(1)

Il-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika (“il-Konvenzjoni”) ġiet konkluża mill-Unjoni permezz tad-Deċiżjoni tal-Kunsill (UE) 2023/1075 (1), fir-rigward tal-istituzzjonijiet u l-amministrazzjoni pubblika tal-Unjoni, u permezz tad-Deċiżjoni tal-Kunsill (UE) 2023/1076 (2), fir-rigward ta’ kwistjonijiet relatati mal-kooperazzjoni ġudizzjarja f’materji kriminali, l-ażil u n-non-refoulement, sa fejn dawn jaqgħu fil-kompetenza esklużiva tal-Unjoni. Il-Konvenzjoni daħlet fis-seħħ għall-Unjoni fl-1 ta’ Ottubru 2023.

(2)

Skont l-Artikolu 66(1) tal-Konvenzjoni, il-Grupp ta’ Esperti dwar l-azzjoni kontra l-vjolenza fuq in-nisa u l-vjolenza domestika (“GREVIO”) għandu jimmonitorja l-implimentazzjoni tal-Konvenzjoni mill-Partijiet. Skont l-Artikolu 68(3) tal-Konvenzjoni, il-proċeduri ta’ evalwazzjoni sussegwenti għall-proċedura ta’ evalwazzjoni tax-xenarju ta’ referenza tal-GREVIO rigward ir-rapporti dwar miżuri leġiżlattivi u miżuri oħra li jagħtu effett lid-dispożizzjonijiet ta’ din il-Konvenzjoni sottomessi mill-Partijietgħandhom jinqasmu f’ċikli (“ċikli ta’ evalwazzjoni tematika”). Skont l-Artikolu 68(11) tal-Konvenzjoni, il-GREVIO għandu jadotta r-rapport u l-konklużjonijiet tiegħu dwar il-miżuri meħuda mill-Parti kkonċernata. Skont l-Artikolu 68(12) tal-Konvenzjoni, fuq il-bażi tar-rapport u l-konklużjonijiet tal-GREVIO, il-Kumitat tal-Partijiet stabbilit bl-Artikolu 67 tal-Konvenzjoni jista’ jadotta rakkomandazzjonijiet indirizzati lill-Parti kkonċernata.

(3)

L-ewwel miċ-ċikli ta’ evalwazzjoni tematika, intitolat “Nibnu l-fiduċja bl-għoti ta’ appoġġ, protezzjoni u ġustizzja”, tnieda fl-2022 u ser jopera mill-2023 sal-2031. Dan jindirizza 19-il dispożizzjoni speċifika tal-Konvenzjoni, jiġifieri l-Artikoli 7, 8, 11, 12, 14, 15, 16, 18, 20, 22, 25, 31, 48, 49, 50, 51, 52, 53 u 56, u jikkonċerna l-implimentazzjoni mill-Partijiet tad-dispożizzjonijiet tal-Konvenzjoni li jirrigwardaw il-kooperazzjoni ġudizzjarja f’materji kriminali, pereżempju kwistjonijiet relatati mal-protezzjoni u l-appoġġ għall-vittmi ta’ vjolenza fuq in-nisa u vjolenza domestika.

(4)

F’Settembru 2024, is-Segretarjat tal-Kumitat tal-Partijiet qasam mal-Partijiet abbozz ta’ deċiżjoni IC-CP(2024)10 dwar rakkomandazzjonijiet li għandhom jiġu adottati fid-dawl tar-rapporti tal-GREVIO adottati bħala parti mill-ewwel ċiklu ta’ evalwazzjoni tematika (l-“abbozz ta’ deċiżjoni”). L-abbozz ta’ deċiżjoni jipprevedi proċedura għall-adozzjoni u s-superviżjoni tal-implimentazzjoni ta’, rakkomandazzjonijiet mill-Kumitat tal-Partijiet u fih mudell ta’ rakkomandazzjoni. L-abbozz ta’ deċiżjoni għandu jiġi diskuss u, jekk jista’ jkun, adottat fis-17-il laqgħa tal-Kumitat tal-Partijiet fis-17 ta’ Diċembru 2024.

(5)

Huwa xieraq li tiġi stabbilita l-pożizzjoni li għandha tittieħed f’isem l-Unjoni fi ħdan il-Kumitat tal-Partijiet peress li l-abbozz ta’ deċiżjoni jistabbilixxi l-proċedura għall-adozzjoni u s-superviżjoni tal-implimentazzjoni tar-rakkomandazzjonijiet indirizzati lill-Partijiet fir-rigward ta’ kwistjonijiet relatati mal-kooperazzjoni ġudizzjarja f’materji kriminali, sa fejn dawn ikunu fil-kompetenza esklużiva tal-Unjoni. Dawk ir-rakkomandazzjonijiet ser ikunu kapaċi jinfluwenzaw b’mod deċiżiv il-kontenut tad-dritt tal-Unjoni fis-sens li jistgħu jaffettwaw l-interpretazzjoni tad-dispożizzjonijiet rilevanti tal-Konvenzjoni fil-futur.

