(1)

L-Unjoni stabbiliet għaliha nfisha l-objettiv li żżomm u tiżviluppa spazju ta' libertà, sigurtà u ġustizzja.

(2)

Il-Programm ta' The Hague: it-tisħiħ tal-libertà, is-sigurtà u l-ġustizzja fl-Unjoni Ewropea (3) jirrikjedi li l-Istati Membri jikkunsidraw possibbiltajiet biex f'każijiet multilaterali transfruntieri l-prosekuzzjoni tiġi kkonċentrata fi Stat Membru wieħed, bil-ħsieb li tiżdied l-effiċjenza tal-prosekuzzjonijiet filwaqt li tiġi ggarantita l-amministrazzjoni tajba tal-ġustizzja.

(3)

Il-Programm ta' miżuri għall-implimentazzjoni tal-prinċipju tar-rikonoxximent reċiproku ta' deċiżjonijiet f'materji kriminali (4) jappella għal strument li jiffaċilita t-trasferiment tal-proċedimenti kriminali lil Stati Membri oħra.

(4)

Huwa meħtieġ żvilupp ulterjuri tal-kooperazzjoni ġudizzjarja bejn l-Istati Membri biex tiżdied l-amministrazzjoni effiċjenti u tajba tal-ġustizzja kriminali fl-ispazju komuni ta' libertà, sigurtà u ġustizzja u biex jiġi żgurat li l-Istat Membru li jkun fl-aħjar pożizzjoni li jinvestiga jew jipprosekwixxi reat kriminali. B'mod partikolari, regoli komuni għall-Istati Membri rigward it-trasferiment tal-proċedimenti kriminali jistgħu jgħinu biex jiġu evitati proċedimenti kriminali paralleli bla bżonn fi Stati Membri differenti fir-rigward tal-istess fatti u tal-istess persuna, li jistgħu jirriżultaw fi ksur tal-prinċipju “ne bis in idem”. Tali regoli komuni jistgħu jnaqqsu wkoll l-għadd ta' proċedimenti kriminali multipli fir-rigward tal-istess fatti jew fir-rigward tal-istess persuna li jkunu qed jitwettqu fi Stati Membri differenti. Tali regoli komuni għandhom ukoll l-għan li jiżguraw li jkun possibbli li, jekk il-konsenja ta' persuna għall-proċedimenti kriminali taħt mandat ta' arrest Ewropew, skont id-Deċiżjoni Qafas tal-Kunsill 2002/584/ĠAI (5), iddum jew tiġi rifjutata għal raġunijiet bħall-eżistenza ta' proċedimenti kriminali paralleli li jkunu għaddejjin fi Stat Membru ieħor għall-istess reat kriminali, ikun jista' jsir trasferiment tal-proċedimenti kriminali sabiex tiġi evitata l-impunità tal-persuna li tkun is-suġġett ta’ proċeduri kriminali.

(5)

Regoli komuni dwar it-trasferiment tal-proċedimenti kriminali huma essenzjali wkoll sabiex il-kriminalità transfruntiera tiġi miġġielda b'mod effiċjenti, li huma partikolarment importanti fir-rigward ta' reati kriminali mwettqa minn gruppi kriminali organizzati, bħat-traffikar tad-droga, id-dħul klandestin ta' migranti, it-traffikar ta' bnedmin, it-traffikar ta' armi, reati ambjentali, iċ-ċiberkriminalità jew il-ħasil tal-flus. Il-prosekuzzjoni ta' gruppi kriminali organizzati li huma attivi fi Stati Membri multipli tista' toħloq diffikultajiet kbar għall-awtoritajiet involuti. It-trasferiment tal-proċedimenti kriminali huwa għodda importanti li ssaħħaħ il-ġlieda kontra gruppi kriminali organizzati li huma attivi fl-Unjoni kollha.

(6)

Sabiex tiġi żgurata l-kooperazzjoni effettiva bejn l-awtoritajiet rikjedenti u l-awtoritajiet rikjesti fir-rigward tat-trasferiment tal-proċedimenti kriminali, jenħtieġ li r-regoli dwar tali trasferiment jiġu stabbiliti b'att legalment vinkolanti u direttament applikabbli tal-Unjoni.

(7)

Jenħtieġ li dan ir-Regolament japplika għat-talbiet kollha għal trasferiment maħruġa fil-qafas tal-proċedimenti kriminali.

(8)

Id-Deċiżjoni Qafas tal-Kunsill 2009/948/ĠAI (6) għandha l-għan li tipprevjeni sitwazzjonijiet fejn l-istess persuna tkun soġġetta għal proċedimenti kriminali paralleli fi Stati Membri differenti fir-rigward tal-istess fatti, li jista' jwassal għal sentenza definittiva ta' dawk il-proċedimenti f'żewġ Stati Membri jew aktar. Dik id-Deċiżjoni Qafas għalhekk tistabbilixxi proċedura għal konsultazzjonijiet diretti bejn l-awtoritajiet kompetenti tal-Istati Membri kkonċernati bil-għan li jintlaħaq kunsens dwar kwalunkwe soluzzjoni effettiva li għandha l-għan li tevita l-konsegwenzi negattivi li jirriżultaw minn tali proċedimenti paralleli u l-ħela ta' ħin u riżorsi ta' dawk l-awtoritajiet kompetenti. Fejn dawk l-awtoritajiet kompetenti jiddeċiedu, wara konsultazzjonijiet f'konformità ma' dik id-Deċiżjoni Qafas, li jikkonċentraw il-proċedimenti fi Stat Membru wieħed permezz tat-trasferiment tal-proċedimenti kriminali, jenħtieġ li dak it-trasferiment jitwettaq f'konformità ma' dan ir-Regolament.

(9)

Atti legali oħra fil-qasam tal-materji kriminali, b'mod partikolari dawk relatati ma' tipi speċifiċi ta' reati kriminali bħad-Direttiva (UE) 2017/541 tal-Parlament Ewropew u tal-Kunsill (7) u d-Deċiżjonijiet Qafas tal-Kunsill 2002/475/ĠAI (8) u 2008/841/ĠAI (9), jinkludu dispożizzjonijiet li jirreferu għall-fatturi li għandhom jitqiesu bil-għan li l-proċedimenti kriminali jiġu ċentralizzati fi Stat Membru uniku fil-każ li aktar minn Stat Membru wieħed ikun jista' jipprosekwixxi b'mod validu abbażi tal-istess fatti. Meta l-awtoritajiet kompetenti tal-Istati Membri kkonċernati jiddeċiedu, wara kooperazzjoni f'konformità ma' tali atti legali, li jiċċentralizzaw il-proċedimenti kriminali fi Stat Membru wieħed permezz tat-trasferiment tal-proċedimenti kriminali, jenħtieġ li tali trasferiment jitwettaq f'konformità ma' dan ir-Regolament.

(10)

Ġew adottati diversi atti legali tal-Unjoni dwar l-applikazzjoni tal-prinċipju tar-rikonoxximent reċiproku għal sentenzi u deċiżjonijiet ġudizzjarji f'materji kriminali, b'mod partikolari d-Deċiżjonijiet Kwadru tal-Kunsill 2005/214/ĠAI (10), 2008/909/ĠAI (11) u 2008/947/ĠAI (12). Dan ir-Regolament jissupplimenta dawk id-Deċiżjonijiet Kwadru u ma jaffettwax l-applikazzjoni tagħhom.

(11)

Dan ir-Regolament ma jaffettwax l-iskambji spontanji ta' informazzjoni regolati minn atti legali oħra tal-Unjoni.

(12)

Dan ir-Regolament ma japplikax għal deċiżjonijiet dwar ir-riallokazzjoni, il-fużjoni jew il-qsim ta' każijiet li fir-rigward tagħhom l-Uffiċċju tal-Prosekutur Pubbliku Ewropew ikun eżerċita l-kompetenza tiegħu f'konformità mar-Regolament tal-Kunsill (UE) 2017/1939 (13).

(13)

Għall-finijiet ta' dan ir-Regolament, jenħtieġ li l-Istati Membri jiddeżinjaw l-awtoritajiet kompetenti tagħhom b'mod li jippromwovi l-prinċipju ta' kuntatt dirett bejn dawk l-awtoritajiet.

(14)

Għall-finijiet ta' dan ir-Regolament u fl-interess li tiġi ffaċilitata l-applikazzjoni effettiva tiegħu fl-Unjoni kollha, fil-każ li l-istruttura tas-sistemi legali interni tal-Istati Membri bi tradizzjonijiet ta' dritt komuni ma tagħtix lok li l-qrati u l-prosekuturi tagħhom jieħdu miżuri anċillari għad-deċiżjoni li jaċċettaw jew jirrifjutaw trasferiment tal-proċedimenti kriminali, jenħtieġ li awtorità oħra, bil-kompetenza li tieħu miżuri fi proċedimenti kriminali, tkun tista' tieħu tali miżuri anċillari. Jenħtieġ li l-involviment ta' tali awtorità kompetenti ma jippreġudika bl-ebda mod id-deċiżjoni, li trid tittieħed esklużivament minn imħallef, qorti, maġistrat istruttur jew prosekutur pubbliku, dwar jekk jiġix aċċettat jew irrifjutat trasferiment tal-proċedimenti kriminali, li neċessarjament jenħtieġ tinkludi l-valutazzjoni tagħha tar-raġunijiet għar-rifjut skont dan ir-Regolament. L-involviment ta' kwalunkwe awtorità kompetenti oħra huwa maħsub biss biex jiffaċilita dan it-teħid ta' deċiżjonijiet fl-ambitu ġudizzjarju u l-applikazzjoni effettiva ta' dan ir-Regolament.

(15)

Meta dan ikun meħtieġ minħabba l-istruttura tas-sistemi legali interni tagħhom, jenħtieġ li jkun possibbli li l-Istati Membri jiddeżinjaw awtorità ċentrali waħda jew aktar għat-trażmissjoni amministrattiva u r-riċevuta ta' talbiet għat-trasferiment tal-proċedimenti kriminali, kif ukoll għal korrispondenza uffiċjali oħra marbuta ma' tali talbiet. Tali awtoritajiet ċentrali jistgħu jipprovdu wkoll appoġġ amministrattiv u jkollhom rwoli ta' koordinazzjoni u ta' assistenza, u b'hekk jiffaċilitaw u jippromwovu l-aċċettazzjoni ta' talbiet għat-trasferiment tal-proċedimenti kriminali.

(16)

Xi atti legali tal-Unjoni diġà jirrikjedu li l-Istati Membri jieħdu l-miżuri meħtieġa biex jistabbilixxu l-ġuriżdizzjoni fuq reati kriminali speċifiċi, bħal dawk relatati ma' attivitajiet terroristiċi skont id-Direttiva (UE) 2017/541 jew mal-falsifikazzjoni tal-euro skont id-Direttiva 2014/62/UE tal-Parlament Ewropew u tal-Kunsill (14), f'każijiet fejn il-konsenja ta' persuna tiġi rrifjutata.

