(1)

Fl-4 ta’ Awwissu 2020, il-Kummissjoni rċeviet applikazzjoni mingħand Cérience (li qabel kienet Jouffray-Drillaud) għall-approvazzjoni tal-estratt taż-żerriegħa tal-Vitis vinifera L. (estratt taż-żerriegħa tal-għeneb) bħala sustanza bażika biex tintuża fil-protezzjoni tal-pjanti bħala fungiċida fuq id-dwieli, it-tuffieħ, il-patata u l-ħass.

(2)

Wara l-kontroll tal-ammissibbiltà, l-applikazzjoni, kif waslet fi Frar 2022, kienet akkumpanjata mill-informazzjoni meħtieġa skont l-Artikolu 23(3), it-tieni subparagrafu, tar-Regolament (KE) Nru 1107/2009.

(3)

Il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) għall-assistenza xjentifika skont l-Artikolu 23(4) tar-Regolament (KE) Nru 1107/2009. L-awtorità pprovdiet lill-Kummissjoni b’rapport tekniku dwar l-estratt taż-żerriegħa tal-Vitis vinifera L. (estratt taż-żerriegħa tal-għeneb) fit-30 ta’ Ottubru 2023 (2).

(4)

Fil-21 ta’ Marzu 2024 u fl-10 ta’ Lulju 2024 rispettivament, il-Kummissjoni ppreżentat ir-rapport ta’ rieżami (3) u abbozz ta’ dan ir-Regolament lill-Kumitat Permanenti dwar il-Pjanti, l-Annimali, l-Ikel u l-Għalf.

(5)

L-informazzjoni pprovduta mill-applikant turi li l-estratt taż-żerriegħa tal-Vitis vinifera L. (estratt taż-żerriegħa tal-għeneb) jintuża bħala suppliment tal-ikel u bħala addittiv tal-għalf. Barra minn hekk, dan ma jintużax b’mod predominanti għal skopijiet ta’ protezzjoni tal-pjanti, iżda s-sustanza hija utli għall-protezzjoni tal-pjanti. Abbażi tal-informazzjoni pprovduta fl-applikazzjoni u fir-Rapport Tekniku mill-Awtorità, jista’ jiġi konkluż ukoll li mhijiex sustanza ta’ tħassib; ma għandhiex il-kapaċità inerenti li tikkawża effetti ta’ interferenza endokrinali , newrotossiċità jew effetti immunotossiċi; u ma tiġix introdotta fis-suq direttament bħala prodott għall-protezzjoni tal-pjanti. Konsegwentement, l-estratt taż-żerriegħa tal-Vitis vinifera L. (estratt taż-żerriegħa tal-għeneb) jissodisfa l-kundizzjonijiet stabbiliti fl-Artikolu 23(1) tar-Regolament (KE) Nru 1107/2009.

(6)

Kienu disponibbli diversi evalwazzjonijiet rilevanti, imwettqa f’konformità ma’ leġiżlazzjoni oħra tal-Unjoni, kif imsemmija fl-Artikolu 23(2) tar-Regolament (KE) Nru 1107/2009. Tliet Opinjonijiet Xjentifiċi tal-Awtorità kienu rilevanti: tnejn mill-Bord FEEDAP u waħda mill-Bord tal-NDA (4). L-eżitu ta’ dawk l-evalwazzjonijiet tqies mill-Awtorità, kif ukoll mill-Kummissjoni.

(7)

Wara li jiġu eżaminati l-applikazzjoni u d-dokumenti relatati kollha, jista’ jkun mistenni li l-estratt taż-żerriegħa tal-Vitis vinifera L. (estratt taż-żerriegħa tal-għeneb) jissodisfa, b’mod ġenerali, ir-rekwiżiti stabbiliti fl-Artikolu 23 tar-Regolament (KE) Nru 1107/2009, b’mod partikolari fir-rigward tal-użi li ġew eżaminati u spjegati fir-rapport ta’ rieżami tal-Kummissjoni. Għalhekk jixraq li l-estratt taż-żerriegħa tal-Vitis vinifera L. (estratt taż-żerriegħa tal-għeneb) jiġi approvat bħala sustanza bażika.

(8)

Il-Kummissjoni stiednet lill-applikant iressaq il-kummenti tiegħu dwar ir-rapport tekniku tal-Awtorità u dwar l-abbozz tar-rapport ta’ rieżami tal-Kummissjoni. L-applikant issottometta l-kummenti tiegħu, li ġew eżaminati bir-reqqa u tqiesu kif dovut.

(9)

F’konformità mal-Artikolu 13(2) tar-Regolament (KE) Nru 1107/2009, flimkien mal-Artikolu 6 tiegħu u fid-dawl tal-għarfien xjentifiku u tekniku attwali, jeħtieġ li jiġu inklużi ċerti kundizzjonijiet għall-approvazzjoni.

(10)

F’konformità mal-Artikolu 13(4) tar-Regolament (KE) Nru 1107/2009, jenħtieġ li l-Anness tar-Regolament ta’ Implimentazzjoni tal-Kummissjoni (UE) Nru 540/2011 (5) jiġi emendat skont dan.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,