(1)

Ir-Regolament ta’ Implimentazzjoni tal-Kummissjoni (UE) 2021/637 (2) stabbilixxa formati uniformi ta’ divulgazzjoni biex tiġi żgurata l-applikazzjoni uniformi tar-Regolament (UE) Nru 575/2013. Ir-Regolament (UE) 2024/1623 tal-Parlament Ewropew u tal-Kunsill (3) emenda r-Regolament (UE) Nru 575/2013 biex f’dak ir-Regolament jinkorpora l-istandards internazzjonali tat-tielet Qafas Regolatorju Internazzjonali għall-banek (li jissejjaħ “Basel III”) tal-Kumitat ta’ Basel dwar is-Superviżjoni Bankarja. Dawk l-istandards internazzjonali fihom standards ta’ divulgazzjoni prudenzjali biex tittejjeb it-trasparenza u l-konsistenza fil-qasam tar-rekwiżiti prudenzjali għall-istituzzjonijiet ta’ kreditu. Għaldaqstant huwa neċessarju li jiġu emendati r-regoli dwar il-formati ta’ divulgazzjoni uniformi sabiex dawk il-bidliet jiġu riflessi fl-ispeċifikazzjonijiet rigward l-obbligi ta’ divulgazzjoni.

(2)

Id-divulgazzjoni ta’ informazzjoni mill-istituzzjonijiet dwar il-metriċi regolatorji ewlenin tagħhom jenħtieġ li tinkludi d-divulgazzjoni tal-kapital disponibbli ta’ istituzzjoni, l-assi ponderati għar-riskju tagħha, l-ingranaġġ tagħha, kif ukoll l-aktar metriċi ta’ likwidità rilevanti.

(3)

L-istituzzjonijiet, sabiex ikunu jistgħu jassorbu t-telf f’sitwazzjoni ta’ negozju avvjat jew negozju magħluq, għandhom bżonn il-fondi proprji fi kwantità u kwalità suffiċjenti, kif mitlub mill-Artikolu 92 tar-Regolament (UE) Nru 575/2013. Jenħtieġ li l-istituzzjonijiet jiddivulgaw l-informazzjoni dwar il-kompożizzjoni, il-kwantità u l-kwalità tal-fondi proprji, sabiex il-partijiet ikkonċernati jkunu jistgħu jivvalutaw il-kapaċità tal-assorbiment tat-telf tal-banek.

(4)

Id-divulgazzjoni dwar il-konformità mar-rekwiżit għal riżerva ta’ kapital kontroċiklika jenħtieġ li tirrifletti l-fatt li r-riżerva ta’ kapital kontroċiklika msemmija fil-Kapitolu 4 tat-Titolu VII tad-Direttiva 2013/36/UE tal-Parlament Ewropew u tal-Kunsill (4) għandha l-għan li taċċerta li r-rekwiżiti ta’ kapital tas-settur bankarju jqisu l-ambjent makrofinanzjarju li fih joperaw l-istituzzjonijiet ta’ kreditu.

(5)

Huwa l-kruċjali li s-suq ikollu aċċess għall-informazzjoni dwar jekk istituzzjoni jenħtieġx li tiġi kklassifikata taħt l-istituzzjonijiet globali sistemikament importanti (G-SIIs, global systemically important institutions). Għal dik ir-raġuni, jenħtieġ li l-istituzzjonijiet jiddivulgaw informazzjoni dwar jekk l-indikaturi ta’ sinifikat imsemmija fl-Artikolu 131 tad-Direttiva 2013/36/UE humiex issodisfati jew le.

(6)

Jenħtieġ li jiġu stabbiliti mudelli uniformi biex jiġi aċċertat li l-istituzzjonijiet jiddivulgaw informazzjoni dwar il-konformità tagħhom mar-rekwiżiti ta’ likwidità, inklużi l-proporzjon tal-kopertura tal-likwidità u l-proporzjon ta’ ffinanzjar stabbli nett, b’mod uniformi u paragunabbli.

