(1)

L-Eurosistema topera sistemi ta’ pagament skont il-mandat u s-setgħat tagħha stabbiliti fl-Istatut tas-Sistema Ewropea ta’ Banek Ċentrali u tal-Bank Ċentrali Ewropew (minn issa ‘l quddiem l-“Istatut tas-SEBĊ”) – b’mod partikolari r-raba’ inċiż tal-Artikolu 3.1, l-Artikolu 12.1, l-Artikolu 22, flimkien mal-Artikolu 17 – u f’konformità mal-prinċipji ġenerali tal-liġi tal-Unjoni. Fit-twettiq ta’ dan l-Eurosistema tieħu kont debitu tal-Artikolu 2, il-punt (b), tad-Direttiva 98/26/KE tal-Parlament Ewropew u tal-Kunsill (1), kif emendat bl-Artikolu 4 tar-Regolament (UE) 2024/886 tal-Parlament Ewropew u tal-Kunsill (2), li jinkludi l-istituzzjonijiet ta’ pagament u l-istituzzjonijiet tal-flus elettroniċi, (kollettivament imsejħa fornituri ta’ servizzi ta’ pagament mhux bankarji, jew NB-PSPs) fil-lista ta’ istituzzjonijiet eliġibbli, soġġetti għal kundizzjonijiet, biex isiru parteċipanti fis-sistemi ta’ pagament nominati taħt dik id-Direttiva. L-Artikolu 35a tad-Direttiva (UE) 2015/2366 tal-Parlament Ewropew u tal-Kunsill (3), kif imdaħħal bl-Artikolu 3 tar-Regolament (UE) 2024/886, jimponi kundizzjonijiet addizzjonali — meta mqabbla ma’ istituzzjonijiet oħra — li tali NB-PSPs iridu jissodisfaw qabel ma jitolbu l-parteċipazzjoni f’sistemi nominati taħt id-Direttiva 98/26/KE. Fl-aħħar nett, l-Artikolu 10(1) tad-Direttiva (UE) 2015/2366, kif emendat bl-Artikolu 3 tar-Regolament (UE) 2024/886, jippermetti lill-NB-PSPs jiddepożitaw il-fondi tal-klijenti tagħhom għas-salvagwardja f’kont separat f’istituzzjoni ta’ kreditu jew f’bank ċentrali fid-diskrezzjoni ta’ dak il-bank ċentrali.

(2)

L-eliġibbiltà tal-NB-PSPs biex jaċċessaw is-sistemi ta’ pagament operati mill-bank ċentrali tal-Eurosistema għandha l-għan li żżid l-effiċjenza u l-funzjonament bla xkiel tas-settur tal-pagamenti bl-imnut, inkluż, iżda mhux limitat għal, l-iffaċilitar tal-forniment ta’ pagamenti istantanji fiż-żona tal-euro kollha.

(3)

Fl-interess taċ-ċertezza legali u biex tiġi evitata diskriminazzjoni bejn l-NB-PSPs abbażi tal-post tal-istabbiliment, il-banek ċentrali tal-Eurosistema għandhom jieħdu approċċ uniformi rigward l-aċċess mill-NB-PSPs għas-sistemi ta’ pagament kollha operati mill-bank ċentrali tal-Eurosistema u kontijiet tal-bank ċentrali. Il-banek ċentrali tal-Eurosistema għandhom għalhekk japplikaw sett ta’ kriterji mhux diskriminatorji, oġġettivi u bbażati fuq ir-riskju biex jippermettu aċċess dirett min-NB-PSPs għal dawn is-sistemi ta’ pagament operati mill-bank ċentrali tal-Eurosistema. Dan jiżgura li l-aċċess dirett mill-NB-PSPs jippromwovi l-integrità tas-suq u jappoġġja l-kompetizzjoni u l-innovazzjoni fl-ekosistema tas-servizzi ta’ pagament, mingħajr ma joħloq riskji għar-reżiljenza, l-integrità u s-sigurtà tas-sistemi ta’ pagament u għalhekk mingħajr ma jsir sors ta’ riskju sistemiku.

