REGOLAMENT TA’ IMPLIMENTAZZJONI TAL-KUNSILL (UE) 2024/2896

tat-18 ta’ Novembru 2024

li jimplimenta r-Regolament (UE) 2023/1529 dwar miżuri restrittivi fid-dawl tal-appoġġ militari tal-Iran għall-gwerra ta’ aggressjoni tar-Russja kontra l-Ukrajna u lil gruppi armati u entitajiet fir-reġjun tal-Lvant Nofsani u tal-Baħar l-Aħmar

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament tal-Kunsill (UE) 2023/1529 tal-20 ta’ Lulju 2023 dwar miżuri restrittivi fid-dawl tal-appoġġ militari tal-Iran għall-gwerra ta’ aggressjoni tar-Russja kontra l-Ukrajna u lil gruppi armati u entitajiet fir-reġjun tal-Lvant Nofsani u tal-Baħar l-Aħmar (1), u b’mod partikolari l-Artikolu 7(1) tiegħu,

Wara li kkunsidra l-proposta tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,

Billi:

(1)	Fl-20 ta’ Lulju 2023, il-Kunsill adotta r-Regolament (UE) 2023/1529.

(2)

Fil-konklużjonijiet tiegħu tal-21 u t-22 ta’ Marzu 2024, il-Kunsill Ewropew iddikjara li kieku l-Iran kellu jittrasferixxi missili ballistiċi u teknoloġija relatata lir-Russja għall-użu kontra l-Ukrajna wara li jkun ipprovda lir-reġim Russu vetturi tal-ajru mingħajr ekwipaġġ (UAVs), li jintużaw f’attakki bla waqfien kontra l-popolazzjoni ċivili fl-Ukrajna, l-Unjoni tkun lesta tirrispondi malajr u f’koordinazzjoni mas-sħab internazzjonali, inkluż b’miżuri restrittivi ġodda u sinifikanti kontra l-Iran. Barra minn hekk, il-Kunsill Ewropew iddikjara li l-aċċess tar-Russja għal oġġetti u teknoloġiji sensittivi b’rilevanza għall-kampijiet tal-battalja jrid ikun ristrett kemm jista’ jkun, inkluż billi jiġu mmirati entitajiet f’pajjiżi terzi li jippermettu ċ-ċirkomvenzjoni tas-sanzjonijiet. Il-Kunsill Ewropew appella lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (ir-“Rappreżentant Għoli”) u lill-Kummissjoni biex iħejju aktar sanzjonijiet kontra l-Belarussja, il-Korea ta’ Fuq u l-Iran.

(3)

Fit-13 ta’ Settembru 2024, f’dikjarazzjoni mir-Rappreżentant Għoli f’isem l-Unjoni, l-Unjoni kkundannat bil-qawwa t-trasferiment reċenti ta’ missili ballistiċi magħmula fl-Iran lejn ir-Russja, meqjusa bħala theddida diretta għas-sigurtà Ewropea u bħala eskalazzjoni materjali sostantiva fir-rigward ta’ forniment ta’ UAVs u munizzjon Iranjani, li r-Russja kienet użat fil-gwerra illegali ta’ aggressjoni tagħha kontra l-Ukrajna. L-Unjoni lesta tirrispondi malajr u f’koordinazzjoni mas-sħab internazzjonali, inkluż b’miżuri restrittivi ġodda u sinifikanti kontra l-Iran, inkluż id-deżinjazzjoni ta’ individwi u entitajiet involuti fil-programmi ta’ missili ballistiċi u droni tal-Iran, u f’dak ir-rigward kienet qed tikkunsidra wkoll miżuri restrittivi fis-settur tal-avjazzjoni tal-Iran.

(4)

Ir-Russja qed tuża UAVs prodotti mill-Iran b’appoġġ għall-gwerra ta’ aggressjoni tagħha kontra l-Ukrajna, li tikser is-sovranità, l-indipendenza u l-integrità territorjali tal-Ukrajna, inkluż kontra l-persuni ċivili u l-infrastruttura ċivili. Il-programm Iranjan sponsorjat mill-Istat għall-iżvilupp u l-produzzjoni ta’ UAVs għalhekk jikkontribwixxi għall-ksur tal-Karta tan-Nazzjonijiet Uniti u tal-prinċipji fundamentali tad-dritt internazzjonali.

(5)

Il-programm tal-missili Iranjani, li huwa bbażat fuq kumpaniji tal-istat kif ukoll privati u jibbenefika minn kapaċitajiet ta’ riċerka domestiċi, huwa mmexxi mill-Ministeru għad-Difiża u l-Loġistika tal-Forzi Armati tal-Iran u l-Korp tal-Gwardjani tar-Rivoluzzjoni Iżlamika, li t-tnejn li huma huma soġġetti għal miżuri restrittivi tal-Unjoni.

