1.   Sabiex jinkisbu l-objettivi politiċi msemmija fl-Artikolu 2, il-mandat għandu jkun li:

(a)	jippromwovi l-koordinazzjoni politika ġenerali tal-Unjoni fl-Asja Ċentrali u jgħin biex tinkiseb konsistenza fl-azzjonijiet esterni tal-Unjoni fir-reġjun;

(b)

jikkontribwixxi għall-implimentazzjoni tal-Istrateġija tal-Unjoni għal sħubija aktar b’saħħitha mal-Asja Ċentrali, ikkomplementat minn konklużjonijiet rilevanti tal-Kunsill u minn rapporti ta’ progress sussegwenti dwar l-implimentazzjoni tal-Istrateġija tal-Unjoni għall-Asja Ċentrali, u tal-Pjan Direzzjonali Konġunt għall-Approfondiment tar-Rabtiet mal-UE u l-Asja Ċentrali,

(c)	jagħmel rakkomandazzjonijiet u jirrapporta lura lill-korpi rilevanti tal-Kunsill fuq bażi regolari;

(d)	jgħin lill-Kunsill ikompli jiżviluppa politika komprensiva dwar l-Asja Ċentrali;

(e)	jappoġġa l-organizzazzjoni regolari ta’ laqgħat politiċi ta’ livell għoli bejn l-Unjoni u l-pajjiżi tal-Asja Ċentrali;

(f)	isegwi mill-qrib l-iżviluppi politiċi fl-Asja Ċentrali billi jiżviluppa u jżomm kuntatti mill-qrib mal-gvernijiet, il-parlamenti, il-ġudikatura, is-soċjetà ċivili u l-mezzi ta’ komunikazzjoni tal-massa;

(g)	iħeġġeġ lill-Każakistan, il-Kirgistan, it-Taġikistan, it-Turkmenistan u l-Użbekistan biex jikkooperaw fi kwistjonijiet reġjonali ta’ interess komuni;

(h)	jiżviluppa kuntatti u kooperazzjoni adatti mal-atturi interessati ewlenin fir-reġjun, u mal-organizzazzjonijiet reġjonali u internazzjonali rilevanti kollha, b’kont meħud tal-preżenza dejjem tikber ta’ pajjiżi terzi fir-reġjun;

(i)

jikkontribwixxi għall-implimentazzjoni tal-politika tal-Unjoni dwar id-drittijiet tal-bniedem fir-reġjun, f’kooperazzjoni mar-RSUE għad-Drittijiet tal-Bniedem, inkluż il-Linji Gwida tal-Unjoni dwar id-drittijiet tal-bniedem u b’mod partikolari l-Linji Gwida tal-Unjoni dwar it-tfal u l-konflitti armati u l-Linji Gwida tal-Unjoni dwar il-vjolenza fuq in-nisa u l-bniet u l-ġlieda kontra kull forma ta’ diskriminazzjoni kontrihom, u għall-implimentazzjoni tal-politika tal-Unjoni fir-rigward tar-Riżoluzzjoni 1325 (2000) tal-Kunsill tas-Sigurtà tan-Nazzjonijiet Uniti dwar in-Nisa, il-Paċi u s-Sigurtà, inkluż permezz ta’ monitoraġġ u rapporti dwar l-iżviluppi kif ukoll billi jfassal rakkomandazzjonijiet f’dak ir-rigward;

(j)	jikkontribwixxi, f’kooperazzjoni mill-qrib mal-OSKE u n-NU, għall-prevenzjoni u r-riżoluzzjoni ta’ konflitti billi jiżviluppa kuntatti mal-awtoritajiet u ma’ atturi lokali oħra bħal organizzazzjonijiet mhux governattivi, partiti politiċi, minoranzi, gruppi reliġjużi u l-mexxejja tagħhom;

(k)

jagħti kontribut għall-formulazzjoni ta’ aspetti tal-Politika Estera u ta’ Sigurtà Komuni, fir-rigward tal-Asja Ċentrali, li huma relatati ma’: konnettività, inkluż l-istrateġija “Global Gateway”; is-sigurtà tal-enerġija; is-sigurtà tal-fruntieri; il-ġlieda kontra l-kriminalità serja, inkluż narkotiċi u traffikar ta’ bnedmin; u l-ġestjoni tar-riżorsi tal-ilma, l-ambjent u t-tibdil fil-klima;;

(l)	jippromwovi s-sigurtà reġjonali fl-Asja Ċentrali fil-kuntest ġeopolitiku usa’, inkluż il-gwerra ta’ aggressjoni tar-Russja kontra l-Ukrajna u l-iżviluppi fl-Afganistan;

(m)	jappoġġa l-attivitajiet ta’ sensibilizzazzjoni u l-inizjattivi tal-Unjoni fil-pajjiżi tal-Asja Ċentrali, inkluż dwar il-prevenzjoni taċ-ċirkomvenzjoni ta’ miżuri restrittivi;

(n)	jappoġġa l-attivitajiet ta’ sensibilizzazzjoni u l-inizjattivi tal-Unjoni fil-pajjiżi tal-Asja Ċentrali rigward ir-rispett għall-indipendenza, is-sovranità u l-integrità territorjali tal-Istati Membri, inkluż fil-qafas tal-fora reġjonali u internazzjonali kollha.

2.   Ir-RSUE għandu jappoġġa l-ħidma tar-Rappreżentant Għoli u jissorvelja b’mod ġenerali l-attivitajiet kollha tal-Unjoni fir-reġjun.

1.   Ir-RSUE għandu jkun responsabbli għall-implimentazzjoni tal-mandat, u jaġixxi taħt l-awtorità tar-Rappreżentant Għoli.

