(1)

Ir-Regolament (UE) 2016/429 jipprevedi li biex jidħlu fl-Unjoni l-konsenji tal-annimali, tal-prodotti ġerminali u tal-prodotti li joriġinaw mill-annimali jridu jkunu ġejjin minn pajjiż terz jew minn territorju, jew minn żona jew minn kompartiment tiegħu, elenkati f’konformità mal-Artikolu 230(1) ta’ dak ir-Regolament.

(2)

Ir-Regolament Delegat tal-Kummissjoni (UE) 2020/692 (2) jistabbilixxi r-rekwiżiti tas-saħħa tal-annimali li l-konsenji ta’ ċerti speċijiet u kategoriji tal-annimali, tal-prodotti ġerminali u tal-prodotti li joriġinaw mill-annimali, li jkunu ġejjin minn pajjiżi terzi jew territorji, jew minn żoni tagħhom, jew minn kompartimenti tagħhom fil-każ tal-annimali tal-akkwakultura, iridu jkunu konformi magħhom biex jidħlu fl-Unjoni.

(3)

Ir-Regolament ta’ Implimentazzjoni tal-Kummissjoni (UE) 2021/404 (3) jistabbilixxi l-listi tal-pajjiżi terzi, jew tat-territorji, jew taż-żoni tagħhom, li minnhom hu permess id-dħul fl-Unjoni tal-ispeċijiet u tal-kategoriji tal-annimali, tal-prodotti ġerminali u tal-prodotti li joriġinaw mill-annimali u li jaqgħu fil-kamp ta’ applikazzjoni tar-Regolament Delegat (UE) 2020/692. Dawk il-listi u ċerti regoli ġenerali li jikkonċernaw dawk il-listi huma stabbiliti fl-Annessi I sa XXII ta’ dak ir-Regolament ta’ Implimentazzjoni. L-Anness I tar-Regolament ta’ Implimentazzjoni (UE) 2021/404 jistabbilixxi r-regoli ġenerali, u l-listi huma stabbiliti fl-Annessi II sa XXII tiegħu.

(4)

Ir-Renju Unit innotifika lill-Kummissjoni dwar każijiet ikkonfermati ta’ infezzjonijiet bil-virus tal-ilsien blu (BTV) f’annimali bovini u ovini fil-Gran Brittanja. Barra minn hekk, il-Maċedonja ta’ Fuq innotifikat lill-Kummissjoni dwar każijiet ikkonfermati tal-BTV f’annimali ovini u kaprini fit-territorju tagħha. Konsegwentement, ir-Renju Unit u l-Maċedonja ta’ Fuq jenħtieġ li jkunu meħtieġa jittestjaw l-annimali bovini, ovini u kaprini donaturi fir-rigward tas-semen, tal-ooċiti jew tal-embrijuni prodotti in vitro għall-BTV. L-Annessi IX u X tar-Regolament ta’ Implimentazzjoni (UE) 2021/404 jistabbilixxu l-listi ta’ pajjiżi terzi jew territorji, jew żoni tagħhom awtorizzati għad-dħul fl-Unjoni ta’ konsenji ta’ prodotti ġerminali ta’ annimali bovini u ta’ annimali ovini u kaprini rispettivament. Minħabba l-każijiet ikkonfermati tal-BTV fil-Gran Brittanja u fil-Maċedonja ta’ Fuq, jenħtieġ li l-garanzija tas-saħħa tal-annimali “Test tal-BTV” tiddaħħal fl-entrati għaż-żoni GB-1 u GB-2 fir-Renju Unit u fiż-żona MK-0 fil-Maċedonja ta’ Fuq fil-kolonna 6 tat-tabella fil-Parti 1 tal-Anness IX, u fl-entrata għaż-żona GB-0 fir-Renju Unit fil-kolonna 6 tat-tabella fil-Parti 1 tal-Anness X tar-Regolament ta’ Implimentazzjoni (UE) 2021/404. Għalhekk, jenħtieġ li l-Annessi IX u X tar-Regolament ta’ Implimentazzjoni (UE) 2021/404 jiġu emendati kif xieraq.

(5)

L-Anness XV tar-Regolament ta’ Implimentazzjoni (UE) 2021/404 jelenka l-pajjiżi terzi jew it-territorji, jew iż-żoni tagħhom awtorizzati għad-dħul fl-Unjoni ta’ konsenji ta’ prodotti tal-laħam mill-ungulati, mill-pollam u mill-għasafar tal-kaċċa. Id-deskrizzjoni taż-żona “BR-2” fil-Brażil fit-tabella stabbilita fil-Parti 2 ta’ dak l-Anness, fost l-oħrajn, tirreferi għaż-żoni “BR-3” u “BR-4” fil-Brażil fit-tabella stabbilita fil-Parti 2 tal-Anness XIII ta’ dak ir-Regolament ta’ Implimentazzjoni. Madankollu, wara l-emenda tal-Anness XIII tar-Regolament ta’ Implimentazzjoni (UE) 2021/404, bir-Regolament ta’ Implimentazzjoni tal-Kummissjoni (UE) 2024/1170 (4), iż-żoni “BR-3” u “BR-4” fil-Brażil ma għadhomx elenkati fit-tabella stabbilita fil-Parti 2 tal-Anness XIII tar-Regolament ta’ Implimentazzjoni (UE) 2021/404. Għalhekk, jenħtieġ li d-deskrizzjoni taż-żona “BR-2” fil-Brażil fil-Parti 2 tal-Anness XV tar-Regolament ta’ Implimentazzjoni (UE) 2021/404 tiġi emendata kif xieraq.