(17)

Sabiex jiġi żgurat li jkun possibbli li l-proċedimenti kriminali jiġu trasferiti f'konformità ma' dan ir-Regolament kull meta meħtieġ fl-interessi ta' amministrazzjoni effiċjenti u tajba tal-ġustizzja u għall-protezzjoni effettiva tad-drittijiet fundamentali tal-persuni suspettati, tal-persuni akkużati u tal-vittmi, kif stipulat fil-liġi tal-Unjoni, jenħtieġ li dan ir-Regolament jipprevedi ġuriżdizzjoni f'każijiet speċifiċi biex l-Istat rikjest ikun jista' jeżerċita ġuriżdizzjoni fir-rigward tar-reati kriminali li għalihom hija applikabbli l-liġi nazzjonali tal-Istat rikjedenti. Jenħtieġ li l-Istat rikjest ikollu l-ġuriżdizzjoni fir-rigward ta' reati kriminali li għalihom ikun qed jintalab it-trasferiment tal-proċedimenti kriminali, kull meta dak l-Istat Membru jitqies li jkun fl-aħjar pożizzjoni biex jipprosekwixxi r-reat kriminali inkwistjoni. Jenħtieġ li r-regoli dwar il-ġuriżdizzjoni previsti f'dan ir-Regolament ma jwaqqfux lill-Istati Membri milli jadottaw miżuri nazzjonali biex jiżguraw li jkunu jistgħu jeżerċitaw il-ġuriżdizzjoni fil-każijiet speċifiċi previsti f'dan ir-Regolament.

(18)

Minbarra l-ġuriżdizzjoni diġà prevista mil-liġi nazzjonali tal-Istat rikjest, jenħtieġ li l-ġuriżdizzjoni tiġi stabbilita abbażi tar-raġunijiet speċifiċi stipulati f'dan ir-Regolament kull meta dak l-Istat Membru jitqies bħala dak fl-aħjar pożizzjoni biex jipprosekwixxi. Jenħtieġ li l-Istat rikjest ikollu l-ġuriżdizzjoni f'sitwazzjonijiet fejn l-Istat rikjest jirrifjuta li jikkonsenja persuna suspettata jew akkużata li għaliha jkun inħareġ mandat ta' arrest Ewropew u li tkun preżenti fl-Istat rikjest u li tkun ċittadin ta' dak l-Istat jew residenti fih, meta tali rifjut ikun ibbażat fuq ir-raġunijiet speċifiċi stipulati f'dan ir-Regolament. Jenħtieġ, pereżempju, li l-ġuriżdizzjoni tiġi stabbilita meta l-konsenja tiġi rrifjutata abbażi tal-Artikolu 4, il-punt (7)(b), tad-Deċiżjoni Kwadru 2002/584/ĠAI, li tapplika f'sitwazzjonijiet fejn ir-reati jkunu twettqu barra mit-territorju tal-Istat Membru emittenti u l-liġi tal-Istat Membru ta' eżekuzzjoni ma tippermettix il-prosekuzzjoni għall-istess reati meta mwettqa barra mit-territorju tiegħu. Dik ir-regola tista' tiġi applikata f'sitwazzjonijiet fejn reat jitwettaq fit-territorju ta' Stat Membru ieħor jew ta' pajjiż terz minn ċittadini ta' Stati Membri oħra jew ċittadini ta' pajjiżi terzi, u l-persuna suspettata jew akkużata tkun residenti fl-Istat rikjest. Dan huwa ta' importanza partikolari fir-rigward ta' reati kriminali serji li jiksru l-valuri fundamentali tal-komunità internazzjonali, bħal delitti tal-gwerra jew ġenoċidju, fejn jista' jinħoloq riskju ta' impunità minħabba rifjut ta' mandat ta' arrest Ewropew abbażi tal-Artikolu 4, il-punt (7)(b), tad-Deċiżjoni Kwadru 2002/584/ĠAI. Jenħtieġ li l-Istat rikjest ikollu wkoll ġuriżdizzjoni meta r-reat kriminali jipproduċi l-effetti tiegħu jew jikkawża dannu prinċipalment fl-Istat rikjest. Jenħtieġ li d-dannu jitqies kull meta jkun wieħed mill-elementi li jikkostitwixxu r-reat kriminali, f'konformità mal-liġi nazzjonali tal-Istat rikjest. Jenħtieġ li l-Istat rikjest ikollu wkoll ġuriżdizzjoni meta l-proċedimenti kriminali jkunu diġà għaddejjin f'dak l-Istat kontra l-istess persuna suspettata jew akkużata fir-rigward ta' fatti oħra, sabiex l-imġiba kriminali allegata kollha ta' din il-persuna tkun tista' tiġi ġġudikata f'ġuriżdizzjoni unika, jew meta jkunu għaddejjin proċedimenti kriminali f'dak l-Istat kontra persuni oħra fir-rigward tal-istess fatti, ta' fatti parzjalment l-istess jew ta' fatti relatati, li jistgħu jkunu ta' rilevanza partikolari biex l-investigazzjoni u l-prosekuzzjoni ta' organizzazzjoni kriminali jiġu kkonċentrati fi Stat Membru wieħed. Fiż-żewġ każijiet, jenħtieġ li l-persuna suspettata jew akkużata fil-proċedimenti kriminali li jkunu qed jiġu ttrasferiti tkun ċittadin tal-Istat rikjest jew residenti fih.

(19)

Sabiex jiġi ssodisfat l-għan ta' dan ir-Regolament u sabiex jiġu evitati l-kunflitti ta' ġuriżdizzjoni, b'kunsiderazzjoni speċifika għal dawk l-Istati Membri li s-sistemi legali tagħhom huma bbażati fuq il-prosekuzzjoni obbligatorja u dawk fejn hemm prosekuzzjoni obbligatorja għal ċerti reati kriminali biss, jenħtieġ li l-Istat rikjedenti, meta jitlob trasferiment tal-proċedimenti kriminali, ikun jista' jirrinunzja l-proċedimenti għall-prosekuzzjoni tal-persuna kkonċernata għar-reat kriminali li għalih ikun qed jintalab it-trasferiment. Għaldaqstant jenħtieġ li dan ir-Regolament jippermetti lill-awtoritajiet kompetenti tal-Istat rikjedenti jirrinunzjaw, jissospendu jew iwaqqfu l-proċedimenti kriminali mressqa quddiemhom favur l-Istat Membru identifikat bħala f'pożizzjoni aħjar biex jipprosekwixxi, anki meta, f'konformità mal-liġi nazzjonali, dawk l-awtoritajiet ikollhom obbligu li jipprosekwixxu. Jenħtieġ li dan ikun mingħajr preġudizzju għad-dispożizzjonijiet dwar l-effetti tat-trasferiment tal-proċedimenti kriminali fl-Istat rikjedenti stabbiliti f'dan ir-Regolament.

(20)

Dan ir-Regolament jirrispetta d-drittijiet fundamentali u josserva l-prinċipji rikonoxxuti fil-Karta tad-Drittijiet Fundamentali tal-Unjoni Ewropea (il-“Karta”) u fil-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali.

(21)

Dan ir-Regolament ma jaffettwax id-drittijiet proċedurali kif stabbiliti fil-Karta jew f'atti legali oħra tal-Unjoni, bħad-Direttivi 2010/64/UE (15), 2012/13/UE (16), 2013/48/UE (17), (UE) 2016/343 (18), (UE) 2016/800 (19) u (UE) 2016/1919 (20) tal-Parlament Ewropew u tal-Kunsill, għall-Istati Membri marbuta bihom. B'mod partikolari, jenħtieġ li l-awtorità rikjedenti tiżgura li tali drittijiet, kif previsti skont il-liġi tal-Unjoni u dik nazzjonali, jiġu rispettati meta jintalab trasferiment tal-proċedimenti kriminali skont dan ir-Regolament.

(22)

Jenħtieġ li l-Istati Membri jiżguraw li, meta japplikaw dan ir-Regolament, jitqiesu l-ħtiġijiet ta' persuni vulnerabbli. F'konformità mar-Rakkomandazzjoni tal-Kummissjoni tas-27 ta' Novembru 2013 dwar is-salvagwardji proċedurali għall-persuni vulnerabbli suspettati jew akkużati fi proċedimenti kriminali (21), jenħtieġ li persuni suspettati jew akkużati li huma vulnerabbli tinftiehem li huma l-persuni suspettati jew akkużati kollha li mhumiex kapaċi jifhmu jew jieħdu sehem b'mod effettiv fi proċedimenti kriminali minħabba l-età tagħhom, il-kundizzjoni mentali jew fiżika tagħhom jew kwalunkwe diżabilità li jista' jkollhom.

(23)

Bl-istess mod, jenħtieġ li l-Istati Membri jiżguraw li, meta japplikaw dan ir-Regolament, jitqiesu d-drittijiet proċedurali tal-persuni suspettati u akkużati soġġetti għall-arrest preventiv, b'kunsiderazzjoni, fejn xieraq, tar-Rakkomandazzjoni tal-Kummissjoni (UE) 2023/681 (22).

(24)

Jenħtieġ li awtorità rikjedenti tkun tista' titlob trasferiment tal-proċedimenti kriminali jew fuq inizjattiva tagħha stess, kemm wara konsultazzjonijiet ma' awtorità rikjesta kif ukoll jekk le, jew fuq proposta minn persuna suspettata jew akkużata, jew fuq proposta minn vittma. Jenħtieġ li dan ir-Regolament ma jimponi l-ebda obbligu li jintalab it-trasferiment jew li jiġu trasferiti l-proċedimenti kriminali. Meta tkun qed tqis għandhiex tinħareġ talba għat-trasferiment tal-proċedimenti kriminali, jenħtieġ li l-awtorità rikjedenti teżamina jekk tali trasferiment jaqdix l-objettiv ta' amministrazzjoni effiċjenti u tajba tal-ġustizzja, inkluż jekk dan huwiex proporzjonat u xieraq għall-fini tal-proċedimenti kkonċernati. Jenħtieġ li dik il-valutazzjoni titwettaq fuq bażi ta' każ b'każ sabiex jiġi identifikat l-Istat Membru li jkun fl-aħjar pożizzjoni biex jipprosekwixxi r-reat kriminali inkwistjoni.

