(1)

Fil-5 ta’ Marzu 2021, il-Kummissjoni rċeviet applikazzjoni mill-Institut Technique de l’Agriculture Biologique (“l-applikant”) għall-approvazzjoni tal-estratt tal-Allium fistulosum bħala sustanza bażika biex tintuża fil-protezzjoni tal-pjanti bħala batteriċida għat-trattament tal-ħamrija qabel iż-żrigħ tat-tadam fl-għalqa u fis-serer permanenti. L-applikazzjoni riveduta ġiet sottomessa f’Ġunju 2021, u kienet akkumpanjata mill-informazzjoni meħtieġa skont l-Artikolu 23(3), it-tieni subparagrafu tar-Regolament (KE) Nru 1107/2009.

(2)

Il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) għall-assistenza xjentifika skont l-Artikolu 23(4) tar-Regolament (KE) Nru 1107/2009. Fil-31 ta’ Ottubru 2023, l-Awtorità ipprovdiet rapport tekniku dwar l-Allium fistulosum (2) lill-Kummissjoni.

(3)

L-applikazzjoni saret għall-“estratt tal-Allium fistulosum”. Madankollu, id-dokumentazzjoni pprovduta mill-applikant turi li l-pjanta Allium fistulosum tista’ tintuża f’żewġ formulazzjonijiet differenti: bħala estratt tal-ilma jew fil-forma ta’ biċċiet mqattgħin friski tal-pjanta. Għalhekk tqies xieraq li ż-żewġ metodi ta’ pproċessar jiġu inklużi f’isem is-sustanza bażika u li jiġi ddefinit il-kamp ta’ applikazzjoni bħala li jkopri l-“Allium fistulosum, ipproċessata”.

(4)

L-informazzjoni mogħtija mill-applikant turi li s-sustanza Allium fistulosum tissodisfa l-kriterji ta’ oġġett tal-ikel kif iddefinit fl-Artikolu 2 tar-Regolament (KE) Nru 178/2002 tal-Parlament Ewropew u tal-Kunsill (3). Barra minn hekk, ma jintużax b’mod predominanti għal skopijiet ta’ protezzjoni tal-pjanti iżda madankollu l-Allium fistulosum, ipproċessata, hija utli għall-finijiet tal-protezzjoni tal-pjanti meta tkun tinsab fi prodott li jikkonsisti jew mis-sustanza nnifisha għas-sustanza u minn dilwent sempliċi. B’hekk, irid jitqies bħala sustanza bażika.

(5)

Abbażi tal-informazzjoni pprovduta fl-applikazzjoni u fir-rapport tekniku mill-Awtorità, jista’ jiġi konkluż ukoll li l-Allium fistulosum, ipproċessata, mhijiex sustanza ta’ tħassib, u ma għandhiex kapaċità inerenti li tikkawża effetti li jfixklu s-sistema endokrinali, newrotossiċi jew immunotossiċi. Barra minn hekk, u ma titqiegħedx fis-suq bħala prodott għall-protezzjoni tal-pjanti. Konsegwentement, l-Allium fistulosum, ipproċessata, tissodisfa l-kundizzjonijiet stabbiliti fl-Artikolu 23(1), it-tieni subparagrafu, tar-Regolament (KE) Nru 1107/2009.

(6)

Wara li ġew eżaminati l-applikazzjoni u d-dokumenti relatati kollha, ġie stabbilit li l-Allium fistulosum, ipproċessata, tissodisfa, b’mod ġenerali, ir-rekwiżiti stabbiliti fl-Artikolu 23 tar-Regolament (KE) Nru 1107/2009, b’mod partikolari fir-rigward tal-użi li ġew eżaminati u spjegati fir-rapport ta’ rieżami tal-Kummissjoni. Għaldaqstant jixraq li l-Allium fistulosum, ipproċessata, tkun approvata bħala sustanza bażika.

(7)

F’konformità mal-Artikolu 23(5) tar-Regolament (KE) Nru 1107/2009, moqri flimkien mal-Artikolu 6 tiegħu, u fid-dawl tal-għarfien xjentifiku u tekniku attwali, jeħtieġ madankollu li jiddaħħlu ċerti kundizzjonijiet għall-approvazzjoni, kif stabbiliti fl-Anness I ta’ dan ir-Regolament.

(8)

Fit-23 ta’ Mejju 2024 u fil-11 ta’ Lulju 2024 rispettivament, il-Kummissjoni ppreżentat ir-rapport ta’ rieżami (4) u abbozz ta’ dan ir-Regolament lill-Kumitat Permanenti dwar il-Pjanti, l-Annimali, l-Ikel u l-Għalf.

(9)

F’konformità mal-Artikolu 23(5) tar-Regolament (KE) Nru 1107/2009, moqri flimkien mal-Artikolu 13(4) tiegħu, jenħtieġ li l-Anness tar-Regolament ta’ Implimentazzjoni tal-Kummissjoni (UE) Nru 540/2011 (5) jiġi emendat skont dan.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,