(1)

Ir-Regolament tal-Kummissjoni (KE) Nru 2073/2005 (2) jistipula l-kriterji mikrobijoloġiċi għal ċerti mikroorganiżmi u r-regoli ta’ implimentazzjoni li jridu jikkonformaw magħhom l-operaturi tan-negozji tal-ikel fir-rigward tar-rekwiżiti ġenerali u speċifiċi tal-iġjene msemmija fl-Artikolu 4 tar-Regolament (KE) Nru 852/2004.

(2)

B’mod partikolari, ir-Regolament (KE) Nru 2073/2005 jistabbilixxi l-kriterji tas-sikurezza tal-ikel li jiddefinixxu l-aċċettabbiltà ta’ prodott jew ta’ lott ta’ oġġetti tal-ikel, li japplikaw għall-prodotti mqiegħda fis-suq. Dak ir-Regolament jipprevedi l-kriterji tas-sikurezza tal-ikel għal Listeria monocytogenes, li hija patoġenu ewlieni li jinġarr mill-ikel u li jippreżenta riskju serju għas-saħħa pubblika minħabba r-rata għolja ta’ fatalitajiet tiegħu. Fl-aħħar rapport tagħha dwar iż-żoonożi (3), l-Awtorità Ewropea dwar is-Sigurtà fl-Ikel (“l-Awtorità”) osservat li fl-2022 l-għadd ta’ każijiet ta’ listerjożi fil-bnedmin fl-Unjoni kien 15,9 % ogħla milli kien fl-2021 u li fl-2022 l-għadd ta’ mwiet minn tifqigħat li jinġarru mill-ikel u kkawżati minn Listeria monocytogenes fl-Unjoni kien wieħed mill-ogħla numri li qatt ġew irrappurtati lill-Awtorità f’dawn l-aħħar għaxar snin. Fid-dawl ta’ din iż-żieda fil-każijiet tal-listerjożi fl-Unjoni, huwa kruċjali li l-kriterji tas-sikurezza tal-ikel għal Listeria monocytogenes jistgħu joffru livell għoli u konsistenti ta’ protezzjoni tal-konsumaturi tul il-katina alimentari kollha.

(3)

Ir-riskju li l-listerjożi tittieħed mill-ikel jiddependi kemm mis-suxxettibbiltà individwali tal-konsumatur kif ukoll minn kemm l-ikel ikkontaminat isostni t-tkabbir ta’ Listeria monocytogenes sa livelli għoljin. It-trabi u l-konsumaturi bid-difiżi immunitarji dgħajfa minħabba mard, disturbi jew kundizzjonijiet mediċi huma suxxettibbli ħafna għal Listeria monocytogenes u ma jistgħux jiġu esposti għal ikel li fih dan il-patoġenu fi kwalunkwe konċentrazzjoni. Għal konsumaturi oħra, huwa xjentifikament rikonoxxut li hija potenzjalment ta’ ħsara għas-saħħa biss l-inġestjoni ta’ ikel li jkun fih konċentrazzjoni ta’ Listeria monocytogenes li taqbeż il-limitu ta’ 100 cfu/g. Għalhekk, ikel lest biex jittiekel, għajr dak maħsub għat-trabi u għal skopijiet mediċi speċjali, li jista’ jsostni t-tkabbir ta’ Listeria monocytogenes lil hinn mil-limitu ta’ 100 cfu/g matul il-ħajja tal-ħżin tiegħu, jirrappreżenta grupp sensittiv ta’ prodotti tal-ikel li fuqu jenħtieġ jiġu ffukati l-miżuri ta’ mitigazzjoni tar-riskju.

(4)

Skont ir-Regolament (KE) Nru 2073/2005, ma għandhiex tiġi individwata l-preżenza ta’ Listeria monocytogenes f’25 g ta’ ikel lest biex jittiekel li jkun kapaċi jsostni t-tkabbir ta’ Listeria monocytogenes, għajr dak maħsub għat-trabi u għal skopijiet mediċi speċjali, qabel ma jkunu telqu mill-kontroll immedjat tal-operatur ta’ negozju tal-ikel meta dak l-operatur ta’ negozju tal-ikel ma jkunx jista’ juri, għas-sodisfazzjoni tal-awtorità kompetenti, li l-livell ta’ Listeria monocytogenes mhuwiex se jaqbeż il-limitu ta’ 100 CFU/g tul il-ħajja tal-ħżin tal-oġġetti tal-ikel ikkonċernati. Madankollu, ir-Regolament (KE) Nru 2073/2005 ma jipprevedix kriterju li japplika għal dawk l-oġġetti tal-ikel ladarba jkunu telqu mill-kontroll immedjat tal-operatur tan-negozju tal-ikel li jkun qed jipproduċihom, filwaqt li għadu mhux possibbli li jiġi żgurat li l-limitu ta’ 100 cfu/g ma jinqabiżx matul il-ħajja tal-ħżin tagħhom.

(5)

Sabiex jiġi ggarantit l-istess livell ta’ protezzjoni tas-saħħa pubblika mill-produzzjoni sad-distribuzzjoni għal ikel lest biex jittiekel għajr dak maħsub għat-trabi u għal skopijiet mediċi speċjali li jistgħu jsostnu t-tkabbir ta’ Listeria monocytogenes, il-kriterju tas-sikurezza tal-ikel “Listeria monocytogenes mhux individwat f’25 g” jenħtieġ li japplika għas-sitwazzjonijiet kollha fejn dawk l-oġġetti tal-ikel jitqiegħdu fis-suq matul il-ħajja tal-ħżin tagħhom u li għalihom l-operatur tan-negozju tal-ikel li jipproduċihom ma setax juri, għas-sodisfazzjon tal-awtorità kompetenti, li l-livell ta’ Listeria monocytogenes mhux se jaqbeż il-limitu ta’ 100 cfu/g matul il-ħajja tal-ħżin tagħhom.

(6)

Sabiex l-operaturi tan-negozji tal-ikel ikollhom biżżejjed żmien biex jadattaw il-prattiki u l-proċeduri tagħhom għar-rekwiżit il-ġdid, jenħtieġ li dan ir-Regolament japplika qabel l-1 ta’ Lulju 2026.

(7)

Għaldaqstant, ir-Regolament (KE) Nru 2073/2005 jenħtieġ li jiġi emendat skont dan.

(8)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,