(1)

L-Artikolu 8(2) tad-Direttiva 2003/99/KE jirrikjedi li l-awtorità kompetenti tal-Istat Membru rispettiv tinvestiga t-tifqigħat mill-ikel f’kooperazzjoni mal-awtoritajiet kompetenti responsabbli biex jindirizzaw it-theddid transkonfinali serju għas-saħħa tal-bniedem u l-konsegwenzi tiegħu skont id-Deċiżjoni 2119/98/KE tal-Parlament Ewropew u tal-Kunsill (2). Dik id-Deċiżjoni tħassret bid-Deċiżjoni 1082/2013/UE tal-Parlament Ewropew u tal-Kunsill (3), li aktar tard tħassret u ġiet sostitwita bir-Regolament (UE) 2022/2371 tal-Parlament Ewropew u tal-Kunsill (4). Dawk l-investigazzjonijiet għandhom jipprovdu data dwar il-profil epidemjoloġiku, l-oġġetti tal-ikel potenzjalment implikati, il-kawżi potenzjali tat-tifqigħat, u għandhom jinkludu wkoll studji epidemjoloġiċi u mikrobijoloġiċi adegwati.

(2)

L-effiċjenza u l-kooperazzjoni transsettorjali bejn l-awtoritajiet tas-saħħa pubblika u tas-sikurezza tal-ikel f’investigazzjonijiet bħal dawn huma essenzjali biex jiġi limitat l-impatt ta’ tifqigħa fuq is-saħħa pubblika u biex jiġi minimizzat l-impatt ekonomiku marbut mal-ġbir lura u t-tneħħija tal-ikel mhux sikur jew potenzjalment mhux sikur. Għal dan il-għan, hija meħtieġa l-identifikazzjoni rapida u affidabbli ta’ gruppi u ta’ lottijiet jew kunsinni li jkun fihom ikel ikkontaminat u l-kawża tat-tifqigħa.

(3)

Is-sekwenzjar tal-ġenoma sħiħa huwa teknika analitika molekulari moderna għall-istudji mikrobijoloġiċi li tiffaċilita ħafna l-identifikazzjoni rapida tal-clusters ta’ mikroorganiżmi, u b’hekk jappoġġa l-investigazzjonijiet epidemjoloġiċi. Dan jippermetti li jiġu stabbiliti rabtiet bejn l-iżolati ta’ patoġeni li jinġarru fl-ikel li jittieħdu mill-bnedmin, l-ikel, l-annimali, l-għalf u l-ambjent relatat matul l-investigazzjoni dwar it-tifqigħa.

(4)

Biex jiġu ffaċilitati b’mod sostanzjali l-investigazzjonijiet dwar it-tifqigħat mill-ikel u d-detezzjoni f’waqtha tas-sorsi ta’ dawk it-tifqigħat, jenħtieġ li l-Istati Membri jkunu meħtieġa jiġbru l-iżolati tas-Salmonella enterica, tal-Listeria monocytogenes, tal-Escherichia coli, tal-Campylobacter jejuni u tal-Campylobacter coli derivati mill-ikel, mill-annimali, mill-għalf u mill-kampjuni ambjentali relatati mingħand l-operaturi tan-negozji tal-ikel u tal-għalf u matul il-kontrolli uffiċjali, fejn dawk l-iżolati jkunu assoċjati jew issuspettati li jkunu assoċjati ma’ tifqigħa mill-ikel. Jenħtieġ ukoll li l-Istati Membri jkunu meħtieġa jwettqu s-sekwenzjar tal-ġenoma sħiħa fuq dawk l-iżolati.

(5)

Jenħtieġ li l-Istati Membri jibagħtu r-riżultati mis-sekwenzjar tal-ġenoma sħiħa tal-iżolati ta’ dawk il-patoġeni mill-ikel, mill-annimali, mill-għalf u mill-ambjent relatat lill-Awtorità Ewropea dwar is-Sigurtà fl-Ikel (l-“Awtorità”) li żviluppat sistema konġunta “Saħħa Waħda” flimkien maċ-Ċentru Ewropew għall-Prevenzjoni u l-Kontroll tal-Mard (ECDC). Fis-sistema konġunta “Saħħa Waħda”, l-Awtorità tista’ tqabbel ir-riżultati mis-sekwenzjar tal-ġenoma sħiħa tal-iżolati ta’ dawk il-patoġeni miġbura f’konformità ma’ dan ir-Regolament mar-riżultati mis-sekwenzjar tal-ġenoma sħiħa tal-iżolati mill-bnedmin ikkomunikati lill-ECDC f’konformità mal-Artikolu 13(3), il-punt (d), tar-Regolament (UE) 2022/2371. Tqabbil bħal dan jippermetti l-identifikazzjoni tas-sors ta’ tifqigħa u tal-kunsinni affettwati meta jintużaw flimkien ma’ data minn investigazzjonijiet epidemjoloġiċi. Meta r-riżultati tas-sekwenzjar tal-ġenoma sħiħa jintbagħtu lill-Awtorità tal-EFSA, jenħtieġ li tiġi inkluża data relatata addizzjonali, essenzjali għall-investigazzjoni ta’ tifqigħat mill-ikel.

(6)

Jixraq li l-Istati Membri u l-Awtorità jingħataw biżżejjed żmien biex jadattaw għar-rekwiżiti l-ġodda dwar il-ġbir tal-iżolati derivati mill-ikel, mill-annimali, mill-għalf u mill-kampjuni ambjentali relatati, dwar is-sekwenzjar tal-ġenoma sħiħa ta’ dawk l-iżolati u dwar it-trażmissjoni tad-data relatata sabiex jipprovdu għall-applikazzjonijiet tekniċi u l-mezzi finanzjarji meħtieġa. Għalhekk jenħtieġ li r-rekwiżiti f’dan ir-Regolament jibdew japplikaw 18-il xahar mid-data tad-dħul fis-seħħ ta’ dan ir-Regolament.

(7)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,