(1)

Permezz tar-Regolament ta’ Implimentazzjoni tal-Kummissjoni (UE) 2019/72 (2)(“ir-regolament oriġinali”), il-Kummissjoni Ewropea (“il-Kummissjoni”) imponiet dazju kumpensatorju fuq l-importazzjonijiet ta’ roti elettriċi li joriġinaw mir-Repubblika tal-Poplu taċ-Ċina (ir-RPĊ jew “il-pajjiż ikkonċernat” jew “iċ-Ċina”). Id-dazji kumpensatorji attwalment fis-seħħ ivarjaw minn 3,9 % sa 17,2 % (“il-miżuri oriġinali”). L-investigazzjoni li wasslet għall-impożizzjoni tal-miżuri oriġinali minn hawn ’il quddiem se tissejjaħ “l-investigazzjoni oriġinali”.

(2)

Wara s-sentenza tal-Qorti Ġenerali fil-kawża T-243/19, id-dazji kumpensatorji ġew imposti mill-ġdid fuq Giant Electric Vehicle (Kunshan) Co., Ltd f’Marzu 2023 permezz tar-Regolament ta’ Implimentazzjoni tal-Kummissjoni (UE) 2023/610 (3). Id-dazju impost mill-ġdid ġie stabbilit fl-istess livell bħal fir-Regolament oriġinali. Għalhekk, ir-rati tad-dazju kumpensatorju attwalment fis-seħħ huma dawk li ġew stabbiliti bir-Regolament ta’ Implimentazzjoni (UE) 2019/72.

(3)

Permezz tar-Regolament ta’ Implimentazzjoni tal-Kummissjoni (UE) 2019/73 (4), il-Kummissjoni imponiet ukoll miżuri anti-dumping definittivi fuq l-importazzjonijiet ta’ roti elettriċi li joriġinaw miċ-Ċina. Id-dazji anti-dumping attwalment fis-seħħ jvarjaw minn 9,9 % sa 70,1 %.

(4)

Fis-17 ta’ Jannar 2024, il-Kummissjoni bdiet reviżjoni ta’ skadenza fir-rigward tal-importazzjonijiet lejn l-Unjoni ta’ roti elettriċi li joriġinaw mir-Repubblika tal-Poplu taċ-Ċina fuq il-bażi tal-Artikolu 18 tar-Regolament bażiku. Hija ppubblikat Notifika tal-Bidu (IATE) f’Il-Ġurnal Uffiċjali tal-Unjoni Ewropea (5) (“in-Notifika tal-Bidu”).

(5)

Il-Kummissjoni bdiet l-investigazzjoni wara talba għal reviżjoni li ġiet ippreżentata fis-16 ta’ Ottubru 2023 mill-Assoċjazzjoni Ewropea tal-Manifatturi tar-Roti (“it-talba” u “r-rikorrent”) f’isem l-industrija tal-Unjoni tar-roti elettriċi fis-sens tal-Artikolu 10(6) tar-Regolament bażiku. It-talba kien fiha evidenza ta’ probabbiltà ta’ kontinwazzjoni ta’ sussidjar u rikorrenza ta’ dannu lill-industrija tal-Unjoni li kienet suffiċjenti biex tiġġustifika l-bidu tal-investigazzjoni.

(6)

Qabel il-bidu tar-reviżjoni ta’ skadenza, il-Kummissjoni nnotifikat lill-Gvern taċ-Ċina (il-“GTĊ”) (6) li kienet irċeviet talba dokumentata kif xieraq, u stiednet lill-GTĊ għal konsultazzjonijiet f’konformità mal-Artikolu 10(7) tar-Regolament bażiku. Il-GTĊ ma weġibx u għalhekk ma kienx hemm konsultazzjonijiet.

(7)

L-investigazzjoni dwar is-sussidjar u d-dannu kopriet il-perjodu mill-1 ta’ Jannar 2023 sal-31 ta’ Diċembru 2023 (il-“perjodu ta’ investigazzjoni għar-reviżjoni” jew l-“RIP”). L-eżami tax-xejriet rilevanti għall-valutazzjoni tal-probabbiltà ta’ kontinwazzjoni jew rikorrenza ta’ dannu kopra l-perjodu mill-1 ta’ Jannar 2020 sa tmiem il-perjodu ta’ investigazzjoni għar-reviżjoni (“il-perjodu kkunsidrat”).

(8)

Fin-Notifika tal-Bidu, il-partijiet interessati ġew mistiedna jikkuntattjaw lill-Kummissjoni sabiex jipparteċipaw fl-investigazzjoni. Barra minn hekk, il-Kummissjoni infurmat speċifikament lir-rikorrent, lill-produtturi magħrufa kollha tal-Unjoni, lill-produtturi magħrufa fir-RPĊ kif ukoll lill-awtoritajiet tar-RPĊ, lill-importaturi magħrufa, lill-utenti, kif ukoll lill-assoċjazzjonijiet magħrufa li huma mħassba dwar il-bidu tal-iskadenza u stidnithom biex jipparteċipaw.

(9)

Il-partijiet interessati kellhom l-opportunità li jikkummentaw dwar il-bidu tar- reviżjoni ta’ skadenza u li jitolbu seduta ta’ smigħ mal-Kummissjoni u/jew mal-Uffiċjal tas-Seduta fi proċedimenti kummerċjali. Grupp ad hoc, f’isem 8 kumpanija fl-Unjoni li jarmaw partijiet tar-roti elettriċi importati miċ-Ċina u minn pajjiżi terzi oħra, ippreżenta ruħu u pprovda kummenti. Dawn il-kummenti ma kinux jirrigwardaw il-bidu sa ċertu punt u ġew indirizzati fit-Taqsima 6 dwar l-interess tal-Unjoni hawn taħt. Dan il-grupp talab ukoll seduta ta’ smigħ mal-Kummissjoni, li saret fit-30 ta’ April 2024.

(10)

Fin-Notifika tal-Bidu, il-Kummissjoni ddikjarat li għandha mnejn tinkludi fil-kampjun il-partijiet interessati f’konformità mal-Artikolu 27 tar-Regolament bażiku.

(11)

Fin-Notifika tal-Bidu, il-Kummissjoni ddikjarat li kienet iddeċidiet li tillimita l-investigazzjoni għal għadd raġonevoli ta’ produtturi tal-Unjoni billi tapplika l-kampjunar. Il-Kummissjoni għażlet il-kampjun fuq il-bażi tal-ogħla kwantità rappreżentattiva ta’ produzzjoni li tista’ tiġi investigata b’mod raġonevoli fiż-żmien disponibbli.

(12)

F’konformità mal-Artikolu 27 tar-Regolament bażiku, il-Kummissjoni stiednet lill-partijiet interessati biex jikkummentaw dwar il-kampjun provviżorju. Ma wasal l-ebda kumment dwar il-kampjun proviżorju. Il-kampjun huwa meqjus rappreżentattiv tal-industrija tal-Unjoni.

(13)

Biex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lill-importaturi mhux relatati biex jipprovdu l-informazzjoni speċifikata fin-Notifika tal-Bidu.

(14)

L-ebda importatur mhux relatat ma wieġeb għall-formola tal-kampjunar.

(15)

Biex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lill-produtturi magħrufa kollha fir-RPĊ biex jipprovdu l-informazzjoni speċifikata fin-Notifika ta’ Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina fl-Unjoni Ewropea biex tidentifika u/jew tikkuntattja produtturi oħra, jekk ikun hemm, li jistgħu jkunu interessati li jipparteċipaw fl-investigazzjoni.

(16)

Żewġ produtturi esportaturi biss mir-Repubblika tal-Poplu taċ-Ċina pprovdew tweġiba għall-kampjunar u għalhekk il-kampjunar ma tqiesx li kien meħtieġ. Madankollu, dawn iż-żewġ kumpaniji kienu jirrappreżentaw flimkien inqas minn 0,1 % tal-industrija Ċiniża tar-roti elettriċi f’termini ta’ (i) esportazzjonijiet lejn l-Unjoni, (ii) bejgħ domestiku u, (iii) kapaċità ta’ produzzjoni Ċiniża fil-perjodu ta’ investigazzjoni għar-reviżjoni. Għalhekk, il-Kummissjoni qieset li dawk iż-żewġ kumpaniji ma setgħux jitqiesu rappreżentattivi tal-industrija Ċiniża tar-roti elettriċi għall-fini tal-investigazzjoni għar-reviżjoni ta’ skadenza u li l-informazzjoni speċifika għall-kumpanija tagħhom ma kinitx suxxettibbli li tifforma bażi għal sejbiet rappreżentattivi rigward l-esportazzjonijiet kollha mir-RPĊ lejn l-Unjoni.

(17)

Għaldaqstant, il-Kummissjoni kkonkludiet li l-kooperazzjoni mill-produtturi tar-roti elettriċi fir-RPĊ kienet insuffiċjenti biex isiru sejbiet rappreżentattivi u infurmat liż-żewġ kumpaniji, kif ukoll lill-awtoritajiet tar-Repubblika tal-Poplu taċ-Ċina, li l-Kummissjoni kellha l-intenzjoni li tapplika l-Artikolu 28 tar-Regolament bażiku u tibbaża s-sejbiet tagħha fuq il-kontinwazzjoni jew ir-rikorrenza ta’ sussidju u dannu fir-rigward tal-importazzjonijiet mir-Repubblika tal-Poplu taċ-Ċina fuq fatti disponibbli.

(18)

Il-Kummissjoni stiednet liż-żewġ kumpaniji li kienu pprovdew tweġiba għall-kampjunar biex jikkuntattjaw lis-servizzi tal-Kummissjoni f’każ li kellhom l-intenzjoni li jimlew tweġiba għall-kwestjonarju minkejja n-nuqqas ta’ rappreżentattività tagħhom tal-industrija tar-roti elettroniċi fir-RPĊ (ara hawn fuq). Fil-bidu tal-investigazzjoni, kopja tal-kwestjonarji saret disponibbli fil-fajl għall-ispezzjoni mill-partijiet interessati u fuq is-sit web tad-DĠ Kummerċ. Ma ġiet ippreżentata l-ebda tweġiba għall-kwestjonarju.

(19)

Fit-12 ta’ Frar 2024 il-Kummissjoni bagħtet kwestjonarju lill-gvern taċ-Ċina (il-“GTĊ”). Il-GTĊ intalab ukoll jibgħat kwestjonarji speċifiċi lil (i) il-Korporazzjoni tal-Assigurazzjoni tal-Esportazzjoni u l-Kreditu Ċiniża (“Sinosure”), (ii) produtturi u distributuri ta’ magni, batteriji u parts u komponenti oħra tar-roti elettriċi u (iii) banek u istituzzjonijiet finanzjarji oħra magħrufa mill-GTĊ li pprovdew self lill-industrija kkonċernata.

(20)

Il-Kummissjoni ma rċeviet l-ebda tweġiba għall-kwestjonarji msemmija hawn fuq. Għaldaqstant, il-Kummissjoni infurmat lill-GTĊ permezz tan-Note Verbale tal-5 ta’ April 2024 li kellha l-intenzjoni li tapplika l-Artikolu 28 tar-Regolament bażiku fir-rigward tal-informazzjoni mitluba fil-kwestjonarji mibgħuta lill-GTĊ u stiednet lill-GTĊ biex jikkummenta dwar dan. Ma wasal l-ebda kumment.

(21)

Il-Kummissjoni fittxet u vverifikat l-informazzjoni kollha meqjusa meħtieġa għad-determinazzjoni tal-probabbiltà ta’ kontinwazzjoni jew rikorrenza ta’ dumping u dannu u tal-interess tal-Unjoni. Iż-żjarat ta’ verifika skont l-Artikolu 26 tar-Regolament bażiku twettqu fil-binjiet tal-kumpaniji li ġejjin:

(22)

Fil-25 ta’ Ottubru 2024, il-Kummissjoni ddivulgat il-fatti u l-kunsiderazzjonijiet essenzjali li fuq il-bażi tagħhom kien beħsiebha żżomm id-dazji kumpensatorji fis-seħħ. Il-partijiet kollha ngħataw perjodu li fih setgħu jikkummentaw dwar id-divulgazzjoni.

(23)

Diversi partijiet interessati ssottomettew kummenti, li ġew ikkunsidrati mill-Kummissjoni u indirizzati fit-Taqsimiet 2.3, 3.9 u 6 hawn taħt. Parti waħda li talbet dan ingħatat seduta ta’ smigħ.

(24)

Il-prodott taħt rieżami huwa l-istess bħal fl-investigazzjoni oriġinali jiġifieri roti, b’assistenza ta’ pedali, b’mutur elettriku awżiljarju (“roti elettriċi”, li attwalment jaqgħu taħt il-kodiċi NM 8711 60 10 u ex 8711 60 90 (kodiċi TARIC 8711 60 90 10).

(25)

Il-prodott ikkonċernat minn din l-investigazzjoni huwa l-prodott taħt rieżami li joriġina mir-Repubblika tal-Poplu taċ-Ċina.

(26)

Kif stabbilit fl-investigazzjoni oriġinali, din l-investigazzjoni għar-reviżjoni ta’ skadenza kkonfermat li l-prodotti li ġejjin għandhom l-istess karatteristiċi fiżiċi u tekniċi bażiċi kif ukoll l-istess użi bażiċi:

(27)

Għalhekk, dawn il-prodotti jitqiesu bħala prodotti simili skont it-tifsira tal-Artikolu 2(c) tar-Regolament bażiku.

(28)

Wara d-divulgazzjoni, parti waħda sostniet li l-Kummissjoni jenħtieġ li tispeċifika li l-partijiet importati mill-importaturi eżentati u/jew mill-esportaturi barranin eżentati skont id-Deċiżjoni ta’ Implimentazzjoni tal-Kummissjoni (UE) 2024/1279 (7) jenħtieġ li ma jitqisux bħala l-prodott ikkonċernat. Skont din il-parti, għandu jiġi ċċarat li partijiet tal-prodott ikkonċernat li għandhom jintużaw għall-prodott ikkonċernat mhumiex soġġetti għal dazji kumpensatorji jekk jiġu importati separatament.

(29)

Il-Kummissjoni qieset li tali kjarifika ma kinitx iġġustifikata peress li l-partijiet mhumiex koperti mill-miżuri li huma soġġetti għal dan ir-rieżami. Fuq din il-bażi, din l-asserzjoni ġiet miċħuda.

(30)

F’konformità mal-Artikolu 18 tar-Regolament bażiku, u kif iddikjarat fin-Notifika tal-Bidu, il-Kummissjoni eżaminat jekk l-iskadenza tal-miżuri eżistenti x’aktarx li twassal għal kontinwazzjoni ta’ sussidjar.

(31)

Fit-12 ta’ Frar 2024 il-Kummissjoni bagħtet kwestjonarju lill-gvern taċ-Ċina (il-“GTĊ”). Il-GTĊ intalab ukoll jibgħat kwestjonarji speċifiċi lil (i) il-Korporazzjoni tal-Assigurazzjoni tal-Esportazzjoni u l-Kreditu Ċiniża (“Sinosure”), (ii) produtturi u distributuri ta’ magni, batteriji u parts u komponenti oħra tar-roti elettriċi u (iii) banek u istituzzjonijiet finanzjarji oħra magħrufa mill-GTĊ li pprovdew self lill-industrija kkonċernata.

(32)

Il-Kummissjoni ma rċeviet l-ebda tweġiba għall-kwestjonarji msemmija hawn fuq. Għaldaqstant, il-Kummissjoni infurmat lill-GTĊ permezz tan-Note Verbale tal-5 ta’ April 2024 li kellha l-intenzjoni li tapplika l-Artikolu 28 tar-Regolament bażiku fir-rigward tal-informazzjoni mitluba fil-kwestjonarji mibgħuta lill-GTĊ u stiednet lill-GTĊ biex jikkummenta dwar dan. Ma wasal l-ebda kumment.

(33)

Peress li l-kooperazzjoni mill-produtturi tar-roti elettriċi fir-RPĊ kienet insuffiċjenti biex isiru sejbiet rappreżentattivi għall-fini ta’ din ir-reviżjoni ta’ skadenza (ara l-premessi (16) u (17) hawn fuq) u n-nuqqas ta’ kooperazzjoni mill-GTĊ u partijiet rilevanti oħra fir-RPĊ li kienu ntalbu jipprovdu informazzjoni kif deskritt hawn fuq, il-Kummissjoni, f’konformità mal-Artikolu 28 tar-Regolament bażiku, irrikorriet għall-użu tal-fatti disponibbli biex tistabbilixxi l-probabbiltà ta’ kontinwazzjoni ta’ sussidjar tal-industrija tar-roti elettriċi fir-RPĊ.

(34)

Għaldaqstant, il-Kummissjoni użat għall-analiżi tagħha l-fatti kollha disponibbli għaliha, b’mod partikolari:

(35)

Fl-investigazzjoni oriġinali l-Kummissjoni stabbiliet il-viżjoni tal-GTĊ għat-titjib u l-promozzjoni ta’ industriji ewlenin, bħall-industrija tar-roti elettriċi, permezz tal-implimentazzjoni ta’ bosta pjanijiet fil-livell nazzjonali, lokali u settorjali. B’mod partikolari, it-13-il Pjan ta’ Ħames Snin għall-Iżvilupp Ekonomiku u Soċjali Nazzjonali tar-RPĊ li jkopri s-snin 2016–2020 (“it-13-il Pjan ta’ Ħames Snin”) kien jinkludi vetturi b’enerġija ġdida bħala industrija strateġika (13), filwaqt li l-Pjan ta’ Żvilupp tal-Industrija Ħafifa għall-istess perjodu (2016–2020), li tħejja mill-GTĊ biex jimplimenta t-13-il Pjan ta’ Ħames Snin, u l-Made in China 2025, jidentifika speċifikament l-industrija tar-roti u tal-batteriji bħala industriji ewlenin.

