(1)

L-infezzjoni bil-virus tal-pesta tar-ruminanti żgħar hija marda infettiva li taffettwa lill-annimali kaprini u ovini u li jista’ jkollha impatt serju fuq il-popolazzjoni tal-annimali kkonċernati u fuq il-profittabbiltà tal-biedja, b’hekk tfixkel il-movimenti tal-kunsinni ta’ dawk l-annimali u tal-prodotti tagħhom fl-Unjoni u l-esportazzjonijiet lejn pajjiżi terzi.

(2)

F’każ ta’ tifqigħa tal-infezzjoni bil-virus tal-pesta tar-ruminanti żgħar fl-annimali kaprini jew ovini, hemm riskju serju li din il-marda tinxtered fi stabbilimenti oħra tal-annimali kaprini jew ovini.

(3)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u ddefinit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż l-infezzjoni bil-virus tal-pesta tar-ruminanti żgħar, u ċerti miżuri li għandhom jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tkun tinkludi żona ta’ protezzjoni, żona ta’ sorveljanza, u, jekk ikun meħtieġ, żoni ristretti ulterjuri madwar iż-żoni ta’ protezzjoni u ta’ sorveljanza jew maġenbhom.

(4)

Id-Deċiżjoni ta’ Implimentazzjoni tal-Kummissjoni (UE) 2024/2119 (4) ġiet adottata abbażi tar-Regolament (UE) 2016/429 u tistabbilixxi ċerti miżuri ta’ emerġenza relatati mal-infezzjoni bil-virus tal-pesta tar-ruminanti żgħar fir-Rumanija. B’mod aktar partikolari, id-Deċiżjoni ta’ Implimentazzjoni (UE) 2024/2119 tipprevedi li ż-żoni ta’ protezzjoni, iż-żoni ta’ sorveljanza u ż-żoni ristretti ulterjuri li għandu jistabbilixxi dak l-Istat Membru, f’konformità mar-Regolament Delegat (UE) 2020/687, wara t-tifqigħat ta’ din il-marda, iridu jkunu jinkludu mill-inqas iż-żoni elenkati fl-Anness ta’ dik id-Deċiżjoni ta’ Implimentazzjoni.

(5)

Wara l-adozzjoni tad-Deċiżjoni ta’ Implimentazzjoni (UE) 2024/2119, ir-Rumanija nnotifikat lill-Kummissjoni b’tifqigħat addizzjonali tal-infezzjoni bil-virus tal-pesta tar-ruminanti żgħar fi stabbilimenti fejn kienu jinżammu l-annimali ovini u kaprini. Barra minn hekk, ir-Rumanija nnotifikat lill-Kummissjoni b’ċertu dewmien fl-applikazzjoni tal-miżuri għall-kontroll tal-mard li jeħtieġ jiġu applikati fil-każ tal-konferma uffiċjali ta’ tifqigħa ta’ marda tal-kategorija A fl-annimali terrestri miżmuma fi stabbiliment. B’riżultat ta’ dan, l-Anness ta’ dik id-Deċiżjoni ta’ Implimentazzjoni ġie emendat kif xieraq biex jitqiesu dawn il-fatti. Id-Deċiżjoni ta’ Implimentazzjoni (UE) 2024/2119 ġiet emendata l-aħħar bid-Deċiżjoni ta’ Implimentazzjoni tal-Kummissjoni (UE) 2024/2832 (5).

(6)

Mid-data tal-adozzjoni tad-Deċiżjoni ta’ Implimentazzjoni (UE) 2024/2832 ’l hawn, ir-Rumanija nnotifikat lill-Kummissjoni li kull miżura għall-kontroll tal-mard li jeħtieġ tiġi applikata fil-każ tal-konferma uffiċjali ta’ tifqigħa ta’ marda tal-kategorija A fl-annimali terrestri miżmuma fi stabbiliment, stabbilita fl-Artikolu 12 tar-Regolament Delegat (UE) 2020/687, ġiet implimentata għat-tifqigħat kollha tal-virus tal-pesta tar-ruminanti żgħar li ġew ikkonfermati sa issa fit-territorju tagħha, inkluż dawk fil-Kontea ta’ Timis. Barra minn hekk, mill-bidu tal-epidemija fil-Kontea ta’ Timis, ir-Rumanija wettqet sorveljanza tal-marda fiż-żona madwar dawn it-tifqigħat, jiġifieri fil-Kontea ta’ Timis u fil-Kontea ta’ Caras Severin, b’riżultati negattivi għall-infezzjoni bil-virus tal-pesta tar-ruminanti żgħar.

(7)

Għalhekk, jenħtieġ li jiġu aġġustati d-durata tal-miżuri li għandhom jiġu applikati fiż-żoni elenkati bħala żoni ta’ protezzjoni, żoni ta’ sorveljanza u żoni ristretti ulterjuri għar-Rumanija, fil-Kontea ta’ Timis, fl-Anness tad-Deċiżjoni ta’ Implimentazzjoni (UE) 2024/2119, kif ukoll id-daqs ta’ dawn iż-żoni, filwaqt li titqies l-aktar data epidemjoloġika reċenti. Għaldaqstant, jeħtieġ jiġu emendati l-lista taż-żoni ristretti u d-durata tal-miżuri li għandhom jiġu applikati fihom stabbiliti fl-Anness ta’ din id-Deċiżjoni ta’ Implimentazzjoni.

(8)

Id-daqs taż-żoni ta’ protezzjoni, taż-żoni ta’ sorveljanza u taż-żoni ristretti ulterjuri u d-durata tal-miżuri li għandhom jiġu applikati fihom jenħtieġ li jkunu bbażati fuq il-kriterji stabbiliti fl-Artikolu 64(1) tar-Regolament (UE) 2016/429 u fuq ir-regoli stabbiliti fir-Regolament Delegat (UE) 2020/687, inkluż is-sitwazzjoni epidemjoloġika fir-rigward tal-infezzjoni bil-virus tal-pesta tar-ruminanti żgħar fiż-żoni affettwati minn din il-marda u s-sitwazzjoni epidemjoloġika kumplessiva tal-infezzjoni bil-virus tal-pesta tar-ruminanti żgħar fl-Istat Membru kkonċernat minnha, kif ukoll il-livell tar-riskju li din il-marda tkompli tinxtered. Jenħtieġ li d-durata tal-miżuri tkun tqis ukoll l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (WOAH, World Organisation for Animal Health). Fis-sitwazzjoni epidemjoloġika attwali, ir-riskju li l-marda tkompli tinxtered jikkonċerna biss liż-żoni ta’ protezzjoni u ta’ sorveljanza b’rabta mal-aktar tifqigħa reċenti fil-Kontea ta’ Timis. Għaldaqstant, ma għadx hemm il-ħtieġa ta’ żona ristretta ulterjuri madwar l-istess żona.

(9)

Sabiex jiġi evitat telf finanzjarju bla bżonn fis-settur tal-biedja, l-emendi li għandhom isiru fid-Deċiżjoni ta’ Implimentazzjoni (UE) 2024/2119 b’din id-Deċiżjoni jenħtieġ li jibdew japplikaw mill-aktar fis possibbli.

(10)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,