(4)

L-Artikolu 35a(1) tad-Direttiva 2015/2366 jistabbilixxi kundizzjonijiet speċifiċi applikabbli għal NB-PSPs li jixtiequ jipparteċipaw f’sistemi ta’ pagament nominati taħt id-Direttiva 98/26/KE. L-Istati Membri għandhom jiddefinixxu l-proċedura li biha tiġi vvalutata l-konformità tal-NB-PSPs ma’ tali kundizzjonijiet. Mingħajr preġudizzju għal dawn il-proċeduri, huwa importanti li jiġi stabbilit sett komuni ta’ rekwiżiti minimi fil-livell tal-Eurosistema li jkun jeħtieġ li jiġu ssodisfati mill-NB-PSPs li jixtiequ jiksbu aċċess għal sistemi ta’ pagament operati minn bank ċentrali. Dawn ir-rekwiżiti minimi għandhom jiġu riflessi kif xieraq fit-termini u l-kundizzjonijiet tal-ftehim bejn il-banek ċentrali tal-Eurosistema u l-NB-PSPs, u għandhom jinkludu konformità ma’ ċerti rekwiżiti ta’ sigurtà u s-sottomissjoni lill-bank ċentrali tal-Eurosistema rilevanti ta’, fost oħrajn, dikjarazzjonijiet mill-NB-PSP jew l-awtorità nazzjonali rilevanti li jikkonfermaw il-konformità inizjali tiegħu, u wara, it-tkomplija tal-konformità mal-kundizzjonijiet kif stabbiliti fil-liġi nazzjonali li timplimenta l-Artikolu 35a(1) tad-Direttiva 2015/2366, u l-forniment ta’ dokumentazzjoni ta’ sostenn addizzjonali fejn mitlub mill-banek ċentrali tal-Eurosistema.

(5)

Id-Direttiva 98/26/KE u d-Direttiva (UE) 2015/2366 ma jagħtux aċċess awtomatiku lill-NB-PSPs għas-sistemi ta’ pagament tal-Eurosistema li huma operati skont ir-raba’ inċiż tal-Artikolu 3.1 u l-Artikoli 17, 18 u 22 tal-Istatut tas-SEBĊ bħal ma hi s-sistema ta’ ġenerazzjoni ġdida tal-Eurosistema Trans-European Automated Real-time Gross Settlement Express Transfer (TARGET). It-TARGET hija strutturata bħala multipliċità ta’ sistemi ta’ pagament u tipprovdi kontijiet għas-saldu bl-euro fi flus tal-bank ċentrali, u għalhekk għandha rwol essenzjali fit-twettiq ta’ ċerti kompiti bażiċi tal-Eurosistema, inkluża l-promozzjoni tal-operat bla xkiel tas-sistemi ta’ pagament. Il-kriterji ta’ aċċessibbiltà u r-regoli għall-parteċipazzjoni fit-TARGET huma stabbiliti fil-Linja Gwida (UE) 2022/912 tal-Bank Ċentrali Ewropew (BĊE/2022/8) (4).

(6)

L-Eurosistema għandha l-għan li tipprovdi aċċess dirett għat-TARGET lill-parteċipanti eliġibbli kollha. B’riżultat ta’ dan, jenħtieġ li l-NB-PSPs li huma eliġibbli biex jipparteċipaw fit-TARGET ma jibqgħux irreġistrati bħala detenturi ta’ kodiċi ta’ identifikazzjoni tan-negozju (BIC) indirizzabbli jew partijiet aċċessibbli fil-kont proprju tal-banek ċentrali tal-Eurosistema, bl-eċċezzjoni ta’ kont tekniku ta’ sistema ta’ pagament operat minn bank ċentrali fis-sistema ta’ Saldu ta’ Pagament Istantanju tat-TARGET (TIPS).