(36)

Kif deskritt fir-Regolament oriġinali (14), skont il-Pjan ta’ Żvilupp tal-Industrija Ħafifa, l-industrija tar-roti u tar-roti elettriċi kienet teħtieġ “Inġinerija ta’ Riformazzjoni Teknoloġika” permezz tal- “Industrijalizzazzjoni ta’ rota ta’ materjal ġdid, trasformazzjoni teknika tal-linja ta’ produzzjoni ta’ roti elettriċi intelliġenti, li ma jagħmlux ħsara lill-ambjent u effiċjenti u partijiet kruċjali”. Dan il-Pjan irrakkomanda wkoll “Il-promozzjoni tal-industrija tar-roti sabiex tiżviluppa f’direzzjoni ħafifa, diversifikata, tal-moda u intelliġenti. It-tħaffif tar-R&Ż u l-applikazzjoni ta’ materjal ħafif iżda b’saħħtu, trażmissjoni, sistema tas-sewqan, enerġija ġdida, teknoloġija intelliġenti ta’ sensuri u teknoloġija tal-Internet tal-Oġġetti. Enfasi fuq l-iżvilupp ta’ roti diversifikati adattati għal skopijiet moda u każwali, eżerċizzju u idoneità, qsim tal-pajjiż fuq distanzi twal u tiwi ta’ prestazzjoni għolja, u r-rota elettrika kkonformat mar-rota elettrika standard u intelliġenti bil-batterija tal-litju”. Barra dan, il-Pjan ta’ Żvilupp tal-Industrija Ħafifa elenka xi miżuri ta’ politika konkreti għall-promozzjoni tal-industriji ewlenin, bħal roti elettriċi u industriji tal-batteriji. Hija rreferiet b’mod partikolari għal miżuri bħar-riforma tal-aċċess għas-suq, żieda fl-appoġġ tal-politika tat-tassazzjoni finanzjarja kif ukoll appoġġ finanzjarju.

(37)

Barra minn hekk, fil-livell speċifiku tas-settur tal-industrija tar-roti, it-13-il Pjan ta’ Ħames Snin għall-Industrija tar-Roti u r-Roti Elettriċi (2016-2020), maħruġ mill-Assoċjazzjoni Ċiniża tar-Roti (,“CBA”, China Bicycle Association) inkluda l-industrija tar-roti fost l-industriji emerġenti u ddikjara: “l-industriji emerġenti ġew promossi għal-livell ta’ strateġija nazzjonali, bħalma huma enerġija ġdida, materjal ġdid, l-Internet, il-konservazzjoni tal-enerġija u l-ħarsien tal-ambjent, u t-teknoloġija tal-informatika, għalhekk, saret xejra inevitabbli għall-industriji tradizzjonali li jidħlu fil-komunità ta’ livell medju u livell għoli. Speċjalment wara li l-Ħames Sessjoni Plenarja intervjeniet sabiex “tippromwovi l-iżvilupp ta’ traffiku u trasport b’livell baxx ta’ karbonju u tinkoraġġixxi l-ivvjaġġar ekoloġiku bir-rota”, l-industrija tar-roti ċertament se tgawdi mill-opportunitajiet storiċi ġodda għall-iżvilupp.” It-13-il Pjan tar-Roti kompla jiddikjara li “l-iskala tal-esportazzjoni tar-roti u l-ispare parts se tibqa’ stabbli u l-esportazzjoni tar-roti elettriċi se tiżdied b’mod drammatiku. L-integrazzjoni tal-industrija se tissaħħaħ aktar u l-kontribut tal-intrapriżi ewlenin għall-volum tal-produzzjoni se jaqbeż il-50 %. L-industrija se trawwem, tibni b’mod konġunt u ttejjeb 3-5 raggruppamenti tal-industrija u reġjuni karatteristiċi. Il-proporzjon ta’ roti ta’ livell medju u ta’ livell għoli u roti elettriċi b’batterija tal-litju se jiżdied kull sena”. Il-kompiti ewlenin fil-Pjan kienu li “jkompli jiġi promoss l-iżvilupp ta’ roti diversi, tad-ditta u ta’ livell għoli fl-industrija, u li gradwalment jiżdied il-proporzjon ta’ persuni li jivvjaġġaw bir-rota u l-proporzjon ta’ roti ta’ livell medju u għoli; ir-realizzazzjoni tal-batterija tal-litju ħafifa u tar-roti elettriċi intelliġenti u t-titjib kostanti tas-sehem mis-suq ta’ roti b’batterija tal-litju u l-proporzjon ta’ roti elettriċi għall-esportazzjoni (15).

(38)

Barra minn hekk, fil-“Katalogu ta’ Proġetti ta’ Investiment soġġetti għall-Verifika u l-Approvazzjoni tal-Gvern”, il-GTĊ kien għamel referenza għal prijoritizzazzjoni miżjuda ta’ vetturi li jaħdmu b’enerġija alternattiva, inklużi roti elettriċi: “Il-kapaċità ta’ produzzjoni li żżid in-numru ta’ vetturi tradizzjonali li jaħdmu bil-fjuwil għandha tkun ikkontrollata strettament b’mod li, fil-prinċipju, manifatturi ġodda ta’ vetturi tradizzjonali li jaħdmu bil-fjuwil ma għandhomx ikunu vverifikati u approvati aktar għall-kostruzzjoni. Għandhom isiru sforzi biex jiggwidaw b’mod attiv l-iżvilupp b’saħħtu u ordnat ta’ vetturi b’enerġija alternattiva” (16).

(39)

Barra minn hekk, il-Made in China 2025, id-Deċiżjoni Nru 40 u d-Direttorat Nazzjonali għall-Iżvilupp tax-Xjenza u t-Teknoloġija fuq Terminu Medju u Twil (2006–2020) identifikaw l-industrija tar-roti elettriċi bħala industrija strateġika/imħeġġa ewlenija li l-iżvilupp tagħha għandu jingħata prijorità u jiġi appoġġat (17).

(40)

Barra minn hekk, l-investigazzjoni oriġinali stabbiliet ukoll li l-GTĊ mhux biss ippromwova l-industrija tar-roti elettriċi iżda wkoll il-partijiet tagħhom, b’mod partikolari l-magni u l-batteriji (18)permezz ta’ diversi pjanijiet fil-livell nazzjonali, reġjonali u settorjali. Notevolment, it-13-il Pjan ta’ Ħames Snin irrefera espliċitament għall-appoġġ għall-iżvilupp ta’ ħażna tal-enerġija b’effiċjenza għolja filwaqt li l-Pjan ta’ Żvilupp tal-Industrija Ħafifa elenka l-industrija tal-batteriji bħala industrija ewlenija. Barra minn hekk, il-parts tar-roti, speċifikament il-batteriji u l-metalli ħfief għall-oqfsa ġew elenkati bħala industriji mħeġġa fil- “Katalogu tal-Gwida ta’ Industriji ta’ Investiment Barrani” kif ukoll fil-Katalogu tal-Industriji ta’ Prijorità għall-Investiment Barrani fiċ-Ċina Ċentrali u tal-Punent. Fl-aħħar nett, il-batteriji tal-litju kienu parti mil-lista tal-industrija mħeġġa fil-Katalogu għall-Gwida tar-Ristrutturar tal-Industrija.

(41)

Għalhekk, il-Kummissjoni kkonkludiet fir-regolament oriġinali li l-industrija tar-roti elettriċi u l-partijiet tagħha kienu meqjusa bħala industriji ewlenin/strateġiċi, li l-iżvilupp tagħhom kien segwit b’mod attiv mill-GTĊ bħala objettiv ta’ politika (19).

(42)

It-talba għal reviżjoni ta’ skadenza kkonfermat li l-GTĊ kompla jappoġġa b’mod attiv l-iżvilupp tal-industrija tar-roti elettriċi u tal-parts, li għadhom jitqiesu bħala industriji ewlenin fiċ-Ċina permezz ta’ diversi dokumenti ta’ politika u leġiżlazzjoni, kif stabbilit hawn taħt.

(43)

L-14-il pjan ta’ ħames snin (“l-14-il FYP”) għall-perjodu mill-2021 sal-2025 jenfasizza l-viżjoni strateġika tal-GTĊ għat-titjib u l-promozzjoni tal-industriji ewlenin (20). Skont il-Kapitolu I tiegħu, waħda mil-linji prinċipali ta’ żvilupp hija l-promozzjoni tal-ammeljorament tal-istruttura industrijali tradizzjonali u l-approfondiment tar-“rivoluzzjoni teknoloġika u t-trasformazzjoni industrijali”. Din l-idea tkompli tiġi elaborata fil-Kapitolu IV, li għandu l-għan li jiżviluppa sistema industrijali moderna ottimizzata bl-objettiv li ċ-Ċina ssir “mutur tal-manifattura”. Sabiex l-industriji emerġenti “jaċċelleraw u jespandu”, il-pjan jappoġġa l-iżvilupp u jippromwovi l-produzzjoni ta’ “vetturi li jaħdmu bl-enerġija ġdida u prodotti ekoloġiċi u li ma jagħmlux ħsara lill-ambjent”, kif diġà kien il-każ fit-13-il Pjan ta’ Ħames Snin.

(44)

L-14-il Pjan ta’ Ħames Snin ikompli jiġi implimentat permezz ta’ pjanijiet lokali u settorjali, li jistabbilixxu d-direzzjoni tal-politiki li għandhom jiġu implimentati għall-iżvilupp ta’ industriji u setturi strateġiċi.

(45)

Minbarra l-14-il Pjan ta’ Ħames Snin, kull livell subċentrali jimplimentah bi pjanijiet provinċjali u lokali biex jiżgura azzjoni effettiva. B’mod partikolari:

(46)

Il-provinċja ta’ Tianjin fl-14-il Pjan ta’ Ħames Snin tagħha għall-iżvilupp ta’ kwalità għolja tal-industrija tal-manifattura tipprevedi t-trasformazzjoni aċċellerata f’ “belt tal-manifattura b’saħħitha” (21). Tianjin iqis is-settur tar-roti/roti elettriċi bħala “industrija vantaġġuża”, li għandha tiġi żviluppata “b’mod vigoruż” (22). Il-vetturi li jaħdmu bl-enerġija ġdida huma wkoll prijorità ewlenija għal Tianjin, peress li l-provinċja tixtieq tiżviluppa vetturi li jiffrankaw l-enerġija u vetturi li jaħdmu bl-enerġija ġdida. Il-pjan tal-Provinċja ta’ Tianjin jistenna li jespandi l-industrija tal-batteriji tal-jon tal-litju permezz tal-iżvilupp ta’ materjali, bħan-nikil, il-grafit u s-siliċju tal-karbonju, sabiex tiġi aċċellerata l-applikazzjoni tagħhom f’vetturi li jaħdmu bl-enerġija ġdida. Materjali oħra rilevanti għall-produzzjoni tar-roti elettriċi, bħal folji tal-liga tal-aluminju tal-manjeżju għall-partijiet, eż. hubs tar-roti, azzar ta’ livell għoli għal vireg tal-azzar u wajers tal-azzar, huma wkoll qasam ta’ appoġġ fokali. (23) B’appoġġ għall-14-il Pjan ta’ 5-il sena, l-Uffiċċju għall-Affarijiet Barranin tal-Gvern tal-Poplu Muniċipali ta’ Tianjin ippubblika lista ta’ 33 inċentiv ta’ politika għal titjib ekonomiku fl-ewwel trimestru tal-2023, inklużi sussidji ta’ mhux aktar minn għaxra (50) miljun għal kull kumpanija (24).

(47)

Il-pjan ta’ żvilupp ta’ kwalità għolja tal-industrija tal-manifattura fil-Provinċja ta’ Jiangsu matul l-14-il Pjan ta’ Ħames Snin jistabbilixxi mira biex jirnexxi fl-iżvilupp tal-industriji tal-manifattura. Vetturi ġodda tal-enerġija huma waħda mill-prijoritajiet industrijali ewlenin, li se jkunu appoġġati minn programmi ta’ riċerka u żvilupp u permezz tal-inkoraġġiment ta’ fużjonijiet u akkwiżizzjonijiet. (25) Il-batteriji tal-joni tal-litju jitqiesu bħala prodotti ewlenin għall-vetturi elettriċi u l-iżvilupp tagħhom għandu jiġi appoġġat permezz tal-forniment ta’ programmi ta’ R&Ż. (26)

(48)

Il-pjan ta’ azzjoni għall-promozzjoni ta’ progress kostanti u t-titjib fil-kwalità tal-ekonomija industrijali fil-Provinċja ta’ Zhejiang jipprevedi r-rinfurzar tal-katina industrijali b’fokus fuq ċerti industriji, inklużi vetturi li jaħdmu bl-enerġija ġdida. Il-vetturi ġodda tal-enerġija huma wieħed mis-sebgħa u għoxrin settur li għandhom jirċievu appoġġ finanzjarju mill-Provinċja ta’ Zhejiang (27).

(49)

Il-Pjan ta’ azzjoni għall-iżvilupp ta’ clusters tal-industrija b’pilastri strateġiċi tal-Industrija Ħafifa Moderna u t-Tessuti fil-Provinċja ta’ Guangdong (2021-2025) jelenka s-sistemi ta’ trażmissjoni tar-roti fost it-teknoloġiji u l-materjali ewlenin f’industriji ewlenin tal-industrija ħafifa moderna u t-tessuti. Il-pjan jelenka ħamest ibliet tal-Provinċja ta’ Guangdong bħala “widien tar-roti” Ċiniżi (jiġifieri Guangzhou, Shenzhen, Huizhou, Dongguan u Zhongshan). (28)

(50)

Fil-livell partikolari tas-settur tal-industrija, l-Assoċjazzjoni Ċiniża tar-Roti (“CBA”) ħarġet l-14-il Pjan ta’ Ħames Snin għar-Roti u r-Roti Elettriċi biex twitti t-triq għall-espansjoni tar-roti u r-roti elettriċi Ċiniżi għas-swieq barranin. Kif ġie kkonfermat ukoll fl-investigazzjoni oriġinali (29), is-CBA hija korp pubbliku skont it-tifsira tal-Artikolu 2(b) tar-Regolament bażiku. Is-CBA hija sussidjarja tal-Kunsill Nazzjonali tal-Industrija Ħafifa taċ-Ċina (“CNLIC” China National Light Industry Council), dak li qabel kien il-Ministeru tal-Industrija Ħafifa. Barra minn hekk, il-Bord tad-Diretturi tas-CBA għandu rabtiet mill-qrib mal-GTĊ. Barra dan, is-CEO jew il-President ta’ Intrapriża tal-istat jew assoċjazzjoni tar-roti għandu dejjem ikun membru tal-Partit Komunista Ċiniż (“CCP”). Anke fil-Bord ta’ kumpaniji tar-roti elettriċi privati, li huma membri tas-CBA u li huma fil-Bord tas-CBA, dejjem irid ikun hemm membru tas-CCP, xi ħaġa li tikkonferma n-natura tas-CBA bħala korp pubbliku.

(51)

Skont l-14-il Pjan tar-Roti, is-sitwazzjoni ġenerali għall-iżvilupp tal-industrija tar-roti/roti elettriċi għandha tiġi mmaniġġjata permezz ta’ riformi b’“mod ċentralizzat”, u permezz ta’ fokus fuq l-għan ġenerali tat-titjib fil-kwalità, it-titjib fl-effiċjenza, kif ukoll it-titjib u l-bini ta’ pajjiż b’industrija tar-roti/roti elettriċi b’saħħitha. Il-pjan jistabbilixxi wkoll miri għaż-żamma ta’ volum qawwi ta’ esportazzjoni ta’ roti/roti elettriċi u t-titjib tal-ishma mis-suq internazzjonali tal-produtturi Ċiniżi (30). Dawk l-għanijiet jenħtieġ li jintlaħqu permezz tal-implimentazzjoni ta’ politiki ta’ appoġġ, bħall-għoti ta’ fondi speċjali biex jappoġġaw l-iżvilupp tal-industrija tar-roti/tar-roti elettriċi (31).

(52)

L-14-il Pjan ta’ Ħames Snin għar-Roti u r-Roti Elettriċi jiddeskrivi tliet aspetti tal-iżvilupp tal-industrija Ċiniża tar-roti/roti elettriċi għal perjodu lil hinn mill-14-il perjodu ta’ 5 snin: (i) sal-2025, il-ħolqien ta’ nazzjon kbir tar-roti/roti elettriċi għandu jiġi kkonsolidat permezz tal-modernizzazzjoni; (ii) sal-2035, l-industrija tar-roti/roti elettriċi Ċiniża se ssir is-setgħa predominanti fis-suq internazzjonali; (iii) sa nofs is-seklu, iċ-Ċina se tkun saret produttur tar-roti/roti elettriċi bl-istatus ta’ nazzjon b’saħħtu tar-roti/roti elettriċi. (32) Minbarra l-pjan nazzjonali ġenerali għall-industrija tar-roti/roti elettriċi, l-14-il Pjan ta’ Ħames Snin għar-Roti u r-Roti Elettriċi jipprevedi “strateġiji ta’ żvilupp reġjonali kkoordinati” (33). Għaxar reġjuni u provinċji (34) huma diretti biex iwettqu t-tqassim industrijali previst sabiex jippromwovu l-produzzjoni tar-roti elettriċi, tar-roti u tal-parts tar-roti bil-ħsieb li jsiru globali.

(53)

Dokument ta’ politika importanti ieħor huwa l-Opinjonijiet ta’ Gwida dwar il-Promozzjoni tal-Iżvilupp ta’ Kwalità Għolja tal-Industrija tad-Dawl, li jipprevedi diversi miżuri ta’ appoġġ għall-industrija Ċiniża tar-roti, tar-roti elettriċi u tal-komponenti. (35) L-Opinjonijiet għandhom l-għan li jħeġġu l-innovazzjoni u l-manifattura tat-tipi kollha ta’ roti u roti elettriċi u jiżviluppaw il-produzzjoni ta’ batteriji għat-trasformazzjoni diġitali u ekoloġika. Dan għandu jinkiseb permezz ta’ miżuri ta’ appoġġ fiskali u finanzjarju, il-ħolqien ta’ raggruppamenti industrijali integrati, u l-għoti ta’ vantaġġi permezz tal-politiki “Belt and Road” u “Going Global” (36).

(54)

Il-“Made in China 2025” hija politika industrijali mmexxija mill-Istat li tfittex li tagħmel ir-RPĊ dominanti fil-manifattura globali ta’ teknoloġija avvanzata permezz ta’ sussidji tal-gvern, Intrapriżi tal-Istat, u akkwist ta’ proprjetà intellettwali, u b’hekk tissostitwixxi l-kapaċità barranija. (37) L-Uffiċċju tar-Rappreżentant tal-Kummerċ tal-Istati Uniti (“USTR”) sab ukoll li l-Istat Ċiniż stabbilixxa fondi b’aktar minn USD 500 biljun disponibbli biex jappoġġa l-industriji identifikati (38).

(55)

Il-politika Made in China 2025 tinkludi miżuri direttament rilevanti għall-manifattura tar-roti elettriċi, billi telenka l-kompiti strateġiċi li għandhom jiġu implimentati sal-2025, inkluż l-intensifikazzjoni tal- “isforzi fir-riċerka u l-iżvilupp ta’ teknoloġija, proċess u tagħmir avvanzati għall-iffrankar tal-enerġija u l-protezzjoni ambjentali”, it-tisħiħ tar- “riċerka u l-iżvilupp ta’ prodott ekoloġiku, il-ġeneralizzazzjoni ta’ tekniki ta’ piż ħafif, konsum baxx tal-enerġija u rkupru faċli, il-promozzjoni kontinwa tal-effiċjenza enerġetika ta’ prodotti li jużaw l-enerġija terminali inkluż il-mutur, il-bojler, il-magna tal-kombustjoni interna u l-apparat elettriku, […] u l-promozzjoni enerġetika tal-iżvilupp ekoloġiku u b’livell baxx ta’ emissjonijiet tal-karbonju ta’ industrija ta’ materjal ġdid, industrija ġdida tal-enerġija, industrija tat-tagħmir ta’ livell għoli”  (39) .

(56)

Id-Deċiżjoni Nru 40 tal-Kunsill tal-Istat hija dokument legali maħruġ fl-2005 li għandu l-għan li jippromwovi aġġustamenti tal-istruttura industrijali fiċ-Ċina billi jħeġġeġ l-iżvilupp ta’ industriji ta’ teknoloġija avvanzata u l-eliminazzjoni ta’ kapaċità ta’ produzzjoni skaduta (40). Il-“Katalogu ta’ Gwida għall-Aġġustament tal-Istruttura Industrijali”, li huwa miżura ta’ implimentazzjoni tad-Deċiżjoni Nru 40, jipprovdi gwida kruċjali lill-GTĊ għal proġetti ta’ investiment u jifformula u jinforza politiki dwar il-finanzi pubbliċi, it-tassazzjoni, il-kreditu, l-importazzjoni u l-esportazzjoni, kif ukoll l-art (41).

(57)

Id-Deċiżjoni Nru 40, li hija legalment vinkolanti fuq il-korpi pubbliċi u l-operaturi ekonomiċi fir-RPĊ, tikklassifika setturi industrijali differenti fi tliet kategoriji, jiġifieri: proġetti mħeġġa, ristretti u pprojbiti. Skont id-Deċiżjoni Nru 40, bosta setturi ta’ rilevanza huma identifikati bħala mħeġġa, li mbagħad jirċievu bosta sussidji (il-Kunsill tal-Istat jagħti struzzjonijiet lill-istituzzjonijiet finanzjarji Ċiniżi kollha biex jipprovdu appoġġ ta’ kreditu u jwiegħed l-implimentazzjoni ta’ “politiki preferenzjali oħra dwar il-proġetti mħeġġa”). B’mod partikolari, il-batteriji u l-materjali ħfief huma kklassifikati taħt il-kategorija “mħeġġa” (skont il-Kapitolu XIX) fl-edizzjoni tal-2019 tal-Katalogu ta’ Gwida għall-Aġġustament tal-Istruttura Industrijali (42).

(58)

Barra dan, il-parts tar-roti u, b’mod speċifiku, il-batteriji u l-metalli ħfief għall-frejms huma parti mil-lista ta’ “industriji mħeġġa” fil-Katalogu tal-Industriji għall-Inkoraġġiment tal-Investiment Barrani (il-Verżjoni tal-2020) (43).

(59)

Abbażi ta’ dan ta’ hawn fuq u fin-nuqqas ta’ kwalunkwe informazzjoni li tindika mod ieħor, isegwi li r-roti elettriċi u l-katina tal-provvista tagħhom għadhom parti mill-industriji “mħeġġa” mill-GTĊ u, b’riżultat ta’ dan, il-benefiċjarju tal-appoġġ kontinwu tal-GTĊ li jinkludi aċċess għal finanzjament preferenzjali, eżenzjonijiet mit-taxxa, inputs għal remunerazzjoni inqas minn adegwata (art, batteriji, magni, eċċ.) kif ukoll aċċess għal programmi ta’ għotja kemm fil-livell nazzjonali, reġjonali kif ukoll lokali.

(60)

Fid-dawl tan-nuqqas ta’ kooperazzjoni, il-Kummissjoni ddeċidiet li teżamina skont l-Artikolu 28 tar-Regolament bażiku, l-ewwel, jekk is-sussidji kkumpensati fl-investigazzjoni oriġinali u li huma msemmija fit-talba ta’ skadenza komplewx jagħtu benefiċċju lill-industrija tar-roti elettriċi fir-RPĊ matul il-perjodu ta’ investigazzjoni għar-reviżjoni u, it-tieni, il-probabbiltà li s-sussidjar ikompli jekk il-miżuri jitħallew jiskadu.

(61)

Dawk is-sussidji jew il-programmi ta’ sussidju huma dawn li ġejjin:

(62)

Fl-investigazzjoni oriġinali (44), il-Kummissjoni stabbiliet li l-banek tal-Istat (“SOBs”) kienu korpi pubbliċi, peress li kienu jwettqu funzjonijiet governattivi u, b’hekk, kienu jeżerċitaw awtorità tal-gvern. Alternattivament, il-Kummissjoni sabet ukoll li dawn il-banek fi kwalunkwe każ ġew fdati u diretti mill-GTĊ sabiex iwettqu funzjonijiet normalment vestiti fil-gvern skont it-tifsira tal-Artikolu 3(1)(a)(iv) tar-Regolament bażiku.

(63)

Il-Kummissjoni stabbiliet ukoll, fuq il-bażi tal-qafas legali normattiv li japplika għas-settur finanzjarju fir-RPĊ, notevolment l-Artikolu 34 tal-Liġi Bankarja Kummerċjali, l-Artikolu 15 tar-Regoli Ġenerali dwar is-Self u d-Deċiżjoni Nru 40, li l-banek kummerċjali privati fiċ-Ċina ġew fdati jew diretti skont it-tifsira tal-Artikolu 3(1)(a) (iv) tar-Regolament bażiku biex isegwu l-politiki tal-gvern (45).

(64)

Għalhekk, il-Kummissjoni kkonkludiet fl-investigazzjoni oriġinali li l-istituzzjonijiet finanzjarji kollha li joperaw fir-RPĊ segwew politiki tal-gvern u pprovdew self, kif ukoll linji ta’ kreditu, (46) b’rati preferenzjali lill-industrija tar-roti elettriċi, li tqieset bħala industrija mħeġġa.

(65)

Skont it-tifsira tal-Artikoli 3(2) u 6(b) tar-Regolament bażiku, instab li jeżisti benefiċċju sal-punt li s-self u l-linji ta’ kreditu ngħataw b’termini aktar favorevoli minn dawk li r-riċevitur seta’ jikseb f’suq ħieles. Il-benefiċċju mogħti lir-riċevituri kien id-differenza bejn l-ammont ta’ mgħax li l-kumpanija fil-fatt ħallset u l-ammont li l-kumpanija tħallas għal self kummerċjali/linja ta’ kreditu komparabbli li tista’ tinkiseb fis-suq ħieles. (47)

(66)

Dan il-programm ta’ sussidju nstab li kien speċifiku skont it-tifsira tal-Artikolu 4(2)(a) tar-Regolament bażiku, billi l-istituzzjonijiet mutwanti pprovdew biss self u linji ta’ kreditu preferenzjali lil għadd limitat ta’ kumpaniji/industriji li huma meqjusa bħala industriji ewlenin/strateġiċi mill-GTĊ, li l-industrija tar-roti elettriċi hija waħda minnhom.

(67)

Ir-rata ta’ sussidju stabbilita fl-investigazzjoni oriġinali fir-rigward ta’ din l-iskema varjat minn 0,23 % sa 2,77 % għall-kumpaniji li kkooperaw inklużi fil-kampjun.

(68)

Fit-talba għal reviżjoni ta’ skadenza, ir-rikorrent ipprovda evidenza li l-industrija tar-roti elettriċi fir-RPĊ kompliet tibbenefika minn finanzjament preferenzjali wara l-impożizzjoni tal-miżuri oriġinali (48).

(69)

Skont ir-rikorrent, il-banek tal-Istat Ċiniż għadhom jiddominaw is-sistema bankarja Ċiniża u għalhekk għandhom rwol ċentrali fl-appoġġ u l-finanzjament tal-industriji identifikati bħala mħeġġa mill-GTĊ. Huwa jsostni wkoll li l-finanzjament preferenzjali mill-banek tal-Istat żdied mill-2021 ’l hawn, b’mod partikolari fir-rigward tal-promozzjoni tal-enerġija nadifa, it-trasport ekoloġiku, it-tnaqqis tal-karbonju u t-trasformazzjoni tal-iffrankar tal-enerġija tal-industriji tradizzjonali (49).

(70)

L-evidenza pprovduta li nġabret mir-rikorrent uriet li l-produtturi tar-roti elettriċi komplew jirċievu self u linji ta’ kreditu preferenzjali mill-banek Ċiniżi. Self u linji ta’ kreditu bħal dawn jidhru fir-Rapporti Annwali ta’ għadd ta’ kumpaniji produtturi. Pereżempju, il-produttur tar-roti elettriċi Yadea jirrapporta fir-rapporti finanzjarji tal-2022 tiegħu, żewġ selfiet bla mgħax mill-gvernijiet lokali għall-kostruzzjoni ta’ faċilitajiet ġodda tal-produzzjoni fl-ammonti ta’ CNY 460 miljun u CNY 39 miljun, rispettivament (50). Barra dan, produttur ieħor tar-roti elettriċi, Joykie kiseb linji ta’ kreditu minn bosta banek Ċiniżi fl-2022 (51). Għalkemm it-termini u l-kundizzjonijiet kemm tas-self kif ukoll tal-linji ta’ kreditu huma dokumenti kummerċjali kunfidenzjali, l-applikant isostni li, simili għall-investigazzjoni oriġinali, dan is-self u l-linji ta’ kreditu komplew jiġu pprovduti b’kundizzjonijiet preferenzjali minħabba li l-industrija tar-roti elettriċi għadha industrija mħeġġa.

(71)

Il-Kummissjoni stabbiliet li matul il-perjodu ta’ investigazzjoni għar-reviżjoni, il-qafas legali ġenerali li kien jeżisti matul l-investigazzjoni oriġinali u li serva biex jidderieġi lill-istituzzjonijiet finanzjarji biex jallinjaw mal-objettivi ta’ politika industrijali meta jieħdu istituzzjonijiet finanzjarji kien għadu prevalenti fiċ-Ċina. Tabilħaqq, mill-investigazzjoni oriġinali, l-Istat Ċiniż kompla jsaħħaħ il-kontroll tiegħu fuq is-suq finanzjarju biex iservi aħjar l-ekonomija reali u jikkonforma mal-għanijiet tal-politiki industrijali taċ-Ċina, mhux l-inqas billi jibgħat il-fondi lill-industriji ta’ prijorità. Dan jintwera b’mod partikolari minn (i) l-Artikolu 34 tal-Liġi Bankarja li jiddikjara li l-banek kummerċjali għandhom iwettqu n-negozju tagħhom ta’ self f’ konformità mal-ħtiġijiet tal-iżvilupp ekonomiku u soċjali nazzjonali u taħt il-gwida tal-politiki industrijali tal-Istat, (ii) l-Artikolu 15 tar-Regoli Ġenerali dwar is-Self li jistabbilixxi li l-imgħax fuq is-self jista’ jiġi ssussidjat meta f’konformità mal-politika tal-Istat għall-promozzjoni tat-tkabbir ta’ ċerti industriji u żoni ekonomiċi u, (iii) id-Deċiżjoni Nru 40 li tiddeżinja ċerti setturi industrijali bħala “mħeġġa” li għandhom jibbenefikaw minn aċċess privileġġat għall-kreditu (52).

(72)

F’dan ir-rigward, il-Kummissjoni fakkret li kienet sabet f’din l-investigazzjoni (ara l-premessa (59)) li l-industrija tar-roti elettriċi għadha industrija mħeġġa fir-RPĊ.

(73)

L-istrumentalizzazzjoni sistematika tas-settur tal-finanzjament Ċiniż għall-finijiet li jiġu segwiti l-politiki industrijali u jiġi pprovdut finanzjament preferenzjali lill-industriji mħeġġa tkompli tiġi kkorroborata mis-sejbiet tal-Kummissjoni f’bosta investigazzjonijiet antisussidji riċenti (53).

(74)

Minħabba li dan il-programm ta’ sussidju huwa limitat għal kumpaniji f’industriji mħeġġa biss u mhuwiex disponibbli għas-setturi ekonomiċi kollha, il-Kummissjoni sabet li huwa speċifiku skont it-tifsira tal-Artikolu 4(2)(a) tar-Regolament bażiku.

(75)

Fin-nuqqas ta’ kooperazzjoni mill-produtturi Ċiniżi, mill-GTĊ u mill-istituzzjonijiet finanzjarji fiċ-Ċina, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont ta’ sussidju riċevut matul il-perjodu ta’ investigazzjoni għar-reviżjoni.

(76)

Madankollu, f’reviżjoni ta’ skadenza mhuwiex meħtieġ li jiġi kkwantifikat l-ammont eżatt ta’ sussidji riċevuti. Abbażi tal-evidenza disponibbli, il-Kummissjoni setgħet tikkonkludi li l-GTĊ kompla jipprovdi self u linji ta’ kreditu lill-industrija tar-roti elettriċi fuq termini preferenzjali f’konformità mal-politika stipulata f’diversi pjanijiet u atti legali oħra li jirreferu għall-industrija tar-roti elettriċi bħala industrija mħeġġa. It-trasferiment dirett ta’ fondi fil-forma ta’ finanzjament preferenzjali kompla jkun disponibbli għall-kumpaniji fl-industrija tar-roti elettriċi matul il-perjodu ta’ investigazzjoni għar-reviżjoni.

(77)

Fid-dawl tal-kunsiderazzjonijiet ta’ hawn fuq, u fin-nuqqas ta’ kwalunkwe argument għall-kuntrarju, il-Kummissjoni kkonkludiet li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ self u linji ta’ kreditu preferenzjali matul il-perjodu ta’ investigazzjoni għar-reviżjoni. Fid-dawl tal-eżistenza ta’ kontribuzzjonijiet finanzjarji, benefiċċju mogħti u speċifiċità, dawn il-programmi ta’ sussidju jkomplu jitqiesu bħala kumpensabbli.

(78)

Fl-investigazzjoni oriġinali, il-Kummissjoni stabbiliet li l-produtturi tar-roti elettriċi Ċiniżi rċevew sussidji fil-forma ta’ assigurazzjoni ta’ kreditu għall-esportazzjoni b’termini preferenzjali (54).

(79)

B’mod partikolari, il-Kummissjoni stabbiliet li l-uniku fornitur fiċ-Ċina ta’ assigurazzjonijiet ta’ kreditu għall-esportazzjoni, il-Korporazzjoni tal-Assigurazzjoni tal-Esportazzjoni u l-Kreditu Ċiniża (“Sinosure”) kien korp pubbliku, li eżerċita funzjonijiet tal-gvern fir-rigward tas-settur tar-roti elettriċi.

(80)

Il-Kummissjoni stabbiliet ukoll li Sinosure pprovdiet assigurazzjonijiet ta’ kreditu għall-esportazzjoni lill-esportaturi tar- roti elettriċi b’termini preferenzjali, jiġifieri taħt il-kundizzjonijiet tas-suq, u b’hekk tat benefiċċju lill-produtturi esportaturi. Il-benefiċċju mogħti lir-riċevituri tqies bħala d-differenza bejn l-ammont tal-primjum li l-kumpanija ħallset fuq l-assigurazzjoni fuq terminu qasir ipprovduta minn Sinosure u l-ammont tal-primjum li l-kumpanija tħallas għal assigurazzjoni ta’ kreditu għall-esportazzjoni komparabbli li tista’ tinkiseb fis-suq. (55)

(81)

Fl-aħħar nett, peress li din l-iskema ta’ sussidju kienet kontinġenti fuq l-esportazzjoni, il-Kummissjoni kkonkludiet li kienet speċifika skont l-Artikolu 4(4)(a) tar-Regolament bażiku u għalhekk kumpensabbli.

(82)

Ir-rata ta’ sussidju stabbilita fl-investigazzjoni oriġinali fir-rigward ta’ din l-iskema varjat minn 0 % sa 0,50 % għall-kumpaniji li kkooperaw inklużi fil-kampjun.

(83)

Simili għas-sitwazzjoni fl-investigazzjoni oriġinali, Sinosure għadha kompletament proprjetà tal-Istat Ċiniż. Skont ir-rikorrent, Sinosure għandha l-mandat, f’konformità mal-politiki diplomatiċi, kummerċjali internazzjonali, industrijali, fiskali u finanzjarji tal-GTĊ, li tippromwovi l-esportazzjonijiet u l-investimenti Ċiniżi, speċjalment l-esportazzjonijiet ta’ prodotti kapitali ta’ teknoloġija avvanzata jew ta’ valur miżjud għoli, billi toffri assigurazzjoni ta’ kreditu għall-esportazzjoni kontra riskji ta’ nuqqas ta’ pagament.

(84)

Il-bażijiet legali għall-attivitajiet ta’ Sinosure huma l-istess bħal dawk applikabbli matul l-investigazzjoni oriġinali, b’mod partikolari n-Notifika dwar l-Implimentazzjoni tal-Istrateġija għall-Promozzjoni tal-Kummerċ permezz tax-Xjenza u t-Teknoloġija bl-Użu tal-Assigurazzjoni ta’ Kreditu għall-Esportazzjoni, Sinosure (Shang Ji Fa [2004] Nru 368) maħruġa b’mod konġunt mill-MOFCOM u Sinosure, u, n-Notifika dwar il-Ħruġ tal-Katalogu tal-Esportazzjoni tal-2006 ta’ Prodotti ta’ Teknoloġija Avvanzata taċ-Ċina, (Guo Ke Fa Ji Zi [2006] Nru 16.

(85)

Skont is-sit web proprju ta’ Sinosure (56), hija kumpanija tal-assigurazzjoni ffinanzjata mill-Istat u orjentata lejn il-politika li hija stabbilita u appoġġata mill-Istat biex tippromwovi l-iżvilupp u l-kooperazzjoni ekonomiċi u kummerċjali barranin taċ-Ċina. Hija tippromwovi l-esportazzjonijiet Ċiniżi ta’ oġġetti, teknoloġiji u servizzi, speċjalment l-esportazzjoni ta’ prodotti ta’ kapital ta’ teknoloġija avvanzata u ta’ valur miżjud għoli, bħal prodotti mekkaniċi u elettriċi u b’hekk isservi b’mod effettiv għal strateġiji nazzjonali, tappoġġa b’mod preċiż l-iżvilupp tal-intrapriżi u tiżgura s-sostenibbiltà finanzjarja. Peress li hija istituzzjoni finanzjarja orjentata lejn il-politika li ġiet stabbilita biex tissodisfa d-domandi tal-globalizzazzjoni ekonomika u l-iżvilupp tal-ekonomija u l-kummerċ barranin taċ-Ċina, hija tiddikjara b’mod espliċitu li se tiffoka mill-qrib fuq l-għan li sservi l-istrateġiji nazzjonali.

