REGOLAMENT TA’ IMPLIMENTAZZJONI TAL-KUMMISSJONI (UE) 2025/627

tat-28 ta’ Marzu 2025

li jistabbilixxi, skont ir-Regolament (UE) 2024/573 tal-Parlament Ewropew u tal-Kunsill, ir-rekwiżiti minimi għaċ-ċertifikati ta’ persuni fiżiċi u l-kundizzjonijiet għar-rikonoxximent reċiproku ta’ tali ċertifikati, fir-rigward tal-installazzjoni, il-manutenzjoni jew is-servizzjar, it-tiswija jew id-dekummissjonar ta’ kommutatur elettriku stazzjonarju li fih gassijiet fluworurati b’effett ta’ serra u l-irkupru ta’ gassijiet fluworurati b’effett ta’ serra minn kommutatur elettriku stazzjonarju u li jħassar ir-Regolament ta’ Implimentazzjoni tal-Kummissjoni (UE) 2015/2066

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2024/573 tal-Parlament Ewropew u tal-Kunsill tas-7 ta’ Frar 2024 dwar gassijiet fluworurati b’effett ta’ serra, li jemenda d-Direttiva (UE) 2019/1937 u li jħassar ir-Regolament (UE) Nru 517/2014 (1), u b’mod partikolari l-Artikolu 10(8) tiegħu,

Billi:

(1)	Ir-Regolament (UE) 2024/573 jinkludi obbligi dwar iċ-ċertifikazzjoni ta’ persuni fiżiċi u ġuridiċi biex iwettqu ċerti attivitajiet li jinvolvu gassijiet fluworurati b’effett ta’ serra jew alternattivi rilevanti għall-gassijiet fluworurati b’effett ta’ serra.

(2)

Ir-Regolament (UE) 2024/573 introduċa regoli ġodda dwar l-installazzjoni, il-manutenzjoni jew is-servizzjar, it-tiswija jew id-dekummissjonar ta’ kommutatur elettriku stazzjonarju li fih gassijiet fluworurati b’effett ta’ serra u l-irkupru ta’ gassijiet fluworurati b’effett ta’ serra minn kommutatur elettriku stazzjonarju. Ir-regoli l-ġodda jkopru b’mod partikolari, kamp ta’ applikazzjoni estiż ta’ sustanzi.

(3)

Għalhekk, skont l-Artikolu 10 tar-Regolament (UE) 2024/573, jeħtieġ jiġu aġġornati r-rekwiżiti minimi għaċ-ċertifikazzjoni ta’ persuni fiżiċi fir-rigward tal-kamp ta’ applikazzjoni tas-sustanzi u l-ħiliet u l-għarfien li għandhom jiġu koperti u li jiġu speċifikati r-regoli għaċ-ċertifikazzjoni u l-kundizzjonijiet għar-rikonoxximent reċiproku taċ-ċertifikati.

(4)	Ir-Regolament (UE) 2024/573 issostitwixxa r-Regolament (UE) Nru 517/2014 tal-Parlament Ewropew u tal-Kunsill (2). Għalhekk, jenħtieġ li r-Regolament ta’ Implimentazzjoni tal-Kummissjoni (UE) 2015/2066 (3) jitħassar.

(5)	Il-miżuri previsti f’dan ir-Regolament huma f’konformità mal-opinjoni tal-Kumitat dwar il-gassijiet fluworurati b’effett ta’ serra, stabbiliti bl-Artikolu 34(1) tar-Regolament (UE) 2024/573,

ADOTTAT DAN IR-REGOLAMENT:

Artikolu 1

Kamp ta’ applikazzjoni

1. Dan ir-Regolament għandu japplika għal persuni fiżiċi li jwettqu l-attivitajiet li ġejjin:

(a)	l-installazzjoni, il-manutenzjoni, is-servizzjar, it-tiswija u d-dekummissjonar ta’ kommutatur elettriku stazzjonarju li fih il-gassijiet fluworurati b’effett ta’ serra elenkati fl-Anness I, fit-Taqsima 1 tal-Anness II u fl-Anness III tar-Regolament (UE) 2024/573;

(b)	l-irkupru tal-gassijiet fluworurati b’effett ta’ serra mill-kommutatur elettriku stazzjonarju.