(25)

Meta tivvaluta jekk talba għat-trasferiment tal-proċedimenti kriminali hijiex ġustifikata, jenħtieġ li l-awtorità rikjedenti tqis diversi kriterji, li l-prijorità u l-piż tagħhom jenħtieġ li jkunu bbażati fuq il-fatti u l-merti ta' kull każ individwali. Jenħtieġ li l-fatturi rilevanti kollha jitqiesu fl-aħjar interessi tal-ġustizzja. Pereżempju, meta r-reat kriminali jkun twettaq kompletament jew parzjalment fit-territorju tal-Istat rikjest, jew il-biċċa l-kbira tal-effetti jew parti sostanzjali mid-danni kkawżati mir-reat kriminali, meta dawk l-effetti jew dawk id-danni jiffurmaw parti mill-elementi kostitwenti tar-reat kriminali, ikunu seħħew fit-territorju tal-Istat rikjest, jenħtieġ li jkun possibbli li dak l-Istat jitqies li huwa f'pożizzjoni aħjar li jipprosekwixxi, minħabba li l-provi li jridu jinġabru, bħad-depożizzjoni mix-xhieda u mill-vittmi, jew il-perizji, ikunu jinsabu fl-Istat rikjest u għalhekk jistgħu jinġabru aktar faċilment jekk il-proċedimenti kriminali jiġu trasferiti. Barra minn hekk, il-bidu tal-proċedimenti sussegwenti għad-danni fl-Istat rikjest jiġi ffaċilitat jekk il-proċedimenti sottostanti li jistabbilixxu r-responsabbiltà kriminali jitwettqu wkoll fl-istess Stat Membru. Bl-istess mod, jekk il-biċċa l-kbira tal-provi jkunu jinsabu fl-Istat rikjest, trasferiment tal-proċedimenti kriminali jista' jiffaċilita l-ġbir u l-ammissibbiltà sussegwenti tal-provi miġbura f'konformità mal-liġi nazzjonali tal-Istat rikjest.

(26)

Meta persuna suspettata jew akkużata waħda jew aktar ikunu ċittadini tal-Istat rikjest jew residenti fih, trasferiment tal-proċedimenti kriminali jista' jkun iġġustifikat bil-għan li jiġi żgurat id-dritt tal-persuna suspettata jew akkużata li tkun preżenti waqt il-proċess, f'konformità mad-Direttiva (UE) 2016/343. Bl-istess mod, meta vittma waħda jew aktar ikunu ċittadini tal-Istat rikjest jew residenti fih, trasferiment tal-proċedimenti kriminali jista' jkun ġustifikat biex il-vittmi jkunu jistgħu jieħdu sehem aktar faċilment fil-proċedimenti kriminali u jinstemgħu b'mod effettiv bħala xhieda waqt il-proċedimenti. F'każijiet fejn il-konsenja ta' persuna suspettata jew akkużata li għaliha nħareġ mandat ta' arrest Ewropew tiġi rifjutata fl-Istat rikjest għar-raġunijiet speċifikati f'dan ir-Regolament, trasferiment jista' jkun ġustifikat ukoll meta dik il-persuna tkun preżenti fl-Istat rikjest imma ma tkunx ċittadin ta' dak l-Istat jew residenti fih.

(27)

Hija r-responsabbiltà tal-awtorità rikjedenti li tivvaluta, abbażi tal-materjal quddiemha, jekk hemmx raġunijiet raġonevoli biex temmen li l-persuna suspettata, il-persuna akkużata jew il-vittma, tirrisjedi fl-Istat rikjest. Meta l-informazzjoni disponibbli tkun limitata, jenħtieġ li jsiru konsultazzjonijiet bejn l-awtoritajiet rikjedenti u dawk rikjesti dwar tali valutazzjoni sabiex tiġi kkonfermata r-residenza tal-persuna suspettata, tal-persuna akkużata, jew tal-vittma fl-Istat rikjest. Għall-finijiet ta' dik il-valutazzjoni, jistgħu jkunu ta' rilevanza diversi ċirkostanzi oġġettivi li jistgħu jindikaw li l-persuna kkonċernata stabbiliet iċ-ċentru abitwali tal-interessi ta' dik il-persuna fi Stat Membru partikolari jew li għandha l-intenzjoni li tagħmel dan. Jistgħu jeżistu raġunijiet raġonevoli biex wieħed jemmen li persuna tirrisjedi fl-Istat rikjest, b'mod partikolari, meta persuna tkun reġistrata bħala resident fl-Istat rikjest, minħabba li jkollha karta tal-identità jew permess ta' residenza, jew permezz ta' reġistrazzjoni f'reġistru ta' residenza uffiċjali. Meta l-persuna inkwistjoni ma tkunx reġistrata fl-Istat rikjest, ir-residenza tista' tiġi indikata mill-fatt li dik il-persuna uriet l-intenzjoni li tistabbilixxi ruħha f'dak l-Istat Membru jew tkun kisbet, wara perjodu stabbli ta' preżenza f'dak l-Istat Membru, ċerti konnessjonijiet miegħu li huma ta' grad simili għal dawk li jirriżultaw mill-istabbiliment ta' residenza formali f'dak l-Istat Membru. Sabiex jiġi ddeterminat jekk, f'sitwazzjoni speċifika, hemmx biżżejjed konnessjonijiet bejn il-persuna kkonċernata u l-Istat rikjest li jwasslu għal bażi raġonevoli biex wieħed jemmen li l-persuna kkonċernata tirrisjedi f'dak l-Istat Membru, jeħtieġ li jitqiesu diversi fatturi oġġettivi li jikkaratterizzaw is-sitwazzjoni ta' dik il-persuna, li jinkludu, b'mod partikolari, it-tul, in-natura u l-kundizzjonijiet tal-preżenza ta' dik il-persuna fl-Istat rikjest jew il-konnessjonijiet familjari jew ekonomiċi li dik il-persuna jkollha mal-Istat rikjest. Vettura rreġistrata, kont tal-bank, il-fatt li s-soġġorn tal-persuna fl-Istat rikjest ma kienx interrott jew fatturi oġġettivi oħra jistgħu jkunu rilevanti biex jiġi determinat li hemm bażi raġonevoli biex wieħed jemmen li l-persuna kkonċernata tirrisjedi fl-Istat rikjest. Żjara qasira, btala, inkluż f'villeġġatura, jew soġġorn simili fl-Istat rikjest mingħajr ebda rabta sostanzjali ulterjuri mhumiex biżżejjed biex tiġi stabbilita r-residenza f'dak l-Istat Membru.

(28)

It-trasferiment tal-proċedimenti kriminali jista' jkun iġġustifikat ukoll meta jkunu għaddejjin proċedimenti kriminali fl-Istat rikjest fir-rigward tal-istess fatti, fatti parzjalment l-istess jew fatti oħra kontra l-persuna suspettata jew akkużata, jew meta jkunu għaddejjin proċedimenti kriminali fl-Istat rikjest fir-rigward tal-istess fatti, fatti parzjalment l-istess jew fatti relatati kontra persuni oħra, pereżempju f'każijiet ta' prosekuzzjoni ta' organizzazzjonijiet kriminali transfruntieri, fejn il-prosekuzzjoni ta' persuni differenti akkużati flimkien isseħħ fi Stati Membri differenti. Barra minn hekk, jekk il-persuna suspettata jew akkużata tkun qed tiskonta jew għandha tiskonta piena li tinvolvi ċ-ċaħda tal-libertà fl-Istat rikjest għal reat kriminali ieħor, it-trasferiment tal-proċedimenti kriminali jista' jkun ġustifikat biex jiġi żgurat id-dritt tal-persuna kkundannata li tkun preżenti fil-proċess li għalih ikun qed jintalab it-trasferiment tal-proċedimenti kriminali, waqt li tkun qed tiskonta l-piena fl-Istat rikjest. Jenħtieġ li l-awtoritajiet rikjedenti jqisu kif xieraq jekk it-trasferiment tal-proċedimenti kriminali jistax itejjeb il-prospetti tar-riabilitazzjoni soċjali tal-persuna kkonċernata f'każ li l-piena tiġi infurzata fl-Istat rikjest. Għal dak il-għan, jistgħu jiġu meqjusa r-rabta tal-persuna mal-Istat rikjest, jekk dik il-persuna tqisux bħala l-post tal-familja, kif ukoll rabtiet lingwistiċi, kulturali, soċjali u ekonomiċi jew rabtiet oħra. Barra minn hekk, l-awtoritajiet kompetenti spiss jilħqu ftehimiet dwar il-konċentrazzjoni tal-proċedimenti abbażi tal-identifikazzjoni tal-ġuriżdizzjoni l-aktar adatta. Tali ftehimiet jistgħu jintlaħqu f'laqgħat ta' koordinazzjoni tal-Aġenzija tal-Unjoni Ewropea għall-Kooperazzjoni fil-Ġustizzja Kriminali (Eurojust), stabbilita bir-Regolament (UE) 2018/1727 tal-Parlament Ewropew u tal-Kunsill (23), f'laqgħat bilaterali jew multilaterali mingħajr l-intervent tal-Eurojust jew wara konsultazzjonijiet skont id-Deċiżjoni Qafas 2009/948/ĠAI.

(29)

Qabel ma tikkunsidra jekk tittrasferixxix il-proċedimenti kriminali abbażi biss tal-fatt li l-biċċa l-kbira tal-provi jkunu jinsabu fl-Istat rikjest, l-awtorità rikjedenti hija mħeġġa tqis il-possibbiltà li tikseb l-provi minn Stati Membri oħra permezz ta' strumenti eżistenti ta' rikonoxximent reċiproku ta' deċiżjonijiet ġudizzjarji, bħal, għall-Istati Membri marbuta biha, id-Direttiva 2014/41/UE tal-Parlament Ewropew u tal-Kunsill (24), u assistenza legali reċiproka.