(6)

It-trasferiment ta’ UAVs u missili magħmula fl-Iran u teknoloġiji relatati u komponenti tagħhom lejn ir-Russja u lil gruppi mhux statali armati fil-Lvant Nofsani u lil hinn huwa kwistjoni ċentrali ta’ tħassib. L-Iran ittrasferixxa UAVs u missili u teknoloġiji relatati magħmula fl-Iran u komponenti tagħhom lir-Russja, inkluż permezz ta’ bastimenti u portijiet.

(7)	Fid-dawl tal-gravità tas-sitwazzjoni, jenħtieġ li persuna waħda u erba’ entitajiet jiġu inklużi fil-lista ta’ persuni fiżiċi u ġuridiċi, entitajiet u korpi soġġetti għall-miżuri restrittivi li tinsab fl-Anness III tar-Regolament (UE) 2023/1529.

(8)	Għalhekk jenħtieġ li r-Regolament (UE) 2023/1529 jiġi emendat skont dan,

ADOTTA DAN IR-REGOLAMENT:

Artikolu 1

L-Anness III tar-Regolament (UE) 2023/1529 huwa emendat f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fid-data tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-18 ta’ Novembru 2024.

Għall-Kunsill

Il-President

J. BORRELL FONTELLES

(1) ĠU L 186, 25.7.2023, p. 1.

ANNESS

L-Anness III tar-Regolament (UE) 2023/1529 huwa emendat kif ġej:

(1)

l-entrata li ġejja tiżdied taħt l-intestatura “A. Persuni fiżiċi”:

Ismijiet (Trażlitterazzjoni bl-alfabett Latin)

Ismijiet

Informazzjoni għall-identifikazzjoni

Raġunijiet għall-elenkar

Data tal-elenkar

“20.

Mohammad Reza KHIABANI

محمدرضا مدرس خیابانی

(Ortografija Farsi)

Pożizzjoni(jiet): Direttur tal-IRISL

Nazzjonalità: Iranjana

Sess: Raġel

Entitajiet assoċjati: Islamic Republic of Iran Shipping Lines (IRISL)

Mohammad Reza Khiabani huwa d-direttur tal-Islamic Republic of Iran Shipping Lines (IRISL), li hija elenkata mill-UE u li hija t-trasportatur marittimu nazzjonali tal-Iran.

Il-bastimenti tal-IRISL ilhom involuti għal bosta snin fit-trasport marittimu ta’ merkanzija relatata mal-qasam militari. L-Islamic Revolutionary Guard Corps Navy (IRGCN) (il-Flotta Navali tal-Korp tal-Gwardjani tar-Rivoluzzjoni Iżlamika) tal-Iran, li hija elenkata mill-UE, tikkonverti bastimenti tal-kontejners li huma proprjetà ta’ IRISL Group fi trasportaturi tad-droni.

L-IRGCN hija parti mill-IRGC, u tinkludi diviżjoni ta’ inġenji tal-ajru mingħajr ekwipaġġ (UAV) u diviżjoni tal-missili. L-IRGCN hija involuta fil-programmi tal-UAVs u l-missili tal-Iran, kif ukoll fit-trasferiment tal-missili tal-Iran lil gruppi armati u entitajiet li jdgħajfu l-paċi u s-sigurtà fil-Lvant Nofsani u r-reġjun tal-Baħar l-Aħmar.

Għaldaqstant, fil-pożizzjoni tiegħu ta’ direttur tal-IRISL, Mohammad Reza Khiabani huwa assoċjat mal-IRGCN.

18.11.2024”

(2)

l-entrati li ġejjin jiżdiedu taħt l-intestatura “B. Persuni ġuridiċi, entitajiet u korpi”:

	Ismijiet (Trażlitterazzjoni bl-alfabett Latin)	Ismijiet	Informazzjoni għall-identifikazzjoni	Raġunijiet għall-elenkar	Data tal-elenkar
“17.	MG Flot LLC		Indirizz: Apartment 1, ul Lenina, Akhty, 18D, 368730, Russja Tip ta’ entità: kumpanija tat-tbaħħir Numru tar-reġistrazzjoni: IMO 6016988	MG Flot LLC hija kumpanija tat-tbaħħir Russa li l-bastimenti tagħha huma involuti fit-trasport marittimu ta’ prodotti Iranjani relatati mal-qasam militari, inkluż komponenti ta’ inġenji tal-ajru mingħajr ekwipaġġ (UAV), lejn ir-Russja. Il-bastimenti ta’ MG Flot LLC, inkluż il-bastiment tal-merkanzija Rasul Gamzatov (IMO: 8861058; MMSI: 273157300), ilhom jittrasportaw armi u munizzjon magħmula fl-Iran, inkluż komponenti tal-UAV, min-naħa għall-oħra tal-Baħar Kaspju għar-riforiment tat-truppi Russi li qed jiġġieldu fl-Ukrajna. Għalhekk, MG Flot LLC hija involuta fit-trasferiment tal-UAVs jew il-missili tal-Iran jew teknoloġiji relatati jew komponenti tagħhom lir-Russja b’appoġġ għall-gwerra ta’ aggressjoni tagħha kontra l-Ukrajna.	18.11.2024
18.	VTS Broker LLC		Indirizz: Office 19, ul Dzerzhinskogo, 72B, Astrakhan, 414015, Russja Tip ta’ entità: kumpanija tat-tbaħħir Numru tar-reġistrazzjoni: IMO 5122966	VTS Broker LLC hija kumpanija tat-tbaħħir Russa li l-bastimenti tagħha huma involuti fit-trasport marittimu ta’ prodotti Iranjani relatati mal-qasam militari, inkluż komponenti ta’ inġenji tal-ajru mingħajr ekwipaġġ (UAV), lejn ir-Russja. Il-bastimenti ta’ VTS Broker LLC, inkluż il-bastiment tal-merkanzija Musa Jalil (IMO: 8846814; MMSI: 273353660), ilhom jittrasportaw armi u munizzjon magħmula fl-Iran, inkluż komponenti tal-UAV, min-naħa għall-oħra tal-Baħar Kaspju għar-riforiment tat-truppi Russi li qed jiġġieldu fl-Ukrajna. Għalhekk, VTS Broker LLC hija involuta fit-trasferiment tal-UAVs jew il-missili tal-Iran jew teknoloġiji relatati jew komponenti tagħhom lir-Russja b’appoġġ għall-gwerra ta’ aggressjoni tagħha kontra l-Ukrajna.	18.11.2024
19.	Arapax LLC		Indirizz: Apartment 6, ul Savushkina, 2, Astrakhan, 414056, Russja Tip ta’ entità: kumpanija tat-tbaħħir Numru tar-reġistrazzjoni: IMO 6189893	Arapax LLC hija kumpanija tat-tbaħħir Russa li l-bastimenti tagħha huma involuti fit-trasport marittimu ta’ prodotti Iranjani relatati mal-qasam militari, inkluż komponenti ta’ inġenji tal-ajru mingħajr ekwipaġġ (UAV), lejn ir-Russja. Il-bastimenti ta’ Arapax LLC, inkluż il-bastiment tal-merkanzija Begey (IMO: 8943210; MMSI: 273421560), ilhom jittrasportaw armi u munizzjon magħmula fl-Iran, inkluż komponenti tal-UAV, min-naħa għall-oħra tal-Baħar Kaspju għar-riforiment tat-truppi Russi li qed jiġġieldu fl-Ukrajna. Għalhekk, Arapax LLC hija involuta fit-trasferiment tal-UAVs jew il-missili tal-Iran jew teknoloġiji relatati jew komponenti tagħhom lir-Russja b’appoġġ għall-gwerra ta’ aggressjoni tagħha kontra l-Ukrajna.	18.11.2024
20.	Islamic Republic of Iran Shipping Lines (IRISL)	گروه کشتیرانی جمهوری اسلامی ایران (Ortografija Farsi)	Post tar-reġistrazzjoni: Iran Individwi assoċjati: Mohammad Reza Khiabani (direttur) Entitajiet assoċjati: Islamic Revolutionary Guard Corps Navy (IRGCN) (Flotta Navali tal-Korp tal-Gwardjani tar-Rivoluzzjoni Iżlamika)	Islamic Republic of Iran Shipping Lines (IRISL) hija t-trasportatur marittimu nazzjonali tal-Iran. Il-bastimenti tagħha ilhom involuti għal bosta snin fit-trasport marittimu ta’ merkanzija relatata mal-qasam militari. L-Islamic Revolutionary Guard Corps Navy (IRGCN) (il-Flotta Navali tal-Korp tal-Gwardjani tar-Rivoluzzjoni Iżlamika) tal-Iran, li hija elenkata mill-UE, tikkonverti bastimenti tal-kontejners li huma proprjetà ta’ IRISL fi trasportaturi tad-droni. L-IRGCN hija parti mill-IRGC, u tinkludi diviżjoni ta’ inġenji tal-ajru mingħajr ekwipaġġ (UAV) u diviżjoni tal-missili. L-IRGCN hija involuta fil-programmi tal-UAVs u l-missili tal-Iran, kif ukoll fit-trasferiment tal-missili tal-Iran lil gruppi armati u entitajiet li jdgħajfu l-paċi u s-sigurtà fil-Lvant Nofsani u r-reġjun tal-Baħar l-Aħmar. Għalhekk, l-IRISL hija assoċjata mal-IRGCN li hija elenkata mill-UE.	18.11.2024.”