(7)

Huwa neċessarju li jiġu aċċertati l-koerenza u l-konsistenza bejn l-obbligi ta’ rappurtar stipulati fir-Regolament (UE) Nru 575/2013 u leġiżlazzjoni oħra tal-Unjoni fil-qasam tar-riskji ESG, u b’mod partikolari r-Regolament (UE) 2020/852 tal-Parlament Ewropew u tal-Kunsill (5). Ir-regoli dwar id-divulgazzjoni tar-riskji ESG jenħtieġ għalhekk iqisu l-kriterji, il-klassifikazzjonijiet u d-definizzjonijiet stipulati fl-Artikoli 2 u 3 tar-Regolament (UE) 2020/852. B’mod partikolari, dawk ir-regoli jenħtieġ li jqisu l-kriterji għall-identifikazzjoni u l-klassifikazzjoni ta’ attivitajiet ekonomiċi ambjentalment sostenibbli, kif stipulat fir-Regolament (UE) 2020/852 u fir-Regolament Delegat tal-Kummissjoni (UE) 2020/1818 (6). Għall-istess raġuni, meta tiġi ddivulgata informazzjoni dwar il-prestazzjoni tal-enerġija tal-portafoll tal-proprjetà immobbli tagħhom, jenħtieġ li l-istituzzjonijiet jipprovdu dik l-informazzjoni fl-għamla ta’ ċertifikat dwar ir-rendiment fl-użu tal-enerġija kif definit fl-Artikolu 2, il-punt 12 tad-Direttiva 2010/31/UE tal-Parlament Ewropew u tal-Kunsill (7).

(8)

L-Artikoli 19a u 29a tad-Direttiva 2013/34/UE tal-Parlament Ewropew u tal-Kunsill (8) jirrikjedu li ċerti impriżi kbar li huma entitajiet ta’ interess pubbliku, jew entitajiet ta’ interess pubbliku li huma impriżi prinċipali ta’ grupp kbir, rispettivament, jinkludu fir-rapport ta’ ġestjoni tagħhom jew fir-rapport ta’ ġestjoni kkonsolidat tagħhom informazzjoni dwar l-impatt tal-attività tagħhom fuq kwistjonijiet ambjentali, soċjali u tal-impjegati, ir-rispett għad-drittijiet tal-bniedem, kwistjonijiet kontra l-korruzzjoni u t-tixħim. Madankollu, dan l-obbligu ma japplikax għal impriżi oħra. B’riżultat ta’ dan, l-impriżi li mhumiex soġġetti għall-Artikoli 19a u 29a tad-Direttiva 2013/34/UE mhumiex meħtieġa jiddivulgaw tali informazzjoni u jistgħu ma jkunux jistgħu jipprovdu tali informazzjoni lill-istituzzjonijiet. Dawk l-impriżi li huma kontropartijiet għal istituzzjonijiet jistgħu għalhekk ikunu mistennija biss li jipprovdu dik l-informazzjoni u data fuq bażi volontarja.

(9)

Sabiex jimplimenta l-istandards ta’ Basel III, ir-Regolament (UE) 2024/1623 introduċa fl-Artikolu 92(3) tar-Regolament (UE) Nru 575/2013 limitu iktar baxx għar-rekwiżiti ta’ kapital ibbażat fuq ir-riskju (“il-limitu tal-output”) li huwa ugwali għal perċentwal tar-rekwiżiti ta’ kapital li kieku kienu japplikaw kieku ntużaw l-approċċi standardizzati. Għalhekk huwa xieraq li jiġu riflessi l-bidliet fil-mudelli ta’ divulgazzjoni rilevanti. Barra minn hekk, jenħtieġ li jiddaħħlu żewġ mudelli ġodda ta’ divulgazzjoni sabiex jiġi pprovdut paragun bejn il-proporzjonijiet ta’ kapital ibbażat fuq ir-riskju li jinħadmu skont l-approċċi standardizzati u mmudellati internament fil-livell tar-riskju u fil-klassijiet tal-iskoperturi għar-riskju ta’ kreditu.

