(1)

Fl-20 ta’ Ġunju 2018, il-Kummissjoni adottat ir-Regolament ta’ Implimentazzjoni (UE) 2018/886 (2) li jipprevedi l-applikazzjoni ta’ dazji doganali addizzjonali fuq l-importazzjonijiet fl-Unjoni ta’ ċerti prodotti li joriġinaw mill-Istati Uniti tal-Amerka (“l-Istati Uniti”).

(2)

Fis-7 ta’ April 2020, il-Kummissjoni adottat ir-Regolament ta’ Implimentazzjoni (UE) 2020/502 (3) li jipprevedi l-applikazzjoni ta’ dazji doganali addizzjonali fuq l-importazzjonijiet fl-Unjoni ta’ ċerti prodotti li joriġinaw fl-Istati Uniti.

(3)

Id-dazji doganali addizzjonali imposti bir-Regolament ta’ Implimentazzjoni (UE) 2018/886 u bir-Regolament ta’ Implimentazzjoni (UE) 2020/502 kellhom l-għan li jikkontrobilanċjaw il-miżuri ta’ salvagwardja fil-forma ta’ dazji doganali addizzjonali li l-Istati Uniti kienu introduċew abbażi tat-Taqsima 232 tal-Att dwar l-Espansjoni tal-Kummerċ tal-1962 tal-Istati Uniti fuq l-importazzjonijiet ta’ prodotti speċifikati tal-azzar u tal-aluminju li joriġinaw mill-Unjoni, b’effett mill-1 ta’ Ġunju 2018, u fuq l-importazzjonijiet ta’ prodotti derivattivi tal-azzar u tal-aluminju li joriġinaw mill-Unjoni, b’effett mit-8 ta’ Frar 2020.

(4)

Fit-18 ta’ Diċembru 2023, il-Kummissjoni adottat ir-Regolament ta’ Implimentazzjoni (UE) 2023/2882 li jissospendi, sal-31 ta’ Marzu 2025, id-dazji ad valorem addizzjonali imposti bir-Regolamenti ta’ Implimentazzjoni (UE) 2018/886 u (UE) 2020/502 (4).

(5)

Fl-10 ta’ Frar 2025, l-Istati Uniti introduċew mill-ġdid il-miżuri ta’ salvagwardja tagħhom fil-forma ta’ dazji doganali addizzjonali fuq l-importazzjonijiet ta’ prodotti tal-azzar u tal-aluminju u ta’ prodotti derivattivi tal-azzar u tal-aluminju li joriġinaw, fost oħrajn, mill-Unjoni, fil-livelli inizjali ta’ 25 % u 10 % ad valorem, rispettivament, b’effett mit-12 ta’ Marzu 2025 (5).

(6)

Jeħtieġ li l-Unjoni tikkalibra l-kamp ta’ applikazzjoni tad-drittijiet tagħha ta’ riekwilibriju skont il-GATT 1994, sabiex tqis l-iżviluppi tal-imgħoddi u dawk imħabbra tar-relazzjoni kummerċjali bejn l-Unjoni u l-Istati Uniti.

(7)

Għalhekk huwa meħtieġ li s-sospensjoni li għaddejja tiġi estiża għal perjodu qasir ieħor sabiex jiġu pprovduti fost oħrajn opportunitajiet addizzjonali għall-kooperazzjoni mal-Istati Uniti, inkluż bil-ħsieb li tinstab soluzzjoni għall-kontroversja dwar it-tariffi rispettivi u qabel ma d-dazji doganali jibdew jiġu applikati mill-ġdid mill-15 ta’ April 2025.

(8)

Għaldaqstant, ir-Regolament ta’ Implimentazzjoni (UE) 2023/2882 jenħtieġ li jiġi emendat kif xieraq.

(9)

Dan ir-Regolament huwa mingħajr preġudizzju għall-pożizzjoni tal-Unjoni li l-miżuri ta’ salvagwardja mill-Istati Uniti jibqgħu inkompatibbli mal-Ftehim tad-WTO, u indipendenti minnha.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat dwar l-Ostakli għall-Kummerċ, stabbilit bir-Regolament (UE) 2015/1843 tal-Parlament Ewropew u tal-Kunsill (6),

1.

Fl-Artikolu 1, il-“31 ta’ Marzu 2025” hija sostitwita bl-“14 ta’ April 2025”.

2.

Fl-Artikolu 2, il-“31 ta’ Marzu 2025” hija sostitwita bl-“14 ta’ April 2025”.