(30)

Jenħtieġ li l-persuni suspettati, il-persuni akkużati jew il-vittmi, ikunu jistgħu jipproponu li l-proċedimenti kriminali li jikkonċernawhom jiġu trasferiti lil Stat Membru ieħor. Jenħtieġ li l-persuni suspettati, il-persuni akkużati jew il-vittmi jkunu jistgħu jagħmlu tali proposta lill-awtoritajiet kompetenti jew tal-Istat rikjedenti jew tal-Istat rikjest meta jqisu li hemm raġunijiet li minħabba fihom trasferiment tal-proċedimenti kriminali jkun ġustifikat fl-interessi tal-ġustizzja. Pereżempju, tali proposta tista' ssir fl-Istat rikjedenti minn persuna suspettata, persuna akkużata jew vittma li tkun konxja li jkunu għaddejjin proċedimenti kriminali fl-Istat rikjest fir-rigward tal-istess fatti, fatti parzjalment l-istess jew fatti oħra kontra l-istess persuna suspettata jew akkużata jew fir-rigward tal-istess fatti, fatti parzjalment l-istess jew fatti relatati kontra persuni oħra. Tali proposta jistgħu jsiru fl-Istat rikjest meta, pereżempju, persuna suspettata, persuna akkużata jew vittma tirrisjedi jew hija ċittadin ta' dak l-Istat, jew hija konxja li nfetħu proċedimenti fir-rigward tal-istess fatti, fatti parzjalment l-istess, jew fatti oħra li jikkonċernaw l-istess persuni suspettati jew persuni akkużati. Għalkemm jenħtieġ li tali proposta tiġi kkunsidrata u rreġistrata, jenħtieġ li ma timponi l-ebda obbligu fuq l-awtorità rikjedenti jew fuq l-awtorità rikjesta biex titlob it-trasferiment tal-proċedimenti kriminali jew biex tittrasferihom jew biex tidħol f'konsultazzjonijiet mal-awtorità ta' Stat Membru ieħor għal dak il-għan. Jekk kwalunkwe waħda minn dawk l-awtoritajiet issir konxja ta' proċedimenti kriminali paralleli abbażi ta' proposta għat-trasferiment tal-proċedimenti kriminali ppreżentata minn persuna suspettata, akkużata jew minn vittma, jew minn avukat f'isimha, hija tkun fl-obbligu li tikkonsulta mal-awtorità l-oħra f'konformità mad-Deċiżjoni Qafas 2009/948/ĠAI.

(31)

Jenħtieġ li l-awtorità rikjedenti tinforma malajr kemm jista’ jkun lill-persuna suspettata jew akkużata bl-intenzjoni li tinħareġ talba għat-trasferiment tal-proċedimenti kriminali u jenħtieġ li tipprevedi l-possibbiltà li tali persuna tesprimi opinjoni, inkluż dwar aspetti marbuta mal-ġustizzja restorattiva, f'konformità mal-liġi nazzjonali applikabbli, biex l-awtoritajiet ikunu jistgħu jqisu l-interessi leġittimi ta' dik il-persuna qabel ma joħorġu talba għat-trasferiment. Huwa importanti li din l-informazzjoni tiġi pprovduta bil-miktub. Jenħtieġ li jkun possibbli wkoll li l-informazzjoni tiġi pprovduta wkoll bil-fomm bil-kondizzjoni li l-fatt li l-informazzjoni ġiet ipprovduta jiġi nnotat f'konformità mal-proċedura ta' reġistrazzjoni skont il-liġi nazzjonali. Jenħtieġ li jkun possibbli wkoll li l-informazzjoni tiġi pprovduta billi jintużaw formoli standard. Meta l-awtorità rikjedenti tqis li jkun meħtieġ, pereżempju minħabba l-età jew il-kundizzjoni fiżika jew mentali tal-persuna suspettata jew akkużata kkonċernata, jenħtieġ li tagħti lir-rappreżentant legali ta' dik il-persuna, meta disponibbli, opportunità jesprimi opinjoni. Meta tkun qed tivvaluta l-interess leġittimu tal-persuna suspettata jew akkużata li tiġi infurmata bl-intenzjoni li tinħareġ talba għat-trasferiment, jenħtieġ li l-awtorità rikjedenti tqis il-bżonn li tiġi żgurata l-kunfidenzjalità ta’ investigazzjoni jew ir-riskju li tiġi kompromessa l-investigazzjoni kontra dik il-persuna, pereżempju kull meta jkun meħtieġ biex jiġi salvagwardjat interess pubbliku importanti, bħal f'każijiet fejn tali informazzjoni tista' tippreġudika investigazzjonijiet sigrieti li jkunu qed isiru jew tagħmel ħsara serja lis-sigurtà nazzjonali tal-Istat Membru li fih jinbdew il-proċedimenti kriminali. Meta l-awtorità rikjedenti ma tkunx tista' tillokalizza jew tagħmel kuntatt mal-persuna suspettata jew akkużata minkejja li jkunu saru sforzi raġonevoli, jenħtieġ li l-obbligu li din il-persuna tiġi infurmata japplika mill-mument li l-persuna suspettata jew akkużata tiġi lokalizzata jew isir kuntatt magħha.

(32)

Jenħtieġ li meta jiġi applikat dan ir-Regolament, jitqiesu d-drittijiet tal-vittmi stipulati fid-Direttiva 2012/29/UE tal-Parlament Ewropew u tal-Kunsill (25), inkluż id-dritt għall-informazzjoni. Jenħtieġ li dan ir-Regolament ma jiġix interpretat bħala li jipprevjeni lill-Istati Membri milli jagħtu lill-vittmi drittijiet aktar estensivi skont il-liġi nazzjonali minn dawk stabbiliti fil-liġi tal-Unjoni.

(33)

Meta tieħu deċiżjoni dwar it-talba għat-trasferiment tal-proċedimenti kriminali, jenħtieġ li l-awtorità rikjedenti tqis kif xieraq l-interessi leġittimi tal-vittmi, inkluż il-protezzjoni tagħhom u aspetti marbuta mal-ġustizzja restorattiva, u jenħtieġ li tivvaluta jekk it-trasferiment tal-proċedimenti kriminali jistax ikun ta' detriment għall-abbiltà tal-vittmi li jeżerċitaw b'mod effettiv id-drittijiet tagħhom fil-proċedimenti kriminali kkonċernati. Dik il-valutazzjoni tista' tinkludi, pereżempju, il-kunsiderazzjoni tal-possibbiltà u l-arranġamenti disponibbli għall-vittmi biex jixhdu matul il-proċess fl-Istat rikjest jekk dak ma jkunx l-Istat Membru fejn jirrisjedu. Barra minn hekk, jenħtieġ li tiġi kkunsidrata l-possibbiltà li l-vittmi jiksbu u jipprovdu provi, pereżempju minn xhieda u periti, biex jitolbu kumpens jew biex jibbenefikaw minn programmi ta' protezzjoni tax-xhieda jew ta' ġustizzja restorattiva fl-Istat rikjest. Jenħtieġ li d-drittijiet tal-vittmi għal kumpens ma jiġux ippreġudikati mit-trasferiment tal-proċedimenti kriminali. Dan ir-Regolament ma jaffettwax ir-regoli dwar il-kumpens u r-restituzzjoni ta' proprjetà lill-vittmi fi proċedimenti nazzjonali.

(34)

Meta jkun hemm bżonn li jiġi żgurat li l-protezzjoni pprovduta lill-vittma fl-Istat rikjedenti titkompla fl-Istat rikjest, jenħtieġ li l-awtoritajiet kompetenti fl-Istat rikjedenti jikkunsidraw il-ħruġ ta' ordni Ewropea ta' protezzjoni f'konformità mar-Regolament (UE) Nru 606/2013 tal-Parlament Ewropew u tal-Kunsill (26) jew, għall-Istati Membri marbuta biha, mad-Direttiva 2011/99/UE tal-Parlament Ewropew u tal-Kunsill (27).

(35)

Ladarba l-awtorità rikjedenti tkun biħsiebha toħroġ talba għat-trasferiment tal-proċedimenti kriminali, jenħtieġ li tinforma malajr kemm jista’ jkun lill-vittmi li jirrisjedu fl-Istat rikjedenti jew, fil-każ ta' persuni ġuridiċi, li jirċievu tali informazzjoni dwar il-proċedimenti kriminali f'konformità mal-Artikolu 6(1) tad-Direttiva 2012/29/UE, kif implimentat fil-liġi nazzjonali, jew, fil-każ ta' persuni ġuridiċi, li jirċievu tali informazzjoni f'konformità mal-liġi nazzjonali. Jenħtieġ li l-awtorità rikjedenti tipprevedi l-possibbiltà li dawn il-persuni jesprimu l-opinjoni tagħhom, f'konformità mal-liġi nazzjonali applikabbli, biex l-awtoritajiet ikunu jistgħu jqisu l-interessi leġittimi tagħhom qabel ma joħorġu talba għat-trasferiment. Huwa importanti li din l-informazzjoni tiġi pprovduta bil-miktub. Jenħtieġ li jkun possibbli wkoll li l-informazzjoni tiġi pprovduta wkoll bil-fomm bil-kondizzjoni li l-fatt li l-informazzjoni ġiet ipprovduta jiġi nnotat f'konformità mal-proċedura ta' reġistrazzjoni skont il-liġi nazzjonali. Jenħtieġ li jkun possibbli wkoll li l-informazzjoni tiġi pprovduta bl-użu tal-formoli standard jew, fil-każ ta' għadd eċċezzjonalment kbir ta' vittmi li jridu jiġu infurmati, permezz ta' mezzi oħra ta' informazzjoni ġenerali lill-pubbliku, bħal fi strumenti speċifiċi ta' pubblikazzjoni online disponibbli għall-awtoritajiet ġudizzjarji skont il-liġi nazzjonali. Meta l-awtorità rikjedenti tqis li jkun meħtieġ, pereżempju minħabba l-età jew il-kundizzjoni fiżika jew mentali tal-vittma kkonċernata, jenħtieġ li tagħti lir-rappreżentant legali ta' dik il-persuna, meta disponibbli, opportunità li jesprimi opinjoni. Meta tkun qed tivvaluta l-interess leġittimu tal-vittmi li jiġu infurmati dwar l-intenzjoni li tinħareġ talba għat-trasferiment, jenħtieġ li l-awtorità rikjedenti tqis il-ħtieġa li tiġi żgurata l-kunfidenzjalità ta’ investigazzjoni jew ir-riskju li tiġi preġudikata l-investigazzjoni, pereżempju f'każijiet fejn tali informazzjoni tista' tippreġudika investigazzjonijiet sigrieti li jkunu għaddejjin jew tagħmel ħsara serja lis-sigurtà nazzjonali tal-Istat Membru rikjedenti.

(36)

Jenħtieġ li jkun possibbli wkoll li jintużaw formoli standard f’ċerti sitwazzjonijiet previsti f’dan ir-Regolament biex ikun aktar faċli għall-awtorità rikjedenti u għall-awtorità rikjesta li jassistu lil xulxin meta jinfurmaw lill-persuna suspettata, akkużata jew lill-vittma u meta jitolbu l-opinjoni tagħhom dwar l-intenzjoni li tinħareġ talba għat-trasferiment tal-proċedimenti kriminali. Jenħtieġ li l-possibbiltà li jintużaw dawn il-formoli standard ma tipprekludix il-possibbiltà ta' notifiki diretti lill-persuni suspettati, lill-persuni akkużati jew lill-vittmi mill-awtorità rikjedenti jew mill-awtorità rikjesta.

(37)

L-applikazzjoni xierqa ta' dan ir-Regolament tippresupponi komunikazzjoni bejn l-awtorità rikjedenti u l-awtorità rikjesta, li jenħtieġ li jiġu mħeġġa jikkonsultaw lil xulxin kull meta jkun xieraq biex tiġi ffaċilitata l-applikazzjoni bla xkiel u effiċjenti ta' dan ir-Regolament, direttament jew, meta jkun il-każ, permezz tal-Eurojust.