(86)

Barra minn hekk, ir-rwol kontinwu ta’ Sinosure bħala pjattaforma għall-appoġġ tal-politiki tal-Gvern jibqa’ l-istess, kif jidher minn sejħa konġunta tal-2022 mill-MOFCOM u Sinosure biex “ jingħata appoġġ lill-intrapriżi sabiex japprofondixxu d-destinazzjonijiet tradizzjonali tal-esportazzjoni u jisfruttaw swieq diversifikati, b’fokus fuq il-forniment ta’ servizzi ta’ assigurazzjoni ta’ kreditu għall-esportazzjonijiet lejn pajjiżi tul il-“Belt and Road”, is-swieq emerġenti, u s-sħab taż-żona ta’ kummerċ ħieles (57).

(87)

Minn dan isegwi li Sinosure għadha korp pubbliku li jeżerċita funzjonijiet tal-gvern, b’mod partikolari fir-rigward tal-industriji mħeġġa. Hija tipprovdi assigurazzjoni ta’ kreditu għall-esportazzjoni b’termini aktar favorevoli minn dawk li r-riċevitur normalment ikun jista’ jikseb fis-suq jew tipprovdi kopertura tal-assigurazzjoni li nkella assolutament ma tkunx disponibbli fis-suq. Peress li l-industrija tar-roti elettriċi Ċiniża, bħala parti mill-industrija tal-vetturi elettriċi u t-trasport ekoloġiku, hija industrija mħeġġa u orjentata lejn l-esportazzjoni, il-Kummissjoni kkonkludiet li din għadha appoġġata minn Sinosure. Is-sejba li Sinosure għadha tipprovdi assigurazzjoni ta’ kreditu lill-industriji mħeġġa tkompli tiġi kkorroborata mis-sejbiet tal-Kummissjoni f’bosta investigazzjonijiet antisussidji riċenti (58).

(88)

Is-sussidji pprovduti taħt l-iskema ta’ assigurazzjoni ta’ kreditu huma speċifiċi peress li ma jistgħux jinkisbu mingħajr esportazzjoni u b’hekk huma kontinġenti fuq l-esportazzjoni skont it-tifsira tal-Artikolu 4(4)(a) tar-Regolament bażiku.

(89)

Fin-nuqqas ta’ tweġibiet għall-kwestjonarju mill-produtturi Ċiniżi, mill-GTĊ u minn Sinosure, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont ta’ sussidju riċevut matul il-perjodu ta’ investigazzjoni għar-reviżjoni.

(90)

Madankollu, f’reviżjoni ta’ skadenza mhuwiex meħtieġ li jiġi kkwantifikat l-ammont eżatt ta’ sussidji riċevuti. Abbażi tal-evidenza disponibbli, il-Kummissjoni setgħet tikkonkludi li Sinosure kompliet, matul il-perjodu ta’ investigazzjoni għar-reviżjoni, tipprovdi assigurazzjoni ta’ kreditu għall-esportazzjoni fuq termini preferenzjali f’konformità mal-politika stipulata f’diversi pjanijiet u atti legali oħra li jirreferu għall-industrija tar-roti elettriċi bħala industrija mħeġġa.

(91)

Fid-dawl tal-kunsiderazzjonijiet ta’ hawn fuq, u fin-nuqqas ta’ kwalunkwe argument għall-kuntrarju, il-Kummissjoni kkonkludiet li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ assigurazzjoni ta’ kreditu għall-esportazzjoni fuq termini preferenzjali. Fid-dawl tal-eżistenza ta’ kontribuzzjonijiet finanzjarji, benefiċċju mogħti u speċifiċità, dawn il-programmi ta’ sussidju jkomplu jitqiesu bħala kumpensabbli.

(92)

L-investigazzjoni oriġinali sabet li l-produtturi Ċiniżi tar-roti elettriċi rċevew sussidji fil-forma ta’ magni għal remunerazzjoni inqas minn adegwata (59).

(93)

L-ewwel nett, il-Kummissjoni kkonfermat li s-suq domestiku Ċiniż għall-magni kien fil-biċċa l-kbira ddominat mill-fornituri domestiċi Ċiniżi li kellhom sehem mis-suq ta’ aktar minn 90 %. Dawk il-fornituri kienu jew kumpaniji tal-Istat jew membri tal-Assoċjazzjoni Ċiniża tar-Roti (CBA) u sa ċertu punt operaturi ewlenin subordinati li ġew fdati biex jimplimentaw il-politika nazzjonali sabiex jintlaħqu l-objettivi usa’ relatati mal-produzzjoni tar-roti elettriċi (60).

(94)

It-tieni nett, il-Kummissjoni stabbiliet, fuq il-bażi ta’ diversi dokumenti legali, b’mod partikolari t-12-il Pjan ta’ Ħames Snin għar-Roti u r-Roti Elettriċi, it-13-il Pjan ta’ Ħames Snin għar-Roti u r-Roti Elettriċi u l-Pjan ta’ Żvilupp tal-Industrija Ħafifa (2016-2020), il-politika tal-GTĊ biex itejjeb il-kwalità u l-prestazzjoni ta’ inputs kruċjali għall-industrija tar-roti elettriċi, li l-magni huma parti integrali minnha, u biex jikkompleta l-katina tal-provvista industrijali tar-roti sabiex tkun tista’ tiġi stabbilita katina tal-produzzjoni tar-roti elettriċi integrata vertikalment u awtonoma fiċ-Ċina (61).

(95)

It-tielet, il-Kummissjoni sabet li l-industrija tar-roti elettriċi u l-industriji tal-magni huma interkonnessi u li l-iżvilupp tal-industrija tal-magni huwa importanti għall-iżvilupp tal-industrija tar-roti elettriċi. F’dan ir-rigward, il-Kummissjoni sabet ukoll li l-GTĊ ipprovda sussidji lill-industrija tal-magni bl-għan li jtejjeb il-kompetittività tal-katina kollha kemm hi tal-industrija, inkluża l-industrija tar-roti elettriċi. Għaldaqstant, il-Kummissjoni kkonkludiet li l-GTĊ fada jew idderieġa lill-produtturi Ċiniżi tal-magni biex ifornu magni lill-industrija tar-roti elettriċi għal renumerazzjoni inqas minn adegwata.

(96)

Fl-investigazzjoni oriġinali, il-Kummissjoni stabbiliet ukoll li s-sussidji fil-forma ta’ magni għal renumerazzjoni inqas minn adegwata kienu speċifiċi skont l-Artikolu 4(2)(b) tar-Regolament bażiku peress li għadd limitat biss ta’ kumpaniji/industriji setgħu jibbenefikaw mill-iskema u li kien ingħata benefiċċju. Il-benefiċċju għall-kumpaniji inklużi fil-kampjun ġie kkalkolat fl-investigazzjoni oriġinali billi tqabblu l-prezzijiet domestiċi ma’ dawk tal-esportazzjoni tal-magni mill-akbar fornitur domestiku tal-magni. Id-differenza, espressa bħala perċentwal, ġiet applikata għall-prezzijiet imħallsa mill-produtturi esportaturi inklużi fil-kampjun għax-xiri ta’ magni mingħand fornituri domestiċi. (62)

(97)

Ir-rata ta’ sussidju stabbilita fl-investigazzjoni oriġinali fir-rigward ta’ din l-iskema varjat minn 0,78 % sa 5,44 % għall-kumpaniji li kkooperaw inklużi fil-kampjun.

(98)

Ir-rikorrent iddikjara li l-industrija tal-magni Ċiniża kompliet tiġi fdata jew diretta mill-GTĊ biex tipprovdi magni b’renumerazzjoni inqas minn adegwata lill-industrija tar-roti elettriċi (63).

(99)

Skont ir-rikorrent, il-produtturi Ċiniżi tal-magni komplew, simili għas-sitwazzjoni matul il-perjodu ta’ investigazzjoni oriġinali, ikunu soġġetti għal diversi pjanijiet ta’ politika, li fihom il-GTĊ jindika appoġġ pubbliku lill-industrija tal-magni minħabba l-pożizzjoni tagħhom fil-katina tal-provvista industrijali tar-roti elettriċi fiċ-Ċina.

(100)

L-14-il Pjan ta’ Ħames Snin għar-Roti u r-Roti Elettriċi (64) jirreferi għall-iżvilupp tas-sistema awżiljarja tar-roti elettriċi bħala wieħed mill-proġetti ta’ riċerka prinċipali għall-membri tas-CBA. Barra dan, ir-Rapport taċ-Ċina dwar l-Analiżi tal-Fattibbiltà tal-Investiment għall-Prospetti ta’ Riċerka u Żvilupp fil-Fond tas-Suq tal-Industrija tal-Magni tar-Roti Elettriċi għall-perjodu 2022-2027 (65) jikkonferma wkoll li l-GTĊ jipprovdi sussidji għall-magni li għandhom l-għan li jtejbu l-kompetittività tal-katina kollha kemm hi tal-industrija inkluża l-industrija tar-roti elettriċi. (66) Barra dan, l-14-il Pjan ta’ Ħames Snin għall-Iżvilupp Ekonomiku u Soċjali Nazzjonali tar-Repubblika tal-Poplu taċ-Ċina u d-Deskrizzjoni tal-Għanijiet fuq Terminu Twil għall-2035 jipprovdu wkoll appoġġ qawwi għall-industrija tal-manifattura intelliġenti ta’ livell għoli, intelliġenti u ekoloġika, bħar-roti elettriċi u l-magni tar-roti elettriċi. Barra minn hekk, kif imsemmi fil-premessa (55) hawn fuq, l-istrateġija Made In China 2025 tipprevedi tisħiħ “fir-riċerka u l-iżvilupp ta’ teknoloġiji, proċessi u tagħmir avvanzati għall-iffrankar tal-enerġija u l-ħarsien tal-ambjent” , it-tisħiħ tar- “riċerka u l-iżvilupp ta’ prodotti ekoloġiċi, il-ġeneralizzazzjoni ta’ tekniki ta’ konsum baxx tal-enerġija u rkupru faċli, il-promozzjoni kontinwa tal-effiċjenza enerġetika ta’ prodotti li jużaw l-enerġija terminali, inklużi mutur, bojler, magna b’kombustjoni interna u apparat elettriku, […] u jippromwovu enerġetikament l-iżvilupp ta’ industrija ta’ materjal ġdid, industrija ta’ enerġija ġdida u industrija ta’ tagħmir ta’ livell għoli”.

(101)

Ir-rikorrent ipprovda wkoll evidenza li l-produtturi Ċiniżi tal-magni komplew jirċievu sussidji sinifikanti fil-forma ta’ għotjiet, tnaqqis fit-taxxa, finanzjament preferenzjali, eċċ (67).

(102)

Fin-nuqqas ta’ kooperazzjoni mill-GTĊ jew minn kwalunkwe manifattur tal-magni Ċiniż, il-Kummissjoni kkonkludiet li l-istruttura tas-suq għall-magni fiċ-Ċina ma nbidlitx mill-investigazzjoni oriġinali ’l hawn. Għalhekk, u minħabba l-importanza kruċjali u integrali tal-industrija tal-magni għall-iżvilupp tal-industrija tar-roti elettriċi mħeġġa, il-Kummissjoni kkonkludiet li l-produtturi tal-magni fiċ-Ċina għadhom fdati jew diretti mill-GTĊ biex jipprovdu magni lill-industrija tar-roti elettriċi għal renumerazzjoni inqas minn adegwata, kif kien il-każ fl-investigazzjoni oriġinali.

(103)

Is-sussidji pprovduti taħt din l-iskema huma speċifiċi skont l-Artikolu 4(2)(a) tar-Regolament bażiku peress li għadd limitat biss ta’ kumpaniji/industriji jistgħu jibbenefikaw mill-iskema.

(104)

Fin-nuqqas ta’ tweġibiet għall-kwestjonarju mill-produtturi Ċiniżi tar-roti elettriċi, mill-produtturi Ċiniżi tal-magni u mill-GTĊ, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont ta’ sussidju riċevut matul il-perjodu ta’ investigazzjoni għar-reviżjoni.

(105)

Madankollu, f’reviżjoni ta’ skadenza mhuwiex meħtieġ li jiġi kkwantifikat l-ammont eżatt ta’ sussidji riċevuti. Abbażi tal-evidenza disponibbli, il-Kummissjoni xorta waħda setgħet tikkonkludi li l-GTĊ kompla jafda jew jidderieġi lill-produtturi tal-magni fiċ-Ċina biex jipprovdu lill-produtturi tar-roti elettriċi magni għal renumerazzjoni inqas minn adegwata, li jikkostitwixxu kontribuzzjoni finanzjarja li tagħti benefiċċju skont l-Artikolu 1(a)(iv) u l-Artikolu 6(d) tar-Regolament bażiku.

(106)

Fid-dawl tal-kunsiderazzjonijiet ta’ hawn fuq, il-Kummissjoni kkonkludiet li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ forniment ta’ magni għal renumerazzjoni inqas minn adegwata. Peress li dan jikkostitwixxi kontribuzzjoni finanzjarja li tagħti benefiċċju u li hija speċifika, is-sussidji taħt din l-iskema huma kumpensabbli.

(107)

L-investigazzjoni oriġinali sabet li l-produtturi Ċiniżi tar-roti elettriċi rċevew sussidji fil-forma ta’ batteriji għal remunerazzjoni inqas minn adegwata (68).

(108)

L-ewwel nett, il-Kummissjoni kkonfermat li porzjon kbir ta’ batteriji fornuti lill-industrija tar-roti elettriċi ġie prodott fiċ-Ċina minn produtturi (parzjalment) tal-Istat u membri tas-CBA u sa ċertu punt operaturi ewlenin subordinati li ġew fdati biex jimplimentaw il-politika nazzjonali sabiex jintlaħqu l-objettivi usa’ relatati mal-produzzjoni tar-roti elettriċi (69).

(109)

It-tieni nett, il-Kummissjoni stabbiliet ukoll, fuq il-bażi ta’ diversi dokumenti (ta’ politika) legali, b’mod partikolari l-Pjan ta’ Żvilupp tal-Industrija Ħafifa (2016-2020), il-pjan Made in China 2025, it-12 u t-13-il Pjan ta’ Ħames Snin għall-industrija tal-batteriji u r-rapport (“Analiżi fil-fond tal-industrija tal-batteriji tal-jon tal-litju għar-roti elettriċi fil-perjodu 2018-2023 u rapport ta’ gwida dwar it-13-il pjan ta’ żvilupp ta’ Ħames Snin”), il-politika tal-GTĊ biex tappoġġa l-industrija tal-batteriji u biex tkompli tintegra l-industriji tal-batteriji u tar-roti elettriċi permezz ta’ kooperazzjoni u alleanzi avvanzati. Dawn id-dokumenti ta’ politika rrikonoxxew ukoll l-eżistenza ta’ politika ta’ sussidju għar-roti elettriċi li jaħdmu bil-batterija biex tippromwovi l-popolarizzazzjoni u l-esportazzjoni tar-roti elettriċi. Għalhekk, fl-investigazzjoni oriġinali, il-Kummissjoni kkonkludiet li l-industrija tal-batteriji hija industrija appoġġata li tista’ tibbenefika minn diversi sussidji u hija marbuta mill-qrib ma’ dik tal-industrija tar-roti elettriċi (70).

(110)

It-tielet, il-Kummissjoni sabet ukoll li l-industrija tar-roti elettriċi u l-industriji tal-batteriji tal-jon tal-litju huma interkonnessi u li l-GTĊ segwa politika li permezz tagħha l-industrija tal-batteriji għandha tnaqqas il-kostijiet u l-prezzijiet tagħha permezz ta’ sussidji sabiex tippromwovi l-industrija tar-roti elettriċi. Għaldaqstant, il-Kummissjoni kkonkludiet li l-GTĊ fada jew idderieġa lill-produtturi Ċiniżi tal-batteriji biex ifornu lill-industrija tar-roti elettriċi batteriji għal renumerazzjoni inqas minn adegwata.

(111)

Il-benefiċċju għall-kumpaniji inklużi fil-kampjun ġie kkalkolat fl-investigazzjoni oriġinali billi tqabblu l-prezzijiet domestiċi ma’ dawk tal-esportazzjoni tal-magni li jaħdmu bil-batteriji mill-uniku fornitur domestiku tal-batteriji li kkoopera. Id-differenza, espressa bħala perċentwal, ġiet applikata għall-prezzijiet imħallsa mill-produtturi esportaturi inklużi fil-kampjun għax-xiri ta’ batteriji mingħand fornituri domestiċi. (71)

(112)

Fl-investigazzjoni oriġinali, il-Kummissjoni stabbiliet ukoll li s-sussidji fil-forma ta’ batteriji għal renumerazzjoni inqas minn adegwata kienu speċifiċi skont l-Artikolu 4(2)(b) tar-Regolament bażiku peress li għadd limitat biss ta’ kumpaniji/industriji setgħu jibbenefikaw mill-iskema.

(113)

Ir-rata ta’ sussidju stabbilita fl-investigazzjoni oriġinali fir-rigward ta’ din l-iskema varjat minn 0,38 % sa 8,97 % għall-kumpaniji li kkooperaw inklużi fil-kampjun.

(114)

Ir-rikorrent iddikjara li l-industrija tal-batteriji Ċiniża kompliet tiġi fdata jew diretta mill-GTĊ biex tipprovdi batteriji b’renumerazzjoni inqas minn adegwata lill-industrija tar-roti elettriċi (72).

(115)

Skont ir-rikorrent, il-produtturi Ċiniżi tal-batteriji komplew, simili għas-sitwazzjoni matul il-perjodu ta’ investigazzjoni oriġinali, ikunu soġġetti għal diversi pjanijiet ta’ politika, li fihom il-GTĊ jindika appoġġ pubbliku lill-industrija tal-batteriji tal-litju minħabba l-pożizzjoni tagħhom fil-katina tal-provvista industrijali tar-roti elettriċi fiċ-Ċina.