(7)

Sabiex jiġi minimizzat kwalunkwe tfixkil potenzjali jew impatt negattiv fuq l-ipproċessar tal-pagamenti li jaffettwa lill-utenti finali ladarba ċerti NB-PSPs ma jibqgħux irreġistrati bħala detenturi ta’ BIC indirizzabbli jew partijiet aċċessibbli fil-kont proprju tal-banek ċentrali tal-Eurosistema, huwa meħtieġ perijodu tranżitorju li jippermetti l-migrazzjoni ta’ tali NB-PSPs li huma eliġibbli u li jixtiequ jsiru parteċipanti diretti fit-TARGET. L-NB-PSPs li għalihom japplika dan il-perijodu tranżitorju huma dawk irreġistrati bħala detenturi ta’ BIC indirizzabbli jew partijiet aċċessibbli fil-kont proprju tal-banek ċentrali tal-Eurosistema. It-tul tal-perijodu tranżitorju jkun jeħtieġ li jkun biżżejjed biex jiffaċilita t-tlestija tal-implimentazzjoni amministrattiva u teknika kollha meħtieġa, inklużi l-attivitajiet ta’ ttestjar mill-NB-PSPs flimkien mal-banek ċentrali rilevanti tal-Eurosistema, u biex jippermetti l-migrazzjoni ta’ diversi entitajiet għal mudell ta’ konnessjoni ġdid mingħajr ma jkun hemm piż żejjed bla bżonn fuq kwalunkwe bank ċentrali individwali tal-Eurosistema. Perijodu tranżitorju sal-31 ta’ Diċembru 2025 huwa meqjus raġonevoli u xieraq għal tali implimentazzjoni u għat-tneħħija gradwali tal-konnessjoni eżistenti minn ċerti NB-PSPs għall-ipproċessar tal-pagamenti.

(8)

Iż-żamma mill-NB-PSPs ta’ kontijiet f’sistema ta’ pagament operata minn bank ċentrali tal-Eurosistema, inkluż it-TARGET, filwaqt li hija permissibbli, għandha tkun biss għall-fini tat-tqegħid ta’ fondi biex jiġu ssodisfati l-obbligi ta’ saldu. Għalhekk, il-bilanċ, jew il-parteċipazzjonijiet, f’kontijiet bħal dawn ma għandhomx jaqbżu dak li huwa meħtieġ biex jiġu ssodisfati dawn l-obbligi. It-tqegħid ta’ fondi li jaqbżu dak l-ammont f’kontijiet miżmuma f’sistema ta’ pagament operata minn bank ċentrali tal-Eurosistema jikkontradixxi l-għan tiegħu. Minn perspettiva ta’ prezz u stabbiltà finanzjarja, huwa importanti li tali kontijiet jintużaw għal skopijiet ta’ pagament u ma jintużawx ħażin għal finijiet ta’ salvagwardja. Konsegwentement, għandu japplika ammont massimu limitu ta’ parteċipazzjoni u dan ir-rekwiżit kif ukoll id-dispożizzjonijiet dwar il-kalkolu tiegħu għandu jiġi rifless kif xieraq fit-termini u l-kundizzjonijiet tal-ftehimiet bejn il-banek ċentrali tal-Eurosistema u l-NB-PSPs.

(9)