(38)

Jenħtieġ li l-awtorità rikjedenti tkun tista' tikkonsulta lill-awtorità rikjesta qabel ma toħroġ talba għat-trasferiment tal-proċedimenti kriminali meta dan ikun meħtieġ, b'mod partikolari, biex tiddetermina jekk it-trasferiment tal-proċedimenti kriminali jkunx jaqdi l-interessi ta' amministrazzjoni effiċjenti u tajba tal-ġustizzja, inkluż jekk hux proporzjonat u xieraq għall-fini tal-proċedimenti kkonċernati, kif ukoll jekk l-awtorità rikjesta x'aktarx tinvoka waħda mir-raġunijiet għar-rifjut skont dan ir-Regolament.

(39)

Meta tibgħat talba għat-trasferiment tal-proċedimenti kriminali, jenħtieġ li l-awtorità rikjedenti tipprovdi informazzjoni preċiża u ċara dwar iċ-ċirkostanzi u l-kundizzjonijiet sottostanti għat-talba, kif ukoll kwalunkwe dokumentazzjoni ta' sostenn oħra, bil-għan li l-awtorità rikjesta tkun tista' tieħu deċiżjoni infurmata dwar it-talba għat-trasferiment tal-proċedimenti kriminali. Jenħtieġ li l-formola ta' talba mimlija u, bil-ħsieb li jitnaqqsu l-kostijiet u l-ħin tat-traduzzjoni, mill-inqas il-partijiet essenzjali ta' kwalunkwe dokumentazzjoni jew informazzjoni ta' sostenn bil-miktub jiġu tradotti mill-awtorità rikjedenti f'lingwa uffiċjali tal-Istat rikjest jew fi kwalunkwe lingwa oħra aċċettata minn dak l-Istat f'konformità ma' dan ir-Regolament. Il-partijiet essenzjali tad-dokumenti kkonċernati huma dawk l-estratti li jidhru neċessarji biex l-awtorità rikjesta tieħu deċiżjoni infurmata dwar it-talba għat-trasferiment tal-proċedimenti kriminali.

(40)

Sakemm l-awtorità rikjesta ma tkunx ħadet deċiżjoni li taċċetta jew tirrifjuta trasferiment tal-proċedimenti kriminali, jenħtieġ li l-awtorità rikjedenti tkun tista' tirtira t-talba għat-trasferiment, pereżempju meta ssir taf b'elementi ulterjuri li minħabba fihom it-trasferiment ma jibqax jidher ġustifikat. Jenħtieġ li l-informazzjoni dwar l-irtirar tat-talba għat-trasferiment tal-proċedimenti kriminali tiġi pprovduta minnufih lill-awtorità rikjesta u jenħtieġ li tiġi kkomunikata lill-persuni suspettati jew akkużati u lill-vittmi, skont ma jkun rilevanti.

(41)

Jenħtieġ li l-awtorità rikjesta tinforma lill-awtorità rikjedenti bid-deċiżjoni tagħha dwar jekk taċċettax jew tirrifjutax it-trasferiment tal-proċedimenti kriminali mingħajr dewmien żejjed u fi kwalunkwe każ mhux aktar tard minn 60 jum wara li tirċievi t-talba għat-trasferiment tal-proċedimenti kriminali. F'każijiet speċifiċi, meta ma jkunx fattibbli għall-awtorità rikjesta li tikkonforma ma' dak il-limitu ta' żmien, pereżempju jekk tara li hemm bżonn ta' informazzjoni addizzjonali, jenħtieġ li jkun possibbli li l-limitu ta' żmien jiġi estiż b'massimu ta' 30 jum biss biex jiġi evitat dewmien eċċessiv. Meta taċċetta t-trasferiment tal-proċedimenti kriminali, jenħtieġ li l-awtorità rikjesta tieħu deċiżjoni debitament motivata. F'każijiet fejn l-awtorità rikjesta tirrifjuta t-trasferiment tal-proċedimenti kriminali, jenħtieġ li tinforma lill-awtorità rikjedenti bir-raġunijiet għar-rifjut. Għal dak il-għan, huwa biżżejjed li l-awtorità rikjesta tipprovdi informazzjoni fil-qosor dwar ir-raġuni jew ir-raġunijiet rilevanti għar-rifjut.

(42)

Meta l-awtorità rikjesta tkun aċċettat it-trasferiment tal-proċedimenti kriminali, jenħtieġ li l-awtorità rikjedenti tibgħat lill-awtorità rikjesta, mingħajr dewmien żejjed, l-oriġinali jew il-kopji ċertifikati tad-dokumenti kollha tal-proċess tal-kawża, jew mill-inqas il-partijiet rilevanti minnhom, akkumpanjati mit-traduzzjoni tagħhom. Ladarba l-proċedimenti nazzjonali jitwaqqfu, jenħtieġ li l-awtorità rikjedenti tibgħat l-oriġinali jew kopja ċertifikata ta' kwalunkwe parti rilevanti li jkun fadal mill-proċess tal-kawża, inkluż il-provi fiżiċi rilevanti bħall-oġġetti li ntużaw fir-reat jew kampjuni tad-demm jew tad-DNA, lill-awtorità rikjesta mingħajr dewmien żejjed. Jenħtieġ li d-dokumentazzjoni oriġinali tintbagħat biss jekk tintalab mill-awtorità rikjesta, pereżempju jekk ikun hemm bżonn li jiġi eżaminat dokument għal finijiet forensiċi. Dment li d-dokumenti oriġinali tal-proċess tal-kawża u l-provi fiżiċi ma jkunux aktar meħtieġa fl-Istat rikjest, jenħtieġ li dawn jiġu ritornati lill-Istat rikjedenti fuq it-talba tiegħu, pereżempju jekk tali dokumenti oriġinali jew provi fiżiċi jkunu meħtieġa għall-finijiet ta' investigazzjoni kriminali oħra. Meta l-Istat rikjedenti, meta mitlub mill-Istat rikjest, jindika li mhux beħsiebu jirkupra d-dokumenti oriġinali tal-proċess tal-kawża jew il-provi fiżiċi meta ma jkunux aktar meħtieġa jew fi tmiem il-proċedimenti, jenħtieġ li l-Istat rikjest ikun jista' jiddeċiedi, f'konformità mal-liġi nazzjonali tiegħu, kif jitratta l-provi li jkun baqa', inkluż jekk iżommx jew jeqridx dawk il-provi. Ladarba tkun ġiet aċċettata talba għat-trasferiment tal-proċedimenti, u sabiex jiġi ffaċilitat trasferiment effiċjenti, jenħtieġ li l-awtorità rikjedenti u l-awtorità rikjesta jkunu jistgħu jikkonsultaw lil xulxin sabiex jiddeterminaw id-dokumenti meħtieġa jew il-partijiet minn dawn id-dokumenti li għandhom jintbagħtu, u li jridu jiġu tradotti, fejn meħtieġ. Madankollu, huwa importanti li deċiżjoni li jintbagħtu biss partijiet mid-dokumenti tkun bilanċjata u bbażata fuq kunsiderazzjoni bir-reqqa tad-dokumenti inkwistjoni sabiex ma tkunx ippreġudikata l-ekwità tal-proċedimenti.

(43)

Jenħtieġ li t-trasferiment tal-proċedimenti kriminali ma jiġix rifjutat għal raġunijiet għajr dawk previsti f'dan ir-Regolament. Sabiex ikun jista' jiġi aċċettat it-trasferiment tal-proċedimenti kriminali, jenħtieġ li l-prosekuzzjoni tal-fatti sottostanti għall-proċedimenti kriminali li jkunu soġġetti għat-trasferiment tkun possibbli fl-Istat rikjest. Jenħtieġ li l-awtorità rikjesta tirrifjuta t-trasferiment tal-proċedimenti kriminali jekk l-aġir li għalih jintalab it-trasferiment ma jkunx reat kriminali fl-Istat rikjest, jew jekk l-Istat rikjest ma jkollux ġuriżdizzjoni fuq dak ir-reat kriminali, ħlief jekk jeżerċita l-ġuriżdizzjoni prevista f'dan ir-Regolament. Jenħtieġ li l-awtorità rikjesta tirrifjuta wkoll it-trasferiment tal-proċedimenti kriminali jekk il-kundizzjonijiet għall-prosekuzzjoni tar-reat kriminali fl-Istat rikjest ma jkunux issodisfati. Dan jista' jkun il-każ, pereżempju, jekk ilment mill-vittma, li huwa meħtieġ għall-prosekuzzjoni tar-reat kriminali fl-Istat rikjest, ma jkunx ġie ppreżentat fil-ħin, jew meta, minħabba l-mewt jew l-insanità tal-persuna suspettata jew akkużata, il-prosekuzzjoni tkun saret impossibbli skont il-liġi nazzjonali tal-Istat rikjest. Barra minn hekk, jenħtieġ li l-awtorità rikjesta tirrifjuta t-trasferiment tal-proċedimenti kriminali jekk ikun hemm impedimenti oħra għall-prosekuzzjoni fl-Istat rikjest. Jenħtieġ li l-awtorità rikjesta tkun tista' tirrifjuta trasferiment tal-proċedimenti kriminali jekk il-persuna suspettata jew akkużata tibbenefika minn privileġġ jew immunità f'konformità mal-liġi nazzjonali tal-Istat rikjest, pereżempju fir-rigward ta' ċerti kategoriji ta' persuni, bħad-diplomatiċi, jew relazzjonijiet speċifikament protetti, bħas-sigriet professjonali bejn l-avukat u l-klijent, jew jekk l-awtorità rikjesta temmen li tali trasferiment ma jkunx ġustifikat mill-interessi ta' amministrazzjoni effiċjenti u tajba tal-ġustizzja, pereżempju minħabba li ebda wieħed mill-kriterji għat-talba ta' trasferiment tal-proċedimenti kriminali ma jkun issodisfat, jew jekk il-formola ta' talba għat-trasferiment tal-proċedimenti kriminali ma tkunx kompluta jew tkun manifestament żbaljata u ma tkunx ġiet mimlija jew ikkoreġuta mill-awtorità rikjedenti, u b'hekk l-awtorità rikjesta ma jkollhiex l-informazzjoni meħtieġa biex tivvaluta t-talba għat-trasferiment tal-proċedimenti kriminali. Jenħtieġ li l-awtorità rikjesta tkun tista' wkoll tirrifjuta t-talba jekk l-imġiba ma tkunx reat kriminali fil-post fejn twettqet u l-Istat rikjest ma jkollu l-ebda ġuriżdizzjoni oriġinali fir-rigward tal-investigazzjoni u l-prosekuzzjoni tat-tali reat. Dik ir-raġuni għal rifjut tqis il-prinċipju tat-territorjalità, li jfisser li jenħtieġ li l-Istat rikjest ikun jista' jirrifjuta t-trasferiment tal-proċedimenti kriminali f'każijiet fejn ir-reat kriminali allegat, li jitwettaq barra t-territorju tal-Istat rikjedenti, ma jkunx reat kriminali fil-post fejn twettaq, u l-liġi nazzjonali tal-Istat rikjest ma tawtorizzax il-prosekuzzjoni ta' tali reati meta mwettqa barra t-territorju tiegħu. Għall-finijiet ta' dan ir-Regolament, “ġuriżdizzjoni oriġinali” hija l-ġuriżdizzjoni li hi diġà prevista mil-liġi nazzjonali u ma tirriżultax minn dan ir-Regolament.

