(1)

Ir-Regolament tal-Kummissjoni (UE) Nru 1332/2011 (2) li jistabbilixxi r-rekwiżiti komuni dwar l-użu tal-ispazju tal-ajru u l-proċeduri operattivi għall-evitar ta’ kolliżjonijiet fl-ajru.

(2)

Ir-Regolament (UE) Nru 1332/2011 jirrikjedi li ajruplani bil-magna mħaddma bit-turbini, b’massa tat-tlugħ iċċertifikata massima ta’ iktar minn 5 700 kg, jew li huma awtorizzati li jġorru aktar minn 19-il passiġġier, jiġu mgħammra bil-verżjoni 7.1 tal-loġika għall-evitar ta’ kolliżjonijiet tas-sistema għall-evitar ta’ kolliżjonijiet fl-ajru (ACAS II, Airborne Collision Avoidance System) biex jiġu evitati kolliżjonijiet fl-ajru. Dak ir-rekwiżit japplika wkoll għall-operaturi ta’ ċerti ajruplani rreġistrati f’pajjiż terz iżda ma japplikax għas-sistemi ta’ inġenji tal-ajru mingħajr bdot abbord.

(3)

F’konformità mar-Regolament (UE) Nru 1332/2011, l-inġenji tal-ajru li mhumiex legalment meħtieġa li jkunu mgħammra bl-ACAS II iżda li jkunu mgħammra b’dik is-sistema fuq bażi volontarja, irid ikollhom il-verżjoni 7.1 tal-loġika għall-evitar ta’ kolliżjonijiet.

(4)

Ir-Regolament ta’ Implimentazzjoni tal-Kummissjoni (UE) 2017/373 (3) jistabbilixxi r-rekwiżiti komuni għall-fornituri ta’ servizzi ta’ ġestjoni tat-traffiku tal-ajru/servizzi tan-navigazzjoni bl-ajru u funzjonijiet oħrajn tan-network tal-ġestjoni tat-traffiku tal-ajru għat-traffiku tal-ajru ġenerali u għas-sorveljanza tagħhom.

(5)

Ir-Regolament ta’ Implimentazzjoni (UE) 2017/373 jirrikjedi li l-fornituri ta’ servizzi ta’ komunikazzjoni, navigazzjoni jew sorveljanza juru li l-metodi ta’ ħidma u l-proċeduri operattivi tagħhom ikunu konformi mal-istandards tal-Anness 10 tal-Konvenzjoni dwar l-Avjazzjoni Ċivili Internazzjonali, iffirmata f’Chicago fis-7 ta’ Diċembru 1944 (“il-Konvenzjoni ta’ Chicago”), dwar it-telekomunikazzjoni ajrunawtika sa fejn dawn ikunu rilevanti għall-forniment ta’ servizzi ta’ komunikazzjoni, navigazzjoni jew sorveljanza fl-ispazju tal-ajru kkonċernat.

(6)

L-emenda 91 tal-Istandards Internazzjonali u l-Prattiki Rakkomandati, it-Telekomunikazzjonijiet Ajrunawtiċi - is-Sistemi ta’ Sorveljanza u l-Evitar tal-Kolliżjonijiet (l-Anness 10, il-Volum IV tal-Konvenzjoni ta’ Chicago) introduċiet is-sistema Xa għall-evitar ta’ kolliżjonijiet fl-ajru (ACAS Xa) bħala alternattiva għall-ACAS II bil-verżjoni 7.1 tal-loġika tal-evitar ta’ kolliżjonijiet.

(7)

Skont l-Artikolu 4(1), il-punt (a), tar-Regolament (UE) 2018/1139, ir-rekwiżiti l-ġodda stabbiliti skont dak ir-Regolament iridu jirriflettu l-ogħla livell u l-aqwa prattiki fil-qasam tal-avjazzjoni, u jqisu l-esperjenza tal-avjazzjoni mad-dinja kollha u l-progress xjentifiku u tekniku fl-oqsma rispettivi. Għalhekk, jenħtieġ li r-Regolament (UE) Nru 1332/2011 jiġi emendat biex jippermetti l-aċċess tal-inġenji tal-ajru mgħammra bl-ACAS Xa għall-ispazju tal-ajru tal-SES.

(8)

Skont l-Artikolu 1(2), il-punt (g), tar-Regolament (UE) 2018/1139, ir-regoli l-ġodda stabbiliti skont dak ir-Regolament jenħtieġ li jassistu lill-Istati Membri biex jeżerċitaw id-drittijiet tagħhom u jwettqu l-obbligi tagħhom skont il-Konvenzjoni ta’ Chicago, billi tiġi żgurata interpretazzjoni komuni u implimentazzjoni uniformi u f’waqtha tad-dispożizzjonijiet tagħha. Għalhekk, jenħtieġ li r-Regolament ta’ Implimentazzjoni (UE) 2017/373 jiġi emendat biex jirreferi għall-aħħar dispożizzjonijiet tal-Anness 10 tal-Konvenzjoni ta’ Chicago.

(9)

Il-miżuri previsti f’dan ir-Regolament huma f’konformità mal-opinjoni tal-kumitat stabbilit bl-Artikolu 127 tar-Regolament (UE) 2018/1139,

“(d)

Il-Volum IV dwar is-sistemi ta’ sorveljanza bir-radar u għall-evitar ta’ kolliżjonijiet fil-ħames edizzjoni tiegħu ta’ Lulju 2014, inklużi l-emendi kollha san-Nru 91, b’din tal-aħħar inkluża;”.