Fir-rigward ta’ kontijiet fit-TARGET, il-kalkolu ta’ kontijiet ta’ parteċipazzjoni massima għandu b’mod ġenerali jagħti attenzjoni xierqa għal obbligi ta’ saldu li joriġinaw minn parteċipazzjoni diretta ta’ NP-PSP f’sistemi ta’ pagament anċillari b’saldu fit-TARGET, u l-ammont massimu limitu ta’ parteċipazzjoni għandu ġeneralment japplika wkoll għal parteċipazzjonijiet ta’ NB-PSP fuq il-kontijiet tekniċi tat-TARGET ta’ tali sistemi anċillari. Madanakollu, l-iskarsità ta’ data affidabbli dwar il-bilanċi miżmuma min-NB-PSP f’kontijiet tat-TARGET għall-finijiiet ta’ proċeduri ta’ sistema anċillari speċifika tostakola l-monitoraġġ ta’ kuljum effettiv li banek ċentrali tal-Eurosistema għandhom iwettqu biex jiddentifikaw użu ħażin min-NB-PSPs ta’ tali kontijiet biż-żamma ta’ likwidità eċċessiva. B’mod speċifiku, il-banek ċentrali tal-Eurosistema m’għandhomx viżibbiltà fuq il-bilanċi miżmuma min-NB-PSPs fuq: (a) kontijiet tat-TARGET għall-finijiet tas-sistema tal-proċedura ta’ saldu D ta’ sistema anċillari għas-saldu f’ħin reali (minn issa ‘l quddiem il-“proċedura ta’ saldu D ta’ RTGS AS”) imsemmija fl-Anness I, Parti VI, l-Artikolu 6, tal-Linja Gwida (UE) 2022/912 (BĊE/2022/8); u (b) kontijiet tat-TARGET għall-finijiet tal-proċeduri ta’ saldu ta’ sistema anċillari (TIPS AS) għas-saldu ta’ ħlasijiet istantanji tat-TARGET (TIPS) imsemmija fl-Anness I, Parti VII, ta’ dik il-Linja Gwida. Għaldaqstant, għall-finijiet preżenti, kwalunkwe fondi miżmuma min-NB-PSP f’kontijiet tat-TARGET għall-finijiet tal-proċedura ta’ saldu D ta’ RTGS AS jew il-proċeduri ta’ saldu ta’ TIPS AS ma għandhomx ikunu inklużi fil-kalkolu ta’ ammont massimu limitu ta’ parteċipazzjoni, u ebda limitu bħal dan ma għandu japplika għal dawk il-fondi. Minflok, għandu jiġi stabbilit reġim ta’ attestazzjoni proprja ta’ kull xahar għal NB-PSPs fejn rilevanti, sabiex il-banek ċentrali tal-Eurosistema rilevanti jkunu jistgħu jżommu monitoraġġ dwar jekk il-fondi miżmuma min-NB-PSPs f’kontijiet tat-TARGET għal tali finijiet huma, fil-fatt, qed jintużaw biex jilħqu l-obbligi ta’ saldu. Dan ir-reġim ta’ attestazzjoni proprja għandu jinkludi rapporti, fuq bażi ta’ kull xahar, tal-parteċipazzjoni mil-lum għall-għada l-aktar għolja u dik medja ta’ kuljum ta’ NB-PSP fuq tali kontijiet, kif ukoll l-ammonti tal-obbligu ta’ saldu l-aktar għoljin u dawk medji pproċessati fis-sistema anċillari korrispondenti.

(10)

L-Eurosistema għandha tirrevedi l-metodu għall-kalkolu tal-ammonti massimi ta’ parteċipazzjoni f’intervalli speċifikati ladarba jkun hemm stabbilizzazzjoni fil-mudell operattiv u sabiex tnaqqas tendenza persistenti ‘l fuq f’dawn l-ammonti.

(11)

Sabiex titrawwem kultura ta’ konformità mar-rekwiżiti li jikkonċernaw l-ammonti massimi limiti ta’ parteċipazzjoni, il-bank ċentrali tal-Eurosistema rilevanti għandu jimponi penali fuq NB-PSP li jżomm ammonti ogħla mill-ammont massimu ta’ parteċipazzjoni rilevanti f’tali kontijiet. Sabiex jiġi skoraġġut ksur ripetut jew sistematiku, kwalunkwe inċident ta’ ksur li jinvolvi ammonti sinifikanti li jaqbżu l-ammonti massimi rilevanti ta’ parteċipazzjoni, jew nuqqas ta’ tnaqqis ta’ kwalunkwe ammont żejjed bħal dan miżmum fil-kontijiet ta’ NB-PSP minnufih wara l-wasla għandu jkun fost l-avvenimenti meqjusa bħala nuqqas ta’ konformità materjali mar-rekwiżiti applikabbli. F’każijiet bħal dawn il-bank ċentrali tal-Eurosistema rilevanti għandu jitħalla jittermina l-parteċipazzjoni tal-NB-PSP fis-sistema ta’ pagament operata mill-bank ċentrali rilevanti u jimponi penali addizzjonali fir-rigward ta’ kwalunkwe kont li jingħalaq bħala riżultat.