(44)

Il-prinċipju ne bis in idem, kif stipulat fl-Artikoli 54 sa 58 tal-Konvenzjoni li timplimenta l-Ftehim ta' Schengen tal-14 ta' Ġunju 1985 (28) u fl-Artikolu 50 tal-Karta, u kif interpretat mill-Qorti tal-Ġustizzja tal-Unjoni Ewropea, huwa prinċipju fundamentali bażiku tal-liġi kriminali, skont liema jenħtieġ li konvenut ma jerġax jiġi ġġudikat jew ikkastigat fi proċedimenti kriminali għar-reat kriminali li għalih dak il-kwerelat ikun diġà ġie illiberat jew ikkundannat b'mod definittiv. Għalhekk, jenħtieġ li l-awtorità rikjesta tirrifjuta t-trasferiment tal-proċedimenti kriminali jekk li tieħu l-proċedimenti f'idejha jmur kontra dak il-prinċipju.

(45)

Meta teżamina jekk taċċettax jew tirrifjutax talba għat-trasferiment tal-proċedimenti kriminali, jenħtieġ li l-awtorità rikjesta tivvaluta jekk tali trasferiment jaqdix l-objettiv ta' amministrazzjoni effiċjenti u tajba tal-ġustizzja. Jenħtieġ li dik il-valutazzjoni ssir fuq bażi ta' każ b'każ sabiex jiġi identifikat l-Istat Membru li jkun fl-aħjar pożizzjoni li jipprosekwixxi r-reat kriminali inkwistjoni. Jenħtieġ li l-awtorità rikjesta jkollha marġni ta' diskrezzjoni wiesa' għall-fini ta' dik il-valutazzjoni. Jenħtieġ li tali valutazzjoni tkun limitata għaċ-ċirkostanzi rilevanti tal-każ, inkluż jekk hemmx indikazzjoni prima facie li r-reat kriminali ma jkunx twettaq kompletament jew parzjalment fit-territorju tal-Istat rikjest, li l-biċċa l-kbira tal-effetti jew parti sostanzjali tad-dannu li jiffurmaw parti mill-elementi kostitwenti tar-reat kriminali ma seħħewx fit-territorju ta' dak l-Istat, u li l-persuna suspettata jew akkużata mhijiex ċittadin ta’ dak l-Istat jew residenti fih. Jenħtieġ li s-sitwazzjoni personali, materjali jew familjari ta’ vittma, xhud jew individwu ieħor ikkonċernat ma tkunx deċiżiva fiha nnifisha fil-valutazzjoni ta’ jekk it-trasferiment tal-proċedimenti kriminali jkunx jaqdi l-objettiv ta’ amministrazzjoni effiċjenti u tajba tal-ġustizzja.

(46)

Qabel ma tiddeċiedi li tirrifjuta talba għat-trasferiment tal-proċedimenti kriminali abbażi ta’ kwalunkwe raġuni għal rifjut, jenħtieġ li l-awtorità rikjesta, fejn ikun xieraq, tikkonsulta lill-awtorità rikjedenti sabiex tikseb kwalunkwe informazzjoni addizzjonali meħtieġa.

(47)

Jenħtieġ li l-Istat rikjest jiżgura l-aċċess għal rimedju legali effettiv għall-persuni suspettati, il-persuni akkużati u l-vittmi, kontra d-deċiżjoni li jiġi aċċettat it-trasferiment tal-proċedimenti kriminali, f'konformità mal-Artikolu 47 tal-Karta u l-proċeduri applikabbli skont il-liġi nazzjonali, kull meta d-drittijiet tagħhom jiġu affettwati ħażin mill-applikazzjoni ta' dan ir-Regolament. Jenħtieġ li r-rieżami tad-deċiżjoni dwar it-trasferiment tal-proċedimenti kriminali jkun ibbażat esklużivament fuq il-kriterji previsti fir-raġunijiet għar-rifjut stipulati f'dan ir-Regolament. Jenħtieġ li l-valutazzjoni dwar jekk il-proċedimenti kriminali għandhomx jiġu trasferiti tinvolvi kunsiderazzjoni taċ-ċirkostanzi kollha li huma rilevanti għall-eżami ta' dawk il-kriterji. Dik il-valutazzjoni spiss tista' tinvolvi mhux biss l-ibbilanċjar tal-interessi jew tad-drittijiet tal-individwi li d-drittijiet tagħhom jistgħu jiġu affettwati, iżda anki kunsiderazzjoni tal-ispeċifiċitajiet u l-aspetti prattiċi tal-funzjonament tas-sistema tal-ġustizzja kriminali. Jenħtieġ li tali rimedju legali jkun mingħajr preġudizzju għal rimedji legali oħra skont il-liġi nazzjonali.

(48)

Jenħtieġ li l-awtorità rikjesta jkollha diskrezzjoni wiesgħa meta tivvaluta jekk it-trasferiment tal-proċedimenti kriminali huwiex fl-interess ta' amministrazzjoni effiċjenti u tajba tal-ġustizzja, u jekk jenħtieġx li talba għal trasferiment tiġi rifjutata minħabba kwalunkwe waħda mir-raġunijiet fakultattivi għal rifjut imniżżla f'dan ir-Regolament. Jenħtieġ li l-eżami tal-eżerċizzju ta' din id-diskrezzjoni jkun limitat għar-rieżami ta' jekk l-awtorità rikjesta, meta tkun qed tieħu d-deċiżjoni li taċċetta t-talba għat-trasferiment tal-proċedimenti kriminali, tkunx qabżet manifestament il-limiti tad-diskrezzjoni tagħha.

(49)

L-eżitu tar-rimedju legali jista' jkun li d-deċiżjoni li jiġi aċċettat it-trasferiment tal-proċedimenti kriminali tiġi kkonfermata jew annullata kompletament jew parzjalment. Fil-prinċipju, fil-każ li r-rimedju jirnexxi, il-proċedimenti kriminali jerġgħu lura għand l-Istat rikjedenti. Madankollu, f'xi sitwazzjonijiet il-qorti tista' tiddeċiedi wkoll, f'konformità mal-liġi nazzjonali tagħha, li d-deċiżjoni li taċċetta it-trasferiment tal-proċedimenti kriminali tista' tiġi kkonfermata dment li jiġu ssodisfati ċerti kundizzjonijiet jew formalitajiet addizzjonali, pereżempju l-kundizzjoni li jimtlew xi elementi neqsin tal-formola ta' talba, jew li jittieħdu miżuri addizzjonali għall-eżekuzzjoni tat-trasferiment, bħall-kontinwazzjoni tal-protezzjoni tax-xhieda.

(50)

Jenħtieġ li rimedju legali skont dan ir-Regolament ma jinvolvi ebda rieżami tal-merti tal-każ, bħal jekk il-provi humiex biżżejjed biex jiġġustifikaw il-ftuħ jew it-tkomplija ta' investigazzjoni, jekk il-fatti tal-każ jew l-aspetti soġġettivi, bħall-intenzjoni jew negliġenza serja, humiex stabbiliti skont l-istandards applikabbli, jew rigward il-valur probatorju jew il-forza probatorja tal-provi miġbura diġà jew il-kredibbiltà tad-dikjarazzjonijiet.

(51)

Bil-ħsieb li jiġi garantit li d-dritt għal rimedju legali jkun jista' jiġi eżerċitat b'mod effettiv, jenħtieġ li l-Istat rikjest jiżgura li l-persuni suspettati, il-persuni akkużati u l-vittmi jkollhom id-dritt ta' aċċess għad-dokumenti kollha relatati mat-trasferiment tal-proċedimenti kriminali li ffurmaw il-bażi għad-deċiżjoni li jiġi aċċettat trasferiment skont dan ir-Regolament, u li huma meħtieġa biex tiġi kkontestata b'mod effettiv dik id-deċiżjoni. Jenħtieġ li d-dritt ta' aċċess għal tali dokumenti jiġi eżerċitat f'konformità mal-proċeduri skont il-liġi nazzjonali tal-Istat rikjest u jista' jkun limitat fejn ikun jipperikola l-kunfidenzjalità ta’ investigazzjoni, jew jippreġudika b'mod ieħor l-investigazzjoni jew jagħmel ħsara lis-sikurezza tal-persuni. Jenħtieġ li kwalunkwe rifjut ta' aċċess bħal dan jiġi kkunsidrat fid-dawl tad-drittijiet tal-persuni kkonċernati, b'kunsiderazzjoni tal-istadji differenti tal-proċedimenti kriminali. Jenħtieġ li r-restrizzjonijiet fuq tali aċċess jiġu interpretati b'mod strett u f'konformità mal-prinċipju tad-dritt għal proċess ġust skont il-Karta.

(52)

Jenħtieġ li l-limitu ta' żmien biex il-persuna suspettata, il-persuna akkużata jew il-vittma titlob rimedju legali effettiv ma jkunx itwal minn 15-il jum mid-data li fiha l-persuna kkonċernata tirċievi d-deċiżjoni motivata li jiġi aċċettat it-trasferiment tal-proċedimenti kriminali. Jenħtieġ li sitwazzjonijiet fejn il-persuna suspettata, il-persuna akkużata jew il-vittma ma tkunx identifikata fil-mument tat-trasferiment tal-proċedimenti kriminali, u fejn għal dik ir-raġuni d-deċiżjoni motivata ma setgħetx tiġi kkomunikata lilha f'dak il-mument, ikunu soġġetti għal-liġi nazzjonali.

