(1)

Ir-Regolament ta’ Implimentazzjoni tal-Kummissjoni (UE) 2018/2019 (2), abbażi ta’ valutazzjoni preliminari tar-riskju, jistabbilixxi lista ta’ pjanti, prodotti mill-pjanti u oġġetti oħra ta’ riskju għoli.

(2)

Bħala segwitu tal-valutazzjoni preliminari, fl-Anness tar-Regolament ta’ Implimentazzjoni (UE) 2018/2019 ġew elenkati b’mod proviżorju 34 ġeneru u speċi waħda ta’ pjanti għat-tħawwil li joriġinaw minn pajjiżi terzi, bħala pjanti ta’ riskju għoli. Dik il-lista tinkludi l-ġeneru Prunus L.

(3)

Ir-Regolament ta’ Implimentazzjoni tal-Kummissjoni (UE) 2020/1213 (3) jistabbilixxi l-miżuri fitosanitarji għall-introduzzjoni fit-territorju tal-Unjoni ta’ ċerti pjanti, prodotti mill-pjanti u oġġetti oħra li tneħħew mill-Anness tar-Regolament ta’ Implimentazzjoni (UE) 2018/2019, iżda li r-riskji fitosanitarji tagħhom għadhom ma ġewx ivvalutati bis-sħiħ. Dan għaliex wieħed jew aktar mill-pesti li jgħixu f’dawk il-pjanti għadhom mhumiex inklużi fil-lista tal-pesti tal-kwarantina fl-Unjoni stabbiliti fl-Anness II tar-Regolament ta’ Implimentazzjoni tal-Kummissjoni (UE) 2019/2072 (4), iżda jistgħu jissodisfaw il-kundizzjonijiet biex jiġu inklużi wara valutazzjoni tar-riskji kompluta ulterjuri.

(4)

Fil-31 ta’ Marzu 2023, ir-Renju Unit (5) issottometta lill-Kummissjoni talba għall-esportazzjoni lejn l-Unjoni ta’ rimjiet bl-għejun/tilqim ta’ Prunus avium ta’ mhux aktar minn sena, b’dijametru massimu ta 12 mm; ta’ pjanti għat-tħawwil f’materjal għat-tkabbir ta’ Prunus avium u Prunus avium ta’ mhux aktar minn 7 snin, imlaqqmin fuq is-salvaġġ ta’ Prunus avium, Prunus canescens, Prunus cerasus jew Prunus pseudocerasus, b’dijametru massimu ta’ 40 mm fil-bażi taz-zokk; ta’ pjanti għat-tħawwil bl-għeruq mikxufin ta’ Prunus avium u Prunus avium ta’ mhux aktar minn 7 snin, imlaqqmin fuq is-salvaġġ ta’ Prunus avium, Prunus canescens, Prunus cerasus jew Prunus pseudocerasus, b’dijametru massimu ta’ 40 mm fil-bażi taz-zokk, u ta’ pjanti għat-tħawwil f’materjal għat-tkabbir ta’ Prunus avium ta’ mhux aktar minn 15-il sena, b’dijametru massimu ta’ 80 mm fil-bażi taz-zokk (“il-pjanti indikati fl-ewwel talba”). Dik it-talba kienet sostnuta mid-dossier tekniku rilevanti (id-dossier tekniku tal-31 ta’ Marzu 2023).

(5)

Fit-23 ta’ Mejju 2024, l-Awtorità Ewropea dwar is-Sigurtà fl-Ikel (l-Awtorità) adottat opinjoni xjentifika dwar il-valutazzjoni tar-riskji tal-pjanti indikati fl-ewwel talba (6) (l-Opinjoni tat-23 ta’ Mejju 2024). L-Awtorità identifikat il-Bemisia tabaci (popolazzjonijiet Ewropej), il-Colletotrichum aenigma, l-Eulecanium excrescens, is-Scirtothrips dorsalis, it-Takahashia japonica, il-virus tar-ringspot tat-tabakk u l-virus tar-ringspot tat-tadam bħala pesti rilevanti għal dawk il-pjanti, evalwat il-miżuri ta’ mitigazzjoni tar-riskju deskritti fid-dossier tekniku tal-31 ta’ Marzu 2023 u stmat il-probabbiltà ta’ ħelsien tal-pjanti rilevanti minn dawk il-pesti.