(12)

Filwaqt li d-Direttiva (UE) 2015/2366 tirrikjedi li l-NB-PSPs jipproteġu l-fondi tal-klijenti tagħhom billi jiftħu kontijiet ta’ salvagwardja jew b’mezzi oħra, mhijiex il-funzjoni ewlenija tal-banek ċentrali li jaġixxu bħala sostitut għall-istituzzjonijiet ta’ kreditu fil-forniment ta’ servizzi ta’ salvagwardja. L-offerta ta’ kontijiet ta’ salvagwardja mill-banek ċentrali jista’ jkollha impatt fuq is-sikurezza u s-solidità ġenerali tal-mekkaniżmu ta’ trażmissjoni tal-politika monetarja u tas-sistema finanzjarja inġenerali, u jistgħu jinħolqu riskji sinifikanti għall-kisba tal-objettivi tal-Eurosistema, speċifiċi għall-banek ċentrali. Riskji bħal dawn jinkludu flussi ta’ ħruġ ta’ depożiti minn istituzzjonijiet ta’ kreditu, pereżempju f’xenarju fejn id-depożiti jinżammu fil-bank ċentrali li jwassal għal diżintermedjazzjoni progressiva tas-settur bankarju kummerċjali li jkollha impatt negattiv fuq id-disponibbiltà tal-likwidità u b’hekk ixxekkel it-trażmissjoni effettiva tal-politika monetarja. Bl-istess mod, munita diġitali sintetika tal-bank ċentrali, pereżempju flus elettroniċi maħruġa min-NB-PSP u appoġġjata bis-sħiħ minn flus tal-bank ċentrali, tista’ ttappan id-distinzjoni bejn flus tal-bank ċentrali, assi ta’ saldu mingħajr riskju ta’ kreditu u likwidità, u flus tal-bank kummerċjali. Id-depożitu tal-fondi tal-klijenti fil-banek ċentrali jista’ jirriskja li jgħaqqad il-flus elettroniċi ma’ forom oħra ta’ flus, inklużi l-flus tal-bank ċentrali, f’moħħ il-pubbliku, u b’hekk ifixkel il-perċezzjonijiet tar-riskju.

(13)

Ir-Regolament (UE) 2023/1114 tal-Parlament Ewropew u tal-Kunsill (5), li japplika mit-30 ta’ Diċembru 2024, jobbliga lill-fornituri ta’ servizzi tal-kriptoassi jissalvagwardjaw il-fondi tal-klijenti tagħhom ma’ istituzzjoni ta’ kreditu jew, meta tali kont ikun disponibbli, ma’ bank ċentrali. Fil-każ tal-aħħar, kull deċiżjoni li jiġu offruti kontijiet għall-finijiet ta’ salvagwardja tibqa’ fid-diskrezzjoni tal-banek ċentrali tal-Eurosistema. Jenħtieġ li opzjoni ta’ salvagwardja fil-banek ċentrali tal-Eurosistema ma tiġix offruta lill-fornituri ta’ servizzi tal-kriptoassi għall-istess raġunijiet li ma għandhiex tiġi offruta lill-NB-PSPs, kif ukoll biex jinżammu kundizzjonijiet ekwi fost id-diversi istituzzjonijiet li jipparteċipaw fis-suq tas-servizzi ta’ pagament.

(14)

Il-forniment ta’ kontijiet ta’ salvagwardja barra mit-TARGET, jiġifieri f’sistemi ta’ pagament nazzjonali jew direttament fil-kotba ta’ bank ċentrali tal-Eurosistema, huwa rilevanti għall-kompiti bażiċi tal-implimentazzjoni tal-politika monetarja u l-iżgurar tal-operat bla xkiel tas-sistemi ta’ pagament u għaldaqstant jaqa’ fil-kamp ta’ applikazzjoni tal-Artikoli 17 u 22 tal-Istatut tas-SEBĊ. Għalhekk, għal din ir-raġuni wkoll, kontijiet ta’ salvagwardja ma għandhomx jiġu offruti jew ipprovduti lil NB-PSPs u lill-fornituri ta’ servizzi tal-kriptoassi minn banek ċentrali individwali tal-Eurosistema. Biex ma jkunx hemm dubju, kontijiet tekniċi ta’ sistemi anċillari għall-proċedura ta’ Saldu D tal-RTGS AS jew kontijiet tekniċi tat-TIPS AS, filwaqt li huma kontijiet ta’ fondi ggarantiti, mhumiex kontijiet ta’ salvagwardja għall-finijiet tal-Artikolu 10(1), il-punt (a), tad-Direttiva (UE) 2015/2366 jew għall-finijiet tal-Artikolu 70 tar-Regolament (UE) 2023/1114 tal-Parlament Ewropew u tal-Kunsill.

