 2010/30/UE u li tħassar id-Direttivi 2004/8/KE u 2006/32/KE (ĠU L 315, 14.11.2012, p. 1, ELI: http://data.europa.eu/eli/dir/2012/27/oj).

ALexpected,Y	:	il-livell ta’ attività mistennija tas-subinstallazzjoni fis-sena Y.
HistEffi	:	l-effiċjenza medja storika fl-użu tal-enerġija jew l-effiċjenza medja storika fil-gassijiet serra (GHG) għal kull prodott i prodott fl-installazzjoni koperta minn kull kodiċi PRODCOM tas-subinstallazzjoni skont il-lista msemmija fl-Artikolu 1 tar-Regolament ta’ Implimentazzjoni tal-Kummissjoni (UE) 2022/2552 (1).

ProdLeveli,Y	:	il-livell ta’ produzzjoni ta’ kull prodott i prodott fl-installazzjoni fis-sena Y.
ALremaining,Y	:	l-ammonti li jifdal tal-livell ta’ attività matul is-sena Y, li mhumiex relatati mal-produzzjoni tal-prodotti msemmija hawn fuq, inkluż l-ammonti tal-livell tal-attività relatata mal-esportazzjoni tas-sħana jew il-produzzjoni ta’ prodotti ġodda li ma ġewx prodotti fix-xenarju ta’ referenza.