2. Dan ir-Regolament ma għandux japplika għal kwalunkwe attività ta’ manifattura mwettqa fis-siti tal-manifattur għall-kommutatur elettriku stazzjonarju.

Artikolu 2

Ċertifikazzjoni għal persuni fiżiċi

1. Il-persuni fiżiċi li jwettqu l-attivitajiet imsemmija fl-Artikolu 1(1) għandu jkollhom ċertifikat kif imsemmi fl-Artikolu 3.

2. Il-persuni fiżiċi li jwettqu waħda mill-attivitajiet imsemmija fl-Artikolu 1(1) ma għandhomx ikunu soġġetti għar-rekwiżit stabbilit fil-paragrafu 1 ta’ dan l-Artikolu, dment li jissodisfaw il-kundizzjonijiet li ġejjin:

(a)	ikunu rreġistrati f’kors tat-taħriġ biex jiksbu ċertifikat li jkopri l-attività rilevanti; u

(b)	jwettqu l-attività taħt is-superviżjoni ta’ persuna li għandha ċertifikat li jkopri dik l-attività u li hija responsabbli b’mod sħiħ għat-twettiq tal-attività b’mod korrett.

Id-deroga prevista fl-ewwel subparagrafu għandha tapplika tul il-perjodi li fihom jitwettqu l-attivitajiet imsemmija fl-Artikolu 1(1), u li b’kollox ma għandhomx jaqbżu l-24 xahar.

Artikolu 3

Ċertifikazzjoni ta’ persuni fiżiċi

1. Korp taċ-ċertifikazzjoni kif imsemmi fl-Artikolu 4 għandu joħroġ ċertifikat lill-persuni fiżiċi li jkunu għaddew minn eżami teoretiku u prattiku li jkopri l-ħiliet minimi u l-għarfien stipulati fl-Anness I, li jkun organizzat minn korp tal-evalwazzjoni kif imsemmi fl-Artikolu 5.

2. Iċ-ċertifikat għandu jinkludi tal-inqas dan li ġej:

(a)	l-isem tal-korp taċ-ċertifikazzjoni, l-isem sħiħ tad-detentur tiegħu, numru taċ-ċertifikat, u d-data tal-iskadenza, jekk ikun hemm;

(b)	l-attivitajiet li jista’ jwettaq id-detentur taċ-ċertifikat;

(c)	id-data tal-ħruġ u l-firma tal-emittent.

3. L-Istati Membri jistgħu jippermettu lill-korpi taċ-ċertifikazzjoni jeżentaw lill-applikanti mir-rekwiżit li jgħaddu mill-eżami msemmi fil-paragrafu 1, meta l-applikant preċedentement ikun kiseb ħiliet u għarfien ekwivalenti għal dawk elenkati fl-Anness I.

L-Istati Membri jistgħu jippermettu lill-korpi taċ-ċertifikazzjoni jirrikjedu li l-applikanti jgħaddu biss minn eżami supplimentari, meta l-ħiliet u l-għarfien miksuba preċedentement tal-applikant ikunu parzjalment koperti skont dawk elenkati fl-Anness I.

Artikolu 4

Korp ta’ ċertifikazzjoni

1. L-Istati Membri għandhom jispeċifikaw fid-dritt nazzjonali, jew jaħtru l-awtorità jew l-awtoritajiet kompetenti, biex jaħtru korp taċ-ċertifikazzjoni awtorizzat li joħroġ iċ-ċertifikati lill-persuni fiżiċi involuti f’waħda jew aktar mill-attivitajiet imsemmija fl-Artikolu 1(1).

Il-korp taċ-ċertifikazzjoni għandu jkun imparzjali fit-twettiq tal-attivitajiet tiegħu.

2. Il-korp taċ-ċertifikazzjoni għandu jistabbilixxi u japplika proċeduri għall-ħruġ, għall-waqfien u għall-irtirar taċ-ċertifikati.