(6)

L-abbozz ta’ deċiżjoni jipprovdi li r-rakkomandazzjonijiet għandhom ikunu limitati għall-aktar tħassib urġenti identifikat mill-GREVIO fir-rapporti tiegħu. Dan it-tħassib jinkludi nuqqasijiet li l-GREVIO jikkunsidra li jeħtieġu azzjoni immedjata, indikata bl-uża tal-verb “iħeġġeġ”, kif ukoll dawk il-kwistjonijiet li l-GREVIO jqis li jenħtieġ li jiġu rimedjati fil-futur qrib, indikati mill-verb “jinkoraġġixxi bil-qawwa”, li jkopru l-kapitoli kollha tal-Konvenzjoni.

(7)

L-abbozz ta’ deċiżjoni jipprevedi li l-Kumitat tal-Partijiet għandu jissorvelja l-implimentazzjoni tar-rakkomandazzjonijiet billi jitlob lill-Parti kkonċernata biex tippreżenta rapport bil-miktub dwar il-miżuri meħuda fi żmien 3 snin mill-adozzjoni tar-rakkomandazzjonijiet. Skont l-abbozz ta’ deċiżjoni, minn hemm “il quddiem, il-Kumitat tal-Partijiet ikun jista” jagħżel li ma jieħu l-ebda pass ulterjuri fis-superviżjoni tiegħu sabiex jevita d-duplikazzjoni ma’ kwalunkwe ċiklu futur ta’ evalwazzjoni tematika.

(8)

L-abbozz ta’ deċiżjoni jipprevedi li r-rakkomandazzjonijiet għandhom jirrakkomandaw li l-Parti kkonċernata timplimenta l-proposti inqas urġenti tal-GREVIO li jkun għad fadal, bħala mod kif jiġu approvati l-konklużjonijiet tal-GREVIO fl-intier tagħhom, u li dik il-Parti tiġi mistiedna għal tkomplija tad-djalogu mal-GREVIO.

(9)

L-Unjoni jenħtieġ li taqbel mal-abbozz ta’ deċiżjoni, peress li l-proċedura stabbilita hemmhekk tallinja mal-proċedura ta’ evalwazzjoni tax-xenarju ta’ referenza taħt l-Artikolu 68 tal-Konvenzjoni, li kienet effettiva, u tiżgura implimentazzjoni effettiva tad-dispożizzjonijiet kollha magħżula għall-evalwazzjoni tematika, filwaqt li tevita proċessi ta’ monitoraġġ duplikati.

(10)

Għalhekk, jenħtieġ li l-pożizzjoni tal-Unjoni fil-Kumitat tal-Partijiet tkun li tappoġġa l-adozzjoni tal-abbozz ta’ deċiżjoni, inkluż il-mudell ta’ rakkomandazzjoni propost stabbilit fl-Appendiċi I tagħha.

(11)

Sabiex ikun hemm il-flessibbiltà meħtieġa matul il-laqgħa tal-Kumitat tal-Partijiet, jenħtieġ li jkun previst li bidliet speċifiċi fl-abbozz ta’ deċiżjoni jkunu jistgħu jiġu miftiehma f’isem l-Unjoni mingħajr deċiżjoni ulterjuri tal-Kunsill.

(12)

F’konformità mal-Artikoli 1 u 2 tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-Ispazju ta’ Libertà, Sigurtà u Ġustizzja, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, u mingħajr preġudizzju għall-Artikolu 4 ta’ dak il-Protokoll, l-Irlanda mhix qed tieħu sehem fl-adozzjoni ta’ din id-Deċiżjoni u mhix marbuta biha jew soġġetta għall-applikazzjoni tagħha.

(13)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka mhijiex qed tieħu sehem fl-adozzjoni ta’ din id-Deċiżjoni u mhijiex marbuta biha jew soġġetta għall-applikazzjoni tagħha,

—

il-punt B: l-estensjoni tal-iskadenza ta’ 3 snin għall-Parti kkonċernata biex tippreżenta rapport bil-miktub lill-Kumitat tal-Partijiet dwar il-miżuri meħuda għall-implimentazzjoni tal-Konvenzjoni;

—

il-punt C: it-tħassir tar-rakkomandazzjoni li l-Parti kkonċernata tieħu miżuri biex timplimenta l-konklużjonijiet ulterjuri tal-ewwel rapporti ta’ evalwazzjoni tematika tal-GREVIO;

—

il-punt D: it-tħassir tal-istedina lill-Parti kkonċernata biex tkompli d-djalogu dwar il-progress mal-GREVIO.