(116)

Ir-rikorrent jirreferi għall-14-il Pjan ta’ Ħames Snin għar-Roti u r-Roti Elettriċi (2012-2025), li jelenka l-iżvilupp tal-batteriji tal-litju għar-roti elettriċi bħala prijorità ewlenija għall-membri tas-CBA. F’dan ir-rigward ta’ min ifakkar li bosta produtturi tal-batteriji fiċ-Ċina huma membri tas-CBA. L-industrija tal-batteriji Ċiniża hija appoġġata wkoll taħt l-Istrateġija Made in China 2025 u t-13-il Pjan ta’ Ħames Snin għall-Industrija tal-batteriji li ġie adottat mill-Assoċjazzjoni tal-Industrija tal-Enerġija Kimika u Fiżika taċ-Ċina (73). Ir-Rapport taċ-Ċina dwar l-Analiżi tal-Fattibbiltà tal-Investiment għall-Prospetti ta’ Riċerka u Żvilupp fil-Fond tas-Suq tal-Industrija tal-Batteriji tal-Jon tal-Litju tar-Roti Elettriċi għall-perjodu 2022-2027 jikkonferma l-appoġġ kontinwu tal-industrija tal-batteriji Ċiniża (74)

(117)

Ir-rikorrent ipprovda wkoll evidenza li l-produtturi Ċiniżi tal-batteriji komplew jirċievu sussidji sinifikanti fil-forma ta’ għotjiet, tnaqqis fit-taxxa, finanzjament preferenzjali, eċċ (75).

(118)

Minn dan isegwi li l-industrija tal-batteriji fiċ-Ċina kompliet tkun industrija appoġġata li tista’ tibbenefika minn diversi sussidji u hija marbuta mill-qrib mal-iżvilupp tal-industrija tar-roti elettriċi.

(119)

Fin-nuqqas ta’ kooperazzjoni mill-GTĊ jew minn kwalunkwe manifattur tal-batteriji Ċiniż, il-Kummissjoni kkonkludiet li l-istruttura tas-suq għall-batteriji fiċ-Ċina ma nbidlitx mill-investigazzjoni oriġinali ’l hawn. Għalhekk, u minħabba l-importanza integrali tal-industrija tal-batteriji għall-iżvilupp tal-industrija tar-roti elettriċi mħeġġa, il-Kummissjoni kkonkludiet li l-produtturi tal-batteriji fiċ-Ċina għadhom fdati jew diretti mill-GTĊ biex jipprovdu batteriji lill-industrija tar-roti elettriċi għal renumerazzjoni inqas minn adegwata, kif kien il-każ fl-investigazzjoni oriġinali.

(120)

Is-sussidji pprovduti taħt din l-iskema huma speċifiċi skont l-Artikolu 4(2)(a) tar-Regolament bażiku peress li għadd limitat biss ta’ kumpaniji/industriji setgħu jibbenefikaw mill-iskema.

(121)

Fin-nuqqas ta’ tweġibiet għall-kwestjonarju mill-produtturi Ċiniżi tar-roti elettriċi, mill-produtturi Ċiniżi tal-batteriji u mill-GTĊ, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont ta’ sussidju riċevut matul il-perjodu ta’ investigazzjoni għar-reviżjoni.

(122)

Madankollu, f’reviżjoni ta’ skadenza mhuwiex meħtieġ li jiġi kkwantifikat l-ammont eżatt ta’ sussidji riċevuti. Abbażi tal-evidenza disponibbli, il-Kummissjoni xorta waħda setgħet tikkonkludi li l-GTĊ kompla jafda jew jidderieġi lill-produtturi tal-batteriji fiċ-Ċina biex jipprovdu lill-produtturi tar-roti elettriċi batteriji għal renumerazzjoni inqas minn adegwata, li jikkostitwixxu kontribuzzjoni finanzjarja li tagħti benefiċċju skont l-Artikolu 1(a)(iv) u l-Artikolu 6(d) tar-Regolament bażiku.

(123)

Fid-dawl tal-kunsiderazzjonijiet ta’ hawn fuq, u fin-nuqqas ta’ kwalunkwe argument għall-kuntrarju, il-Kummissjoni kkonkludiet li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ forniment ta’ batteriji għal renumerazzjoni inqas minn adegwata. Peress li dan jikkostitwixxi kontribuzzjoni finanzjarja li tagħti benefiċċju u li hija speċifika, is-sussidji taħt din l-iskema huma kumpensabbli.

(124)

L-investigazzjoni oriġinali sabet li l-produtturi Ċiniżi tar-roti elettriċi rċevew sussidji fil-forma ta’ drittijiet għall-użu tal-art għal remunerazzjoni inqas minn adegwata (76).

(125)

B’mod aktar speċifiku, il-Kummissjoni stabbiliet li ma kien hemm l-ebda suq li jiffunzjona għall-art fir-RPĊ u li l-użu ta’ parametru referenzjarju estern wera li l-prezzijiet mħallsa għad-drittijiet għall-użu tal-art kienu ferm inqas mir-rati tas-suq. Peress li l-industrija tar-roti elettriċi kienet industrija mħeġġa u li l-awtoritajiet lokali, meta jistabbilixxu l-prezzijiet, kellhom iqisu l-objettivi ta’ politika prevalenti tal-GTĊ, inkluż l-għoti ta’ aċċess preferenzjali għall-art għall-industriji mħeġġa, il-Kummissjoni kkonkludiet li l-kumpaniji inklużi fil-kampjun fl-investigazzjoni oriġinali rċevew art għal remunerazzjoni inqas minn adegwata. L-għoti ta’ dritt għall-użu tal-art għal remunerazzjoni inqas minn adegwata għalhekk tqies bħala sussidju li jagħti benefiċċju u skont it-tifsira tal-Artikolu 3(1)(a)(iii) u l-Artikolu 3(2) tar-Regolament bażiku.

(126)

Il-benefiċċju ġie kkalkolat fl-investigazzjoni oriġinali billi tqieset id-differenza bejn l-ammont fil-fatt imħallas minn kull wieħed mill-produtturi esportaturi inklużi fil-kampjun għad-drittijiet għall-użu tal-art u l-ammont li normalment kellu jitħallas fuq il-bażi tal-prezzijiet mit-Tajpej Ċiniż, li ntuża bħala prezz referenzjarju estern. L-ammont totali ta’ sussidju ġie allokat għall-perjodu ta’ investigazzjoni bl-użu tat-tul tal-ħajja normali tad-dritt għall-użu tal-art għal art għall-użu industrijali, jiġifieri 50 sena. (77)

(127)

Il-Kummissjoni stabbiliet ukoll li s-sussidju kien speċifiku skont l-Artikolu 4(2)(a) tar-Regolament bażiku peress li għadd limitat biss ta’ kumpaniji/industriji jistgħu jibbenefikaw mill-iskema.

(128)

Fl-investigazzjoni oriġinali, il-Kummissjoni stabbiliet ammont ta’ sussidju ad valorem fir-rigward ta’ din l-iskema bejn 0,43 % u 1,46 % għall-kumpaniji li kkooperaw inklużi fil-kampjun.

(129)

Fit-talba ta’ skadenza u fl-annessi korrispondenti (78), ir-rikorrent ipprovda evidenza li l-produtturi tar-roti elettriċi Ċiniżi komplew jibbenefikaw mid-drittijiet għall-użu tal-art għal remunerazzjoni inqas minn adegwata.

(130)

Il-qafas legali li jirregola l-forniment tad-drittijiet għall-użu tal-art fir-RPĊ baqa’ l-istess u dawn id-drittijiet jistgħu jinkisbu biss mill-awtoritajiet rilevanti, li jkollhom iqisu l-politika industrijali tal-GTĊ meta jattribwixxu d-drittijiet għall-użu tal-art aktar milli jaderixxu strettament mal-prinċipji tas-suq ħieles (79).

(131)

Barra minn hekk, f’investigazzjonijiet antisussidji riċenti, il-Kummissjoni stabbiliet li l-industriji mħeġġa, li l-industrija tar-roti elettriċi hija waħda minnhom, għadhom jirċievu d-dritt għall-użu tal-art għal renumerazzjoni inqas minn adegwata (80).

(132)

Fl-aħħar nett, la l-GTĊ u lanqas xi produttur esportatur ma pprovdew xi evidenza li tindika li l-industrija tar-roti elettriċi mħeġġa waqfet tibbenefika mid-dritt għall-użu tal-art għal remunerazzjoni inqas minn adegwata.

(133)

Għalhekk, il-Kummissjoni kkonkludiet li l-produtturi tar-roti elettriċi fiċ-Ċina għadhom jibbenefikaw minn sussidji fil-forma ta’ drittijiet għall-użu tal-art għal remunerazzjoni inqas minn adegwata u għalhekk jingħata benefiċċju lill-kumpaniji riċevituri.

(134)

Is-sussidji pprovduti taħt din l-iskema huma speċifiċi skont l-Artikolu 4(2)(a) tar-Regolament bażiku peress li għadd limitat biss ta’ kumpaniji/industriji jistgħu jibbenefikaw mill-iskema.

(135)

Fin-nuqqas ta’ tweġibiet għall-kwestjonarju mill-produtturi Ċiniżi tar-roti elettriċi u mill-GTĊ, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont ta’ sussidju riċevut matul il-perjodu ta’ investigazzjoni għar-reviżjoni.

(136)

Madankollu, f’reviżjoni ta’ skadenza mhuwiex meħtieġ li jiġi kkwantifikat l-ammont eżatt ta’ sussidji riċevuti. Abbażi tal-evidenza disponibbli, il-Kummissjoni xorta waħda setgħet tikkonkludi li l-GTĊ kompla jipprovdi drittijiet għall-użu tal-art lill-produtturi tar-roti elettriċi għal renumerazzjoni inqas minn adegwata, li jikkostitwixxu kontribuzzjoni finanzjarja li tagħti benefiċċju skont l-Artikolu 3(1)(a)(iii) u l-Artikolu 6(d) tar-Regolament bażiku.

(137)

Fid-dawl tal-kunsiderazzjonijiet ta’ hawn fuq, u fin-nuqqas ta’ kwalunkwe argument għall-kuntrarju, il-Kummissjoni kkonkludiet li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ drittijiet għall-użu tal-art għal renumerazzjoni inqas minn adegwata. Peress li dan jikkostitwixxi kontribuzzjoni finanzjarja li tagħti benefiċċju u li hija speċifika, is-sussidji taħt din l-iskema huma kumpensabbli.

(138)

Skont l-Artikolu 28 tal-Liġi Ċiniża dwar it-Taxxa fuq l-Introjtu tal-Intrapriżi (“EIT”), l-intrapriżi ta’ teknoloġija avvanzata u ġdida jistgħu jibbenefikaw minn rata ta’ taxxa fuq l-introjtu mnaqqsa ta’ 15 % minflok ir-rata standard ta’ 25 %.

(139)

Fl-investigazzjoni oriġinali, il-Kummissjoni stabbiliet li dan it-tnaqqis fit-taxxa kien sussidju skont it-tifsira tal-Artikolu 3(1)(a)(ii) u l-Artikolu 3(2) tar-Regolament bażiku minħabba li jinvolvi kontribuzzjoni finanzjarja fil-forma ta’ dħul mitluf mill-GTĊ li jagħti benefiċċju lill-kumpaniji kkonċernati. Peress li huma biss il-kumpaniji li huma rikonoxxuti bħala intrapriżi ta’ teknoloġija avvanzata u ġdida f’setturi appoġġati mill-Istat, il-Kummissjoni kkonkludiet ukoll li s-sussidju kien speċifiku u għalhekk kumpensabbli.

(140)

L-investigazzjoni oriġinali stabbiliet li bosta produtturi tar-roti elettriċi kienu bbenefikaw minn din l-iskema ta’ sussidju. Il-benefiċċju ġie kkalkolat bħala d-differenza bejn it-taxxa totali pagabbli skont ir-rata ta’ taxxa standard u t-taxxa totali pagabbli skont ir-rata ta’ taxxa mnaqqsa.

(141)

Ir-rata ta’ sussidju stabbilita fl-investigazzjoni oriġinali fir-rigward ta’ din l-iskema ta’ sussidju ġiet stabbilita bejn 0 % u 0,70 % għall-kumpaniji li kkooperaw inklużi fil-kampjun.

(142)

Ir-rikorrent iddikjara li l-produtturi tar-roti elettriċi fiċ-Ċina komplew jibbenefikaw minn din l-iskema ta’ sussidju u pprovda evidenza li bosta produtturi tar-roti elettriċi huma meqjusa bħala intrapriżi ta’ teknoloġija avvanzata u ġdida u għalhekk huma eliġibbli għas-sussidju (81). Ir-rikorrent ipprovda wkoll evidenza fil-forma ta’ rapporti annwali li bosta produtturi tar-roti elettriċi bbenefikaw de facto mill-iskema wara l-perjodu ta’ investigazzjoni oriġinali (82).

(143)

Barra minn hekk, il-Kummissjoni ma kellha l-ebda evidenza jew indikazzjoni li tissuġġerixxi li l-iskema ta’ sussidju ma kinitx tkun applikabbli matul il-perjodu ta’ investigazzjoni għar-reviżjoni.

(144)

Għalhekk, il-Kummissjoni kkonkludiet li l-produtturi tar-roti elettriċi fiċ-Ċina komplew jibbenefikaw minn sussidji fil-forma ta’ rifużjoni tat-taxxa għall-intrapriżi ta’ teknoloġija avvanzata u ġdida, li jagħtu benefiċċju.

(145)

Is-sussidji pprovduti taħt din l-iskema huma speċifiċi skont l-Artikolu 4(2)(a) tar-Regolament bażiku peress li għadd limitat biss ta’ kumpaniji/industriji setgħu jibbenefikaw mill-iskema.

(146)

Fin-nuqqas ta’ tweġibiet għall-kwestjonarju mill-produtturi Ċiniżi tar-roti elettriċi u mill-GTĊ, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont ta’ sussidju riċevut matul il-perjodu ta’ investigazzjoni għar-reviżjoni.

(147)

Madankollu, f’reviżjoni ta’ skadenza mhuwiex meħtieġ li jiġi kkwantifikat l-ammont eżatt ta’ sussidji riċevuti. Madankollu, abbażi tal-evidenza disponibbli, il-Kummissjoni kkonkludiet li l-GTĊ kompla jipprovdi tnaqqis fit-taxxa fuq l-introjtu, li kien jikkostitwixxi kontribuzzjoni finanzjarja li tagħti benefiċċju skont l-Artikolu 1(a)(iii) u 3 tar-Regolament bażiku.

(148)

Fid-dawl tal-kunsiderazzjonijiet ta’ hawn fuq u fin-nuqqas ta’ kwalunkwe argument għall-kuntrarju, il-Kummissjoni kkonkludiet li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ dħul tal-gvern mitluf. Peress li dan jikkostitwixxi kontribuzzjoni finanzjarja li tagħti benefiċċju u li hija speċifika, is-sussidji taħt din l-iskema huma kumpensabbli.

(149)

L-Artikolu 30(1) tal-Liġi Ċiniża dwar it-Taxxa fuq l-Introjtu tal-Intrapriżi (“EIT”), jipprevedi tpaċija tat-taxxa għar-riċerka u l-iżvilupp u jintitola lill-kumpaniji għal trattament tat-taxxa preferenzjali għall-ispejjeż relatati mar-R&Ż imġarrba biex jiġu żviluppati teknoloġiji ġodda, prodotti ġodda u snajja’ ġodda f’ċerti oqsma ta’ prijorità ta’ teknoloġija avvanzata ddeterminati mill-Istat.

(150)

Fl-investigazzjoni oriġinali, il-Kummissjoni stabbiliet li t-tpaċija tat-taxxa għar-R&Ż kien sussidju skont it-tifsira tal-Artikoli 3(1)(a)(ii) u 3(2) minħabba li jinvolvi kontribuzzjoni finanzjarja fil-forma ta’ dħul mitluf mill-GTĊ li jagħti benefiċċju, ugwali għall-iffrankar tat-taxxa, lill-kumpaniji kkonċernati.

(151)

Il-Kummissjoni sabet ukoll li s-sussidju kien speċifiku peress li kien limitat għal intrapriżi li ġarrbu spejjeż relatati mar-R&Ż f’ċerti oqsma ta’ prijorità ta’ teknoloġija avvanzata ddeterminati mill-Istat, li l-industrija tar-roti elettriċi hija waħda minnhom.

(152)

Ir-rata ta’ sussidju stabbilita fl-investigazzjoni oriġinali fir-rigward ta’ din l-iskema ta’ sussidju ġiet stabbilita bejn 0 % u 0,51 % għall-kumpaniji li kkooperaw inklużi fil-kampjun.

(153)

Ir-rikorrent ipprovda evidenza li l-produtturi tar-roti elettriċi għadhom rikonoxxuti bħala intrapriżi ta’ teknoloġija avvanzata u ġdida (ara l-premessa (142) hawn fuq) li huma attivi f’industrija mħeġġa. L-applikant ipprovda wkoll biżżejjed evidenza li bosta produtturi tar-roti elettriċi jġarrbu spejjeż sinifikanti relatati mar-R&Ż li żdiedu mill-investigazzjoni oriġinali ’l hawn.

(154)

Barra dan, il-Kummissjoni ma rċeviet l-ebda evidenza jew indikazzjoni li tissuġġerixxi li l-iskema ta’ sussidju ma kinitx tkun applikabbli matul il-perjodu ta’ investigazzjoni għar-reviżjoni jew li d-dispożizzjonijiet legali li jirregolawha kienu nbidlu.

(155)

Għalhekk, il-Kummissjoni kkonkludiet li l-produtturi tar-roti elettriċi fiċ-Ċina komplew jibbenefikaw minn sussidji fil-forma ta’ trattament tat-taxxa preferenzjali għall-ispejjeż relatati mar-R&Ż.

(156)

Is-sussidji pprovduti taħt din l-iskema huma speċifiċi skont l-Artikolu 4(2)(a) tar-Regolament bażiku peress li għadd limitat biss ta’ kumpaniji/industriji setgħu jibbenefikaw mill-iskema.

(157)

Fin-nuqqas ta’ tweġibiet għall-kwestjonarju mill-produtturi Ċiniżi tar-roti elettriċi u mill-GTĊ, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont ta’ sussidju riċevut matul il-perjodu ta’ investigazzjoni għar-reviżjoni.

(158)

Madankollu, f’reviżjoni ta’ skadenza mhuwiex meħtieġ li jiġi kkwantifikat l-ammont eżatt ta’ sussidji riċevuti. Madankollu, abbażi tal-evidenza disponibbli, il-Kummissjoni qieset li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ trattament tat-taxxa preferenzjali għall-ispejjeż relatati mar-R&Ż, li kienu jikkostitwixxu kontribuzzjoni finanzjarja li tagħti benefiċċju skont l-Artikoli 3(1)(a)(ii) u 3(2) tar-Regolament bażiku.

(159)

Fid-dawl tal-kunsiderazzjonijiet ta’ hawn fuq u fin-nuqqas ta’ kwalunkwe argument għall-kuntrarju, il-Kummissjoni kkonkludiet li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ dħul tal-gvern mitluf. Peress li dan jikkostitwixxi kontribuzzjoni finanzjarja li tagħti benefiċċju u li hija speċifika, is-sussidji taħt din l-iskema huma kumpensabbli.

