REGOLAMENT TA’ IMPLIMENTAZZJONI TAL-KUMMISSJONI (UE) 2025/648

tat-2 ta’ April 2025

dwar l-emendar tar-Regolament ta’ Implimentazzjoni (UE) 2015/2378 fir-rigward tal-formoli standard u l-formati kompjuterizzati li għandhom jintużaw għall-iskambju awtomatiku obbligatorju ta’ informazzjoni b’rabta mad-Direttiva tal-Kunsill 2011/16/UE kif emendata bid-Direttiva tal-Kunsill (UE) 2021/514 u l-lista tad-data statistika li għandha tiġi pprovduta mill-Istati Membri għall-finijiet tal-evalwazzjoni tad-Direttiva tal-Kunsill 2011/16/UE kif emendata bid-Direttiva tal-Kunsill (UE) 2021/514

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 2011/16/UE tal-15 ta’ Frar 2011 dwar il-kooperazzjoni amministrattiva fil-qasam tat-tassazzjoni u li tħassar id-Direttiva 77/779/KEE (1), u b’mod partikolari l-Artikolu 20(4) u l-Artikolu 23(4) tagħha,

Billi:

(1)

Id-Direttiva tal-Kunsill (UE) 2021/514 (2) emendat id-Direttiva 2011/16/UE biex ittejjeb id-dispożizzjonijiet ta’ din tal-aħħar marbuta mal-forom kollha ta’ skambji ta’ informazzjoni u kooperazzjoni amministrattiva u biex tipprevedi skambju awtomatiku obbligatorju ta’ informazzjoni li jkunu rrapportaw l-operaturi tal-pjattaformi.

(2)	Ir-Regolament ta’ Implimentazzjoni tal-Kummissjoni (UE) 2022/1467 (3) imbagħad emenda r-Regolament ta’ Implimentazzjoni (UE) 2015/2378 (4) biex jirrifletti xi wħud minn dawk l-emendi.

(3)

Filwaqt li r-Regolament ta’ Implimentazzjoni (UE) 2015/2378, kif emendat bir-Regolament ta’ Implimentazzjoni (UE) 2022/1467, stabbilixxa lista tad-data statistika li għandha tiġi pprovduta mill-Istati Membri lill-Kummissjoni dwar l-iskambju awtomatiku obbligatorju ta’ informazzjoni li jkunu rrapportaw l-operaturi tal-pjattaformi, dan ma speċifikax sa meta jenħtieġ li tiġi pprovduta dik l-informazzjoni. Huwa għalhekk meħtieġ li tiġi speċifikata d-data sa meta dik id-data statistika jenħtieġ li tiġi pprovduta lill-Kummissjoni.

(4)

Biex jiġi mmonitorjat it-twettiq tal-awditi konġunti fl-Istati Membri skont l-Artikolu 12a tad-Direttiva 2011/16/UE kif emendata bid-Direttiva (UE) 2021/514, huwa meħtieġ ukoll li tiġi aġġornata d-data statistika meħtieġa għall-forom kollha ta’ kooperazzjoni amministrattiva għajr l-iskambju awtomatiku obbligatorju ta’ informazzjoni.

(5)	Għalhekk jenħtieġ li r-Regolament ta’ Implimentazzjoni (UE) 2015/2378 jiġi emendat kif xieraq.

(6)	Il-Kontrollur Ewropew għall-Protezzjoni tad-Data ġie kkonsultat dwar il-miżuri previsti f’dan ir-Regolament f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (5).

(7)	Il-miżuri previsti f’dan ir-Regolament huma skont l-opinjoni tal-Kumitat dwar il-kooperazzjoni amministrattiva għat-tassazzjoni,

ADOTTAT DAN IR-REGOLAMENT:

Artikolu 1

Ir-Regolament ta’ Implimentazzjoni (UE) 2015/2378 huwa emendat kif ġej:

(1)

fl-Artikolu 2d, jiżdied il-paragrafu 4 li ġej:

“4. Qabel l-1 ta’ April ta’ kull sena, l-Istati Membri għandhom jikkomunikaw lill-Kummissjoni, permezz ta’ mezzi elettroniċi, id-data statistika relatata mal-iskambju awtomatiku obbligatorju ta’ informazzjoni f’konformità mal-lista stabbilita fl-Anness XV.”

;

(2)	L-Anness IX huwa emendat f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-20 jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-2 ta’ April 2025.

Għall-Kummissjoni

Il-President

Ursula VON DER LEYEN

(1) ĠU L 64, 11.3.2011, p. 1, ELI: http://data.europa.eu/eli/dir/2011/16/oj.

(2) Id-Direttiva tal-Kunsill (UE) 2021/514 tat-22 ta’ Marzu 2021 li temenda d-Direttiva 2011/16/UE dwar il-kooperazzjoni amministrattiva fil-qasam tat-tassazzjoni (ĠU L 104, 25.3.2021, p. 1, ELI: http://data.europa.eu/eli/dir/2021/514/oj).

(3) Ir-Regolament ta’ Implimentazzjoni tal-Kummissjoni (UE) 2022/1467 tal-5 ta’ Settembru 2022 li jemenda r-Regolament ta’ Implimentazzjoni (UE) 2015/2378 fir-rigward tal-formoli standard u l-formati kompjuterizzati li għandhom jintużaw b’rabta mad-Direttiva tal-Kunsill 2011/16/UE u l-lista ta’ data statistika li għandha tiġi pprovduta mill-Istati Membri għall-finijiet tal-evalwazzjoni ta’ dik id-Direttiva (ĠU L 231, 6.9.2022, p. 36, ELI: http://data.europa.eu/eli/reg_impl/2022/1467/oj).

(4) Ir-Regolament ta’ Implimentazzjoni tal-Kummissjoni (UE) 2015/2378 tal-15 ta’ Diċembru 2015 li jistabbilixxi regoli dettaljati għall-implimentazzjoni ta’ ċerti dispożizzjonijiet tad-Direttiva tal-Kunsill 2011/16/UE dwar il-kooperazzjoni amministrattiva fil-qasam tat-tassazzjoni u li jħassar ir-Regolament ta’ Implimentazzjoni (UE) Nru 1156/2012 (ĠU L 332, 18.12.2015, p. 19, ELI: http://data.europa.eu/eli/reg_impl/2015/2378/oj).

(5) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39, ELI: http://data.europa.eu/eli/reg/2018/1725/oj).

ANNESS

Fl-Anness IX tar-Regolament ta’ Implimentazzjoni (UE) 2015/2378, il-Parti B hija sostitwita b’li ġej:

“—

Parti B: L-istatistika għal kull Stat Membru dwar forom oħra ta’ kooperazzjoni amministrattiva

—

dwar il-preżenza fl-uffiċċji amministrattivi u l-parteċipazzjoni f’indaġnijiet amministrattivi (l-Artikolu 11 tad-Direttiva 2011/16/UE)

—	L-għadd ta’ preżenzi li jidħlu fl-uffiċċji amministrattivi u ta’ parteċipazzjoni f’indaġnijiet amministrattivi

—	L-għadd ta’ preżenzi li ħerġin fl-uffiċċji amministrattivi u ta’ parteċipazzjoni f’indaġnijiet amministrattivi

—

dwar il-kontrolli simultanji (l-Artikolu 12 tad-Direttiva 2011/16/UE)

—	L-għadd ta’ kontrolli simultanji mibdijin mill-Istat Membru

—	L-għadd ta’ kontrolli simultanji li l-Istat Membru ħa sehem fihom

—

dwar l-awditi konġunti (l-Artikolu 12 tad-Direttiva 2011/16/UE)

—	L-għadd ta’ awditi konġunti mibdijin mill-Istat Membru

—	L-għadd ta’ awditi konġunti li l-Istat Membru ħa sehem fihom

—

dwar it-talbiet għal notifika (l-Artikolu 13 tad-Direttiva 2011/16/UE)

—	L-għadd ta’ talbiet għal notifika mibgħuta

—	L-għadd ta’ talbiet għal notifika riċevuti

—

dwar il-feedback (l-Artikolu 14 tad-Direttiva 2011/16/UE)

—	L-għadd ta’ talbiet għal feedback mibgħuta

—	L-għadd ta’ feedback riċevut

—	L-għadd ta’ talbiet għal feedback riċevuti

—	L-għadd ta’ feedback mibgħut”.