DEĊIŻJONI TA’ IMPLIMENTAZZJONI TAL-KUMMISSJONI (UE) 2024/3157

tas-17 ta’ Diċembru 2024

li temenda d-Deċiżjoni ta’ Implimentazzjoni tal-Kummissjoni (UE) 2021/1067 dwar l-użu armonizzat tal-ispettru tar-radju fil-banda tal-frekwenzi 5 945 - 6 425 MHz għall-implimentazzjoni ta’ sistemi tal-aċċess mingħajr fili inkluż networks ta’ żona lokali bir-radju (WAS/RLANs)

(notifikata bid-dokument C(2024) 8803)

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Deċiżjoni Nru 676/2002/KE tal-Parlament Ewropew u tal-Kunsill dwar qafas regolatorju għall-politika tas-7 ta’ Marzu 2002 dwar qafas regolatorju għall-politika dwar l-ispettru tar-radju fil-Komunità Ewropea (Deċiżjoni dwar l-Ispettri tar-radju) (1), u b’mod partikolari l-Artikolu 4(3) tagħha,

Billi:

(1)

Id-Deċiżjoni ta’ Implimentazzjoni tal-Kummissjoni (UE) 2021/1067 (2) tarmonizza l-banda 5 945 - 6 425 MHz għas-sistemi tal-aċċess bla fili inkluż networks ta’ żona lokali bir-radju. It-tabella 2 tal-Anness ta’ dik id-Deċiżjoni tistabbilixxi, għall-apparati WAS/RLAN b’Potenza Baxxa Ħafna (VLP, Very Low Power), il-limitu tad-densità tal-potenza isotropika rradjata ekwivalenti medja massima (e.i.r.p.,equivalent isotropically radiated power) għall-emissjonijiet barra mill-banda (OOB, out-of-band) taħt il-5 935 MHz f’-45 dBm/MHz sal-31 ta’ Diċembru 2024. Barra minn hekk, in-Nota 3 ta’ dik it-Tabella tipprevedi li l-adegwatezza ta’ dak il-limitu jenħtieġ li tkun soġġetta għal rieżami sal-31 ta’ Diċembru 2024, u li fin-nuqqas ta’ evidenza ġustifikata, mill-1 ta’ Jannar 2025 ikun japplika valur ta’ -37 dBm/MHz.

(2)

Fil-21 ta’ April 2021, skont l-Artikolu 4(2) tad-Deċiżjoni 676/2002/KE, il-Kummissjoni ħarġet mandat lill-Konferenza Ewropea tal-Amministrazzjonijiet Postali u tat-Telekomunikazzjoni (“CEPT”, European Conference of Postal and Telecommunications Administrations) biex sa Lulju 2024 teżamina mill-ġdid il-limitu tal-emissjonijiet tal-OOB taħt il-5 935 MHz applikabbli għall-apparati VLP WAS/RLAN li jużaw il-banda 5 945 - 6 425 MHz, abbażi, b’mod partikolari, tal-istudju ta’ tekniki tal-mitigazzjoni possibbli għall-protezzjoni tas-sistemi tat-trasport intelliġenti ferrovjarji urbani (ITS, urban rail intelligent transport systems), bil-ħsieb li l-limitu jiġi llaxkat għal -37 dBm/MHz. Dan kien iġġustifikat mill-ħtieġa li tiġi żgurata s-sikurezza tat-trasport u l-koeżistenza ta’ tali apparati mal-ITS, inkluż il-kontroll tal-ferroviji bbażat fuq il-komunikazzjoni (CBTC, communication based train control), li jużaw l-ispettru f’partijiet tal-banda tal-frekwenzi 5 905 - 5 935 MHz.