(10)

B’rabta mal-użu tal-Approċċ standardizzat (“AS”) għar-riskju ta’ kreditu, ir-Regolament (UE) 2024/1623 introduċa fil-Kapitolu 2 tat-Titolu II tar-Regolament (UE) Nru 575/2013 trattament aktar granulari tal-ponderazzjoni tar-riskju ta’ skoperturi differenti, inkluż għall-iskoperturi għal istituzzjonijiet, skoperturi għal korporattivi, skoperturi fuq self speċjalizzat, skoperturi fil-livell tal-konsumatur, skoperturi garantiti permezz ta’ proprjetà immobbli, skoperturi ta’ dejn subordinat, skoperturi ta’ ekwità u skoperturi inadempjenti. Huwa neċessarju li dawk il-bidliet jiġu riflessi fil-mudelli ta’ divulgazzjoni, u li n-numerazzjoni tar-ringieli f’dawk il-mudelli ta’ divulgazzjoni tiġi allinjata ma’ dik użata fil-mudelli ta’ divulgazzjoni korrispondenti tal-BCBS.

(11)

Ir-Regolament (UE) 2024/1623 introduċa fil-Kapitolu 3 tat-Titolu II tar-Regolament (UE) Nru 575/2013, b’rabta mal-użu tal-Approċċ ta’ Klassifikazzjonijiet Interni (“IRB”, Internal Ratings Approach) għall-iskoperturi għar-riskju ta’ kreditu, qiegħed limitu fuq il-klassijiet tal-iskoperturi li għalihom jista’ jiġi applikat l-approċċ IRB avvanzat (A-IRB, advanced IRB) sabiex jiġu kkalkolati r-rekwiżiti ta’ fondi proprji għar-riskju ta’ kreditu. Speċifikament għall-iskoperturi għal istituzzjonijiet, issa jista’ jintuża biss l-approċċ IRB ta’ fondazzjoni (F-IRB, foundation IRB), u għall-iskoperturi ta’ ekwità, huwa permess biss l-użu tal-approċċ standardizzat, ħlief għal perjodu tranżitorju. Barra minn hekk, inħolqu klassijiet tal-iskoperturi ġodda għall-“Gvernijiet reġjonali jew awtoritajiet lokali” u għall-“Entitajiet tas-settur pubbliku” sabiex jiġi aċċertat trattament konsistenti ta’ dawk l-iskoperturi u sabiex tiġi evitata varjabbiltà mhux intenzjonata fir-rekwiżiti ta’ fondi proprji relatati. Jenħtieġ li dawk l-emendi jiġu riflessi fil-mudelli ta’ divulgazzjoni dwar l-użu tal-approċċ IRB. Huwa wkoll neċessarju li tiġi allinjata l-istruttura tal-effett tal-mudelli fuq l-RWEAs tad-derivattivi ta’ kreditu użati bħala tekniki ta’ mitigazzjoni tar-riskju ta’ kreditu (CRM, credit risk mitigation techniques) man-numerazzjoni tar-ringieli użata fil-mudell korrispondenti ta’ divulgazzjoni tal-BCBS.

(12)

