“Il-Kummissjoni għandha tkun responsabbli għall-abbozzar, l-adozzjoni u l-pubblikazzjoni f’Il-Ġurnal Uffiċjali tal-Unjoni Ewropea tas-sejħa miftuħa għall-kandidati f’konformità mal-Artikolu 14(3) tar-Regolament (UE) 2017/1939. Il-Kummissjoni għandha tikkonsulta lill-Parlament Ewropew u lill-Kunsill dwar l-abbozz tas-sejħa miftuħa għall-kandidati, qabel l-adozzjoni tagħha, fil-livell xieraq. Malli jirċievi l-applikazzjonijiet tal-kandidati, il-bord tal-għażla għandu janalizza l-applikazzjonijiet fir-rigward tar-rekwiżiti stabbiliti fl-Artikolu 14(2) tar-Regolament (UE) 2017/1939, kif speċifikat ulterjorment mill-Kummissjoni fis-sejħa miftuħa għall-kandidati. Il-kandidati li ma jissodisfawx ir-rekwiżiti ta’ eliġibbiltà għandhom jiġu esklużi mill-passi li jmiss tal-proċedura. Il-bord tal-għażla għandu jikklassifika lill-kandidati li jissodisfaw ir-rekwiżiti skont il-kwalifiki u l-esperjenza tagħhom, abbażi tad-dokumentazzjoni u l-informazzjoni pprovduti fl-applikazzjoni jew mogħtija wara li ssir talba skont ir-Regola V. Il-bord tal-għażla għandu jisma’ għadd suffiċjenti ta’ kandidati minn fost l-ogħla klassifikati sabiex ikun jista’ jistabbilixxi l-lista ristretta msemmija fir-Regola VII.1. Is-seduta ta’ smigħ għandha ssir personalment jew, fuq deċiżjoni motivata tal-bord tal-għażla, jew fuq inizjattiva tiegħu stess jew fuq talba tal-kandidat, permezz ta’ vidjokonferenza. Qabel ma l-bord tal-għażla jiddeċiedi fuq inizjattiva tiegħu stess li jwettaq seduta ta’ smigħ permezz ta’ vidjokonferenza, huwa għandu jħalli lill-kandidat jesprimi l-fehmiet tiegħu.”.