(1)

Ir-Regolament (UE) 2016/429 jistabbilixxi regoli speċifiċi għall-mard elenkat f’konformità mal-Artikolu 5(1) tiegħu, u jispeċifika kif dawk ir-regoli jridu jiġu applikati għall-kategoriji differenti tal-mard elenkat. Ir-Regolament (UE) 2016/429 jipprevedi wkoll l-approvazzjoni jew l-irtirar mill-Kummissjoni tal-istatus ta’ ħelsien mill-mard tal-Istati Membri jew taż-żoni jew tal-kompartimenti tagħhom rigward ċertu mard elenkat imsemmi fl-Artikolu 9(1), il-punti (a), (b) u (c), tiegħu. Barra minn hekk, ir-Regolament (UE) 2016/429 jipprevedi li l-Istati Membri jistabbilixxu programmi tal-eradikazzjoni obbligatorji għall-mard elenkat imsemmi fl-Artikolu 9(1), il-punt (b), tiegħu u programmi tal-eradikazzjoni fakultattivi għall-mard elenkat imsemmi fl-Artikolu 9(1), il-punt (c), tiegħu, u li l-Kummissjoni tapprova dawn il-programmi.

(2)

Ir-Regolament Delegat tal-Kummissjoni (UE) 2020/689 (2) jissupplimenta r-Regolament (UE) 2016/429 u jistabbilixxi l-kriterji għall-għoti, għaż-żamma, għas-sospensjoni u għall-irtirar tal-istatus ta’ ħelsien mill-mard għall-Istati Membri jew għaż-żoni jew għall-kompartimenti tagħhom, u r-rekwiżiti għall-approvazzjoni tal-programmi tal-eradikazzjoni għall-Istati Membri jew għaż-żoni jew għall-kompartimenti tagħhom.

(3)

Ir-Regolament ta’ Implimentazzjoni tal-Kummissjoni (UE) 2021/620 (3) jistabbilixxi r-regoli ta’ implimentazzjoni għall-mard elenkat, imsemmi fl-Artikolu 9(1), il-punti (a), (b) u (c), tar-Regolament (UE) 2016/429, tal-annimali, fir-rigward tal-istatus ta’ ħelsien mill-mard u tal-istatus ta’ mingħajr tilqim ta’ ċerti Stati Membri jew taż-żoni jew tal-kompartimenti tagħhom, u l-approvazzjoni tal-programmi tal-eradikazzjoni għal dak il-mard elenkat. B’mod aktar partikolari, dan jelenka fl-Annessi tiegħu, l-Istati Membri jew iż-żoni jew il-kompartimenti tagħhom bi status approvat ta’ ħelsien mill-mard, u bil-programmi tal-eradikazzjoni obbligatorji jew fakultattivi approvati eżistenti. Minħabba s-sitwazzjoni epidemjoloġika li qed tinbidel fl-Unjoni ta’ ċertu mard elenkat, jenħtieġ li jiġu emendati l-Annessi VIII u XI ta’ dak ir-Regolament ta’ Implimentazzjoni.

(4)