Ir-Regolament (UE) 2024/1623 introduċa fit-Titolu IV tar-Regolament (UE) Nru 575/2013, qafas ġdid għall-ikkalkular tar-rekwiżiti ta’ fondi proprji għar-riskju tas-suq, abbażi tar-rieżami fundamentali tal-portafoll tan-negozjar (FRTB, fundamental review of the trading book) tal-BCBS. Dik l-emenda kienet neċessarja sabiex tindirizza n-nuqqasijiet identifikati fil-qafas attwali tar-rekwiżiti ta’ kapital għar-riskju tas-suq għall-pożizzjonijiet fil-portafoll tan-negozjar. F’konformità mal-qafas il-ġdid, l-istituzzjonijiet għandhom l-obbligu li japplikaw approċċ standardizzat simplifikat, standardizzat alternattiv jew ta’ mudell intern alternattiv sabiex jikkalkulaw ir-rekwiżiti ta’ fondi proprji għar-riskju tas-suq. Jenħtieġ li dawk l-emendi jiġu riflessi fil-mudelli ta’ divulgazzjoni permezz tal-introduzzjoni ta’ sett komprensiv ta’ tabelli u mudelli ta’ divulgazzjoni. Dak is-sett ġdid ta’ tabelli u mudelli ta’ divulgazzjoni jenħtieġ li jkun effettiv meta l-qafas regolatorju għar-riskju tas-suq ibbażat fuq l-istandards FRTB ta’ Basel jibda japplika fl-Unjoni. Sadanittant, jenħtieġ li r-rekwiżiti ta’ divulgazzjoni kif japplikaw bħalissa, jibqgħu japplikaw. Sabiex jifhmu b’mod komprensiv l-użu ta’ dak l-approċċ il-ġdid, jenħtieġ li l-istituzzjonijiet li jużaw l-approċċ ta’ mudell intern alternattiv, fl-ewwel data tal-applikazzjoni tal-qafas il-ġdid tad-divulgazzjoni, jiddivulgaw l-informazzjoni kwantitattiva flimkien mal-informazzjoni kwalitattiva.

(13)

Jenħtieġ li jiġu stipulati formati ta’ divulgazzjoni uniformi biex tiġi aċċertata divulgazzjoni uniformi u paragunabbli dwar ir-riskji tal-aġġustamenti tal-valwazzjoni tal-kreditu (“CVA”, credit valuation adjustments). Għalhekk huwa meħtieġ li jiġu introdotti mudelli u tabelli ġodda ta’ divulgazzjoni b’informazzjoni kwantitattiva u kwalitattiva dwar ir-riskju ta’ CVA għal dak l-iskop. Jenħtieġ li dawk il-mudelli jqisu li l-istituzzjonijiet soġġetti għar-rekwiżiti ta’ fondi proprji għas-CVA jistgħu japplikaw l-approċċ standardizzat, bażiku jew simplifikat jew taħlita ta’ dawk l-approċċi u li r-riskju tas-CVA jenħtieġ li jaqbad kemm ir-riskju tal-firxiet tal-kreditu ta’ kontroparti ta’ istituzzjoni kif ukoll ir-riskju tas-suq tal-portafoll tat-tranżazzjonijiet innegozjati mill-istituzzjoni ma’ dik il-kontroparti.

(14)

Ir-Regolament (UE) 2024/1623 introduċa fil-Kapitolu 1 tat-Titolu III tar-Regolament (UE) Nru 575/2013 approċċ uniku ġdid mhux ibbażat fuq mudelli għall-kalkolu tar-rekwiżiti ta’ fondi proprji għar-riskju operazzjonali sabiex jiġi indirizzat in-nuqqas ta’ sensittività għar-riskju u ta’ komparabilità tal-approċċi eżistenti. B’segwitu għal diskrezzjoni inkluża fl-istandards ta’ Basel III, ir-rekwiżiti minimi ta’ fondi proprji tal-Unjoni huma bbażati unikament fuq il-kalkolu tal-komponent tal-indikatur tan-negozju (BIC, Business Indicator Component), filwaqt li r-rekords tat-telf jitqiesu għall-finijiet tad-divulgazzjoni biss. Jenħtieġ li dawk l-emendi jiġu riflessi fil-mudelli tad-divulgazzjoni, inter alia billi jiġu stipulati mudelli ġodda biex tingħata informazzjoni dwar it-telf operazzjonali annwali mġarrab matul l-10 snin li għaddew, il-kalkolu tal-indikatur, komponenti u subkomponenti tan-negozju, u r-rekwiżiti ta’ fondi proprji relatati u l-ammonti tal-iskoperturi għar-riskju.

(15)

L-Artikolu 501d(2) tar-Regolament (UE) Nru 575/2013 jippreskrivi kif l-istituzzjonijiet għandhom l-obbligu li jikkalkulaw ir-rekwiżiti ta’ fondi proprji tagħhom għall-iskoperturi tal-kriptoassi sad-data tal-applikazzjoni tal-att leġiżlattiv imsemmi fl-Artikolu 501d(1) ta’ dak ir-Regolament. Għaldaqstant huwa neċessarju li jiġi stabbilit kif l-istituzzjonijiet se jkollhom l-obbligu li jiddivulgaw l-iskoperturi tal-kriptoassi tagħhom matul dak il-perjodu tranżitorju.