(160)

L-eżenzjoni mit-taxxa fuq l-introjtu minn dividendi hija prevista fl-Artikoli 25-26 tal-liġi tal-EIT u fl-Artikolu 83 tar-Regolamenti dwar l-Implimentazzjoni tat-Taxxa fuq l-Introjtu tal-Intrapriżi.

(161)

Fl-investigazzjoni oriġinali, il-Kummissjoni stabbiliet li din l-eżenzjoni mit-taxxa hija sussidju skont l-Artikolu 3(1)(a)(ii) u l-Artikolu 3(2) tar-Regolament bażiku minħabba li hemm kontribuzzjoni finanzjarja fil-forma ta’ dħul mitluf mill-GTĊ li tagħti benefiċċju lill-kumpanija kkonċernata, ugwali għad-differenza bejn l-ammont ta’ taxxa normalment miġbur u l-ammont ta’ taxxa fil-fatt imħallas mill-kumpanija kkonċernata. Il-Kummissjoni sabet ukoll li s-sussidju huwa speċifiku peress li l-leġiżlazzjoni tillimita l-applikazzjoni għal ċerti kumpaniji.

(162)

Il-Kummissjoni stabbiliet l-ammont ta’ sussidju ad valorem għal din l-iskema ta’ sussidju bejn 0 % u 0,04 % għall-kumpaniji li kkooperaw inklużi fil-kampjun.

(163)

Ir-rikorrent ipprovda evidenza fit-talba għal reviżjoni ta’ skadenza li xi produtturi tar-roti elettriċi fiċ-Ċina huma gruppi korporattivi kbar magħmula minn bosta kumpaniji u entitajiet legali Ċiniżi u għalhekk ikunu intitolati li jkomplu jużaw din l-iskema ta’ sussidju.

(164)

Barra dan, il-Kummissjoni ma rċeviet l-ebda evidenza jew indikazzjoni li tissuġġerixxi li l-iskema ta’ sussidju ma kinitx tkun applikabbli matul il-perjodu ta’ investigazzjoni għar-reviżjoni jew li d-dispożizzjonijiet legali li jirregolawha kienu nbidlu.

(165)

Għalhekk, il-Kummissjoni kkonkludiet li l-produtturi tar-roti elettriċi fiċ-Ċina komplew jibbenefikaw minn sussidji fil-forma ta’ eżenzjoni mit-taxxa fuq l-introjtu minn dividendi bejn l-intrapriżi residenti kwalifikati.

(166)

Is-sussidji pprovduti taħt din l-iskema huma speċifiċi skont l-Artikolu 4(2)(a) tar-Regolament bażiku peress li għadd limitat biss ta’ kumpaniji/industriji setgħu jibbenefikaw mill-iskema.

(167)

Fin-nuqqas ta’ tweġibiet għall-kwestjonarju mill-produtturi Ċiniżi tar-roti elettriċi u mill-GTĊ, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont ta’ sussidju riċevut matul il-perjodu ta’ investigazzjoni għar-reviżjoni.

(168)

Madankollu, f’reviżjoni ta’ skadenza mhuwiex meħtieġ li jiġi kkwantifikat l-ammont eżatt ta’ sussidji riċevuti. Madankollu, abbażi tal-evidenza disponibbli u fin-nuqqas ta’ kwalunkwe argument għall-kuntrarju, il-Kummissjoni qieset li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ eżenzjoni mit-taxxa fuq l-introjtu minn dividendi bejn l-intrapriżi residenti kwalifikati, li kienu jikkostitwixxu kontribuzzjoni finanzjarja li tagħti benefiċċju skont l-Artikoli 3(1)(a)(ii) u 3(2) tar-Regolament bażiku.

(169)

Fid-dawl tal-kunsiderazzjonijiet ta’ hawn fuq, il-Kummissjoni kkonkludiet li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ dħul tal-gvern mitluf. Peress li dan jikkostitwixxi kontribuzzjoni finanzjarja li tagħti benefiċċju u li hija speċifika, is-sussidji taħt din l-iskema huma kumpensabbli.

(170)

Fl-investigazzjoni oriġinali, il-Kummissjoni stabbiliet li l-produtturi tar-roti elettriċi fir-RPĊ kienu rċevew bosta għotjiet ad hoc individwali mill-awtoritajiet f’diversi livelli, jiġifieri l-livell ta’ gvern nazzjonali, provinċjali, tal-belt, tal-pajjiż jew distrettwali. Dawn l-għotjiet kienu ngħataw għal varjetà ta’ raġunijiet u finijiet, pereżempju fondi ta’ privattivi, fondi u għotjiet għax-xjenza u t-teknoloġija, fondi għall-iżvilupp tan-negozju, fondi għall-promozzjoni tal-esportazzjoni, għotjiet għall-parteċipazzjoni f’wirjiet, aġġornar tat-tagħmir tal-manifattura, taħriġ vokazzjonali u diversi fondi oħra ta’ appoġġ ġenerali.

(171)

L-għotjiet tqiesu bħala sussidji skont l-Artikoli 3(1)(a)(ii) u 3(2) tar-Regolament bażiku. Instab ukoll li kienu speċifiċi peress li l-Kummissjoni qieset li dawn kienu limitati għal ċerti kumpaniji jew proġetti speċifiċi f’reġjuni speċifiċi u/jew l-industrija tar-roti elettriċi. Xi għotjiet instabu wkoll li kienu kontinġenti fuq l-esportazzjoni.

(172)

Il-benefiċċju ġie kkalkolat fl-investigazzjoni oriġinali bħala l-ammont riċevut fil-perjodu ta’ investigazzjoni, jew allokat għall-perjodu ta’ investigazzjoni fejn l-ammont ġie deprezzat matul il-ħajja utli tal-assi fiss li miegħu kienet relatata l-għotja. (83)

(173)

Il-Kummissjoni stabbiliet ir-rata ta’ sussidju fir-rigward ta’ din il-miżura bejn 0,07 % u 0,25 % għall-kumpaniji li kkooperaw inklużi fil-kampjun.

(174)

Ir-rikorrent ipprovda evidenza fit-talba għal reviżjoni ta’ skadenza li l-produtturi tar-roti elettriċi fiċ-Ċina komplew jirċievu għotjiet ad hoc individwali mill-awtoritajiet muniċipali u reġjonali (84) għal ammonti sinifikanti, li juri li l-appoġġ mill-gvern għall-industrija tar-roti elettriċi fiċ-Ċina huwa komprensiv, mifrux mal-pajjiż kollu u sistemiku.

(175)

Barra minn hekk, la l-GTĊ u lanqas xi produttur esportatur ma jipprovdu xi evidenza jew indikazzjoni li jissuġġerixxu li l-industrija tar-roti elettriċi fiċ-Ċina ma tibqax tibbenefika minn dawn l-għotjiet. Tabilħaqq, peress li l-industrija inkwistjoni hija industrija mħeġġa u l-iżvilupp tagħha huwa prijorità għall-GTĊ, il-Kummissjoni qieset li huwa inkonċepibbli li l-produtturi tar-roti elettriċi ma komplewx jirċievu bosta u diversi għotjiet ad hoc mill-awtoritajiet f’diversi livelli amministrattivi biex jiġi żgurat l-iżvilupp kontinwu tal-industrija f’konformità mal-politika industrijali nazzjonali.

(176)

Għalhekk, il-Kummissjoni kkonkludiet li l-produtturi tar-roti elettriċi fiċ-Ċina komplew jibbenefikaw minn sussidji fil-forma ta’ diversi għotjiet.

(177)

Fin-nuqqas ta’ kwalunkwe evidenza għall-kuntrarju, il-Kummissjoni kkonkludiet li l-għotjiet ad hoc huma speċifiċi għall-istess raġunijiet bħal dawk fl-investigazzjoni oriġinali (ara l-premessa (171)).

(178)

Fin-nuqqas ta’ tweġibiet għall-kwestjonarju mill-produtturi Ċiniżi tar-roti elettriċi u mill-GTĊ, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont ta’ sussidju riċevut matul il-perjodu ta’ investigazzjoni għar-reviżjoni.

(179)

Madankollu, f’reviżjoni ta’ skadenza mhuwiex meħtieġ li jiġi kkwantifikat l-ammont eżatt ta’ sussidji riċevuti. Madankollu, abbażi tal-evidenza disponibbli u fin-nuqqas ta’ kwalunkwe argument għall-kuntrarju, il-Kummissjoni qieset li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ għotjiet ad hoc minn diversi livelli ta’ gvern, li kienu jikkostitwixxu kontribuzzjoni finanzjarja li tagħti benefiċċju skont l-Artikoli 3(1)(a)(i) u (3)2 tar-Regolament bażiku.

(180)

Fid-dawl tal-kunsiderazzjonijiet ta’ hawn fuq, il-Kummissjoni kkonkludiet li l-industrija tar-roti elettriċi fiċ-Ċina kompliet tibbenefika minn sussidji fil-forma ta’ għotjiet. Peress li dan jikkostitwixxi kontribuzzjoni finanzjarja li tagħti benefiċċju u li hija speċifika, is-sussidji taħt din l-iskema huma kumpensabbli.

(181)

Fl-investigazzjoni oriġinali, il-Kummissjoni stabbiliet ammont totali ta’ sussidju ad valorem kumpensabbli li jvarja bejn 3,9 % u 17,2 % għall-kumpaniji li kkooperaw inklużi fil-kampjun. Hija stabbiliet ukoll ammont ta’ sussidji kumpensabbli għall-kumpaniji li kkooperaw mhux inklużi fil-kampjun ta’ 9,2 % u rata tad-dazju fil-pajjiż kollu għall-produtturi esportaturi l-oħra kollha ta’ 17,2 %.

(182)

Minħabba s-sejbiet tal-Kummissjoni fir-rigward tad-diversi skemi u programmi ta’ sussidju eżaminati hawn fuq, il-Kummissjoni kkonkludiet li l-produtturi tar-roti elettriċi fiċ-Ċina komplew jibbenefikaw minn sussidji kumpensabbli f’livell li jaqbeż de minimis matul il-perjodu ta’ investigazzjoni għar-reviżjoni.

(183)

Wara d-divulgazzjoni, parti interessata waħda ddikjarat li l-konklużjoni li l-industrija tar-roti elettriċi fiċ-Ċina kompliet tibbenefika mis-sussidji kienet żbaljata. Sabiex tiġi ssostanzjata din l-affermazzjoni, ġew mehmuża sottomissjonijiet ta’ tliet rappreżentanti tal-produtturi Ċiniżi tar-roti elettriċi, li fihom dikjarazzjonijiet li ma waslu l-ebda sussidji. Il-Kummissjoni qieset li, fid-dawl tal-fatt li dawn il-produtturi ma kinux ippreżentaw ruħhom fl-investigazzjoni u ma kinux ikkooperaw, id-dikjarazzjonijiet ta’ dawn il-produtturi, li ġew sottomessi mingħajr ebda evidenza sottostanti, ma setgħux jiġu aċċettati. Konsegwentement, il-pretensjoni ġiet miċħuda.

(184)

Minbarra s-sejba tal-eżistenza ta’ sussidjar kontinwu matul il-perjodu ta’ investigazzjoni għar-reviżjoni, il-Kummissjoni investigat il-probabbiltà ta’ kontinwazzjoni ta’ importazzjonijiet sussidjati mill-pajjiż ikkonċernat, jekk il-miżuri jitħassru. Ġew analizzati l-elementi addizzjonali li ġejjin; il-kapaċità ta’ produzzjoni u l-kapaċità ta’ riżerva fir-RPĊ u l-attraenza tas-suq tal-Unjoni.

(185)

Fin-nuqqas ta’ kooperazzjoni mill-GTĊ u mill-produtturi esportaturi Ċiniżi, il-Kummissjoni bbażat is-sejbiet tagħha dwar il-kapaċità ta’ produzzjoni u l-kapaċità ta’ riżerva fir-RPĊ fuq l-informazzjoni pprovduta mill-applikant fit-talba tiegħu għal rieżami.

(186)

L-informazzjoni disponibbli wriet li hemm kapaċità żejda ġenerali fil-produzzjoni tar-roti elettriċi fiċ-Ċina matul il-perjodu kkunsidrat. Il-kapaċità ta’ produzzjoni (85) fiċ-Ċina matul dan il-perjodu kienet stmata għal 130 miljun unità kull sena. Barra minn hekk, il-produzzjoni Ċiniża tar-roti standard tista’ faċilment tinbidel għall-produzzjoni tar-roti elettriċi, b’kapaċità totali potenzjali ta’ aktar minn 400 miljun unità. (86) Skont l-informazzjoni dwar is-suq tar-rikorrent, il-produzzjoni u l-bejgħ reali Ċiniżi ammontaw għal 57 miljun unità kull sena, li indikaw kapaċità ta’ riżerva stmata ta’ 73 miljun unità matul il-perjodu ta’ investigazzjoni għar-reviżjoni. (87) Din il-kapaċità ta’ riżerva, li kienet kważi ħmistax-il darba tal-konsum totali tal-Unjoni matul l-istess perjodu, tista’ tiġi esportata lejn l-Unjoni jekk il-miżuri attwali jiskadu.

(187)

Abbażi ta’ dan ta’ hawn fuq, il-Kummissjoni kkonkludiet li l-produtturi esportaturi Ċiniżi għandhom kapaċitajiet ta’ riżerva sinifikanti, li jistgħu jintużaw għall-esportazzjonijiet lejn l-Unjoni fi kwantitajiet kbar bi prezzijiet sussidjati jekk il-miżuri jitħallew jiskadu.

(188)

Abbażi tal-informazzjoni pprovduta fit-talba, is-suq tal-Unjoni għar-roti elettriċi baqa’ attraenti għall-esportaturi Ċiniżi. Mill-investigazzjoni oriġinali, l-importazzjonijiet mir-RPĊ naqsu kemm f’termini assoluti kif ukoll f’termini relattivi. Madankollu, mill-2020 ’l hawn, meta l-volum tal-importazzjonijiet miċ-Ċina kien fil-livell l-aktar baxx, l-importazzjonijiet żdiedu b’mod sinifikanti u kważi rduppjaw minkejja l-miżuri fis-seħħ (ara t-Tabella 2 hawn taħt). Is-sehem mis-suq li qabel kien miżmum mir-RPĊ, ittieħed parzjalment minn pajjiżi terzi oħra bħat-Tajwan, li żied il-volumi tal-esportazzjoni tiegħu tal-prodott taħt rieżami lejn l-Unjoni mill-investigazzjoni preċedenti ’l hawn. Fl-istess ħin, ir-RPĊ kienet għadha t-tieni l-akbar esportatur tar-roti elettriċi lejn l-Unjoni matul il-perjodu ta’ investigazzjoni għar-reviżjoni. Dan juri li l-Unjoni baqgħet suq attraenti għall-esportaturi mir-RPĊ.

(189)

Is-suq tal-Unjoni għar-roti elettriċi huwa wieħed mill-akbar fid-dinja, b’konsum ta’ 4 979 000 unità matul il-perjodu ta’ investigazzjoni għar-reviżjoni. Barra minn hekk, kif spjegat fit-talba għal reviżjoni ta’ skadenza, id-domanda għar-roti elettriċi hija mistennija li tikber fis-snin li ġejjin minħabba (fost affarijiet oħra) il-politiki ambjentali fl-Unjoni.

(190)

Barra minn hekk, anke bil-miżuri fis-seħħ, l-esportazzjonijiet Ċiniżi lejn l-Unjoni komplew u għandhom sehem mis-suq mhux negliġibbli li wera li s-suq tal-Unjoni baqa’ u se jibqa’ attraenti għall-produtturi esportaturi Ċiniżi.

(191)

Għalhekk, abbażi tal-kapaċità żejda sinifikanti fir-RPĊ u l-attraenza tas-suq tal-Unjoni, il-Kummissjoni kkonkludiet li, jekk il-miżuri attwali jiskadu, x’aktarx li l-produtturi esportaturi Ċiniżi jkomplu u jżidu l-esportazzjonijiet tagħhom tar-roti elettriċi sussidjati lejn l-Unjoni fi kwantitajiet kbar.

(192)

Fid-dawl tas-sejbiet tagħha dwar il-kontinwazzjoni ta’ sussidjar matul il-perjodu ta’ investigazzjoni għar-reviżjoni u dwar l-iżvilupp probabbli ta’ żieda fl-esportazzjonijiet lejn l-Unjoni jekk il-miżuri jiskadu, il-Kummissjoni kkonkludiet li hemm probabbiltà kbira li l-iskadenza tal-miżuri kumpensatorji fuq l-importazzjonijiet tar-roti elettriċi mir-RPĊ tirriżulta fil-kontinwazzjoni ta’ importazzjonijiet sussidjati.

(193)

Il-prodott simili ġie mmanifatturat minn 67 produttur fl-Unjoni matul il-perjodu kkunsidrat. Dawn jikkostitwixxu l-“industrija tal-Unjoni” skont it-tifsira tal-Artikolu 9(1) tar-Regolament bażiku.

(194)

Il-produzzjoni totali tal-Unjoni fil-perjodu ta’ investigazzjoni għar-reviżjoni ġiet stabbilita għal madwar 4 560 000 unità. Dan l-għadd ġie stabbilit fuq il-bażi tal-informazzjoni disponibbli rigward l-industrija tal-Unjoni, bħar-rapport dwar l-Industrija Ewropea tar-Roti u l-Profil tas-Suq, u studju ekonomiku mwettaq mill-Konfederazzjoni tal-Industrija Ewropea tar-Roti (il-“CONEBI”). Kif indikat fil-premessa (11), intgħażlu tliet produtturi tal-Unjoni fil-kampjun li jirrappreżentaw 23,4 % tal-produzzjoni totali tal-Unjoni fir-rigward tal-prodott simili.

(195)

Il-Kummissjoni stabbiliet il-konsum tal-Unjoni fuq il-bażi tal-istatistika tal-Eurostat dwar l-importazzjoni u l-volum tal-bejgħ tal-industrija tal-Unjoni fl-Unjoni, kif ippreżentat mill-CONEBI.

(196)

Il-konsum tal-Unjoni żviluppa kif ġej:

Tabella 1

Konsum tal-Unjoni (unitajiet)

(197)

Il-konsum totali tar-roti elettriċi fl-UE żdied minn madwar 4,3 miljun rota elettrika fl-2020 għal 5,3 miljun rota elettrika fl-2022. It-titjib fid-disinn u fil-prestazzjoni, ikkombinat ma’ sensibilizzazzjoni ambjentali akbar fost iċ-ċittadini tal-UE, wasslu għal żieda kostanti fil-konsum tar-roti elettriċi. Madankollu, fil-perjodu ta’ investigazzjoni għar-reviżjoni, il-konsum tar-roti elettriċi fl-UE naqas bi 346 000 unità meta mqabbel mal-2022 wara tnaqqis fid-domanda li seħħ xi żmien wara t-tneħħija tal-aħħar miżuri tal-COVID-19 fl-ewwel nofs tal-2022.