It-tieni, fir-rigward tal-infezzjoni bil-virus tal-ilsien blu (is-serotipi 1-24) (infezzjoni bil-BTV), iċ-Ċekja u l-Polonja nnotifikaw lill-Kummissjoni dwar tifqigħat tal-infezzjoni bis-serotip 3 tal-BTV. It-tifqigħat fiċ-Ċekja kienu fiż-żona li għad għandha status ta’ ħelsien mill-mard fir-rigward ta’ dik il-marda u t-tifqigħat fil-Polonja kienu fil-provinċji ta’: dolnośląskie, zachodniopomorskie u warmińsko-mazurskie li jaffettwaw ukoll provinċji oħra. Barra minn hekk, Spanja nnotifikat lill-Kummissjoni dwar tifqigħat ta’ infezzjoni bis-serotip 8 tal-BTV fil-komunità awtonoma ta’ Castilla la Mancha u País Vasco, li jaffettwaw ukoll komunitajiet awtonomi oħra, fiż-żona li għad għandha status ta’ ħelsien mill-mard fir-rigward ta’ dik il-marda. Billi t-territorju kollu tal-Polonja u partijiet mit-territorju taċ-Ċekja u ta’ Spanja għandhom status ta’ ħelsien mill-mard, u huma elenkati fil-Parti I tal-Anness VIII tar-Regolament ta’ Implimentazzjoni (UE) 2021/620, l-approvazzjoni tal-istatus ta’ ħelsien mill-mard mill-infezzjoni bil-BTV jenħtieġ li tiġi rtirata mill-provinċji ta’: dolnośląskie, lubuskie, pomorskie, u zachodniopomorskie u ċerti żoni tal-provinċji ta’ kujawsko-pomorskie, łódzkie, mazowieckie, opolskie, podlaskie, warmińsko-mazurskie u wielkopolskie fil-Polonja, it-territorju kollu taċ-Ċekja u l-komunità awtonoma ta’ País Vasco, il-komunità awtonoma ta’ Navarra, ċerti żoni tal-provinċja ta’ Zaragoza fil-komunità awtonoma ta’ Aragón, ċerti żoni fil-provinċja ta’ Burgos fil-komunità awtonoma ta’ Castilla y León u ċerti żoni fil-provinċja ta’ Guadalajara fil-komunità awtonoma ta’ Castilla-La Mancha fi Spanja. Għalhekk, jenħtieġ li l-entrati għaċ-Ċekja, għall-Polonja u għal Spanja fil-Parti I ta’ dak l-Anness jiġu emendati skont dan.

(5)

Barra minn hekk, Spanja infurmat ukoll lill-Kummissjoni li estendiet l-ambitu territorjali tal-programm tal-eradikazzjoni fakultattiv għall-infezzjoni bil-BTV li diġà ġie approvat għaż-żoni elenkati fil-Parti II tal-Anness VIII tar-Regolament ta’ Implimentazzjoni (UE) 2021/620, biż-żieda tal-komunità awtonoma ta’ País Vasco, il-komunità awtonoma ta’ Navarra, ċerti żoni tal-provinċja ta’ Zaragoza fil-komunità awtonoma ta’ Aragón, ċerti żona tal-provinċja ta’ Burgos fil-komunità awtonoma ta’ Castilla y León u ċerti żoni fil-provinċja ta’ Guadalajara fil-komunità awtonoma ta’ Castilla-La Mancha fi Spanja. Għalhekk, dawk iż-żoni jenħtieġ li jiżdiedu mal-entrata għal Spanja fil-Parti II tal-Anness VIII tar-Regolament ta’ Implimentazzjoni (UE) 2021/620, u tiġi approvata l-emenda proposta tal-programm tal-eradikazzjoni fakultattiv għall-infezzjoni bil-BTV.

(6)

Fir-rigward tal-infezzjoni bl-influwenza avjarja b’patoġeniċità għolja (HPAI), l-awtorità kompetenti tan-Netherlands infurmat lill-Kummissjoni li Verbeek’s poultry international B.V bin-numru tal-approvazzjoni 1122 ma tistax titqies bħala kompartiment ħieles mill-HPAI billi l-kundizzjonijiet għaż-żamma tal-istatus ta’ ħelsien mill-mard ma għadhomx issodisfati. Billi dan il-kompartiment huwa elenkat fl-Anness XI tar-Regolament ta’ Implimentazzjoni (UE) 2021/620 bħala ħieles mill-HPAI, l-istatus ta’ ħelsien mill-HPAI jenħtieġ li jiġi rtirat. Għalhekk, jenħtieġ li l-entrata għan-Netherlands f’dak l-Anness tiġi emendata skont dan.

(7)

Għalhekk jenħtieġ li l-Annessi VIII u XI tar-Regolament ta’ Implimentazzjoni (UE) 2021/620 jiġu emendati skont dan.

(8)

Il-miżuri previsti f’dan ir-Regolament huma f’konformita mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,