(1)

Id-Deċiżjoni ta’ Implimentazzjoni tal-Kunsill (UE) 2018/1491 (2) awtorizzat lil Spanja biex tapplika rata mnaqqsa ta’ dazju tas-sisa sal-31 ta’ Diċembru 2024 fuq l-elettriku pprovdut direttament lil bastimenti rmiġġati fil-portijiet għajr dgħajjes għal użu rikreattiv privat (“elettriku mill-art”), f’konformità mal-Artikolu 19 tad-Direttiva 2003/96/KE.

(2)

B’ittra tas-27 ta’ Frar 2024, Spanja talbet awtorizzazzjoni biex tkompli tapplika rata mnaqqsa ta’ taxxa fuq l-elettriku mill-art skont l-Artikolu 19 tad-Direttiva 2003/96/KE. L-awtoritajiet Spanjoli pprovdew informazzjoni addizzjonali relatata mat-talba permezz ta’ ittri datati l-11, l-14 u l-15 ta’ Ottubru 2024.

(3)

Bir-rata tat-taxxa mnaqqsa li beħsiebha tapplika, Spanja għandha l-għan li tkompli tippromwovi l-użu tal-elettriku mill-art. L-użu ta’ dan l-elettriku jitqies bħala mod li jagħmel inqas ħsara lill-ambjent biex jissodisfa l-ħtiġijiet tal-elettriku tal-bastimenti li jkunu rmiġġati fil-portijiet milli l-ħruq ta’ fjuwils tal-bastimenti minn dawk il-bastimenti.

(4)

Sa fejn l-użu tal-elettriku mill-art jevita l-emissjonijiet ta’ sustanzi niġġiesa tal-arja li joriġinaw mill-ħruq tal-fjuwils tal-bastimenti, dan jikkontribwixxi għal titjib fil-kwalità tal-arja lokali fl-ibliet portwarji u għat-tnaqqis tal-istorbju. Il-miżura għalhekk hija mistennija li tikkontribwixxi għall-objettivi tal-politika dwar l-ambjent, is-saħħa u t-tibdil fil-klima tal-Unjoni.

(5)

Il-fatt li Spanja titħalla tapplika rata mnaqqsa ta’ tassazzjoni fuq l-elettriku mill-art ma jmurx lil hinn minn dak li huwa meħtieġ sabiex jiżdied l-użu ta’ tali elettriku, peress li l-ġenerazzjoni abbord tal-elettriku se tibqa’ l-aktar alternattiva kompetittiva fil-biċċa l-kbira tal-każijiet. Għall-istess raġuni, u minħabba l-livell relattivament baxx attwali ta’ penetrazzjoni tat-teknoloġija fis-suq, il-miżura x’aktarx li ma twassalx għal distorsjonijiet sinifikanti fil-kompetizzjoni matul il-perjodu ta’ applikazzjoni tagħha u għalhekk mhux se taffettwa b’mod negattiv il-funzjonament xieraq tas-suq intern.

(6)

F’konformità mal-Artikolu 19(2) tad-Direttiva 2003/96/KE, kull awtorizzazzjoni mogħtija skont dik id-dispożizzjoni jeħtieġ li jkollha żmien limitat. Sabiex jiġi żgurat li l-perjodu ta’ awtorizzazzjoni jkun twil biżżejjed sabiex l-operaturi ekonomiċi rilevanti ma jiġux skoraġġuti milli jagħmlu l-investimenti meħtieġa, huwa xieraq li l-awtorizzazzjoni tingħata għal perjodu ta’ 4 snin. Madankollu, jenħtieġ li l-awtorizzazzjoni tieqaf milli tapplika mid-data tal-applikazzjoni ta’ kwalunkwe dispożizzjoni ġenerali dwar il-vantaġġi tat-taxxa għall-elettriku mill-art adottata mill-Kunsill skont l-Artikolu 113 tat-Trattat dwar il-Funzjonament tal-Unjoni Ewropea, jew kwalunkwe dispożizzjoni rilevanti oħra tat-Trattat, jekk tali dispożizzjonijiet isiru applikabbli matul il-perjodu tal-awtorizzazzjoni.

(7)

Sabiex tiġi pprovduta ċertezza legali lill-operaturi tal-portijiet u tal-vapuri u biex jiġu evitati kwalunkwe tfixkil u żieda potenzjali fil-piż amministrattiv għad-distributuri u r-ridistributuri tal-elettriku, jenħtieġ li jiġi żgurat li Spanja tkun tista’ tkompli tapplika rata mnaqqsa ta’ tassazzjoni fuq l-elettriku mill-art. Għalhekk jenħtieġ li tingħata l-awtorizzazzjoni mitluba b’effett mill-1 ta’ Jannar 2025, sabiex tiġi garantita l-kontinwità tal-arranġamenti preċedenti skont id-Deċiżjoni ta’ Implimentazzjoni (UE) 2018/1491.

(8)

Din id-Deċiżjoni hija mingħajr preġudizzju għall-applikazzjoni tar-regoli tal-Unjoni dwar l-għajnuna mill-Istat,