(6)

Barra minn hekk, it-territorju kollu tal-Moldova huwa elenkat fl-Anness XV tar-Regolament ta’ Implimentazzjoni (UE) 2021/404 bħala pajjiż terz li minnu l-konsenji ta’ prodotti tal-laħam mill-pollam li jkunu għaddew minn trattament speċifiku għall-mitigazzjoni tar-riskju “D”, f’konformità mal-Anness XXVI tar-Regolament Delegat (UE) 2020/692, huma awtorizzati għad-dħul fl-Unjoni.

(7)

Fl-21 ta’ Ġunju 2024, il-Moldova ressqet talba lill-Kummissjoni biex telenka ż-żona tagħha “MD-1” fl-Anness XV tar-Regolament ta’ Implimentazzjoni (UE) 2021/404 bħala żona awtorizzata għad-dħul fl-Unjoni ta’ konsenji ta’ prodotti tal-laħam tal-pollam li mhumiex meħtieġa jgħaddu minn trattament speċifiku għall-mitigazzjoni tar-riskju f’konformità mal-Anness XXVI tar-Regolament Delegat (UE) 2020/692.

(8)

Il-Kummissjoni evalwat it-talba mill-Moldova u kkonkludiet li, meta jitqies l-istatus tas-saħħa tal-annimali taż-żona “MD-1” fil-Moldova fir-rigward tal-mard elenkat rilevanti u l-garanziji pprovduti mill-awtorità kompetenti tal-Moldova fir-rigward tal-konformità jew tal-ekwivalenza mar-rekwiżiti tas-saħħa tal-annimali applikabbli fl-Unjoni, dik iż-żona tista’ tiġi elenkata għad-dħul fl-Unjoni ta’ konsenji ta’ prodotti tal-laħam tal-pollam bi trattament mhux speċifiku assenjat “A” fil-kolonna 10 tat-tabella fil-Parti 1, it-Taqsima A tal-Anness XV tar-Regolament ta’ Implimentazzjoni (UE) 2021/404, li tindika li l-prodotti tal-laħam mhumiex meħtieġa jgħaddu minn xi trattament speċifiku għall-mitigazzjoni tar-riskju. Jenħtieġ li l-Anness XV ta’ dak ir-Regolament ta’ Implimentazzjoni jiġi emendat kif xieraq.

(9)

Barra minn hekk, jeħtieġ li jiġu aġġornati ċerti referenzi fl-Anness I tar-Regolament ta’ Implimentazzjoni (UE) 2021/404. Għalhekk, jenħtieġ li l-Annessi I, IX, X u XV tar-Regolament ta’ Implimentazzjoni (UE) 2021/404 jiġu emendati kif xieraq.

(10)

Barra minn hekk, il-Parti 1, it-Taqsima A, tal-Anness XXI tar-Regolament ta’ Implimentazzjoni (UE) 2021/404 telenka l-pajjiżi terzi jew it-territorji, jew iż-żoni jew il-kompartimenti tagħhom li minnhom huwa awtorizzat id-dħul fl-Unjoni ta’ konsenji ta’ ċerti annimali akkwatiċi tal-ispeċijiet elenkati u ta’ prodotti li joriġinaw mill-annimali minn dawk l-ispeċijiet elenkati. Fl-entrata għall-Istati Uniti, fir-ringieli għaż-żoni “US-2”, “US-3”, “US-4” u “US-5”, fil-kolonna 6 ta’ dik il-lista, ir-referenza għal mudell taċ-ċertifikat tas-saħħa tal-annimali “AQUA-ENTRY-ESTAB/RELEASE/OTHER” tħassret bi żball bir-Regolament ta’ Implimentazzjoni tal-Kummissjoni (UE) 2021/1727 (5), meta dan emenda dak l-Anness. Jenħtieġ li dik ir-referenza terġa’ tiddaħħal u għalhekk jenħtieġ li l-Anness XXI tar-Regolament ta’ Implimentazzjoni (UE) 2021/404 jiġi kkoreġut kif xieraq.

(11)

Ir-Regolament ta’ Implimentazzjoni (UE) 2021/1727 japplika mill-1 ta’ Ottubru 2021. Kif xieraq, jenħtieġ li l-korrezzjoni li saret fl-Anness XXI tar-Regolament ta’ Implimentazzjoni (UE) 2021/404 b’dan ir-Regolament tapplika wkoll minn dik id-data.

(12)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,