(15)

NB-PSPs li għandhom aċċess għal sistemi ta’ pagament operati minn bank ċentrali għandhom jitħallew jiftħu diversi kontijiet ta’ saldu, skont l-offerta tal-operatur tas-sistema ta’ pagament. Filfatt, kontijiet multipli ma jipprevedux is-segregazzjoni tal-fondi tal-klijenti peress li tali kontijiet ma jkunux protetti kontra l-insolvenza.

(16)

Il-Linja Gwida (UE) 2022/912 (BĊE/2022/8) għandha tiġi emendata, u għalhekk l-applikazzjoni tad-dispożizzjonijiet ta’ din id-Deċiżjoni li jirrigwardaw talbiet min-NB-PSPs għal aċċess għat-TARGET għandha tiġi ddifferita sas-16 ta’ Ġunju 2025, li hija d-data li fiha l-emendi għal-Linja Gwida (UE) 2022/912 (BĊE/2022/8), għal raġunijiet tekniċi, se jkollhom japplikaw.

(17)

Għal ċertezza legali u fl-interess li jiġi ffaċilitat l-allinjament tat-termini u l-kundizzjonijiet tal-banek ċentrali tal-Eurosistema bħala operaturi tas-sistema ta’ pagament jew banek ċentrali li jżommu kontijiet, mal-emendi leġiżlattivi rilevanti reċenti tal-Unjoni, id-data tal-applikazzjoni ta’ din id-Deċiżjoni għandha tiġi allinjata mad-data sa meta l-Istati Membri huma meħtieġa jittrasponu l-emendi għad-Direttiva 98/26/KE u d-Direttiva (UE) 2015/2366 magħmula mir-Regolament (UE) 2024/886, li hija d-9 ta’ April 2025,

(1)

“bank ċentrali tal-Eurosistema” tfisser jew il-Bank Ċentrali Ewropew jew bank ċentrali nazzjonali ta' Stat Membru li l-munita tiegħu hija l-euro;

(2)

“sistema ta’ pagament operata minn bank ċentrali” tfisser sistema ta’ pagament operata minn bank ċentrali tal-Eurosistema li tinkludi sistema komponenti tat-TARGET;

(3)

“fornitur ta’ servizzi ta’ pagament mhux bankarju” jew “NB-PSP” tfisser kwalunkwe waħda minn dawn li ġejjin:

(4)

“kont ta’ salvagwardja” tfisser kont separat f’istituzzjoni ta’ kreditu jew, fid-diskrezzjoni ta’ bank ċentrali tal-Eurosistema, f’dak il-bank ċentrali, li jinfetaħ minn:

(5)

“fornitur ta’ servizz tal-kriptoassi” tfisser fornitur ta’ servizz tal-kriptoassi kif definit fl-Artikolu 3(1), il-punt (15), tad-Direttiva (UE) 2023/1114;

(6)

“ordni ta’ trasferiment ta’ flus kontanti” tfisser ordni ta’ trasferiment ta’ flus kontanti kif definit fl-Anness III, il-punt (16) tal-Linja Gwida (UE) 2022/912 (BĊE/2022/8);

(7)

“tmiem il-jum ta’ negozju” tfisser il-ħin limitu, kif previst fir-regoli tas-sistema ta’ pagament operata mill-bank ċentrali rilevanti, għas-saldu ta’ ordnijiet ta’ trasferiment ta’ flus kontanti għal dak il-jum ta’ negozju speċifiku.