(6)

Fid-9 ta’ Ġunju 2023, ir-Renju Unit issottometta talba lill-Kummissjoni għall-esportazzjoni lejn l-Unjoni ta’ rimjiet bl-għejun/tilqim ta’ Prunus spinosa ta’ mhux aktar minn sena, b’dijametru massimu ta’ 12 mm; ta’ pjanti għat-tħawwil bl-għeruq mikxufin ta’ Prunus spinosa ta’ mhux aktar minn 7 snin, b’dijametru massimu ta’ 40 mm fil-bażi taz-zokk; u ta’ pjanti għat-tħawwil f’materjal għat-tkabbir ta’ Prunus spinosa ta’ mhux aktar minn 7 snin, b’dijametru massimu ta’ 40 mm fil-bażi taz-zokk (“il-pjanti indikati fit-tieni talba”). Dik it-talba kienet sostnuta mid-dossier tekniku rilevanti (id-dossier tekniku tad-9 ta’ Ġunju 2023).

(7)

Fid-19 ta’ Ġunju 2024, l-Awtorità adottat opinjoni xjentifika dwar il-valutazzjoni tar-riskji tal-pjanti indikati fit-tieni talba (7) (l-Opinjoni tad-19 ta’ Ġunju 2024). L-Awtorità identifikat il-Bemisia tabaci (popolazzjonijiet Ewropej), l-Eulecanium excrescens u s-Scirtothrips dorsalis bħala pesti rilevanti għal dawk il-pjanti, evalwat il-miżuri ta’ mitigazzjoni tar-riskju deskritti fid-dossier u stmat il-probabbiltà ta’ ħelsien tal-pjanti rilevanti minn dawk il-pesti.

(8)

Abbażi tal-Opinjonijiet tat-23 ta’ Mejju 2024 u tad-19 ta’ Ġunju 2024, ir-riskju fitosanitarju li jirriżulta mill-introduzzjoni fit-territorju tal-Unjoni taż-żewġ pjanti indikati fl-ewwel talba u tal-pjanti indikati fit-tieni talba jitqies li huwa mnaqqas għal livell aċċettabbli, dment li jiġu applikati miżuri xierqa li jindirizzaw ir-riskju tal-pesti relatati ma’ dawk il-pjanti.

(9)

Għall-pjanti rilevanti indikati fl-ewwel talba, l-Awtorità identifikat il-pesti magħrufa li jintużaw bħala ospitanti jew bħala Prunus avium, Prunus canescens, Prunus cerasus jew bħala Prunus pseudocerasus. Peress li r-riskju fitosanitarju mill-introduzzjoni fit-territorju tal-Unjoni ta’ siġar kbar u eqdem (ta’ 80 mm u 15-il sena) jitqies li jitnaqqas għal livell aċċettabbli bl-applikazzjoni ta’ miżuri xierqa, huwa għalhekk iġġustifikat li jiġi konkluż li r-riskju fitosanitarju mill-introduzzjoni tal-pjanti kollha għat-tħawwil ta’ Prunus avium, Prunus canescens, Prunus cerasus u Prunus pseudocerasus, irrispettivament mid-daqs, mill-età, minn jekk ikunux imlaqqmin jew le, jew minn jekk ikunux bl-għeruq mikxufin jew f’materjal għat-tkabbir, li joriġinaw mir-Renju Unit, jitnaqqas għal livell aċċettabbli bl-applikazzjoni ta’ miżuri xierqa.