(16)

Ir-Regolament (UE) 2024/1623 emenda l-Artikolu 434a(1) tar-Regolament (UE) Nru 575/2013 u introduċa rekwiżit biex l-EBA tiżviluppa soluzzjonijiet tal-IT, inklużi struzzjonijiet, li jintużaw mill-istituzzjonijiet għad-divulgazzjonijiet mitluba skont it-Titoli II u III ta’ dak ir-Regolament. Bl-istess mod, il-mudelli tad-divulgazzjoni jenħtieġ li jindikaw b’biżżejjed ċarezza l-punti tad-data u l-informazzjoni li l-istituzzjonijiet għandhom l-obbligu li jiddivulgaw sabiex jiġi aċċertat li l-utenti jkollhom aċċess għal biżżejjed informazzjoni komprensiva u komparattiva u li tinżamm il-konsistenza mal-istandards internazzjonali dwar id-divulgazzjonijiet. Sabiex l-EBA tkun tista’ tiżviluppa soluzzjonijiet tal-IT adattati, dawk il-formati uniformi tad-divulgazzjoni jenħtieġ li ma jkunux vinkolanti fir-rigward tal-istruttura tagħhom u r-rappreżentazzjoni tagħhom. B’mod partikolari, jenħtieġ li l-EBA tkun tista’ tabbanduna r-rappreżentazzjoni grafika u l-istruttura tabulari tal-mudelli tad-divulgazzjoni dment li l-informazzjoni u l-punti tad-data kollha meħtieġa jkunu inklużi fis-soluzzjoni tal-IT.

(17)

Sabiex l-istituzzjonijiet jingħataw sett integrat u komprensiv ta’ formati ta’ divulgazzjoni uniformi u sabiex jiġu aċċertati divulgazzjonijiet ta’ kwalità għolja, filwaqt li jiġi wkoll rifless l-approċċ skont l-Artikolu 434a(1) rivedut tar-Regolament (UE) Nru 575/2013, huwa meħtieġ li jitħassar ir-Regolament ta’ Implimentazzjoni (UE) 2021/637 u li dak ir-Regolament ta’ Implimentazzjoni jiġi sostitwit b’dan ir-Regolament.

(18)

Sabiex jiġu aċċertati divulgazzjonijiet fil-pront u ta’ kwalità mill-istituzzjonijiet, jenħtieġ li dawn jingħataw biżżejjed żmien biex jadattaw is-sistemi interni tagħhom fid-dawl tal-bidliet fil-qafas eżistenti tad-divulgazzjoni riflessi/inkorporati f’dan ir-Regolament.

(19)

Dan ir-Regolament huwa bbażat fuq l-abbozz tal-istandards tekniċi ta’ implimentazzjoni ppreżentat lill-Kummissjoni mill-Awtorità Bankarja Ewropea.

(20)

L-Awtorità Bankarja Ewropea wettqet konsultazzjonijiet pubbliċi miftuħa dwar l-abbozz tal-istandards tekniċi ta’ implementazzjoni li dan ir-Regolament huwa bbażat fuqhom, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (9),

(a)

l-informazzjoni msemmija fl-Artikolu 444, il-punti minn (a) sa (e), u l-informazzjoni msemmija fl-Artikolu 453, il-punti (g), (h) u (i), tar-Regolament (UE) Nru 575/2013 kif speċifikat fit-Taqsima 10 – “Divulgazzjoni tar-riskju ta’ kreditu SA” fl-Anness I;

(b)

l-informazzjoni dwar il-valuri tal-iskopertura mnaqqsin minn fondi proprji msemmija fl-Artikolu 444, il-punt (e), tar-Regolament (UE) Nru 575/2013 kif speċifikat fit-Taqsima 4 – “Divulgazzjoni tal-fondi proprji” fl-Anness I.