(198)

Il-Kummissjoni stabbiliet il-volum tal-importazzjonijiet abbażi tad-data tal-Eurostat.

(199)

Imbagħad is-sehem mis-suq tal-importazzjonijiet ġie stabbilit billi tqabblu l-volumi tal-importazzjonijiet mal-konsum fl-Unjoni kif jidher fit-Tabella 1.

(200)

L-importazzjonijiet fl-Unjoni mir-RPĊ żviluppaw kif ġej:

Tabella 2

Volum tal-importazzjonijiet (unitajiet) u sehem mis-suq

(201)

Anke bil-miżuri fis-seħħ, is-sehem mis-suq tal-importazzjonijiet Ċiniżi żdied minn 2,3 % fl-2020 għal 4,4 % fil-perjodu ta’ investigazzjoni għar-reviżjoni.

(202)

Il-Kummissjoni stabbiliet il-prezzijiet tal-importazzjonijiet fuq il-bażi tad-data tal-Eurostat.

(203)

Il-prezz medju tal-importazzjonijiet fl-Unjoni mir-RPĊ żviluppa kif ġej:

Tabella 3

Prezzijiet tal-importazzjonijiet (EUR/unità)

(204)

Il-prezzijiet medji tal-importazzjonijiet mir-RPĊ komplew ikunu estremament baxxi matul il-perjodu kkunsidrat. Fl-2020 u l-2021, il-prezzijiet irrappurtati mill-Eurostat kienu saħansitra aktar baxxi mill-prezzijiet medji li nstabu fl-investigazzjoni inizjali (jiġifieri bejn EUR 422 u EUR 477).

(205)

Abbażi tad-data tal-Eurostat, il-prezzijiet fl-2022 kienu temporanjament ogħla, iżda xorta waħda aktar baxxi mill-prezzijiet tal-importazzjonijiet Ċiniżi fl-2016 (jiġifieri EUR 477).

(206)

Peress li ma kien hemm l-ebda kooperazzjoni mill-produtturi esportaturi fir-RPĊ, il-Kummissjoni ddeterminat it-twaqqigħ tal-prezz matul il-perjodu ta’ investigazzjoni għar-reviżjoni billi qabblet:

(207)

Ir-riżultat tat-tqabbil ġie espress bħala perċentwal tal-fatturat tal-produtturi tal-Unjoni inklużi fil-kampjun matul il-perjodu ta’ investigazzjoni għar-reviżjoni. It-twaqqigħ tal-prezz varja minn 68 % sa 80 %. Mingħajr id-dazji, it-twaqqigħ tal-prezz ammonta għal 82,8 %.

(208)

L-importazzjonijiet tar-roti elettriċi minn pajjiżi terzi għajr ir-RPĊ kienu prinċipalment mit-Tajwan u l-Vjetnam.

(209)

Il-volum (aggregat) tal-importazzjonijiet fl-Unjoni kif ukoll is-sehem mis-suq u x-xejriet tal-prezzijiet għall-importazzjonijiet tar-roti elettriċi minn pajjiżi terzi oħra żviluppaw kif ġej:

Tabella 4

Importazzjonijiet minn pajjiżi terzi

(210)

L-ishma mis-suq tal-importazzjonijiet totali tal-prodott taħt rieżami minn pajjiżi terzi għajr ir-RPĊ żdiedu bejn l-2020 u l-2022 u laħqu l-20,3 % fl-2022. Madankollu, fil-perjodu ta’ investigazzjoni għar-reviżjoni dan naqas għal 16,3 %, livell aktar baxx milli fl-2020.

(211)

Il-valutazzjoni tas-sitwazzjoni ekonomika tal-industrija tal-Unjoni kienet tinkludi evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu kkunsidrat.

(212)

Kif imsemmi fil-premessa (11), il-kampjunar intuża għall-valutazzjoni tas-sitwazzjoni ekonomika tal-industrija tal-Unjoni.

(213)

Sabiex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi fuq il-bażi tal-informazzjoni pprovduta mill-CONEBI. Id-data kienet relatata mal-produtturi kollha tal-Unjoni. Il-Kummissjoni evalwat l-indikaturi mikroekonomiċi abbażi tad-data inkluża fit-tweġibiet għall-kwestjonarju mill-produtturi tal-Unjoni inklużi fil-kampjun.

(214)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, il-kobor tal-marġini ta’ sussidju, u l-irkupru minn sussidjar li sar fil-passat.

(215)

L-indikaturi mikroekonomiċi huma: il-prezzijiet medji tal-bejgħ, il-kost ta’ unità, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti, u l-kapaċità li jiġi ġġenerat il-kapital.

(216)

Il-produzzjoni totali tal-Unjoni, il-kapaċità ta’ produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 5

Produzzjoni, kapaċità ta’ produzzjoni u użu tal-kapaċità

(217)

Il-kapaċità ta’ produzzjoni u l-produzzjoni fl-Unjoni żdiedu b’mod kostanti fil-perjodu mill-2020 sal-2022 bħala konsegwenza ta’ żieda fid-domanda matul il-pandemija tal-COVID-19. Madankollu, fil-perjodu ta’ investigazzjoni għar-reviżjoni kien hemm tnaqqis fil-volumi u l-kapaċitajiet tal-produzzjoni minħabba żieda fl-akkumulazzjoni tal-istokk matul il-COVID-19, fejn il-produtturi tal-Unjoni antiċipaw bejgħ kontinwu f’livell aċċellerat għoli, li ma seħħx peress li, wara l-COVID-19, id-domanda naqset b’mod sinifikanti.

(218)

Il-volum tal-bejgħ u s-sehem mis-suq tal-industrija tal-Unjoni żviluppaw kif ġej matul il-perjodu kkunsidrat:

Tabella 6

Volum tal-bejgħ u sehem mis-suq (unitajiet)

(219)

Il-bejgħ żdied matul il-perjodu kkunsidrat, speċjalment minħabba żieda fid-domanda matul il-pandemija tal-COVID-19. Madankollu, ladarba l-miżuri tal-COVID-19 tneħħew, id-domanda għar-roti elettriċi naqset u dan irriżulta f’ċifri tal-bejgħ aktar baxxi fil-perjodu ta’ investigazzjoni għar-reviżjoni. Barra minn hekk, is-sitwazzjoni ekonomika fl-2022 u l-perjodu ta’ investigazzjoni għar-reviżjoni (kostijiet ogħla tal-enerġija, inflazzjoni, b’mod partikolari) kellhom effett mhux biss fuq l-industrija tal-Unjoni iżda wkoll fuq il-konsumaturi, b’mod partikolari dawk b’inqas kapaċità tal-akkwist. Għalhekk, il-bejgħ tal-industrija tal-Unjoni staġna fil-perjodu ta’ investigazzjoni għar-reviżjoni meta mqabbel mal-2022, filwaqt li s-sehem mis-suq tal-industrija tal-Unjoni żdied b’ 4,5 punti perċentwali.

(220)

L-impjiegi u l-produttività żviluppaw kif ġej matul il-perjodu kkunsidrat:

Tabella 7

Impjiegi u produttività

(221)

L-industrija tal-Unjoni żiedet il-livell ta’ impjiegi bi 28 % fil-perjodu kkunsidrat. Il-biċċa l-kbira ta’ din iż-żieda seħħet bejn l-2020 u l-2022 bħala konsegwenza ta’ żieda fid-domanda matul il-pandemija tal-COVID-19. Fl-2023 kien hemm tnaqqis fl-għadd ta’ impjegati minħabba t-tnaqqis fil-volumi tal-produzzjoni. Il-produttività baqgħet pjuttost stabbli fil-perjodu kkunsidrat.

(222)

Billi l-bejgħ baqa’ stabbli fil-perjodu ta’ investigazzjoni għar-reviżjoni meta mqabbel mal-2022, filwaqt li l-konsum naqas, l-industrija tal-Unjoni rnexxielha żżid is-sehem mis-suq tagħha b’ 4,5 % f’dak il-perjodu.

(223)

Il-livell tal-importazzjonijiet mir-RPĊ matul il-perjodu ta’ investigazzjoni għar-reviżjoni kien relattivament limitat, u kien jirrappreżenta 4,4 % tal-konsum tal-Unjoni. Għalhekk, l-impatt tad-daqs tas-sussidjar fuq l-industrija tal-Unjoni kien pjuttost limitat.

(224)

Il-prezzijiet medji ponderati tal-bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu taħt kunsiderazzjoni:

Tabella 8

Prezzijiet tal-bejgħ u kost tal-produzzjoni fl-Unjoni (EUR/unità)

(225)

Il-prezzijiet medji tal-bejgħ tal-produtturi tal-Unjoni inklużi fil-kampjun, kif ukoll il-kostijiet tal-produzzjoni, żdiedu fil-perjodu kkunsidrat, li fl-2020 u fl-2021 kienu jirriflettu prinċipalment bidla fit-taħlita ta’ prodotti u l-avvanzi teknoloġiċi fil-magni u l-batteriji tar-roti elettriċi, filwaqt li fl-2022 u fil-perjodu ta’ investigazzjoni għar-reviżjoni, dik iż-żieda kienet tirrifletti wkoll żieda fil-kostijiet tal-produzzjoni minħabba s-sitwazzjoni ekonomika ġenerali kkaratterizzata mill-inflazzjoni u kostijiet ogħla tal-enerġija.

(226)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 9

Kostijiet lavorattivi medji għal kull impjegat

(227)

Għalkemm kien hemm tnaqqis fl-għadd ta’ impjegati fil-perjodu ta’ investigazzjoni għar-reviżjoni meta mqabbel mal-2022 wara tnaqqis fid-domanda, il-kostijiet lavorattivi medji għal kull impjegat żdiedu b’mod kostanti fil-perjodu kkunsidrat.

(228)

Il-livelli tal-istokks tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 10

Inventarji

(229)

Iż-żidiet fl-inventarji kienu dovuti għaż-żieda fl-akkumulazzjoni tal-istokk matul il-COVID-19, fejn kien hemm żieda sinifikanti fid-domanda, ikkombinata mal-kwistjonijiet tal-katina tal-provvista peress li l-produtturi tal-Unjoni kienu qed jordnaw b’mod eċċessiv materja prima u komponenti biex jissodisfaw ir-rekwiżiti tal-produzzjoni. Madankollu, ladarba l-kwistjonijiet tal-katina tal-provvista jkunu ġew solvuti, il-produtturi tal-Unjoni rċevew aktar materja prima u komponenti milli kienu jeħtieġu. Dan ġie segwit bi tnaqqis fid-domanda għar-roti elettriċi fil-perjodu ta’ investigazzjoni għar-reviżjoni meta mqabbel mal-2022 li ħalla lill-produtturi tal-Unjoni b’għadd kbir ħafna ta’ inventarji fi tmiem il-perjodu ta’ investigazzjoni għar-reviżjoni.

(230)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 11

Profittabbiltà, fluss tal-flus, investimenti u redditu fuq l-investimenti

(231)

Il-Kummissjoni stabbiliet il-profittabbiltà tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala persentaġġ tal-fatturat ta’ dak il-bejgħ. Il-produtturi tal-Unjoni inklużi fil-kampjun baqgħu profittabbli matul il-perjodu kkunsidrat. Madankollu, fil-perjodu ta’ investigazzjoni għar-reviżjoni, il-profittabbiltà naqset minħabba żieda fil-kostijiet.

(232)

Il-profittabbiltà stabbli ġenerali fil-perjodu kkunsidrat ippermettiet lill-industrija tal-Unjoni tagħmel investimenti kbar.

(233)

Il-fluss tal-flus nett huwa l-abbiltà tal-produtturi tal-Unjoni li jiffinanzjaw l-attivitajiet tagħhom huma stess. Il-fluss tal-flus naqas b’mod sinifikanti matul il-perjodu kkunsidrat u sar negattiv fl-2023. Ir-redditu fuq l-investimenti ddeterjora wkoll, u dan għamilha aktar diffiċli għall-industrija tal-Unjoni biex tiġbor il-kapital u tikber. Dan irriżulta fi tnaqqis fl-investimenti ta’ 50 % fil-perjodu ta’ investigazzjoni għar-reviżjoni meta mqabbel mal-2022.

(234)

L-indikaturi makro bħall-produzzjoni, il-bejgħ u l-impjiegi tal-Unjoni żdiedu b’mod kostanti fil-perjodu mill-2020 sal-2022, bħala konsegwenza ta’ żieda fid-domanda matul il-pandemija tal-COVID-19. Madankollu, fil-perjodu ta’ investigazzjoni għar-reviżjoni, il-volumi tal-produzzjoni, il-kapaċitajiet, il-bejgħ u l-impjiegi naqsu, minħabba żieda fl-akkumulazzjoni tal-istokk matul il-pandemija tal-COVID-19, segwita minn tnaqqis fid-domanda bħala riżultat tat-tneħħija tal-miżuri tal-COVID-19 u l-bidla fis-sitwazzjoni ekonomika fl-Unjoni, ikkaratterizzata b’mod partikolari minn kostijiet għoljin tal-enerġija u inflazzjoni.

(235)

Fir-rigward tal-indikaturi mikroekonomiċi, l-investigazzjoni stabbiliet li l-profittabbiltà tal-produtturi tal-Unjoni inklużi fil-kampjun fil-perjodu mill-2020 sal-2022 baqgħet ogħla minn 7 %. Madankollu, fil-perjodu ta’ investigazzjoni għar-reviżjoni, il-profittabbiltà tal-industrija tal-Unjoni naqset għal 5,4 %. Il-fluss tal-flus naqas mill-2020 sal-2022 u sar negattiv fl-2023. Ir-redditu fuq l-investimenti ddeterjora wkoll, u dan għamilha aktar diffiċli għall-industrija tal-Unjoni biex tiġbor il-kapital u tikber.

(236)

Fuq il-bażi ta’ dan ta’ hawn fuq, il-Kummissjoni kkonkludiet li l-industrija tal-Unjoni kienet irkuprat minn dannu materjali tal-passat skont it-tifsira tal-Artikolu 8 tar-Regolament bażiku, li ġie kkawżat minn importazzjonijiet sussidjati mir-RPĊ. Madankollu, matul il-perjodu kkunsidrat, għadd ta’ indikaturi tad-dannu ddeterjoraw, u l-industrija tal-Unjoni rritornat għal sitwazzjoni ekonomikament fraġli. Għalhekk, il-Kummissjoni eżaminat ukoll il-probabbiltà ta’ rikorrenza ta’ dannu kkawżat oriġinarjament minn importazzjonijiet sussidjati mir-RPĊ jekk il-miżuri kellhom jitħassru.

(237)

Il-Kummissjoni analizzat l-elementi li ġejjin sabiex tistabbilixxi l-probabbiltà ta’ rikorrenza ta’ dannu jekk il-miżuri jitħassru: il-kapaċità ta’ produzzjoni u l-kapaċità ta’ riżerva fir-RPĊ, ir-relazzjoni bejn il-prezzijiet tal-esportazzjoni lejn pajjiżi terzi u l-livell tal-prezzijiet fl-Unjoni u l-impatt tal-importazzjonijiet potenzjali u l-livelli tal-prezzijiet ta’ dawn l-importazzjonijiet minn dawn il-pajjiżi fuq is-sitwazzjoni tal-industrija tal-Unjoni.

(238)

Kif diġà ġie deskritt u dettaljat fit-Taqsima 3.10.1 hawn fuq, il-produtturi esportaturi fir-RPĊ għandhom kapaċitajiet ta’ riżerva sinifikanti li jistgħu jintużaw biex jipproduċu l-prodott taħt rieżami għall-esportazzjoni lejn l-Unjoni jekk il-miżuri jitħallew jiskadu. Il-kwantitajiet li jistgħu jiġu esportati mill-produtturi esportaturi Ċiniżi jammontaw għal 73 miljun unità, li jaqbżu bil-bosta d-daqs tas-suq tal-Unjoni.

(239)

Kif deskritt u dettaljat fit-Taqsima 3.10.2 hawn fuq, is-suq tal-Unjoni għar-roti elettriċi huwa wieħed mill-akbar fid-dinja u d-domanda għar-roti elettriċi hija mistennija li tikber fis-snin li ġejjin minħabba, fost punti oħra, il-politiki ambjentali fl-Unjoni. Il-produtturi esportaturi Ċiniżi esportaw lejn is-swieq terzi prinċipali tagħhom bi prezzijiet sinifikattivament inqas mill-prezzijiet medji tal-bejgħ tal-produtturi tal-Unjoni fis-suq tal-Unjoni matul il-perjodu ta’ investigazzjoni għar-reviżjoni. Għalhekk, l-esportazzjoni lejn l-Unjoni hija potenzjalment ħafna aktar attraenti għall-esportaturi Ċiniżi. Konsegwentement, jista’ jkun raġonevolment mistenni li, jekk il-miżuri jitħassru, il-produtturi esportaturi Ċiniżi jibdew jesportaw volumi kbar tal-prodott taħt rieżami lejn l-Unjoni.

(240)

Sabiex jiġi stabbilit kif l-importazzjonijiet mir-RPĊ jaffettwaw l-industrija tal-Unjoni jekk il-miżuri jintemmu, il-Kummissjoni wettqet analiżi komparattiva tal-prezzijiet mingħajr l-eżistenza ta’ miżuri antisussidji.

(241)

Sabiex jiġi stmat il-prezz probabbli li bih il-produtturi Ċiniżi jbigħu meta jesportaw lejn is-suq tal-Unjoni, il-Kummissjoni għamlet tqabbil tal-prezzijiet bejn il-prezz medju (mill-fabbrika) tal-produtturi tal-Unjoni inklużi fil-kampjun mal-prezz medju korrispondenti tal-prodott taħt rieżami mir-RPĊ meta jiġi esportat lejn pajjiżi terzi bħar-Renju Unit, it-Turkija, in-Norveġja jew is-Serbja, li għandhom kodiċijiet separati għar-roti elettriċi u l-ebda miżura fis-seħħ.

(242)

Ir-riżultat tat-tqabbil wera li l-prezz medju tal-esportazzjonijiet Ċiniżi tal-prodott ikkonċernat lejn il-pajjiżi ta’ hawn fuq varja minn EUR 210 sa EUR 650, jiġifieri sinifikattivament aktar baxx mill-prezz tal-industrija tal-Unjoni fis-suq tal-Unjoni. Għalhekk, jekk il-miżuri jitħallew jiskadu, ikun probabbli li l-importazzjonijiet mir-RPĊ jidħlu fis-suq f’volumi kbar, bħal fil-perjodu ta’ investigazzjoni tal-investigazzjoni oriġinali u bi prezzijiet baxxi li jikkawżaw dannu.