(3)

Peress li s-CEPT ma rnexxilhiex tagħti r-riżultati tal-mandat sa Lulju 2024, huwa essenzjali li tiġi żgurata ċ-ċertezza legali għas-sikurezza tat-trasport fir-rigward tal-limitu xieraq tad-densità tal-e.i.r.p. medja massima għall-emissjonijiet tal-OOB li japplika taħt il-5 935 MHz għall-apparati VLP WAS/RLAN. Għalhekk, sakemm jitlesta r-rieżami xieraq mis-CEPT skont il-mandat, jenħtieġ li jiġi żgurat li l-valur attwali ta’ -45 dBm/MHz ikompli japplika wara l-31 ta’ Diċembru 2024. Jenħtieġ li jingħata biżżejjed żmien lis-CEPT biex tlesti r-rieżami mistenni u għalhekk l-iskadenza għal tali rieżami jenħtieġ li tiġi estiża sal-31 ta’ Diċembru 2025.

(4)	Il-miżuri previsti f’din id-Deċiżjoni huma f’konformità mal-opinjoni tal-Kumitat dwar l-Ispettru tar-Radju,

ADOTTAT DIN ID-DEĊIŻJONI:

Artikolu 1

Id-Deċiżjoni ta’ Implimentazzjoni (UE) 2021/1067 hija emendata kif ġej:

(1)

L-Artikolu 4 huwa sostitwit b’dan li ġej:

“Artikolu 4

Din id-Deċiżjoni għandha tkun soġġetta għal rieżami sal-31 ta’ Diċembru 2025 filwaqt li jitqiesu studji u kejl addizzjonali fir-rigward tal-limiti tad-densità tal-e.i.r.p. medja massima għall-emissjonijiet VLP WAS/RLANs barra mill-banda taħt il-5 935 MHz.”;

(2)	l-Anness huwa sostitwit bit-test stabbilit fl-Anness ta’ din id-Deċiżjoni.

Artikolu 2

Din id-Deċiżjoni hija indirizzata lill-Istati Membri.

Magħmul fi Brussell, is-17 ta’ Diċembru 2024.

Għall-Kummissjoni

Henna Virkkunen

Viċi President Eżekuttiv

(1) ĠU L 108, 24.4.2002, p. 1.

(2) Id-Deċiżjoni ta’ Implimentazzjoni tal-Kummissjoni (UE) 2021/1067 tas-17 ta’ Ġunju 2021 dwar l-użu armonizzat tal-ispettru tar-radju fil-banda tal-frekwenzi 5 945 - 6 425 MHz għall-implimentazzjoni ta’ sistemi tal-aċċess mingħajr fili inkluż networks ta’ żona lokali bir-radju (WAS/RLANs) (ĠU L 232, 30.6.2021, p. 1).

ANNESS

“ANNESS

Kundizzjonijiet tekniċi armonizzati għall-WAS/RLANs fil-banda tal-frekwenzi 5 945 - 6 425 MHz

Tabella 1

Apparati WAS/RLANs ta’ enerġija baxxa ta’ fuq ġewwa (“LPI”, Low power indoor)

Parametru

Kundizzjonijiet tekniċi

Operazzjoni permissibbli

Ristrett għall-użu fuq ġewwa, inkluż fil-ferroviji bi twieqi miksija bil-metall (nota 1) u fl-inġenji tal-ajru.

L-użu fuq barra, inkluż fil-vetturi tat-triq, mhuwiex permess.

Kategorija tal-apparat

Punt ta’ aċċess jew pont LPI li jiġi fornut bl-enerġija minn konnessjoni bil-wajer ikollu antenna integrata u ma jaħdimx bil-batterija.

Apparat tal-klijent LPI li jkun konness ma’ punt ta’ aċċess LPI jew apparat tal-klijent LPI ieħor u li jista’ jaħdem bil-batterija jew le.

Banda tal-frekwenzi

5 945 - 6 425 MHz

Potenza isotropika rradjata ekwivalenti medja massima (“e.i.r.p.”) għall-emissjonijiet fil-banda (nota 2)

23 dBm

Densità e.i.r.p medja massima għall-emissjonijiet fil-banda (nota 2)

10 dBm/MHz

Densità e.i.r.p. medja massima għall-emissjonijiet barra mill-banda taħt il-5 935 MHz (nota 2)

-22 dBm/MHz

Nota 1:

Jew strutturi simili magħmula minn materjal b’karatteristiċi ta’ attenwazzjoni komparabbli.

Nota 2:

L-e.i.r.p. medja tirreferi għall-e.i.r.p. waqt it-trażmissjoni li tikkorrispondi għall-ogħla potenza, jekk jiġi implimentat il-kontroll tal-potenza.

