(1)

Id-Direttiva tal-Kummissjoni 2008/108/KE (2) inkludiet il-klorur tal-mepikwat bħala sustanza attiva fl-Anness I tad-Direttiva tal-Kunsill 91/414/KEE (3), taħt l-isem “mepikwat”.

(2)

Is-sustanzi attivi inklużi fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4).

(3)

L-approvazzjoni ta’ dik is-sustanza attiva, kif stipulata fil-Parti A tal-Anness tar-Regolament ta’ Implimentazzjoni (UE) Nru 540/2011, tiskadi fil-15 ta’ Ottubru 2025.

(4)

F’konformità mal-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (5) u fil-perjodu ta’ żmien previst f’dak l-Artikolu, ġiet ippreżentata applikazzjoni għat-tiġdid tal-approvazzjoni tas-sustanza attiva klorur tal-mepikwat lill-Finlandja, l-Istat Membru relatur, u lill-Estonja, l-Istat Membru korelatur.

(5)

L-applikant ippreżenta l-fajls supplimentari lill-Istat Membru relatur, lill-Istat Membru korelatur, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 6 tar-Regolament ta’ Implimentazzjoni (UE) Nru 844/2012. L-Istat Membru relatur sab li l-applikazzjoni kienet ammissibbli.

(6)

L-Istat Membru relatur ħejja abbozz tar-rapport ta’ valutazzjoni tat-tiġdid b’konsultazzjoni mal-Istat Membru korelatur u bagħtu lill-Awtorità u lill-Kummissjoni fid-19 ta’ Diċembru 2018. Fl-abbozz tar-rapport ta’ valutazzjoni tat-tiġdid tiegħu, l-Istat Membru relatur ma setax jipproponi li l-approvazzjoni tal-klorur tal-mepikwat tiġġedded, billi kienet meħtieġa aktar informazzjoni biex jiġu esklużi l-proprjetajiet ta’ dik is-sustanza attiva, li jfixklu s-sistema endokrinali.

(7)

L-Awtorità għamlet il-fajl tas-sommarju supplimentari disponibbli għall-pubbliku. Barra minn hekk, l-Awtorità ċċirkolat ukoll l-abbozz tar-rapport ta’ valutazzjoni tat-tiġdid lill-applikant u lill-Istati Membri biex jagħtu l-kummenti tagħhom u nediet konsultazzjoni pubblika dwaru. L-Awtorità għaddiet il-kummenti li rċeviet lill-Kummissjoni.

(8)

Fl-20 ta’ April 2020, l-Awtorità talbet informazzjoni addizzjonali mingħand l-applikant dwar il-proprjetajiet li jfixklu s-sistema endokrinali tal-klorur tal-mepikwat skont l-Artikolu 13(3a), l-ewwel subparagrafu, tar-Regolament ta’ Implimentazzjoni (UE) Nru 844/2012. L-applikant ippreżenta informazzjoni biex l-Awtorità tkun tista’ tikkonkludi l-valutazzjoni dwar jekk il-kriterji xjentifiċi għad-determinazzjoni tal-proprjetajiet li jfixklu s-sistema endokrinali stabbiliti fil-punti 3.6.5 u 3.8.2 tal-Anness II tar-Regolament (KE) Nru 1107/2009, kif introdotti bir-Regolament tal-Kummissjoni (UE) 2018/605 (6), humiex issodisfati.

(9)

F’April 2023, l-Istat Membru relatur qiegħed abbozz aġġornat tar-rapport ta’ valutazzjoni tat-tiġdid għad-dispożizzjoni tal-Awtorità, tal-Istati Membri u tal-Kummissjoni. Fl-abbozz aġġornat tar-rapport ta’ valutazzjoni tat-tiġdid tiegħu, l-Istat Membru relatur ikkunsidra l-informazzjoni addizzjonali mressqa mill-applikant rigward il-kriterji biex jiġu identifikati l-proprjetajiet li jfixklu s-sistema endokrinali u kkonkluda li l-klorur tal-mepikwat ma kellu l-ebda proprjetà ta’ dan it-tip fir-rigward tal-ispeċijiet umani, mammiferi u organiżmi oħra mhux fil-mira.

(10)

Fl-4 ta’ Lulju 2024, l-Awtorità kkomunikat lill-Kummissjoni l-konklużjoni (7) tagħha, li indikat li l-klorur tal-mepikwat jista’ jkun mistenni li jissodisfa l-kriterji tal-approvazzjoni previsti fl-Artikolu 4 tar-Regolament (KE) Nru 1107/2009.

(11)

Fit-2 ta’ Ottubru 2024, il-Kummissjoni ppreżentat rapport tat-tiġdid u abbozz ta’ dan ir-Regolament lill-Kumitat Permanenti dwar il-Pjanti, l-Annimali, l-Ikel u l-Għalf.

(12)

Il-Kummissjoni stiednet lill-applikant jissottometti l-kummenti tiegħu dwar il-konklużjoni tal-Awtorità u, f’konformità mal-Artikolu 14(1), it-tielet subparagrafu, tar-Regolament ta’ Implimentazzjoni (UE) Nru 844/2012, dwar ir-rapport tat-tiġdid. L-applikant ippreżenta l-kummenti tiegħu, li ġew eżaminati bir-reqqa u tqiesu.

(13)

Fir-rigward ta’ użu rappreżentattiv wieħed jew iktar ta’ mill-inqas prodott wieħed għall-protezzjoni tal-pjanti li fih is-sustanza attiva klorur tal-mepikwat, ġie stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati.

(14)

Għalhekk, huwa xieraq li l-approvazzjoni tal-klorur tal-mepikwat tiġġedded.

(15)

Għalkemm il-valutazzjoni tar-riskju għat-tiġdid tal-approvazzjoni tas-sustanza attiva klorur tal-mepikwat hija bbażata fuq għadd limitat ta’ użi rappreżentattivi, dan ma jirrestrinġix l-użi li għalihom jistgħu jiġu awtorizzati l-prodotti għall-protezzjoni tal-pjanti li fihom il-klorur tal-mepikwat. Għalhekk, huwa xieraq li r-restrizzjoni fuq l-użu tal-klorur tal-mepikwat bħala regolatur tat-tkabbir tal-pjanti ma tibqax fis-seħħ.

(16)

Madankollu, f’konformità mal-Artikolu 14(1) tar-Regolament (KE) Nru 1107/2009 flimkien mal-Artikolu 6 tiegħu, u fid-dawl tal-għarfien xjentifiku u tekniku attwali u tal-eżitu tal-valutazzjoni tar-riskju, huwa neċessarju li jiġu previsti ċerti kundizzjonijiet, b’mod partikolari f’dak li għandu x’jaqsam mal-ispeċifikazzjoni tal-materjal tekniku u l-protezzjoni tal-operaturi. Ma għadux meħtieġ li tinżamm il-kundizzjoni speċifika li l-Istati Membri jagħtu attenzjoni partikolari lir-residwi fl-ikel li joriġina mill-pjanti u mill-annimali u li jevalwaw l-esponiment djetetiku tal-konsumaturi, peress li l-valutazzjoni tar-riskju tal-konsumatur proviżorja wriet riskju aċċettabbli anke għal gruppi ta’ konsumaturi kritiċi.

(17)

Jenħtieġ li r-Regolament ta’ Implimentazzjoni (UE) Nru 540/2011 jiġi emendat kif xieraq.

(18)

Ir-Regolament ta’ Implimentazzjoni tal-Kummissjoni (UE) 2024/324 (8) estenda l-perjodu ta’ approvazzjoni tal-mepikwat sal-15 ta’ Ottubru 2025 sabiex il-proċess ta’ tiġdid ikun jista’ jitlesta qabel ma jiskadi l-perjodu ta’ approvazzjoni ta’ dik is-sustanza attiva. Madankollu, minħabba li ttieħdet deċiżjoni dwar it-tiġdid tal-approvazzjoni ta’ dik is-sustanza attiva qabel dik id-data ta’ skadenza estiża, jenħtieġ li dan ir-Regolament japplika qabel dik id-data.

(19)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,