(243)

Fid-dawl ta’ dan ta’ hawn fuq, il-konklużjoni hija li t-tħassir tal-miżuri x’aktarx li jirriżulta f’żieda sinifikanti ta’ importazzjonijiet sussidjati mir-RPĊ f’livelli ta’ prezzijiet dannużi. B’konsegwenza ta’ dan, il-vijabbiltà tal-industrija tal-Unjoni tkun f’riskju serju.

(244)

F’konformità mal-Artikolu 31 tar-Regolament bażiku, il-Kummissjoni eżaminat jekk iż-żamma tal-miżuri antisussidji eżistenti tmurx kontra l-interess tal-Unjoni kollha kemm hi. Id-determinazzjoni tal-interess tal-Unjoni kienet ibbażata fuq apprezzament tad-diversi interessi kollha involuti, inklużi dawk tal-industrija tal-Unjoni, tal-importaturi u tal-utenti.

(245)

L-investigazzjoni wriet li jekk il-miżuri jiskadu jkollhom effett negattiv fuq l-industrija tal-Unjoni. Il-miżuri reġgħu stabbilixxew kundizzjonijiet ekwi fis-suq tal-Unjoni. Dan ippermetta li kumpaniji ġodda jidħlu fis-suq, speċjalment fis-segmenti ta’ livell tad-dħul u ta’ livell medju. L-għadd ta’ produtturi tar-roti elettriċi magħrufa tal-Unjoni kważi rdoppja minn bejn wieħed u ieħor 37 fl-2020 għal 67 fl-2023, minkejja l-isfidi li rriżultaw mis-sitwazzjoni ekonomika fil-perjodu 2022-2023. L-għadd ta’ roti elettriċi prodotti fl-Unjoni żdied b’aktar minn 1 miljun bejn l-2020 (3,4 miljun) u l-2023 (4,5 miljun) u huwa previst li jkompli jiżdied. L-għadd ta’ impjegati diretti żdied minn madwar 3 500 fil-perjodu ta’ investigazzjoni oriġinali għal kważi 11 000 fil-perjodu ta’ investigazzjoni għar-reviżjoni.

(246)

Terminazzjoni tal-miżuri kompensatorji tpoġġi lill-produtturi tal-Unjoni f’riskju għoli, speċjalment dawk li jservu s-segmenti tar-roti elettriċi ta’ livell tad-dħul u ta’ livell medju, li jinkludu ħafna produtturi iżgħar fl-industrija tal-Unjoni.

(247)

L-ikkumplikar tas-sitwazzjoni vulnerabbli huwa l-fatt li l-produzzjoni tar-roti elettriċi hija negozju intensiv ħafna ta’ kapital, minħabba li stokkijiet sostanzjali ta’ parts tar-roti huma meħtieġa f’kull ħin biex tinżamm il-produzzjoni. Barra minn hekk, il-produtturi tal-Unjoni għamlu investimenti kbar fil-produzzjoni sostenibbli u li ma tagħmilx ħsara lill-ambjent u fit-titjib tal-prodotti matul dawn l-aħħar snin. It-terminazzjoni tal-miżuri antisussidji timblokka l-iżvilupp ta’ għarfien prattiku tal-inġinerija għall-applikazzjoni ta’ teknoloġiji avvanzati aħħarija, inklużi l-awtomatizzazzjoni u l-materjali ġodda.

(248)

Barra minn hekk, skont it-talba għal reviżjoni, l-industrija tar-roti elettriċi tal-Unjoni hija waħda mill-akbar industriji ekoloġiċi, b’aktar minn 1 000 intrapriża żgħira u ta’ daqs medju (SMEs) li pprovdew bejn wieħed u ieħor 80 000 impjieg skont ir-rapport tal-2024 dwar l-Industrija Ewropea tar-Roti u l-Profil tas-Suq. Dan jinkludi impjiegi f’impjiegi ta’ produzzjoni diretta u indiretta, industriji upstream, aċċessorji tar-roti, negozjanti tar-roti, eċċ.

(249)

Fuq il-bażi ta’ dan ta’ hawn fuq, l-estensjoni tal-miżuri hija fl-interess tal-industrija tal-Unjoni.

(250)

Il-Kummissjoni kkuntattjat lill-utenti u l-importaturi mhux relatati kollha magħrufa.

(251)

Wara l-bidu, l-unika parti li ppreżentat ruħha u pprovdiet kummenti kien Grupp ad hoc, f’isem tmien kumpaniji żgħar, li jimmuntaw parts tar-roti elettriċi, li jiġu importati miċ-Ċina u minn pajjiżi terzi oħra, fl-Unjoni. Il-kumment prinċipali tagħhom kien relatat mal-implimentazzjoni tal-miżuri kontra l-importazzjonijiet ta’ parts tar-roti (konvenzjonali) miċ-Ċina, li joħloq inċertezza dwar ir-regoli legali tal-importazzjoni tal-komponenti tar-roti elettriċi u, għalhekk, jagħmilha diffiċli li jiġu importati parts tar-roti elettriċi, li mhumiex soġġetti għal miżuri. Il-grupp oppona l-estensjoni tal-miżuri, prinċipalment minħabba l-problemi attwali bl-importazzjonijiet tal-komponenti, flimkien mar-riskju ta’ estensjoni tal-miżuri għal dawn il-komponenti tar-roti elettriċi, u argumenta li l-użu tas-sorveljanza tas-suq biex tiġi skrutinizzata l-konformità tal-importazzjonijiet mir-RPĊ mar-regolamenti pertinenti kollha jkun aktar effiċjenti biex jiġu indirizzati l-importazzjonijiet ta’ roti elettriċi nnegozjati b’mod inġust miċ-Ċina li spiss ikunu illegali u mhux sikuri.

(252)

Madankollu, il-Kummissjoni qieset li mhuwiex realistiku li s-sorveljanza tas-suq u l-miżuri regolatorji biss jistgħu jipprevjenu d-dannu kkawżat mill-importazzjonijiet ta’ roti elettriċi sussidjati mir-RPĊ. Barra minn hekk, kwistjonijiet ta’ infurzar doganali fir-rigward tal-importazzjonijiet ta’ komponenti tar-roti elettriċi ma jistgħux jiġġustifikaw it-terminazzjoni tal-miżuri, li kisbu l-effett intenzjonat. Fi kwalunkwe każ, l-infurzar tal-miżuri jaqa’ barra mill-ambitu tal-investigazzjoni.

(253)

Wara d-divulgazzjoni, il-Grupp ad hoc tenna l-istess affermazzjonijiet. Huwa argumenta li l-Kummissjoni għandha tiffoka fuq it-tisħiħ tas-sorveljanza tas-suq aktar milli testendi l-miżuri għad-difiża tal-kummerċ biex tindirizza l-kawżi ewlenin tad-distorsjonijiet tas-suq u tiżgura kundizzjonijiet ekwi għall-partijiet ikkonċernati kollha. Skont il-Grupp ad hoc, il-miżuri għad-difiża tal-kummerċ b’mod involontarju joħolqu qafas regolatorju li jrawwem l-importazzjonijiet ta’ roti substandardizzati u mhux sikuri filwaqt li jagħmel il-ħajja tal-manifatturi serji tar-roti elettriċi mir-RPĊ b’ambizzjonijiet fit-tul fis-suq tal-Unjoni diffiċli.

(254)

Il-Kummissjoni qieset li l-argumenti mqajma mill-Grupp ad hoc kienu diġà indirizzati fil-premessa (251). Peress li ma tressaq l-ebda kumment ġdid dwar is-sustanza, il-konklużjoni fil-premessa (252) ġiet ikkonfermata.

(255)

Il-grupp ad hoc argumenta wkoll li r-revoka tal-miżuri għad-difiża tal-kummerċ ma twassalx għal żieda sinifikanti fl-importazzjonijiet dannużi peress li, skonthom, sehem mis-suq modest ta’ 4.4 % tal-importazzjonijiet Ċiniżi matul il-PIR dgħajjef l-affermazzjoni li l-importazzjonijiet Ċiniżi huma ta’ theddida sinifikanti.

(256)

Il-Kummissjoni qieset li ż-żieda fis-sehem mis-suq għal 4.4 % fil-PIR seħħet f’sitwazzjoni b’miżuri ta’ difiża kummerċjali fis-seħħ. Minħabba l-miżuri għad-difiża tal-kummerċ, l-importazzjonijiet Ċiniżi kisbu biss sehem mis-suq ta’ 2,1 punti perċentwali matul il-perjodu kkunsidrat. Meta titqies l-attraenza tas-suq tal-Unjoni, il-kapaċità tal-produzzjoni u l-kapaċità ta’ riżerva fir-RPĊ u r-relazzjoni bejn il-prezzijiet tal-esportazzjoni lejn pajjiżi terzi u l-livell tal-prezzijiet fl-Unjoni, il-Kummissjoni kkonkludiet li jekk il-miżuri jridu jiġu revokati, ikun hemm żieda sinifikanti fl-importazzjonijiet oġġett ta’ dumping mir-RPĊ f’livelli ta’ prezzijiet dannużi. Fuq din il-bażi, din l-asserzjoni ġiet miċħuda.

(257)

Barra minn hekk, il-grupp ad hoc sostna li l-Kummissjoni bbażat ruħha fuq informazzjoni u allegazzjonijiet mhux ivverifikati li jikkompromettu l-imparzjalità tal-investigazzjoni, speċjalment dawk li ġejjin mill-applikant.

(258)

Kif imsemmi fil-premessi (33) u (34), il-Kummissjoni applikat l-Artikolu 28 tar-Regolament bażiku peress li l-kooperazzjoni mill-produtturi tar-roti elettriċi fir-RPĊ ma kinitx biżżejjed biex tagħmel sejbiet rappreżentattivi għall-fini ta’ dan ir-rieżami ta’ skadenza u n-nuqqas ta’ kooperazzjoni mill-GTĊ u minn partijiet rilevanti oħra fir-RPĊ, il-Kummissjoni, f’konformità mal-Artikolu 28 tar-Regolament bażiku, irrikorriet għall-użu tal-fatti disponibbli. Konsegwentement, is-sejbiet fir-rigward tal-probabbiltà ta’ kontinwazzjoni tas-sussidjar u l-probabbiltà u r-rikorrenza tad-dannu kienu bbażati fuq il-fatti disponibbli, b’mod partikolari l-informazzjoni sottomessa mat-talba għal rieżami, l-informazzjoni miksuba mill-partijiet li kkooperaw matul l-investigazzjoni tar-rieżami (jiġifieri, l-applikant u l-produtturi tal-Unjoni inklużi fil-kampjun), l-informazzjoni mis-sejbiet tal-Kummissjoni fl-investigazzjoni oriġinali, is-sejbiet tal-aktar investigazzjonijiet antisussidji reċenti mwettqa mill-Kummissjoni dwar l-industriji mħeġġa fiċ-Ċina u d-Dokument ta’ Ħidma tal-Persunal tal-Kummissjoni dwar Distorsjonijiet Sinifikanti. L-informazzjoni kollha sottomessa mill-produtturi tal-Unjoni fil-kampjun ġiet ivverifikata bir-reqqa. Fuq din il-bażi, din l-asserzjoni ġiet miċħuda.

(259)

L-ebda utent jew importatur mhux relatat ma ppreżenta ruħu u kkoopera f’din l-investigazzjoni billi ppreżenta tweġiba għall-kwestjonarju minbarra s-sottomissjoni msemmija hawn fuq. Fuq il-bażi tal-informazzjoni disponibbli għall-Kummissjoni, hija sabet li ma kien hemm l-ebda evidenza li tikkontradixxi l-konklużjoni fl-investigazzjoni oriġinali li l-effetti negattivi fuq importaturi mhux relatati ma setgħux jitqiesu sproporzjonati u ttaffew mid-disponibbiltà ta’ sorsi alternattivi ta’ provvista. L-effetti pożittivi tal-miżuri kumpensatorji fuq is-suq tal-Unjoni, b’mod partikolari fuq l-industrija tal-Unjoni, kienu akbar mill-effett negattiv potenzjali fuq il-gruppi ta’ interess l-oħra. Tabilħaqq, l-investigazzjoni kkonfermat li, minbarra ċ-Ċina, hemm dejjem aktar sors ieħor ta’ provvista minn pajjiżi terzi. Għalhekk, il-Kummissjoni kkonkludiet li l-kontinwazzjoni tal-miżuri ma tkunx ta’ detriment sproporzjonat għall-utenti u l-importaturi.

(260)

Wara d-divulgazzjoni, parti interessata waħda ddikjarat li jekk il-miżuri ma jiġux revokati, ir-roti elettriċi se jkomplu jiġu pprezzati żżejjed bla bżonn u inqas disponibbli għall-utenti. Huma sostnew jekk il-miżuri jitħassru li t-tnaqqis fil-prezz tar-roti elettriċi jwassal għal żieda sinifikanti fil-bejgħ tar-roti elettriċi. Il-Kummissjoni qieset li prezzijiet aktar baxxi mhux neċessarjament iwasslu għal żieda fil-bejgħ, peress li s-sikurezza, il-kwalità, l-affidabbiltà u s-servizz, minbarra l-prezzijiet, huma wkoll kriterji meta l-utenti jikkunsidraw ix-xiri ta’ rota elettronika. Barra minn hekk, jekk il-miżuri kellhom jitħassru, dan ikollu impatt negattiv fuq is-sitwazzjoni ekonomika tal-industrija tal-Unjoni, li jaffettwa l-innovazzjoni u l-varjetà tal-prodotti u jirriżulta f’inqas għażla għall-utenti. Fuq din il-bażi, din l-asserzjoni ġiet miċħuda.

(261)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti tal-interess tal-Unjoni kontra ż-żamma tal-miżuri eżistenti fuq l-importazzjonijiet tal-prodott taħt rieżami li joriġina mir-RPĊ.

(262)

Fuq il-bażi tal-konklużjonijiet li ntlaħqu mill-Kummissjoni dwar il-kontinwazzjoni ta’ sussidjar, ir-rikorrenza ta’ dannu u l-interess tal-Unjoni, il-miżuri antisussidji fuq l-importazzjonijiet tar-roti elettriċi li joriġinaw mir-RPĊ għandhom jinżammu.

(263)

Sabiex jiġu minimizzati r-riskji ta’ ċirkomvenzjoni minħabba d-differenzi fir-rati tad-dazju, jinħtieġu miżuri speċjali sabiex tiġi żgurata l-applikazzjoni tad-dazji kumpensatorji individwali. L-applikazzjoni tad-dazji kumpensatorji individwali hija applikabbli biss malli tiġi ppreżentata fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stabbiliti fl-Artikolu 1(3) ta’ dan ir-regolament. Sakemm tiġi ppreżentata din il-fattura, l-importazzjonijiet għandhom ikunu soġġetti għad-dazju kumpensatorju applikabbli għall- “importazzjonijiet l-oħra kollha li joriġinaw mir-RPĊ”.

(264)

Filwaqt li l-preżentazzjoni ta’ din il-fattura hija meħtieġa sabiex l-awtoritajiet doganali tal-Istati Membri jkunu jistgħu japplikaw ir-rati individwali tad-dazju kumpensatorju fuq l-importazzjonijiet, ma hijiex l-uniku element li għandu jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jridu jwettqu l-verifiki tas-soltu tagħhom u jistgħu, bħal fil-każijiet l-oħra kollha, jirrikjedu dokumenti addizzjonali (dokumenti tat-trasport, eċċ.) sabiex ikunu jistgħu jivverifikaw il-preċiżjoni tad-dettalji li jkun hemm fid-dikjarazzjoni u jiżguraw li l-applikazzjoni sussegwenti tar-rata tad-dazju aktar baxxa tkun ġustifikata, f’konformità mal-liġi doganali.

(265)

Jekk l-importazzjonijiet lejn l-Unjoni minn waħda mill-kumpaniji li jibbenefikaw minn rati tad-dazju individwali aktar baxxi jiżdiedu b’mod sinifikanti fil-volum wara l-impożizzjoni tal-miżuri kkonċernati, din iż-żieda fil-volum tista’ tiġi kkunsidrata bħala waħda li fiha nfisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont it-tifsira tal-Artikolu 23(1) tar-Regolament bażiku. F’ċirkostanzi bħal dawn u dment li l-kundizzjonijiet jiġu ssodisfati, tista’ tinbeda investigazzjoni antiċirkomvenzjoni. Din l-investigazzjoni tista’, fost oħrajn, teżamina l-ħtieġa għat-tneħħija ta’ rata/i tad-dazju individwali u l-impożizzjoni konsegwenti ta’ dazju fil-pajjiż kollu.

(266)

Ir-rati tad-dazju kumpensatorju tal-kumpaniji individwali speċifikati f’dan ir-Regolament japplikaw biss għall-importazzjonijiet tal-prodott taħt rieżami li joriġinaw mir-RPĊ u li jiġi prodott mill-entitajiet legali msemmija. L-importazzjonijiet tal-prodott taħt rieżami li jiġi prodott minn kwalunkwe kumpanija oħra mhux imsemmija speċifikament fil-parti operattiva ta’ dan ir-Regolament, inklużi entitajiet relatati ma’ dawk speċifikament imsemmija, għandhom ikunu soġġetti għar-rata tad-dazju applikabbli għal “L-importazzjonijiet l-oħra kollha li joriġinaw mir-Repubblika tal-Poplu taċ-Ċina”. Dawn ma għandhom ikunu soġġetti għall-ebda waħda mir-rati tad-dazju kumpensatorju individwali.

(267)

Kumpanija tista’ titlob l-applikazzjoni tar-rata tad-dazju individwali jekk sussegwentement tibdel l-isem tal-entità tagħha. It-talba trid tkun indirizzata lill-Kummissjoni (88). It-talba trid tinkludi l-informazzjoni rilevanti kollha li turi li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, regolament emendatorju li jinforma dwar il-bidla fl-isem jiġi ppubblikat f’Il-Ġurnal Uffiċjali tal-Unjoni Ewropea.

(268)

Fid-dawl tal-Artikolu 109 tar-Regolament (UE, Euratom) 2024/2509 tal-Parlament Ewropew u tal-Kunsill (89) dwar ir-regoli finanzjarji applikabbli għall-baġit ġenerali tal-Unjoni meta jkollu jiġi rimborżat ammont wara sentenza tal-Qorti tal-Ġustizzja tal-Unjoni Ewropea, l-imgħax li għandu jitħallas għandu jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament prinċipali tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar.

(269)

Il-miżuri previsti f’dan ir-regolament huma f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036.