IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament tal-Kunsill (UE) 2017/1939 tat-12 ta' Ottubru 2017 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”) (1), u b'mod partikolari l-Artikolu 16 tiegħu,

Wara li kkunsidra d-Deċiżjoni ta' Implimentazzjoni tal-Kunsill (UE) 2018/1696 tat-13 ta' Lulju 2018 dwar ir-regoli ta' ħidma tal-bord tal-għażla previsti fl-Artikolu 14(3) tar-Regolament (UE) 2017/1939 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”) (2),

Wara li kkunsidra d-Deċiżjoni tal-Kunsill (UE) 2023/133 tas-17 ta' Jannar 2023 li taħtar il-membri tal-bord tal-għażla previst fl-Artikolu 14(3) tar-Regolament (UE) 2017/1939 (3),

Wara li kkunsidra l-opinjoni motivata u l-klassifikazzjoni tal-kandidati mħejjija mill-bord tal-għażla,

Billi:

(1)	L-UPPE ġie stabbilit bir-Regolament (UE) 2017/1939.

(2)	Il-Prosekuturi Ewropej jissorveljaw l-investigazzjonijiet u l-prosekuzzjonijiet f'konformità mal-Artikolu 12 tar-Regolament (UE) 2017/1939.

(3)	Id-Deċiżjoni tal-Kummissjoni (UE) 2024/807 (4) ikkonfermat il-parteċipazzjoni tal-Polonja fil-kooperazzjoni msaħħa dwar l-istabbiliment tal-UPPE.

(4)	Id-Deċiżjoni ta' Implimentazzjoni (UE) 2018/1696 tistabbilixxi r-regoli ta' ħidma tal-bord tal-għażla previsti fl-Artikolu 14(3) tar-Regolament (UE) 2017/1939 (ir-“regoli ta' ħidma tal-bord tal-għażla”).

(5)

Skont l-Artikolu 16(1) tar-Regolament (UE) 2017/1939, kull Stat Membru parteċipant irid jinnomina tliet kandidati għall-pożizzjoni ta' Prosekutur Ewropew minn fost kandidati li huma membri attivi tal-uffiċċju tal-prosekutur pubbliku jew tal-ġudikatura tal-Istat Membru rilevanti, li l-indipendenza tagħhom tkun mingħajr dubju u li jkollhom il-kwalifiki meħtieġa biex jinħatru f'kariga għolja ta' prosekuzzjoni jew ġudizzjarja fl-Istati Membri rispettivi tagħhom, u li jkollhom esperjenza prattika rilevanti tas-sistemi legali nazzjonali, ta' investigazzjonijiet finanzjarji u tal-kooperazzjoni ġudizzjarja internazzjonali f'materji kriminali.

(6)	Il-Polonja nnominat tliet kandidati.

(7)	Il-bord tal-għażla ħejja l-opinjoni motivata u l-klassifikazzjoni għal kull wieħed mill-kandidati nominati mill-Polonja li ssodisfaw il-kundizzjonijiet stabbiliti fl-Artikolu 16(1) tar-Regolament (UE) 2017/1939, u ppreżentahom lill-Kunsill, li rċevihom fil-15 ta’ Lulju 2024.

(8)	Skont ir-raba' paragrafu tar-Regola VII.2 tar-regoli ta' ħidma tal-bord tal-għażla, il-bord tal-għażla kklassifika lill-kandidati skont il-kwalifiki u l-esperjenza tagħhom. Il-klassifikazzjoni tindika l-ordni ta' preferenza tal-bord tal-għażla u mhijiex vinkolanti fuq il-Kunsill.

(9)	F'konformità mal-Artikolu 16(2) tar-Regolament (UE) 2017/1939, wara li jkun irċieva l-opinjoni motivata tal-bord tal-għażla, il-Kunsill jagħżel u jaħtar wieħed mill-kandidati biex ikun il-Prosekutur Ewropew tal-Istat Membru parteċipanti inkwistjoni.

(10)	F'konformità mal-Artikolu 16(3) tar-Regolament (UE) 2017/1939, il-Kunsill, filwaqt li jaġixxi b'maġġoranza sempliċi, għandu jagħżel u jaħtar il-Prosekuturi Ewropej għal perjodu ta' sitt snin li ma jiġġeddidx.

(11)	Il-Kunsill ivvaluta l-merti rispettivi tal-kandidati b'kont meħud tal-opinjoni motivata ppreżentata mill-bord tal-għażla.

(12)	Fuq il-bażi ta' valutazzjoni tal-merti rispettivi tal-kandidati, il-Kunsill segwa l-ordni ta' preferenza mhux vinkolanti indikata mill-bord tal-għażla għall-kandidati nnominati mill-Polonja,

ADOTTA DIN ID-DEĊIŻJONI: