(1)

Ir-Regolament ta’ Implimentazzjoni tal-Kummissjoni (UE) 2018/2019 (2), abbażi ta’ valutazzjoni preliminari tar-riskju, jistabbilixxi lista ta’ pjanti, prodotti mill-pjanti u oġġetti oħra ta’ riskju għoli.

(2)

Bħala segwitu tal-valutazzjoni preliminari, fl-Anness tar-Regolament ta’ Implimentazzjoni (UE) 2018/2019 ġew elenkati b’mod proviżorju 34 ġeneru u speċi waħda ta’ pjanti għat-tħawwil li joriġinaw minn pajjiżi terzi, bħala pjanti ta’ riskju għoli. Dik il-lista tinkludi l-ġeneru Betula L.

(3)

Fis-27 ta’ April 2023, ir-Renju Unit (3) ressaq żewġ talbiet lill-Kummissjoni għall-esportazzjoni lejn l-Unjoni ta’ rimja bl-għejun/biċċa rimja għat-tilqim ta’ mhux aktar minn sena tal-Betula pendula b’dijametru massimu ta’ 12 mm; pjanti għat-tħawwil ta’ mhux aktar minn 7 snin tal-Betula pendula u tal-Betula pubescens f’materjal għat-tkabbir, b’dijametru massimu fil-bażi taz-zokk ta’ 40 mm; pjanti bl-għeruq mikxufin ta’ mhux aktar minn 7 snin għat-tħawwil tal-Betula pendula u tal-Betula pubescens, b’dijametru massimu fil-bażi taz-zokk ta’ 40 mm u pjanti għat-tħawwil ta’ mhux aktar minn 15-il sena tal-Betula pendula u tal-Betula pubescens f’materjal għat-tkabbir, b’dijametru massimu fil-bażi taz-zokk ta’ 80 mm (“il-pjanti rilevanti”). Dawk it-talbiet kienu appoġġati mid-dossiers tekniċi rilevanti.

(4)

Fis-26 ta’ Settembru 2024, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskju tal-pjanti rilevanti (4). L-awtorità identifikat il-Entoleuca mammata, il-Meloidogyne fallax u l-Phytophthora ramorum (iżolati mhux tal-UE) u t-Thaumetopoea processionea bħala pesti rilevanti għal dawk il-pjanti, evalwat il-miżuri ta’ mitigazzjoni tar-riskju deskritti fid-dossiers tekniċi u stmat il-probabbiltà tal-ħelsien tal-pjanti rilevanti minn dawk il-pesti.

(5)

Il-Meloidogyne fallax u l-Phytophthora ramorum (iżolati mhux tal-UE) huma elenkati bħala pesti tal-kwarantina fl-Unjoni fl-Anness II tar-Regolament ta’ Implimentazzjoni (UE) 2019/2072 (5), u l-Entoleuca mammata u t-Thaumetopoea processionea huma elenkati bħala pesti tal-kwarantina f’żona protetta fl-Anness III ta’ dak ir-Regolament.

(6)

Abbażi tal-opinjoni tal-Awtorità, ir-riskju fitosanitarju li jirriżulta mill-introduzzjoni tal-pjanti rilevanti fit-territorju tal-Unjoni jitqies li huwa mnaqqas għal livell aċċettabbli, dment li jkun hemm konformità mar-rekwiżiti tal-importazzjoni rispettivi stabbiliti fl-Anness VII tar-Regolament ta’ Implimentazzjoni (UE) 2019/2072.

(7)

Peress li r-riskju fitosanitarju mill-introduzzjoni fit-territorju tal-Unjoni ta’ siġar kbar u qodma tal-Betula pendula u tal-Betula pubescens (ta’ 80 mm u 15-il sena) jitqies li huwa mnaqqas għal livell aċċettabbli, huwa għalhekk iġġustifikat li jiġi konkluż li r-riskju fitosanitarju mill-introduzzjoni fl-Unjoni tal-pjanti kollha għat-tħawwil tal-Betula pendula u tal-Betula pubescens, irrispettivament mid-daqs, mill-età, minn jekk humiex bl-għeruq mikxufin jew f’materjal għat-tkabbir, li joriġinaw mir-Renju Unit, huwa mnaqqas għal livell aċċettabbli.

(8)

Għaldaqstant, jenħtieġ li l-pjanti għat-tħawwil tal-Betula pendula u tal-Betula pubescens li joriġinaw mir-Renju Unit ma jibqgħux jiġu meqjusa bħala pjanti ta’ riskju għoli. Għalhekk, jenħtieġ li jitneħħew mil-lista ta’ pjanti, ta’ prodotti mill-pjanti u ta’ oġġetti oħra ta’ riskju għoli fl-Anness tar-Regolament ta’ Implimentazzjoni (UE) 2018/2019.

(9)

Għaldaqstant, jenħtieġ li r-Regolament ta’ Implimentazzjoni (UE) 2018/2019 jiġi emendat kif xieraq.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,