(10)

Għaldaqstant, il-pjanti għat-tħawwil ta’ Prunus avium, Prunus canescens, Prunus cerasus u Prunus pseudocerasus, ta’ rimjiet bl-għejun/tilqim ta’ Prunus spinosa ta’ mhux aktar minn sena, b’dijametru massimu ta’ 12 mm u ta’ pjanti mhux imlaqqmin għat-tħawwil ta’ Prunus spinosa ta’ mhux aktar minn 7 snin, b’dijametru massimu fil-bażi taz-zokk ta’ 40 mm, li joriġinaw mir-Renju Unit (“il-pjanti rilevanti”), jenħtieġ li ma jibqgħux jitqiesu bħala pjanti ta’ riskju għoli. Għalhekk, jenħtieġ li jitneħħew mil-lista ta’ pjanti, prodotti mill-pjanti u oġġetti oħra ta’ riskju għoli fl-Anness tar-Regolament ta’ Implimentazzjoni (UE) 2018/2019.

(11)

Għaldaqstant, jenħtieġ li r-Regolament ta’ Implimentazzjoni (UE) 2018/2019 jiġi emendat kif xieraq.

(12)

Il-miżuri deskritti mir-Renju Unit fid-dossiers tekniċi tal-31 ta’ Marzu 2023 u tad-9 ta’ Ġunju 2023 huma meqjusa suffiċjenti biex inaqqsu r-riskju li jirriżulta mill-introduzzjoni tal-pjanti rilevanti fit-territorju tal-Unjoni għal livell aċċettabbli. Għalhekk, jenħtieġ li dawk il-miżuri jiġu stabbiliti bħala rekwiżiti fitosanitarji tal-importazzjoni fl-[Anness tar-Regolament ta’ Implimentazzjoni (UE) 2020/1213 biex tiġi żgurata l-protezzjoni fitosanitarja tat-territorju tal-Unjoni.

(13)

Il-Bemisia tabaci (popolazzjonijiet Ewropej) hija elenkata bħala pest tal-kwarantina f’żona protetta fl-Anness III tar-Regolament ta’ Implimentazzjoni (UE) 2019/2072 u s-Scirtothrips dorsalis huwa elenkat bħala pest tal-kwarantina fl-Unjoni fl-Anness II ta’ dak ir-Regolament ta’ Implimentazzjoni.

(14)

Il-virus tar-ringspot tat-tabakk u l-virus tar-ringspot tat-tadam issa huma elenkati bħala pesti rregolati mhux tal-kwarantina fl-Unjoni fl-Anness IV tar-Regolament ta’ Implimentazzjoni (UE) 2019/2072.

(15)

It-Takahashia japonica għadha mhijiex inkluża fil-lista ta’ pesti tal-kwarantina fl-Unjoni fl-Anness II tar-Regolament ta’ Implimentazzjoni (UE) 2019/2072. Madankollu, abbażi tal-evidenza pprovduta mill-Istati Membri li tindika li l-impatt ta’ dak il-pest fuq il-pjanti ospitanti tiegħu fl-Unjoni mhuwiex sinifikanti, ma huwa meħtieġ l-ebda rekwiżit tal-importazzjoni fir-rigward ta’ dak il-pest.

(16)

Il-Colletotrichum aenigma u l-Eulecanium excrescens għadhom mhumiex inklużi fil-lista tal-pesti tal-kwarantina fl-Unjoni. Jeħtieġ li ssir disponibbli valutazzjoni sħiħa tar-riskju tal-pesti, biex jiġi ddeterminat jekk dawk il-pesti jenħtieġx li jiġu elenkati fl-Anness II tar-Regolament ta’ Implimentazzjoni (UE) 2019/2072, u jekk bħala konsegwenza l-pjanti rilevanti, flimkien mar-rekwiżiti speċifiċi rilevanti jenħtieġx li jiġu elenkati fl-Anness VII ta’ dak ir-Regolament.

(17)

Għalhekk, jenħtieġ li r-Regolament ta’ Implimentazzjoni (UE) 2020/1213 jiġi emendat biex jinkludi l-pesti Colletotrichum aenigma u Eulecanium excrescens, u r-rekwiżiti korrispondenti tagħhom.

(18)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,