Għandhom jintużaw tekniki għall-aċċess tal-ispettru u għall-mitigazzjoni tal-interferenzi li jipprovdu livell xieraq ta’ prestazzjoni għall-konformità mar-rekwiżiti essenzjali tad-Direttiva 2014/53/UE tal-Parlament Ewropew u tal-Kunsill (1). Meta t-tekniki rilevanti jkunu deskritti fi standards armonizzati jew f’partijiet minnhom, li r-referenzi għalihom ġew ippubblikati f’Il-Ġurnal Uffiċjali tal-Unjoni Ewropea f’konformità mad-Direttiva 2014/53/UE, mill-inqas għandha tkun żgurata prestazzjoni ekwivalenti għal-livell tal-prestazzjoni assoċjat ma’ dawk it-tekniki.

Tabella 2

Apparati WAS/RLAN b’Potenza Baxxa Ħafna (VLP, Very Low Power)

Parametru

Kundizzjonijiet tekniċi

Operazzjoni permissibbli

Fuq ġewwa u fuq barra.

L-użu fuq Sistema tal-Ajru mingħajr Bdot Abbord (UAS, Unmanned Aircraft Systems) mhuwiex permess.

Kategorija tal-apparat

L-apparat VLP huwa apparat portabbli.

Banda tal-frekwenzi

5 945 -6 425 MHz

e.i.r.p medja massima għall-emissjonijiet fil-banda (nota 1)

14 dBm

Densità e.i.r.p. medja massima għall-emissjonijiet fil-banda (nota 1)

1 dBm/MHz

Densità e.i.r.p. medja massima tal-użu tan-narrowband għall-emissjonijiet fil-banda (nota 1) (nota 2)

10 dBm/MHz

Densità e.i.r.p. medja massima għall-emissjonijiet barra mill-banda taħt il-5 935 MHz (nota 1)

- 45 dBm/MHz (nota 3)

Nota 1:

L-e.i.r.p. medja tirreferi għall-e.i.r.p. waqt it-trażmissjoni li tikkorrispondi għall-ogħla potenza, jekk jiġi implimentat il-kontroll tal-potenza.

Nota 2:

L-apparati narrowband (NB) huma apparati li joperaw f’wisgħat tal-banda ta’ kanali taħt l-20 MHz. L-apparati NB jeħtieġu wkoll mekkaniżmu ta’ qbiż tal-frekwenzi bbażat fuq mill-inqas 15-il kanal tal-qbiż biex joperaw b’valur ta’ densità spettrali tal-potenza (PSD) fil-banda ’l fuq minn 1 dBm/MHz.

Nota 3:

Is-sostituzzjoni tal-limitu - 45 dBm/MHz bil-limitu -37 dBm/MHz għandha tiġi deċiża sal-31 ta’ Diċembru 2025, abbażi tat-tweġiba tas-CEPT għall-mandat tal-Kummissjoni tal-21 ta’ April 2021.

Għandhom jintużaw tekniki għall-aċċess tal-ispettru u għall-mitigazzjoni tal-interferenzi li jipprovdu livell xieraq ta’ prestazzjoni għall-konformità mar-rekwiżiti essenzjali tad-Direttiva 2014/53/UE. Meta t-tekniki rilevanti jkunu deskritti fi standards armonizzati jew f’partijiet minnhom, li r-referenzi għalihom ġew ippubblikati f’Il-Ġurnal Uffiċjali tal-Unjoni Ewropea f’konformità mad-Direttiva 2014/53/UE, mill-inqas għandha tkun żgurata prestazzjoni ekwivalenti għal-livell tal-prestazzjoni assoċjat ma’ dawk it-tekniki.

”

(1) Id-Direttiva 2014/53/UE tal-Parlament Ewropew u tal-Kunsill tas-16 ta’ April 2014 dwar l-armonizzazzjoni tal-liġijiet tal-Istati Membri marbuta mat-tqegħid fis-suq ta’ tagħmir tar-radju u li tħassar id-Direttiva 1999/5/KE (ĠU L 153, 22.5.2014, p. 62).