(1)

L-Artikolu 20(2) tar-Regolament (UE) 2023/1804 jipprevedi li sal-14 ta’ April 2025, l-operaturi ta’ punti tal-irriċarġjar u punti ta’ riforniment aċċessibbli għall-pubbliku għall-fjuwils alternattivi, jew, f’konformità mal-arranġamenti bejniethom, is-sidien ta’ dawk il-punti, għandhom jiżguraw id-disponibbiltà ta’ data statika u data dinamika dwar l-infrastruttura tal-fjuwils alternattivi mħaddma minnhom, jew servizzi marbuta b’mod inerenti ma’ tali infrastruttura li huma jipprovdu jew li jesternalizzaw, mingħajr ħlas.

(2)

Sabiex jiġi pprovdut aċċess liberu u mingħajr restrizzjonijiet għal dik id-data u jkun jista’ jsir skambju awtomatizzat u uniformi tad-data bejn l-operaturi ta’ punti tal-irriċarġjar u tar-riforniment aċċessibbli għall-pubbliku u l-utenti tad-data, l-Artikolu 20(3) tar-Regolament (UE) 2023/1804 jirrikjedi li kull operatur ta’ punti tal-irriċarġjar u tar-riforniment aċċessibbli għall-pubbliku għall-fjuwils alternattivi, jew, f’konformità mal-arranġamenti bejniethom, is-sid ta’ dawk il-punti, jistabbilixxi interfaċċa għall-programm ta’ applikazzjoni (API).

(3)

Dan ir-Regolament jistabbilixxi rekwiżiti tekniċi komuni għal interfaċċa komuni għall-programm ta’ applikazzjoni biex tippermetti skambju awtomatizzat u uniformi tad-data bejn l-operaturi ta’ punti tal-irriċarġjar u punti tar-riforniment aċċessibbli għall-pubbliku għall-fjuwils alternattivi u l-utenti tad-data.

(4)

L-operaturi ta’ punti tal-irriċarġjar u tar-riforniment aċċessibbli għall-pubbliku jew is-sidien ta’ dawk il-punti jistgħu jistabbilixxu l-APIs huma stess jew jużaw soluzzjoni protokoll għall-API żviluppata mill-atturi rilevanti tas-suq, inklużi fornituri terzi. Jenħtieġ li tali soluzzjonijiet protokoll għall-API jikkonformaw mar-rekwiżiti tekniċi komuni għall-API stabbiliti f’dan ir-Regolament.

(5)

Sabiex jiġu promossi b’mod speċifiku l-interoperabbiltà, il-konverġenza u trasparenza akbar tal-APIs abbażi ta’ soluzzjonijiet protokoll żviluppati minn atturi rilevanti tas-suq għall-punti tal-irriċarġjar u l-punti ta’ riforniment differenti aċċessibbli għall-pubbliku għall-fjuwils alternattivi, huwa meħtieġ li jiġu introdotti għadd ta’ rekwiżiti tekniċi komuni. Dawk ir-rekwiżiti tekniċi jenħtieġ li jiżguraw minimu ta’ kompatibbiltà, skalabbiltà, robustezza u sigurtà biex ikun jista’ jsir skambju awtomatizzat u uniformi tad-data bejn l-operaturi ta’ punti tal-irriċarġjar u punti ta’ riforniment aċċessibbli għall-pubbliku għall-fjuwils alternattivi u l-utenti tad-data madwar l-Unjoni.

(6)

Sabiex jiġi żgurat l-iżvilupp prevedibbli tal-APIs għall-operaturi ta’ punti tal-irriċarġjar u tar-riforniment aċċessibbli għall-pubbliku jew għas-sidien ta’ dawk il-punti, ir-rekwiżiti tekniċi komuni jenħtieġ li jiżguraw li s-soluzzjonijiet protokoll ikun fihom informazzjoni dwar l-APIs abbażi ta’ pjan ta’ żvilupp tekniku dettaljat li jkun aċċessibbli għall-pubbliku, pereżempju fuq sit web iddedikat, b’dettalji operazzjonali rilevanti bl-informazzjoni dwar l-implimentazzjoni teknika u l-kontinwità maż-żmien. Dan ir-rekwiżit jenħtieġ li jiffaċilita wkoll l-aċċess tal-operaturi interessati tal-infrastruttura tal-fjuwils alternattivi għal dokumentazzjoni aġġornata aċċessibbli għall-pubbliku u linji gwida għall-integrazzjoni u għall-użu bla xkiel mill-utenti tad-data, inkluż taħriġ komprensiv u materjali ta’ appoġġ tekniku.

(7)

Ir-rekwiżiti tekniċi komuni għal API komuni jenħtieġ li jiffaċilitaw ukoll il-ħidma teknika tal-Istati Membri meta jagħmlu d-data dwar l-infrastruttura tal-fjuwils alternattivi aċċessibbli bħala data miftuħa permezz tal-NAPs f’konformità mal-Artikolu 20(4) tar-Regolament (UE) 2023/1804 u d-Direttiva 2010/40/UE tal-Parlament Ewropew u tal-Kunsill (2) u f’konformità mal-ispeċifikazzjonijiet addizzjonali fir-Regolamenti Delegati adottati abbażi ta’ dik id-Direttiva.

(8)

Sabiex jiġu antiċipati l-iżviluppi futuri u l-implimentazzjoni tal-Artikolu 20(5) tar-Regolament (UE) 2023/1804, jenħtieġ li r-rekwiżiti tekniċi komuni għal API komuni jikkontribwixxu wkoll għall-istruttura teknika tal-punt ta’ aċċess komuni Ewropew li l-Kummissjoni trid tistabbilixxi sal-31 ta’ Diċembru 2026. Jenħtieġ li dawn ir-rekwiżiti tekniċi komuni jgħinu fl-operat futur tal-punt ta’ aċċess komuni Ewropew sabiex l-utenti tad-data jkunu jistgħu jaċċessaw faċilment id-data u jqabblu l-informazzjoni dwar il-karatteristiċi tal-infrastruttura tal-fjuwils alternattivi, bħall-prezz, l-aċċessibbiltà, id-disponibbiltà jew il-kapaċità tal-enerġija.

(9)

L-Artikolu 20(8) tar-Regolament (UE) 2023/1804 jirrikjedi li l-atti delegati u ta’ implimentazzjoni msemmija fil-paragrafi 6 u 7 jipprevedu perjodi tranżizzjonali raġonevoli qabel ma d-dispożizzjonijiet li jinsabu fihom, jew l-emendi tagħhom, isiru vinkolanti fuq l-operaturi jew is-sidien ta’ punti tal-iċċarġjar u punti ta’ riforniment għall-fjuwils alternattivi. Għalhekk, dan ir-Regolament jenħtieġ li japplika mill-14 ta’ April 2025 peress li dik id-data tikkoinċidi mad-data tal-applikazzjoni tal-Artikolu 20(2) tar-Regolament (UE) 2023/1804,