(1)

It-Trattat tal-Karta tal-Enerġija (“TKE”) u l-Protokoll tiegħu dwar effiċjenza fl-enerġija u aspetti ambjentali li għandhom x’jaqsmu magħha (“PEEREA”) ġew konklużi mill-Komunitajiet Ewropej permezz tad-Deċiżjoni tal-Kunsill u tal-Kummissjoni 98/181/KE, KEFA, Euratom (1) u daħlu fis-seħħ fis-16 ta' April 1998.

(2)

L-Artikolu 49 tat-TKE u l-Artikolu 21 tal-PEEREA jiddeżinja lill-Gvern tar-Repubblika Portugiża bħala d-depożitarju tat-TKE u tal-PEEREA. Fl-1 ta' Frar 2024, ir-Repubblika Portugiża nnotifikat l-intenzjoni tagħha li toħroġ mit-TKE u l-PEEREA. F’dan ir-rigward, il-Gvern tar-Repubblika Portugiża ser jieqaf jaqdi l-funzjoni tiegħu ta' depożitarju. Il-ħruġ tar-Repubblika Portugiża mit-TKE u l-PEEREA ser isir effettiv fit-2 ta' Frar 2025.

(3)

Emenda fl-Artikolu 49 tat-TKE u fl-Artikolu 21 tal-PEEREA hija neċessarja biex jiġi ddeżinjat depożitarju ġdid għat-TKE u l-PEEREA. Il-Partijiet Kontraenti għat-TKE (“Partijiet Kontraenti”) qablu fin-negozjati li jżidu tali emenda fit-test modernizzat tat-TKE, sabiex jiddeżinjaw lis-Segretarjat tal-Karta tal-Enerġija (is-“Segretarjat”) bħala depożitarju ġdid. Il-Partijiet Kontraenti qablu wkoll li jemendaw il-PEEREA b’mod simili. Il-Partijiet Kontraenti qablu wkoll li jipproponu għall-approvazzjoni tal-Konferenza tal-Karta tal-Enerġija fehim ġdid fir-rigward tal-Artikolu 49 tat-TKE u tal-Artikolu 21 tal-PEEREA dwar ir-rwoli tas-Segretarjat bħala depożitarju. Barra minn hekk, minħabba li mhux il-Partijiet Kontraenti kollha ser japplikaw it-TKE modernizzat b'mod proviżorju wara l-adozzjoni tiegħu, il-Partijiet Kontraenti qablu li jipproponu żewġ deċiżjonijiet għall-approvazzjoni tal-Konferenza tal-Karta tal-Enerġija li ser tiddeżinja lis-Segretarjat bħala depożitarju interim mit-2 ta' Frar 2025, sakemm jidħlu fis-seħħ l-emendi tat-TKE u tal-PEEREA.

(4)

Skont l-Artikolu 34 tat-TKE, il-Konferenza tal-Karta tal-Enerġija tadotta t-testi tal-emendi tat-TKE. Skont l-Artikolu 12 tal-PEEREA, il-Konferenza tal-Karta tal-Enerġija tadotta testi ta’ emendi għall-PEEREA.

(5)

Il-Konferenza tal-Karta tal-Enerġija ser tadotta l-atti proposti fil-laqgħa tagħha tat-3 ta' Diċembru 2024 fir-rigward tat-TKE u permezz ta' korrispondenza, imnedija fis-6 ta’ Novembru 2024 bi skadenza fit-30 ta’ Jannar 2025, fir-rigward tal-PEEREA. L-atti li għandhom jiġu adottati mill-Konferenza tal-Karta tal-Enerġija ser ikunu vinkolanti fuq il-Euratom.

(6)

Jixraq li waqt il-Konferenza tal-Karta tal-Enerġija, il-Euratom ma teżerċitax il-vot tagħha dwar l-emendi proposti għat-TKE u għall-PEEREA, kif ukoll dwar il-fehimiet u d-deċiżjonijiet proposti. Huwa xieraq ukoll li tistabbilixxi l-pożizzjoni li għandha tittieħed mill-Istati Membri li huma Partijiet Kontraenti, li jaġixxu b'mod konġunt, għal kwistjonijiet li jaqgħu fi ħdan il-kompetenza tal-Euratom. Dik il-pożizzjoni hija mingħajr preġudizzju għad-diviżjoni tal-kompetenzi bejn il-Euratom u l-Istati Membri. Dik il-pożizzjoni tikkomplementa l-pożizzjoni stabbilita fid-Deċiżjoni tal-Kunsill (Euratom) 2024/1645 (2).

(7)

Jenħtieġ li l-Istati Membri li huma Partijiet Kontraenti, li huma preżenti waqt il-Konferenza tal-Karta tal-Enerġija jew li jivvotaw b’korrispondenza, jieħdu pożizzjoni li ma timpedix l-adozzjoni jew l-approvazzjoni tal-emendi, il-fehimiet u d-deċiżjonijiet proposti,