(53)

Jenħtieġ li l-aċċettazzjoni tat-trasferiment tal-proċedimenti kriminali mill-awtorità rikjesta tirriżulta fis-sospensjoni jew fil-waqfien tal-proċedimenti kriminali fl-Istat rikjedenti biex tiġi evitata d-duplikazzjoni ta' miżuri fl-Istat rikjedenti u fl-Istat rikjest. Jenħtieġ, madankollu, li dak ikun mingħajr preġudizzju għal miżuri investigattivi jew proċedurali oħra neċessarji, inkluż miżuri urġenti neċessarji, li l-Istat rikjedenti jista' jkollu bżonn iwettaq wara li jirċievi n-notifika tal-aċċettazzjoni mill-awtorità rikjesta, fil-każ fejn l-amministrazzjoni effiċjenti u tajba tal-ġustizzja tirrikjedi dan. Jenħtieġ li l-kunċett ta' “miżuri investigattivi jew proċedurali oħra” jiġi interpretat b'mod wiesa' bħala li jinkludi mhux biss kwalunkwe miżura għall-fini tal-ġbir tal-provi, iżda anki kwalunkwe att proċedurali li jimponi arrest preventiv jew kwalunkwe miżura interim oħra. Biex jiġi żgurat li l-proċedimenti kriminali ma jiġux estiżi fit-tul fl-Istat rikjedenti, ladarba l-miżuri investigattivi jew proċedurali oħra meħuda jkunu finalizzati jew ma jkunux aktar neċessarji, jenħtieġ li l-proċedimenti kriminali fl-Istat rikjedenti jiġu sospiżi jew jitwaqqfu. Jekk ikun ġie invokat rimedju legali b'effett sospensiv fl-Istat rikjest, jenħtieġ li l-proċedimenti kriminali ma jiġux sospiżi jew imwaqqfa fl-Istat rikjedenti sakemm tkun ittieħdet deċiżjoni fl-Istat rikjest dwar ir-rimedju.

(54)

Fil-każijiet fejn il-ġuriżdizzjoni għall-proċedimenti kriminali tkun ibbażata esklużivament fuq dan ir-Regolament u fejn tkun waslet talba għal trasferiment u d-deċiżjoni dwar jekk jaċċettawx jew jirrifjutawx it-trasferiment tal-proċedimenti kriminali tkun pendenti, jenħtieġ li l-Istati Membri jkunu jistgħu jipprovdu skont il-liġi nazzjonali tagħhom bażi legali għall-arrest proviżorju tal-persuna suspettata jew akkużata li tkun qed tirrisjedi fl-Istat rikjest jew għall-adozzjoni ta' miżuri proviżorji oħra mill-awtorità kompetenti ta' dak l-Istat. Jenħtieġ li tali arrest proviżorju jew miżuri proviżorji oħra jittieħdu biss f'konformità mal-liġi nazzjonali, u fejn meħtieġ biss. Jenħtieġ li tali arrest proviżorju jew miżuri proviżorji oħra jkunu soġġetti għall-istess salvagwardji proċedurali applikabbli għall-istess miżuri skont il-liġi nazzjonali, inkluż is-sorveljanza ġudizzjarja. Barra minn hekk, jenħtieġ li tali arrest proviżorju jew miżuri proviżorji oħra jittieħdu wara valutazzjoni xierqa abbażi tal-informazzjoni għad-dispożizzjoni tal-awtorità rikjesta. Madankollu, jenħtieġ li dan ir-Regolament ma jikkostitwix bażi legali għall-arrest ta' persuni bil-ħsieb li jiġu fiżikament trasferiti lejn l-Istat rikjest sabiex dan tal-aħħar iressaq proċedimenti kriminali kontra dik il-persuna.

(55)

Jenħtieġ li awtorità kompetenti tal-Istat rikjest tinforma lill-awtorità rikjedenti bil-miktub bi kwalunkwe deċiżjoni meħuda fi tmiem il-proċedimenti kriminali fl-Istat rikjest. Id-Deċiżjoni Qafas 2009/948/ĠAI timponi obbligu simili fejn ikun intlaħaq ftehim dwar il-konċentrazzjoni tal-proċedimenti fi Stat Membru wieħed. Meta l-awtorità rikjesta tiddeċiedi li twaqqaf il-proċedimenti kriminali relatati mal-fatti sottostanti għat-talba għal trasferiment, jenħtieġ li tinforma lill-awtorità bir-raġunijiet għat-tali waqfien. Jenħtieġ li tal-inqas il-partijiet essenzjali ta' din l-informazzjoni u tad-deċiżjoni finali bil-miktub meħuda fl-Istat rikjest, jiġu tradotti mill-awtorità rikjesta f'lingwa uffiċjali tal-Istat rikjedenti jew fi kwalunkwe lingwa oħra aċċettata minn dak l-Istat f'konformità ma' dan ir-Regolament. Il-partijiet essenzjali tal-informazzjoni u tad-deċiżjoni huma maħsuba li jkunu dawk l-estratti li jidhru neċessarji biex l-awtorità rikjedenti jkollha għarfien tal-kontenut ġenerali tagħhom.

(56)

Jekk l-awtorità rikjesta tiddeċiedi li twaqqaf proċedimenti kriminali relatati mal-fatti sottostanti għat-talba għal trasferiment, jenħtieġ li l-awtorità rikjedenti tkun tista' tkompli jew terġa' tiftaħ il-proċedimenti kriminali jekk dak ma jkunx jinvolvi ksur tal-prinċipju ne bis in idem, kif interpretat mill-Qorti tal-Ġustizzja tal-Unjoni Ewropea, jiġifieri meta d-deċiżjoni li jitwaqqfu l-proċedimenti ma tipprojbix b'mod definittiv il-prosekuzzjoni ulterjuri skont il-liġi nazzjonali tal-Istat rikjest u ma tteħditx wara li l-merti tal-każ ikunu ġew determinati, u għalhekk ma tipprekludix proċedimenti kriminali ulterjuri, fir-rigward tal-istess atti, f'dak l-Istat. Jenħtieġ li l-vittmi jkollhom il-possibbiltà li jibdew jew li jitolbu l-ftuħ mill-ġdid tal-proċedimenti kriminali fl-Istat rikjedenti f'konformità mal-liġi nazzjonali ta' dak l-Istat, dment li dan ma jkunx jinvolvi ksur tal-prinċipju ne bis in idem.

(57)

Ladarba l-proċedimenti kriminali jiġu trasferiti f'konformità ma' dan ir-Regolament, jenħtieġ li l-awtorità rikjesta tapplika l-liġi nazzjonali u l-proċeduri rilevanti tagħha. Jenħtieġ li l-ebda parti minn dan ir-Regolament ma tiġi interpretata bħala li tinterferixxi ma' kwalunkwe diskrezzjoni prosekutorjali prevista fil-liġi nazzjonali.

(58)

Jenħtieġ li l-ebda parti minn dan ir-Regolament ma tiġi interpretata bħala li taffettwa t-tul tal-perjodu ta' limitazzjoni fl-Istat rikjest, kif previst fil-liġi nazzjonali ta' dak l-Istat.

(59)

Bil-għan li jingħata effett sħiħ lit-trasferiment tal-proċedimenti kriminali, jenħtieġ li l-provi trasferiti mill-awtorità rikjedenti ma jiġux miċħuda l-ammissjoni fil-proċedimenti kriminali korrispondenti fl-Istat rikjest minħabba s-sempliċi kunsiderazzjoni li l-provi nġabru fi Stat Membru ieħor. Jenħtieġ li l-qorti kompetenti fl-Istat rikjest iżżomm id-diskrezzjoni ġudizzjarja tagħha fil-valutazzjoni ta' dawn il-provi f'konformità mal-liġi nazzjonali, filwaqt li jenħtieġ li l-persuni suspettati u akkużati jżommu d-drittijiet tagħhom li jikkontestaw l-ammissibbiltà ta' dawn il-provi f'konformità mad-drittijiet tagħhom ta' difiża skont il-Karta. F'konformità ma' dawk il-prinċipji, u b'rispett għas-sistemi u t-tradizzjonijiet legali differenti tal-Istati Membri kif previst fl-Artikolu 67(1) tat-Trattat dwar il-Funzjonament tal-Unjoni Ewropea (TFUE), l-ebda parti minn dan ir-Regolament ma għandha tiġi interpretata bħala li tipprojbixxi lill-qrati milli japplikaw il-prinċipji fundamentali tal-liġi nazzjonali dwar l-ekwità tal-proċedura li japplikaw fis-sistemi nazzjonali tagħhom, inkluż fis-sistemi tad-dritt komuni.

(60)

Jenħtieġ li l-Istat rikjest japplika l-liġi nazzjonali tiegħu biex jiddetermina l-piena applikabbli għar-reat kriminali inkwistjoni. F'każijiet fejn ir-reat kriminali jkun twettaq fit-territorju tal-Istat rikjedenti, jenħtieġ li fid-determinazzjoni tal-piena l-awtoritajiet rikjesti jkunu jistgħu jqisu l-piena massima prevista fil-liġi nazzjonali tal-Istat rikjedenti, kull meta dan ikun għall-benefiċċju tal-persuna akkużata, u f'konformità mal-liġi nazzjonali tal-Istat rikjest. Jenħtieġ li dan jitqies f'sitwazzjonijiet fejn it-trasferiment tal-proċedimenti kriminali jkun iwassal għall-applikazzjoni fl-Istat rikjest ta' piena aktar ħarxa mill-piena massima prevista fl-Istat rikjedenti għall-istess reat kriminali, bil-ħsieb li jiġi żgurat grad ta' ċertezza legali u prevedibbiltà tal-liġi applikabbli għall-persuni suspettati jew akkużati kkonċernati. Jenħtieġ li l-piena massima prevista fil-liġi nazzjonali tal-Istat rikjedenti titqies dejjem meta l-ġuriżdizzjoni tal-Istat rikjest tkun ibbażata esklużivament fuq dan ir-Regolament.

(61)

Jenħtieġ li kull Stat Membru jġarrab il-kostijiet ta' trasferimenti tal-proċedimenti kriminali tiegħu stess, inkluż dawk relatati mal-eżerċizzju tad-drittijiet proċedurali li l-persuna suspettata jew akkużata hija intitolata għalihom f'kull wieħed mill-Istati Membri kkonċernati, f'konformità mal-liġi tal-Unjoni u dik nazzjonali applikabbli. Jenħtieġ li l-Istati Membri ma jkunux jistgħu jippretendu kumpens mingħand xulxin għall-kostijiet li jirriżultaw mill-applikazzjoni ta' dan ir-Regolament. Madankollu, meta l-Istat rikjedenti jkun ġarrab kostijiet kbar jew eċċezzjonali marbuta mat-traduzzjoni tad-dokumenti fil-proċess tal-kawża li jkun ser jiġi trasferit lill-Istat rikjest, jenħtieġ li l-awtorità rikjesta tikkunsidra proposta mill-awtorità rikjedenti biex jikkondividu l-kostijiet. F'każijiet bħal dawn, jenħtieġ li l-awtorità rikjedenti u l-awtorità rikjesta jikkonsultaw lil xulxin sabiex jilħqu qbil dwar il-kondiviżjoni tal-kostijiet. Idealment jenħtieġ li dawn il-konsultazzjonijiet isiru qabel ma tinħareġ it-talba għat-trasferiment. Jekk ma jkun jista' jintlaħaq l-ebda qbil qabel ma tiġi adottata d-deċiżjoni li jiġi aċċettat it-trasferiment tal-proċedimenti kriminali, jenħtieġ li l-awtorità rikjedenti tkun tista' tiddeċiedi li tirtira t-talba f'konformità ma' dan ir-Regolament jew li żżomm it-talba u ġġarrab il-parti tal-kostijiet meqjusa bħala eċċezzjonalment għoljin.