2.   Il-KPS għandu jżomm kuntatt privileġġat mar-RSUE u għandu jkun il-punt ta’ kuntatt primarju tar-RSUE fi ħdan il-Kunsill. Il-KPS għandu jipprovdi gwida strateġika u direzzjoni politika lir-RSUE fil-qafas tal-mandat, mingħajr preġudizzju għas-setgħat tar-Rappreżentant Għoli.

3.   Ir-RSUE għandu jaħdem f’koordinazzjoni mill-qrib mad-dipartimenti rilevanti tas-Servizz Ewropew għall-Azzjoni Esterna (SEAE).

1.   L-ammont ta’ referenza finanzjarja maħsub biex ikopri n-nefqa relatata mal-mandat (in-“nefqa”) għall-perjodu mill-1 ta’ Marzu 2025 sat-28 ta’ Frar 2027 għandu jkun ta’ EUR 2 719 777,34.

2.   In-nefqa għandha tiġi amministrata f’konformità mal-proċeduri u r-regoli applikabbli għall-baġit ġenerali tal-Unjoni.

3.   L-amministrazzjoni tan-nefqa għandha tkun soġġetta għal kuntratt bejn ir-RSUE u l-Kummissjoni. Ir-RSUE għandu jagħti rendikont lill-Kummissjoni għal kull nefqa.

1.   Fil-limiti tal-mandat u l-mezzi finanzjarji korrispondenti disponibbli, ir-RSUE għandu jkun responsabbli mill-formazzjoni ta’ tim. It-tim tar-RSUE għandu jinkludi l-kompetenza esperta dwar kwistjonijiet politiċi speċifiċi kif meħtieġ skont il-mandat. Ir-RSUE għandu jżomm lill-Kunsill u lill-Kummissjoni infurmati fil-pront dwar il-kompożizzjoni tat-tim tar-RSUE.

2.   L-Istati Membri, istituzzjonijiet tal-Unjoni u s-SEAE jistgħu jipproponu l-issekondar ta’ persunal biex jaħdem mat-tim tar-RSUE. Is-salarji ta’ tali persunal issekondat għandu jkun kopert mill-Istat Membru ssekondanti, mill-istituzzjoni tal-Unjoni kkonċernata jew mis-SEAE, kif xieraq. Esperti assenjati mill-Istati Membri mal-istituzzjonijiet tal-Unjoni jew mas-SEAE jistgħu wkoll jiġu ssekondati sabiex jaħdmu mat-tim tar-RSUE. Il-persunal internazzjonali kkuntrattat għandu jkollu n-nazzjonalità ta’ Stat Membru.

3.   Il-persunal issekondat kollu għandu jibqa’ taħt l-awtorità amministrattiva tal-Istat Membru ssekondanti, tal-istituzzjoni tal-Unjoni kkonċernata jew tas-SEAE, u għandu jwettaq dmirijietu u jaġixxi fl-interess tal-mandat.

4.   It-tim tar-RSUE għandu jiġi kollokat mad-dipartimenti rilevanti tas-SEAE jew mad-delegazzjonijiet tal-Unjoni sabiex jiġu żgurati l-koerenza u l-konsistenza tal-attivitajiet rispettivi tagħhom.

1.   L-Istati Membri, il-Kummissjoni, is-SEAE u s-Segretarjat Ġenerali tal-Kunsill għandhom jiżguraw li r-RSUE jingħata aċċess għal kwalunkwe informazzjoni rilevanti.

2.   Id-delegazzjonijiet tal-Unjoni u l-Istati Membri, kif adatt, għandhom jipprovdu appoġġ loġistiku għar-RSUE u għall-membri tat-tim tar-RSUE.

1.   Ir-RSUE għandu japplika r-regoli stabbiliti fir-Regolament (KE) Nru 1049/2001 tal-Parlament Ewropew u tal-Kunsill (5). Ir-Rappreżentant Għoli għandha tiddeċiedi dwar ir-regoli ta’ implimentazzjoni rilevanti li jikkonċernaw ir-RSUE.

2.   Ir-RSUE għandu jipproteġi lill-individwi fir-rigward tal-ipproċessar tad-data personali tagħhom f’konformità mar-regoli stabbiliti fir-Regolament (UE) 2018/1725 tal-Parlament Ewropew u tal-Kunsill (6). Ir-Rappreżentant Għoli għandha tiddeċiedi dwar ir-regoli ta’ implimentazzjoni rilevanti li jikkonċernaw ir-RSUE.

1.   Ir-RSUE għandu jikkontribwixxi għall-unità, il-konsistenza u l-effikaċja tal-azzjoni tal-Unjoni u għandu jgħin biex jiġi żgurat li l-istrumenti kollha tal-Unjoni u l-azzjonijiet kollha tal-Istati Membri jkunu impenjati b’mod konsistenti biex jinkisbu l-objettivi politiċi tal-Unjoni. Fejn ikun adatt għandu jitfittex kuntatt mal-Istati Membri. L-attivitajiet tar-RSUE għandhom jiġu kkoordinati ma’ dawk tad-dipartiment ġeografiku rilevanti tas-SEAE u mal-Kummissjoni. Ir-RSUE għandu jipprovdi informazzjoni regolari lill-missjonijiet tal-Istati Membri u lid-delegazzjonijiet tal-Unjoni.

2.   Fuq il-post, l-RSUE għandu jżomm kuntatt mill-qrib mal-Kapijiet tal-Missjonijiet tal-Istati Membri u mal-Kapijiet tad-delegazzjonijiet tal-Unjoni rilevanti. Dawn għandhom jagħmlu kull sforz biex jgħinu lir-RSUE fl-implimentazzjoni tal-mandat. Ir-RSUE għandu wkoll iżomm kuntatt ma’ atturi internazzjonali u reġjonali oħrajn fil-post.