3. Il-korp taċ-ċertifikazzjoni għandu jżomm rekords li jippermettu l-verifika tal-istatus ta’ persuna fiżika ċċertifikata. Ir-rekords għandhom juru li l-proċess ta’ ċertifikazzjoni twettaq b’mod effettiv. Ir-rekords għandhom jinżammu għal perjodu minimu ta’ 5 snin.

Artikolu 5

Korp tal-evalwazzjoni

1. Korp tal-evalwazzjoni maħtur f’kull Stat Membru għandu jorganizza l-eżamijiet għall-persuni fiżiċi msemmija fl-Artikolu 1. Korp taċ-ċertifikazzjoni kif imsemmi fl-Artikolu 4 jista’ jikkwalifika wkoll bħala korp tal-evalwazzjoni. Il-korp tal-evalwazzjoni għandu jkun indipendenti u imparzjali fit-twettiq tal-attivitajiet tiegħu.

2. L-eżamijiet għandhom ikunu ppjanati u strutturati b’tali mod li jiġi żgurat li l-ħiliet u l-għarfien minimi stabbiliti fl-Anness I ikunu koperti. Il-korp tal-evalwazzjoni għandu jipprovdi l-post tal-eżamijiet li jiżgura s-sikurezza tal-applikanti.

3. Il-korp tal-evalwazzjoni għandu jadotta l-proċeduri tar-rappurtar u jżomm ir-rekords biex ikun hemm dokumentazzjoni dwar l-individwu u dwar ir-riżultati ġenerali tal-evalwazzjoni.

4. Il-korp tal-evalwazzjoni għandu jiżgura li l-eżaminaturi li jkunu ntgħażlu għal xi eżami jkollhom għarfien xieraq tal-metodi u tad-dokumenti rilevanti għall-eżami, kif ukoll kompetenza xierqa fil-qasam li se jiġi eżaminat. Huwa għandu jiżgura wkoll li t-tagħmir, l-għodda u l-materjali meħtieġa għall-eżamijiet prattiċi jkunu disponibbli.

Artikolu 6

Kundizzjonijiet għar-rikonoxximent reċiproku

1. Ir-rikonoxximent reċiproku taċ-ċertifikati bejn l-Istati Membri għandu japplika biss għaċ-ċertifikati maħruġa f’konformità mal-Artikolu 3, għall-attivitajiet speċifikati f’dawn iċ-ċertifikati.

2. L-Istati Membri ma għandhom jimponu l-ebda evalwazzjoni jew tip ieħor ta’ proċeduri ta’ valutazzjoni jew rekwiżiti amministrattivi sproporzjonati fuq id-detenturi ta’ ċertifikati maħruġa minn Stat Membru ieħor biex jiġu rikonoxxuti dawk iċ-ċertifikati jew biex jippermettu l-aċċess għall-impjieg lid-detenturi ta’ dawk iċ-ċertifikati għall-attivitajiet speċifikati fihom.

3. L-Istati Membri jistgħu jirrikjedu li d-detenturi ta’ ċertifikati maħruġa fi Stat Membru ieħor jipprovdu traduzzjoni taċ-ċertifikat b’lingwa uffiċjali oħra tal-Unjoni.

Artikolu 7

Ċertifikati eżistenti, korsijiet ta’ taħriġ ta’ aġġornament jew proċessi ta’ evalwazzjoni

1. L-Istati Membri għandhom jiżguraw li l-korsijiet ta’ taħriġ ta’ aġġornament jew il-proċessi ta’ evalwazzjoni kif meħtieġ skont l-Artikolu 10(9) tar-Regolament (UE) 2024/573 jagħtu prova tal-għarfien u l-ħiliet prattiċi u teoretiċi tal-persuni fiżiċi ċċertifikati speċifikati fl-Anness I ta’ dan ir-Regolament.