(62)

L-użu ta' formola ta' talba standardizzata tradotta fil-lingwi uffiċjali kollha tal-Unjoni jiffaċilita l-kooperazzjoni u l-iskambju ta' informazzjoni bejn l-awtorità rikjedenti u l-awtorità rikjesta, u jippermettilhom jieħdu deċiżjoni aktar malajr u b'mod aktar effettiv dwar it-talba għat-trasferiment tal-proċedimenti kriminali. L-użu ta' tali formola ta' talba jnaqqas ukoll il-kostijiet tat-traduzzjoni u jikkontribwixxi għal kwalità ogħla tat-talbiet.

(63)

Jenħtieġ li l-formola ta' talba tinkludi biss id-data personali meħtieġa biex tiġi ffaċilitata d-deċiżjoni tal-awtorità rikjesta dwar it-talba għat-trasferiment tal-proċedimenti kriminali. Jenħtieġ li l-formola ta' talba jkun fiha indikazzjoni tal-kategoriji ta' data personali, bħal jekk il-persuna kkonċernata hijiex persuna suspettata, akkużata jew vittma, kif ukoll l-oqsma speċifiċi għal kull waħda minn dawk il-kategoriji.

(64)

Sabiex tiġi indirizzata b'mod effettiv il-possibbiltà li jkun hemm bżonn titjib fir-rigward tal-formola ta' talba li trid tintuża biex jintalab it-trasferiment tal-proċedimenti kriminali jew ta' formoli oħra, jenħtieġ li l-Kummissjoni tingħata s-setgħa li tadotta atti f'konformità mal-Artikolu 290 TFUE fir-rigward tal-emendar tal-Anness ta' dan ir-Regolament. Huwa partikolarment importanti li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż fil-livell tal-esperti, u li dawk il-konsultazzjonijiet isiru f'konformità mal-prinċipji stabbiliti fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (29). B'mod partikolari, sabiex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jieħdu ħsieb it-tħejjija ta' atti delegati.

(65)

Sabiex jiġi żgurat skambju rapidu, dirett, interoperabbli, affidabbli u sigur tad-data relatata mal-każ, jenħtieġ li l-komunikazzjoni skont dan ir-Regolament bejn l-awtorità rikjedenti u l-awtorità rikjesta u bl-involviment tal-awtoritajiet ċentrali, fejn Stat Membru jkun iddeżinja awtorità ċentrali, kif ukoll mal-Eurojust, bħala regola, issir permezz tas-sistema deċentralizzata tal-IT skont it-tifsira tar-Regolament (UE) 2023/2844 tal-Parlament Ewropew u tal-Kunsill (30). B'mod partikolari, jenħtieġ li, bħala regola, għall-iskambju tal-formola ta' talba u ta' kwalunkwe informazzjoni u dokumenti rilevanti oħra u għal kull komunikazzjoni oħra bejn l-awtoritajiet skont dan ir-Regolament, tintuża s-sistema deċentralizzata tal-IT. F'każijiet fejn tapplika waħda jew aktar mill-eċċezzjonijiet previsti fir-Regolament (UE) 2023/2844, b'mod partikolari meta l-użu tas-sistema deċentralizzata tal-IT ma jkunx possibbli jew xieraq, jenħtieġ li jkun possibbli li jintużaw mezzi ta' komunikazzjoni oħra kif speċifikat f'dak ir-Regolament.

(66)

Jenħtieġ li l-Istati Membri jkunu jistgħu jużaw software żviluppat mill-Kummissjoni (“software ta' implimentazzjoni ta' referenza”) minflok sistema tal-IT nazzjonali. Jenħtieġ li s-software ta' implimentazzjoni ta' referenza jkun ibbażat fuq struttura modulari, li jfisser li s-software jiġi ppakkjat u kkonsenjat separatament mill-komponenti tas-sistema e-CODEX, stabbilita skont ir-Regolament (UE) 2022/850 tal-Parlament Ewropew u tal-Kunsill (31), li huma meħtieġa biex jiġi konness mas-sistema deċentralizzata tal-IT. Jenħtieġ li dik l-istruttura tippermetti lill-Istati Membri jużaw mill-ġdid jew itejbu l-infrastrutturi nazzjonali eżistenti ta' komunikazzjoni ġudizzjarja tagħhom għall-fini ta' użu transfruntier.

(67)

Jenħtieġ li l-Kummissjoni tkun responsabbli għall-ħolqien, il-manutenzjoni u l-iżvilupp tas-software ta' implimentazzjoni ta' referenza. Jenħtieġ li l-Kummissjoni tfassal, tiżviluppa u tagħmel il-manutenzjoni tas-software ta' implimentazzjoni ta' referenza b'mod li jippermetti lill-kontrolluri jiżguraw il-konformità mar-rekwiżiti u l-prinċipji tal-protezzjoni tad-data stabbiliti fir-Regolament (UE) 2018/1725 tal-Parlament Ewropew u tal-Kunsill (32) u d-Direttiva (UE) 2016/680 tal-Parlament Ewropew u tal-Kunsill (33), b'mod partikolari l-obbligi tal-protezzjoni tad-data mid-disinn u b'mod awtomatiku kif ukoll livell għoli ta' ċibersigurtà. Jenħtieġ li s-software ta' implimentazzjoni ta' referenza jinkludi wkoll miżuri tekniċi xierqa u jippermetti l-miżuri organizzattivi meħtieġa biex jiġi żgurat livell xieraq ta' sigurtà u interoperabbiltà, filwaqt li jitqies li jistgħu jiġu skambjati wkoll kategoriji speċjali ta' data. Il-Kummissjoni ma tipproċessa l-ebda data personali fil-kuntest tal-ħolqien, il-manutenzjoni u l-iżvilupp tas-software ta' implimentazzjoni ta' referenza.

(68)

Jenħtieġ li s-software ta' implimentazzjoni ta' referenza żviluppat mill-Kummissjoni bħala sistema back-end jiġbor b'mod programmatiku d-data statistika meħtieġa għall-finijiet ta' monitoraġġ u jenħtieġ li tali data tintbagħat lill-Kummissjoni. Meta l-Istati Membri jagħżlu li jużaw sistema nazzjonali tal-IT minflok is-software ta' implimentazzjoni ta' referenza żviluppat mill-Kummissjoni, dik is-sistema tista' tiġi mgħammra sabiex tiġbor b'mod programmatiku dik id-data u, f'dak il-każ, jenħtieġ li dik id-data tintbagħat lill-Kummissjoni. Il-konnettur tal-e-CODEX jista' jkun mgħammar ukoll b'karatteristika li tippermetti l-irkupru ta' data statistika rilevanti.

(69)

Sabiex jiġu żgurati kundizzjonijiet uniformi għall-implimentazzjoni ta' dan ir-Regolament, jenħtieġ li l-Kummissjoni tingħata s-setgħa ta' implimentazzjoni biex tistabbilixxi sistema deċentralizzata tal-IT. Jenħtieġ li dawk is-setgħat jiġu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (34).

(70)

Jenħtieġ li dan ir-Regolament joħloq il-bażi legali għall-iskambju ta' data personali bejn l-Istati Membri għall-finijiet tat-trasferiment tal-proċedimenti kriminali f'konformità mal-Artikolu 8 u mal-Artikolu 10, il-punt (a), tad-Direttiva (UE) 2016/680. Madankollu, kwalunkwe aspett ieħor relatat mad-data personali, bħall-perjodu għaż-żamma tad-data personali li tirċievi l-awtorità rikjedenti, l-ipproċessar tad-data personali mill-awtorità rikjedenti u l-awtorità rikjesta, jenħtieġ li jkun soġġett għal-liġinazzjonali tal-Istati Membri adottati skont id-Direttiva (UE) 2016/680. Jenħtieġ li l-awtorità rikjedenti u l-awtorità rikjesta jitqiesu bħala kontrolluri fir-rigward tal-ipproċessar tad-data personali skont dik id-Direttiva. L-awtoritajiet ċentrali jistgħu jipprovdu appoġġ amministrattiv lill-awtorità rikjedenti u l-awtorità rikjesta u, sa fejn ikunu qed jipproċessaw data personali f'isem dawk il-kontrolluri, jenħtieġ li jitqiesu bħala proċessuri tal-kontrollur rispettiv. Fir-rigward tal-ipproċessar ta' data personali mill-Eurojust, jenħtieġ li r-Regolament (UE) 2018/1725 japplika fil-kuntest ta' dan ir-Regolament mingħajr preġudizzju għar-regoli speċifiċi dwar il-protezzjoni tad-data stabbiliti fir-Regolament (UE) 2018/1727. Jenħtieġ li l-ebda parti minn dan ir-Regolament ma tiġi interpretata bħala estensjoni ulterjuri tad-drittijiet ta' aċċess għal sistemi ta' informazzjoni oħra tal-Unjoni skont l-atti legali tal-Unjoni li jistabbilixxu dawk is-sistemi.

(71)

Minħabba li l-objettiv ta' dan ir-Regolament, jiġifieri t-trasferiment tal-proċedimenti kriminali, ma jistax jinkiseb b'mod suffiċjenti mill-Istati Membri iżda jista' pjuttost, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea (TUE). F'konformità mal-prinċipju ta’ -proporzjonalità kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv.

(72)

F'konformità mal-Artikolu 3 tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta' libertà, sigurtà u ġustizzja, anness mat-TUE u mat-TFUE, l-Irlanda nnotifikat, b'ittra tat-13 ta' Lulju 2023, ix-xewqa tagħha li tieħu sehem fl-adozzjoni u fl-applikazzjoni ta' dan ir-Regolament.

(73)

F'konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka mhijiex qed tieħu sehem fl-adozzjoni ta' dan ir-Regolament u mhijiex marbuta bih jew soġġetta għall-applikazzjoni tiegħu.

(74)

Il-Kontrollur Ewropew għall-Protezzjoni tad-Data ġie kkonsultat f'konformità mal-Artikolu 42(1) tar-Regolament (UE) 2018/1725 u ta l-opinjoni tiegħu fit-22 ta' Mejju 2023 (35),