2. Skont l-Artikolu 10(9) tar-Regolament (UE) 2024/573, l-Istati Membri għandhom jiżguraw li d-detenturi taċ-ċertifikati eżistenti skont l-Artikolu 3 tar-Regolament ta’ Implimentazzjoni tal-Kummissjoni (UE) 2015/2066 jitħallew ikomplu jużaw dawk iċ-ċertifikati biss jekk jaġġornaw l-għarfien u l-ħiliet tagħhom sal-livell tal-għarfien u l-ħiliet meħtieġa għaċ-ċertifikat kif imsemmi fl-Artikolu 3 ta’ dan ir-Regolament u speċifikat fl-Anness I tiegħu.

Artikolu 8

Tħassir

1. Ir-Regolament (UE) 2015/2066 jitħassar.

2. Ir-referenzi għar-Regolament imħassar għandhom jinftiehmu bħala referenzi għal dan ir-Regolament u għandhom jinqraw f’konformità mat-tabella ta’ korrelazzjoni fl-Anness II.

Artikolu 9

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-28 ta’ Marzu 2025.

Għall-Kummissjoni

Il-President

Ursula VON DER LEYEN

(1) ĠU L, 2024/573, 20.2.2024, ELI: http://data.europa.eu/eli/reg/2024/573/oj.

(2) Ir-Regolament (UE) Nru 517/2014 tal-Parlament Ewropew u tal-Kunsill tas-16 ta’ April 2014 dwar gassijiet fluworurati b’effett ta’ serra u li jħassar ir-Regolament (KE) Nru 842/2006 (ĠU L 150, 20.5.2014, p. 195, ELI: http://data.europa.eu/eli/reg/2014/517/oj).

(3) Ir-Regolament ta’ Implimentazzjoni tal-Kummissjoni (UE) 2015/2066 tas-17 ta’ Novembru 2015 li jistabbilixxi, skont ir-Regolament (UE) Nru 517/2014 tal-Parlament Ewropew u tal-Kunsill, ir-rekwiżiti minimi u l-kundizzjonijiet għall-għarfien reċiproku għaċ-ċertifikazzjoni ta’ persuni fiżiċi li jwettqu l-installazzjoni, is-servisjar, il-manutenzjoni, it-tiswija jew id-dekummissjonar ta’ tagħmir tat-tqassim tal-elettriku li fih gassijiet fluworurati b’effett ta’ serra jew l-irkupru ta’ gassijiet fluworurati b’effett ta’ serra minn tagħmir għat-tqassim tal-elettriku stazzjonarju (ĠU L 301, 18.11.2015, p. 22, ELI: http://data.europa.eu/eli/reg_impl/2015/2066/oj).

ANNESS I

Ir-rekwiżiti minimi fir-rigward tal-ħiliet u l-għarfien li għandhom jiġu koperti mill-korpi tal-evalwazzjoni

L-eżami msemmi fl-Artikolu 5 għandu jinkludi dan li ġej:

(a)	eżami teoretiku b’mistoqsija waħda jew iktar dwar dik il-ħila jew dak l-għarfien, kif muri b’(T) fil-kolonna msejħa “Tip ta’ Test”;

(b)

test prattiku li matulu l-applikant għandu jwettaq il-biċċa xogħol korrispondenti bil-materjal, l-għodda u t-tagħmir relevanti, kif muri b’(P) fil-kolonna msejħa “Tip ta’ Test”.

Nru	Għarfien u Ħiliet Minimi	Tip ta’ Test
1.	Fehim bażiku tal-leġiżlazzjoni applikabbli tal-UE u dik nazzjonali, b’mod partikolari r-Regolament dwar il-gassijiet F. Għarfien bażiku tal-kwistjonijiet ambjentali rilevanti (it-tibdil fil-klima, l-objettivi klimatiċi tal-UE, il-Ftehim ta’ Pariġi, l-emenda ta’ Kigali għall-Protokoll ta’ Montreal, il-potenzjal ta’ tisħin globali tal-gassijiet fluworurati b’effett ta’ serra, l-impatti tas-sustanzi per- u polifluworoalkilati (PFAS, per- and polyfluoroalkyl substances))	T
2.	Karatteristiċi fiżiċi, kimiċi u ambjentali tal-gassijiet/tat-taħlitiet ta’ gassijiet ta’ iżolazzjoni u ta’ estinzjoni tal-ark użati f’kommutatur elettriku	T
3.	Fehim tad-disinn ta’ kommutatur elettriku inkluż it-teknoloġiji differenti ta’ iżolazzjoni u ta’ estinzjoni tal-ark	T
4.	Gassijiet użati għall-iżolazzjoni u għall-estinzjoni tal-ark f’kommutatur elettriku u l-proċeduri ta’ trattament sikuri u speċifiċi tagħhom	T
5.	Ittestjar tal-kwalità u tal-proporzjonijiet ta’ taħlit tal-gassijiet/tat-taħlitiet ta’ gassijiet ta’ iżolazzjoni u ta’ estinzjoni tal-ark skont l-istandards industrijali rilevanti, id-detezzjoni tal-prodotti ta’ dekompożizzjoni u tal-kontaminazzjonijiet	T, P
6.	Ħżin u trasportazzjoni tal-gassijiet/tat-taħlitiet ta’ gassijiet ta’ iżolazzjoni u ta’ estinzjoni tal-ark	T
7.	Tħaddim tat-tagħmir ta’ rkupru għal gassijiet/taħlitiet ta’ gassijiet differenti ta’ iżolazzjoni u ta’ estinzjoni tal-ark	T, P
8.	Irkupru tal-gassijiet/tat-taħlitiet ta’ gassijiet ta’ iżolazzjoni u ta’ estinzjoni tal-ark u purifikazzjoni/reklamazzjoni tal-gassijiet/tat-taħlitiet ta’ gass irkuprati, jekk applikabbli	T, P
9.	Ħidma fuq kompartimenti tal-gass miftuħa	T, P
10.	Użu mill-ġdid u rimi ta’ gassijiet/taħlitiet ta’ gassijiet differenti ta’ iżolazzjoni u ta’ estinzjoni tal-ark u kategoriji differenti ta’ użu mill-ġdid	T
11.	Tnaqqis tat-tnixxijiet u metodu tat-twettiq tal-kontrolli ta’ tnixxija	T, P
12.	Prodotti sekondarji newtralizzanti tal-gassijiet/tat-taħlitiet ta’ gassijiet ta’ iżolazzjoni u ta’ estinzjoni tal-ark, jekk applikabbli	T
13.	Monitoraġġ tal-gassijiet/tat-taħlitiet ta’ gassijiet ta’ iżolazzjoni u ta’ estinzjoni tal-ark, u l-obbligi xierqa tar-reġistrazzjoni tad-data skont il-leġiżlazzjoni nazzjonali jew dik tal-Unjoni, jew il-ftehimiet internazzjonali	T
14.	Tħaddim tas-sistemi ta’ tħaffir issiġillati li jżommu l-gass milli jnixxi, jekk meħtieġ	T, P

ANNESS II

Tabella ta’ korrelazzjoni

Regolament (UE) 2015/2066	Dan ir-Regolament
Artikolu 1	Artikolu 1
Artikolu 2(1)	Artikolu 2(1)
Artikolu 2(2)	Artikolu 2(2)
Artikolu 2(3)	Artikolu 2(3)
Artikolu 3(1)	Artikolu 3(1)
Artikolu 3(2)	Artikolu 3(2)
Artikolu 3(3)	—
Artikolu 4(1)	Artikolu 4(1)
Artikolu 4(2)	Artikolu 4(2)
Artikolu 4(3)	Artikolu 4(3)
Artikolu 5(1)	Artikolu 5(1)
Artikolu 5(2)	Artikolu 5(2)
Artikolu 5(3)	Artikolu 5(3)
Artikolu 5(4)	Artikolu 5(4)
Artikolu 6(1)	—
Artikolu 6(2)	—
Artikolu 7(1)	Artikolu 7(1)
Artikolu 7(2)	—
Artikolu 8	Artikolu 8
Artikolu 9	Artikolu 9